KESE info

Il-Kumitat Ekonomiku u Soċjali Ewropew (KESE) għandu pożizzjoni iebsa fir-rigward tal-ksur tal-istat tad-dritt fl-UE, u jiddikjara li huwa impenjat li jiżgura li l-Kunsill tal-Unjoni Ewropea u l-Kummissjoni Ewropea jimponu penali dissważivi għoljin fil-konfront ta' Stati Membri li sistematikament ma jirrispettawx l-istat tad-dritt b’mod li jpoġġi l-baġit tal-UE f'riskju.

Fl-Opinjoni fuq inizjattiva proprja dwar L-istat tad-dritt u l-fond ta' rkupru addottata fis-sessjoni plenarja tal-20 ta' Jannar, il-KESE laqa' r-Regolament tal-UE 2020/2092, li jippermetti lill-Kummissjoni timponi penali finanzjarji f'każ ta' nuqqasijiet sistematiċi fl-istat tad-dritt f'pajjiż partikolari tal-UE, u jappella sabiex ir-Regolament jiġi applikat strettament fl-oqsma kollha li huma rilevanti għall-baġit.

"L-istat tad-dritt huwa l-bażi indispensabbli għal soċjetà demokratika u pluraristika fl-Ewropa u għall-eżistenza kontinwa tal-UE", qal ir-relatur tal-Opinjoni, Christian Bäumler.

Sabiex jiġu indirizzati n-nuqqasijiet sistematiċi ta' konformità mal-istat tad-dritt, il-KESE jirrakkomanda li l-UE tuża l-mezzi l-oħra kollha ta' sanzjoni, bħall-proċedura ta' ksur prevista fl-Artikolu 263 tat-TFUE u l-proċedura stabbilita fl-Artikolu 7 tat-TUE.

Fil-fehma tal-KESE, jekk pajjiż tal-UE jikser sistematikament l-istat tad-dritt, dan dejjem jikkomprometti, jew tal-inqas jipperikola serjament, l-implimentazzjoni tal-programmi ffinanzjati mill-UE u huwa ta' detriment għall-baġit tal-UE. Għalhekk huwa essenzjali li l-benefiċjarji kollha tal-pagamenti mill-baġit tal-Unjoni jkunu konformi mar-regoli ta' trasparenza u jkunu jistgħu juru bis-sħiħ għal xiex qed jintużaw il-fondi.

Il-pjani nazzjonali għall-irkupru u r-reżiljenza għandhom ukoll jispjegaw il-miżuri li l-gvernijiet rispettivi se jieħdu sabiex isaħħu l-istat tad-dritt.
Madankollu, il-biċċa l-kbira tal-pjani nazzjonali ppreżentati s'issa jinkludu ftit wisq inizjattivi f'dan ir-rigward. Barra minn hekk, fil-valutazzjoni tagħha ta' dawn il-pjani, il-Kummissjoni ma tatx biżżejjed importanza għall-istat tad-dritt, li l-KESE jqis li huwa ta' dispjaċir.

Fl-Opinjoni, il-KESE jħeġġeġ lill-Istati Membri kollha biex jingħaqdu mal-kooperazzjoni msaħħa tal-Uffiċċju tal-Prosekutur Pubbliku Ewropew, u jappella biex dan isir prerekwiżit għall-parteċipazzjoni fil-programmi ffinanzjati mill-UE. Din il-kooperazzjoni diġà qed tibda tagħti riżultati u x’aktarx tikkontribwixxi fit-tul għal titjib enormi fil-prosekuzzjoni kriminali transfruntiera. (ll)

Il-Kumitat Ekonomiku u Soċjali Ewropew (KESE) laqa’ d-deżinjazzjoni tal-2022 bħala s-Sena Ewropea taż-Żgħażagħ, iżda jħoss li din għandha tmur lil hinn minn sempliċi attivitajiet promozzjonali: hija għandha tikkontribwixxi għall-istrateġija tal-UE għaż-żgħażagħ bi pjani u impenji ċari bil-għan li jinkisbu riżultati tanġibbli għaż-żgħażagħ Ewropej kollha.

Il-KESE organizza dibattitu dwar is-Sena Ewropea taż-Żgħażagħ 2022 fis-sessjoni plenarja tiegħu ta' Jannar, bil-parteċipazzjoni ta’ Anne Kjær Bathel, f'isem il-programm Mexxejja Żgħażagħ Ewropej, Joe Elborn, Segretarju Ġenerali tal-Forum Ewropew taż-Żgħażagħ, u Miriam Teuma, President tal-Kumitat ta’ Tmexxija Ewropew għaż-Żgħażagħ tal-Kunsill tal-Ewropa.

