KESE info

F’Opinjoni esploratorja dwar it-30 anniversarju tas-suq uniku, il-KESE appoġġja l-idea tal-Kummissjoni ta’ fond tal-UE li jiġbor flimkien ir-riżorsi għall-investiment fi proġetti ewlenin tat-teknoloġija ekoloġika pjuttost milli jillaxka r-regoli tal-kompetizzjoni.

L-illaxkar tar-regoli dwar l-għajnuna mill-Istat biex l-industriji Ewropej jiġu protetti mill-kompetizzjoni mill-Istati Uniti fejn għadu kif ġie adottat l-Att dwar it-Tnaqqis tal-Inflazzjoni jista’ joħloq asimetriji bejn l-Istati Membri ogħna, bħall-Ġermanja, li jistgħu jissussidjaw l-industriji tagħhom, u l-Istati Membri b’inqas spazju fiskali li ma jistgħux jagħmlu dan. Dan enfasizzah il-KESE f’rapport ġdid li jagħti rendikont tat-30 sena tas-suq uniku u li jħares lejn il-futur.

“Fond Ewropew għas-Sovranità huwa l-aqwa mod biex nagħtu spinta ġdida lill-politika industrijali Ewropea u l-investiment fit-teknoloġiji ekoloġiċi,” qal ir-relatur Felipe Medina Martín mill-Grupp ta’ Min Iħaddem tal-KESE, li enfasizza wkoll il-ħtieġa li jiġu rieżaminati u rifomati r-regoli attwali dwar l-għajnuna mill-Istat.

“Irid ikun hemm riflessjoni dwar il-kriterji għall-allokazzjoni tal-għajnuna mill-Istat, l-effetti u s-siwi tagħhom,” qal ir-relatur. “Nafu li ċerti setturi setgħu jibbenefikaw mill-għajnuna mill-Istat u mid-derogi u l-eżenzjonijiet fil-qasam tal-għajnuna mill-Istat, iżda kien hemm setturi oħra li ma setgħux jagħmlu dan. Jekk iżżid dan mal-iżbilanċi bejn l-Istati Membri tispiċċa b’differenzi kbar ħafna fil-kompetittività fi ħdan l-UE.”

Ir-rapport tal-KESE jenfasizza li s-suq uniku bla dubju kien wieħed mill-akbar kisbiet politiċi, ekonomiċi u soċjali tal-UE, iżda jrid jibqa’ proġett li dejjem jevolvi, li jibqa’ jadatta għar-realtijiet li jinbidlu u jindirizza l-isfidi li ġejjin.

Fost dawn l-isfidi għandha tingħata l-ogħla prijorità lill-awtonomija strateġika miftuħa: il-provvista u l-kummerċ u l-enerġija u l-materja prima kritika għandhom ikunu prijoritajiet ewlenin u l-ftehimiet mal-pajjiżi li għandhom l-istess prinċipji u valuri huma approċċ li ta’ min jadottah f’dan ir-rigward.

Fi ħdan is-suq intern, il-KESE jirreferi għall-fatt inkwetanti li ħafna mill-piż regolatorju għadu qed jinħoloq fil-livell tal-Istati Membri, peress li r-regoli nazzjonali jidħlu fis-seħħ qabel ma jitressqu l-inizjattivi tal-UE, li jfixkel l-armonizzazzjoni u potenzjalment jikkawża distorsjonijiet fis-suq uniku. Biex dan jiġi evitat, il-KESE jissuġġerixxi li l-UE tfassal il-leġiżlazzjonijiet tagħha b’mod aktar proattiv u rapidu.

Mill-perspettiva tal-ħaddiema, il-KESE jixtieq li l-miżuri li jippromovu l-kompetittività u s-sostennibbiltà tan-negozji jkunu akkumpanjati minn miżuri li jipproteġu l-kwalità tal-impjieg u jiżguraw id-drittijiet taċ-ċittadini, il-protezzjoni tal-konsumatur u kundizzjonijiet ġusti għall-intrapriżi żgħar.

