Kontributi tas-Sezzjonijiet

Is-Sezzjoni ECO twissi li l-impatti fuq l-Istati Membri tal-UE se jkunu asimmetriċi u għalhekk titlob solidarjetà u rispons Ewropew komuni biex jittaffew it-tbatija ekonomika u soċjali u tiġi żgurata l-ġustizzja għaċ-ċittadini u l-kumpaniji Ewropej.
Għalkemm huwa diffiċli li wieħed jagħti stima tal-firxa sħiħa tal-konsegwenzi tal-gwerra fl-Ukrajna u s-sanzjonijiet introdotti bħala reazzjoni għall-aggressjoni Russa, is-sistema ekonomika u finanzjarja Ewropea mhux se taħrab l-effetti ta’ dawn l-iżviluppi. Barra minn hekk, peress li l-impatti fuq l-Istati Membri tal-UE se jkunu asimmetriċi, is-solidarjetà u rispons Ewropew komuni biex jittaffew it-tbatija ekonomika u soċjali se jkunu kruċjali. It-tqegħid tal-ekonomija Ewropea fit-triq tat-tkabbir, l-impjiegi, il-koeżjoni u l-konverġenza sostnuta, u l-kisba ta’ prosperità u ġustizzja għaċ-ċittadini u l-kumpaniji Ewropej għandhom jibqgħu l-ogħla prijorità tal-politika ekonomika tal-UE matul il-ftit snin li ġejjin.

Is-Sezzjoni INT tqis li l-kriżi tal-Ukrajna tenfasizza l-ħtieġa li jingħelbu ċerti ostakli u li jissaħħu s-suq intern u l-funzjonament tiegħu.

Is-Sezzjoni INT tqis li l-kriżi tal-Ukrajna tenfasizza l-ħtieġa li jingħelbu ċerti ostakli u li jissaħħu s-suq intern u l-funzjonament tiegħu. Jeħtieġ li naċċelleraw l-iżvilupp ta’ awtonomija strateġika għall-Ewropa. Jeħtieġ li l-Ewropa tikkonferma l-unità u d-determinazzjoni tagħha u ssir setgħa aktar indipendenti u sovrana f’termini ekonomiċi u tal-enerġija. F’dan il-kuntest, jeħtieġ li nfittxu swieq ġodda tal-provvista sabiex inkunu indipendenti mir-Russja, miċ-Ċina u mill-Istati Uniti. Jeħtieġ ukoll li niddiversifikaw is-sorsi tal-enerġija użati mill-Istati Membri.

Is-Sezzjoni INT tinsisti fuq il-fatt li jeħtieġ li nikkumpensaw it-telf li ġarrbu l-intrapriżi Ewropej minħabba s-sanzjonijiet. Jeħtieġ li nipproteġu l-intrapriżi tagħna: il-biċċa l-kbira tal-intrapriżi intlaqtu ħażin ħafna mill-pandemija meta wieħed iqis id-dħul dejjem anqas, it-telf ta’ fluss ta’ flus u ż-żieda fid-dejn u issa qed jiffaċċjaw problemi tal-provvista minħabba l-gwerra u s-sanzjonijiet.

Jeħtieġ ukoll li nżommu l-impjiegi u niffaċilitaw l-integrazzjoni tar-refuġjati fis-suq tax-xogħol. F’dan ir-rigward, l-ekonomija soċjali għandha potenzjal kbir u tista’ tgħin fl-integrazzjoni tar-refuġjati peress li dan il-mudell ekonomiku wera li huwa reżiljenti ħafna fi żminijiet ta’ kriżi u huwa magħruf għall-ħolqien ta’ impjiegi ta’ kwalità bl-objettiv li ħadd ma jitħalla jibqa’ lura.

Is-Sezzjoni TEN tħeġġeġ biex jitwettqu l-azzjonijiet diplomatiċi u umanitarji kollha li jistgħu jappoġġjaw lill-poplu Ukren fiż-żamma tal-aċċess għal servizzi essenzjali, inklużi l-ilma u l-elettriku. Is-Sezzjoni tesprimi tħassib dwar is-sikurezza nukleari, tiġbed l-attenzjoni għas-sitwazzjoni ta’ emerġenza ta’ partijiet sinifikanti tas-settur tat-trasport u tappella għal pjan vijabbli biex jiġu ddiversifikati s-sorsi tal-enerġija u jiġu żgurati s-sigurtà u s-sostenibbiltà tal-provvista tal-enerġija fl-UE.

