Il-fondazzjoni karitattiva Third Age tal-Irlanda qed tiġġieled kontra s-solitudni fix-xjuħija permezz tan-network ta’ involviment soċjali tagħha AgeWell. Il-membri ta’ AgeWell, li huma stess għandhom ’il fuq minn 50 sena, iżuru persuni akbar fl-età fi djarhom darba fil-ġimgħa, joffru kumpanija iżda wkoll jimmonitorjaw is-saħħa u l-benesseri tal-klijent bl-għajnuna ta’ kwestjonarju f’forma ta’ applikazzjoni fuq l-ismartphone. Alison Branigan tal-fondazzjoni Third Age qaltilna li sal-lum, aktar minn 500 persuna rċevew l-appoġġ fil-Co. Meath tal-Irlanda, b’xi wħud jiddeskrivu s-servizz bħala “mezz ta’ salvataġġ” jew saħansitra bħala “raġġ ta’ dawl f’tarf mina twila u mudlama.”

X’ħeġġek tibda l-proġett tiegħek?

AgeWell ġie introdott fil-Co. Meath biex jappoġġja l-popolazzjoni akbar fl-età tagħha, li kellha ħtiġijiet speċifiċi ta’ kura soċjali, emozzjonali, psikoloġika u fiżika. Is-servizz tas-saħħa tagħna jinsab taħt pressjoni enormi, il-popolazzjoni tagħna qed tikber u qed tixjieħ, u hemm listi twal ta’ stennija għas-servizzi inkluż l-appoġġ fid-djar; Agewell jipprovdi rispons f’waqtu u prattiku li jikkomplementa u jsaħħaħ is-servizz tas-saħħa eżistenti tagħna billi jappoġġja lill-anzjani iżolati, solitarji, fraġli, li ma jistgħux joħorġu minn djarhom, u dawk li jinsabu f’riskju biex jgħinuhom jgħixu aħjar għal żmien itwal fil-post tal-għażla tagħhom, billi jipprovdulhom konnessjonijiet soċjali u monitoraġġ kontinwu tas-saħħa u l-benesseri, u billi jidentifikaw u jirreaġixxu għal kwistjonijiet emerġenti qabel ma jeskalaw f’xi ħaġa aktar serja. AgeWell jimxi id f’id mal-etika tal-organizzazzjoni tagħna Third Age, li tappoġġja lill-anzjani direttament permezz ta’ servizzi u programmi innovattivi, u toħloq opportunitajiet uniċi ta’ volontarjat fejn l-anzjani jistgħu jappoġġjaw lill-pari tagħhom u lil gruppi oħra tal-komunità. 

Kif intlaqa’ l-proġett tagħkom? Ksibtu xi feedback miċ-ċittadini li għintu?  (Tista’ ttina eżempju jekk għandek?)

Sal-lum AgeWell appoġġja ’l fuq minn 500 persuna akbar fl-età fil-Co. Meath. Ħafna japprezzaw tabilħaqq l-aspett tal-programm li joffri kumpanija: huma bnew fiduċja speċjali mal-membri ta’ AgeWell li jipprovdulhom kumpanija, u dan li jgħinna nifhmu l-ħtiġijiet u l-biżgħat tagħhom u b’hekk jgħinna nappoġġjawhom aħjar.

Kummenti mill-klijenti tagħna jinkludu: “is-servizz huwa mezz ta’ salvataġġ”, “ma kontx naf li kelli bżonn l-appoġġ sakemm sibtu”, “inħossni tassew grat għas-servizz u għal min jiġi jżommli kumpanija, iddawluli l-ġimgħa”, “kont inħossni maqtugħ minn kulħadd, ma kont nara lil ħadd jum wara l-ieħor, inkun qed nistenna bil-ħerqa li jiġu jżuruni”. Klijent wieħed li kien għaddej minn perjodu diffiċli u ammetta li kien ikkontempla s-suwiċidju diversi drabi qal li “AgeWell wasal fil-ħin it-tajjeb – għenni nara raġġ ta’ dawl f’tarf mina twila u mudlama”; qal ukoll “kulħadd għandu jkollu aċċess għal dan is-servizz”.

Il-membri voluntiera tagħna li joffru kumpanija huma anzjani wkoll u jistqarru: “jien sempliċement inħobb inkun voluntier”, “hija ħaġa sabiħa meta tħoss li qed tagħmel id-differenza”, u “tgħallimt ħafna dwar in-nies u dwari li nagħmel dan ix-xogħol”.

Mil-lat statistiku nistgħu nuru li AgeWell ittejjeb il-benesseri u l-appoġġ soċjali, emozzjonali u informattiv, tnaqqas l-iżolament u s-solitudni, ittejjeb is-saħħa personali, u żżid il-livelli ta’ attività fiżika.

