EESC info

Cháin comhaltaí Choiste Eacnamaíoch agus Sóisialta na hEorpa (CESE) an t‑ionradh gan chúis gan údar a rinne Cónaidhm na Rúise ar an Úcráin. Rinneadh an cáineadh le linn díospóireacht gan choinne ar chuir Uachtarán CESE Christa Schweng tús léi agus seisiún iomlánach mhí Feabhra ar siúl. Chuir comhaltaí CESE a ndlúthpháirtíocht le muintir na hÚcráine in iúl agus d’éiligh siad bearta láidre ar leibhéal an Aontais agus na mBallstát araon, mar léiriú ar an gcur le chéile in am seo an ghátair.

Agus tús á chur aici leis an díospóireacht, leag an tUachtarán Christa Schweng béim ar a thromchúisí agus atá a bhfuil ag titim amach san Eoraip: ‘Tá ionsaí á dhéanamh ar leac dorais an Aontais Eorpaigh. Sárú soiléir ar an dlí idirnáisiúnta atá ann, agus ar chomhaontuithe idirnáisiúnta, Comhaontuithe Mhionsc san áireamh. Ag an uair seo, is ag cuimhneamh ar an Úcráin agus ar shochaí shibhialta na tíre sin atá muid: mná, fir agus leanaí nach ndearna aon cheo as bealach ach ar gá dóibh ionsaí gan chúis a fhulaingt agus eagla a n‑anama a bheith orthu mar sin féin. Tá an Eoraip ina seasamh ar ghualainn na hÚcráine agus a sochaí sibhialta!’

Bhí an méid seo a leanas le rá ag Stefano Mallia, cathaoirleach Ghrúpa na bhFostóirí: ‘Is cinnte go bhfuil an tAontas aontaithe agus fonn air beart daingean a dhéanamh. Bhí mise i láthair ar Chearnóg Maidan agus is cuimhin liom go soiléir gur theastaigh go mór ó lucht na sochaí sibhialta a bheith ina chuid den Eoraip, ina chuid den Aontas. Nár thréigtear an Úcráin. Ní mór dúinne a bheith sásta íobairtí a dhéanamh agus an rud is gá a dhéanamh’.

Thug Oliver Röpke, cathaoirleach Ghrúpa na nOibrithe, an méid seo a leanas le fios: ‘Tá sé in am againn cur ina choinne seo agus a chur in iúl go soiléir nach nglacfaidh an Eoraip lena leithéid seo choíche. Ní mór dúinn cur le chéile agus freagairt chuí a thabhairt ar an ionsaí seo agus an fód a sheasamh i gceart le muintir na hÚcráine’.

Is leis an meon céanna a chuir Séamus Boland, cathaoirleach an Ghrúpa ‘Éagsúlacht Eoraip’, a thacaíocht in iúl: ‘Tá uair na cinniúna buailte linn agus ní mór dúinn an lámh a shíneadh chuig eagraíochtaí sochaí sibhialta na hÚcráine. Thar aon ní eile, ní mór don Aontas a bheith aontaithe agus seasamh lena chomharsana.’

Is éard a bhí le rá ag cathaoirleach na Rannóige um Chaidreamh Seachtrach in CESE, Dimitris Dimitriadis, ná go leanfaidh CESE de thacaíocht a thabhairt do shochaí shibhialta na hÚcráine trí bhíthin na mbealaí cumarsáide seanbhunaithe, cuir i gcás Ardán Sochaí Sibhialta AE‑na hÚcráine agus na foinsí teagmhála déthaobhacha. (at)

Ní mór don Aontas Eorpach athmheasúnú a dhéanamh ar thosaíochtaí a bheartais thionsclaíoch i bhfianaise na paindéime agus na coinbhleachta ar theorainn oirthear na hEorpa. Is é sin an teachtaireacht a tháinig as an gcomhdháil dar teideal ‘Todhchaí inbhuanaithe d’earnáil tionsclaíochta na hEorpa’ a d’óstáil Coiste Eacnamaíoch agus Sóisialta na hEorpa an 4 Márta 2022, i gcomhar leis an gCoimisiún Eorpach agus le hUachtaránacht na Fraince ar Chomhairle an Aontais Eorpaigh.