“Id-dinja qed tinbidel u l-paradigma li ntużat għas-suq uniku tul dawn l-aħħar 30 sena se jkollha tinbidel ukoll, x’aktarx b’mod radikali, jekk irridu negħlbu l-isfidi ġeopolitiċi l-ġodda,” enfasizza l-korelatur Angelo Pagliara, mill-Grupp tal-Ħaddiema tal-KESE. “Biex niggarantixxu kompetittività ġenwina, irridu niġġieldu kull forma ta’ dumping – dumping soċjali, fiskali u ta’ kull tip. Dan għaliex id-dumping huwa għodda li jdgaħjjef il-kompetizzjoni.”

Dan ir-rapport ġenerali se jiġi segwit minn Opinjonijiet li jindirizzaw kwistjonijiet speċifiċi li jikkonċernaw is-suq uniku. (dm)

Fil-jum Dinji għas-Sigurtà u s-Saħħa fuq il-Post tax-Xogħol 2023, il-Kumitat Ekonomiku u Soċjali Ewropew stieden lill-Unjoni Ewropea tadotta leġiżlazzjoni vinkolanti biex tipprevjeni r-riskji psikosoċjali fuq il-post tax-xogħol. Hemm evidenza dejjem akbar li tindika l-fatt li x-xogħol prekarju qed ikollu impatt sinifikanti fuq is-saħħa mentali tal-ħaddiema.

Fis-27 ta’ April, il-KESE ppreżenta l-Opinjoni tiegħu dwar Xogħol prekarju u saħħa mentali waqt dibattitu mas-Segretarju tal-Istat Spanjol għax-Xogħol u l-Ekonomija Soċjali, Joaquín Pérez Rey.

Ir-relatur għall-Opinjoni, José Antonio Moreno Díaz, tenna li hemm evidenza ċara li x-xogħol prekarju jżid il-probabbiltà li s-saħħa mentali tal-ħaddiema tiddeterjora, u b’hekk din issir kwistjoni ta’ saħħa pubblika.

Ix-xogħol prekarju – li jkopri aspetti bħan-nuqqas ta’ sigurtà tal-impjiegi, il-kuntratti temporanji li jisfruttaw il-ħaddiema, is-sigħat twal tax-xogħol u l-inabbiltà ta’ ppjanar tal-ħin tax-xogħol – jikser id-drittijiet fundamentali tal-ħaddiema u għandu jinqered u jiġi miġġieled fil-forom kollha tiegħu. Huwa għalhekk li l-KESE appella favur l-adozzjoni ta’ leġiżlazzjoni vinkolanti fil-livell tal-UE kif ukoll għall-iżvilupp u l-immodernizzar tad-Direttiva dwar is-Sigurtà u s-Saħħa tal-Ħaddiema fuq ix-Xogħol (89/391/KEE).

“Jeħtieġ li jkollna ambjent tax-xogħol ta’ kwalità għolja li ma jkunx sors ta’ tbatija fiżika jew psikoloġika. Għandna bżonn direttiva speċifika tal-UE dwar ir-riskji psikosoċjali," qal is-Sur Moreno Díaz.

Il-President tal-KESE Oliver Röpke qal: “Dan il-Kumitat kien impenjat li jikkontribwixxi għall-avvanz tal-aġenda soċjali tal-UE u biex tinbena Ewropa sostenibbli u kompetittiva lesta għas-seklu 21. Dan ifisser, fost l-oħrajn, kundizzjonijiet deċenti fis-suq tax-xogħol, appoġġ għall-involviment tal-ħaddiema u l-ġlieda kontra x-xogħol prekarju.” (ll)

Waħda mill-prijoritajiet ewlenin tal-moviment tad-diżabilità, il-Karta Ewropea tad-Diżabilità se tippermetti lill-persuni b’diżabilità jeżerċitaw id-dritt fundamentali tagħhom għal-libertà tal-moviment fl-UE bl-istess mod bħall-persuni mingħajr diżabilità.

Il-KESE laqa’ l-inizjattiva biex tiġi introdotta Karta Ewropea tad-Diżabilità, li tnediet mill-Kummissjoni Ewropea sabiex tgħin lil persuni b’diżabilità jiċċaqalqu u jgħixu b’mod liberu fl-Unjoni Ewropea.

