KESE info

Il-politika ta’ koeżjoni hija essenzjali għall-iżvilupp ta’ viżjoni ġdida ta’ wara l-COVID-19 għall-Unjoni Ewropea, li tkun iffukata fuq il-prosperità, l-inklużjoni u s-sostenibbiltà ambjentali, viżjoni li fiha s-soċjetà ċivili organizzata tkun inkluża bis-sħiħ. Dan kien il-messaġġ ta’ Christa Schweng, il-President tal-KESE, mtenni minn Elisa Ferreira, il-Kummissarju Ewropew għall-Koeżjoni u r-Riformi, fis-sessjoni plenarja tal-KESE ta’ Settembru.

Sa mill-bidu tal-kriżi tal-COVID-19, il-politika ta’ koeżjoni kienet strumentali biex jinstabu soluzzjonijiet matul il-fażi tal-emerġenza, u matul il-perjodu ta’ programmazzjoni 2021-2027 hija għandha tkompli tintuża biex jiġu indirizzati l-isfidi u l-inugwaljanzi li jeżistu fi ħdan l-Istati Membri, ir-reġjuni, il-bliet, u l-persuni, u bejniethom, peress li s-sitwazzjoni marret għall-agħar matul il-pandemija.

“Il-politika ta’ koeżjoni għandha rwol ewlieni biex jiġi żgurat l-irkupru bilanċjat fejn ħadd ma jitħalla jibqa’ lura. Il-prinċipju tas-sħubija mal-organizzazzjonijiet tas-soċjetà ċivili huwa parti mid-DNA tal-politika, u nixtiequ naraw li dan il-prinċipju jiġi estiż għal NextGenerationEU u l-implimentazzjoni tal-pjani nazzjonali għall-irkupru u r-reżiljenza. Il-politika ta’ koeżjoni għandha wkoll issir inqas burokratika, tkun aktar diġitalizzata u aktar effettiva”, qalet is-Sinjura Schweng.

Is-Sinjura Ferreira rrimarkat li l-kriżi tal-COVID-19 aggravat l-inugwaljanzi eżistenti u ħolqot oħrajn ġodda, li jaffettwaw b’mod partikolari lill-ħaddiema tal-ewwel linja, lill-persuni vulnerabbli bħall-persuni akbar fl-età u l-persuni b’diżabbiltà, lil dawk li għandhom inqas aċċess għas-servizzi, u lil dawk li sofrew l-aktar mill-impatti tal-lockdowns, bħan-nisa u ż-żgħażagħ: “L-Unjoni tagħna hija b’saħħitha daqs l-aktar ħolqa dgħajfa tagħha. Li niġġieldu u nnaqqsu l-inugwaljanzi huwa sine qua non għal Unjoni b’saħħitha u li tirnexxi. Il-ġustizzja soċjali u l-inklużività jeħtieġ li jkunu fiċ-ċentru tal-irkupru tagħna. Ma nistgħux insolvu kwistjonijiet soċjali mingħajr ma nsolvu l-inugwaljanzi spazjali u reġjonali. Jeħtiġilna nqisu l-postijiet fejn jgħixu n-nies”. (mp)

Il-Kumitat Ekonomiku u Soċjali Ewropew (KESE) qed jingħaqad mal-isforzi tal-UE biex ireġġgħu lura x-xejra inkwetanti ta’ tnaqqis fil-libertajiet tal-media u t-tnaqqis dejjem jiżdied fuq l-indipendenza ġurnalistika kkawżata minn pressjoni dejjem tikber minn diversi strutturi ta’ poter u ta’ negozju, pagi baxxi, konċentrazzjoni tas-sjieda tal-media u proliferazzjoni ta’ aħbarijiet foloz fuq il-media soċjali u kanali oħrajn.

F’dibattitu mal-kap tal-Uffiċċju ta’ Brussell ta’ Reporters mingħajr Fruntieri, Julie Majerczak, u s-Segretarju Ġenerali tal-Federazzjoni Ewropea tal-Ġurnalisti, Ricardo Gutiérrez, li sar matul is-sessjoni plenarja tiegħu ta’ Settembru, il-KESE esprima tħassib dwar il-mod kif il-ġurnalisti qed jisfaw dejjem aktar fil-mira ta’ attakki verbali u fiżiċi, b’16 li ġew maqtula mill-2015 ’il hawn.

