Mill-Grupp tal-Ħaddiema tal-KESE

Il-Grupp tal-Ħaddiema tal-KESE jwissi li d-drittijiet soċjali u tal-ħaddiema li tant stinkajna biex niksbuhom m’għandhomx jitwarrbu fl-isforzi tal-UE biex tibqa’ kompetittiva fl-ekonomija globali. Fost sejħiet għal aktar deregolamentazzjoni, l-UE ma għandhiex tmur passi lura fir-rigward ta’ leġiżlazzjoni ewlenija, bħall-Pilastru Ewropew tad-Drittijiet Soċjali.

Wara r-rakkomandazzjonijiet tar-rapporti ta’ Draghi u Letta, il-Kummissjoni ħarġet komunikazzjoni dwar il-Boxxla għall-Kompetittività li, ikkomplementata mill-inizjattivi orizzontali li ressqet, għandha l-għan li tagħti spinta lill-attivitajiet tan-negozji. L-għan huwa li jissaħħaħ il-vantaġġ kompetittiv tal-Ewropa.

Il-Grupp tal-Ħaddiema huwa mħasseb ħafna li d-drittijiet soċjali u tax-xogħol jistgħu jibqgħu lura fil-proċess, peress li l-UE tidher li għażlet li żżomm il-pass ma’ ekonomiji kompetittivi oħra akkost ta’ kollox.

Huwa għalhekk li l-Grupp tal-Ħaddiema ppropona sensiela ta’ Opinjonijiet fuq inizjattiva proprja li jindirizzaw il-kwistjoni tal-kompetittività mill-perspettiva tal-valur miżjud tal-kapital uman.  Din hija l-proposta mħabbra għall-Opinjoni dwar “Ir-rwol tat-trade unions fit-titjib tal-produttività”. L-Opinjoni ser ikollha l-għan li turi li l-forza mexxejja wara l-produttività fl-UE (li taffettwa l-kompetittività) hija prinċipalment l-investiment fil-kapital uman (il-ħaddiema), kif ukoll fit-teknoloġija u l-innovazzjoni.

Ir-rwol ewlieni tat-trade unions huwa enfasizzat f’dan il-kuntest, peress li dawn jgħaqqdu ’l-ħaddiema individwali permezz ta’ negozjar u azzjoni kollettivi, li jsawru d-dinamika tas-suq tax-xogħol biex jgħinu fit-twettiq tal-wegħda ta’ ekonomija kompetittiva.

Bl-istess mod, studju li jmiss tal-Grupp tal-Ħaddiema se jkollu l-għan li janalizza u jevalwa s-sitwazzjoni attwali tal-leġiżlazzjoni tal-UE relatata mal-Pilastru Ewropew tad-Drittijiet Soċjali. L-istudju se jkun għodda importanti għall-monitoraġġ tal-politika soċjali, peress li fit-tfittxija tagħha għall-perkors tad-deheb lejn il-kompetittività, l-Ewropa hija mistennija li tiffoka prinċipalment fuq l-ekonomija tagħha.   

Fl-aħħar nett, fil-laqgħa tiegħu ta’ April tal-Kategorija “Il-vuċi tal-ħaddiema għal aktar parteċipazzjoni demokratika”, il-Grupp tal-Ħaddiema se jeżamina l-isforzi proposti biex jitnaqqsu l-piżijiet regolatorji fuq in-negozji – meqjusa bħala fattur li jnaqqas ir-ritmu tal-kompetittività tal-Ewropa – u l-impatt tagħhom fuq il-liġijiet tal-UE li jipproteġu lill-ħaddiema u l-ambjent, b’mod partikolari fil-kuntest tad-diliġenza dovuta tas-sostenibbiltà u r-rapportar korporattiv dwar is-sostenibbiltà.

It-tieni edizzjoni tal-Ġimgħa tas-Soċjetà Ċivili tal-KESE 2025, li se ssir mis-17 sal-20 ta’ Marzu, se tiffoka fuq It-Tisħiħ tal-koeżjoni u l-parteċipazzjoni f’soċjetajiet polarizzati. Irriżerva l-post tiegħek billi tirreġistra hawnhekk!

Għad baqa’ żmien biex tirreġistra għat-tieni Ġimgħa tas-Soċjetà Ċivili tal-KESE, li matulha s-soċjetà ċivili tal-Ewropa, dawk li jfasslu l-politika tal-UE, l-esperti, il-ġurnalisti, u parteċipanti oħra se jingħaqdu flimkien biex jiddiskutu waħda mill-aktar sfidi urġenti li qed niffaċċjaw illum – kif nistgħu niġġieldu l-polarizzazzjoni tas-soċjetajiet tagħna.