Feedback ieħor jinkludi s-serħan tal-moħħ espress mill-membri tal-familja tal-klijenti tagħna, u r-rikonoxximent tal-ħidma tagħna mill-fornituri tal-kura tas-saħħa li kontinwament jirreferu l-klijenti direttament lilna.

X’parir tagħtu lil organizzazzjonijiet oħra dwar il-kisba ta’ riżultati minn attivitajiet u programmi bħal dawn?

Kun af l-udjenza tiegħek, involvi lill-parteċipanti tiegħek fil-proċess, u agħti widen għas-suġġerimenti u l-ħtiġijiet tagħhom. Emmen f’dak li taf u f’dak li tista’ tikseb, kun kuraġġuż, kun kreattiv, taqtax qalbek: jekk l-idea tiegħek hija tajba biżżejjed, se ssib mod kif twettaqha. Trid tkun lest li taħdem ma’ ħaddieħor, u jekk possibbli tikseb finanzjament, appoġġ, promozzjoni mill-istat jew mis-servizz tas-saħħa, li jistgħu jikkontribwixxu ħafna għall-kredibilità, l-impatt u s-suċċess tal-programm.

X’taħseb li hija l-kawża ewlenija tal-aggravar tas-saħħa mentali fix-xjuħija, apparti l-fatturi fiżjoloġiċi? Nistgħu, bħala soċjetà, intejbu s-saħħa mentali tal-anzjani?

Is-solitudni u l-iżolament dejjem kienu fatturi li jikkontribwixxu għall-aggravar tas-saħħa mentali fix-xjuħija; għalkemm din tista’ tkun kwistjoni fl-Irlanda rurali, daqstant hija prevalenti fil-bliet dinamiċi. F’dawn l-aħħar snin, l-effetti tal-pandemija, l-iżolament sfurzat, it-tendenza li wieħed isib il-kenn f’daru, anke biex iħares lilu nnifsu mill-mard, it-telf tal-kuntatti soċjali, l-aċċess għall-attivitajiet u l-libertà ħolqu epidemija ta’ biża’, ansjetà, dipressjoni, u problemi ta’ saħħa mentali. Avvenimenti domestiċi u globali, inkluż l-għoli tal-ħajja li qed jiżdied, il-gwerra u l-kunflitt, kellhom rwol ukoll. Hekk kif navvanzaw fl-età, jista’ jkun hemm tnaqqis fiċ-ċirku soċjali tagħna, il-mard jista’ jaffettwa l-ħila li nwettqu l-attivitajiet tas-soltu, nistgħu nsibu lilna nfusna konfinati fid-dar jew nitilfu ftit mill-indipendenza tagħna. Huwa importanti li l-anzjani ma jintesewx minħabba l-inviżibbiltà possibbli tagħhom: irridu niftakru l-importanza tal-komunità u l-interventi tagħha, kif ukoll il-qawwa tal-kuntatti soċjali u t-trattamenti bbażati fuq l-attivitajiet soċjali. 

Mhux se jkun hemm “patt ekoloġiku” mingħajr “patt soċjali”

mill-Grupp tal-Ħaddiema tal-KESE

Fis-26 ta’ Frar, il-bdiewa u t-trakters tagħhom imblukkaw it-toroq ta’ Brussell bi protesta, għat-tieni darba fi ftit ġimgħat. F’kuntrast qawwi mal-wirja normali ta’ lbies formali u xagħar maqtugħ pulit, fit-toroq tad-distrett Ewropew niżlu trakkijiet, trakters, ħuxlief u munzell tajers maħruqin. Ir-raġunijiet kumplessi wara l-protesta tal-bdiewa jvarjaw mill-PAK u l-politiki ambjentali għal kwistjonijiet kompletament mhux relatati.

Il-verità hija li l-kampanja Ewropea tinsab f’sitwazzjoni diffiċli, u issa ilha għal żmien twil. Il-Grupp tal-Ħaddiema u l-KESE b’mod ġenerali wissew ripetutament li mhu se jkun hemm l-ebda patt ekoloġiku mingħajr patt soċjali. U minkejja li jista’ jkun hemm it-tentazzjoni li dan jitwarrab bħala prodott sekondarju ieħor tal-lingwaġġ tekniku ta’ Brussell, dan ikun żball gravi. Il-kampanja qed tiffaċċja problemi reali. Dawn jinkludu intermedjarji li jħallsu biċ-ċiċri lill-produtturi iżda li jitolbu prezzijiet esaġerati lill-konsumatur; għajnuna insuffiċjenti għat-twettiq ta’ riformi ambjentali; u kummerċ ħieles (mhux ġust), il-kundizzjonijiet tax-xogħol ħorox u t-tibdil fil-klima.

