Il-kooperattivi u l-komunitajiet tal-enerġija huma kruċjali biex it-tranżizzjoni ekoloġika tirnexxi. Madankollu, il-Kummissjoni tonqos milli tagħtihom il-prominenza mistħoqqa fil-pjan ta’ azzjoni tagħha għall-enerġija mir-riħ fl-Ewropa li jidher li jinjora l-oppożizzjoni dejjem tikber għal parks eoliċi ġodda.
Il-kooperattivi u l-komunitajiet tal-enerġija huma kruċjali biex it-tranżizzjoni ekoloġika tirnexxi. Madankollu, il-Kummissjoni tonqos milli tagħtihom il-prominenza mistħoqqa fil-pjan ta’ azzjoni tagħha għall-enerġija mir-riħ fl-Ewropa li jidher li jinjora l-oppożizzjoni dejjem tikber għal parks eoliċi ġodda.
F’Ottubru, il-Kummissjoni Ewropea ppreżentat il-Pjan ta’ Azzjoni Ewropew għall-Enerġija mir-Riħ biex tiżgura li t-tranżizzjoni lejn enerġija nadifa timxi id f’id mal-kompetittività industrijali u li l-enerġija mir-riħ tkompli tkun storja ta’ suċċess Ewropea.
L-enerġija mir-riħ tiġġenera aktar minn terz tal-elettriku rinnovabbli tal-Ewropa – u aktar minn 17% tal-produzzjoni totali tal-elettriku tagħha – u tagħmel parti fundamentali mill-produzzjoni tal-elettriku b’emissjonijiet żero netti għall-futur.
Madankollu, il-Pjan ta’ Azzjoni tal-Kummissjoni jidher li jinjora l-oppożizzjoni dejjem tikber għal parks eoliċi ġodda, mid-difensuri tal-pajsaġġi sal-konservazzjonisti tan-natura, b’reazzjonijiet simili għal NIMBY(Not in My Backyard).
Il-kooperattivi u l-komunitajiet, li jmexxu proċess lokali mmexxi miċ-ċittadini li jista’ jkollu sjieda tat-tranżizzjoni, huma kruċjali sabiex tingħeleb din l-oppożizzjoni u biex jiġi żgurat li l-benefiċċji ta’ din it-tranżizzjoni jiġu kondiviżi b’mod wiesa’. Barra minn hekk, huma importanti wkoll biex il-ġenerazzjoni rinnovabbli ġġib magħha sistema ġdida u aktar deċentralizzata tal-ġenerazzjoni tal-enerġija.
Minflok, il-Pjan ta’ Azzjoni Ewropew għall-Enerġija mir-Riħ tal-Kummissjoni jiffoka biss fuq kumpaniji kbar. Dan se jagħmel ħsara lill-proċess, inaqqas l-aċċettazzjoni u jipperikola t-tranżizzjoni. Il-Kummissjoni għandha tikkunsidra mill-ġdid il-kamp ta’ applikazzjoni tal-Pjan ta’ Azzjoni tagħha u tinkludi l-parteċipazzjoni taċ-ċittadini fil-pilastru 7.
F’Marzu, il-KESE ħa sehem fit-68 sessjoni tal-Kummissjoni tan-Nazzjonijiet Uniti dwar l-Istatus tan-Nisa (Commission on the Status of Women, CSW68), il-korp internazzjonali u intergovernattiv ewlieni li jiġġieled għall-ugwaljanza bejn il-ġeneri, li saret fi New York.
F’Marzu, il-KESE ħa sehem fit-68 sessjoni tal-Kummissjoni tan-Nazzjonijiet Uniti dwar l-Istatus tan-Nisa (Commission on the Status of Women, CSW68), il-korp internazzjonali u intergovernattiv ewlieni li jiġġieled għall-ugwaljanza bejn il-ġeneri, li saret fi New York.