“Fl-Ewropa qed naraw xejriet li ma nistgħux naċċettaw. Il-libertà u d-diversità tal-media huma l-prekundizzjonijiet għal demokrazija li tiffunzjona tajjeb u għalhekk jikkonċernawna lkoll. Il-ġurnaliżmu professjonali qatt ma jista’ jiġi sostitwit minn algoritmi, servizzi għall-ġbir tal-aħbarijiet u networks soċjali,” qalet il-President tal-KESE Christa Schweng.

Il-KESE approva l-aħħar inizjattivi tal-Kummissjoni Ewropea, inkluża r-Rakkomandazzjoni dwar is-Sikurezza tal-Ġurnalisti, ippreżentata l-ġimgħa li għaddiet mill-Kummissarju Věra Jourová. Huwa laqa’ d-diskors tal-President tal-Kummissjoni dwar l-Istat tal-Unjoni, li fih Ursula von der Leyen ħabbret il-pjani għall-Att dwar il-Libertà tal-Media Ewropea.

Madankollu, fl-Opinjoni dwar Niżguraw il-libertà u d-diversità tal-media fl-Ewropa, adottata fis-sessjoni plenarja, il-KESE appella sabiex il-Kummissjoni tapplika regoli ġenerali ta’ kondizzjonalità u timponi sanzjonijiet baġitarji mingħajr dewmien fuq dawk il-pajjiżi fejn il-libertà tal-media u l-pluraliżmu kienu mhedda serjament.

Ir-relatur tal-Opinjoni, Christian Moos, wissa: “Ir-rakkomandazzjonijiet dwar il-protezzjoni u s-sikurezza tal-ġurnalisti mhux se jkunu biżżejjed. M’hemmx ħin x’nitilfu. L-Istati Membri li joħonqu l-libertà tal-media għandhom jiġu esklużi min-Next Generation EU. Ir-regolament dwar il-kundizzjonalità għandu jiġi applikat. L-Ungerija u l-Polonja qed jeqirdu b’mod attiv jew diġà qerdu l-libertà tal-media. Il-gvernijiet tagħhom għandhom jerġgħu jistabbilixxu d-demokrazija u l-istat tad-dritt, inkella ma jistgħux jibqgħu membri tal-UE, li jiggarantixxi legalment id-demokrazija u l-istat tad-dritt u, bħala prerekwiżit indispensabbli għat-tnejn li huma, il-libertà tal-media.”

Is-Sinjura Majerczak u s-Sur Gutiérrez esprimew l-appoġġ tagħhom għall-Opinjoni tal-KESE u għall-azzjoni tal-UE biex jiġu żgurati l-libertà u l-pluraliżmu tal-media, iżda enfasizzaw l-importanza li jiġi żgurat li r-rakkomandazzjonijiet u l-pjan propost tal-Kummissjoni ma jibqgħux ittra mejta. (ll)

Enfasi qawwija fuq l-irkupru, l-unjoni tas-saħħa u d-diġitalizzazzjoni tal-UE, pożizzjoni soda dwar il-ħarsien tal-istat tad-dritt u enfasi fuq il-futur tal-Ewropa: il-KESE jilqa’ dawn l-aspetti tad-diskors dwar l-Istat tal-Unjoni ta’ din is-sena, li huma konformi mal-prijoritajiet tiegħu.

Il-prijorità tal-KESE tibqa’ l-implimentazzjoni tar-riformi stabbiliti fil-pjani nazzjonali għall-irkupru u r-reżiljenza, filwaqt li jitqiesu l-ħtiġijiet tal-impjegaturi, tal-ħaddiema u tas-soċjetà ċivili inġenerali.

“L-uniku mod kif dawn ir-riformi nsarrfuhom f’azzjonijiet huwa permezz tal-involviment sħiħ tas-soċjetà ċivili organizzata,” qalet Christa Schweng, President tal-KESE.

Ir-riċerka rapida, id-disponibbiltà u l-organizzazzjoni tad-distribuzzjoni tal-vaċċini tal-COVID-19 urew li l-Ewropa qed tagħti riżultati. Unjoni tas-Saħħa ġenwina, kif enfasizzat il-President tal-Kummissjoni, Ursula von der Leyen, hija waħda mill-prijoritajiet ewlenin tal-mandat attwali tal-KESE.