Ir-rispons tal-Kummissjoni Ewropea, li malajr abbandunat ir-rekwiżiti tal-pestiċidi, huwa saħansitra aktar inkwetanti min-nuqqas ta’ konsultazzjoni u involviment xierqa mal-imsieħba soċjali u n-nuqqas ta’ azzjoni fil-livell tal-politika soċjali. Bħal fil-każ tal-miżuri ambjentali, l-abbandun ta’ dawn il-miżuri jista’ jippermetti lill-politiċi tagħna jiggwadanjaw ftit ħin, iżda se jwassalna wkoll lil hinn mill-punt tal-ebda ritorn fir-rigward tal-ħsara ambjentali.

Barra minn hekk, bl-elezzjonijiet li ġejjin, il-lemin estrem qed jipprova jikkapitalizza fuq l-iskuntentizza u, sa ċertu punt, qed jirnexxielu jmexxi l-protesta kontra l-SDGs, il-Patt Ekoloġiku u l-Aġenda 2030.

Fit-23 ta’ Frar, il-Kumitat Ekonomiku u Soċjali Ewropew (KESE) u l-Kummissjoni Ewropea organizzaw avveniment ewlieni għas-Sena Ewropea tal-Ħiliet, li laqqa’ flimkien aktar minn 400 żagħżugħ u żagħżugħa mill-Istati Membri kollha tal-UE biex jixħtu dawl fuq il-ħiliet meħtieġa għall-impjiegi attwali u futuri.

L-avveniment Niltaqgħu mal-Promoturi tal-Eċċellenza stieden 35 promotur żagħżugħ tal-UE mill-kompetizzjonijiet reċenti WorldSkills u EuroSkills u mill-Abylimpics (Olimpjadi tal-ħiliet għall-persuni b’diżabilità), fejn il-kompetituri kienu pparteċipaw f’aktar minn 20 dixxiplina differenti, bħar-robotika mobbli, l-ICT, il-mekkanika, id-disinn grafiku, it-teknoloġiji tal-karozzi u l-kostruzzjoni.

Il-promoturi qasmu stejjer ta’ ispirazzjoni tal-perkorsi tat-tagħlim u l-karriera tagħhom. Spettaturi żgħażagħ setgħu josservaw u jitgħallmu dwar ħiliet tradizzjonali u ġodda matul dimostrazzjonijiet speċifiċi f’oqsma bħall-floristrija, it-tiżbigħ tal-karozzi, ir-robotika u r-realtà virtwali, li kienu jinkludu taħditiet dwar l-integrazzjoni tas-sistema tar-robot, robot għat-tneħħija tal-mini għall-Ukrajna u disinjar permezz tal-kompjuter tal-inġinerija mekkanika.

L-għan kien li jiġu promossi l-benefiċċji u l-opportunitajiet offruti mill-edukazzjoni u t-taħriġ vokazzjonali (VET), speċjalment fl-isfond tat-tranżizzjonijiet ekoloġiċi u diġitali u d-dinja futura tax-xogħol. Il-VET huma rilevanti wkoll fil-kuntest attwali ta’ nuqqas ta’ ħaddiema u ħiliet u nuqqas ta’ tlaqqigħ tal-ħiliet fl-UE, fejn aktar minn tliet kwarti tal-kumpaniji jirrapportaw diffikultajiet biex isibu ħaddiema bil-ħiliet meħtieġa.

Il-President tal-KESE Oliver Röpke qal: “ Il-ħiliet huma l-ingredjent ewlieni biex tissaħħaħ il-pożizzjoni taż-żgħażagħ sabiex jirnexxu kemm fil-ħajja personali kif ukoll fil-karrieri tagħhom. Bit-tranżizzjonijiet diġitali u ekoloġiċi li għaddejjin, għandna s-setgħa, permezz tal-ħiliet, mhux biss li nadattaw iżda wkoll li nsawru l-impjiegi ta’ għada”.

Nicolas Schmit, Kummissarju għall-Impjiegi u d-Drittijiet Soċjali, qal: “It-taħriġ vokazzjonali joffri tant opportunitajiet fis-suq tax-xogħol tal-lum. Ninsab konvint li l-VET għandhom il-potenzjal jgħinuna nindirizzaw in-nuqqas ta’ tlaqqigħ tal-ħiliet u n-nuqqas ta’ ħaddiema li qed iżommu lura l-industriji tal-Ewropa”.

