Jekk l-UE trid tibqa’ ħajja, trid tikkomunika b’mod effettiv, speċjalment fil-kuntest attwali ta’ diżinformazzjoni sfrenata, iż-żieda rapida tal-intelliġenza artifiċjali u żieda fit-tendenzi awtoritarji. Biex tilħaq lil kulħadd, il-komunikazzjoni dwar l-UE jeħtieġ tasal fil-livell lokali.

Rebranding Europe, il-ktieb il-ġdid tal-istrateġista tal-komunikazzjoni u awtur Stavros Papagianneas, iwitti t-triq għal diskussjoni kritika dwar ir-rwol tal-UE fix-xena globali, li l-Ewropa tinsab f’salib it-toroq fid-dawl tal-aggressjoni Russa kontra l-Ukrajna, li qed tidħol fit-tielet sena tagħha, il-gwerra fil-Lvant Nofsani u sensiela ta’ sfidi ġeopolitiċi u ekonomiċi.

Il-preżentazzjoni tal-ktieb saret fit-3 ta’ Diċembru fir-Residence Palace fi Brussell, li għaliha attenda l-Viċi President tal-KESE għall-Komunikazzjoni Laurenţiu Plosceanu, li ħa sehem fid-dibattitu dwar il-pożizzjoni tal-Ewropa f’arena globali turbolenti u l-ħtieġa li l-UE tikkomunika l-valuri tagħha b’mod effettiv.

“L-UE tinsab f’mument determinanti. Biex tiżgura l-futur tagħha, l-Ewropa jeħtiġilha tikkomunika viżjoni ċara u konvinċenti liċ-ċittadini tagħha u lid-dinja. Din mhix kwistjoni ta’ politika, iżda ta’ fiduċja, identità u skop kondiviż,” spjega Papagianneas.

Il-parteċipanti fid-dibattitu enfasizzaw li komunikazzjoni effettiva mhijiex biss għażla iżda ħtieġa għas-sopravivenza tal-UE, speċjalment fl-era attwali mifnija diżinformazzjoni, l-użu tal-intelliġenza artifiċjali, u awtoritarjaniżmu li qed jinfirex dejjem aktar. L-Ewropa trid tkun minn ta’ quddiem fil-promozzjoni tad-demokrazija u d-drittijiet tal-bniedem. Ir-rwol tal-media huwa essenzjali fit-tiswir tal-isfera pubblika tal-Ewropa, kif irrikonoxxa Colin Stevens, kap editur ta’ EU Reporter u moderatur tad-diskussjoni. “Aħna, il-media, irridu nispjegaw u nirrepetu bla heda li l-Ewropa tikkonċerna lil kulħadd. U rridu nwasslu dan il-messaġġ kuljum,” qal Stevens.

L-esperti jaqblu li huwa diffiċli ħafna li nikkumbattu l-miżinformazzjoni jew l-aħbarijiet foloz f’ras il-għajn, b’mod partikolari minħabba l-użu mifrux tal-intelliġenza artifiċjali. L-aktar kontromiżura effettiva hija li tinħoloq reżiljenza fi ħdan il-popolazzjoni.

Is-Sur Plosceanu qal li “wasal iż-żmien li niftħu widnejna sew għal dak li qed jgħidulna ċ-ċittadini, aktar milli nitkellmu magħhom. Iċ-ċittadini jridu aktar involviment u parteċipazzjoni. Huwa saħaq l-importanza tal-kooperazzjoni mal-istampa reġjonali u ħeġġeġ lill-Istituzzjonijiet tal-UE biex jiżviluppaw sħubijiet mal-media reġjonali u jistiednu lill-ġurnalisti reġjonali fi Brussell. Huwa temm jgħid li l-Ewropa jeħtieġ tilħaq il-livell lokali, il-livell taċ-ċittadini.

Peress li l-maġġoranza taċ-ċittadini Ewropej l-ewwel jaħsbu mill-perspettiva lokali, wara reġjonali, imbagħad nazzjonali, u fl-aħħar nett dik Ewropea, il-komunikazzjoni dwar l-Ewropa trid tadatta għal din ir-realtà u tirrikonoxxi li biex jintlaħqu ċ-ċittadini, in-narrattivi jridu jkunu lokali, reġjonali u nazzjonali. (mt)

Fl-2025, għandna responsabbiltà kondiviża biex nibnu Ewropa aktar b’saħħitha

Hekk kif dħalna fl-2025, il-Presidenza Pollakka tal-Kunsill tal-Unjoni Ewropea ġġib sens ta’ urġenza u determinazzjoni biex jiġu indirizzati l-isfidi kumplessi li jsawru l-preżent u l-futur tal-Ewropa. Bit-tema ġenerali ta’ sigurtà, it-tmexxija tal-Polonja twiegħed li tiggwidana matul sena li se tkun kruċjali għar-reżiljenza, il-koeżjoni u l-progress tal-UE.