Fir-rigward tal-investiment f’teknoloġiji futuri, il-KESE jenfasizza li l-UE għandha tiżviluppa l-viżjoni u l-istrateġija tagħha għas-sovranità diġitali, filwaqt li tibqa’ miftuħa għall-kummerċ ħieles u tappoġġja s-sistema multilaterali.

Is-Sinjura Schweng tilqa’ wkoll il-pożizzjoni soda tal-Kummissjoni Ewropea dwar l-istat tad-dritt. Irridu niddefendu l-valuri Ewropej.

Għall-KESE, is-suċċess futur tal-mudell ekonomiku u soċjali tal-Ewropa se jiddependi ħafna mill-kapaċità tagħna li nissieħbu u nikkollegaw mal-bqija tad-dinja, mill-eqreb ġirien tagħna bħall-Balkani tal-Punent sal-imsieħba strateġiċi ġeopolitiċi oħrajn. (at)

Il-KESE jappoġġja b’mod wiesa’ l-istrateġija l-ġdida tal-UE għall-2021-2025 kontra t-traffikar tal-bnedmin, iżda jiġbed l-attenzjoni wkoll għall-ħtieġa li tiġi inkorporata d-dimensjoni soċjali f’din il-politika.

F’dak li għandu x’jaqsam mad-drittijiet tal-vittmi u d-dimensjoni soċjali, l-istrateġija l-ġdida tal-UE dwar il-ġlieda biex jitrażżan it-traffikar tonqos milli tilħaq l-għanijiet meħtieġa. Il-KESE jemmen li s-sitwazzjoni tal-vittmi mhijiex ittrattata sistematikament b’mod umanistiku tul l-istrateġija kollha.

Kif qal Carlos Manuel Trindade, ir-relatur tal-KESE:“It-traffikar tal-bnedmin iwassal għal tbatija kbira fost il-vittmi: hija attakk fuq id-dinjità. Għaldaqstant, id-dimensjoni soċjali trid titqies sew f’din il-ġlieda.”

Minħabba l-fatt li kemm il-profitti kif ukoll il-vittmi qed jiżdiedu, il-KESE jilqa’ l-pożizzjoni tal-Kummissjoni li d-Direttiva dwar il-ġlieda kontra t-traffikar tal-bnedmin trid tiġi implimentata fl-Istati Membri kollha, u r-rieżami tagħha għandu jkun ibbażat fuq valutazzjoni approfondita tal-limitazzjonijiet u l-iżviluppi identifikati fil-qasam tat-traffikar tal-bnedmin.

Barra minn hekk, il-KESE jenfasizza l-ħtieġa li jittejbu s-sanzjonijiet u japprova l-istabbiliment ta’ standards minimi fil-livell tal-UE li jikkriminalizzaw in-networks involuti fil-proċess kollu tat-traffikar u tal-isfruttar tal-bnedmin.

Titqies id-dimensjoni soċjali fl-implimentazzjoni tal-istrateġija

Il-pjan jonqos kompletament milli jipprovdi għar-rikonoxximent u l-infurzar tad-drittijiet tal-vittmi, li għandhom ikunu ta’ tħassib ewlieni fl-affermazzjoni tad-dinjità u d-drittijiet tal-bnedmin. Il-vittmi għandhom jingħataw id-dritt għall-integrazzjoni fis-soċjetà ospitanti permezz ta’ proċess ta’ integrazzjoni adegwat u rapidu.

L-Opinjoni tenfasizza wkoll il-ħtieġa li jinħolqu kundizzjonijiet ekonomiċi u soċjali dinjitużi u suffiċjenti għall-popolazzjonijiet fil-pajjiżi ta’ oriġini, il-fattur ewlieni biex jitwaqqaq jew jiġi evitat ir-reklutaġġ ta’ vittmi għat-traffikar tal-bnedmin.

Fl-aħħarnett, l-istrateġija l-ġdida għandha tirrikonoxxi l-appoġġ sinfikanti mogħti min-networks ta’ solidarjetà tal-komunità għall-protezzjoni, l-ilqugħ u l-integrazzjoni tal-vittmi u l-ħidma mwettqa mill-organizzazzjonijiet tas-soċjetà ċivili. (at)

Il-Kumitat Ekonomiku u Soċjali Ewropew (KESE) laqa’ l-isforzi tal-Kummissjoni biex tarmonizza l-miżuri li jirregolaw ir-ritorn volontarju tal-migranti u r-riintegrazzjoni tagħhom fil-pajjiż ta’ oriġini tagħhom, iżda qal li kellu dubji dwar il-fattibbiltà ta’ xi wħud mill-proposti mressqa u wera tħassib li r-ritorn volontarju jista’ jinbidel f’deportazzjoni ta’ migranti mill-UE.