Xprunata minn kriżijiet li jikkoinċidu, mill-pandemija u t-tibdil fil-klima għaż-żieda fl-għoli tal-ħajja u d-distakki dejjem jikbru fl-introjtu – il-polarizzazzjoni infirxet madwar l-UE u lil hinn minnha, approfondiet id-diviżjonijiet soċjali, naqqset il-fiduċja fl-istituzzjonijiet demokratiċi, u qed titfa’ pressjoni fuq l-unità tal-komunità.

F’dan il-kuntest, il-Ġimgħa tas-Soċjetà Ċivili 2025 hija sejħa kuraġġuża għal azzjoni sabiex titrawwem il-koeżjoni soċjali u tissaħħaħ il-parteċipazzjoni demokratika. Permezz ta’ dibattiti vivaċi u workshops kollaborattivi, dan il-forum ta’ erbat ijiem se jipprovdi pjattaforma unika għall-parteċipanti kollha biex jinvolvu ruħhom f’diskussjonijiet kritiċi, jaqsmu l-aħjar prattiki, u jaħdmu flimkien biex jiżviluppaw soluzzjonijiet prattiċi. 

X’inhu mistenni?

Il-Ġimgħa tas-Soċjetà Ċivili 2025 ser tinkludi diskussjonijiet tal-panel immexxija mill-Grupp ta’ Kuntatt tal-KESE, kif ukoll il-Jum l-Inizjattiva taċ-Ċittadini Ewropej (IĊE) u ċ-ċerimonja tal-għoti tal-Premju tal-KESE għas-Soċjetà Ċivili.

Hija se tibda b’diskors ewlieni li jqanqal il-ħsieb mill-istudjuż, il-kittieb u l-kummentatur politiku Albena Azmanova, li se jwitti t-triq, u jsawwar id-diskors għad-dibattiti li se jsiru wara.

Fil-panel ta’ livell għoli sussegwenti, se niddiskutu l-mistoqsija “Għadna Magħquda fid-Diversità?”. Il-membri tal-panel se jinkludu l-Viċi President tal-Parlament Ewropew Younous Omarjee; il-Ministru għas-Soċjetà Ċivili f’isem il-Presidenza Pollakka Adriana Porowska; il-President tal-KESE Oliver Röpke; il-Kopresident tal-Grupp ta’ Kuntatt tal-KESE Brikena Xhomaqi; is-Segretarju Ġenerali tal-Moviment Ewropew Internazzjonali Petros Fassoulas; u Mădălina-Mihaela Antoci mill-Kunsill Nazzjonali taż-Żgħażagħ tal-Moldova.

Matul il-Ġimgħa tas-Soċjetà Ċivili, se nesploraw kif l-edukazzjoni ċivika tista’ tgħin biex jitnaqqsu d-distakki, kif l-Ewropa tista’ tmexxi fl-innovazzjoni mingħajr ma tikkomprometti l-valuri tagħha, u kif l-akkomodazzjoni tista’ ssir aktar affordabbli u sostenibbli filwaqt li jiġi indirizzat il-faqar enerġetiku u jiġi appoġġjat l-għajxien multiġenerazzjonali. Se nħarsu wkoll lejn modi kif insaħħu s-soċjetà ċivili permezz ta’ appoġġ pubbliku u filantropiku, kif nistgħu niżguraw li l-politiki tal-UE jirriflettu l-ħtiġijiet lokali fit-tranżizzjoni ekoloġika u blu, u kif nirrikonoxxu, nipproteġu u ninvolvu ruħna mas-soċjetà ċivili madwar l-Ewropa b’mod aktar effettiv.

Sessjoni speċjali, ospitata flimkien mal-Parlament Ewropew, se tindirizza speċifikament il-Qafas Finanzjarju Pluriennali (QFP) u l-implikazzjonijiet tiegħu għas-soċjetà ċivili.

Jum tal-Inizjattiva taċ-Ċittadini Ewropej 2025

Fil-Jum l-Inizjattiva taċ-Ċittadini Ewropej fit-18 ta’ Marzu, l-enfasi se tkun fuq l-għodda b’saħħitha tad-demokrazija parteċipattiva li hija l-Inizjattiva taċ-Ċittadini Ewropej (IĊE). Introdotta mit-Trattat ta’ Lisbona, l-inizjattiva tippermetti liċ-ċittadini jitolbu lill-Kummissjoni Ewropea tipproponi leġiżlazzjoni ġdida tal-UE dwar kwistjoni partikolari. Biex jiġu kkunsidrati mill-Kummissjoni, l-organizzaturi jridu jiġbru miljun (1) firma biex jappoġġjaw il-kawża tagħhom.