Il-prijoritajiet deskritti mill-Presidenza Pollakka jirriflettu approċċ komprensiv għas-sigurtà fil-ħafna dimensjonijiet tagħha. Is-sigurtà interna, b’enfasi fuq il-protezzjoni tal-fruntieri u l-ġlieda kontra d-diżinformazzjoni, tenfasizza l-ħtieġa għal viġilanza kontra t-theddid emerġenti. Is-sigurtà esterna se tiffoka fuq it-tisħiħ tal-kapaċitajiet tad-difiża, it-trawwim tal-innovazzjoni, u li jiġu aċċellerati l-isforzi tat-tkabbir biex tiġi żgurata l-istabbiltà fil-viċinat tagħna. Sadanittant, is-sigurtà ekonomika, tal-enerġija, tal-ikel u tas-saħħa se tibqa’ ċentrali biex jiġu żgurati l-indipendenza tal-Ewropa u l-benesseri taċ-ċittadini tagħha.

Fil-Kumitat Ekonomiku u Soċjali Ewropew (KESE), aħna lesti li nappoġġjaw bis-sħiħ l-aġenda tal-Presidenza, billi nisfruttaw ir-rwol uniku tagħna bħala l-vuċi tas-soċjetà ċivili. Il-KESE ser jikkontribwixxi b’mod attiv għad-diskussjonijiet dwar kif tista’ tiġi ssalvagwardjata l-kompetittività tal-Ewropa filwaqt li jiġi żgurat li ħadd ma jitħalla jibqa’ lura fit-tranżizzjonijiet li qed niffaċċjaw – kemm jekk ikunu diġitali, ekoloġiċi jew ekonomiċi.

Din is-sena hija kkaratterizzata wkoll minn tiġdid politiku, bil-Kummissjoni Ewropea li għadha kif ġiet iffurmata tibda l-mandat tagħha. Dan jipprovdi opportunità ġdida biex jitfasslu oqfsa ta’ politika u jiġu implimentati inizjattivi li jallinjaw mal-aspettattivi taċ-ċittadini Ewropej. Il-KESE se jaqdi r-rwol tiegħu fl-appoġġ ta’ dan il-kapitolu l-ġdid, u se jiżgura li l-perspettivi tas-soċjetà ċivili u tal-imsieħba soċjali jkunu fil-qalba tat-teħid tad-deċiżjonijiet tal-UE.

Hekk kif inħarsu ’l quddiem lejn l-2025, niftakru fir-responsabbiltà kondiviża tagħna li nibnu Ewropa aktar b’saħħitha u aktar inklużiva. Il-KESE ser ikompli jippromovi l-istat tad-dritt, l-iżvilupp sostenibbli u l-koeżjoni soċjali, u se jiżgura li l-kontributi tas-soċjetà ċivili jsawru l-prijoritajiet tal-aġenda tal-UE. Flimkien mal-Presidenza Pollakka, ser nistinkaw biex nindirizzaw l-isfidi urġenti tal-lum u nwittu t-triq għal Ewropa sigura, kompetittiva u magħquda għall-ġenerazzjonijiet li ġejjin.

Oliver Röpke

Il-President tal-KESE

L-akkomodazzjoni trid tiġi ttrattata bħala dritt fundamentali, biex tiġi żgurata akkomodazzjoni deċenti u sostenibbli għall-Ewropej kollha, inklużi ż-żgħażagħ u l-gruppi vulnerabbli.

Din hija s-sejħa qawwija mressqa mill-Forum tal-KESE dwar l-Akkomodazzjoni, li sar għall-ewwel darba fis-sessjoni plenarja ta’ Diċembru fil-5 ta’ Diċembru 2024. Id-dibattitu kien jinkludi l-parteċipazzjoni ta’ kelliema prominenti u l-adozzjoni ta’ opinjoni dwar is-suġġett.

Wara l-ħatra ta’ Dan Jørgensen bħala Kummissarju għall-enerġija u l-akkomodazzjoni, il-President tal-KESE Oliver Röpke laqa’ d-deċiżjoni storika li jinħoloq portafoll speċifiku dwar l-akkomodazzjoni fi ħdan il-Kummissjoni l-ġdida. Is-Sur Röpke qali li: ‘“L-akkomodazzjoni hija dritt fundamentali, mhux privileġġ, u ma nistgħux naċċettaw l-esklużjoni ta’ popolazzjonijiet vulnerabbli minn din il-ħtieġa essenzjali. Hekk kif qed naffaċċjaw kriżi serja tal-akkomodazzjoni li taffettwa kważi kull Stat Membru, nenfasizza l-ħtieġa urġenti li jiġi żgurat li l-akkomodazzjoni affordabbli, sostenibbli u deċenti ssir realtà għal kulħadd.”

