Il-KESE minn dejjem kien fuq quddiem nett fil-promozzjoni tal-isport bħala forza pożittiva għat-trawwim ta’ valuri b’saħħithom f’kull qasam tas-soċjetà.

Fl-Opinjoni tiegħu dwar L-isport u l-valuri Ewropej, imfassla mill-membru Bernardo Hernández Bataller, il-KESE jgħid li l-isport jgħin biex jintlaħqu l-objettivi strateġiċi tal-UE, jagħti prominenza lill-valuri edukattivi u kulturali ewlenin, u huwa mezz ta’ integrazzjoni, peress li huwa miftuħ għall-membri kollha tal-pubbliku, irrispettivament mill-ġeneru, l-oriġini etnika, ir-reliġjon, l-età, in-nazzjonalità, is-sitwazzjoni soċjali jew l-orjentazzjoni sesswali tagħhom. L-isport għandu rwol ċentrali bħala għodda biex jiġu indirizzati l-intolleranza, il-ksenofobija u r-razziżmu.

Fl-2022, il-ħidma tal-KESE dwar l-isport iffukat fuq l-Opinjoni tiegħu dwar L-azzjoni tal-UE għall-perjodu ta’ wara l-COVID-19: irkupru aħjar permezz tal-isport, abbozzat mill-membru Pietro Barbieri. Wara l-perjodu twil tal-pandemija, li kellu impatt serju fuq is-settur kollu tal-isport u fuq l-assoċjazzjonijiet sportivi lokali b’mod partikolari, il-Kumitat ressaq l-argument li kien meħtieġ approċċ strateġiku sabiex jissaħħaħ u jiġi promoss ir-rwol tal-isport u tal-attività fiżika fil-bini ta’ soċjetà aktar reżiljenti u sostenibbli, bħala parti mill-proċess usa’ ta’ rkupru ekonomiku u soċjali.

Il-KESE enfasizza wkoll l-impenn qawwi tiegħu favur iċ-ċikliżmu bħala mezz ta’ trasport tajjeb għas-saħħa u li ma jagħmilx ħsara lill-klima f’diversi Opinjonijiet, bħal Il-promozzjoni tat-trasport transkonfinali bir-rota u It-trasport fiż-żoni urbani u metropolitani.

Il-Lexicon Ewropew taċ-Ċikliżmu tal-KESE (l-aħħar edizzjoni ppubblikata fl-2023) huwa eżempju prattiku tal-appoġġ tiegħu għaċ-ċikliżmu. Jiġbor flimkien vokabularju relatat maċ-ċikliżmu fil-lingwi kollha tal-UE u huwa utli għal kull min isuq ir-rota f’pajjiż Ewropew ieħor u lil hinn mill-kontinent.

F’dawn l-aħħar snin, il-KESE organizza u appoġġja wkoll avvenimenti taċ-ċikliżmu. F’Mejju 2024, il-membru tal-KESE Bruno Choix mexxa avveniment taċ-ċikliżmu madwar Franza u l-Belġju biex jippromovi l-elezzjonijiet Ewropej u jħeġġeġ lin-nies joħorġu jivvutaw. Fl-2019, għall-Grand Départ de Bruxelles 2019 (1-7 ta’ Lulju 2019) tat-Tour de France, il-Kumitat ippromova r-rwol u l-popolarità li qed tikber taċ-ċikliżmu bħala mezz ta’ trasport nadif. (mp)

Is-seminar tal-KESE “Nikkollegaw l-Ewropa”, li kull sena jlaqqa’ flimkien professjonisti tal-komunikazzjoni mill-organizzazzjonijiet tas-soċjetà ċivili, se jsir fi Brussell fis-17 u t-18 ta’ Ottubbru 2024. Se jiffoka fuq il-ġurnaliżmu u l-importanza li jitħarsu l-indipendenza u r-rilevanza tiegħu fil-kuntest tal-pressjoni politika dejjem tikber fuq il-media u l-mod kif kibret b’daqstant ħeffa l-IA ġenerattiva. 