Il-KESE saħaq li l-maġġoranza tar-ritorn volontarju mhux qed jiffunzjona tajjeb minħabba li l-pajjiżi ta’ oriġini ma jiġux involuti biżżejjed u minħabba li l-migranti f’sitwazzjonijiet irregolari spiss ma jkunux lesti li jmorru lura.

Il-perspettiva tal-KESE kienet ippreżentata fl-Opinjoni dwar L-Istrateġija tal-UE dwar ir-ritorn volontarju u r-riintegrazzjoni adotta fis-sessjoni plenarja ta’ Settembru, li fiha l-Kumitat ta ħarsa mill-qrib lejn l-istrateġija li hija waħda mill-objettivi ewlenin tal-Patt Ġdid dwar il-Migrazzjoni u l-Ażil.

Il-KESE tenna l-kritika preċedenti tiegħu dwar il-Patt li kien jiffoka kważi b’mod esklużiv fuq l-indirizzar tas-sitwazzjonijiet irregolari fuq il-fruntiera jew permezz ta’ ritorn volontarju jew furzat, filwaqt li ma joffrix approċċ komprensiv għall-ġestjoni tal-migranti permezz tal-promozzjoni għal mobilità legali u sikura. Il-KESE jqis li din hija dgħufija strateġika tal-politika tal-UE dwar il-migrazzjoni u l-ażil.

“Jeħtieġ nimmaniġġjaw l-irregolarità qabel ma sseħħ. Dan ifisser li rridu niżguraw mezzi sikuri u effettivi għad-dħul fl-UE. Jekk jirnexxielna nagħmlu dan, ikun possibbli li jitnaqqsu l-wasliet irregolari”, qal ir-relatur tal-Opinjoni, José Antonio Moreno Díaz.

L-approċċ frammentat ta’ bħalissa fih għadd ta’ difetti.

L-inċentivi li jingħataw bħalissa lill-pajjiżi ta’ oriġini jistgħu fil-fatt jiskuraġġuhom milli jippruvaw inaqqsu l-flussi ta’ migranti, peress li dawn l-inċentivi jiġu offruti permezz ta’ programmi bbażati fuq l-eżistenza ta’ persuni f’sitwazzjonijiet irregolari.
Il-KESE qal li kellu tħassib partikolari dwar l-objettiv tal-Patt biex jinżied ir-ritorn volontarju rapidu mill-fruntieri esterni tal-UE.

“Huwa minnu li dan huwa ritorn volontarju rapidu, jew huwa deportazzjoni? Ninsabu inkwetati li dan ir-‘ritorn volontarju’ jista’ jinbidel f’ewfemiżu għad-deportazzjoni jew għal kumpens finanzjarju li jitħallas lill-pajjiżi ta’ destinazzjoni li jirċievu lill-persuni rimpatrijati, mingħajr ma qatt jitqiesu xewqathom jew - aktar inkwetanti minn hekk - drittijiethom,” qal is-Sur Moreno Díaz.

Il-KESE kkonkluda li l-kooperazzjoni ma’ pajjiżi terzi dwar kwalunkwe aspett trid tkun ibbażata fuq il-fatt li jirrispettaw id-dritt internazzjonali pubbliku, kif ukoll li jipproteġu d-drittijiet tal-bniedem u l-libertajiet fundamentali.

 

F’żewġ rapporti dwar abbozz ta’ leġiżlazzjoni tal-UE dwar l-IA, il-KESE jappella għal projbizzjoni kompleta fuq il-punteġġ soċjali u għal mekkaniżmu ta’ lmenti u rimedju għal persuni li jkunu sofrew ħsara minn sistema tal-IA.