L-avveniment wera li l-VET huwa għażla eċċellenti, li toffri prospetti ta’ karriera b’saħħithom u opportunitajiet ta’ xogħol aktar rapidi għaż-żgħażagħ kif ukoll għall-adulti li jkunu qed ifittxu li jibdlu l-impjiegi jew sempliċiment jaġġornaw is-sett ta’ ħiliet eżistenti tagħhom. Madankollu, ħafna drabi tibqa’ t-tieni għażla għal ħafna studenti prospettivi. Fl-2021, ftit aktar minn nofs l-istudenti kollha rreġistrati f’edukazzjoni ta’ livell medju fl-UE kienu fi programmi b’orjentazzjoni vokazzjonali.

Fl-2022, kważi 80 % tal-gradwati reċenti tal-VET irnexxielhom isibu impjieg, fejn l-objettiv tal-UE hu li tilħaq mira ta’ 82 % sal-2025. (ll)

Qed tipprova tibdel is-sistema edukattiva? Qed ikollok problema bi prodotti tal-ikel ikkontaminati? Tixtieq iċċaqlaq it-trakkijiet mit-triq għall-ferrovija? Jew qed ikollok problemi biex tirreġistra l-kumpanija tiegħek bejn fruntieri differenti? Iċ-ċittadini tal-UE għandhom ħafna drittijiet u jiffaċċjaw ukoll għażliet ibsin – iżda jeħtieġ li jkunu jafu fejn u kif jistgħu jagħmlu differenza u x’inhuma l-għażliet tagħhom.

Il-Passaport għad-Demokrazija Ewropea popolari tagħna fih it-tweġibiet, u għadu kif ġie aġġornat! Il-Passaport jipprovdi skedi informattivi, informazzjoni ta’ sfond, gwidi u navigaturi għall-aspetti kollha tad-demokrazija Ewropea moderna, inkluż sett ta’ għodod għall-parteċipazzjoni u manwal dettaljat dwar l-Inizjattiva taċ-Ċittadini Ewropej (IĊE).

Il-verżjoni l-ġdida diġà hija disponibbli b’diversi lingwi u se nżidu aktar fil-ġimgħat li ġejjin. (cw)

Fil-15 ta’ Frar, il-Kumitat Ekonomiku u Soċjali Ewropew (KESE) nieda uffiċjalment l-inizjattiva tiegħu biex jilqa’ rappreżentanti tas-soċjetà ċivili mill-pajjiżi kandidati tal-UE. Intgħażlu total ta’ 131 'membru kandidati għat-tkabbir' biex jiffurmaw il-grupp ta’ esperti tas-soċjetà ċivili li ser jipparteċipaw fil-ħidma tal-Kumitat, u b’hekk il-KESE sar l-ewwel istituzzjoni li fetaħ il-bibien tiegħu għall-pajjiżi kandidati tal-UE.

Din l-inizjattiva hija l-prijorità politika tal-President tal-KESE Oliver Röpke. Hija tistabbilixxi standards ġodda għall-involviment tal-pajjiżi kandidati fl-attivitajiet tal-UE, u tiffaċilita l-integrazzjoni progressiva u tanġibbli tagħhom fl-UE.

L-inizjattiva ġiet inawgurata fis-sessjoni plenarja tal-KESE, fejn irċeviet merħba mill-qalb minn Věra Jourová, Viċi President tal-Kummissjoni Ewropea, Milojko Spajić, Prim Ministru tal-Montenegro, u Edi Rama, Prim Ministru tal-Albanija. Magħhom ingħaqdu rappreżentanti tas-soċjetà ċivili minn disa’ pajjiżi kandidati tal-UE (l-Albanija, il-Bożnija-Ħerzegovina, il-Georgia, il-Moldova, il-Montenegro, il-Maċedonja ta’ Fuq, is-Serbja, it-Turkija u l-Ukrajna) u minn membri kandidati għat-tkabbir oħrajn online. Kollha pparteċipaw f’dibattitu plenarju tal-KESE għall-ewwel darba.

F’din l-okkażjoni storika, il-President Röpke enfasizza: “Ma nistgħux inżommu aktar lill-pajjiżi kandidati fil-kamra ta’ stennija. Huwa għalhekk li l-KESE ddeċieda li jiftaħ il-bibien tiegħu għall-pajjiżi kandidati u jinvolvi lir-rappreżentanti tagħhom – il-membri kandidati għat-tkabbir – fil-ħidma tagħna”.

Il-Prim Ministru Spajić qal: “Napprezzaw ħafna dawn l-aspetti tal-integrazzjoni gradwali. Aħna ma narawx dan bħala sostitut għas-sħubija, iżda mod kif nippreparaw kemm il-pajjiżi tar-Reġjun tal-Balkani tal-Punent (f’konformità mal-approċċ “regatta” bbażat fuq il-mertu) kif ukoll l-UE għall-integrazzjoni.’