Huwa u jappella għal perspettiva ġdida li tqis l-akkomodazzjoni bħala infrastruttura essenzjali għas-soċjetà, fuq l-istess livell bħas-saħħa u l-edukazzjoni, Bent Madsen, il-President ta’ Housing Europe, qal: “Aħna nilqgħu s-sentiment li juri l-Kummissarju l-ġdid għall-akkomodazzjoni meta qal li l-approċċ tagħna għandu jkun ibbażat fuq valuri, regoli u investiment. Aħna lesti bħala kooperattiva pubblika u bħala fornituri tal-akkomodazzjoni soċjali biex nuru t-triq biex jiġu pprovduti d-djar li n-nies u s-soċjetajiet tagħna jeħtieġu.”

Fl-Opinjoni dwar L-akkomodazzjoni soċjali fl-UE – deċenti, sostenibbli u affordabbli, abbozzata minn Thomas Kattnig u Rudolf Kolbe, il-KESE jirrikonoxxi li kien hemm falliment tas-suq fl-akkomodazzjoni. Dan irid jiġi indirizzat billi jittejbu l-kundizzjonijiet qafas bħad-data, il-koordinazzjoni, il-proċeduri ta’ approvazzjoni u r-regoli dwar l-ippjanar tal-użu tal-art, jiġi stabbilit dritt fundamentali għall-akkomodazzjoni, jiġi pprovdut finanzjament suffiċjenti, jiġi implimentat l-approċċ ‘L-Akkomodazzjoni l-Ewwel’ għall-persuni mingħajr dar, u billi ssir enfasi akbar fuq is-sostenibbiltà u l-ħtiġijiet taż-żgħażagħ. (mp)

Minn Thomas Kattnig

L-akkomodazzjoni m’għadhiex affordabbli għal għadd dejjem jikber ta’ nies minħabba ż-żieda fil-prezzijiet tal-kirjiet u tal-proprjetà immobbli, u minħabba s-salarji li mhux iżommu l-pass mal-inflazzjoni. Il-kriżi tal-akkomodazzjoni fl-UE hija reali.

Dan qed iwassal għal kostijiet ogħla tal-kura tas-saħħa, telf fil-produttività, ħsara ambjentali u konsegwenzi ekonomiċi negattivi minħabba tnaqqis fil-kapaċità tal-akkwist.

Il-KESE, bħala leħen is-soċjetà ċivili organizzata, jemmen li għandha tittieħed azzjoni urġenti biex jiġi indirizzat il-falliment tas-suq fis-settur tal-akkomodazzjoni. Għalhekk, nappellaw lill-Kummissjoni biex taħdem mal-Parlament, l-Istati Membri u s-soċjetà ċivili biex tfassal pakkett komprensiv ta’ miżuri tal-UE li jistabbilixxu kundizzjonijiet qafas u d-dritt għall-akkomodazzjoni, f’konformità mal-Pilastru Ewropew tad-Drittijiet Soċjali u l-Karta tad-Drittijiet Fundamentali.

Għalhekk nilqgħu l-ħatra ta’ Kummissarju għall-Enerġija u għall-Akkomodazzjoni u t-tħabbira li se jitressaq pjan Ewropew għal akkomodazzjoni affordabbli fil-100 jum li ġejjin. Fost affarijiet oħra neħtieġu reġistru ta’ trasparenza fl-UE kollha għat-tranżazzjonijiet tal-proprjetà immobbli, koordinazzjoni aktar semplifikata, proċeduri għall-għoti ta’ permessi aktar effiċjenti, ippjanar aħjar tal-użu tal-art, art affordabbli għall-akkomodazzjoni soċjali, aktar investiment fir-rinnovazzjoni u kostruzzjoni li ma tagħmilx ħsara lill-klima, u l-programm “L-Akkomodazzjoni l-Ewwel” (Housing First) sabiex il-persuni mingħajr dar jerġgħu jingħataw s-sigurtà u l-prospetti. Nappellaw biex l-akkomodazzjoni tiġi inkorporata fil-liġi primarja tal-UE biex b’hekk tkun rikonoxxuta bħala dritt fundamentali u mhux sepliċi komodità.

Fl-istess ħin, naqblu mar-rapport ta’ Letta li l-aċċess għall-akkomodazzjoni soċjali jeħtieġ li jiġi definit b’mod aktar wiesa’ fil-liġi dwar l-għajnuna mill-Istat.

Barra minn hekk, il-KESE jappella għal żieda sinifikanti fl-appoġġ finanzjarju għall-akkomodazzjoni soċjali. L-ewwel nett, l-investiment pubbliku fl-akkomodazzjoni soċjali jrid jiġi eskluż mir-regoli dwar id-dejn tal-Patt ta’ Stabbiltà u Tkabbir. It-tieni nett, l-iżviluppaturi u l-kooperattivi tal-proprjetà mingħajr skop ta’ qligħ, kif ukoll il-muniċipalitajiet, għandhom ikunu jistgħu jiksbu self fit-tul mingħajr imgħax permezz tal-pjattaforma ta’ investiment ippjanata jew direttament mill-Bank Ewropew tal-Investiment.