"Huwa fundamentali li ż-żgħażagħ ikollhom vuċi fit-tfassil tal-politiki tal-lum u ta' għada", qalet Christa Schweng, President tal-KESE. "Huma l-futur, għalhekk l-involviment tagħhom u l-investiment fihom huma kruċjali biex nibnu soċjetajiet stabbli, paċifiċi u sostenibbli, u biex niżviluppaw politiki li jissodisfaw il-ħtiġijiet speċifiċi tal-ġenerazzjonijiet żgħażagħ".

Il-KESE jinsab f'pożizzjoni unika biex jaħdem u jikkollabora ma' networks taż-żgħażagħ, u jinsab lest u ħerqan biex ikollu rwol ewlieni fis-Sena taż-Żgħażagħ, billi jibni fuq l-inizjattivi ta' suċċess tiegħu, bħal L-Ewropa Tiegħek, Leħnek, ir-Roundtables taż-Żgħażagħ dwar il-Klima u s-Sostenibbiltà, u s-Summit taż-Żgħażagħ dwar il-Klima tal-UE li jorganizza fil-bidu tas-sajf.

Il-KESE jistenna bil-ħerqa biex jagħti kontribut pożittiv għas-Sena Ewropea taż-Żgħażagħ 2022. Is-Sena Ewropea taż-Żgħażagħ trid tipproduċi riżultati tanġibbli għaż-żgħażagħ Ewropej f’oqsma ta’ politika li jħallu impatt fuq ħajjithom. (ks)

L-irkupru, is-saħħa u s-sens ta’ appartenenza huma t-tliet objettivi ewlenin tal-Presidenza Franċiża, li l-KESE jikkondividi u jappoġġja. Dan enfasizzatu l-President tal-KESE, Christa Schweng, waqt is-sessjoni plenarja tad-19 ta’ Jannar 2022 meta indirizzat lis-Segretarju tal-Istat Franċiż għall-Affarijiet Ewropej, Clément Beaune.

“Bi pjaċir nosserva li ħafna mill-prijoritajiet tagħkom – Ewropa aktar sovrana, mudell Ewropew ġdid għat-tkabbir u Ewropa umana – huma similari ħafna għal dawk tal-KESE”, qalet is-Sinjura Schweng, waqt li enfasizzat l-impenn u l-kontribut tal-KESE fit-tiswir ta’ Ewropa reżiljenti, b’saħħitha, sostenibbli u inklużiva.

Is-Sur Beaune enfasizza li l-Presidenza Franċiża tgħin tipprepara lill-Ewropa ta’ għada, b’ħarsa lejn l-2030, waqt li tpoġġi l-bażi għal bidliet estensivi relatati mal-valuri, l-investiment, iż-żgħażagħ, il-kultura u s-saħħa. Tingħata attenzjoni speċjali lill-promozzjoni tal-valuri li jgħaqqduna lkoll iżda li ddgħajfu f’dawn l-aħħar snin, forsi minħabba li kienu meqjusa bħala fatt, bħall-istat tad-dritt u l-valuri demokratiċi. Huwa qal li “Irridu nrawmu sens ta’ appartenenza u niddefendu l-valuri tagħna. Mhux se jkun hemm proġett politiku mingħajr din l-identità Ewropea komuni lil hinn mill-identitajiet nazzjonali”.

B’referenza għall-konklużjonijiet li jmiss tal-Konferenza dwar il-Futur tal-Ewropa, is-Sinjura Schweng żiedet li “bħala dar is-soċjetà ċivili organizzata Ewropea, aħna nistgħu nkunu l-aħjar alleati tagħkom f’din il-fażi finali sensittiva. Se jkun kruċjali li jiġu żgurati riżultati tanġibbli u segwitu trasparenti. In-nies se jkollhom bżonn it-trasparenza u jaraw li l-UE qed tagħmel dak li tgħid. Ir-rwol tal-Presidenza Franċiża, għalhekk, se jkun kruċjali għas-suċċess tal-Konferenza u biex l-UE tmur lura għand iċ-ċittadini tagħha.”

