Is díol sásaimh é tionscnamh nua an Choimisiúin Eorpaigh chun dlús a chur le fás an mhargaidh do bhreoslaí eitlíochta inbhuanaithe, ach tá roinnt modhnuithe de dhíth lena chinntiú gur féidir é a chur chun feidhme go héifeachtach, gan saobhadh a chruthú. B’in í príomhtheachtaireacht na tuairime maidir le togra eitlíochta RefuelEU, a dhréachtaigh Thomas Kropp agus a glacadh ag an seisiún iomlánach i mí Dheireadh Fómhair.

Is fíor go ndéanfadh breoslaí eitlíochta inbhuanaithe laghdú suntasach ar astaíochtaí CO₂ na hearnála dá dtáirgfí méideanna leordhóthanacha díobh agus dá mbeadh fáil ag na haerlínte uile orthu. Ní léir, áfach, an gcuirfeadh an cur chuige atá á shaothrú ag an gCoimisiún cosc ar shaobhadh iomaíochta,’ a dúirt Thomas Kropp.

Is earnáil seirbhíse idirnáisiúnta í an eitlíocht, a chlúdaíonn dhá mhargadh ar leith ina bhfuil dinimicí éagsúla margaidh: Margadh Aonair Eorpach an Limistéir Eorpaigh Eacnamaíoch (LEE) ar thaobh amháin, agus an margadh atá rialaithe go hidirnáisiúnta ar an taobh eile. Ba cheart an difríocht sin a léiriú go soiléir sa dréacht-togra ón gCoimisiún, agus é a bheith d’aidhm aige cothrom na Féinne a choinneáil laistigh de LEE agus caighdeáin is infheidhme i leith na hinbhuanaitheachta á gcur chun cinn go réamhghníomhach ar fud an domhain san am céanna.

Maidir le saincheist na n-astaíochtaí CO₂, dhréachtaigh Thomas Kropp tuairim faoin bhFógra maidir leis an Scéim Fritháirithe agus Laghdaithe Carbóin don Eitlíocht Idirnáisiúnta (CORSIA), a glacadh freisin ag seisiún iomlánach mhí Dheireadh Fómhair. Sa doiciméad sin, formhuiníonn CESE an togra ón gCoimisiún chun Treoir 2003/87/CE a leasú i ndáil le fógra a thabhairt faoi fhritháireamh in 2021, agus tacaíonn sé lena ghlacadh práinneach d’fhonn deimhneacht dhlíthiúil a bhaint amach. (mp)