L-akkomodazzjoni disponibbli qed tkompli tonqos minħabba l-kirjiet għal żmien qasir, li saru problema f’ħafna bliet Ewropej ewlenin. Biex nindirizzaw dan il-fenomenu, neħtieġu sett ta’ għodod fil-livell tal-UE li jinkludi, fost l-oħrajn, taxxa fuq l-akkomodazzjoni vakanti u limiti massimi fuq il-kera, sabiex l-Istati Membri jkunu jistgħu jieħdu azzjoni adegwata.

Għandha tingħata wkoll attenzjoni partikolari a) biex jiġu ssodisfati l-ħtiġijiet ta’ akkomodazzjoni taż-żgħażagħ permezz ta’ programmi mmirati bħal “L-Akkomodazzjoni l-Ewwel għaż-Żgħażagħ” (Housing First for Youth) u b) għall-inklużjoni tal-persuni b’diżabilità.

Sabiex jiġi żgurat li l-akkomodazzjoni ma tkunx biss affordabbli iżda wkoll sostenibbli, ir-rinnovazzjonijiet ta’ binjiet eżistenti għandhom jingħataw prijorità fuq bini ġdid. Biex jiġu ffaċilitati rinnovazzjonijiet bħal dawn, nappellaw għal taħlita ta’ miżuri obbligatorji u ta’ appoġġ biex jiġi żgurat li tittieħed azzjoni klimatika ġusta. Neħtieġu għodod ta’ finanzjament biex kulħadd, irrispettivament mis-sitwazzjoni finanzjarja, ikun jista’ jwettaq rinnovazzjonijiet termali u tal-enerġija. Fl-istess ħin, iridu jiġu stabbiliti obbligi għas-sidien tal-proprjetà, b’mod partikolari s-sidien tal-kera, sabiex l-inkwilini jiġu protetti minn żidiet eċċessivi fil-kera minħabba trasferiment tal-ispejjeż mis-sidien.

Fl-aħħar nett, nenfasizzaw li l-kriżi tal-akkomodazzjoni ma taffettwax biss b’mod negattiv il-kwalità tal-ħajja taċ-ċittadini Ewropej, iżda thedded ukoll il-funzjonament bla xkiel tas-suq intern tal-UE. Għalhekk neħtieġu strateġija tal-UE dwar l-akkomodazzjoni biex tiżdied il-provvista tal-akkomodazzjoni, jiġu introdotti miżuri biex jitnaqqsu l-ispejjeż tal-kostruzzjoni, tingħata għajnuna biex jittejbu l-ħiliet tal-forza tax-xogħol, tiżdied il-produttività u tittejjeb il-prestazzjoni ambjentali tal-industrija tal-kostruzzjoni.

Il-KESE jappella għal tranżizzjoni ġusta u inklużiva hekk kif l-UE timxi lejn in-newtralità klimatika. F’Opinjoni reċenti, il-KESE jenfasizza l-ħtieġa għal sforzi kkoordinati biex jiġi żgurat li, meta jintlaħqu l-għanijiet klimatiċi ambizzjużi, ħadd ma jitħalla jibqa’ lura. Dawn ir-rakkomandazzjonijiet huma allinjati mal-prijoritajiet tal-Kummissjoni Ewropea għall-2024-2029, li jindirizzaw l-impjiegi, il-ħiliet, il-benesseri soċjali u d-disparitajiet reġjonali.

Il-KESE qed jirrakkomanda pakkett komprensiv ta’ politika għal tranżizzjoni ġusta, li jippermetti flessibbiltà għall-Istati Membri biex jindirizzaw iċ-ċirkostanzi partikolari tagħhom stess. Waqt li jidentifika d-djalogu soċjali u n-negozjar kollettiv bħala għodod ewlenin, il-KESE jipproponi wkoll l-immappjar tad-diskrepanzi fil-ħiliet, programmi ta’ taħriġ inklużivi, pjani trasparenti ta’ tranżizzjoni tal-kumpaniji, konsultazzjoni akbar tal-ħaddiema u l-integrazzjoni ta’ prinċipji ta’ tranżizzjoni ġusta fl-oqfsa tal-UE bħall-Pilastru Ewropew tad-Drittijiet Soċjali.

“Irridu li t-tranżizzjoni ġusta tkun storja fejn il-ġustizzja, ir-reżiljenza u s-sostenibbiltà jwittu t-triq għal futur aktar ekoloġiku u aktar inklużiv,” qal Dirk Bergrath, ir-relatur tal-Opinjoni.

Sabiex jinkisbu l-ambizzjonijiet klimatiċi tal-Ewropa – tnaqqis ta’ 75% fl-emissjonijiet sal-2030 u emissjonijiet żero netti sal-2050 – il-ġustizzja jeħtieġ li tiġi inkorporata fil-politiki, il-KESE enfasizza fl-Opinjoni. Il-prijoritizzazzjoni tax-xogħol deċenti, l-inklużjoni soċjali u t-tnaqqis tal-faqar hija vitali biex jiġi sostnut l-appoġġ pubbliku u jiġi żgurat is-suċċess tal-Patt Ekoloġiku Ewropew.