Permezz ta’ diskussjonijiet ta’ livell għoli u workshops interattivi, il-parteċipanti se jesploraw suġġetti ewlenin bħar-rwol tal-IĊE fl-indirizzar tal-polarizzazzjoni u modi kif jinbena appoġġ aktar b’saħħtu madwar l-Istati Membri. Se jkun hemm enfasi speċjali fuq kif l-organizzazzjonijiet tas-soċjetà ċivili jistgħu jipparteċipaw b’mod attiv fil-proċess tal-IĊE sabiex l-ilħna taċ-ċittadini jinstemgħu fit-tfassil tal-politika Ewropea.

Il-parteċipanti se jkollhom ukoll opportunità unika biex jitkellmu direttament ma’ organizzaturi ta’ IĊE – tal-passat, tal-preżent u tal-futur biex jiskambjaw l-aħjar prattiki u t-tagħlimiet meħuda għall-kampanji tagħhom stess.

Barra minn hekk, l-avveniment se jenfasizza l-importanza tal-istrateġiji tal-impatt biex l-IĊE u l-panels taċ-ċittadini jsiru aktar effettivi, b’enfasi fuq iż-żieda tal-possibbiltajiet ta’ segwitu leġiżlattiv mill-istituzzjonijiet tal-UE.

Premju għas-Soċjetà Ċivili 2025

L-aħħar jum tal-Ġimgħa tas-Soċjetà Ċivili 2025 se jinkludi, fost affarijiet oħra, il-15-il ċerimonja tal-għoti tal-Premju tal-KESE għas-Soċjetà Ċivili.

L-għan tal-Premju għas-Soċjetà Ċivili huwa li jkun hemm sensibilizzazzjoni dwar il-kontribut eċċellenti tas-soċjetà ċivili għall-ħolqien ta’ identità u ċittadinanza Ewropej, kif ukoll għall-promozzjoni tal-valuri komuni li jsaħħu l-integrazzjoni Ewropea. Dan jingħata kull sena lill-individwi u lill-organizzazzjonijiet tas-soċjetà ċivili għall-proġetti innovattivi u kreattivi tagħhom mingħajr skop ta’ qligħ dwar temi differenti rilevanti għall-UE.

Din is-sena l-premju se jingħata lil tliet proġetti li jiġġieldu l-polarizzazzjoni dannuża tas-soċjetà tal-UE.

Il-Ġimgħa se tintemm b’sessjoni ta’ għeluq dinamika, b’kelliema li jinkludu l-Viċi President Eżekuttiv tal-Kummissjoni Ewropea (għad irid jiġi kkonfermat); il-Viċi President tal-Parlament Ewropew Katarina Barley, il-President tal-KESE Oliver Röpke; u s-Segretarju Ġenerali tal-Fondazzjoni Ċentru għad-Demokrazija fis-Serbja Nataša Vučković.

Kun parti mid-diskussjoni!

Matul l-erbat ijiem ta’ diskussjonijiet siewja, interventi ta’ ispirazzjoni minn kelliema ta’ livell għoli, u opportunitajiet kbar ta’ networking, il-Ġimgħa tas-Soċjetà Ċivili 2025 se tkun avveniment li mhux ta’ min jitilfu. Irriżerva l-post tiegħek illum u ngħaqad magħna biex id-diskussjoni tinbidel f’azzjoni ta’ bidla. Leħnek huwa importanti fil-bini ta’ Ewropa aktar koeżiva u parteċipattiva!

Il-programm sħiħ hu disponibbli hawnhekk.

Irreġistra hawn qabel it-12 ta’ Marzu. (ma)

Fil-11 ta’ Frar, il-Kumitat Ekonomiku u Soċjali Ewropew (KESE) ħabbar it-tnedija tal-applikazzjonijiet għar-raba’ edizzjoni tal-Premjijiet tal-UE għall-Produzzjoni Organika, u s-sottomissjonijiet se jibqgħu miftuħin sas-27 ta’ April 2025.