Agus í ag cur tús leis an gComhdháil, leag Uachtarán CESE, Christa Schweng, béim ar an ngá atá le cur chuige comhoibritheach maidir le beartas tionsclaíoch an Aontais a mhúnlú: ‘Ní mór dúinn oibriú i gcomhar leis an tionsclaíocht, leis na húdaráis phoiblí agus leis na comhpháirtithe sóisialta agus todhchaí inbhuanaithe á tógáil againn do thionscal an Aontais. Le linn an phróisis sin, níor cheart aon duine a fhágáil ar lár.’

Cé go bhfuil an tAontas Eorpach fós ag déileáil le hiarmhairtí ghéarchéim COVID-19, chuir na himeachtaí móra san Úcráin alltacht ar mhuintir na mór-roinne. Dúirt Margrethe Vestager, Leas-Uachtarán Feidhmiúcháin an Choimisiúin Eorpaigh, ‘go gcaithfidh tionscail na hEorpa spleáchas aontaobhach ar thionscail eile a laghdú. Ní mór dúinn an Margadh Aonair a chosaint freisin ar thionchair sheachtracha, bíodh sin fóirdheontais eachtracha saofa nó iarrachtaí ar chomhéigean ag rialtais eachtracha.’

Léirigh formhór na gcainteoirí go raibh an choinbhleacht ina hargóint láidir eile chun leanúint de bheith ag iarraidh cuspóirí glasa a bhaint amach, cé gur mheas cuid eile díobh gur gá athmhachnamh a dhéanamh sna himthosca áirithe sin, ar ár spriocanna glasa, agus bhí caint, fiú, ar fhilleadh ar an ngual san Eoraip. ‘Mar gheall ar thosca nua atá ag teacht chun cinn amhail boilsciú, fiachas, cosaint, agus fuinneamh, ní mór dúinn straitéis thionsclaíoch iomlán difriúil a shaothrú. Ní mór neamhspleáchas agus cosaint straitéiseach a bheith mar riachtanas nua againn,’ a d’áitigh Carlo Calenda, Feisire de Pharlaimint na hEorpa.

Anuas air sin, tá Ard-Stiúrthóir Fiontraíochta in Aireacht Geilleagair, Airgeadais agus Téarnaimh na Fraince, Thomas Courbe, den tuairim gur deis é an t-aistriú chuig fuinneamh inbhuanaithe chun fothaí tionsclaíocha na hEorpa a nuachóiriú. Ní mór dálaí cothroma fostaíochta atá cóir ó thaobh na sochaí de a chothú leis an aistriú glas agus an t-aistriú digiteach, i gcomhréir leis an bprionsabal nach bhfágfar aon duine ar lár. ‘Ba cheart é a bheith mar sprioc astaíochtaí gás ceaptha teasa a laghdú a mhéid is féidir ar an gcostas socheacnamaíoch is ísle is féidir,’ arsa rapóirtéir CESE, Sandra Parthie. < style="color:blue">An straitéis nua tionsclaíochta a nuashonrú.

Ar deireadh, d’athdhearbhaigh an Coimisinéir Eorpach um an Margadh Inmheánach, Thierry Breton, go bhfuil sé ríthábhachtach fís chomhtháite den Aontas Eorpach agus dá thionscail a spreagadh agus teannas geopholaitiúil ag dul i méid. (gb/dm)

Thionóil Coiste Eacnamaíoch agus Sóisialta na hEorpa (CESE) comhdháil dar teideal An Eoraip a mhúnlú i dteannta a chéile. Ba é cuspóir na comhdhála sin, a eagraíodh d’fhonn Comhdháil ar Thodhchaí na hEorpa a thabhairt chun críche, bailchríoch a chur ar an obair a rinne an Coiste go dtí sin agus plé a dhéanamh ar an staid reatha, ar na dúshláin a bhí amach romhainn agus ar na huaillmhianta don todhchaí.