Din kienet l-ewwel darba li l-KESE pparteċipa fl-akbar laqgħa annwali tan-NU dwar it-tisħiħ tal-pożizzjoni tan-nisa, li din is-sena ffukat fuq it-tmiem tal-faqar tan-nisa. Waqt li ta vuċi lis-soċjetà ċivili Ewropea fil-ġlieda tagħha għall-ugwaljanza bejn il-ġeneri, il-KESE kkontribwixxa għat-tema b’dikjarazzjoni li tinkludi għaxar punti ta’ azzjoni għall-emanċipazzjoni ekonomika u l-protezzjoni soċjali tan-nisa.
Id-delegazzjoni tal-KESE kienet immexxija mill-President Oliver Röpke, li għamel l-ugwaljanza bejn il-ġeneri prijorità ewlenija tal-ħidma tiegħu u tal-presidenza tiegħu. Il-President Röpke qal: “Il-KESE għandu storja twila fejn jippromovi politiki tal-UE u globali biex tiġi avvanzata l-ugwaljanza bejn il-ġeneri u jiġu indirizzati l-inugwaljanzi ekonomiċi u soċjali li n-nisa u l-bniet għadhom ibatu minnhom illum. Iżda din hija l-ewwel darba li ħadna din il-ħidma, taħt vuċi waħda tas-soċjetà ċivili Ewropea, fl-ogħla stadju possibbli f’din il-ġlieda kollettiva lejn l-ugwaljanza globali bejn il-ġeneri. Il-faqar mhuwiex newtrali mil-lat tal-ġeneru, u għalhekk lanqas m’għandha tkun hekk ir-risposta tagħna”.
Il-punti ta’ azzjoni elenkati fid-Dikjarazzjoni tal-KESE inkludew il-pożizzjonijiet tal-KESE dwar it-tema tas-CSW68. Dawn kellhom l-għan li javvanzaw l-ugwaljanza bejn il-ġeneri, jindirizzaw il-faqar u jsaħħu l-istituzzjonijiet permezz ta’ perspettiva tal-ġeneru, f’konformità mal-prijoritajiet tal-UE. Fost affarijiet oħra, dawn inkludew ukoll il-protezzjoni tan-nisa minn kull tip ta’ vjolenza, l-iżgurar ta’ servizzi tal-kura tas-saħħa aċċessibbli, ir-rappreżentanza ġusta tan-nisa fis-suq tax-xogħol, l-appoġġ għat-tmexxija min-nisa u l-iżgurar ta’ opportunitajiet indaqs permezz tal-edukazzjoni.
“Sena minn issa, nittama li nkun nista’ ngħid li l-preżenza tal-KESE fil-UNCSW għenet biex dawn it-talbiet jingħataw vuċi aktar b’saħħitha. Nistgħu u għandna nkunu kritiċi. Neħtieġu l-vuċijiet kritiċi tas-soċjetà ċivili, tal-partijiet interessati, tal-NGOs u tal-istituzzjonijiet li jaħdmu lejn dan il-għan kollettiv u kondiviż: Ewropa aktar ugwali, dinja aktar ugwali. Nistgħu u għandna nindikaw it-triq ’il quddiem,” qal il-President Röpke. Il-KESE kien jifforma parti minn delegazzjoni tal-UE rrappreżentata mill-Presidenza tal-UE. Kellu rwol ta’ osservatur, flimkien mal-Parlament Ewropew. Apparti l-President, id-delegazzjoni tal-KESE kienet magħmula mill-membri li ġejjin: Christa Schweng, Mariya Mincheva, Cinzia del Rio, Maria Nikolopoulou, Chiara Corazza u Sif Holst, il-President tal-Grupp dwar l-Ugwaljanza tal-KESE. (ll)
Ingħaqad magħna għall-Jum għall-Pubbliku tal-KESE fl-4 ta’ Mejju!
Immarka l-kalendarju tiegħek għas-Sibt 4 ta’ Mejju 2024 meta l-Kumitat Ekonomiku u Soċjali Ewropew (KESE) jiftaħ il-bibien tiegħu għall-Jum għall-Pubbliku interistituzzjonali annwali tal-UE. Niċċelebraw id-demokrazija Ewropea u niffukaw fuq l-elezzjonijiet Ewropej li ġejjin f’Ġunju. Din hija opportunità biex titgħallem dwar l-UE, tinvolvi ruħek mas-soċjetà ċivili, u tiskopri kif leħnek u l-vot tiegħek jistgħu jsawru l-futur tal-Ewropa.