Is-Sur Beaune wiegħed li mill-Konferenza dwar il-Futur tal-Ewropa se jinsiltu proposti konkreti li “huwa essenzjali li jiġu implimentati b’mod rapidu, peress li l-Konferenza ma tistax tkun eżerċizzju artifiċjali iżda hija maħsuba li tħejji l-bażi għal riforma ġenwina.” (mp)

Il-KESE jemmen bis-sħiħ li mudell ta’ kura għall-anzjani dipendenti għandu jiġi integrat fit-tfassil tal-politika tal-UE, peress li l-proporzjon tal-popolazzjoni li għandha aktar minn 80 sena huwa mistenni li jkun aktar mid-doppju sal-2050.

Il-pandemija ħarġet fid-dieher xi fallimenti f’dan il-qasam u l-inizjattiva tal-Kummissjoni li tistabbilixxi Strateġija għall-Kura Ewropea ġdida hija pass fid-direzzjoni t-tajba, fil-fehma tal-KESE. Madankollu, iridu jgħidu tagħhom l-istituzzjonijiet konsultattivi u l-organizzazzjonijiet tas-soċjetà ċivili li jirrappreżentaw lill-anzjani.

Fl-Opinjoni fuq inizjattiva proprja tiegħu Lejn mudell ġdid ta’ kura għall-anzjani: Nitgħallmu mill-pandemija tal-COVID-19, adottata fis-sessjoni plenarja ta’ Jannar, il-KESE ta ħarsa iktar mill-qrib lejn diversi mudelli ta’ kura fit-tul għal persuni ikbar minn 65 sena li tilfu l-awtonomija tagħhom jew huma dipendenti fuq djar tal-kura istituzzjonali.

Miguel Ángel Cabra De Luna, relatur tal-Opinjoni, enfasizza li: “Il-kura għall-anzjani kollha trid tkun pedament tal-politiki tal-UE, b’rabta mal-konformità mal-Pjan ta’ Azzjoni tal-Pilastru Ewropew tad-Drittijiet Soċjali."

Il-KESE ppropona l-istabbiliment ta’ Osservatorju Ewropew għall-kura tal-anzjani, li jippermetti li tinġabar data statistika biżżejjed, li jsir qbil bejn l-aħjar prattika ta’ mudelli statali differenti, li jiġu identifikati dgħufijiet strutturali fis-sistemi nazzjonali, li jingħata appoġġ tekniku sabiex tiġi faċilitata l-adozzjoni ta’ linji gwida ta’ politika tal-UE u jgħin fl-implimentazzjoni tal-Pilastru Ewropew tad-Drittijiet Soċjali.

Barra minn hekk, l-Opinjoni tal-KESE ssejjaħ għal Sena Ewropea tal-Anzjani, bħala rikonoxximent tad-drittijiet fundamentali tal-anzjani u l-kontribut tagħhom lejn is-soċjetà, kif stabbilit fl-Artikolu 25 tal-Karta tad-Drittijiet Fundamentali tal-Unjoni Ewropea.

Matul in pandemija, id-drittijiet u l-ħtiġijiet tal-anzjani tqiesu parzjalment biss, u dan il-fatt żvela n-nuqqasijiet kunċettwali, strutturali u funzjonali tal-mudelli tal-kura tal-anzjani. F’kuntest usa’, din is-sitwazzjoni għenet biex jiġi enfasizzat aktar il-fatt li t-tixjiħ tal-popolazzjoni huwa sfida strateġika ewlenija għall-UE u l-Istati Membri tagħha. (at)

Minkejja l-bidla fir-riskji okkupazzjonali li ġabet magħha d-diġitalizzazzjoni tax-xogħol – li waslet għal żieda qawwija fl-istress u f’kundizzjonijiet ikkawżati minn burnouts jew korrimenti ergonomiċi, u waslet ukoll għal tnaqqis żgħir fl-għadd ta’ inċidenti fuq il-post tax-xogħol – id-djalogu soċjali jibqa’ strumentali fil-promozzjoni tas-saħħa u s-sikurezza okkupazzjonali (OSH), il-Kumitat Ekonomiku u Soċjali Ewropew (KESE) qal fl-Opinjoni “Id-djalogu soċjali bħala għodda għall-promozzjoni tas-saħħa u s-sigurtà fuq il-post tax-xogħol”.

“Il-miżuri tas-saħħa u s-sigurtà fuq il-post tax-xogħol mwettqa permezz tad-djalogu soċjali jikkontribwixxu b’mod pożittiv għas-saħħa tal-ħaddiema, iżda jistgħu jtejbu l-profittabbiltà tal-intrapriżi u jnaqqsu l-ispejjeż tal-kura u l-assenteiżmu. L-ispiża għas-soċjetà minħabba korrimenti u mard fuq il-post tax-xogħol hija stmata li tilħaq EUR 476 biljun jew 3.3% tal-PDG tal-UE,” qalet ir-relatur tal-Opinjoni, Franca Salis-Madinier.