Fl-10 ta’ Marzu 2022, is-Sezzjoni TEN organizzat dibattitu dwar il-gwerra fl-Ukrajna u l-implikazzjonijiet tagħha fuq il-ħidma tas-Sezzjoni TEN. Fid-dibattitu ħadu sehem żewġ kelliema:

•    Dr Zsolt Hetesi, Riċerkatur Prinċipali, Università Nazzjonali tal-Amministrazzjoni Pubblika tal-Ungerija u espert dwar kwistjonijiet tal-enerġija, ta preżentazzjoni dwar l-implikazzjonijiet tal-gwerra tal-Ukrajna fil-qasam tas-sigurtà tal-enerġija u l-prezzijiet tal-enerġija.
•    Is-Sur Serhii Prokopenko, Speċjalist fil-qasam  tal-Innovazzjoni u l-Intraprenditorija taż-Żgħażagħ fl-Ukrajna, konsulent, riċerkatur dwar l-ekonomija ġdida fir-reġjun ta’ Kharkhiv, l-Ukrajna, kien qed jara s-sitwazzjoni drammatika fil-pajjiż u ta xhieda tal-attakki li l-belt kienet qed issofri.

Id-dibattitu tas-Sezzjoni TEN enfasizza l-elementi ewlenin li ġejjin:

Is-Sezzjoni TEN tħeġġeġ biex jitwettqu l-azzjonijiet diplomatiċi u umanitarji kollha li jistgħu jappoġġjaw lill-poplu Ukren fiż-żamma tal-aċċess għal servizzi essenzjali, inklużi b’mod partikolari l-ilma u l-elettriku. Ir-refuġjati li qed jaħarbu lejn l-Ewropa jeħtieġ li jiġu appoġġjati b’mod adatt u għandhom jiġu adottati l-miżuri kollha meħtieġa bil-ħsieb li jiġu ggarantiti akkomodazzjoni u infrastrutturi adegwati għar-refuġjati fil-pajjiżi ospitanti.

L-okkupazzjoni tal-impjanti tal-enerġija nukleari qed tqajjem tħassib dwar is-sikurezza nukleari għall-popolazzjoni lokali u għall-Ewropa kollha kemm hi. Is-Sezzjoni TEN tappella għal kooperazzjoni sħiħa mal-atturi kollha involuti u mal-Aġenzija Internazzjonali tal-Enerġija Atomika biex tiġi mmonitorjata s-sitwazzjoni u jiġi evitat kwalunkwe ħruġ possibbli ta’ radjuattività.

Is-sitwazzjoni fl-Ukrajna qed ikollha impatt fuq il-kriżi tal-enerġija diġà urġenti. Biex jingħelbu l-impatti negattivi ta’ din il-kriżi fuq l-ekonomiji tal-Istati Membri, jeħtieġ li jittieħdu passi konkreti biex isir progress fir-rigward tal-awtonomija strateġika li tnaqqas id-dipendenza enerġetika. Għalhekk, is-Sezzjoni TEN titlob li jiġi stabbilit pjan vijabbli għad-diversifikazzjoni tas-sorsi tal-enerġija fi ħdan it-taħlita tal-enerġija tal-Istati Membri.

Is-sigurtà u s-sostenibbiltà tal-provvista tal-enerġija jistgħu jinkisbu bis-sħiħ fuq medda twila ta’ żmien biss billi tingħata spinta lill-użu ta’ sorsi tal-enerġija b’livell baxx ta’ emissjonijiet ta’ karbonju jew ħielsa mill-karbonju. Sabiex jiġi żgurat futur reżiljenti u sostenibbli tas-sistema tal-enerġija tal-UE, is-Sezzjoni TEN tirrakkomanda li jitħaffu l-investimenti fir-riċerka biex jiġu żviluppati teknoloġiji nodfa ġodda.