Waqt il-plenarja ta’ Settembru, il-KESE laqa’ l-Att dwar l-Intelliġenza Artifiċjali u l-Pjan Ikkoordinat dwar l-Intelliġenza Artifiċjali

Il-KESE jħoss li l-leġiżlazzjoni l-ġdida tassew tpoġġi s-saħħa, is-sigurtà u d-drittijiet fundamentali fil-qalba tagħha, u tieħu xejra globali billi tistabbilixxi sensiela ta’ rekwiżiti li l-iżviluppaturi, Ewropej u le, iridu jikkonformaw magħhom jekk iridu jbiegħu l-prodotti tagħhom fl-UE.

Fil-fehma tal-KESE, il-proposti għandhom xi dgħufijiet, inklużi fil-qasam tal-“punteġġ soċjali”. Il-Kumitat jwissi kontra l-periklu li din il-prattika – li diġà tinsab fis-seħħ fiċ-Ċina, fejn il-gvern jista’ jinnega liċ-ċittadini l-aċċess għas-servizzi pubbliċi – tista’ tibda tintuża wkoll fl-Ewropa.

L-abbozz tal-Att dwar l-Intelliġenza Artifiċjali jinkludi projbizzjoni fuq il-punteġġ soċjali mill-awtoritajiet pubbliċi fl-Ewropa, iżda l-KESE jixtieq li din il-projbizzjoni tkun estiża għall-organizzazzjonijiet privati u semiprivati sabiex jiġi eskluż li dawn jużaw din il-prattika, pereżempju biex jiġi stabbilit jekk persuna hijiex eliġibbli għal self personali jew self ipotekarju.

Il-KESE jindika wkoll il-perikli li tiġi elenkata intelliġenza artifiċjali “b’riskju għoli”, u jwissi li dan l-approċċ ta’ elenkar jista’ jinnormalizza u jissemplifika numru ta’ prattiki tal-intelliġenza artifiċjali li għadhom ikkritikati ħafna. Jiġu permessi prattiki bħar-rikonoxximent bijometriku, inkluż tal-emozzjoni jew tas-sentimenti, fejn l-espressjonijiet tal-wiċċ, it-ton tal-vuċi, il-pożizzjoni u l-ġesti ta’ persuna jiġu analizzati sabiex titbassar imġiba futura, jiġi identifikat il-gideb u anke tiġi verifikata l-probabbiltà li xi ħadd jirnexxi f’impjieg. Jiġu permessi wkoll il-valutazzjoni, il-klassifikazzjoni u saħansitra t-tkeċċija ta’ ħaddiema abbażi tal-intelliġenza artifiċjali, jew li l-istudenti jiġu vvalutati waqt l-eżamijiet.

Barra minn hekk, ir-rekwiżiti proposti għall-intelliġenza artifiċjali b’riskju għoli mhux dejjem jistgħu jtaffu d-danni għas-saħħa, is-sigurtà u d-drittijiet fundamentali li dawn il-prattiki jimponu. Għalhekk hemm il-ħtieġa li jiġi introdott mekkaniżmu ta’ konformità u rimedju, li ser jagħti lil dawk li soffrew danni mis-sistemi tal-intelliġenza artifiċjali d-dritt li jikkontestaw deċiżjonijiet li ttieħdu purament minn algoritmu.

B’mod ġenerali, fil-fehma tal-KESE, l-Att dwar l-Intelliġenza Artifiċjali jaħdem fuq il-premessa li, ladarba jiġu ssodisfati r-rekwiżiti għall-intelliġenza artifiċjali b’riskju medju u kbir, l-intelliġenza artifiċjali tista’ tissostitwixxi fil-biċċa l-kbira t-teħid tad-deċiżjonijiet mill-bniedem.

Ir-relatur tal-Opinjoni tal-KESE dwar l-Att dwar l-Intelliġenza Artifiċjali, Cateljine Muller, tgħid li l-KESE minn dejjem appoġġja approċċ għall-intelliġenza artifiċjali bbażat fuq il-kontroll mill-bniedem, peress li mhux id-deċiżjonijiet kollha jistgħu jiġu ridotti għal numri binarji. Ħafna għandhom komponent morali, implikazzjonijiet legali serji u impatti soċjetali kbar, pereżempju fuq l-infurzar tal-liġi u l-ġudikatura, is-servizzi soċjali, l-akkomodazzjoni, is-servizzi finanzjarji, l-edukazzjoni u r-regolamenti tax-xogħol. Verament lesti li nippermettu lill-intelliġenza artifiċjali biex tissostitwixxi t-teħid tad-deċiżjonijiet mill-bniedem, anke fi proċessi kritiċi bħall-infurzar tal-liġi u l-ġudikatura? (dm)