Madankollu, il-kwalità tad-djalogu soċjali tvarja fi Stati Membri differenti, li jfisser li l-applikazzjoni ta’ ftehimiet awtonomi konklużi mal-imsieħba soċjali fil-qasam tal-OSH kultant ma tkunx indaqs madwar l-UE.

Skont il-KESE, id-djalogu soċjali Ewropew irid jissaħħaħ sabiex tiġi żgurata protezzjoni uniformi għall-ħaddiema kollha fl-UE.  
Għaldaqstant, il-Kummissjoni Ewropea għandha tistabbilixxi kriterji ċar sabiex tiżgura li l-ftehimiet iffirmati mill-imsieħba soċjali jiġu implimentati fl-Istati Membri kollha, speċjalment fid-dawl tas-sentenza tal-Qorti tal-Ġustizzja tal-UE, li qalet li l-Kummissjoni mhijiex obbligata li taġixxi skont it-talbiet tal-imsieħba soċjali biex timplimenta l-ftehimiet.

Madankollu, barra minn djalogu soċjali produttiv, l-istabbiliment tal-linji gwida ġenerali dwar l-OSH jeħtieġ qafas regolaturju b’saħħtu. Il-ftehimiet li jirriżultaw f’direttivi tal-Kunsill wara li ssir talba miż-żewġ partijiet firmatarji jidhru li huma aktar effettivi peress li jiżguraw pjani ta’ azzjoni speċifiċi fl-Istati Membri kollha.
Għal dan il-għan, il-KESE jappella għal linji gwida ġodda dwar it-telexogħol, pożizzjoni iżjed ambizzjuża fir-rigward tal-ġlieda kontra l-kanċer u għal direttivi tal-UE dwar disturbi muskoloskeletali u riskji psikosoċjali, li qed isiru theddida ewlenija okkupazzjonali għall-ħaddiema Ewropej.

Il-Grupp ta’ Min Iħaddem tal-KESE ressaq diversi emendi għall-Opinjoni, fejn esprima l-oppożizzjoni tiegħu, speċjalment fir-rigward ta’ sejħiet għal miżuri regolatorji ġodda, u pereżempju, l-azzjoni proposta tal-UE rigward disturbi muskoloskeletali u riskji psikosoċjali, kif ukoll l-abbozzar ta’ linji gwida ġodda dwar it-telexogħol.
L-Opinjoni, li kienet mitluba mill-presidenza Franċiża tal-UE, ġiet adottata fis-sessjoni plenarja tal-KESE f’Jannar, b’172 vot favur, 32 vot kontra u 70 astensjoni. (ll)
 

Il-KESE appella għall-ħolqien ta’ ombudsmen speċjali sabiex l-SMEs fl-Ewropa jingħataw għajnuna biex jindirizzaw il-kwistjonijiet finanzjarji u ta’ finanzjament tagħhom. Il-Kumitat jenfasizza wkoll li, biex l-SMEs jużaw l-IA, jeħtieġ li jkun hemm ir-rieda politika biex jingħataw appoġġ fil-proċess.

Fil-plenarja tiegħu ta’ Jannar, il-KESE adotta żewġ rapporti li jittrattaw xi wħud mill-aktar kwistjonijiet urġenti li għandhom impatt fuq l-SMEs.

Fl-Opinjoni dwar Strateġija għall-SMEs tal-ġenerazzjoni li jmiss – It-tisħiħ ta’ implimentazzjoni effettiva u rapida, il-KESE jenfasizza li l-aċċess għall-kreditu, il-likwidità, il-fluss tal-flus u l-pagamenti huma kollha ostakli kritiċi għall-SMEs, speċjalment bil-COVID - u b’hekk il-proposta li jinħoloq network ta’ ombudsmen finanzjarji u ta’ finanzjament biex:

•    jippromovi l-aċċess tal-SMEs għall-fondi;
•   iwettaq analiżi dwar jekk u kif il-banek intermedjarji jużaw strumenti finanzjarji sabiex jilħqu lill-SMEs l-aktar fil-bżonn ta’ riżorsi finanzjarji;
•  ikun medjatur għal tilwim bejn l-SMEs u l-fornituri ta’ servizzi finanzjarji u ta’ likwidità.