F’Opinjoni adottata fis-sessjoni plenarja tiegħu f'April, il-KESE madankollu wissa li s-suċċess tal-karta se tiddipendi fuq l-għarfien reċiproku tal-istatus ta’ diżabilità bejn il-pajjiżi tal-UE, li bħalissa mhuwiex il-każ u li b’hekk ixekkel lill-persuni b’diżabilità milli jkollhom aċċess għal miżuri ta’ appoġġ meta jivvjaġġaw lejn pajjiżi oħra. Dan huwa ksur fundamentali tal-libertà tal-moviment tagħhom, li hija valur ewlieni tal-UE.

Ir-relatur għall-Opinjoni, Ioannis Vardakastanis, qal: “Bħalissa għandna ċittadini Ewropej tal-ewwel u tat-tieni klassi, l-ewwel klassi huma dawk li jistgħu jiċċaqalqu min Stat Membru għal ieħor biex jivvjaġġa, jaħdem jew jistudja jew biex imur jgħix, u tat-tieni klassi huma dawk li ma jistgħux. Il-Karta Ewropea tad-Diżabilità se telimina dawn l-ostakli,”

Il-KESE jirrimarka fl-Opinjoni li l-Karta Ewropea tad-Diżabilità kienet prijorità għolja għall-moviment tad-diżabilità u hija xi ħaġa li ilhom jitolbu għaliha. Huwa rakkomandat li l-karta tiġi stabbilita permezz ta’ regolamentazzjoni, peress li dan huwa strument iktar adatt li jista’ jiżgura l-applikazzjoni konsistenti u universali tagħha u jiġu evitati differenzi fl-implimentazzjoni fil-livell nazzjonali.

Għandhom jittieħdu miżuri komplementarji li jiżguraw li t-trasport, is-servizzi u l-bini jkunu aċċessibbli għal kulħadd, filwaqt li d-data personali fil-karta tkun protetta mir-regolamenti dwar il-protezzjoni tad-data. B’dan il-mod, il-karta tiffunzjona bħala Passaport Ewropew tad-Diżabilità.

Fil-fehma ta-KESE, il-karta se ġġiegħel lill-Istati Membri jtejbu s-sistemi attwali li huma bbażati primarjament fuq approċċ mediku għad-diżabilità u jallinjawhom ma’ mudelli li jirrispettaw il-Konvenzjoni dwar id-Drittijiet ta’ Persuni b’Diżabilità tan-NU (UNCRPD).

Sabiex jiġi żgurat li din il-karta tirnexxi, il-KESE appella għall-parteċipazzjoni sħiħa ta’ persuni b’diżabilità u tal-organizzazzjonijiet tagħhom fl-istadji kollha tal-implimentazzjoni tagħha u matul il-proċess ta’ monitoraġġ.

Talba oħra hija għas-separazzjoni fiżika tal-Karta Ewropea tad-Diżabilità mill-Karta tal-UE għall-Parkeġġ. Dan jagħmilha aktar faċli għall-persuni b’diżabilità biex jinnavigaw is-sistemi tat-trasport u jaċċessaw is-servizzi pubbliċi. (ll)

Il-KESE jiddeskrivi l-proposti tal-Kummissjoni għat-tisħiħ tad-djalogu soċjali fl-Istati Membri u fl-UE kemm bħala kemm f’waqthom kif ukoll meħtieġa, iżda jitlob li jittieħdu passi addizzjonali. Hija meħtieġa azzjoni biex jittejbu l-konsultazzjonijiet nazzjonali mal-imsieħba soċjali, il-kopertura tan-negozjar kollettiv nazzjonali u Ewropew u l-implimentazzjoni tal-ftehimiet mal-imsieħba soċjali

Il-Kumitat Ekonomiku u Soċjali Ewropew laqa’ l-inizjattiva reċenti tal-Kummissjoni Ewropea li ssaħħaħ u tippromovi d-djalogu soċjali fl-UE. Madankollu, huwa rrimarka dwar xi kwistjonijiet li jridu jiġu indirizzati sabiex jiġi żgurat li d-djalogu soċjali ikun sinifikattiv u effettiv fil-livell nazzjonali u Ewropew.

