Ġirien tal-Lvant

L-attivitajiet tal-KESE li jikkonċernaw il-Ġirien tal-Lvant jinvolvu l-Armenja, l-Azerbajġan, il-Belarussja, il-Ġeorġja, il-Moldova u l-Ukrajna. L-għan ewlieni tal-KESE fir-rigward tal-Ġirien tal-Ewropa tal-Lvant huwa li jsaħħaħ ir-relazzjonijiet mal-organizzazzjonijiet tas-soċjetà ċivili fir-reġjun u li jinvolvihom fi djalogu kemm ma’ dawk li jfasslu l-politika nazzjonali kif ukoll mas-soċjetà ċivili organizzata tal-UE.

Il-mekkaniżmi ta’ kooperazzjoni ewlenin mal-Georgia, il-Moldova u l-Ukrajna huma l-Pjattaformi tas-Soċjetà Ċivili li jikkomplementaw il-korpi politiċi eżistenti fi ħdan il-qafas tal-Ftehimiet ta’ Assoċjazzjoni tal-UE ma’ dawn il-pajjiżi. Il-Pjattaformi jippermettu lill-organizzazzjonijiet tas-soċjetà ċivili kemm tal-UE kif ukoll tal-pajjiż imsieħeb biex jimmonitorjaw il-proċess ta’ implimentazzjoni u jħejju r-rakkomandazzjonijiet tagħhom lill-awtoritajiet rilevanti.

Min-naħa tal-UE, dawn il-Pjattaformi jinkludi membri tal-KESE kif ukoll rappreżentanti tan-networks Ewropej kbar tas-soċjetà ċivili. Min-naħa tal-pajjiżi msieħba, dawn jirrappreżentaw firxa wiesgħa ta’ organizzazzjonijiet tas-soċjetà ċivili. Is-sħubija tal-Pjattaformi hija bbażata fuq rappreżentazzjoni bbilanċjata tal-gruppi interessati kollha (l-organizzazzjonijiet ta’ min iħaddem, it-trade unions u gruppi ta’ interessi varji).

Fi ħdan il-KESE, il-Kumitat ta’ Segwitu Ġirien tal-Lvant ġie stabbilit fl-2004 bħala korp dedikat tal-KESE responsabbli għar-relazzjonijiet mas-soċjetà ċivili fil-pajjiżi tal-Viċinat tal-Lvant. Il-Kumitat ta’ Segwitu normalment jiltaqa’ erba’ darbiet fis-sena u l-membri tiegħu jieħdu sehem attiv fl-attivitajiet tas-Sħubija tal-Lvant, bħalma huma l-pjattaformi multilaterali tas-Sħubija tal-Lvant u l-Forum tas-Soċjetà Ċivili tas-Sħubija tal-Lvant.