Il-KESE jissuġġerixxi wkoll:

•    il-ħolqien ta’ task force dwar il-likwidità tal-SMEs biex tissorvelja l-miżuri l-ġodda tal-Kummissjoni Ewropea biex ittejjeb il-likwidità fuq perjodu qasir tal-intrapriżi mikro, żgħar u ta’ daqs medju (MSMEs);

•    l-introduzzjoni ta’ formola ta’ applikazzjoni unika biex jittaffa l-piż għall-kumpaniji b’riżorsi umani u timijiet legali limitati li jixtiequ japplikaw għall-fondi tal-UE.

•    l-għoti ta’ aktar opportunitajiet għall-SMEs biex jitfgħu offerti u jirbħu kuntratti pubbliċi fl-Istati Membri.

Fl-Opinjoni dwar L-iżvilupp tal-Intelliġenza Artifiċjali fl-intrapriżi mikro, żgħar u ta’ daqs medju Ewropej (MSMEs), il-KESE jenfasizza li hija meħtieġa rieda politika b’saħħitha biex jingħelbu l-ostakli li jfixklu lill-MSMEs li jħaddnu l-IA.

Hemm bżonn rieda politika biex tinbena l-fiduċja, bl-għajnuna tal-imsieħba soċjali, il-kmamar tal-kummerċ, l-assoċjazzjonijiet professjonali u oħrajn biex jindirizzaw it-tħassib tal-MSMEs fil-prattika.

Il-KESE jissuġġerixxi sett ta’ miżuri li jirrikjedu wkoll rieda politika kontinwa - l-ewwel u qabel kollox:

•    edukazzjoni u t-taħriġ vokazzjonali li jintużaw għall-promozzjoni ta’ ħakma ġenerali tal-IA
•    jiġi żgurat li l-MSMEs ikollhom aċċess faċli kemm għall-finanzjament pubbliku kif ukoll għal dak privat għall-IA;
•   jiġu garantiti infrastruttura u konnessjonijiet kullimkien;
•   jiġi promoss l-għarfien dwar kwistjonijiet ta’ ċibersigurtà;
•   jixxerdu bl-aktar mod wiesa’ possibbli l-aħjar prattiki u stejjer ta’ suċċess. (dm)

Hemm bżonn ta’ strumenti finanzjarji ġodda biex l-ekonomija soċjali tibqa’ tikber lil hinn mill-istimolu pprovdut mill-programmi pubbliċi, jgħid rapport ġdid mill-KESE, li jappella wkoll għal taħriġ finanzjarju biex jitrawwem il-finanzjament privat.

L-ekonomija soċjali tista’ attira investimenti adatti biss jekk ikun hemm strumenti finanzjarji apposta li jibbilanċjaw l-impatt soċjali mar-ritorn aċċettabbli għall-investituri, u riskji medji għall-intrapriżi soċjali, jgħid il-KESE f’Opinjoni adottata f’Jannar.

Ir-relatur Giuseppe Guerini jgħid li “Hemm bżonn ġenwin li niffaċilitaw il-konnessjoni bejn id-dinja tal-invesiment privat u d-dinja tal-ekonomija soċjali. Nemmnu li ta’ spiss l-operaturi finanzjarji jaraw l-organizzazzjonijiet tal-ekonomija soċjali bħala riskju għoli sempliċiment minħabba li jużaw għodod li jintużaw b’mod ġenerali sabiex jiġu vvalutati tipi oħra ta’ intrapriżi”.

L-investimenti relatati mal-impatt soċjali għandhom jindirizzaw dawn il-kriterji:

• ikollhom għan ċar biex jinħoloq impatt soċjali;
• jappoġġjaw l-intrapriżi li huma definiti b’mod ċar bħala intrapriżi tal-ekonomija soċjali;
• jiġu stabbiliti livelli ta’ stennija abbażi ta’ ritorni ekonomiċi ġusti, sostenibbli u trasparenti, anke jekk inqas mill-medja tas-suq;
• jippermettu li parti mill-assi jerġgħu jiġu investiti f’investimenti oħra b’għanijiet soċjali;
• ikollhom impatt li jitkejjel;
• ikunu konsistenti mal-valuri tal-intrapriża li jinvestu fiha.

Għarfien reċiproku sod huwa essenzjali biex jintaqqas id-distakk tal-investiment.  Il-korelatur Marie Pierre le Breton tgħid li “L-atturi finanzjarji jeħtieġu jkunu appoġġjati aħjar biex jifhmu r-realtajiet tal-intrapriżi soċjali, u jgħinu lil dawn tal-aħħar jifhmu d-dinja u l-istrumenti ta’ finanzjament”.

