Is í an fhorbairt tuaithe agus uirbeach atá inbhuanaithe agus cothrom an rud is tábhachtaí do shláinte shaoránaigh an Aontais, dar le CESE.

Tá CESE ag iarraidh ar lucht déanta beartas straitéis chuimsitheach iomlánaíoch a chur chun feidhme maidir le forbairt tuaithe agus uirbeach atá cothrom, comhtháite, comhionann agus inbhuanaithe. Is éard atá i gceist leis seo leas a bhaint as ról na bpobal áitiúil, borradh a chur faoi thionscail thraidisiúnta agus gníomhaíochtaí eacnamaíocha agus deiseanna fostaíochta nua a chruthú i gceantair thuaithe, agus sineirgí le limistéir uirbeacha á gcothú ag an am céanna.

Sa tuairim ó CESE I dtreo straitéis iomlánaíoch maidir le forbairt inbhuanaithe tuaithe/uirbeach, déantar roinnt moltaí atá bunaithe ar rannpháirtíocht il-gheallsealbhóra agus cur chuige 'ó bhun aníos’, gnéithe atá ríthábhachtach chun inbhuanaitheacht agus úinéireacht áitiúil na mbeartas tuaithe a áirithiú.

An ríthábhacht a bhaineann le comhordú cothrománach agus beartais shaincheaptha

‘Tá sé riachtanach bogadh i dtreo cur chuige atá comhtháite maidir le gníomhaíocht agus cistiú na mbeartas éagsúil a bhfuil tionchar acu ar cheantair thuaithe. Ní mór a áirithiú ní hamháin gur áiteanna inbhuanaithe iad na ceantair thuaithe ach gur áiteanna tarraingteacha iad freisin le cónaí iontu. Is leis an méadú a thagann ar líon na ndaoine óga agus ar thionscnaimh nua a chuireann poist dhea-íoctha ar ardcháilíocht ar fáil, a dhéanfar caighdeán saoil i gceantair thuaithe a thomhas’, a dúirt an rapóirtéir Josep Puxeu Rocamora. (an tUas.)