Dawn il-premjijiet huma ċelebrazzjoni tal-eċċellenza fil-katina tal-valur organiku, u jirrikonoxxu kontributi eċċellenti fil-kategoriji tal-produzzjoni organika bħall-Aħjar Bidwi, Belt, Reġjun, SME tal-Ipproċessar tal-Ikel, Bejjiegħ bl-Imnut, u Restorant/Servizz tal-Ikel. Il-KESE jissorvelja tliet kategoriji b’mod speċifiku:

• L-Aħjar SME li Tipproċessa l-Ikel Organiku
• L-Aħjar Bejjiegħ bl-Imnut tal-Ikel Organiku
• L-Aħjar Ristorant/Servizz tal-Ikel Organiku

Ir-rebbieħa se jitħabbru fit-23 ta’ Settembru 2025 (Jum Organiku tal-UE). Il-partijiet interessati mill-qasam tal-produzzjoni organika – inklużi l-bdiewa, il-proċessuri, il-bejjiegħa bl-imnut, u l-awtoritajiet pubbliċi – huma mħeġġa japplikaw.

Għad-dettalji tal-eliġibbiltà u l-applikazzjonijiet, żur is-sit web tal-Kummissjoni Ewropea. Il-mistoqsijiet dwar il-kategoriji ġestiti mill-KESE jistgħu jintbagħtu lil EUorganicawardsEESC@eesc.europa.eu.

Din l-inizjattiva tappoġġja l-Pjan ta’ Azzjoni tal-UE għall-Produzzjoni Organika, li jippromovi l-produzzjoni organika u s-sensibilizzazzjoni tal-konsumaturi. (ks) 

mill-Grupp tal-Organizzazzjonijiet tas-Soċjetà Ċivili tal-KESE

Il-prezzijiet tad-djar żdiedu b’ 47% fl-UE bejn l-2010 u l-2022. Matul l-istess perjodu, il-kirjiet żdiedu bi 18%. Skont l-Eurostat, fl-2023, aktar minn 10% tal-unitajiet domestiċi fil-bliet u 7% tal-unitajiet domestiċi fiż-żoni rurali nefqu aktar minn 40% tal-introjtu disponibbli tagħhom fuq l-akkomodazzjoni. Biex jixħet aktar dawl fuq kif nistgħu nagħmlu l-akkomodazzjoni aktar affordabbli u sostenibbli għall-Ewropej kollha, il-KESE kkummissjona studju li jesplora soluzzjonijiet ta’ politika biex jintlaħaq dan l-għan. F’din l-intervista, il-koawturi tal-istudju, Agnieszka Maj, Ekonomista, u Karolina Zubel, Direttur tal-Ambjent, l-Enerġija u t-Tibdil fil-Klima miċ-Ċentru għar-Riċerka Soċjali u Ekonomika (CASE), jiddiskutu s-sejbiet ewlenin tiegħu.

X’inhu dan l-istudju tal-KESE u għaliex huwa rilevanti?

Dan l-istudju dwar akkomodazzjoni sostenibbli affordabbli fl-UE jeżamina l-ħtieġa għal akkomodazzjoni affordabbli u sostenibbli fl-UE, waqt li jenfasizza r-rwol tad-diġitalizzazzjoni (IA, permessi tal-bini diġitali, bażijiet tad-data rilevanti) u strutturi tal-ekonomija soċjali. Permezz ta’ studji tal-każijiet, jenfasizza sforzi innovattivi li jtejbu l-affordabbiltà, l-aċċessibbiltà u s-sostenibbiltà tal-akkomodazzjoni. L-istudju jipprovdi rakkomandazzjonijiet azzjonabbli għall-2030 u l-2050, li jallinjaw mal-għanijiet tal-UE tar-reżiljenza għall-klima, l-ekwità soċjali u t-tkabbir ekonomiku. L-istudju joffri għarfien strateġiku għall-adattament tal-politiki tal-akkomodazzjoni għall-isfidi li qed jevolvu waqt li jitrawwem il-benesseri tal-komunità.

X’inhuma s-sejbiet ewlenin tal-istudju?

Id-diġitalizzazzjoni tippreżenta opportunità sinifikanti biex tittejjeb l-effiċjenza fl-ippjanar, il-kostruzzjoni u l-ġestjoni tal-akkomodazzjoni, u potenzjalment jitnaqqsu l-kostijiet u tissaħħaħ is-sostenibbiltà. Madankollu, l-impatt attwali tagħha fuq l-iffrankar tal-kostijiet huwa limitat. L-ostakli ewlenin għall-adozzjoni tal-avvanz diġitali jinkludu l-fehmiet tradizzjonali tal-partijiet ikkonċernati, il-perċezzjoni ta’ redditu baxx fuq l-investiment, kostijiet għoljin ta’ implimentazzjoni, u nuqqas ta’ inċentivi, taħriġ u regolamenti. Biex jiġi sfruttat il-potenzjal sħiħ tad-diġitalizzazzjoni, huwa essenzjali li jsir aktar investiment fl-infrastruttura diġitali, pereżempju billi l-pjattaformi diġitali jsiru interoperabbli.