Il-Prim Ministru Rama stqarr: “Jiena nemmen bis-sħiħ li dak li qed iseħħ hawnhekk jista’ jseħħ ujkoll fil-Parlament tal-UE, għandu jseħħ fil-Kummissjoni Ewropea u għandu jseħħ fil-Kunsill Ewropew. Dan huwa l-uniku mod kif nistgħu nserrħu moħħ kulħadd u nintroduċu enerġija konkreta ħafna”.

Věra Jourová, il-Viċi President tal-Kummissjoni Ewropea għall-Valuri u t-Trasparenza, qalet: “It-tkabbir huwa l-interess reċiproku tagħna. Jibqa’ investiment ġeostrateġiku għall-Unjoni. Huwa għalhekk li nappoġġjaw it-tnedija tal-inizjattiva tal-lum u l-oħrajn kollha li jgħinu lill-pajjiżi msieħba tagħna jirnexxu bi sforzi ta’ riforma li jwasslu għal ekonomija aħjar u demokrazija aktar b’saħħitha”.

Il-lista sħiħa tal-membri kandidati għat-tkabbir magħżula għall-pool hija disponibbli hawnhekk. (at)

mill-Grupp tal-Organizzazzjonijiet tas-Soċjetà Ċivili tal-KESE

Fil-25 ta’ Marzu mis-14.30 sas-18.00 CET, il-Grupp tal-Organizzazzjonijiet tas-Soċjetà Ċivili tal-KESE ser jorganizza konferenza fi Brussell li se tesplora kif l-UE b’mod ġenerali u l-Istati Membri individwalment jistgħu jaħdmu għal djalogu ċivili sostenibbli effettiv u demokrazija parteċipattiva.

Il-kelliema mistiedna se jinkludu lil:

• Pedro Silva Pereira, Viċi President tal-Parlament Ewropew, li se jissostitwixxi lill-President tal-Parlament Ewropew Roberta Metsola għal kuntatt mal-organizzazzjonijiet tas-soċjetà ċivili li jirrappreżentaw liċ-ċittadini, u
• L-eċċellenza Tiegħu Willem van de Voorde, Ambaxxatur Belġjan u Rappreżentant Permanenti tal-Belġju għall-UE.

Matul il-konferenza, se jiġu ppreżentati ż-żewġ inizjattivi reċenti li ġejjin:

• l-Opinjoni tal-KESE dwar “It-tisħiħ tad-djalogu ċivili u d-demokrazija parteċipattiva fl-UE: it-triq ’il quddiem” (SOC/782), mitluba mill-Presidenza Belġjana u adottata fis-sessjoni plenarja tal-KESE fil-15 ta’ Frar;
• ittra miftuħa, li rċeviet l-appoġġ ta’ 156 firmatarju minn 26 Stat Membru tal-UE fuq inizjattiva mill-Grupp tal-Organizzazzjonijiet tas-Soċjetà Ċivili u mis-Soċjetà Ċivili Ewropa. L-ittra tistieden lill-istituzzjonijiet ewlenin tal-UE jieħdu miżuri konkreti biex jimplimentaw djalogu miftuħ, trasparenti u regolari mal-organizzazzjonijiet tas-soċjetà ċivili fl-oqsma kollha ta’ politika.

Il-konferenza se tlaqqa’ flimkien il-partijiet ikkonċernati istituzzjonali u udjenza usa’ biex jirriflettu dwar metodi għall-implimentazzjoni tal-miżuri proposti minn dawn l-inizjattivi u oħrajn.

Il-konferenza hija miftuħa għall-pubbliku. Għall-parteċipazzjoni attiva fuq il-post jew mill-bogħod tkun meħtieġa reġistrazzjoni minn qabel. L-avveniment se jintwera f’xandira diretta

Għal aktar informazzjoni, l-abbozz tal-programm, ir-reġistrazzjoni u l-istreaming, jekk jogħġbok żur is-sit web tal-avveniment.

minn Antonello Pezzini, delegat tal-Kumitat Konsultattiv tal-KESE dwar il-Bidliet Industrijali u eks membru tal-Grupp ta’ Min Iħaddem tal-KESE

F’Jannar li għadda, il-Kummissarju Ewropew għas-Suq Intern, Thierry Breton tenna l-ħtieġa li jiġi kkonsolidat suq intern tad-difiża biex tiġi żgurata s-sigurtà tagħna. “Bdejna bil-munizzjon għall-Ukrajna”, stqarr. “Issa jeħtieġ li nwessgħu dan l-approċċ biex jinkludi Programm Ewropew għall-Industrija tad-Difiża fuq skala kbira li jkun kapaċi jappoġġja l-espansjoni tal-bażi industrijali Ewropea u jiżviluppa l-infrastruttura meħtieġa biex jiġu protetti ż-żoni kkontestati”.