Barra minn hekk, il-KESE jenfasizza appoġġ immirat għar-reġjuni affettwati b’mod sproporzjonat mit-tranżizzjoni ekoloġika. L-immappjar tal-ħtiġijiet reġjonali u tat-tranżizzjonijiet settorjali huwa kritiku, bl-Osservatorju ta’ Tranżizzjoni Ġusta jimmonitorja l-progress u jiżgura li l-ebda komunità ma tiġi injorata.

Biex jitnaqqsu d-diskrepanzi fil-finanzjament, huwa essenzjali li jiżdied il-Fond għal Tranżizzjoni Ġusta, jiġi ingranat l-investiment privat u jiġu allinjati l-istrumenti finanzjarji tal-UE. Il-kundizzjonalitajiet soċjali u ambjentali se jiżguraw allokazzjoni ekwa, b’enfasi fuq it-taħriġ u l-protezzjoni għall-gruppi vulnerabbli. (ks) 

Id-9 Forum Ewropew dwar il-Migrazzjoni, organizzat mill-Kumitat Ekonomiku u Soċjali Ewropew (KESE) u mid-Direttorat Ġenerali għall-Migrazzjoni u l-Affarijiet Interni tal-Kummissjoni Ewropea, iffoka fuq kif is-soċjetà ċivili jista’ jkollha rwol ewlieni fl-implimentazzjoni li jmiss tal-Patt dwar il-Migrazzjoni u l-Ażil, u enfasizza wkoll il-ħidma diretta tal-organizzazzjonijiet tas-soċjetà ċivili f’dan il-qasam.

Il-Forum Ewropew dwar il-Migrazzjoni, li sar fi Brussell lejn l-aħħar ta’ Novembru, xeħet dawl fuq il-Patt dwar il-Migrazzjoni u l-Ażil, li daħal fis-seħħ f’Ġunju 2024. Il-parteċipanti esploraw l-implimentazzjoni li jmiss tiegħu u kif is-soċjetà ċivili tista’ tgħin fl-appoġġ u l-applikazzjoni tal-Patt b’mod uman. L-avveniment ta ħarsa aktar mill-qrib lejn il-mekkaniżmu ta’ solidarjetà permanenti l-ġdid, li ħoloq rabtiet aktar mill-qrib bejn il-proċeduri tal-ażil u tar-ritorn, kundizzjonijiet ta’ akkoljenza adegwati u l-Pjan ta’ Azzjoni dwar l-Integrazzjoni u l-Inklużjoni 2021–2027.

Fis-sessjoni tal-ftuħ, il-Kummissarju Ewropew għall-Affarijiet Interni li għadha kif temmet il-kariga tagħha, Ylva Johansson, qalet: “Ninsab kuntenta li wieħed mill-aħħar dmir pubbliku tiegħi bħala Kummissarju huwa li nitkellem f’dan il-Forum Ewropew dwar il-Migrazzjoni, pjattaforma kruċjali għall-organizzazzjonijiet tas-soċjetà ċivili, għall-Istati Membri u għal dawk li jfasslu l-politika biex jiġu indirizzati l-isfidi u l-opportunitajiet relatati mal-ġestjoni tal-migrazzjoni. Id-diskussjonijiet tagħna matul is-snin dejjem kienu ta’ ispirazzjoni. Flimkien, nistgħu nibnu komunitajiet aktar b’saħħithom u aktar reżiljenti, inħarsu l-valuri tagħna u niżguraw li l-Ewropa tibqa’ post ta’ rifuġju u ta’ opportunità”.

Il-President tal-KESE, Oliver Röpke, irringrazzja lill-Kummissarju Johansson għad-dedikazzjoni tagħha għar-riforma tal-politika tal-UE dwar il-migrazzjoni. “Jeħtiġilna niżguraw li l-Patt dwar il-Migrazzjoni jiġi implimentat bl-aktar mod uman u sostenibbli possibbli, u l-uniku mod kif nistgħu nagħmlu dan huwa billi nisimgħu lill-organizzazzjonijiet tas-soċjetà ċivili attivi f’dan il-qasam. Għalkemm il-Patt ġie adottat, il-ħidma għadha ’l bogħod milli tintemm – fil-fatt, wieħed jista’ jgħid li l-ħidma reali tibda issa”, huwa wissa.

Il-Forum Ewropew dwar il-Migrazzjoni ġie stabbilit fl-2015 bħala pjattaforma għal djalogu bejn is-soċjetà ċivili, l-istituzzjonijiet u l-awtoritajiet dwar kwistjonijiet relatati mal-migrazzjoni u l-integrazzjoni ta’ ċittadini ta’ pajjiżi terzi. Huwa jiltaqa’ darba fis-sena biex jiddiskuti l-aħħar żviluppi ta’ politika u biex jiġbor u jiskambja informazzjoni dwar kif il-politiki Ewropej jiġu implimentati fil-livelli reġjonali, lokali u taċ-ċittadini.