It-tixrid ta’ prattiki tajbin, bħaċ-Ċentru tal-Għarfien Espert għall-Investiment li jħalli impatt tal-Finlandja, jew il-mudelli ta’ investiment “ħallas bir-riżultati” ta’ Franza, jista’ jgħin ukoll. Madankollu, għandhom jiġu stabbiliti indikaturi għall-UE kollha biex jiġi vvalutat l-impatt. Dawn jistgħu jkunu indikaturi oġġettivi, bħal impjiegi maħluqa, jew oħrajn suġġettivi, bħall-benesseri tal-komunità.

Fl-Opinjoni dwar Is-sigurtà alimentari u sistemi tal-ikel sostenibbli , li ġiet adottata fis-sessjoni plenarja tad-19 ta’ Jannar 2022, il-KESE identifika l-mezzi ewlenin għall-produzzjoni sostenibbli u kompetittiva tal-ikel fl-UE, biex titnaqqas id-dipendenza mill-importazzjonijiet u tiżdied l-awtonomija tal-UE fil-proteini.

Biex politika tal-ikel komprensiva tkun tassew rilevanti għall-konsumaturi Ewropej, huwa essenzjali li l-prezz u l-kwalità tal-ikel prodott b’mod sostenibbli fl-UE jkunu kompetittivi. Dan ifisser li s-settur agroalimentari Ewropew huwa kapaċi jwassal l-ikel għall-konsumaturi bi prezzijiet li jinkludu spejjeż żejda għal kriterji bħalma huma s-sostenibbiltà, it-trattament xieraq tal-annimali, l-ispejjeż ogħla tal-input, is-sikurezza alimentari u l-valur nutrizzjonali, iżda wkoll redditu ġust għall-bdiewa, u fl-istess ħin iżomm il-pożizzjoni tiegħu bħala l-għażla ppreferuta għall-parti l-kbira tal-konsumaturi.

Għalkemm il-Patt Ekoloġiku Ewropew joffri opportunità biex jiġi affermat mill-ġdid il-“kuntratt soċjali tal-ikel” bejn l-UE u ċ-ċittadini tagħha permezz tal-prinċipji stabbiliti fl-Istrateġija Mill-Għalqa sal-Platt u fl-Istrateġija għall-Bijodiversità, għad hemm ħafna xi jsir. “Il-Kummissjoni tipproponi ftit wisq azzjonijiet konkreti biex issaħħaħ is-settur agroalimentari u l-introjtu tal-bdiewa u tal-ħaddiema, u biex tippromovi prezzijiet ġusti u l-valur tal-ikel”, enfasizza l-korelatur, Peter Schmidt.

Kif ġie enfasizzat mir-relatur tal-Opinjoni, Arnold Peuch d’Alissac, “...it-trawwim ta’ awtonomija strateġika miftuħa, l-iżgurar ta’ reċiproċità tal-istandards kummerċjali, il-promozzjoni tar-riċerka, it-titjib tad-diġitalizzazzjoni, l-iżvilupp ta’ teknoloġiji innovattivi u żrieragħ u l-iffaċilitar tal-aċċess għat-taħriġ tal-bdiewa fir-rigward ta’ dawn it-teknoloġiji huma fost il-mezzi ewlenin biex tiġi salvagwardata l-kompetittività tal-produtturi Ewropej”.
It-titjib tal-produzzjoni tal-UE ta’ legumi, bus u ħemes b’kontenut għoli ta’ proteini u ta’ żrieragħ żejtnin u ta’ pasta taż-żrieragħ żejtnin ikun ta’ benefiċċju għall-bdiewa tal-UE u jkollu impatt pożittiv fuq il-klima, il-bijodiversità u l-ambjent. (mr)

Jeħtieġ li l-UE tadatta t-trasport Ewropew b’mod kontinwu għall-ħtiġijiet attwali u futuri, speċjalment fid-dawl tal-bidliet fid-domanda u x-xejra ’l fuq fil-fatturat tal-portijiet marittimi. Il-karatteristiċi ewlenin iridu jkunu l-multimodalità u t-tbaħħir intelliġenti, li jisfruttaw il-vantaġġi tad-diversi modi tat-trasport biex jinkisbu l-aħjar riżultati possibbli, filwaqt li fl-istess waqt tiżdied is-sikurezza u jitnaqqas il-piż ambjentali.

Dan huwa l-messaġġ ewlieni tal-Opinjoni abbozzata minn Mateusz Szymański u adottata fis-sessjoni plenarja ta’ Jannar tal-KESE, li tindirizza l-Komunikazzjoni tal-Kummissjoni dwar “NAIADES III: It-tisħiħ tat-trasport fl-ilmijiet navigabbli interni Ewropej li jibqa’ validu fil-futur”.