Bit-titolu "Il-bażi tad-demokrazija: ngħinu lill-ġurnaliżmu jissopravivi u jikber”, is-seminar se jinkludi żewġ panels u sessjoni ta’ networking:

• Ġurnaliżmu responsabbli fl-era ta’ post-verità – il-livelli tad-demokrazija qed jonqsu ħafna madwar id-dinja u l-ġurnalisti qed iħabbtu wiċċhom ma’ sfidi ġodda, bħall-użu dejjem aktar makakk tal-IA għat-tixrid ta’ aħbarijiet foloz. Barra minn hekk, l-isfidi l-antiki, bħan-nuqqas ta’ trasparenza tas-sjieda tal-media jew finanzjament insuffiċjenti, jidhru li se jibqgħu. X’se jkun meħtieġ biex il-ġurnaliżmu jibqa’ pedament tad-demokrazija? Il-ġurnaliżmu responsabbli huwa saħansitra vijabbli llum? F’dinja fejn il-mezzi tal-media qed jikkompetu mal-influwenzaturi jew mal-medja soċjali bħala s-sorsi tal-aħbarijiet, il-ġurnaliżmu se jkollu jerġa’ jivvinta lilu nnifsu biex jibqa’ ġid pubbliku? L-aħħar atti tal-UE jistgħu jgħinu biex l-IA ssir alleat tal-libertà tal-istampa? 
• Xogħol perikoluż – rapportar investigattiv – il-ġurnaliżmu investigattiv għandu storja twila li jġiegħel lil dawk fil-poter jagħtu rendikont ta’ azzjonijiethom u jagħti vuċi lil dawk li qed ifittxu li jirrapportaw abbuż ta’ pożizzjoni u privileġġ. X’tipi ta’ sfidi għandhom jaffrontaw il-ġurnalisti investigattivi biex jixħtu dawl fuq il-verità? X’protezzjoni għandhom għad-dispożizzjoni tagħhom biex jipproteġu lilhom infushom minn theddid? Il-leġiżlazzjoni l-ġdida tal-UE tista’ tiżgura aktar libertà u setgħa għalihom? 
• Xogħol bħala uffiċjal tal-istampa jew tal-komunikazzjoni fl-era ta’ Instagram, TikTok u IA – kif twassal il-messaġġ tiegħek (sessjoni ta’ networking u sessjonijiet ta’ ħidma) – Permezz ta’ preżentazzjonijiet u sessjonijiet ta’ ħidma prattiċi, is-sessjoni għandha l-għan li toffri ħarsa lejn dinja ġdida ta’ komunikazzjoni ma’ udjenzi differenti, inkluż iż-żgħażagħ. 

Is-seminar “Nikkollegaw l-Ewropa” joffri pjattaforma fejn il-professjonisti tal-istampa u l-komunikazzjoni minn organizzazzjonijiet tas-soċjetà ċivili jistgħu jinteraġixxu u jiddiskutu dwar kwistjonijiet attwali ta’ interess komuni li jolqtu lill-Ewropa. Is-seminar ilaqqa’ membri tal-KESE u rappreżentanti oħra tal-UE, organizzazzjonijiet imsieħba mill-Istati Membri, ġurnalisti u riċerkaturi biex jiddiskutu l-kwistjonijiet jaħarqu tal-ġurnata. Il-programm sħiħ u l-lista tal-kelliema se jkunu disponibbli dalwaqt fis-sit web tal-KESE. Għal aktar informazzjoni jekk jogħġbok ikteb lil: pressofficers@eesc.europa.eu. (ll)

Il-Kumitat Ekonomiku u Soċjali Ewropew (KESE) jieħu l-inizjattiva li japprova l-valuri minquxa fl-Olimpjadi tal-2024 f’Pariġi, mill-perspettiva tas-soċjetà ċivili.

Fix-xenarju ġeopolitiku fraġli tal-lum, il-KESE qed iressaq b’mod simboliku l-idea ta’ tregwa matul iċ-ċelebrazzjoni tal-logħob, biex tirrifletti t-tliet valuri oriġinali tal-eċċellenza, ir-rispett u l-ħbiberija. Is-soċjetà ċivili organizzata hija favur l-ispirtu tal-bini ta’ dinja paċifika u aħjar permezz tal-edukazzjoni taż-żgħażagħ bi sport li jiġi pprattikat mingħajr diskriminazzjoni ta’ kwalunkwe tip, u fi spirtu ta’ ħbiberija, solidarjetà u logħob ġust.

Oliver Röpke, il-President tal-KESE, qal li: “Il-Logħob jirrappreżenta l-ispirtu ta’ għaqda u paċi, li ma jagħrfux fruntieri u jlaqqgħu flimkien lill-persuni minn kull qasam tas-soċjetà. Billi nirrakkomandaw dawn il-valuri, nittamaw li nispiraw moviment globali favur il-paċi u s-solidarjetà.”