Kull sena, il-Forum jiffoka fuq tema differenti, li tintgħażel abbażi tal-kontribut li jipprovdu l-organizzazzjonijiet tas-soċjetà ċivili matul il-proċessi ta’ konsultazzjoni li jitwettqu fix-xhur ta’ qabel l-avveniment. S’issa il-Forum kopra suġġetti bħal rotot ta’ migrazzjoni sikuri, l-aċċess tal-migranti għad-drittijiet u s-servizzi u għall-UE, suq tax-xogħol Ewropew aktar inklużiv għall-migranti u r-rwol taż-żgħażagħ.

Il-KESE diġà adotta Opinjonijiet ewlenin dwar temi ewlenin relatati mal-migrazzjoni u l-ażil, inkluż dwar il-ħolqien tal-Patt dwar il-Migrazzjoni u l-Ażil, dwar ir-Regolament dwar l-ażil u l-migrazzjoni, dwar il-pakkett dwar l-Unjoni tas-Sigurtà/il-pakkett Schengen, u dwar il-Pjan ta’ Azzjoni dwar l-integrazzjoni u l-inklużjoni 2021-2027. Fl-2009, il-KESE waqqaf ukoll Grupp Permanenti dwar l-Immigrazzjoni u l-Integrazzjoni, li jgħin biex jagħti forma tanġibbli lir-rwol tal-KESE bħala faċilitatur bejn is-soċjetà ċivili u l-istituzzjonijiet tal-UE dwar kwistjonijiet ta’ migrazzjoni, kif ukoll jistinka biex jippromovi l-iżvilupp ta’ politika Ewropea komuni dwar l-immigrazzjoni u l-integrazzjoni. (lm)

L-UE qed tiffaċċja kriżi severa ta’ akkomodazzjoni xprunata minn żieda fil-kirjiet, prezzijiet tal-proprjetà immobbli mhux affordabbli, u pagi li għadhom lura meta mqabbla mal-inflazzjoni.  Thomas Kattnig, ir-relatur tal-Opinjoni tal-KESE L-akkomodazzjoni soċjali fl-UE – deċenti, sostenibbli u affordabbli, jikteb li sabiex jiġi rrimedjat il-falliment tas-suq fis-settur tal-akkomodazzjoni, il-KESE qed jitlob azzjoni urġenti u jappella għal strateġija soda tal-UE dwar l-akkomodazzjoni.

Il-Jum Ewropew tal-Konsumatur 2024 iffoka fuq L-isfidi tal-ilma: Nesploraw il-perspettivi tal-konsumatur – Nimxu ’l quddiem bil-Patt Blu tal-UE. L-avveniment enfasizza l-ħtieġa għal ġestjoni sostenibbli tal-ilma, infrastruttura mtejba u edukazzjoni tal-konsumatur biex jiġi żgurat li l-ilma jibqa’ affordabbli għall-Ewropej kollha.

Kif ġie żvelat waqt il-Jum Ewropew tal-Konsumatur li sar mill-Kumitat Ekonomiku u Soċjali Ewropew (KESE) fid-9 ta’ Diċembru, bil-prezz tal-ilma mistenni li jiżdied b’25% sal-2030, l-UE se jkollha bżonn tinvesti aktar minn EUR 250 biljun biex tissodisfa l-ħtiġijiet tal-ilma tal-Ewropa u tibni soċjetà li fiha kulħadd ikollu aċċess għal ilma nadif u affordabbli.

L-ilma qed isir riżorsa skarsa, anke fl-Ewropa: sa 30% tal-Ewropej jiffaċċjaw stress idriku mill-inqas darba fis-sena. Dan ifisser li l-konsumaturi, li bħala medja għadhom iqisu l-ilma bħala komodità mhux essenzjali, se jkollhom ibiddlu l-imġiba tagħhom biex jużawh b’mod aktar effiċjenti, kemm billi jsiru aktar konxji tal-impronta tal-ilma tagħhom kif ukoll billi jużaw teknoloġiji intelliġenti li jiffrankaw l-ilma.

Madankollu, dawk li jniġġsu l-aktar għandhom iħallsu wkoll il-prezz u ma jħallux lill-konsumaturi jerfgħu l-ispejjeż moħbija tagħhom.

B’15 000 litru ilma użat għall-produzzjoni ta’ kilo biss ta’ laħam u 8 000 litru għal par jeans wieħed, spejjeż kbar tal-ilma (bħall-manifattura u speċjalment l-agrikoltura, li jammontaw għal 72% tal-estrazzjoni kollha tal-ilma) se jkollhom iġarrbu wkoll l-ispiża tal-impatt ambjentali tagħhom u jinvestu f’faċilitajiet ta’ produzzjoni aħjar.