L-involviment tal-entitajiet tal-ekonomija soċjali (assoċjazzjonijiet tal-akkomodazzjoni bi profitt limitat, organizzazzjonijiet ta’ benefiċċju pubbliku, kooperattivi) jirrappreżenta innovazzjoni politika promettenti biex jiġu indirizzati l-isfidi attwali tal-akkomodazzjoni. Dawn l-entitajiet joffru soluzzjonijiet ta’ akkomodazzjoni kosteffettivi u mfassla tajjeb li jrawmu l-koeżjoni tal-komunità u jippromovu l-istabbiltà tal-akkomodazzjoni fit-tul. Pereżempju, l-akkomodazzjoni mingħajr skop ta’ qligħ u bi profitt limitat fi Vjenna, li tammonta għal 30% tal-produzzjoni totali tad-djar tal-belt, għandha rwol kruċjali fl-istabbilizzazzjoni tas-suq tad-djar billi teżerċita effett ta’ tnaqqis fil-prezzijiet. Dan jgħin biex il-kirjiet jinżammu affordabbli u jiġu evitati distorsjonijiet tas-suq.

Abbażi tas-sejbiet, x’inhuma r-rakkomandazzjonijiet ewlenin tiegħek għal azzjoni u riċerka ulterjuri?

Fit-terminu medju, il-politiki tal-UE dwar l-akkomodazzjoni għandhom jagħtu prijorità lill-introduzzjoni ta’ “Patt Ewropew Ġdid għal Akkomodazzjoni Soċjali Sostenibbli Affordabbli” u “Direttiva dwar l-Akkomodazzjoni” għal approċċ unifikat madwar l-Istati Membri. Il-pajjiżi għandhom jippromovu mudelli innovattivi bħall-kooperattivi u l-akkomodazzjoni bi profitt limitat, jipprovdu appoġġ finanzjarju flessibbli għall-proġetti tal-akkomodazzjoni, u jħaddnu għodod diġitali biex itejbu s-soluzzjonijiet tal-akkomodazzjoni.

Fit-tul, il-politiki tal-akkomodazzjoni għandhom jadottaw approċċ strateġiku u sostenibbli, waqt li jenfasizzaw soluzzjonijiet lokali u monitoraġġ kontinwu. Id-diġitalizzazzjoni trid tiġi standardizzata permezz ta’ leġiżlazzjoni, bi prattiki tal-ekonomija ċirkolari bħas-self bankarju marbut maċ-ċirkolarità tal-bini, inċentivi għall-kiri bbażati fuq l-effiċjenza enerġetika, u inizjattivi ta’ finanzjament fil-livell lokali. Barra minn hekk, il-kunċett ta’ “akkomodazzjoni soċjali” għandu jespandi biex jinkludi familji b’introjtu medju, simili għall-mudell ta’ “akkomodazzjoni soċjetali” ta’ Vjenna, il-promozzjoni tat-taħlita soċjali u l-prevenzjoni tal-ġentrifikazzjoni. Huwa kruċjali wkoll li ssir enfasi kemm fuq il-kostruzzjoni u r-rinnovazzjonijiet ġodda, kif ukoll li l-bini mhux użat jiġi adattat mill-ġdid biex jissodisfa b’mod effettiv il-ħtiġijiet tal-akkomodazzjoni.

Ir-riċerka futura għandha tiffoka fuq approċċi inklużivi fl-ippjanar urban, il-kostruzzjoni u l-provvista tal-akkomodazzjoni biex tittejjeb l-aċċessibbiltà għaċ-ċittadini kollha. Għandha tinvestiga wkoll l-impatt tat-teknoloġiji emerġenti, bħall-IA u l-awtomatizzazzjoni, fuq l-iffrankar tal-kostijiet u l-effiċjenza fl-iżvilupp u l-ġestjoni tal-akkomodazzjoni. Barra minn hekk, ir-riċerka għandha tesplora mudelli innovattivi ta’ akkomodazzjoni madwar l-Istati Membri tal-UE, waqt li tidentifika strateġiji li jistgħu jtejbu kemm l-affordabbiltà kif ukoll is-sostenibbiltà.