Waqt li tkellem fil-marġini tal-laqgħa, is-Sur Szymański qal: “NAIADES III huwa pjan ta’ azzjoni importanti. Il-KESE jappoġġja l-isforzi biex jiżdied is-sehem tat-trasport fl-ilmijiet navigabbli interni fit-trasport tal-passiġġieri u tal-merkanzija. Hemm potenzjal kbir f’dan il-qasam, li għadu mhux sfruttat. Neħtieġu rieda politika u impenn f’ħafna livelli biex nistabbilixxu miżuri ta’ appoġġ għall-iżvilupp u l-manutenzjoni tal-infrastruttura u l-promozzjoni tal-ilmijiet navigabbli interni bħala settur tal-karrieri. Anke n-network TEN-T jeħtieġ li jiġi aġġornat biex iwieġeb għal xejriet ġodda tat-trasport.” (mp)

F’Opinjoni esploratorja mitluba mill-Presidenza Franċiża tal-Kunsill tal-UE, il-KESE jistieden lill-Kummissjoni Ewropea tikkunsidra l-benefiċċji sostanzjali li r-reġjuni ultraperiferiċi jistgħu jġibu għall-futur tal-Ewropa.

Jeħtieġ li l-Kummissjoni tieħu miżuri adegwati biex tiżgura li dawn ir-reġjuni ma jitilfux opportunitajiet fir-rigward tal-irkupru wara l-COVID-19 jew tat-tranżizzjonijiet klimatiċi, soċjali u diġitali. Il-KESE jissuġġerixxi passi ewlenin ġodda għall-awtonomija tal-ikel u l-enerġija fir-reġjuni ultraperiferiċi, it-tranżizzjoni ekoloġika, it-turiżmu sostenibbli, l-inklużjoni soċjali, l-involviment tas-soċjetà ċivili, il-ħiliet u l-problema tal-ilma u s-sanità.

Ir-relatur Joël Destom qal li “Ir-reġjuni ultraperiferiċi għandhom jitqiesu bħala bankijiet tat-test għall-promozzjoni tal-progress fuq skala globali, u jistgħu jsiru mudelli li jistgħu jiġu replikati”.

Il-korelatur Gonçalo Lobo Xavier qal, “Il-KESE jappella sabiex jiġi żgurat l-aċċess diġitali fir-reġjuni ultraperiferiċi, u li jiġi inkluż proġett ewlieni għall-aċċess għall-ilma u s-sanità fil-programmi operattivi li jmiss”. (tk)

F’Jannar 2022, il-KESE adotta Opinjoni li ndirizzat ir-rakkomandazzjonijiet tal-Kummissjoni Ewropea dwar il-politika ekonomika taż-żona tal-euro għall-2022, waqt li tqiesu ċ-ċirkostanzi attwali.

Ir-relatur Juraj Sipko kkumenta: “Waħda mill-isfidi ewlenin għall-ekonomija taż-żona tal-euro hija kif għandna nindirizzaw l-akkumulazzjoni ta’ livelli għoljin ta’ dejn pubbliku, il-livell għoli ta’ inflazzjoni u kif għandna nkomplu bil-proċess ta’ trasformazzjoni lejn ekonomija ekoloġika u diġitali, filwaqt li niffukaw ukoll fuq l-istabilità soċjali”.

Il-KESE huwa tal-fehma li l-Patt ta’ Stabbiltà u Tkabbir tal-UE m’għadux adatt għal dawn il-kundizzjonijiet. Il-proġett tal-unjoni bankarja jrid javvanza aktar malajr u l-Unjoni tas-Swieq Kapitali jeħtieġ li titlesta. Il-KESE jinsab imħasseb ukoll dwar l-approfondiment tal-instabilità soċjali u jappella għal indikaturi ġodda u aktar adatti għall-inugwaljanza u l-faqar. (tk)

F’Opinjoni adottata f’Jannar 2022, il-KESE jilqa’ l-għan tal-Kummissjoni Ewropea li tiċċara u taġġorna l-qafas eżistenti tal-UE u li tistruttura t-tassazzjoni Ewropea b’mod li jiffavorixxi l-enerġija sostenibbli mhux fossili.

Madankollu, il-KESE jinsab imħasseb ukoll dwar l-impatt soċjoekonomiku negattiv possibbli ta’ xi wħud mill-miżuri li jinsabu fil-Proposta għal Direttiva tal-Kummissjoni Ewropea.