Il-KESE kellu l-opportunità li jtenni f’diversi okkażjonijiet il-ħtieġa li tiġi appoġġjata t-tnedija ta’ Programm Ewropew għall-Iżvilupp fl-Industrija tad-Difiża (EDIDP) bl-għan li tinħoloq sistema ta’ difiża komuni interoperabbli u integrata.

Dan l-objettiv huwa aktar urġenti minħabba s-sitwazzjoni ġeopolitika attwali, li tħeġġiġna nsaħħu l-awtonomija strateġika tal-Ewropa fid-difiża u niżviluppaw bażi industrijali u teknoloġika komuni soda.

L-EDIDP għandu jitfassal b’viżjoni strateġika komuni għall-industrija tad-difiża li tista’ timxi lejn l-integrazzjoni effettiva tal-manifatturi u l-utenti Ewropej, li tinvolvi mill-inqas tliet Stati Membri.

Hemm ħtieġa emerġenti u li qed tikber għal djalogu strutturat fil-livell Ewropew, f'sinerġija u koordinazzjoni man-NATO, u Kunsill tal-Ministri tad-Difiża li jista' jipprovdi gwida politika dejjiema u forum għall-konsultazzjoni u l-adozzjoni ta' deċiżjonijiet tabilħaqq Ewropej.

Id-dispożizzjonijiet statutorji għandhom jiżguraw: bilanċ bejn pajjiżi kbar u pajjiżi żgħar; li 20 % tan-negozji parteċipanti huma negozji iżgħar; taħriġ għal persunal imħarreġ u profili ta’ impjiegi ġodda; u taħriġ mill-ġdid għall-persunal li l-ħiliet tagħhom m’għadhomx jintużaw jew saru antikwati.

Issa wasal iż-żmien li dan l-approċċ jiġi estiż u msaħħaħ biex jinkludi programm industrijali Ewropew tad-difiża fuq skala kbira, li jkun kapaċi jappoġġja l-espansjoni tal-bażi industrijali Ewropea, billi jiżviluppa oġġetti ta’ “użu doppju”. Dawn huma oġġetti, inklużi software u teknoloġija, li jistgħu jintużaw kemm għal skopijiet ċivili kif ukoll militari u jinkludu oġġetti li jistgħu jintużaw għad-disinn, l-iżvilupp, il-produzzjoni jew l-użu ta’ armi kimiċi jew bijoloġiċi u l-mezzi ta’ kunsinna tagħhom.

Aqra l-artiklu sħiħ minn Antonello Pezzini fil-Bulettin tal-Grupp ta’ Min Iħaddem tal-KESE: https://europa.eu/!yKMPTk

F’dibattitu mal-Viċi President tal-Kummissjoni u l-Kummissarju għad-Demokrazija u d-Demografija Dubravka Šuica, il-KESE appella għal strateġija dwar id-djalogu ċivili bħala l-ewwel pass lejn it-tisħiħ tar-rwol tas-soċjetà ċivili u ż-żieda tal-parteċipazzjoni taċ-ċittadini fit-tfassil tal-politika tal-UE.

Il-Kumitat Ekonomiku u Soċjali Ewropew (KESE) ressaq it-talbiet tiegħu permezz tal-Opinjoni dwar It-tisħiħ tad-djalogu ċivili u d-demokrazija parteċipattiva fl-UE: it-triq ’il quddiem, li ġiet adottata ftit wara d-dibattitu li sar fis-sessjoni plenarja tal-KESE fil-15 ta’ Frar.

Huwa enfasizza l-ħtieġa urġenti li tissaħħaħ l-implimentazzjoni tal-Artikolu 11 tat-Trattat tal-UE (TUE), li skontu l-istituzzjonijiet għandhom responsabbiltà konġunta biex jiżguraw li s-soċjetà ċivili organizzata tkun involuta b’mod attiv fil-formulazzjoni tal-liġijiet tal-UE.

Dan għandu jsir bħala segwitu għall-Konferenza dwar il-Futur tal-Ewropa, inizjattiva storika u eżerċizzju demokratiku ewlieni, li kienet tinkludi sensiela ta’ dibattiti mmexxija miċ-ċittadini dwar kwistjonijiet li jaffettwawhom direttament f’ħajjithom.

“Ilkoll nistgħu naqblu li l-ilħna taċ-ċittadini jridu jinstemgħu lil hinn mill-kaxxa tal-voti. Aħna, fl-istituzzjonijiet u l-korpi tal-UE, ilkoll għandna ninvolvu aħjar lis-soċjetà ċivili fi djalogu sinifikanti lil hinn minn sempliċi informazzjoni u konsultazzjoni”, qal il-President tal-KESE Oliver Röpke.