L-istudju ġie kkummissjonat mill-KESE fuq talba tal-Grupp tal-Organizzazzjonijiet tas-Soċjetà Ċivili.

Is-suq tal-elettriku għandu jiġi riformat b’tali mod li ma jkunx limitat biss għall-ilħuq tal-miri tan-newtralità klimatika sal-2050. Skont il-Kumitat Ekonomiku u Soċjali Ewropew, huwa essenzjali li jiġu żgurati s-sigurtà tal-provvista, prezzijiet stabbli u affordabbli u d-dritt għall-enerġija sabiex jiġu protetti l-gruppi vulnerabbli.

Fl-Opinjoni dwar Il-futur tal-provvista u l-ipprezzar tal-elettriku fl-UE, ippubblikata f’Jannar u mfassla minn Jan Dirx u Thomas Kattnig, il-KESE jirrakkomanda mudell ta’ regolamentazzjoni governattiva fejn meħtieġ u intraprenditorija privata fejn possibbli, u jirrakkomanda faċilità tal-elettriku.

Din tista’ tkun f’forma ta’ kumpanija stabbilita mill-gvern li taġixxi bħala ġeneratur tas-suq fis-suq tal-elettriku, u b’hekk jintlaħqu l-għanijiet tan-newtralità klimatika, is-sigurtà tal-provvista, u prezzijiet stabbli u affordabbli.

Skont il-Kumitat, il-bidliet meħtieġa fis-suq tal-elettriku għandhom jitwettqu fi tliet stadji:

• Fażi 1 – minn issa sal-2030

  Il-faċilità tal-elettriku ser tkabbar il-portafoll tagħha b’taħlita ta’ ġenerazzjoni tal-enerġija (mhux tas-CO₂). Matul dan il-perjodu, in-negozjar tal-enerġija ser iseħħ fuq bażi ta’ negozjar ta’ ġurnata bil-quddiem iżda l-influwenza tal-faċilità tal-elettriku fis-suq ser tikber.

• Fażi 2 – mill-2030 sal-2040

  Il-faċilità tal-elettriku ser tikseb il-pożizzjoni tagħha ta’ ġeneratur tas-suq u ser tikkontrolla parti adegwata tal-lat tal-provvista tas-suq permezz ta’ kuntratti għall-provvista. In-negozjar ta’ ġurnata bil-quddiem ser jaġġusta ruħu matul dan il-perjodu kif meħtieġ.

• Fażi 3 – mill-2040 sal-2050

  Il-faċilità tal-elettriku ser tottimizza l-lat tal-provvista tal-elettriku biex tiżgura, mill-2050, provvista sostenibbli fit-tul tal-elettriku b’emissjonijiet ta’ gassijiet serra żero netti bi prezzijiet stabbli u prevedibbli. (mp)

Il-progress tal-Ewropa biex jintlaħqu l-Għanijiet ta’ Żvilupp Sostenibbli (SDGs) naqas b’mod sinifikanti, u qed iqajjem tħassib dwar il-ksib tal-miri tal-2030. Ir-Rapport dwar l-Iżvilupp Sostenibbli tal-Ewropa 2025, ippubblikat min-Network ta’ Soluzzjonijiet ta’ Żvilupp Sostenibbli tan-NU (SDSN), jiżvela li r-rata tal-progress fil-qasam tal-SDGs mill-2020 sal-2023 kienet inqas minn nofs dik li kienet fil-perjodu preċedenti.

Bejn l-2016 u l-2019, il-progress żdied b’1.9 punti, iżda dan naqas għal 0.8 punti biss fis-snin ta’ wara. It-tnaqqis fir-ritmu jaħbat ma’ żmien ta’ sfidi ambjentali, soċjali u ġeopolitiċi dejjem akbar. L-SDG 2 (Ebda Ġuħ) għadu ta’ tħassib kbir, peress li għad hemm kwistjonijiet ta’ sigurtà u sostenibbiltà tal-ikel fl-Ewropa.

Studju separat li sar għall-Kumitat Ekonomiku u Soċjali Ewropew (KESE) jenfasizza l-ħtieġa għal bidliet fid-dieta biex jiġu appoġġjati l-agrikoltura sostenibbli u s-saħħa pubblika.