Laurenţiu Plosceanu, il-Viċi President tal-KESE għall-Komunikazzjoni, qal li: “B’din l-inizjattiva nixtiequ napprovaw il-valuri tal-isport li ma jeqdiemu qatt. Il-valuri li qed niddefendu għandhom is-setgħa li jbiddlu d-dinja u jgħaqqdu lin-nies u lill-pajjiżi.”

Krzysztof Pater, il-Viċi President tal-KESE għall-Baġit, qal li: “Il-Logħob ta’ Pariġi juri li kulħadd għandu d-dritt li jagħmel parti minn din iċ-ċelebrazzjoni kbira tal-isports mingħajr diskriminazzjoni. Il-persuni b’diżabilità huma eżempju b’saħħtu għall-udjenzi madwar id-dinja, u jenfasizzaw il-valuri tal-kuraġġ, id-determinazzjoni u l-ugwaljanza.”

Dimitris Dimitriadis, eks President tal-KESE u President tas-Sezzjoni għar-Relazzjonijiet Esterni tal-KESE, qal: “It-tregwa, jew ‘Ekecheiria’ bil-Grieg oriġinali, issa tidher aktar f’waqtha minn qatt qabel. Jeħtieġ li din l-idea tat-tregwa nagħtuha l-ħajja u nħaddmuha fil-prattika bħala tama biex nispiraw l-umanità u nippromovu l-paċi u d-djalogu.”

Giulia Barbucci, eks Viċi President tal-KESE għall-Baġit u Membru tal-KESE, qalet: “Għall-ewwel darba fl-istorja, se jkun hemm parteċipazzjoni ugwali bejn l-irġiel u n-nisa fil-Logħob ta’ Pariġi. Iżda rridu niftakru li l-parità fil-parteċipazzjoni mhijiex l-ugwaljanza u għad hemm ħafna xi jsir fir-rigward ta’ dan l-objettiv fl-isport.”

Isabel Caño Aguilar, eks Viċi President tal-KESE għall-Komunikazzjoni u Membru tal-KESE, qalet: “Ix-xewqa tiegħi għal-Logħob ta’ Pariġi hija li l-kategoriji kollha ta’ persuni b’diżabilità jkun rappreżentati b’mod ekwu, bid-dritt li jikkompetu u jiġu protetti, speċjalment bl-inklużjoni tal-persuni b’diżabilità intelletwali”. (mt)

Fis-sessjoni plenarja ta’ Lulju tal-KESE ġiet adottata l-Opinjoni dwar Id-diġitalizzazzjoni tal-enerġija: nibbilanċjaw l-opportunitajiet u r-riskji għall-konsumaturi Ewropej. 

Din l-Opinjoni, abbozzata mill-membru tal-KESE Kęstutis Kupšys, tindika li l-enerġija għandha tibqa’ affordabbli, aġġustabbli u faċli biex tintuża għall-konsumaturi. Id-diġitalizzazzjoni tal-enerġija ma tfissirx “diġitali biss”. 

Jeħtieġ li l-konsumaturi jibqgħu l-ogħla prijorità u li jiġu ppreservati l-modi tradizzjonali ta’ negozjar. Jeħtieġ li l-UE tagħmel progress fl-iżvilupp ta’ għodod diġitali faċli għall-utent li jakkomodaw ħtiġijiet diversi u jippromovu aċċess ugwali għas-servizzi tal-enerġija diġitali. 

Madankollu, l-utenti xorta għandhom ikunu jistgħu jagħżlu l-prezzijiet, il-kuntratti u s-servizzi tal-klijenti b’mod “prediġitali”. “Id-diġitalizzazzjoni tal-enerġija toffri opportunitajiet u sfidi. Irridu naħdmu flimkien biex niżguraw li t-tranżizzjoni tal-enerġija diġitali tkun inklużiva, sigura u verament ta’ benefiċċju għall-konsumaturi Ewropej kollha, u b’hekk il-punti b’saħħithom jinbidlu f’opportunitajiet,” qal is-Sur Kupšys. 

L-indisponibilità reċenti tal-IT ikkawżat kaos fil-qasam tat-trasport u tan-negozji fid-dinja kollha, u wriet kemm huwa importanti li ma jkunx hemm dipendenza eċċessiva fuq it-teknoloġija. 