“L-ilma għandu jitqies bħala parti fundamentali mill-inizjattivi ta’ politika ewlenin li jmiss tal-Kummissjoni Ewropea. Nixtiequ naraw il-Koalizzjoni l-ġdida dwar l-Ilma mnedija biex tgħin fl-implimentazzjoni tal-Patt Blu Ewropew, u bħalissa qed naħdmu fuq il-ħolqien tal-Pjattaforma tal-Partijiet Ikkonċernati tal-Patt Blu Ewropew,” qalet Milena Angelova, relatur tal-Opinjoni tal-KESE dwar Il-konsum effiċjenti tal-ilma u s-sensibilizzazzjoni tal-konsumaturi dwar l-impronta tagħhom fuq l-ilma. Hija enfasizzat l-importanza tal-Patt Blu tal-UE bħala inizjattiva ewlenija tal-KESE, “istituzzjoni pijuniera tal-UE” fir-rigward tal-kwistjonijiet tal-ilma.

Fid-diskors ewlieni tiegħu, Gaetano Casale, Direttur tal-Uffiċċju ta’ Kollegament tal-Istitut IHE DELFT għall-Edukazzjoni dwar l-Ilma, qal li l-ilma għadu sottovalutat fl-Ewropa. Fil-fehma tiegħu, approċċ sostenibbli għall-ilma issa huwa assolutament essenzjali, u jappella għal aktar sensibilizzazzjoni dwar l-ispejjeż ambjentali, l-isfidi ta’ popolazzjoni dinjija li qed tikber u t-tibdil fil-klima.

“Inkun kuntent jekk ilkoll kemm aħna magħqudin – ċittadini, gvernijiet, aġenziji, xjenzati, l-industrija, u leġiżlaturi – naħtfu din l-opportunità unika u nieħdu dik il-qabża komprensiva ’l quddiem biex nagħmlu waħda mill-aktar riżorsi prezzjużi tagħna – l-ilma fuq l-art, fil-baħar, u fis-sema – valida fil-futur”, qalet Hildegard Bentele, ix-shadow rapporteur tal-Parlament Ewropew dwar id-Direttiva Qafas dwar l-Ilma. (ll)

Il-KESE organizza dibattitu biex jiċċelebra kemm il-Jum Internazzjonali għal Persuni b’Diżabbiltà kif ukoll l-ispirtu Olimpiku matul is-sessjoni plenarja tiegħu tal-5 ta’ Diċembru fi Brussell. 

Il-KESE ċċelebra kemm il-Jum Internazzjonali għal Persuni b’Diżabbiltà kif ukoll l-ispirtu Olimpiku billi stieden persuni mid-dinja tal-isport Paralimpiku – inklużi l-atleta Paralimpiku Belġjan u champion Joachim Gérard.

Waqt il-ftuħ tas-sessjoni, il-President tal-KESE Oliver Röpke qal li "Dan id-dibattitu jenfasizza l-ħtieġa urġenti li nindirizzaw id-differenza fl-impjiegi li jiffaċċjaw il-persuni b’diżabbiltà. Minkejja l-oqfsa legali eżistenti, huma ħafna l-persuni esklużi mis-suq tax-xogħol minħabba ostakli persistenti. Il-KESE jappella għal azzjoni biex jinħolqu postijiet tax-xogħol inklużivi, jitneħħew l-ostakli sistemiċi u jiġu żgurati opportunitajiet indaqs għal kulħadd. Ewropa li tkun tassew inklużiva ma trid tħalli lil ħadd jibqa’ lura.”

Is-Sur Gérard, plejer u champion Belġjan tat-tennis tas-siġġu tar-roti, qal lill-plenarja li meta beda jilgħab it-tennis għall-ewwel darba, spiss kien milqugħ b’sorpriża u saħansitra protesti li kien se “jirrovina l-piċċ” bis-siġġu tar-roti tiegħu. “F’dawn l-aħħar 10 snin, rajna progress kbir fir-rwol tal-persuni b’mobbiltà mnaqqsa fid-dinja tal-isport. Lgħabt f’għadd ta’ Gran Slams madwar id-dinja, u permezz ta’ dan il-logħob u l-Paralimpiċi, inħoss li qed insir dejjem aktar aċċettat bħala atleta tal-ogħla livell. Mhux biss atleta Paralimpiku, imma atleta tal-aqwa livell.

Anne d’Ieteren, president tal-Federazzjoni tal-Komunità Frankofona għall-Isport b’Diżabbiltà (La Ligue Handisport Francophone), indikat li minkejja s-suċċessi kbar murija mil-Logħob Paralimpiku, għad hemm ħafna ostakli fil-ħajja ta’ kuljum tal-persuni b’diżabbiltà. “Għadd sinifikanti ta’ faċilitajiet sportivi għadhom inaċċessibbli, b’faċilitajiet ta’ parkeġġ inadegwati jew disinn fqir. Dawn jistgħu jidhru bħala problemi żgħar, iżda l-effett kumulattiv tagħhom jista’ jeskludi u jiskoraġġixxi l-parteċipazzjoni.”

