Minn Felipe Medina, Membru tal-Grupp ta’ Min Iħaddem tal-KESE

L-Unjoni Ewropea qed tiċċelebra t-30 sena tas-suq uniku, li jippermetti liċ-ċittadini tal-Unjoni jistudjaw, jgħixu, jixtru u jaħdmu fi kwalunkwe Stat Membru tal-UE billi jiġi żgurat l-moviment liberu tal-merkanzija, tas-servizzi, tal-kapital u tal-persuni. Nistgħu niddikjaraw mingħajr esaġerazzjoni, li s-suq uniku huwa l-essenza tal-Unjoni Ewropea, l-istrument kbir li ppermetta t-tneħħija tal-fruntieri politiċi, soċjali u ekonomiċi sabiex nimxu lejn iċ-ċittadinanza u l-identità Ewropea.

L-avvenimenti li l-Unjoni Ewropea, u d-dinja kollha, kienu esposti għalihom f’dawn l-aħħar snin, iġiegħluna nirriflettu dwar kif nistgħu noħolqu suq uniku li jkun aktar reżiljenti u inqas dipendenti mid-dinja esterna. Il-Kumitat Ekonomiku u Soċjali Ewropew jindirizza dan is-suġġett fl-Opinjoni tiegħu INT/1011 dwar It-30 sena tas-suq uniku: kif jista’ jittejjeb il-funzjonament tas-suq uniku, li ġiet adottata fis-sessjoni plenarja ta’ April.

Kunċett ewleni rikorrenti fl-Opinjoni fir-rigward tal-futur tal-Unjoni Ewropea huwa l-kompetittività. L-Opinjoni tenfasizza l-ħtieġa li jinħolqu kondizzjonijiet ekwivalenti ta’ kompetizzjoni għan-negozji “billi jiġu promossi t-tkabbir u l-kompetittività ġusta, u jinħoloq ambjent favorevoli għan-negozju u li jirrispetta d-dimensjoni soċjali”. It-tħassib ewlieni tal-KESE huma l-problemi relatati man-nuqqasijiet tas-suq uniku li qed jaffettwaw lill-kompetittività u s-sostenibbiltà tan-negozji.

Dawk kollha involuti fil-bini tal-Unjoni Ewropea għandhom id-dmir li jissensibilizzaw lill-ġenerazzjonijiet ta’ età iżgħar dwar l-importanza tal-passi li diġà ttieħdu biex jinbena dak li għandna llum, kif ukoll l-obbligu li jwissu dwar ir-riskji għas-suq uniku, u li jippruvaw jistabbilixxu linji gwida sabiex jegħlbuhom u jkomplu jagħmlu progress lejn futur komuni aktar b’saħħtu u konsolidat.

L-artiklul sħiħ jinsab disponibbli hawnhekk:https://europa.eu/!PHPc3R