Minn Andrej Zorko (Grupp tal-Ħaddiema), relatur tal-Opinjoni esploratorja dwar “Komponenti ewlenin ta’ xogħol ta’ kwalità sostenibbli matul u wara l-irkupru”

Il-kwalità tax-xogħol hija waħda mill-komponenti fundamentali tal-kwalità tal-ħajja. Il-prinċipju tal-kwalità tax-xogħol għall-kwalità tal-ħajja għandu jiġi segwit fl-istadji kollha, peress li dan huwa prerekwiżit għal żvilupp soċjali sostenibbli.

Għalhekk, il-KESE jemmen bis-sħiħ li dan għandu jingħata attenzjoni speċjali fil-politiki tal-UE, peress li jrid jipprevjeni r-riskji tal-inugwaljanza, il-faqar, l-esklużjoni soċjali, id-dumping soċjali u l-kompetizzjoni inġusta. Fil-fehma tal-KESE, l-irkupru ekonomiku u soċjali jridu jimxu id f'id.

Il-problemi u l-isfidi li jeżistu għandhom jiġu indirizzati fid-dawl tal-prinċipji tal-Pilastru Ewropew tad-Drittijiet Soċjali u l-Għanijiet ta’ Żvilupp Sostenibbli tal-Aġenda 2030. L-istandards internazzjonali tal-ILO dwar ix-xogħol deċenti għandhom jiġu kkunsidrati wkoll, flimkien mal-Karta tad-Drittijiet Fundamentali tal-Unjoni Ewropea.

Il-KESE jagħraf id-diversità u n-natura multidimensjonali tal-kunċett ta’ xogħol ta’ kwalità sostenibbli, u jirrimarka wkoll li dan huwa magħmul minn diversi komponenti li jaffettwaw direttament jew indirettament il-kwalità tal-ħajja tan-nies, id-drittijiet tal-ħaddiema u s-sigurtà soċjali tal-ħaddiema.

L-iżgurar ta’ kundizzjonijiet ġusti u kompetittivi għall-ekonomija Ewropea, l-investiment fl-innovazzjoni u l-iżvilupp, il-prevenzjoni tad-dumping soċjali, l-inkoraġġiment tal-ħolqien tal-impjiegi u l-promozzjoni ta’ kundizzjonijiet tax-xogħol ġusti u inċentivi adatti għandhom ikunu komponenti ewlenin tal-istrateġiji tal-Unjoni Ewropea u tal-Istati Membri u jistgħu jagħtu kontribut sinifikanti biex il-kwalità tax-xogħol tittejjeb.

F’dan ir-rigward, huwa kruċjali li jkun hemm djalogu soċjali effettiv (kemm bipartitiku u tripartitiku) fil-livell tal-UE u dak nazzjonali. Nirrakkomandaw li wieħed jikkapitalizza fuq il-kontenut tradizzjonali tad-djalogu soċjali biex jinkludi kontenut ieħor aktar strateġiku orjentat lejn is-sostenibbiltà u s-soluzzjonijiet. Dan jinkludi, pereżempju, l-antiċipazzjoni tal-ħtiġijiet futuri tal-kumpaniji u tal-ħaddiema b’ċerti kompetenzi u ħiliet, attivitajiet konġunti għat-taħriġ tal-ħaddiema, l-iżgurar ta’ tranżizzjoni ġusta lejn l-ekonomiji diġitali u ekoloġiċi, u r-regolamentazzjoni u l-iżvilupp ta’ soluzzjonijiet ibbilanċjati għax-xogħol tal-pjattaformi, kif ukoll kwistjonijiet simili importanti fil-qasam tal-iżvilupp.

Il-KESE jinnota li l-Faċilità għall-Irkupru u r-Reżiljenza ma tindirizzax direttament il-komponenti tax-xogħol ta’ kwalità, u għalhekk, jistieden lill-Kummissjoni biex tissupplimenta din il-parti tal-Faċilità. Il-gruppi vulnerabbli, bħall-ħaddiema prekarji u dawk żgħażagħ, li ntlaqtu l-agħar mill-epidemija, ma għandhomx jiġu injorati.

Biex nikkonkludu nistgħu ngħidu li hija r-responsabbiltà tal-Kummissjoni, tal-Istati Membri u tal-imsieħba soċjali Ewropej u nazzjonali li jagħtu aktar attenzjoni lill-kwistjonijiet ta’ xogħol deċenti u ta’ kwalità u jippjanaw u jimplimentaw miżuri li jiżguraw xogħol ta’ kwalità sostenibbli, flimkien mal-partijiet interessati rilevanti kollha l-oħra.