Chuir Uachtarán CESE, Christa Schweng, tús leis an díospóireacht, agus tagairt á déanamh aici do na forbairtí stairiúla atá ag tarlú le déanaí san Úcráin agus an chéad cheist á freagairt aici maidir le cé acu an é seo an t-am ceart chun todhchaí na hEorpa a phlé.

‘Léiríonn an t-ionsaí i gcoinne na hÚcráine agus a muintire an géarghá atá leis an tionscadal Eorpach agus luachanna bunúsacha na hEorpa, amhail an tsíocháin, an tsaoirse agus an daonlathas, a neartú a thuilleadh', a dúirt Christa Schweng.

Léirigh sí a thábhachtaí atá an eachtra seo mar ócáid chun léargas a fháil ar an staid mar atá faoi láthair agus chun measúnú a dhéanamh ar an méid a tharla le cúpla mí anuas.

Rinne CESE tionscnaimh agus imeachtaí for-rochtana a reáchtáil sna Ballstáit ar fad d’fhonn ionadaíocht chothrom a ráthú, fostóirí, oibrithe agus an tsochaí shibhialta eagraithe ina hiomláine a rannpháirtiú, agus a mbarúlacha a chur in iúl le linn na Comhdhála ar Thodhchaí na hEorpa. Ghlac an Coiste Rún maidir le hInsint Nua ar an Eoraip freisin agus d’fhoilsigh sé roinnt smaointe ar ardán na Comhdhála ar líne. 

I ráiteas deiridh, dúirt Státrúnaí Gnóthaí Eorpacha le hAire don Eoraip agus do Ghnóthaí Eachtracha na Fraince, Clément Beaune an méid seo a leanas: ‘Beidh díospóireachtaí agus cinntí institiúideacha ag teastáil chun tograí na saoránach a chur chun feidhme, agus gníomhóidh CESE mar chaomhnóir chun a chinntiú go mbainfear amach an méid a bhfuiltear ag súil leis’.

Bhí ról thar a bheith gníomhach ag CESE sa Chomhdháil ar Thodhchaí na hEorpa trína ghrúpa ad-hoc, mar bhreathnóir ar bhord feidhmiúcháin na Comhdhála, agus mar chomhalta den seisiún iomlánach. (ks)

Is faoi scáth an chogaidh a tionóladh an chomhdháil maidir le Mná sa Mhargadh Saothair, a d’eagraigh CESE chun Lá Idirnáisiúnta na mBan a chomóradh an 8 Márta. Mhol rannpháirtithe na comhdhála mná éachtacha na hÚcráine as an neart, as an gcrógacht agus as an teacht aniar atá léirithe acu.

San aitheasc tosaigh a thug sí uaithi, thagair Uachtarán CESE, Christa Schweng, do mhná agus do chailíní na hÚcráine a bhfuil iallach á chur orthu a dtír a fhágáil, rud a fhágann i mbaol foréigin iad, murab ionann is riamh.

Ar an gcaoi chéanna, leag Maria Nikolopoulou, cathaoirleach an Ghrúpa ad hoc um an gComhionannas agus comhalta de CESE, béim air ‘go bhfuil mná, máithreacha agus céilí sáinnithe i limistéar cogaidh, agus cuid mhaith acu ag dul chun comhraic iad féin, fad atá tuilleadh eile díobh ar a ndícheall ag iarraidh teitheadh ó ainghníomhartha na n-ionsaithe. Seasaimid leis na sochaithe sibhialta atá ag iarraidh go gcuirfí deireadh leis an gcogaíocht i ngach tír ar domhan.’

Faoi mar a méadaíodh an bhearna fostaíochta idir na hinscní de dheasca phaindéim COVID-19, tá borradh curtha ag an bpaindéim faoin bhforéigean agus faoin gciapadh ag an obair.