Bi tmexxija ġdida tal-UE fis-seħħ, l-esperti qed jappellaw għal politiki u investimenti aktar b’saħħithom biex jaċċelleraw il-progress fil-qasam tal-SDGs. Il-kooperazzjoni u l-finanzjament globali huma meqjusa kruċjali, u r-Raba’ Konferenza Internazzjonali dwar il-Finanzjament għall-Iżvilupp li se ssir fi Spanja f’Ġunju 2025 hija mistennija tiffoka fuq żieda fl-appoġġ finanzjarju għas-sostenibbiltà.

Guillaume Lafortune, Viċi President tal-SDSN u l-awtur ewlieni tar-rapport, iwissi li t-tensjonijiet ġeopolitiċi li qed jiżdiedu qed jikkumplikaw l-isforzi ta’ sostenibbiltà, iżda għadu ottimist.

“Id-dinja qed issir dejjem aktar perikoluża, instabbli u inċerta,” jistqarr. “Fl-istess ħin, in-nies, speċjalment iż-żgħażagħ, iridu żvilupp sostenibbli. Bid-daqs tal-ekonomija globali u t-teknoloġiji disponibbli, id-dinja għandha l-potenzjal li tikseb bis-sħiħ żvilupp sostenibbli.”

“Sistemi tal-ikel sostenibbli huma mutur kruċjali għall-implimentazzjoni tal-SDGs. Biex naċċelleraw l-azzjoni, neħtieġu mekkaniżmi aktar ambizzjużi biex nissalvagwardjaw l-għajxien tal-bdiewa, tal-produtturi tal-ikel fuq skala żgħira, u ta’ partijiet ikkonċernati oħra tul il-katina tal-provvista tal-ikel. Iżda rridu nindirizzaw ukoll id-distribuzzjoni inġusta u niżguraw tranżizzjoni ġusta,” qal Peter Schmidt, President tas-Sezzjoni tal-KESE għall-Agrikoltura, l-Iżvilupp Rurali u l-Ambjent(NAT), li appella wkoll għal involviment akbar tas-soċjetà ċivili.

Baqa’ ħames snin biss sad-data stabbilita u l-UE qed tiffaċċja deċiżjoni kritika: li taġixxi b’mod deċiżiv jew tirriskja li ma tilħaqx l-impenji tagħha fir-rigward ta’ futur sostenibbli u ekwu. (ks)

L-interessi leġittimi tal-UE fl-Artiku Ewropew se jiġu difiżi l-aħjar permezz ta’ strateġija tal-UE għall-Artiku li ssaħħaħ il-parteċipazzjoni tas-soċjetà ċivili fid-deċiżjonijiet rilevanti kollha. Il-kooperazzjoni mill-qrib ma’ Greenland hija wkoll essenzjali għal investiment sostenibbli fl-Artiku sabiex jiġu żgurati l-prosperità u r-reżiljenza tar-reġjun.

Il-KESE ressaq Opinjoni fuq inizjattiva proprja dwar Niżviluppaw l-istrateġija tal-Ewropa għall-Artiku fi djalogu mas-soċjetà ċivili, li ġiet adottata fis-sessjoni plenarja tiegħu ta’ Jannar u tenfasizza r-rwol importanti li l-Artiku għandu għall-awtonomija strateġika, ir-reżiljenza u l-kompetittività tal-Ewropa.

Il-membru tal-KESE Anders Ladefoged, relatur tal-Opinjoni, qal: “Bl-Opinjoni ġdida tagħna dwar il-politika tal-UE dwar l-Artiku qed noffru perspettiva tas-soċjetà ċivili dwar kif l-UE tista’ tiżviluppa il-politika tagħha għal dan ir-reġjun. Kemm biex tieħu ħsieb l-interessi tagħha stess kif ukoll biex tgħin jiġi żgurat reġjun reżiljenti u prosperu għan-nies li jgħixu hemmhekk.”

Il-KESE jappoġġja u jħeġġeġ ukoll konsultazzjoni sħiħa u kooperazzjoni mal-popli indiġeni fl-Artiku. F’dan il-kuntest, il-membru tal-KESE Christian Moos, korelatur tal-Opinjoni, qal: “L-interessi tal-Istati Ewropej tal-Artiku jiġu difiżi l-aħjar flimkien, kemm permezz tal-kooperazzjoni bejn l-Istati Membri tat-Tramuntana tal-UE kif ukoll permezz ta’ strateġija Ewropea għall-Artiku, li trid tiżgura l-parteċipazzjoni tas-soċjetà ċivili u tiddefendi d-drittijiet tal-popli lokali u indiġeni.”

Greenland, li hija diskussa wkoll fl-Opinjoni, qed tiffaċċja sitwazzjoni simili għall-Artiku Ewropew fir-rigward kemm tal-opportunitajiet kif ukoll tal-isfidi relatati mat-trasformazzjoni rapida fir-reġjun.