Ingħaqad magħna għall-Jum għall-Pubbliku tal-KESE fl-4 ta’ Mejju!
Immarka l-kalendarju tiegħek għas-Sibt 4 ta’ Mejju 2024 meta l-Kumitat Ekonomiku u Soċjali Ewropew (KESE) jiftaħ il-bibien tiegħu għall-Jum għall-Pubbliku interistituzzjonali annwali tal-UE. Niċċelebraw id-demokrazija Ewropea u niffukaw fuq l-elezzjonijiet Ewropej li ġejjin f’Ġunju. Din hija opportunità biex titgħallem dwar l-UE, tinvolvi ruħek mas-soċjetà ċivili, u tiskopri kif leħnek u l-vot tiegħek jistgħu jsawru l-futur tal-Ewropa.
Għaliex għandek iżżur il-KESE fil-Jum għall-Pubbliku?
Il-bini Jacques Delors: esplora l-bini ikoniku tal-KESE f’Rue Belliard, il-qalba tas-soċjetà ċivili organizzata fl-Ewropa. Ara b’għajnejk kif ir-rappreżentanti tal-impjegaturi, il-ħaddiema, l-ambjentalisti, il-konsumaturi, u aktar jikkontribwixxu għat-tfassil tal-politika tal-UE.
Tagħlim interattiv: involvi ruħek f’diskussjonijiet imqanqlin ma’ membri tal-KESE dwar suġġetti li huma qrib tiegħek. Tgħallem kif id-djalogu soċjali jsawwar il-leġiżlazzjoni tal-UE u kif il-vuċi tiegħek tista’ tinstema’.
Attivitajiet għall-etajiet kollha: gawdi minn atmosfera vibranti b’mużika live tal-ogħla kwalità, logħob interattiv biex tittestja l-għarfien tiegħek dwar l-UE, u artisti tal-irtokk li jiżbgħu wiċċ it-tfal. Ħu miegħek id-dar rigal kommemorattiv jew karikatura ta’ wiċċek u ddeverti fil-kabina fotografika.
Diskussjonijiet fil-fond: ikseb perspettiva “ta’ ġewwa” dwar ir-rwol tal-KESE fit-tiswir ta’ Ewropa sostenibbli, prospera u inklużiva għal kulħadd. Ħu l-opportunità biex tinvolvi ruħek f’diskussjonijiet rapidi u ffukati ma’ membri tal-KESE dwar suġġetti speċifiċi li huma importanti għalik. Opportunità unika biex tikseb għarfien siewi mill-qalba tat-tfassil tal-politika Ewropea.
Is-setgħa tas-soċjetà ċivili: skopri kif il-KESE jaħdem biex inaqqas id-distakk bejn iċ-ċittadini u l-UE. Ara kif ilħna differenti jingħaqdu flimkien biex jippromovu l-ġustizzja soċjali, il-protezzjoni ambjentali, u ħafna aktar għal Unjoni Ewropea aktar b’saħħitha.
Ċelebrazzjoni fuq żewġ roti!
Barra minn dawn l-avvenimenti eċċitanti, grupp ta’ ċiklisti se jasal fil-KESE fl-4 ta’ Mejju! Xi wħud minn dawn il-membri ddedikati tal-KESE u individwi oħra qed jivvjaġġaw fuq ir-roti distanza ta’ 500 km minn Franza għal Brussell biex iqajmu kuxjenza dwar l-elezzjonijiet Ewropej. Ingħaqad magħna hekk kif nagħtuhom merħba mistħoqqa meta jaslu fil-KESE u tgħallem aktar dwar il-missjoni ta’ ispirazzjoni tagħhom, il-vjaġġ u l-isfidi tagħhom tul it-triq.