Is-Sezzjoni TEN hija mħassba dwar is-sitwazzjoni ta’ emerġenza ta’ partijiet sinifikanti tas-settur tat-trasport minħabba l-ispejjeż estremament għoljin tal-fjuwil u tal-elettriku kkawżati minn livelli għoljin tal-prezzijiet li diġà kienu għaljin qabel il-bidu tal-gwerra fl-Ukrajna u laħqu livelli bla preċedent hekk kif faqqgħet din il-gwerra. Dan wassal għal sitwazzjoni fejn ħafna kumpaniji jinsabu f’riskju ta’ falliment.

Is-Sezzjoni TEN għalhekk titlob lill-Kummissjoni tagħti l-attenzjoni dovuta lill-kriżi urġenti tas-settur tat-trasport fil-ħolqien tal-Qafas Temporanju tal-Kriżijiet imsemmi fil-Komunikazzjoni dwar REPowerEU: Azzjoni Ewropea Konġunta għal enerġija aktar affordabbli, sikura u sostenibbli

Is-Sezzjoni SOC twiegħed appoġġ fit-tul u sħiħ għar-refuġjati Ukreni u tesprimi apprezzament għas-solidarjetà murija mill-organizzazzjonijiet tas-soċjetà ċivili u l-azzjonijiet kontinwi tagħhom sa mill-bidu tal-aggressjoni Russa.

Hija tinsisti li r-refuġjati kollha li qed jaħarbu mill-gwerra fl-Ukrajna, irrispettivament min-nazzjonalità tagħhom, iridu jirċievu protezzjoni u aċċess għal infrastruttura adegwata u li l-ħtiġijiet tal-gruppi vulnerabbli, speċjalment in-nisa, it-tfal, l-anzjani u l-persuni b’diżabilità, għandhom jiġu indirizzati b’mod adegwat. F’ħafna pajjiżi s-soċjetà ċivili mmobilizzat mil-lum għall-għada u qed tikkoopera mal-awtoritajiet biex tipprovdi għajnuna lill-Ukreni li ħarbu mill-gwerra.

L-UE trid tipprovdi appoġġ finanzjarju kemm lill-pajjiżi ġirien tal-Ukrajna biex tgħinhom ilaħħqu mal-flussi bla preċedent ta’ refuġjati, kif ukoll lis-soċjetà ċivili biex tiżgura li din tkun tista’ taqdi r-rwol vitali tagħha bħala fornitur ta’ għajnuna umanitarja u miżuri ta’ integrazzjoni.

Is-Sezzjoni NAT dwar il-gwerra fl-Ukrajna u l-ħtieġa li tingħata assistenza umanitarja, ekonomika, teknika u ambjentali.

Assistenza lill-Ukrajna (ekonomika, teknika, umanitarja, enerġetika, relatata mas-sigurtà, eċċ…)

• Jeħtieġ li l-gvernijiet jagħmlu dak kollu li jistgħu biex jiżguraw il-provvista tal-ikel u s-sikurezza tal-ikel lill-popolazzjoni Ukrena, billi jipprovdu ikel u ilma nadif fiż-żoni ta’ gwerra u jżidu l-protezzjonijiet soċjali biex jiżolaw lin-nies vulnerabbli mill-prezzijiet tal-ikel li qed jogħlew.
• Il-KESE jilqa’ l-fatt li l-UE diġà attivat il-Mekkaniżmu tal-UE għall-Protezzjoni Ċivili u ħolqot ċentri loġistiċi fil-pajjiżi ġirien biex l-għajnuna tintbagħat lill-Ukrajna.
• L-organizzazzjonijiet tas-soċjetà ċivili, inklużi l-assoċjazzjonijiet tal-bdiewa, fl-Ewropa kollha qed jimmobilizzaw ruħhom ukoll biex jipprovdu donazzjonijiet tal-ikel lill-popolazzjoni tal-Ukrajna. Il-banek tal-ikel qed jaqdu rwol importanti f’dan il-kuntest.