Il-vantaġġi tat-tranżizzjoni lejn enerġija diġitali ma jridux jaħbu l-lat l-ieħor tal-kwistjoni: ir-riskji u l-isfidi. Għal din ir-raġuni, il-protezzjoni tal-konsumaturi u l-appoġġ għall-ħaddiema għandhom jibqgħu fil-quċċata tal-aġenda. 

Huwa importanti li jinħolqu regolamenti dinamiċi dwar il-protezzjoni tal-konsumatur adattati għall-kuntesti u l-parteċipanti ġodda fis-settur, iżda wkoll li jiġu offruti taħriġ, programmi ta’ taħriġ mill-ġdid u assistenza finanzjarja lill-ħaddiema. (mp)

Is-sessjoni plenarja ta’ Lulju tal-KESE inkludiet dibattitu mal-Ministru Ungeriż għall-Affarijiet tal-Unjoni Ewropea, János Bóka, li ppreżenta l-prijoritajiet ewlenin tal-Presidenza Ungeriża tal-Kunsill tal-UE. 

L-Ungerija qed tieħu r-riedni tal-presidenza b’rotazzjoni fi żmien sensittiv għall-Ewropa, żmien ta’ tranżizzjoni politika fi ħdan l-istituzzjonijiet u sfidi straordinarji għall-Unjoni. “Il-Presidenza Ungeriża tal-Kunsill tal-2024 waslet fi żmien ta’ kriżijiet multipli,” qal is-Sur Bóka. “Qed naraw gwerra fil-viċinat tagħna, tnaqqis fil-kompetittività Ewropea, żieda fit-tensjonijiet fir-relazzjonijiet kummerċjali tal-UE, sfidi demografiċi, migrazzjoni mhux ikkontrollata u prospetti li qed jonqsu għall-bdiewa Ewropej.” 

Waqt li fakkar li l-Kumitat kellu storja twila ta’ ħidma tajba mal-presidenzi tal-Kunsill, il-President tal-KESE Oliver Röpke tkellem dwar ir-rwol tal-istituzzjoni bħala gwardjan tal-valuri Ewropej: “Il-Kumitat tagħna huwa impenjat li jaħdem mill-qrib mal-Presidenza Ungeriża biex jiżgura li l-UE qed tieħu azzjoni dwar dak li l-Ewropej iħossu li huma l-aktar prijoritajiet urġenti. Ser inkunu msieħba imprezzabbli, iżda wkoll kritiċi li jesprimu ruħhom b’mod ċar u kostruttivi. Is-soċjetà ċivili għandha vuċi b’saħħitha, u se niżguraw li tinstema’.” 

Xi membri tal-KESE esprimew tħassib dwar il-pożizzjoni tal-Ungerija dwar il-gwerra ta’ aggressjoni tar-Russja kontra l-Ukrajna, ir-rispett għall-istat tad-dritt fl-UE, u l-ispazju dejjem jiċkien għas-soċjetà ċivili fl-Ungerija. Is-Sur Bóka qal li l-presidenza Ungeriża kienet kompletament konxja tar-responsabbiltajiet tagħha u qablet kemm mal-pożizzjoni komuni tal-UE dwar l-Ukrajna kif ukoll mal-istat tad-dritt u l-valuri Ewropej. Il-presidenza Ungeriża diġà kkuntattjat lill-KESE u talbet għaxar Opinjonijiet esploratorji. Għal aktar informazzjoni dwar l-attivitajiet tal-KESE matul il-presidenza Ungeriża, jekk jogħġbok iċċekkja s-sit web tal-KESE. (mp)

Tħabbru l-finalisti tal-Premjijiet tal-UE għall-Produzzjoni Organika 2024: 24 proġett minn 12-il pajjiż tal-UE fi tmien kategoriji. Ir-rebbieħa se jitħabbru f’ċerimonja fi Brussell fit-23 ta’ Settembru, li se ssir flimkien maċ-ċelebrazzjonijiet annwali tal-Jum Organiku tal-UE. 

Il-premjijiet, li jsiru għat-tielet darba, jippremjaw proġetti li huma innovattivi u sostenibbli u li jżidu valur sinifikanti għall-produzzjoni u l-konsum organiku. Jipprovdu lir-rebbieħa bi pjattaforma biex jippreżentaw il-prattiki tajbin tagħhom lil udjenza usa’. 

