D’iarr Coiste Eacnamaíoch agus Sóisialta na hEorpa (CESE) ar an Aontas Eorpach agus ar na Ballstáit tacaíocht chórasach, mhachnamhach a thairiscint don obair dheonach. Tríd an méid sin a dhéanamh, thabharfadh sé aitheantas don tionchar ollmhór atá ag an obair dheonach ar fhorbairt shóisialta na hEorpa agus don ról ríthábhachtach atá aici i gcur chun feidhme Spriocanna Forbartha Inbhuanaithe na Náisiún Aontaithe agus i gcothú an chuimsithe shóisialta.

Sa tuairim féintionscnaimh uaidh faoi obair dheonach, mhol CESE go n-ainmneoidh an tAontas 2025 mar Bhliain Eorpach na nOibrithe Deonacha, go leathnódh sé scéimeanna deonacha an Aontais agus go gcuirfeadh sé maoiniú ar fáil do dhaoine scothaosta agus go bhforbródh sé modh uile-Aontais chun sonraí saorálaíochta a bhailiú a d’fhéadfadh tíortha agus eagraíochtaí a roinnt.

Dúirt Krzsysztof Pater, rapóirtéir na tuairime: “Ní hiad cinnteoirí, polaiteoirí nó eagraíochtaí na sochaí sibhialta a thógfaidh todhchaí na hEorpa, ach na saoránaigh ghníomhacha agus na hoibrithe dheonacha – daoine a chaitheann a gcuid ama saor ar mhaithe leis an tsochaí.

San Eoraip, déanann duine as gach cúigear obair dheonach gach bliain. Léiríodh le suirbhé a rinneadh le déanaí go raibh 25 % d’Eorpaigh óga páirteach i ngníomhaíocht eagraithe saorálaíochta gach bliain. Gach lá, caitheann oibrithe dheonacha ó gach aois ghrúpa agus ó gach cúlra a gcuid ama ar ghníomhaíochtaí ar mhaithe le daoine eile agus leis an gcomhshaol, rud a neartaíonn an tsochaí agus a fhorbraíonn todhchaí inbhuanaithe.

“Tá gá le tacaíocht chórasach iomlán ag leibhéal an Aontais agus ag leibhéal náisiúnta ós rud é go mbíonn tionchar na tacaíochta sin i bhfad níos mó ná an costas a d’fhéadfadh a bheith ag baint léi,” a dúirt an tUasal Pater. De réir na mionsonraí atá ar fáil, tá fíorluach eacnamaíoch ag baint le gníomhaíocht na n-oibrithe deonacha a ghineann níos mó ná 2 % de OTI i roinnt mhaith tíortha.

Ó bhí Bliain Eorpach na hOibre Deonaí ann in 2011, thosaigh an obair dheonach ag imeacht de réir a chéile den chlár oibre Eorpach. Níor luadh an obair dheonach ach ó am go chéile: Is é an tAontas a chruthaigh an Cór Saorálach Eorpach agus an Cór Dlúthpháirtíochta Eorpach, agus a rinne ábhar tosaíochta den obair dheonach sa Chlár um an Eoraip ar son na Saoránach.

De réir CESE, tá aitheantas níos leithne tuillte ag cúnamh na n-oibrithe deonacha, agus ag an tsláinte agus ag an gceangal a mbraitheann siad mar chúiteamh leis. (ll)