D’fhógair an Coimisinéir um Chomhionannas, Helena Dalli, go gcuirfeadh an Coimisiún Eorpach togra i láthair le haghaidh treoir maidir le foréigean in aghaidh na mban agus foréigean teaghlaigh a chomhrac a bheadh ceangailteach ar na Ballstáit uile.

Maidir le hearnáil na hintleachta saorga, níl ach 16 % den lucht saothair ar mná iad, rud a fhágann an chumhacht ag an 84 % eile (ar fir iad) na cinntí go léir a dhéanamh agus ceannaireacht a thabhairt. ‘Mura mbeidh páirt ag mná sna hearnálacha sin, ciallóidh sin gurb iad na fir a chruthóidh agus a mhúnlóidh ár ndomhan nua uile, agus gur domhan claonta a bheidh ann, dá dheasca sin’, a dúirt Schweng.  (at)

In 2022, eagróidh Coiste Eacnamaíoch agus Sóisialta na hEorpa (CESE) ar bhonn comhpháirteach leis an gCoimisiún Eorpach, le Coiste Eorpach na Réigiún (CnaR), COPA-COGECA agus IFOAM Organics Europe Gradaim an Aontais maidir le táirgeadh orgánach den chéad uair, agus é mar aidhm aige barrfheabhas a aithint agus duais a bhronnadh ar na gníomhaithe is fearr agus is nuálaí i slabhra luacha orgánach an Aontais.

Áirítear sna gradaim maidir le Táirgeadh Orgánach (#EUOrganic) ocht nduais agus na seacht gcatagóir seo a leanas don táirgeadh orgánach is fearr:

1. feirmeoir (baineann agus fireann)
2. réigiún
3. cathair
4. bithcheantar
5. fiontar beag agus meánmhéide (FBM)
6. miondíoltóir bia
7. bialann.

Tá beartas níos inbhuanaithe agus níos cuimsithí bia san Aontas Eorpach á mholadh ag CESE le blianta fada agus beidh sé freagrach as na trí ghradam seo a leanas: an FBM a bhfuil an táirgeadh orgánach is fearr aige, an miondíoltóir bia orgánaigh is fearr, agus an bhialann orgánach is fearr. Tá an fhoirm iarratais le fáil anseo. 

Is féidir iarratais ar líne a dhéanamh ón 25 Márta go dtí an 8 Meitheamh 2022, agus beidh siad ar fáil anseo.

Eagrófar searmanas bronnta ar Lá Orgánach an Aontais an 23 Meán Fómhair 2022, ócáid ina gcuirfidh na buaiteoirí a gcuid tionscadal nuálach i láthair. Níl sé beartaithe airgead duaise a bhronnadh.

Cúlra

Shonraigh an Coimisiún an sprioc maidir le 25 % den talamh talmhaíochta a bheith faoi fheirmeoireacht orgánach faoi 2030. Chun tacú leis an sprioc sin, ghlac an Coimisiún an plean gníomhaíochta chun táirgeadh orgánach a fhorbairt i mí an Mhárta 2021. Sa phlean gníomhaíochta seo, glactar cur chuige ina n-aithnítear go bhfuil sé ríthábhachtach feasacht an phobail a mhéadú maidir leis na saintréithe agus na tairbhí a bhaineann leis an táirgeadh orgánach, d’fhonn táirgeadh agus tomhaltas orgánach a spreagadh. Dá bhrí sin, áirítear sa phlean gníomhaíochta duaiseanna bliantúla mar cheann de na straitéisí chun an sprioc sin a bhaint amach. (mr)

Ag an seisiún iomlánach a bhí aige an 24 Feabhra, thug Coiste Eacnamaíoch agus Sóisialta na hEorpa (CESE) tuairim uaidh dar teideal'Oiriúnach do 55': sprioc aeráide an Aontais do 2030 i dtreo aeráidneodracht a bhaint amach (níl leagan Gaeilge ann). Tá tograí nithiúla curtha ar aghaidh ag CESE chun cuidiú le dlús a chur leis an aistriú fuinnimh ionas go mbeidh an tAontas in ann laghdú 55 % ar a laghad a dhéanamh ar ghlanastaíochtaí gás ceaptha teasa faoi 2030.