Il-bini ta’ UE aktar trasparenti, inklużiva u demokratika jeħtieġ impenn ċiviku akbar u sħubija b’saħħitha bejn l-istituzzjonijiet tal-UE u l-korpi governattivi nazzjonali. “L-isforzi kollettivi tagħna se jiżguraw li l-UE tibqa’ xempju ta’ tama u mudell ta’ demokrazija parteċipattiva għad-dinja”, saħqet il-Kummissarju Šuica.

Pietro Barbieri, relatur tal-Opinjoni, qal: “Permezz ta’ din l-Opinjoni, il-KESE qed jistieden lill-istituzzjonijiet tal-UE jieħdu pass konkret ’il quddiem: biex jadottaw strateġija għad-djalogu ċivili, li tagħti ħajja lil pjan ta’ azzjoni u ftehim interistituzzjonali li jinvolvi kull livell tal-UE. L-impenn tal-KESE huwa sinjal ta’ ħtieġa urġenti li ma tistax tiġi rinunzjata jew posposta”.

Miranda Ulens, korelatur, żiedet tgħid li: “Diġà għandna prattiki tajbin għad-djalogu soċjali. Il-proposti li nagħmlu se jiżguraw li l-ilħna ta’ organizzazzjonijiet leġittimi u rappreżentattivi oħra jkunu jistgħu jinstemgħu wkoll. Ejjew noħolqu Ewropa reali u demokratika għaċ-ċittadini tagħha! #TogetherStrong!' (ll)

L-Ewropa qed tinjora din il-battalja iebsa u mhux qed jirnexxielha tlaħħaq magħha. Li nreġġgħu lura l-progress tal-lemin estrem bħalissa qed jidher li huwa kompitu diffiċli. Meta fl-1945 ingħeleb in-Nażi-Faxxiżmu, kien maħsub li movimenti estremisti se jitilfu l-influwenza u l-ispazju tagħhom biex joperaw. Dan ma kienx il-każ. Il-mudell demokratiku ppermetta lil-lemin estrem biex jibqa’ attiv u jissaħħaħ permezz tar-riżentiment u l-frustrazzjoni tan-nies. Il-lemin estrem ibbenefika minn tmenin sena ta’ tolleranza u kompjaċenza tad-demokraziji liberali Ewropej. Il-lemin estrem għamel ta’ bir-ruħu li qed jilgħab il-logħba demokratika, madankollu huwa qatt ma warrab l-ambizzjoni tiegħu li jeqred id-demokrazija minn ġewwa, ladarba jikseb il-poter li jagħmel dan.

U wasal qrib li jirnexxi; bħala parti minn qafas li huwa jsejjaħ “sovranità nazzjonali”, il-lemin estrem diġà kiseb is-setgħa fil-gvern f’diversi pajjiżi bħall-Ungerija ta’ Orban u s-Slovakkja ta’ Fico. Fil-Polonja huwa kien kien fil-poter għal tmien snin permezz tal-gvern PiS (Prawo i Sprawiedliwosc/Liġi u Ġustizzja) sal-elezzjonijiet reċenti ta’ Ottubru.

Fl-Unjoni Ewropea, il-lemin estrem qed jipprova wkoll inawwar id-demokrazija u jwassal għall-implożjoni tagħha. L-iżviluppi fit-teknoloġiji tal-informazzjoni u tal-komunikazzjoni matul dawn l-aħħar tletin sena, permezz ta’ pjattaformi diġitali u l-media soċjali, żiedu b’mod drammatiku l-kapaċità tal-gruppi neo-Nażisti u neo-Faxxisti biex jinteraġixxu, u jiksbu viżibbiltà u setgħa fuq skala globali. Huma jużaw il-libertà tal-espressjoni tad-demokraziji biex jamplifikaw u jtennu l-ideoloġiji ksenofobiċi u razzisti tagħhom. Huma jikkoordinaw l-istrateġiji u jimmobilizzaw l-isfidi, f’ħin reali, għall-ordni ċiviku li jagħmlu parti minnu. Il-fatt huwa li d-demokrazija tipprovdi l-movimenti li qed jippruvaw jeqirduha b’kundizzjonijiet oġġettivi li jwasslu għall-iżvilupp u l-penetrazzjoni soċjali tagħhom – inkluż il-finanzjament mill-Istat.