Fl-Opinjoni adottata fis-sessjoni plenarja tiegħu f’April, il-KESE analizza l-Komunikazzjoni reċenti tal-Kummissjoni dwar it-tisħiħ tad-djalogu soċjali u l-proposta għal rakkomandazzjoni tal-Kunsill dwar l-istess suġġett.

Il-KESE wissa li l-kisba ta’ riżultat pożittiv mid-djalogu soċjali m’għandhiex tittieħed bħala fatt u rrakkomanda li l-Kummissjoni għandha tħares lejn mudelli nazzjonali, reġjonali u settorjali li rnexxu u tara għalfejn kellhom suċċess.

“Fl-ambizzjoni tagħha biex issaħħaħ id-djalogu soċjali, l-inizjattiva tal-Kummissjoni hija milqugħa b’mod pożittiv. Fl-istess waqt, l-Opinjoni tagħna tirrakkomanda passi ulterjuri, pereżempju fejn jidħol it-titjib tad-djalogu soċjali tripartitiku fil-livell nazzjonali, it-titjib tal-kopertura tan-negozjar kollettiv, u l-użu ta’ direttivi tal-Kunsill biex jiġu żviluppati regoli ċari għall-implimentazzjoni ta’ ftehimiet mal-imsieħba soċjali,” qal ir-relatur tal-Opinjoni, Pekka Ristelä.

Fil-fehma tal-KESE, djalogu soċjali effettiv irid jinkludi msieħba soċjali rappreżentattivi u leġittimi b’għarfien, kapaċità teknika u aċċess f’waqtu għal informazzjoni. Jirrikjedi wkoll ir-rieda u l-impenn politiku biex wieħed jinvolvu ruħu. Huwa meħtieġ ir-rispett għad-drittijiet u l-awtonomija tal-imsieħba soċjali, bħad-dritt tal-libertà ta’ assoċjazzjoni u n-negozjar kollettiv, kif ukoll qafas legali u istituzzjonali abilitanti.

“Aħna nemmnu li r-Rakkomandazzjoni proposta hija strument adatt għall-appoġġ tal-proċess jekk tistipula dispożizzjonijiet ċari u effettivi ta’ monitoraġġ proposti inizjalment mill-Kummissjoni. Mid-diskussjoni bejn l-Istati Membri nifhmu li din tidher li hija problema mill-bidu nett. It-test finali tar-Rakkomandazzjoni ser ikun eżami deċiżiv għar-rieda politika ġenwina biex jissaħħaħ verament il-proċess,” qalet il-korelatur, Maryia Mincheva.

Sabiex jirribatti l-fatt li f’xi Stati Membri djalogi soċjali tripartitiċi huma iktar kwistjoni tal-għamla tagħhom milli s-sustanza li jkun fihom, il-KESE jipproponi li jiġi stabbilit qafas komuni effettiv sabiex l-imsieħba soċjali jiġu involuti fil-livell nazzjonali. Jekk l-imsieħba soċjali mhumiex involuti b’mod sinifikattiv, il-KESE jirrakkomanda li l-Kummissjoni tiegħu azzjoni.

Il-KESE nnota li d-djalogu ċivili, li jinvolvi firxa usa’ ta’ partijiet interessati u suġġetti, huwa proċess separat. Din id-distinzjoni għandha ssir ukoll fl-appoġġ għall-bini tal-kapaċitajiet għall-imsieħba soċjali u s-soċjetà ċivili. (ll)

Fis-sessjoni plenarja tiegħu ta’ April, il-Kumitat Ekonomiku u Soċjali Ewropew adotta Opinjoni dwar l-impatt tal-metavers fuq is-soċjetà. L-Opinjoni tenfasizza l-ħtieġa li l-UE tindirizza malajr l-opportunitajiet u r-riskji assoċjati mal-metavers biex tiżgura ambjent virtwali inklużiv u sikur.