Beidh tionchar míchothrom ag gnóthú na spriocanna athbhreithnithe do 2030, mar a moladh sa phacáiste ‘Oiriúnach do 55’, ar réigiúin, ar phobail agus ar dhaoine aonair ar fud na hEorpa.

Chun aghaidh a thabhairt ar na hábhair imní sin, molann CESE don Choimisiún Eorpach mapáil mhionsonraithe a dhéanamh ar an tionchar a bheidh ag an aistriú ar fhostaíocht agus ar scileanna sna tíortha, sna réigiúin agus sna hearnálacha éagsúla, lena n-áirítear ar fhochonraitheoirí agus ar shlabhraí luacha iartheachtacha.

Ní mór dúinn samhail a ghlacadh a mbeidh geilleagar rathúil, inbhuanaithe agus iomaíoch mar thoradh uirthi. Sin é an fáth a molann CESE go ndéanfaí seiceáil iomaíochais ar na tograí reachtacha go léir a thíolacfar faoi chuimsiú an phacáiste ‘Oiriúnach do 55’ ionas go dtuigfear i gceart na himpleachtaí go léir a bheadh ann do ghnólachtaí.

Tá ról ríthábhachtach ag na comhpháirtithe sóisialta agus ag príomh-eagraíochtaí na sochaí sibhialta. Ní mór dóibh a bheith páirteach ag céim phleanála agus chur chun feidhme araon an phacáiste ‘Oiriúnach do 55’.

Dá bhrí sin, ‘tacaíonn CESE le 'Coimisiúin thrípháirteacha um Aistriú Cóir' a chur ar bun chun cur ar chumas na n-údarás réigiúnach, na gcomhpháirtithe sóisialta agus eagraíochtaí na sochaí sibhialta páirt a ghlacadh i gcur chun feidhme na bpleananna náisiúnta agus réigiúnacha um aistriú cóir', arsa Cillian Lohan.

Beidh impleachtaí ollmhóra airgeadais, sóisialta agus comhshaoil ag baint le dul i ngleic leis an athrú aeráide. ‘Sin é an fáth ar gá dúinn a chinntiú go mbeidh an pacáiste ‘Oiriúnach do 55’ ina chéim thábhachtach i dtreo geilleagar Eorpach aeráidneodrach a bhaint amach faoi 2050 agus nach gcuirfidh sé cosc ar an méid sin,’ a dúirt Stefano Mallia. (mr)

Ba cheart na bearta éigeandála a ghlacann na húdaráis phoiblí in imthosca urghnácha a bheith go hiomlán comhréireach, a bheith teoranta go soiléir ó thaobh ama de agus ba cheart dlúthfhaireachán a dhéanamh orthu. Ag labhairt dóibh ag seisiún iomlánach CESE an 23 Feabhra 2022, ghlac Christa Schweng, Uachtarán CESE agus Věra Jourová, Leas-Uachtarán an Choimisiúin Eorpaigh um Luachanna agus um Thrédhearcacht, seasamh daingean.

Agus tagairt á déanamh aici do ghéarchéim COVID-19 agus don staid éigeandála a d’fhógair a lán Ballstát de chuid an Aontais chun an tsláinte phoiblí a chosaint, a raibh srianta ar roinnt cearta agus saoirsí bunúsacha mar thoradh orthu, dúirt Christa Schweng an méid seo a leanas: ‘Is tástáil struis í an phaindéim dár sochaithe agus dár ndaonlathais. Ó thaobh na gceart bunúsach, an smachta reachta agus an daonlathais de, bhí CESE den tuairim go raibh sé ríthábhachtach dlúthfhaireachán a dhéanamh ar an staid. D’éist muid le gníomhaithe na sochaí sibhialta go háirithe maidir leis na hiarmhairtí, na dúshláin agus na straitéisí scoir a bhaineann leis an ngéarchéim. Ní mór don Eoraip teacht amach as géarchéim COVID-19 agus a cuid luachanna coiteanna á neartú aici.’