“Nappellaw għal attitudni aktar flessibbli dwar il-bijofjuwils ammissibbli u t-tassazzjoni tagħhom” qal ir-relatur Stefan Back.

Il-Kumitat jirrakkomanda wkoll li jintuża l-kunċett ta’ “faqar enerġetiku”, aktar milli “unitajiet domestiċi vulnerabbli”, jappella sabiex it-taxxi ambjentali jiġu ritornati lill-persuni l-aktar milquta, u jemmen fl-aġġustament tas-sistema tal-ipprezzar tal-UE biex tirrifletti l-prezz tal-forom kollha tal-enerġija.

“Il-KESE jiddispjaċih ukoll li fil-proposta ma ġewx inklużi miżuri adegwati biex jiġi evitat il-faqar tal-mobbiltà” żied jgħid il-korelatur Philippe Charry. (tk)

Ir-rwol ewlieni tal-materja prima ġie diskuss f’ċertu dettal f’konferenza ta’ livell għoli ospitata mill-KESE fil-31 ta’ Jannar. Il-Konferenza ffokat speċifikament fuq żewġ aspetti ewlenin: ir-rwol essenzjali li għandha l-materja prima kritika biex tiġi żgurata l-awtonomija strateġika tal-UE fit-tranżizzjoni ekoloġika u diġitali u l-importanza taċ-ċirkolarità f’termini tal-ħtieġa li jinħoloq suq għall-materja prima sekondarja fl-Ewropa.

“Għall-biċċa l-kbira tal-materja prima, l-Ewropa tiddependi ħafna mill-bqija tad-dinja. L-Ewropa għandha tkun fit-tmexxija u turi li din l-industrija tista’ tkun sostenibbli f’termini ambjentali u umani,” qalet il-President tal-KESE Christa Schweng, li enfasizzat ukoll il-ħtieġa għal sħubijiet strateġiċi ma’ pajjiżi li jaħsbuha l-istess madwar id-dinja.

Thierry Breton, il-Kummissarju Ewropew għas-Suq Intern, indirizza l-konferenza permezz ta’ messaġġ bil-vidjo u qal, “Ser neħtieġu 60 darba aktar litju sal-2050 għall-batteriji elettriċi tal-vetturi. M’għandi l-ebda dubju li l-ekonomija ċirkolari se ssir il-modus operandi l-ġdid għall-materja prima. Din se tkun għodda kruċjali oħra għad-dispożizzjoni tagħna biex niżguraw is-sigurtà u r-reżiljenza tal-ktajjen tal-provvista tagħna. Il-KESE u l-Kummissjoni Ewropea huma tal-istess fehma”.

Agnès Pannier-Runacher, Segretarju tal-Istat Franċiż għall-Industrija, irrikonoxxiet il-materja prima kritika bħala kwistjoni ewlenija għall-awtonomija tal-Ewropa fit-tranżizzjoni lejn ekonomija ekoloġika u diġitali bbażata fuq mudell ċirkolari. Filwaqt li l-awtonomija tal-enerġija tal-Ewropa hija waħda mill-prijoritajiet tal-Presidenza Franċiża tal-Kunsill tal-Unjoni Ewropea, kompliet tgħid li “ma nistgħux nippermettu li d-dipendenza tagħna mill-fjuwils fossili tinbidel f’dipendenza ġdida minn dawn il-metalli strateġiċi”.

Il-membri tal-bord qablu li l-Ewropa trid turi tmexxija globali f’dan il-qasam billi tgħolli l-istandards ambjentali, soċjali u ta’ governanza tagħha għal livelli mingħajr preċedent.
“Il-KESE huwa konxju bis-sħiħ tal-ħtieġa urġenti li nindirizzaw din il-kwistjoni. Il-KESE jemmen li l-azzjonijiet previsti mill-Kummissjoni Ewropea huma essenzjali jekk irridu nżommu u nsaħħu l-bażi industrijali tal-UE,” qal il-President tal-Kummissjoni Konsultattiva dwar il-Bidliet Industrijali tal-KESE, Pietro Francesco De Lotto, li ppresjeda l-konferenza.

Bħala konklużjoni, l-istituzzjonijiet pubbliċi għandhom ikomplu jingħaqdu u jaġixxu, u s-soċjetà ċivili jeħtiġilha tkompli tinvolvi ruħha f’dan il-qasam.

Il-konferenza kienet parti mill-attivitajiet tal-KESE b’rabta mal-Konferenza dwar il-Futur tal-Ewropa. (ks)