Javier Doz: Gníomhaíochtaí an Ghrúpa um an Seimeastar Eorpach

Tá an Grúpa um an Seimeastar Eorpach comhdhéanta de 42 chomhalta, cathaoirleach amháin agus dhá leaschathaoirleach – Luca Jahier (Grúpa III) agus Gonçalo Lobo (Grúpa I) – rúnaíocht de thriúr a bhfuil Jakob Andersen i gceannas uirthi agus oiliúnaí amháin. Ina theannta sin, tá 27 dtoscaireacht náisiúnta thríthaobhacha sa struchtúr ina bhfuil 39 gcomhalta eile.

Is léir ó ainm an Ghrúpa cé na cúraimí atá air: anailís a dhéanamh ar rialachas eacnamaíoch an Aontais agus ar na nósanna imeachta agus an t‑ábhar lena mbaineann, lena n‑áirítear na bearta a dhéantar ar an leibhéal náisiúnta, agus tuairim a éisiúint i ndáil leis an méid sin. As na doiciméid éagsúla atá i bpacáiste an Fhómhair agus pacáiste an Earraigh den Seimeastar, déanann an Grúpa um an Seimeastar Eorpach dlúthfhaireachán ar an Straitéis Bhliantúil um Fhorbairt Inbhuanaithe agus ar an dá thuairim (an chéad tuairim agus an tuairim fhorlíontach) a ghlacann an Coiste gach bliain maidir leis an Straitéis Bhliantúil um Fhorbairt Inbhuanaithe. Reáchtálann an Grúpa cúig chruinniú in aghaidh na bliana agus comhdháil oscailte atá i gceann díobh a eagraítear i mí na Bealtaine nó i mí an Mheithimh go hiondúil.

Thosaigh sainordú reatha an Ghrúpa um an Seimeastar Eorpach le linn phaindéim COVID‑19, paindéim ar fhreagair an tAontas di trí chur chuige iomlán éagsúil a ghlacadh i leith an bheartais eacnamaíoch i gcomparáid leis an gcur chuige a glacadh le linn ghéarchéim 2008-2012. Glacadh meascán de bheartais airgeadaíochta agus fhioscacha agus Plean Téarnaimh ar fiú EUR 750 000 billiún, arna mhaoiniú le fiachas Eorpach. Ó shin i leith, tá gníomhaíocht an Ghrúpa dírithe ar anailís a dhéanamh ar an ionstraim théarnaimh Next Generation EU agus ar na Pleananna Náisiúnta Téarnaimh agus Athléimneachta (NRRPanna) lena ngabhann. Chuir an méid sin le ról thoscaireachtaí náisiúnta an Ghrúpa, a bhfuil ról lárnach acu i ndréachtú an dá rún a bheidh le glacadh ag CESE maidir leis na pleananna téarnaimh. Sa chéad rún, a glacadh ag seisiún iomlánach CESE i mí Feabhra 2021, díríodh ar mheastóireacht a dhéanamh ar rannpháirtíocht eagraíochtaí na sochaí sibhialta i ndréachtú na NRRPanna. Bhí an mheastóireacht bunaithe ar bharúlacha na dtoscaireachtaí náisiúnta, a fuarthas trí shuirbhé cúig cheist, agus ar dhíospóireachtaí éagsúla a tionóladh ar an leibhéal náisiúnta. Cáintear sa rún go raibh rannpháirtíocht eagraíochtaí na sochaí sibhialta íseal agus ar chaighdeán íseal, in ainneoin fhorálacha an Rialacháin maidir leis an tSaoráid Téarnaimh agus Athléimneachta.

I láthair na huaire, tá rún nua á ullmhú ag an nGrúpa um an Seimeastar Eorpach agus a chuid toscaireachtaí náisiúnta, a bheidh le plé ag seisiún iomlánach mhí na Bealtaine, ina ndéanfar meastóireacht ar ábhar na bpleananna, ar an tionchar a bheidh acu ar an ngeilleagar agus ar an tsochaí agus ar rannpháirtíocht eagraíochtaí na sochaí sibhialta i gcur chun feidhme na rún sin. An uair seo, tá 21 cheist sa suirbhé. Cuirfear san áireamh freisin conclúidí na bpléití a bhí ann, amhail an dá chomhdháil náisiúnta a eagraíodh i gcomhpháirt leis na comhairlí náisiúnta eacnamaíocha agus sóisialta sa dá thír a gheobhaidh an méid níos mó de chistí na Saoráide Téarnaimh agus Athléimneachta, mar atá, an Spáinn agus an Iodáil. Mar chreat tagartha, bainfear leas as na príomhmheasúnuithe ar na NRRPanna atá á gcur i gcrích ag na meithleacha Eorpacha, mar aon le sonraí arna soláthar ag an Tascfhórsa Téarnaimh agus Athléimneachta.

A luaithe a bheidh an obair ar ullmhú an dara rún tugtha chun críche, díreofar gníomhaíochtaí an Ghrúpa ar athchóiriú an tSeimeastair Eorpaigh agus ar mheastóireacht a dhéanamh ar an infheistíocht a bheidh ag teastáil d’fhonn cuspóirí an Comhaontaithe Ghlais don Eoraip a bhaint amach agus, go háirithe, na cuspóirí sin atá riachtanach san aistriú cóir chuig geilleagar glas aeráidneodrach faoi 2050. Beidh an t‑athchóiriú ar nósanna imeachta an tSeimeastair Eorpaigh, atá nasctha le hathchóiriú an Chomhshocraithe Cobhsaíochta agus Fáis, á phlé le linn chomhdháil an Ghrúpa um an Seimeastar Eorpach a bheidh ar siúl an 3 Meitheamh. Chun anailís a dhéanamh ar na hinfheistíochtaí a bheidh ag teastáil faoin gComhaontú Glas, molfaidh an Grúpa um an Seimeastar Eorpach go n‑eagróidh rannóg ECO, i dteannta rannóg NAT, comhdháil sa ráithe dheiridh den bhliain.

Mar fhocal scoir, níl aon amhras ach go mbeidh ar an nGrúpa um an Seimeastar Eorpach aghaidh a thabhairt sna míonna amach romhainn ar iarmhairtí eacnamaíochta ionradh na Rúise ar an Úcráin agus na smachtbhannaí a ghlac an tAontas chun dul i ngleic leis. Ní mór dó freisin a bheith go mór ar son athbhunú cheannasacht ár dtíre comharsanaí agus ár gcomhghuaillí.

Javier Doz

Uachtarán an Ghrúpa um an Seimeastar Eorpach