Chuir Věra Jourová i bhfios go láidir gur léirigh paindéim COVID-19 go tréan a thábhachtaí atá ár gcearta bunúsacha agus ár luachanna daonlathacha dár saol laethúil agus nach bhféadfaí talamh slán a dhéanamh díobh: ‘Ceacht tábhachtach a thagann ón ngéarchéim sláinte is ea nár cheart bearta atá riachtanach chun an phaindéim a chomhrac a ghlacadh má dhéanfar dochar do luachanna daonlathacha agus do chearta bunúsacha dá dheasca sin. Ní mór dúinn a bheith airdeallach agus cloí lenár gcearta bunúsacha agus lenár luachanna coiteanna, ar cheart iad a bheith lárnach inár bhfreagairt ar phaindéim COVID-19.

Leagadh amach seasamh CESE maidir le tionchar ghearchéim COVID-19 ar chearta bunúsacha, ar an smacht reatha ar fud an Aontais agus ar thodhchaí an daonlathais sa tuairim a chuir an Grúpa um Chearta Bunúsacha agus an Smacht Reachta in CESE i láthair, arna dréachtú ag José Antonio Moreno Díaz agus Cristian Pîrvulescu. Sa doiciméad a glacadh ag an seisiún iomlánach, tá sé á chur i bhfios ag an gCoiste gur cheart do na bearta speisialta chun aghaidh a thabhairt ar ghéarchéim COVID-19 a bheith eisceachtúil agus teoranta ó thaobh ama de, agus nár cheart dóibh teacht salach ar an smacht reachta ná níor cheart dóibh an daonlathas, scaradh cumhachtaí ná cearta bunúsacha chónaitheoirí na hEorpa a chur i mbaol. (mp)

Ní mór sláinte agus cáilíocht saoil daoine a bhfuil cónaí orthu agus a bhíonn ag obair in aice seolbhealaí loingseoireachta nó calafort a chur san áireamh agus an muiriompar agus an t‑iompar uiscebhealaí intíre á nglasú. Is é sin an phríomhtheachtaireacht a chuirtear chun tosaigh sa tuairim ó CESE a dhréachtaigh Pierre Jean Coulon agus agus a glacadh ag seisiún iomlánach CESE i mí Feabhra.

Sa doiciméad sin, tugann CESE aghaidh ar an ngné shochaíoch a bhaineann le saincheisteanna muiriompair áitiúla agus réigiúnacha, déantar moltaí atá ríthábhachtach chun an geilleagar gorm a fheabhsú amach anseo, agus cuirtear le conclúidí dhá thuairim eile a glacadh le déanaí, is iad sin:FuelEU Maritime (TEN/751) agus NAIADES III (TEN/752).

Is éard a dúirt an tUasal Coulon ar imeall an tseisiúin iomlánaigh ‘ní mór dúinn cur chuige nuálach agus inbhuanaithe a úsáid ina mbeidh cuspóirí glasa agus sláinte i dteannta a chéile. Sa mhuiriompar, beidh dlúthchomhar leis na geallsealbhóirí ar fad sa bhraisle agus sa slabhra soláthair riachtanach chun an sprioc dheiridh a bhaint amach. Tá gá le dlúthchomhar freisin chun na tairbhí soiléire a bhaineann le cruthú na gcríochfort idirmhódúil a áirithiú, lena bhféadfar iompar uiscebhealaí intíre a fhorbairt i gcathracha agus lena gcuirfear le caighdeán saoil níos fearr’.

Is ionann iompar muirí agus thart ar 75 % d’iompar lasta an Aontais. Tá sé fíorthábhachtach mar sin cothromaíocht a bhaint amach idir na gnéithe eacnamaíocha, sóisialta agus comhshaoil trí chur chuige comhtháite. Ba cheart go n‑oibreodh údaráis chalafoirt agus geallsealbhóirí iompair i gcomhar le húdaráis áitiúla agus réigiúnacha chun athmhachnamh a dhéanamh ar na naisc idir cathracha, calafoirt agus modhanna iompair.