Il-metavers diġà wera l-potenzjal tiegħu biex joffri soluzzjonijiet kosteffettivi, produzzjoni aktar mgħaġġla, kwalità msaħħa, tnaqqis ta’ riskji u effiċjenza mtejba. Joffri wkoll it-tama li jiġu mitigati l-impatti ambjentali billi jippermetti x-xogħol mill-bogħod u jnaqqas il-ħtieġa għal vjaġġar fiżiku u emissjonijiet tal-karbonju.

Ir-relatur tal-KESE għal-Opinjoni, Martin Böhme, enfasizza li “il-metavers u dinjiet virtwali ser ikollhom impatt sostanzjali fuq ħajjitna. Iġibu magħhom opportunitajiet, iżda wkoll perikli potenzjali li rridu nantiċipaw.”

Dinjiet virtwali joħolqu diversi riskji, speċjalment għat-tfal u gruppi vulnerabbli. Il-Kumitat jappella lill-operaturi tal-pjattaformi biex jistabbilixxu mekkaniżmi ta’ kontroll stretti biex jiffiltraw u jneħħu kontenut dannuż u salvagwardji għall-prevenzjoni tal-fastidju, l-abbuż u l-imġiba ta’ sfruttament. Tħassib dwar dipendenza, privatezza u s-saħħa mentali huma nnotati wkoll fost l-utenti.

Il-leġiżlazzjoni eżistenti jaf mhijiex biżżejjed biex tirregola dinjiet virtwali. Il-KESE jħeġġeġ lill-istituzzjonijiet tal-UE biex jiżguraw li l-metavers jirrispetta l-leġiżlazzjoni tad-dinja reali, it-tassazzjoni u jindirizza l-ħtiġijiet speċifiċi tiegħu permezz ta’ miżuri ġodda.

L-Opinjoni tirrimarka li l-metavers industrijali għandu potenzjal sinifikanti għall-kumpaniji Ewropej li qed ifittxu li jottimizzaw l-operazzjonijiet tagħhom, jiġbru d-data u jtejbu l-prestazzjoni. Sfidi industrijali jinkludu l-ħtieġa għal aċċettazzjoni akbar ta’ dawn it-teknoloġiji ġodda, it-taħriġ mill-ġdid tal-forza tax-xogħol u l-iżgurar ta’ esperjenzi etiċi u sikuri.

“Il-bini ta’ metaversi għan-negozju jesiġi tipi ta’ kompetenzi partikolari, u l-Ewropa trid tistinka biex issir għal darb’ oħra komunità li tilqa’ lir-riċerkaturi u tħeġġiġhom ikunu fl-avangwardja,” qal il-korelatur tal-KESE, Hervé Jeannin.

Opinjoni oħra dwar il-metavers bħalissa qed titħejja mill-KESE biex tiġi adottata fit-tieni sitt xhur tas-sena. (gb)

Sistema ta’ trasport sostenibbli fit-tul hija possibbli biss jekk iċ-ċittadini, l-industrija u s-settur tat-trasport jallinjaw ruħhom maż-żewġ objettivi: tnaqqis tal-emissjonijiet ta’ 90% fis-settur tat-trasport sal-2050 u impenn biex jiġu implimentati s-soluzzjonijiet maqbula biex jinkiseb ir-riżultat finali.

Dan huwa l-messaġġ tal-Opinjoni tal-KESE mfassla minn Stefan Back u Mateusz Szymański, u li ġiet adottata fis-sessjoni plenarja fis-27 ta’ April 2023.

Sabiex jintlaħaq l-objettiv ta’ trasport sostenibbli ekoloġiku fit-tul, “it-tranżizzjoni trid tkun attraenti u realistika, u għalhekk aċċettabbli għaċ-ċittadini u għan-negozji minn tliet lati: mil-lat finanzjarju, mil-lat soċjali, u mil-lat prattiku,” qal is-Sur Back.

"Dan huwa l-uniku mod biex it-tranżizzjoni tkun tista’ tiġi appoġġjata b’mod attiv mis-soċjetà tagħna, fin-nuqqas ta’ dan, ir-riskju mhuwiex biss il-falliment, iżda fl-agħar ipoteżi inkwiet soċjali,” żid jgħid is-Sur Szymański.