Il-premjijiet huma organizzati mill-Kummissjoni Ewropea, il-Kumitat Ekonomiku u Soċjali Ewropew, il-Kumitat Ewropew tar-Reġjuni, COPA-COGECA u IFOAM Organics Europe, il-Parlament Ewropew u l-Kunsill tal-UE. Il-bord tal-għażla huwa magħmul minn seba’ membri nominati minn dawn il-korpi. 

Il-finalisti jinkludu: 

• L-aqwa bidwi organiku (mara): Blagovesta Vasilieva (Bulgarija), Caroline Devillers (Belġju), Reinhild Frech-Emmelmann (Awstrija) 
• L-aqwa bidwi organiku (raġel): Gianpaolo Mancini (Italja), Tommi Hasu (Finlandja), Benny Schöpf (Ġermanja) 
• L-aqwa reġjun organiku: Comunidade Intermunicipal do Alto Tâmega e Barroso (Portugall), Castilla - La Mancha (Spanja), South Savo (Finlandja) 
• L-aqwa belt organika: BioStadt Bremen (Ġermanja), Cascais (Portugall), Las Rozas (Spanja) 
• L-aqwa “bijodistrett” organiku: Distretto del Cibo Monregalese (Italja), Bioregião de S. Pedro do Sul (Portugall), Sörmland Bio-district (Żvezja) 
• L-aqwa SME li tipproċessa ikel organiku: Biologon GmbH (Awstrij), Gino Girolomoni Cooperativa Agricola (Italja), Organic veggie food GmbH (Ġermanja) 
• L-aqwa bejjiegħ bil-imnut tal-ikel organiku: BIOGAST GmbH (Awstrija), Coolanowle Organic Meats (Irlanda), SAiFRESC (Spanja) 
• L-aqwa ristorant/servizz tal-ikel organiku: B2 Bio pur GmbH (Ġermanja), Biohotel St. Daniel (Slovenja), Kalf & Hansen (Żvezja) 

Il-produzzjoni organika fl-UE tkopri 17-il miljun ettaru (10.5% tal-art agrikola tal-UE fl-2022), u l-għan huwa li tintlaħaq il-mira tal-Patt Ekoloġiku Ewropew ta’ 25% sal-2030. Iż-żieda fis-sensibilizzazzjoni tal-pubbliku u fid-domanda tal-konsumaturi huma kruċjali. Il-Premjijiet tal-UE għall-Produzzjoni Organika, stabbiliti fl-2022 bħala parti mill-Pjan ta’ Azzjoni għall-Iżvilupp tal-Produzzjoni Organika, jirrikonoxxu l-eċċellenza tul il-katina tal-valur organiku, mill-biedja għas-servizzi tal-ikel, u jtejbu l-viżibbiltà u l-għarfien tal-prattiki organiċi. (ks)

Il-KESE jistieden lill-Kummissjoni tagħmel is-suġġett tal-indukraturi informali prijorità politika u tistabbilixxi pjattaforma għall-iskambju tal-aħjar prattiki fost l-Istati Membri.

F’Lulju, il-KESE adotta Opinjoni u sejjaħ għat-teħid ta’ miżuri addizzjonali, kemm fil-livell tal-UE kif ukoll f’dak nazzjonali, biex jiġu protetti aħjar il-persuni li jindukraw b’mod informali u jiġi rikonoxxut il-kontribut essenzjali tagħhom għas-soċjetà.

Dawn il-miżuri jinkludu: it-twaqqif ta’ pjattaforma mill-Kummissjoni Ewropea għall-iskambju tal-aħjar prattiki fost l-Istati Membri, il-forniment ta’ servizzi ta’ kwalità għolja u aċċessibbli bbażati fil-komunità biex jittaffa l-piż fuq l-indokraturi tal-familja, u l-forniment ta’ servizzi ta’ solliev. Huwa kruċjali wkoll li l-indokraturi jkunu jistgħu jaċċessaw kundizzjonijiet tax-xogħol flessibbli, sabiex ma jkunux imġiegħla jħallu xogħolhom biex jieħdu ħsieb il-membri tal-familja.

