Il-Gruppi Konsultattivi Domestiċi u Konġunti kollha

Il-Gruppi Konsultattivi Domestiċi huma korpi tas-soċjetà ċivili li jipprovdu konsulenza dwar l-implimentazzjoni taʼ ftehimiet kummerċjali. Ġew stabbiliti għall-ewwel darba fi ħdan il-Ftehim taʼ Kummerċ Ħieles bejn l-UE u l-Korea tal-2011. Minn dakinhar ʼil hawn, kull ftehim taʼ kummerċ ħieles iffirmat mill-UE maʼ pajjiż imsieħeb jew grupp taʼ pajjiżi jistabbilixxi Grupp Konsultattiv Domestiku tal-UE u Grupp Konsultattiv Domestiku għall-kontroparti tal-ftehim.

Il-Gruppi Konsultattivi Domestiċi mhumiex korpi bilaterali: il-Grupp Konsultattiv Domestiku tal-UE jingħata l-kompitu li joffri konsulenza lid-DĠ Kummerċ tal-Kummissjoni, waqt li l-Grupp Konsultattiv Domestiku għall-kontroparti għandu r-responsabbiltà ta’ konsulenza lill-gvern nazzjonali tiegħu. Madankollu, il-Gruppi Konsultattivi Domestiċi taż-żewġ naħat jistgħu jorganizzaw laqgħat bejn il-Gruppi Konsultattivi Domestiċi qabel il-laqgħa annwali tal-Forum tas-Soċjetà Ċivili, li tiġi organizzata mill-Partijiet fil-qafas taʼ ftehim taʼ kummerċ ħieles partikolari.

Il-Gruppi Konsultattivi Domestiċi huma prinċipalment attivi fil-qasam tal-Kummerċ u l-Iżvilupp Sostenibbli (TSD): il-ftehimiet ta’ kummerċ ħieles iffirmati mill-UE għandhom kapitolu speċifiku dwar il-kummerċ u l-iżvilupp sostenibbli, u l-imsieħba soċjali u l-organizzazzjonijiet tas-soċjetà ċivili rappreżentati fil-Gruppi Konsultattivi Domestiċi jsemmgħu l-opinjoni tagħhom dwar l-effetti tal-ftehimiet ta’ kummerċ ħieles fuq is-soċjetà, l-ekonomija, l-ambjent, kif ukoll id-drittijiet tal-ħaddiema u tal-bniedem fl-UE u fil-pajjiż jew pajjiżi msieħba.

Il-kompożizzjoni tal-Gruppi Konsultattivi Domestiċi tiżgura rappreżentanza bbilanċjata minn tliet gruppi ewlenin: l-impjegaturi, il-ħaddiema, u t-tielet settur/NGOs. Għall-Gruppi Konsultattivi Domestiċi tal-UE, il-KESE jipprovdi tliet membri (wieħed għal kull grupp), ħlief għad-DAG tal-UE għar-Renju Unit, fejn hemm sitt membri tal-KESE. Il-KESE jipprovdi wkoll is-servizzi tas-segretarjat għall-Gruppi Konsultattivi Domestiċi kollha.

Wara l-Ftehim dwar il-Kummerċ u l-Kooperazzjoni bejn l-UE u r-Renju Unit tal-Gran Brittanja u l-Irlanda ta’ Fuq, li daħal fis-seħħ fl-2021, twaqqaf Grupp Konsultattiv Domestiku tal-UE fil-qafas tal-Ftehim dwar il-Kummerċ u l-Kooperazzjoni bejn l-UE u r-Renju Unit, bl-inkarigu li joffri konsulenza lill-Kummissjoni dwar il-Ftehim kollu.

Fl-2025, ġew stabbiliti żewġ Gruppi Konsultattivi Domestiċi ġodda tal-UE, wieħed għall-Kenja u wieħed għan-New Zealand, li jkopru wkoll il-ftehimiet kollha. Il-Grupp Konsultattiv Domestiku tal-UE għaċ-Ċilì ġie stabbilit f’Marzu 2026.

Għalhekk bħalissa hemm 15-il Grupp Konsultattiv Domestiku. Tista’ ssib aktar informazzjoni fil-paġna speċifika għal kull DAG.