Aurel Laurenţiu Plosceanu, il-Viċi President tal-KESE responsabbli għall-komunikazzjoni, laqa’ lis-Sur Gérard u lis-Sinjura d’Ieteren, u qal li “l-preżenza u r-rekord tagħhom ifakkruna dwar kemm l-eċċellenza fl-atletika tista’ tkun ta’ ispirazzjoni għalina lkoll li nistinkaw biex nisfruttaw il-potenzjal sħiħ tagħna, waqt li juru wkoll ir-rwol essenzjali li l-persuni b’diżabbiltà jaqdu fis-soċjetà tagħna u b’mod partikolari fid-dinja sportiva.”

Christophe Lefèvre, president tal-Grupp Permanenti dwar id-Drittijiet tal-Persuni b’Diżabbiltà tal-KESE, argumenta favur l-istabbiliment ta’ mekkaniżmu ta’ aċċessibbiltà tal-UE b’indikaturi ta’ aċċessibbiltà, li jkopri oqsma bħall-akkomodazzjoni sostenibbli, l-isport, il-ġustizzja u l-edukazzjoni, waqt li Pietro Vittorio Barbieri (membru tal-Grupp Permanenti) żied jgħid li “Huwa essenzjali li l-persuni kollha b’diżabbiltà li jgħixu fl-Ewropa jkollhom aċċess għall-isport u l-edukazzjoni, sabiex ilkoll jiġu ggarantiti l-istess privileġġi fis-soċjetà.” (lm)

Fit-13 ta’ Diċembru 2024, il-KESE, il-Fond Ewropew għad-Demokrazija (EED) u l-Press Club Belarus organizzaw b’mod konġunt seminar dwar ir-rwol tal-media indipendenti Belarussa fit-trawwim ta’ soċjetà reżiljenti u demokratika. Il-media indipendenti Belarussa hija l-uniku sors ta’ informazzjoni għan-nies fil-pajjiż, għaldaqstant, jeħtieġ li din tiġi appoġġjata finanzjarjament u tkun involuta fi sħubijiet mal-media tal-Punent biex il-Belarussja tinżamm fuq quddiem fl-aġenda tal-aħbarijiet internazzjonali.

Bil-parteċipazzjoni tiegħu fl-inizjattiva “Jiem il-Belarussja” (9-13 ta’ Diċembru 2024), organizzata mis-Servizz Ewropew għall-Azzjoni Esterna u mid-Direttorat Ġenerali għall-Viċinat u n-Negozjati għat-Tkabbir tal-Kummissjoni, il-KESE wera l-impenn sod tiegħu għal Belarussja demokratika li tirrispetta d-drittijiet tal-bniedem u l-libertà tal-kelma.

Fil-ftuħ tal-avveniment, il-President tal-KESE Oliver Röpke qal: “Il-media indipendenti hija s-sinsla ta’ soċjetà ħielsa u demokratika. Illum, bħala parti mill-Jiem il-Belarussja, naffermaw mill-ġdid is-solidarjetà tagħna mal-poplu Belarussu u l-ġlieda kuraġġuża tiegħu kontra d-diżinformazzjoni u l-oppressjoni”.

Id-Direttur Eżekuttiv tal-EED Jerzy Pomianowski enfasizza: “Ir-riżultat tal-elezzjoni tas-26 ta’ Jannar huwa predeterminat, u r-reġim se jipprova jibda paġna ġdida, billi jipprova jilleġittimizza lilu nnifsu fl-affarijiet internazzjonali u jaħbi l-oppressjoni. Madankollu, il-media indipendenti Belarussa tidher li rnexxielha tinvolvi lill-udjenza tagħha”.

Hanna Liubakova, ġurnalista freelance li tinsab fl-eżilju u li ġiet ikkundannata għal 10 snin ħabs in absentia fuq erba’ akkużi kriminali, tinsab ħerqana bil-motivazzjoni tal-poplu Belarussu li jibqa’ infurmat u li jkollu aċċess għal media indipendenti, u enfasizzat li 50 % tat-traffiku għal siti web immexxija mill-Belarussi li jinsabu barra mill-pajjiż jiġi mill-Belarussja stess. Hija kkonfermat li sa 90 % tal-udjenza tal-pjattaforma tal-media soċjali tinsab ġewwa l-Belarussja. “Il-media indipendenti fil-Belarussja hija l-aħjar antidotu għal Lukashenko u l-propaganda tal-Kremlin,” hija żiedet tgħid.

Natalia Belikova, li taħdem mal-Press Club Belarus qalet li l-għan tal-propaganda l-ġdida tal-gvern huwa li jipprovdi fehim ġdid ta’ xi jfissru l-elezzjonijiet, għalhekk huma qed jippruvaw jgħaqqdu lin-nies u jħeġġuhom juru l-patrijottiżmu tagħhom. “Tattiki bħal dawn huma kif ibiddlu l-perċezzjoni tal-popolazzjoni kollha dwar xi tfisser id-demokrazija”, qalet is-Sinjura Belikova.

Is-seminar intemm bil-wiri tal-film Under the Grey Sky, ispirat mill-istorja vera ta’ Katsyaryna Andreeva, ġurnalista Belarussa li tinsab il-ħabs, fil-preżenza tad-direttur tal-film Mara Tamkovich. (mt)