Hekk kif l-Ewropa qed terġa’ lura għan-normalità wara l-kriżi tal-COVID-19, issa wasal iż-żmien li tgħaddi mill-kliem għall-fatti u timplimenta l-Istrateġija “Mill-Għalqa sal-Platt”. Il-KESE jirrakkomanda bil-qawwa li tiġi appoġġjata t-trasformazzjoni tas-sistemi tal-ikel tal-Ewropa sabiex dawn isiru aktar sostenibbli ambjentalment, ekonomikament u soċjalment. Jenfasizza wkoll li l-kooperazzjoni (aktar milli l-kompetizzjoni) fost l-operaturi tal-katina tal-ikel hija essenzjali biex titrawwem sistema tal-ikel aktar reżiljenti u inklużiva, sabiex jiġi żgurat sehem ġust għal kulħadd.

L-Unjoni Ewropea ċċelebrat l-ewwel “Jum Organiku” tagħha fit-23 ta’ Settembru 2021 u l-KESE għadu kif adottat l-Opinjonijiet dwar Pjan ta’ azzjoni għall-iżvilupp tal-produzzjoni organika u Lejn katina tal-provvista tal-ikel ġusta.

Dawk li jieħdu d-deċiżjonijiet ser ikollhom opportunitajiet kbar biex joħolqu t-trasformazzjonijiet meħtieġa. Ninsabu f’punt kritiku biex tiġi implimentata politika komprensiva dwar l-ikel.

Li t-8,5 % tal-art agrikola destinata għall-biedja organika fl-UE jitla’ għal 25 % hija mira ambizzjuża.

Bħala parti mill-Patt Ekoloġiku Ewropew, il-Kummissjoni Ewropea stabbilixxiet mira għall-produzzjoni organika fl-UE permezz tal-Istrateġija “Mill-Għalqa sal-Platt” u l-Istrateġija għall-Bijodiversità: sal-2030 mill-inqas 25 % tal-art agrikola tibda tinħadem b’mod organiku.

“Il-biedja organika għandha rwol x’taqdi sabiex jinkisbu l-għanijiet tal-Pakkett Ekoloġiku Ewropew. Ser ikun hemm bżonn ta’ approċċ orjentat lejn is-suq sabiex tkompli tiżdied id-domanda tal-konsumatur u l-fiduċja fil-prodotti organiċi”, qal Andreas Thurner, relatur tal-Opinjoni tal-KESE dwar il-produzzjoni organika.

Il-KESE madankollu jenfasizza l-bżonn li jkun hemm biżżejjed riżorsi finanzjarji sabiex jiġi żgurat li l-benefiċċji ta’ din il-konverżjoni prinċipali għall-biedja organika jitgawdew miċ-ċittadini kollha tal-UE. (mr)

L-UE teħtieġ miżuri effiċjenti u urġenti biex tnaqqas l-emissjonijiet u ssib tarf it-tibdil fil-klima. Għal dan il-għan, il-Pakkett dwar il-Finanzi Sostenibbli ppreżentat mill-Kummissjoni Ewropea għandu l-potenzjal li jistabbilixxi qafas ċar, koerenti u komprensiv li fih tista’ tiżviluppa ekonomija aktar ekoloġika mingħajr effetti ta’ intrappolament.

Fl-Opinjoni mfassla minn Stefan Back u li ġiet adottata fis-sessjoni plenarja ta’ Settembru, il-KESE jappoġġja bis-sħiħ il-miżuri tal-Kummissjoni bil-għan li tistabbilixxi standards għad-definizzjoni ta’ “attività ekonomika sostenibbli”, iżda jinnota li xi elementi jistgħu jippreżentaw sfida kumplessa u għalja, partikolarment għall-SMEs.

Il-Kumitat jistqarr li huwa importanti li jiġu definiti kriterji tekniċi ċari għall-investimenti ekoloġiċi li jikkontribwixxu direttament għall-objettivi klimatiċi tal-Ewropa u li magħhom jistgħu jiġu allinjati l-prattiki tas-setturi tan-negozju kkonċernati u tas-settur finanzjarju. L-istabbiliment ta’ standards li jvarjaw mir-rekwiżiti massimi tal-leġiżlazzjoni tal-UE jista’ joħloq konfużjoni, u għaldaqstant, il-KESE jirrakkomanda li dawn ir-rekwiżiti jissaħħu.