B’mod aktar speċifiku, il-KESE isostni li sabiex it-tranżizzjoni tirnexxi, iridu jiġu ssodisfati ċerti kundizzjonijiet.

L-ewwel nett, in-negozji jeħtiġilhom iħossu li mhumiex mgħobbija żżejjed bi spejjeż eċċessivi u li ser iżommu l-kompetittività, mhux biss fl-UE iżda wkoll lil hinn minnha.

It-tieni, l-impjegati jeħtiġilhom jaraw it-tranżizzjoni bħala esperjenza aċċettabbli u jingħataw il-possibbiltà li jadattaw għal kundizzjonijiet tax-xogħol ġodda b’mod soċjalment aċċettabbli.

It-tielet, iċ-ċittadini kemm fl-agglomerazzjonijiet kif ukoll f’żoni rurali jeħtiġilhom jibbenefikaw minn aċċessibbiltà u mobbiltà bi spejjeż raġonevoli u b’kundizzjonijiet ġenerali tajbin. (mp)

Il-KESE ġedded it-talba tiegħu għal bidla radikali tas-semestru Ewropew, u appella għal regolament tal-UE biex l-involviment tas-soċjetà ċivili fiċ-ċiklu jsir obbligatorju.

F’Opinjoni diskussa u adottata fis-sessjoni plenarja tiegħu ta’ April, il-KESE enfasizza li r-riformi ekonomiċi għandhom ikunu bbażati fuq fatturi soċjali u mhux biss fuq indikaturi ekonomiċi. Huwa enfasizza wkoll li l-proċess tar-rakkomandazzjonijiet speċifiċi għall-pajjiż irid jiġi rieżaminat ukoll sabiex iħeġġeġ lill-Istati Membri biex jieħdu rwol ta’ tmexxija fl-implimentazzjoni tagħhom.

Is-Semestru Ewropew huwa ċiklu annwali ta’ sitt xhur ta’ koordinazzjoni tal-politiki ekonomiċi, soċjali u fiskali bejn l-Istati Membri, u jimmonitorja l-pjani nazzjonali għall-irkupru u r-reżiljenza. Għalkemm huwa kellu rwol importanti sa mill-introduzzjoni tiegħu fl-2011, is-Semestru wera wkoll dgħufijiet sinifikanti.

F’din l-Opinjoni, il-KESE ġedded l-appell tiegħu għal riforma tas-Semestru Ewropew għat-tisħiħ tat-trasparenza u tad-demokrazja, tal-involviment tas-soċjetà ċivili organizzata, u tal-effettività tal-funzjonament tiegħu. Il-KESE jirrakkomanda li:

• jiġu rieżaminati u kkomplementati s-sistemi eżistenti ta’ indikaturi, u li dawn ikunu konsistenti ma’ xulxin sabiex jittejbu l-proċeduri ta’ evalwazzjoni;
• li l-kopertura r-rakkomandazzjonijiet speċifiċi għall-pajjiż, wieħed mill-istrumenti ewlenin tas-Semestru, tiġi estiża għal perjodu ta’ tliet snin, b’evalwazzjonijiet u rieżamijiet annwali, u li l-implimentazzjoni u l-finanzjament tagħhom ikunu marbuta mal-baġit tal-UE, li huwa l-aktar inċentiv adegwat biex tiġi żgurata l-konformita;
• li jiġu involuti l-imsieħba soċjali u l-organizzazzjonijiet tas-soċjetà ċivili permezz ta’ proċedura ta’ konsultazzjoni formali u korp speċifiku li jkun inkarigat legalment b’dan il-kompitu. Il-kunsilli ekonomiċi u soċjali nazzjonali eżistenti għandhom jaqdu wkoll rwol rilevanti f’dan il-proċess;
• għandhom jiġu stabbiliti permezz ta’ regolament tal-UE l-prinċipji u l-karatteristiċi ġenerali tal-involviment strutturat u permanenti tas-soċjetà ċivili organizzata fl-istadji differenti tas-Semestru Ewropew.