Aktar minn sempliċi żjara, hija esperjenza
Il-Jum għall-Pubbliku tal-KESE huwa l-opportunità tiegħek li toħloq rabta mal-Ewropa, tiċċelebra d-demokrazija u tiskopri s-setgħa tas-soċjetà ċivili. Kemm jekk inti entużjast veteran tal-UE, xettiku tal-UE, jew sempliċiment kurjuż, noffru xi ħaġa għal kulħadd. Ejja esplora, tgħallem, u involvi ruħek fil-qalba tad-demokrazija Ewropea!
Ibqa’ konness għal aktar dettalji
Ma hija meħtieġa l-ebda reġistrazzjoni minn qabel. Se naqsmu aktar informazzjoni dwar attivitajiet speċifiċi, u punti ewlenin eċċitanti fil-ġimgħat li ġejjin. Segwina fuq il-media soċjali u żur is-sit web tagħna (www.eesc.europa.eu/openday) għal aġġornamenti.
Titlifx din l-opportunità unika biex tesperjenza l-UE tiegħek direttament! (cg)
Fis-27 ta’ Frar, il-President tal-Kumitat Ekonomiku u Soċjali Ewropew (KESE), Oliver Röpke, u l-President tal-Parlament Ewropew (PE), Roberta Metsola, iffirmaw Memorandum ta’ Qbil dwar il-kooperazzjoni bi tħejjija għall-elezzjonijiet Ewropej.
Fis-27 ta’ Frar, il-President tal-Kumitat Ekonomiku u Soċjali Ewropew (KESE), Oliver Röpke, u l-President tal-Parlament Ewropew (PE), Roberta Metsola, iffirmaw Memorandum ta’ Qbil dwar il-kooperazzjoni bi tħejjija għall-elezzjonijiet Ewropej.
L-għan tas-sħubija huwa li tapprofondixxi l-kooperazzjoni bejn iż-żewġ istituzzjonijiet biex jiġu promossi l-elezzjonijiet Ewropej, tingħata spinta lill-parteċipazzjoni elettorali – speċjalment fost dawk li ma joħorġux jivvutaw u dawk li se jivvutaw għall-ewwel darba – u tiġi miġġielda l-manipulazzjoni tal-informazzjoni.
Fost miżuri oħra, l-istituzzjonijiet qablu li jżidu l-kooperazzjoni tagħhom fir-rigward tal-komunikazzjoni dwar l-elezzjonijiet, jikkoordinaw l-organizzazzjoni ta’ avvenimenti, bħall-Jum għall-Pubbliku jew il-Ġimgħa tas-Soċjetà Ċivili, u jikkondividu informazzjoni fuq il-pjattaformi “flimkien.eu” u “X’qed tagħmel għalija l-Ewropa”.
Il-President tal-KESE, Oliver Röpke, qal li: “L-elezzjonijiet Ewropej se jkunu test deċiżiv tad-demokrazija Ewropea. Il-KESE jista’ jkun il-pjattaforma biex is-soċjetà ċivili tingħaqad għad-demokrazija. Nilqa’ l-Memorandum ta’ Qbil tal-lum mal-Parlament Ewropew, li jippermettilna nieħdu rwol aktar attiv fit-tħejjija għall-elezzjonijiet u ninvolvu ruħna mal-votanti biex ikun hemm parteċipazzjoni ikbar fl-elezzjonijiet. Il-KESE u l-Parlament Ewropew huma msieħba u alleati.”
Il-Memorandum jelenka oqsma speċifiċi fejn il-kooperazzjoni bejn il-KESE u l-Parlament Ewropew għandha titkompla u tissaħħaħ fit-tħejjija għall-elezzjonijiet Ewropej tal-2024. (kn/ll)
Tkellimna mal-ġurnalist Ġeorġjan-Franċiż Régis Genté dwar il-kwistjonijiet li huma fost l-akbar tħassib fir-rigward tal-elezzjonijiet Ewropej: iż-żieda fil-lemin estrem, żgħażagħ li m’għandhomx motivazzjoni biex jivvutaw u d-diżinformazzjoni. Espert politiku taż-żona post-Sovjetika, Régis Genté jirrapporta għall-media prinċipali ta’ Radio France Internationale, France 24 TV u Le Figaro.