“Il-pakkett ta’ miżuri tal-Kummissjoni huwa maħsub biex jippermetti lill-investituri jorjentaw mill-ġdid l-investimenti lejn teknoloġiji u negozji aktar sostenibbli. Neħtieġu għodod effiċjenti, faċilment applikabbli, innovattivi u produttivi li jwasslu għal riżultati rapidi u ċari. Il-valutazzjoni tar-Regolament Delegat dwar it-Tassonomija ta’ Sostenibbiltà għandha titwettaq f’dan l-ispirtu”, saħaq is-Sur Back. (mp)

Il-Forum tas-Soċjetà Ċivili tal-Balkani tal-Punent tal-KESE, li sar fi Skopje fit-30 ta’ Settembru u l-1 ta’ Ottubru, xeħet dawl qawwi fuq is-sitwazzjoni attwali tal-prospetti ċari tar-reġjun fir-rigward tal-adeżjoni mal-UE u l-involviment attiv tas-soċjetà ċivili f’dan l-isforz.

Il-Forum, organizzat mill-Kumitat Ekonomiku u Soċjali Ewropew f’kollaborazzjoni mal-Kummissjoni Ewropea u l-Kunsill għall-Kooperazzjoni Reġjonali, wasal f’waqtu, ftit jiem qabel is-Summit bejn l-UE u l-Balkani tal-Punent f’Brdo, taħt il-Presidenza Slovena.

Il-Prim Ministru tar-Repubblika tal-Maċedonja ta’ Fuq, Zoran Zaev, qal: “It-tisħiħ tal-proċess ta’ adeżjoni – perspettiva kredibbli tal-UE għall-Balkani tal-Punent – huwa s-suġġett ġust fil-mument opportun minħabba l-imblokk tat-tkabbir impost.”

Il-President tal-KESE Christa Schweng affermat l-appoġġ ċar tal-Kumitat għat-tkabbir tal-UE għall-pajjiżi tar-reġjun.
“Tassew nemmen li post il-Balkani tal-Punent jinsab fl-UE. M’għandniex ninsew ukoll li kwalunkwe diskussjoni dwar it-tkabbir hija, b’mod impliċitu, diskussjoni dwar il-futur tal-Ewropa, u s-soċjetà ċivili, kemm mir-reġjun kif ukoll mill-UE, għandha tkun involuta bis-sħiħ fil-proċess.”

Il-Kummissarju għall-Viċinat u t-Tkabbir Olivér Várhelyi kkummenta: “It-triq lejn l-UE hija twila, ikkumplikata u mimlija sfidi. Iżda dawk li huma verament iddedikati jaslu. U għalija, m’hemmx dubju – il-futur tal-Balkani tal-Punent huwa l-Unjoni Ewropea.”

Bi tkomplija ma’ dan, Gašper Dovžan, segretarju tal-istat fil-ministeru tal-affarijiet barranin tas-Slovenja, qal li t-tkabbir kien pass loġiku u proċess ta’ benefiċċju reċiproku li kien jeħtieġ ambizzjoni u reżiljenza.

L-involviment attiv tas-soċjetà ċivili huwa essenzjali fil-proċess tal-adeżjoni

Biljana Spasovska, min-Network tal-Iżvilupp tas-Soċjetà Ċivili tal-Balkani, esprimiet it-tħassib tagħha dwar l-ispazju li dejjem jiċkien u t-tnaqqis fil-finanzjament tas-soċjetà ċivili, u qalet li l-libertajiet bażiċi tqiegħdu taħt pressjoni, speċjalment matul il-pandemija.

Il-parteċipanti tal-Forum enfasizzaw l-importanza li tiġi ggarantita l-libertà ta’ assoċjazzjoni u li jiġi żgurat spazju ċiviku abilitanti.

Ġew diskussi wkoll il-linji gwida għall-implimentazzjoni tal-Aġenda Ekoloġika u l-Pjan Ekonomiku u ta’ Investiment. Madankollu, is-suċċess ta’ dawn jiddependi fuq l-inklużjoni sinifikanti u l-involviment attiv tas-soċjetà ċivili fit-tfassil tal-politika.

