European Economic
and Social Committee
L-Ewropa
Fl-Ewropa, il-KESE għandu relazzjonijiet mal-imsieħba soċjali u l-organizzazzjonijiet tas-soċjetà ċivili fil-Balkani tal-Punent, il-Viċinat tal-Lvant, l-Istati taż-ŻEE-EFTA tal-Iżlanda, il-Liechtenstein u n-Norveġja, u r-Renju Unit.
Il-Kumitat taʼ Segwitu Balkani tal-Punent – korp intern permanenti tal-KESE – huwa l-istrument ewlieni għall-koordinazzjoni tal-attivitajiet tal-KESE fʼdan ir-reġjun. Il-Forum tas-Soċjetà Ċivili tal-Balkani tal-Punent, li jiġi organizzat kull sentejn, huwa parti mill-ħidma tal-Kumitat taʼ Segwitu.
Il-KESE jaħdem ukoll bʼmod bilaterali mal-pajjiżi fil-Balkani tal-Punent li bdew in-negozjati tal-adeżjoni u mat-Turkija, permezz taʼ korpi speċjalizzati stabbiliti abbażi tal-ftehimiet taʼ assoċjazzjoni bejn dawn il-pajjiżi u l-UE: l-għan taʼ dawn il-Kumitati Konsultattivi Konġunti huwa li jinvolvu lill-imsieħba soċjali u lill-organizzazzjonijiet tas-soċjetà ċivili fil-monitoraġġ tal-proċessi taʼ qabel l-adeżjoni u taʼ riforma għal sħubija possibbli fl-UE. Kull korp huwa magħmul minn għadd ugwali taʼ membri mill-KESE u mill-pajjiż imsieħeb, u normalment jiltaqaʼ darba jew darbtejn fis-sena.
Il-KESE waqqaf ukoll il-Kumitat taʼ Segwitu Ġirien tal-Lvant, li huwa korp intern responsabbli għat-titjib tar-relazzjonijiet mas-soċjetà ċivili fil-pajjiżi tar-reġjun, jiġifieri l-Armenja, l-Ażerbajġan, il-Belarussja, il-Georgia, il-Moldova, u l-Ukrajna.
Il-mekkaniżmi ewlenin taʼ kooperazzjoni mal-Armenja, il-Georgia, il-Moldova, u l-Ukrajna huma l-Pjattaformi tas-Soċjetà Ċivili li jippermettu lill-organizzazzjonijiet tas-soċjetà ċivili kemm mill-UE kif ukoll mill-pajjiżi msieħba jimmonitorjaw l-implimentazzjoni tal-ftehimiet tal-UE maʼ dawn il-pajjiżi u jabbozzaw rakkomandazzjonijiet għall-awtoritajiet rilevanti. Barra minn hekk, l-Ukrajna u l-Moldova saru pajjiżi kandidati fl-2022.
Fir-rigward tal-Belarussja u r-Russja, qed jiġu żviluppati relazzjonijiet mal-organizzazzjonijiet tas-soċjetà ċivili li għadhom jaħdmu bʼmod liberu u li fil-biċċa l-kbira jinsabu fit-territorju tal-UE. Il-KESE jqis li huwa importanti li d-djalogu jinżamm ħaj sakemm ikun hemm kundizzjonijiet aħjar fil-futur.
Iż-Żona Ekonomika Ewropea (ŻEE) tlaqqaʼ flimkien l-Istati Membri tal-UE u t-tliet Stati taż-ŻEE-EFTA (l-Iżlanda, il-Liechtenstein u n-Norveġja) fʼsuq intern li jippermetti l-moviment liberu tal-prodotti, is-servizzi, il-kapital u l-persuni. Il-KESE jagħmel parti mill-Kumitat Konsultattiv taż-Żona Ekonomika Ewropea, li fi ħdanu jiġu diskussi kwistjonijiet taʼ interess komuni mar-rappreżentanti tal-imsieħba soċjali mill-Istati taż-ŻEE-EFTA.
Fl-aħħar, il-KESE għandu Kumitat taʼ Segwitu UE-Renju Unit responsabbli għall-monitoraġġ tar-relazzjoni bejn l-UE u r-Renju Unit tal-Gran Brittanja u tal-Irlanda taʼ Fuq mill-perspettiva tas-soċjetà ċivili. Il-ħidma tiegħu hija partikolarment iffokata fuq l-implimentazzjoni tal-Ftehim dwar il-ħruġ tar-Renju Unit mill-Unjoni Ewropea u l-Protokoll dwar l-Irlanda/l-Irlanda taʼ Fuq, li dwarhom għaddejja konverżazzjoni mal-organizzazzjonijiet tas-soċjetà ċivili tar-Renju Unit. Il-ħidma tal-Kumitat taʼ Segwitu tiffoka wkoll fuq l-implimentazzjoni tal-Ftehim dwar il-Kummerċ u l-Kooperazzjoni bejn l-UE u r-Renju Unit, li dwaru l-Kumitat taʼ Segwitu UE-Renju Unit jikkoopera mal-Grupp Konsultattiv Domestiku tal-UE bʼrabta mal-Ftehim dwar il-Kummerċ u l-Kooperazzjoni bejn l-UE u r-Renju Unit.