Pietro Barbieri, relatur tal-Opinjoni, qal: “Il-KESE jinsab lest biex isemma’ leħen grupp ta’ nies fis-soċjetà tagħna li ħafna drabi ma jidhrux: l-indokraturi infomali. Dawn il-persuni ħafna drabi jiġu mġiegħla jħallu xogħolhom u b’konsegwenza ta’ dan jitilfu l-introjtu u ħafna mid-drittijiet tagħhom. Il-persuni li jindukraw b’mod informali jwettqu dan ix-xogħol li ma jidhirx. Issa wasal iż-żmien li noħorġu fid-dieher l-isforzi tagħhom”.

Il-KESE jistieden lill-Istati Membri jieħdu miżuri adatti biex jiggarantixxu li deċiżjoni li tittieħed dwar il-kura informali tkun volontarja, li jiġu indirizzati l-inugwaljanzi bejn il-ġeneri, u li l-persuni li jindukraw b’mod informali jkunu jistgħu jżommu l-impjieg u l-paga tagħhom permezz ta’ kundizzjonijiet tax-xogħol aktar flessibbli u jkunu jistgħu jidħlu lura faċilment fis-suq tax-xogħol jekk ikunu ġew imġiegħla joħorġu minnu. Huwa importanti li niżguraw li jkollhom bilanċ adegwat bejn ix-xogħol u l-ħajja privata.

L-indukrar informali ma jaffettwax lill-irġiel u lin-nisa bl-istess mod. Perċentwal enormi ta’ persuni li jindukraw b’mod informali huma nisa. Madwar 70 % jieħdu ħsieb uliedhom, il-konjuġi jew ħuthom. Minbarra li huma esposti għal riskji ogħla ta’ eżawriment u disturbi psikofiżiċi, dawn in-nisa jinsabu f’riskju serju ta’ faqar. “Għandna waħda mill-aħjar sistemi ta’ protezzjoni soċjali fid-dinja, iżda f’ħafna każijiet, din tiddependi fuq in-nisa stess, dirgħajhom u l-volontà tagħhom,” qal is-Sur Barbieri.

Sabiex ikun jista’ jiġi mmonitorjat l-impatt tar-regoli u r-regolamenti rilevanti, huwa importanti ferm li jkun hemm aċċess għal data kwalitattiva u kwantitattiva li tiddeskrivi l-kundizzjonijiet tal-għajxien attwali tal-persuni li jindukraw b’mod informali. Il-KESE jappella sabiex jiġu adottati aktar strateġiji ta’ riċerka, b’mod partikolari bil-kooperazzjoni tal-Eurofound u l-involviment tal-partijiet interessati rilevanti.

Kważi nofs aktar minn tliet miljun trainee fl-UE ma jirċievu l-ebda kumpens u kważi terz ma għandhom l-ebda aċċess għall-protezzjoni soċjali.

Il-KESE organizza dibattitu ta’ livell għoli f’Lulju bil-għan li tittejjeb il-leġiżlazzjoni tal-UE dwar it-traineeships fost sejħiet mis-soċjetà ċivili u l-organizzazzjonijiet taż-żgħażagħ biex titwaqqaf il-prattika mifruxa ta’ trainees li jaħdmu b’xejn u li ma jkollhom l-ebda aċċess għall-protezzjoni soċjali jew drittijiet tax-xogħol u soċjali oħra.

Fid-dibattitu tas-sessjoni plenarja mal-Kummissarju għall-Impjiegi u d-Drittijiet Soċjali, Nicolas Schmit, il-KESE laqa’ l-aħħar proposti tal-Kummissjoni li għandhom l-għan li jittejbu t-traineeships fl-Ewropa – id-Direttiva dwar it-Traineeship u l-Qafas tal-Kwalità għat-Traineeships imsaħħaħ.

Madankollu, il-KESE ħeġġeġ lill-koleġiżlaturi biex isaħħu l-proposti biex jiġi evitat li t-traineeships jintużaw ħażin bħala sors ta’ xogħol irħis jew sostitut għall-impjiegi fil-livell inizjali. Huwa enfasizza l-importanza ta’ kumpens ġust għat-trainees u li jiġu koperti l-ispejjeż tal-għajxien li jġarrbu meta jieħdu sehem fi traineeship.

Il-President tal-KESE, Oliver Röpke, qal li “It-traineeships huma għodda kruċjali li tippermetti liż-żgħażagħ jiksbu esperjenza diretta ta’ xogħol. Irridu niżguraw li ħadd miż-żgħażagħ ma jiġi eskluż minn dawn l-opportunitajiet minħabba restrizzjonijiet finanzjarji. Huwa għalhekk li t-traineeships jeħtieġ li jiġu kkumpensati b’mod ġust. Irridu nindirizzaw dawk it-traineeships fl-Ewropa li qed jisfruttaw, u nirringrazzja lill-Kummissjoni għall-proposti tagħha biex jintlaħaq dan l-għan.”

