Mill-Grupp tal-Ħaddiema tal-KESE

Fi żmien meta tipi differenti ta’ kriżijiet u tranżizzjonijiet qed jolqtu d-dinja tax-xogħol id-djalogu soċjali jista’ jkun kruċjali biex jintlaħqu tliet objettivi ewlenin: l-antiċipazzjoni u l-ġestjoni tal-bidliet li jirriżultaw mit-tranżazzjonijiet ekoloġiċi, diġitali u demografiċi; it-titjib tal-prevenzjoni ta’ inċidenti fuq il-post tax-xogħol u mard relatat max-xogħol; u t-tħejjija għal kriżijiet potenzjali futuri tas-saħħa.

Fejn hemm bżonn, flimkien mad-djalogu soċjali, jeħtieġ jiġu adottati miżuri regolatorji mill-Unjoni Ewropea, kif ukoll linji gwida għal oqsma bħat-telexogħol u l-aġġornament tal-Ftehim Qafas Ewropew tal-2002.

Il-pandemija hija opportunità fejn jinħolqu kapaċitajiet kollettivi ġodda biex jiġu indirizzati l-kriżijiet futuri u biex jittaffew l-effetti tagħhom fuq is-saħħa u s-sigurtà fuq il-post tax-xogħol. Il-pjani ta’ rkupru għandhom jippermettu li jissaħħaħ ir-rwol tal-imsieħba soċjali fl-Istati Membri fejn l-inqas li għandu effett.

L-ispiża tal-mard relatat max-xogħol bħall-mard tal-qalb u l-burn out jeħtieġ li tiġi monitorjata bir-reqqa sabiex jiġu identifikati l-miżuri rilevanti fil-livell adatt skont il-Viżjoni Żero, bil-mira li ma jkunx hemm aktar imwiet relatati max-xogħol.

Il-miżuri tas-saħħa u s-sigurtà fuq il-post tax-xogħol mwettqa permezz tad-djalogu soċjali jikkontribwixxu b’mod pożittiv għas-saħħa tal-ħaddiema, jistgħu jtejbu l-profittabbiltà tal-intrapriżi, inaqqsu l-ispejjeż tal-kura u jnaqqsu l-assenteiżmu. L-ispiża għas-soċjetà minħabba l-korrimenti u l-mard relatati max-xogħol hija stmata għal 3,3 % tal-PDG tal-UE (EUR 476 biljun), jiġifieri iktar minn nofs il-fondi tal-pjan ta’ rkupru.

Din hija r-raġuni għaliex għandna noħolqu kultura ta’ prevenzjoni, u dan għandu jinvolvi t-taħriġ tal-atturi tad-djalogu soċjali, is-sensibilizzazzjoni dwar ir-riskji emerġenti, u t-tisħiħ u t-tixrid tar-riżorsi disponibbli.

In-negozjati bipartitiċi tal-imsieħba soċjali Ewropej huma ta’ importanza kbira biex jiġu indirizzati l-kwistjonijiet tas-saħħa u s-sigurtà fuq il-post tax-xogħol. Madankollu, l-applikazzjoni ta’ ftehimiet awtonomi kultant tkun irregolari, u tvarja skont is-saħħa relattiva tad-djalogu soċjali u d-diversità tas-sistemi ta’ relazzjonijiet relatati max-xogħol fl-Istati Membri. Din hija r-raġuni għaliex hija meħtieġa regolamentazzjoni f’ċerti oqsma, bħal pereżempju għar-riskji psikosoċjali u l-mard muskoloskeletali. (prp)