Stqarrija għall-Istampa

Test sħiħ tal-Opinjoni (tk)

Il-gwerra fl-Ukrajna kkawżat ħsara ambjentali transfruntiera sinifikanti, u qajmet tħassib kbir. Il-KESE jħeġġeġ li l-azzjonijiet tar-Russja jsiru reat skont il-liġi tal-UE u jenfasizza l-ħtieġa għall-protezzjoni ambjentali biex jiġu ssalvagwardjati d-drittijiet fundamentali.

L-ekosistemi tal-Ukrajna ġew affettwati b’mod serju, bil-qerda mifruxa tal-foresti u t-tniġġis tal-arja u tal-ilma. Dan joħloq theddida għall-bijodiversità rikka, l-ekosistemi, is-saħħa tal-bniedem u l-produzzjoni agrikola tagħha. Il-KESE jingħaqad mal-Parlament Ewropew u jirrakkomanda li l-ekoċidju jiġi rikonoxxut bħala reat kriminali skont il-liġi tal-UE biex jiġi żgurat li r-Russja tinżamm responsabbli għall-azzjonijiet tagħha u biex jiġu evitati diżastri ambjentali futuri.

Ir-relatur, Ozlem Yildirim, qalet: “Il-KESE jenfasizza li hemm il-ħtieġa urġenti biex tittejjeb il-protezzjoni ambjentali sabiex jiġu rispettati d-drittijiet fundamentali fl-Unjoni Ewropea u lil hinn minnha, u li din il-ħtieġa hija aċċentwata mill-ħsara ambjentali kbira kkawżata mill-gwerra fl-Ukrajna”.

Il-Kumitat jappella wkoll għal inizjattiva biex dawn l-effetti jiġu ddokumentati u kkwantifikati, sabiex jiġu żgurati l-protezzjoni legali, ir-responsabbiltà u l-irkupru ġust wara l-kunflitti f’konformità mal-istandards internazzjonali.

Id-dritt għal ambjent b’saħħtu huwa kruċjali għall-benesseri soċjali u ekonomiku, peress li ħafna impjiegi jiddependu fuq klima b’saħħitha. Il-KESE jħeġġeġ lill-Istati Membri u lill-istituzzjonijiet tal-UE biex isaħħu l-għodod u l-isforzi legali eżistenti sabiex jipproteġu d-dritt għal ambjent b’saħħtu, b’mod partikolari fid-dawl tal-fraġilità tal-ekosistemi enfasizzata mill-kunflitt fl-Ukrajna. (ks)

Il-membri osservaw mill-qrib ekosistema sofistikata li tipproteġi lill-ambjent, tippromovi s-suċċess ekonomiku, tħeġġeġ prattiki ta’ ekonomija ċirkolari fl-agrikoltura, u trawwem il-koeżjoni soċjali.

Fil-5 ta’ Mejju, delegazzjoni tal-membri tal-Kumitat Ekonomiku u Soċjali Ewropew żaru Wildpoldsried, villaġġ ta’ enerġija sostenibbli fir-reġjun Ġermaniż ta’ Allgäu.

Il-villaġġ huwa magħruf għas-suċċess tiegħu fl-produzzjoni lokali tal-enerġija rinnovabbli, u għall-parteċipazzjoni pubblika b’saħħitha.

Il-membri tal-KESE baqgħu impressjonati bl-infrastruttura tal-villaġġ, li tinkludi turbini eoliċi, impjant tal-bijogass, impjant ta’ koġenerazzjoni b’network għat-tisħin lokali, u sistema fotovoltajka b’batterija.

L-approċċ innovattiv u sostenibbli ta’ Wildpoldsried huwa ta’ eżempju ewlieni ta’ ekosistema sofistikata li tipproteġi lill-ambjent, tippromovi s-suċċess ekonomiku, tħeġġeġ prattiki ta’ ekonomija ċirkolari fl-agrikoltura, u trawwem il-koeżjoni soċjali permezz tal-parteċipazzjoni taċ-ċittadini.

Din iż-żjara kienet ta’ interess partikolari għall-KESE, peress li huwa jagħti pariri lill-istituzzjonijiet tal-UE dwar kwistjonijiet li jolqtu lis-soċjetà ċivili u jfittex li jnaqqas id-distakk bejn l-involviment tas-soċjetà u l-politiki tal-UE. (ks)