Tkellimna mal-ġurnalist Ġeorġjan-Franċiż Régis Genté dwar il-kwistjonijiet li huma fost l-akbar tħassib fir-rigward tal-elezzjonijiet Ewropej: iż-żieda fil-lemin estrem, żgħażagħ li m’għandhomx motivazzjoni biex jivvutaw u d-diżinformazzjoni. Espert politiku taż-żona post-Sovjetika, Régis Genté jirrapporta għall-media prinċipali ta’ Radio France Internationale, France 24 TV u Le Figaro.
KESE Info: Taħseb li ż-żieda tal-partiti tal-lemin estrem fl-Ewropa se jkollha impatt fuq ir-riżultat tal-elezzjonijiet Ewropej?
Bl-ebda mod ma jien espert tal-lemin estrem fl-Ewropa, iżda jekk tħares lejn l-istħarriġiet li għandna bħalissa f’pajjiżi (Franza), ikolli nirrikonoxxi li l-lemin estrem jinsab fuq quddiem. L-elezzjonijiet Ewropej jirrappreżentaw mezz politiku għaċ-ċittadini Ewropej biex jgħidu jew jgħaddu messaġġ dwar pajjiżhom lill-politiċi tagħhom. Iċ-ċittadini Ewropej l-ewwel jaħsbu dwar is-sitwazzjoni politika f’pajjiżhom u mbagħad wara dwar is-sitwazzjoni fl-Ewropa. Għalhekk iva, il-partiti tal-lemin estrem probabbilment se jkollhom impatt fuq dawn l-elezzjonijiet, f’kuntest fejn qed jiżdiedu l-mistoqsijiet dwar ir-rabta bejn is-sovranità u l-integrazzjoni Ewropea.
Temmen li ż-żgħażagħ huma motivati biex jivvutaw fl-elezzjonijiet Ewropej?
Se nwieġeb bħala ċittadin normali li ilu jgħix f’territorju post-Sovjetiku għal 22 sena u bħala xi ħadd li ta’ spiss jitkellem maż-żgħażagħ fl-Ewropa. Nara li mhumiex motivati ħafna biex imorru jivvutaw. Nosserva l-istess fil-Georgia, fejn ngħix. Iż-żgħażagħ hemmhekk huma interessati fil-politika, iżda la huma favur partit fil-gvern u lanqas favur l-oppożizzjoni. Jixtiequ jkunu involuti fil-ħajja politika ta’ pajjiżhom, iżda jirrifjutaw li jivvutaw minħabba li l-ebda wieħed mill-partiti u l-mexxejja tagħhom ma jirrappreżentawhom verament. Hija pożizzjoni interessanti li nirrispetta għaliex tista’ tiftaħ il-bibien biex il-politika ssir differenti, lil hinn mid-demokrazija rappreżentattiva, lil hinn mill-partiti. Iżda, sadanittant, tħalli l-qasam politiku f’idejn il-politiċi u diversi forzi politiċi ... u mingħajr iż-żgħażagħ.
Id-diżinformazzjoni kemm tista’ tinfluwenza b’mod profond lill-votanti fl-elezzjonijiet Ewropej li ġejjin?
Id-diżinformazzjoni tirbaħ jekk lil min qed tindirizza huwa dgħajjef – u f’dan il-każ huma aħna l-Ewropej li qed niġu indirizzati. Id-diżinformazzjoni Russa ma toħloqx problemi; tuża l-problemi eżistenti. U lkoll nifhmu li bħalissa s-soċjetajiet tagħna għaddejjin minn kriżi politika u morali profonda. Dan ifisser li, sfortunatament, hemm lok biex id-diżinformazzjoni tkun effiċjenti. Iżda nħoss li, bħala Ewropej u bħala ċittadini tad-dinja, ilkoll aħna aktar edukati u esperjenzati dwar kif għandna naġixxu fir-rigward tal-media soċjali. Tgħallimna ħafna matul dawn l-aħħar għaxar snin. Nafu ftit aħjar kif għandna niffiltraw l-aħbarijiet tal-pjattaformi tal-media soċjali, peress li aħna konxji li dawn iservu ta’ ambjent għall-manipulazzjoni u l-aħbarijiet foloz. M’għandniex inkunu pessimisti wisq, għaliex dan diġà qed jagħmilna l-vittmi tad-diżinformazzjoni. Is-soċjetajiet m’għadhomx daqshekk inġenwi, u n-nies huma konxji li l-pajjiżi u atturi politiċi oħra jistgħu jużaw in-networks soċjali biex jimmanipulaw l-opinjoni pubblika. Fir-rigward tal-media soċjali għandi ngħid li hija biss il-minoranza li hija attiva; il-maġġoranza vasta tal-popolazzjoni medja, il-persuni b’edukazzjoni, spiss tibqa’ siekta. U dan l-għadd sinifikanti ta’ nies mhux qed jibilgħu kull ħaġa impressjonanti li tinkiteb fuq il-media soċjali.