Il-finanzjament pubbliku għall-organizzazzjonijiet tas-soċjetà ċivili jeħtieġ li jiġi riformat fil-pajjiżi kollha fir-reġjun u s-soċjetà ċivili jeħtieġ li tkun indipendenti u ħielsa mill-influwenza politika.

Id-dikjarazzjoni finali tat-8 Forum tas-Soċjetà Ċivili tal-Balkani tal-Punent tinsab hawnhekk. (at)

Fl-1 ta’ Ottubru 2021, il-Kumitat Ekonomiku u Soċjali Ewropew (KESE) nieda uffiċjalment il-parteċipazzjoni tiegħu fl-Alleanza Ewropea dwar il-Materja Prima (ERMA). L-ERMA tnediet fid-29 ta’ Settembru 2020 mill-Kummissjoni Ewropea sabiex trawwem ir-reżiljenza u l-awtonomija strateġika fil-provvista ta’ materja prima kritika għall-industrija u s-soċjetà tal-UE. L-alleanza bħalissa tinkludi aktar minn 500 membru mill-UE u lil hinn minnha.

Fid-dawl tal-ħidma li wettaq il-KESE permezz tal-Opinjoni CCMI 177, l-ERMA talbet għall-parteċipazzjoni uffiċjali tiegħu bl-istatus ta’ osservatur. Il-Bureau tal-KESE ħatar lis-Sur Andrés Barceló Delgado (ES-GR I) bħala osservatur tal-KESE fl-ERMA, fid-dawl tal-ħidma preċedenti tiegħu dwar diversi Opinjonijiet tal-KESE relatati mas-suġġett tal-materja prima. Il-kontribut tas-Sur Barceló Delgado se jkun appoġġjat u kkoordinat flimkien mas-Sur Norbert Kluge (DE-GR II) u mas-Sur Kestutis Kupsys (LT-GR III).

Din is-sena rat il-41 tellieqa ta’ 20 km ta’ Brussell, li saret fit-12 ta’ Settembru. It-tellieqa kienet iddedikata għal żewġ kampanji: l-ewwel waħda, il-promozzjoni tal-Konferenza dwar il-Futur tal-Ewropa bl-islogan tagħha: “Il-futur jinsab f’idejk”, u t-tieni, l-appoġġ tal-azzjoni kontra l-kanċer u li jinġabru EUR 10 000 għall-ġlieda kontra l-kanċer u biex tiġi appoġġata r-riċerka. Għal din il-kampanja, EUR 10 minn kull miżata ta’ reġistrazzjoni marru direttament għand TELEVIE, avveniment għall-karità li ilu jiġi organizzat mill-1989 fil-Belġju frankofonu u fil-Lussemburgu minn RTL-TVI għall-benefiċċju tar-riċerka xjentifika kontra l-kanċer fit-tfal u l-adulti.

Aktar minn 22,000 persuna minn ‘il fuq minn 100 nazzjonalità ħadu sehem fit-tellieqa, ħafna minnhom jiġru u oħrajn jimxu jew rekbin hand-bikes jew siġġu tar-roti, li kollha flimkien imxew jew ġrew mit-toroq ta’ Brussell. Aktar minn 800 kollega mill-istituzzjonijiet Ewropej ħadu sehem fit-tellieqa, lebsin il-flokk tat-tim “Running for Europe”.

Din is-sena t-tellieqa ntrebħet minn Amaury Paquet minn Liège fil-Belġju, li spiċċa f’ħin ta’ 59’31, li hu t-tielet l-aktar ħin veloċi fl-istorja ta’ dan l-avveniment. Fit-tellieqa tan-nisa, Florence De Cock, hija wkoll minn Liège, spiċċat f’ħin ta’ 1:09:50.

Il-KESE kien rappreżentat mill-viċi president tiegħu, Cillian Lohan, li flimkien ma’ Stefaan De Rynck, kap tar-Rappreżentazzjoni tal-Kummissjoni Ewropea fil-Belġju, taw is-sinjal biex tinbeda t-tellieqa. Dawk kollha li ħadu sehem fit-tellieqa ngħataw tislima wkoll minn Jaume Duch, Direttur Ġenerali għall-Komunikazzjoni tal-Parlament Ewropew, u mir-Reġina Mathilda tal-Belġjani, li wkoll ħadet sehem fit-tellieqa.

It-tellieqa li jmiss ta’ 20 km fi Brussell se ssir fid-29 ta’ Mejju 2022. (ehp)