Is iad na saincheisteanna eile nach mór aghaidh a thabhairt orthu ná oiliúint foirne, ionchais fostaíochta, cóir neamh‑chomhionann idir fir agus mná, agus na hathruithe móra atá ag teacht chun cinn mar gheall ar dhigiteáil agus uathoibriú gairmeacha. (mp)

Thionóil CESE agus AS ECFIN comhdháil ar líne maidir le creat rialachais eacnamaíoch an Aontais mar chuid den díospóireacht phoiblí ghaolmhar. Bhí sé d’aidhm ag an imeacht an tsochaí shibhialta a rannpháirtiú d’fhonn teacht ar chomhthoil maidir lena bhfuil i ndán don chreat rialachais eacnamaíoch.

Thosaigh Uachtarán CESE, Christa Schweng, leis an ráiteas seo a leanas: ‘In ionad filleadh ar an ngnáthshaol, molann CESE dul i dtreo creat rialachais eacnamaíoch athbhreithnithe agus athchothromaithe a bheidh dírithe ar an rathúnas.’ Chuir sí i dtábhacht freisin gur gá na príomhgheallsealbhóirí uile, lena n-áirítear eagraíochtaí na sochaí sibhialta a rannpháirtiú. Ina dhiaidh sin, dúirt an Coimisinéir um an nGeilleagar, Paolo Gentiloni, nach mbeidh sé éasca teacht ar chomhthoil faoi 2023, ach nach mór dúinn an deis uathúil seo a thapú chun ár rialacha fioscacha a ailíniú lenár sprioc uaillmhianach maidir le fás láidir, inbhuanaithe agus cuimsitheach a chothú san Eoraip. Chuir an Feisire, Margarida Marques, tuarascáil ó Pharlaimint na hEorpa i láthair ansin maidir leis an athbhreithniú ar an gcreat reachtach maicreacnamaíoch, agus bhí díospóireacht phainéil ann ina dhiaidh sin. Díríodh sa chuid dheireanach ar an gcaoi a bhféadfadh creat rialachais eacnamaíoch athbhreithnithe aghaidh a thabhairt ar dhúshlán na bearna infheistíochta d’fhonn an t-aistriú glas agus an t-aistriú digiteach a bhaint amach. Chuir Dominika Biegon, rapóirtéir CESE, a tuairim féintionscnaimh i láthair dar teideal ‘Athstruchtúrú chreat fioscach an Aontais le haghaidh téarnamh inbhuanaithe agus aistriú cóir’. (tk)

Is é Alexander Kleinig an Stiúrthóir nua um Chumarsáid agus um Chaidreamh Idirinstitiúideach in CESE. Thosaigh Alexander ag obair i bParlaimint na hEorpa in 1996 mar riarthóir don Choiste um Fhostaíocht agus um Ghnóthaí Sóisialta. In 2005, thosaigh sé ag obair in Ard-Stiúrthóireacht na Cumarsáide i bParlaimint na hEorpa mar bhainisteoir tionscadail d’ionad na gcuairteoirí. Rinne sé an Parlamentarium a sheoladh agus a bhainistiú idir 2011 agus 2018.

‘Tá mé an-tógtha le leibhéal cáilíochta na ndíospóireachtaí agus le gairmiúlacht fhoireann an Choiste. Gach áit a dtéim, buailim le comhghleacaithe atá tiomanta, díograiseach agus bródúil as a gcuid oibre. Chuaigh an fháilte chroíúil a chuir Stiúrthóireacht D romham i bhfeidhm go mór orm. Ba mhaith liom an deis seo a thapú chun buíochas a ghabháil le mo réamhtheachtaí, Eleonora Di Nicolantonio, a rinne sárbhainistíocht ar an stiúrthóireacht san am atá caite’.