Fl-20 ta’ Marzu, il-KESE adotta riżoluzzjoni fejn jappella liċ-ċittadini Ewropej biex jeżerċitaw id-dritt demokratiku tagħhom tal-vot matul l-elezzjonijiet Ewropej li qed joqorbu malajr.
Fl-20 ta’ Marzu, il-Kumitat Ekonomiku u Soċjali Ewropew (KESE) adotta riżoluzzjoni fejn jappella liċ-ċittadini Ewropej biex jeżerċitaw id-dritt demokratiku tagħhom tal-vot matul l-elezzjonijiet Ewropej li qed joqorbu malajr.
“Għaddejna minn żminijiet diffiċli, iżda ħadd ma jista’ jiċħad li l-UE ggarantiet il-paċi, id-demokrazija, il-prosperità ekonomika u l-progress soċjali għall-Istati Membri u ċ-ċittadini tagħha. Bis-saħħa tal-Unjoni, għandna l-libertà li naħdmu, nistudjaw u nagħmlu negozju fil-pajjiżi kollha tal-UE,” il-KESE ddikjara fir-riżoluzzjoni.
“In-nazzjonaliżmu, il-populiżmu u s-soluzzjonijiet fil-livell ta’ stat individwali mhumiex it-tweġiba. Il-kollaborazzjoni, il-kooperazzjoni u l-konverġenza huma”, qal il-KESE, waqt li enfasizza li l-ebda pajjiż tal-UE ma jista’ jlaħħaq waħdu ma’ sfidi bħaż-żieda fl-inflazzjoni, il-gwerer, il-migrazzjoni jew l-emerġenza klimatika.
Ir-riżoluzzjoni ġiet adottata fis-sessjoni plenarja tal-KESE ta’ Marzu wara d-dibattitu dwar “L-elezzjonijiet Ewropej tal-2024 mil-lenti tas-soċjetà ċivili”, bil-parteċipazzjoni ta’ attivisti tas-soċjetà ċivili u l-kunsilli ekonomiċi u soċjali nazzjonali ta’ Franza u l-Bulgarija.
Il-KESE qal li xtaq jimmobilizza n-network tiegħu ta’ mill-inqas 90 miljun persuna madwar l-UE, u jiżgura li l-Ewropej joħorġu jivvutaw biex jiddeċiedu min se jirrappreżentahom fil-Parlament Ewropew matul il-ħames snin li ġejjin.
Fil-plenarja, il-President tal-KESE Oliver Röpke qal li l-organizzazzjonijiet rappreżentati mill-membri tal-KESE għandhom għeruq profondi fis-soċjetajiet ċivili nazzjonali: “Nistgħu nilħqu lil kulħadd, nistgħu nġiegħlu lin-nies jivvutaw, u dan jeħtiġilna nagħmluh. Huwa d-dmir morali tagħna.”
Il-KESE ngħaqad ukoll mal-Parlament Ewropew biex jgħin sabiex tiżdied il-parteċipazzjoni fl-elezzjonijiet, għax is-soltu tkun ħafna aktar baxxa milli fl-elezzjonijiet nazzjonali, b’mod partikolari f’uħud mill-Istati Membri.
Il-President tal-KESE enfasizza li, fi sfond fejn id-demokrazija sejra lura madwar id-dinja u f’ċerti Stati Membri, l-elezzjonijiet tal-2024 huma ta’ importanza partikolarment kbira.