Il-Kummissarju Schmit qal li “Traineeships jistgħu jkunu mod tajjeb għaż-żgħażagħ biex jiksbu esperjenza inizjali ta’ xogħol, jitgħallmu ħiliet ġodda u jibnu n-network tagħhom. Madankollu, dawn iridu jkunu traineeships ta’ kwalità tajba. Dan ifisser li jrid ikun hemm objettiv ċar ta’ tagħlim, iridu jkunu bi ħlas u t-trainees iridu jirċievu mentoraġġ u gwida biex jgħinuhom fit-tranżizzjoni tagħhom lejn id-dinja tax-xogħol.”

Fl-Opinjoni tiegħu dwar id-Direttiva dwar it-Traineeship u Qafas ta’ Kwalità għat-Traineeships Imsaħħaħ, il-KESE enfasizza r-rwol ewlieni li jaqdu l-awtoritajiet rilevanti fil-ġlieda kontra r-relazzjonijiet regolari ta’ impjieg li taparsi jkunu traineeships. L-imsieħba soċjali jistgħu jkunu strumentali f’dawn l-isforzi, f’konformità mal-prattiki nazzjonali eżistenti.

“Huwa essenzjali li jittejjeb il-Qafas tal-Kwalità għat-Traineeships fl-Ewropa kollha, speċjalment f’termini tat-tisħiħ tal-kontenut tat-tagħlim u t-taħriġ, u li jiġi miġġieled l-abbuż u l-użu ħażin tat-traineeships. Għalhekk nappellaw lill-Kummissjoni biex ittejjeb il-proposti mressqa sabiex tiżgura li dawn l-għanijiet jintlaħqu,” qalet ir-relatur tal-Opinjoni, Nicoletta Merlo. (ll)

Il-KESE ħareġ twissija bikrija dwar l-impatti agrikoli tat-tkabbir li jmiss tal-UE. Din l-espansjoni trid titqies fl-isfond ta’ sfidi globali sinifikanti, inklużi bidliet ġeopolitiċi, it-tibdil fil-klima, u t-tranżizzjonijiet fil-politiki dwar l-enerġija u l-ambjent. Il-KESE jenfasizza l-importanza ta’ tħejjija bir-reqqa u aderenza mal-valuri tal-UE hekk kif jissieħbu membri ġodda. 

Fis-sessjoni plenarja tiegħu ta’ Lulju, il-KESE adotta Opinjoni li tenfasizza l-kumplessitajiet tal-proċess ta’ tkabbir, li tenfasizza l-ħtieġa għal tħejjija, sostenibbiltà, u appoġġ ibbilanċjat kemm għas-setturi agrikoli attwali kif ukoll għal dawk tal-Istati Membri kandidati. Dan it-tkabbir għandu l-għan li jsaħħaħ l-awtonomija strateġika tal-UE u jnaqqas l-impatt ambjentali tal-agrikoltura. Madankollu, it-tkabbir wassal għal riżultati mħallta fil-passat, li spiss kienu iktar ta’ benefiċċju għal intrapriżi agrikoli akbar milli g]al azjendi agrikoli iżgħar u rurali. 

Dan ġie indikat mir-relatur tal-Opinjoni, Stoyan Tchoukanov, li nnota li waqt li t-tkabbir tal-passat ġeneralment kien ta’ suċċess, dan ma kienx ta’ benefiċċju kemm għaż-żoni rurali kif ukoll għall-bdiewa fuq skala żgħira. Huwa enfasizza l-ħtieġa li s-sistema agrikola tiġi ġestita bir-reqqa biex jiġi evitat it-tfixkil. 

Sabiex tiġi indirizzata miżinformazzjoni potenzjali u tiġi żgurata integrazzjoni bla xkiel, il-KESE jirrakkomanda l-ġbir komprensiv tad-data u l-monitoraġġ tar-riformi agrikoli. Il-pajjiżi kandidati se jkollhom jadattaw għall-politika agrikola komuni (PAK) li qed tevolvi, li issa iktar qed tenfasizza s-servizzi tal-ekosistema milli l-appoġġ tradizzjonali. It-tkabbir huwa mistenni li jżid iż-żona agrikola tal-UE b’mod sinifikanti, speċjalment bl-adeżjoni tal-Ukrajna, li waħedha tespandiha bi kwart. 