Il-lemin estrem sab art fertili fejn jikber fl-Ewropa, peress li l-politiki neoliberali u l-kapitaliżmu finanzjarju ispirati minn Reaganomics ikkawżaw l-interruzzjoni tal-progress u l-benesseri soċjali tal-klassijiet medji – is-sinjali tal-bini tal-Ewropa u s-suċċess tagħha. In-neoliberaliżmu għamel deregolamentazzjoni u fixkel l-iżvilupp ekonomiku u soċjali; huwa naqqas l-introjtu reali mix-xogħol favur il-kapital; naqqas l-appoġġ soċjali u s-servizzi pubbliċi; u ħalla s-settur tal-akkomodazzjoni f’idejn l-ispekulazzjoni tal-proprjetà. Il-gvernijiet Ewropej qed jikkompetu b’mod perikoluż ma’ xulxin fil-bejgħ ta’ viżi tad-deheb lil kleptokrati u oligarki minn madwar id-dinja kollha. Il-kriżi tas-suq u d-dumping fiskali, li jagħmlu l-kompetizzjoni fis-suq intern inġusta, appoġġ dgħajjef minn Brussell u Frankfurt lill-SMEs, kif ukoll protezzjoni dgħajfa tal-impjiegi u kapaċità tal-akkwist dgħajfa, żiedu l-iskuntentizza fl-Ewropa matul dawn l-aħħar ħmistax-il sena.

Huwa żball politiku traġiku li huwa responsabbli għal tnaqqis konsekuttiv fl-għadd ta’ persuni li jipparteċipaw fl-elezzjonijiet Ewropej u ż-żieda tal-lemin estrem fil-Parlament Ewropew. Il-qawmien mill-ġdid tal-ideoloġija Nażi-Faxxista hija r-riżultat tal-mudell ta’ awsterità użat fl-Ewropa. Dan il-mudell ipproteġa s-sistema finanzjarja iżda naqas milli jipproteġi l-ġustizzja ekonomika u fiskali u milli jwieġeb għall-problemi, ix-xewqat u l-aspettattivi taċ-ċittadini. Dan wassal għal propaganda antika ta’ ideoloġiji suprematisti u identitarji, li dejjem ikunu qed iħufu fl-isfond jistennew għall-opportunità li l-umanità tiddiġenera fil-livell taċ-ċivilizzazzjoni. Dan it-trawwim ta’ mibegħda kulturali u reliġjuża huwa preżenti f’ħajjitna llum, fuq l-iskrins tagħna, fuq il-midja soċjali tagħna, fid-diżinformazzjoni li tiġi promossa kull minuta. It-trawwim tal-biża’ u n-nuqqas ta’ sigurtà taċ-ċittadini, l-evokazzjoni tal-Iżlamizzazzjoni, it-tmiem tas-supremazija bajda jew tal-identità Ġudeo-Kristjana u d-demonizzazzjoni tal-komunità Rom bħala dipendenti fuq il-benefiċċji, huma strateġiji li storikament intużaw biex tiżdied il-popolarità ta’ dittaturi jew mexxejja awtoritarji.

Illum, il-gvernijiet Ewropej qed jippermettulhom jindikaw il-“periklu tal-immigrazzjoni” f’Ewropa li qed tixjieħ li assolutament teħtieġ li timporta parti mill-forza tax-xogħol tagħha sabiex issostni lilha nnifisha u tikber ekonomikament. Dan minkejja l-fatt li l-għadd ta’ refuġjati u migranti li jidħlu fl-UE llum huwa baxx – fil-fatt, huwa aktar baxx minn dak li jeħtieġu l-popolazzjoni u l-forza tax-xogħol Ewropej. Madankollu, ir-retorika ksenofobika u razzista tippersisti, f’Ewropa li għadha nieqsa minn qafas legali sikur u effiċjenti biex tilqa’ u tintegra lill-migranti, minflok tkompli tikkontribwixxi għall-mafja tat-traffikar tal-bnedmin. Il-ħaddiema migranti kienu essenzjali fir-rikostruzzjoni tal-Ewropa ta’ wara l-gwerra u fil-bini tal-UE. Il-kontribut tal-migranti se jibqa’ kruċjali għall-progress tal-Ewropa fid-deċennji li ġejjin. Il-lemin estrem huwa konxju ta’ dan – ħafna mill-finanzjaturi tagħha jużaw il-migranti fl-industriji u n-negozji tagħhom.

Iżda l-lemin estrem se jkompli jilgħab il-logħob tiegħu, joħloq biżgħat, u jimmanipula l-kuxjenza, kif ukoll il-kompjaċenza ta’ mexxejja nazzjonali u Ewropej dgħajfa u instabbli fir-rigward ta’ viżjoni strateġika, il-valuri tagħna u l-prinċipji tagħna. Jista’ jkun hemm rispons wieħed biss mid-demokraziji u l-Ewropej – li niġġieldu għall-valuri tagħna. Għad-demokrazija, għal-libertà, għad-dinjità u għall-paċi fl-Ewropa.