“Dawn l-elezzjonijiet mhumiex is-soluzzjoni maġika biex intemmu l-inkwiet tagħna, inneħħu l-biżgħat tagħna, jew intaffu t-tħassib taċ-ċittadini, iżda huma mod leġittimu biex nesprimu x-xewqat tagħna, nitolbu futur aħjar, u nżommu lil dawk fil-poter responsabbli,” qal is-Sur Röpke.
Meta tkellmu fil-plenarja, it-tliet relaturi tar-riżoluzzjoni, il-membri tal-KESE Christa Schweng, Cinzia del Rio u Ioannis Vardakastanis, li jirrappreżentaw lill-Gruppi tal-KESE ta’ Min Iħaddem, tal-Ħaddiema u tal-Organizzazzjonijiet tas-Soċjetà Ċivili rispettivament, kienu magħquda fl-appell tagħhom lill-Ewropej biex jużaw il-vot tagħhom u jeleġġu rappreżentanti li se jiddefendu Ewropa magħquda, demokratika, sostenibbli u soċjali.
Il-KESE ser jadotta riżoluzzjoni oħra f’Lulju, li tiffoka fuq it-talbiet tas-soċjetà ċivili lill-Parlament Ewropew u lill-Kummissjoni li jkunu ġew eletti.(II)
F’rispons konġunt għall-posponiment tal-Kummissjoni Ewropea tal-Inizjattiva dwar ir-reżiljenza tal-Ilma, ir-rappreżentanti tal-Kumitat Ekonomiku u Soċjali Ewropew (KESE), il-Grupp tal-MEPs dwar l-Ilma tal-Parlament Ewropew (PE) u l-Kumitat Ewropew tar-Reġjuni (KtR) bagħtu ittra miftuħa lill-Viċi President Eżekuttiv Maroš Šefčovič, fejn talbu lill-Kummissjoni tadotta approċċ komprensiv fir-rigward tal-ilma u tennew is-sejħa tagħhom għal Patt Blu tal-UE.
F’rispons konġunt għall-posponiment tal-Kummissjoni Ewropea tal-Inizjattiva dwar ir-reżiljenza tal-Ilma, ir-rappreżentanti tal-Kumitat Ekonomiku u Soċjali Ewropew (KESE), il-Grupp tal-MEPs dwar l-Ilma tal-Parlament Ewropew (PE) u l-Kumitat Ewropew tar-Reġjuni (KtR) bagħtu ittra miftuħa lill-Viċi President Eżekuttiv Maroš Šefčovič, fejn talbu lill-Kummissjoni tadotta approċċ komprensiv fir-rigward tal-ilma u tennew is-sejħa tagħhom għal Patt Blu tal-UE.
L-ittra tirrifletti t-tħassib komuni ta’ dawn l-istituzzjonijiet fir-rigward tal-posponiment tal-Inizjattiva dwar ir-reżiljenza tal-Ilma, li huma jqisu bħala sinjal inkwetanti rigward l-impenn tal-UE biex tindirizza l-isfidi tal-Ewropa li qed jiżdiedu fir-rigward tal-ilma. It-tliet istituzzjonijiet jirrappreżentaw is-soċjetà ċivili, iċ-ċittadini u l-gvernijiet lokali tal-UE, rispettivament.
Huma jipproponu approċċ olistiku u kollaborattiv li jintegra l-ilma fil-politiki kollha biex jiġi żgurat aċċess soċjali ekwu, aċċess għall-bdiewa, l-industriji u l-infrastruttura, u l-aspetti soċjali, ekonomiċi u ambjentali tal-ilma.
Din il-bidla għandha l-għan li tmur lil hinn mill-approċċi frammentati eżistenti, u fl-istess ħin trawwem strateġija awtonoma tal-ilma aktar komprensiva u effettiva. Din is-sejħa interistituzzjonali tħeġġeġ lill-Kummissjoni tkompli l-ħidma tagħha fuq l-Inizjattiva dwar ir-reżiljenza tal-Ilma u tagħmel l-ilma prijorità ewlenija tal-UE fil-mandat li jmiss (2024-2029).