Il-KESE jirrakkomanda approċċ ta’ integrazzjoni gradwali, b’baġits iddedikati biex jappoġġjaw is-sottosetturi agrikoli l-aktar milquta, b’mod partikolari l-SMEs. Ir-riformi futuri tal-PAK għandhom jiffukaw fuq is-sostenibbiltà, jissostitwixxu s-sussidji bbażati fuq l-ettari b’inċentivi bbażati fuq il-benefiċċji ambjentali u soċjetali. 

B’mod ġenerali, il-KESE jappella għal proċess ta’ tkabbir bir-reqqa u appoġġjat sew biex jiġi żgurat li l-Istati Membri kollha jibbenefikaw minnu u li l-prattiki agrikoli tal-UE jibqgħu sostenibbli u ekwi fil-isfond ta’ tensjonijiet ġeopolitiċi li qed jikbru.

Il-KESE kkritika l-pjan attwali tal-Kummissjoni Ewropea għall-materjali avvanzati minħabba n-nuqqas ta’ finanzjament, ta’ miri kwantifikabbli u ta’ indikaturi tas-sostenibbiltà tiegħu. Fl-Opinjoni tiegħu dwar il-Komunikazzjoni rilevanti tal-Kummissjoni, huwa jirrakkomanda strateġija komprensiva biex l-UE ssib postha bħala mexxejja globali f’dan is-settur vitali. 

“Il-materjali avvanzati huma kruċjali għall-industrija, it-tkabbir ekonomiku u s-sostenibbiltà fl-UE. Neħtieġu indikaturi tas-sostenibbiltà fil-proċessi kollha tal-produzzjoni u rridu niżguraw il-ħiliet it-tajba u forza tax-xogħol ikkwalifikata,” qal Anastasis Yiapanis, relatur tal-Opinjoni. 

Il-Kumitat iwissi li l-pjan tal-Kummissjoni huwa nieqes mill-ambizzjoni u mill-miri speċifiċi meħtieġa biex tiġi żgurata t-tmexxija industrijali tal-UE. Il-korelatur Gerardo Luis Arroyo Herranz enfasizza n-nuqqas ta’ miri kwantifikabbli, skadenzi u indikaturi ewlenin tal-prestazzjoni. Il-KESE jappella għal approċċ strateġiku kuraġġuż biex jissaħħu l-kapaċitajiet tal-UE f’materjali avvanzati u jipproponi l-inklużjoni tal-kura tas-saħħa bħala qasam strateġiku minħabba l-impatt industrijali sinifikanti tagħha. 

Rakkomandazzjoni ċentrali hija t-tranżizzjoni lejn ekonomija ċirkolari biex titnaqqas id-dipendenza fuq il-materja prima. Dan jeħtieġ kooperazzjoni msaħħa bejn l-industrija, l-akkademja u dawk li jfasslu l-politika, investiment sostanzjali fir-riċerka u l-iżvilupp, u l-iżvilupp tal-ħiliet. “Mingħajr persuni b’ħiliet adegwati, kwalunkwe azzjoni tista’ tfalli. L-UE trid timplimenta programmi ta’ titjib tal-ħiliet u taħriġ mill-ġdid u inizjattivi ta’ edukazzjoni vokazzjonali,” qal is-Sur Arroyo Herranz. 

Il-KESE jqis li l-EUR 250 miljun proposti għal materjali avvanzati taħt Orizzont Ewropa mhumiex biżżejjed u jappella għal finanzjament aktar sostanzjali, inċentivi bbażati fuq it-taxxa u proċessi burokratiċi simplifikati biex jiġu stimulati l-investiment u l-innovazzjoni. L-iżgurar ta’ provvista stabbli ta’ materja prima kritika huwa wkoll ta’ tħassib. 

Il-KESE jirrakkomanda t-tisħiħ tal-kapaċità domestika tal-UE u d-diversifikazzjoni tas-sorsi, inklużi sħubijiet mal-Korea t’Isfel u l-Istati Uniti u kuntratti fit-tul ma’ pajjiżi iżgħar biex jittaffa t-tfixkil fil-provvista. (gb)