Konsegwenzi possibbli fuq l-UE tal-gwerra u tal-miżuri imposti mill-UE f’dawn iż-żoni

• L-Aġenda 2030 tan-NU dwar l-iżvilupp sostenibbli hija l-ewwel u qabel kollox aġenda ta’ paċi u sigurtà. L-indirizzar tal-impatti tal-gwerra m’għandux ikun għad-detriment tal-azzjoni klimatika u s-sostenibbiltà. Jeħtieġ li nimxu lejn l-implimentazzjoni tiegħu b’Patt Ekoloġiku Ewropew ambizzjuż, speċjalment wara l-aħħar twissijiet li saru fir-rapport tal-IPCC dwar il-konsegwenzi gravi tal-emerġenza klimatika. Ma nistgħux nipposponu l-passi meħtieġa biex inkunu sostenibbli u newtrali għall-klima; jistgħu jingħataw biss derogi eċċezzjonali għal żmien limitat.
• L-UE tiddependi ħafna miż-żewġ pajjiżi li jinsabu fi gwerra għall-importazzjoni ta’ ċereali u fertilizzanti u hija esportatur ewlieni tat-tjur u tal-laħam tal-majjal lejn l-Ukrajna, u r-Russja għadha s-sitt l-akbar imsieħeb kummerċjali tal-UE. Għalhekk, il-kunflitt inevitabbilment se jkollu konsegwenzi severi għas-settur agroalimentari tal-UE. Is-sitwazzjoni li diġà kienet inkwetanti għall-bdiewa f’dawn l-aħħar xhur, milquta direttament minn żidiet kbar fil-prezzijiet tal-fertilizzanti, l-enerġija u l-għalf tal-annimali, mhux se titjieb u se teħtieġ appoġġ addizzjonali.
• Il-KESE jqis li għalkemm il-kwistjoni tas-sigurtà tal-ikel mhijiex ta’ tħassib immedjat għall-UE, is-sehem kbir tal-importazzjonijiet tal-UE ta’ ċereali, għalf tal-annimali, u fertilizzanti mill-Ukrajna u r-Russja jrid isaħħaħ l-impenn tal-UE biex timplimenta sistemi tal-ikel sostenibbli u fl-istess ħin tiggarantixxi l-affordabbiltà ta’ ikel ta’ kwalità għal kulħadd.
• Il-kriżi għandha ssir opportunità biex titnaqqas id-dipendenza tal-UE mill-fjuwils fossili, il-materja prima u l-input tal-fertilizzanti, jiġu protetti l-assi strateġiċi tal-ikel tal-UE u tiġi żgurata provvista tal-ikel ġusta, tajba għas-saħħa, sostenibbli u reżiljenti. Din id-dipendenza hija r-riżultat ta’ fallimenti tal-politika u nuqqas ta’ azzjoni f’dawn l-aħħar snin. L-UE issa trid taħdem lejn awtonomija strateġika miftuħa tas-sistemi tal-ikel tal-UE kif ukoll tħaffef it-tranżizzjoni lejn enerġiji rinnovabbli u titjib fl-effiċjenza enerġetika.
• Il-KESE jqis li l-impatti ambjentali kkawżati mill-kunflitt (attakki bil-bombi, speċjalment fil-kuntest ta’ tnixxijiet ta’ żejt/gass, fabbriki kimiċi jew impjanti nukleari) huma ta’ tħassib kbir, kemm għall-popolazzjoni tal-Ukrajna kif ukoll għal dik tal-UE. L-UE għandha tgħin biex tipproteġi u tirrestawra l-ħsara ambjentali kkawżata mill-gwerra u tikkastiga r-reati ambjentali, peress li inevitabbilment se jkollhom konsegwenzi dejjiema.

Is-Sezzjoni REX, li ltaqgħet fid-9 ta’ Marzu, iddedikat is-sessjoni tagħha ta’ waranofsinhar għal dibattitu dwar l-Ukrajna, bil-parteċipazzjoni ta’ tliet membri Ukreni tal-Pjattaforma tas-Soċjetà Ċivili UE-Ukrajna:

1. Alexander Shubin, Federazzjoni tat-Trade Unions tal-Ukrajna
2. Olena Pavlenko, Grupp DiXi, firmatarju tad-Dikjarazzjoni ta’ Kiev
3. Vasyl Andreyev, Union tal-Ħaddiema tal-Industrija tal-Kostruzzjoni u l-Materjali tal-Bini tal-Ukrajna

Huma ressqu erba’ talbiet ewlenin:

1. Appoġġ u assistenza kontinwi lill-Ukreni kemm fl-Ukrajna kif ukoll ’il hinn minnha
2. Appoġġ għall-proċess ta’ adeżjoni tal-Ukrajna mal-UE
3. Żona ta’ divjet ta’ titjiriet fuq l-Ukrajna
4. Tnaqqis sinifikanti tad-dipendenza enerġetika tal-UE mir-reġim awtoritarju Russu

Fid-dibattitu li segwa, il-membri tas-Sezzjoni għar-Relazzjonijiet Esterni qablu dwar l-importanza ta’ azzjonijiet konkreti fl-oqsma li ġejjin:

1) Appoġġ u solidarjetà mal-Ukrajna u l-poplu tagħha

• Organizzazzjoni ta’ għajnuna umanitarja permezz tal-organizzazzjonijiet tal-membri f’konformità mal-aktar ħtiġijiet urġenti tal-poplu Ukren
• Kollaborazzjoni kontinwa mas-soċjetà ċivili tal-Ukrajna permezz ta’ mezzi stabbiliti sew bħall-Pjattaforma tas-Soċjetà Ċivili UE-Ukrajna, u permezz ta’ kuntatti bilaterali biex jiġu indirizzati aħjar il-ħtiġijiet attwali tas-soċjetà tal-Ukrajna

2) Sanzjonijiet u aktar iżolament tar-Russja

• Sospensjoni tal-kollaborazzjoni mal-Kamra Ċivika tal-Federazzjoni Russa
• Il-promozzjoni tal-inattivazzjoni tas-sħubija tal-organizzazzjonijiet tas-soċjetà ċivili Russi li għandhom rabtiet mar-reġim f’networks internazzjonali
• It-tfassil ta’ proposta għal inizjattiva globali dwar id-diżinformazzjoni li għandha tiġi stabbilita għall-ġlieda kontra l-propaganda tal-Kremlin

3) Awtonomija strateġika u difiża

• Reviżjoni tal-Patt Ekoloġiku u d-diversifikazzjoni tas-sorsi tal-enerġija fl-Istati Membri
• Il-promozzjoni tal-implimentazzjoni ta’ strateġija ta’ difiża komuni u effettiva
• It-tisħiħ tal-alleanza trans-Atlantika

Is-CCMI dwar il-konsegwenzi tal-invażjoni Russa tal-Ukrajna għal diversi industriji strateġiċi inklużi d-difiża u l-produzzjoni tal-mikroċipep.
Ħafna setturi tal-industrija se jintlaqtu serjament mill-invażjoni Russa u s-sanzjonijiet imposti fuq ir-Russja u l-Belarussja. Ir-Russja u l-Ukrajna għandhom sehem sinifikanti fl-importazzjonijiet fl-UE mhux biss tal-enerġija iżda wkoll ta’ metalli, bħan-nikil, ir-ram u l-ħadid, u materja prima essenzjali, bħan-neon, il-palladju, it-titanju u l-platinu. Dawn huma kritiċi għal diversi industriji strateġiċi inklużi d-difiża u l-produzzjoni tal-mikroċipep.
Is-CCMI temmen li l-UE għandha tkompli taħdem fuq iż-żewġ objettivi doppji tat-tranżizzjoni ekoloġika u diġitali tal-ekosistemi industrijali tagħha. Dan se jnaqqas id-dipendenza tal-UE mill-importazzjonijiet tal-enerġija u tal-materja prima, kif ukoll il-vulnerabbiltajiet fl-ispazju diġitali. Barra minn hekk, is-CCMI temmen li l-UE għandha tħaffef l-isforzi tagħha għal awtonomija strateġika miftuħa. Dan se jippermetti lill-UE tkun aktar b’saħħitha kemm ekonomikament kif ukoll ġeopolitikament.