Fir-rigward ta’ Greenland, is-Sur Moos qal: “Il-kooperazzjoni Ewropea msaħħa, inkluż fi Greenland, hija essenzjali għal investiment sostenibbli fl-Artiku Ewropew sabiex isir reġjun prosperu u reżiljenti.”

Għall-Greenlandiżi, wieħed mill-punti fokali ewlenin huwa t-tisħiħ tal-awtodeterminazzjoni tagħhom bħala nazzjon taħt is-slogan “xejn dwarna, mingħajrna”. Madankollu, l-UE hija meqjusa bħala alleat mill-qrib, fuq il-bażi ta’ valuri kondiviżi, bħad-drittijiet tal-bniedem, l-istat tad-dritt u d-djalogu soċjali. (at)

L-UE teħtieġ fokus aktar qawwi fuq il-politika tal-kompetizzjoni biex issaħħaħ il-kompetittività globali tagħha, tagħti spinta lill-produttività, u tiżgura li s-Suq Uniku jibqa’ pilastru tas-saħħa ekonomika.

Fil-plenarja tiegħu ta’ Jannar, il-Kumitat Ekonomiku u Soċjali Ewropew (KESE) adotta l-Opinjoni bit-titolu Politika tal-kompetizzjoni fil-qalba tal-kompetittività tal-UE. L-Opinjoni tappella għal integrazzjoni aktar profonda tal-ekonomiji nazzjonali u strateġiji ta’ għajnuna mill-Istat aktar intelliġenti biex jiġi sfruttat il-potenzjal ekonomiku tal-Ewropa u jiġu indirizzati l-isfidi globali ewlenin, inklużi d-diġitalizzazzjoni, it-tibdil fil-klima u r-reżiljenza.

Il-KESE enfasizza li l-politika tal-kompetizzjoni hija kritika għat-trawwim tal-innovazzjoni, is-sostenibbiltà u t-tkabbir ekonomiku. “M’hemm l-ebda kunflitt bejn il-kompetizzjoni u l-kompetittività”, qalet ir-relatur Isabel Yglesias. “Bi proċeduri simplifikati, għodod flessibbli u riżorsi suffiċjenti, il-politika tal-kompetizzjoni tista’ tixpruna l-prosperità għan-negozji u ċ-ċittadini tal-UE.”

Ir-regoli l-ġodda tal-kompetizzjoni tal-UE, bħall-Att dwar is-Swieq Diġitali u r-Regolament dwar is-Sussidji Barranin, diġà qed jindirizzaw id-distorsjonijiet tas-suq u jsaħħu l-pożizzjoni globali tal-blokk. Madankollu, il-KESE jappella għal aktar miżuri biex jiġu modernizzati l-valutazzjonijiet tal-fużjonijiet u jiġi żgurat li l-fużjonijiet xprunati mill-innovazzjoni jiġu kkontrollati b’mod effettiv, anke jekk dawn jaqgħu taħt il-limiti attwali tal-UE.

L-Opinjoni tenfasizza r-rwol vitali tal-għajnuna mill-Istat fl-appoġġ tat-tranżizzjoni ekoloġika u dik diġitali. Madankollu, is-sussidji kkoordinati ħażin jirriskjaw li jimminaw il-produttività u t-tkabbir. L-istudji juru li koordinazzjoni aħjar fi ħdan l-UE tista’ tagħti spinta lill-produttività b’aktar minn 30 %. Il-KESE jirrakkomanda l-allinjament tas-sussidji madwar l-Istati Membri biex jissaħħu l-ktajjen tal-valur Ewropej u jiġu evitati l-ineffiċjenzi.

Il-Proġetti Importanti ta’ Interess Ewropew Komuni (IPCEIs) u l-Fond Ewropew għall-Kompetittività propost għandhom jitfasslu b’perspettiva pan-Ewropea sabiex jixprunaw l-innovazzjoni industrijali fuq skala kbira. Dawn l-għodod iridu jiżguraw li l-benefiċċji jitqassmu b’mod ġust madwar l-Unjoni, waqt li jippromwovu s-sostenibbiltà u r-reżiljenza.

Biex l-UE tiġi ppożizzjonata bħala mexxejja globali, il-KESE jenfasizza l-ħtieġa għal:

• Integrazzjoni akbar biex jitnaqqsu s-sussidji allokati ħażin u tingħata spinta lill-produttività;
• Regoli aktar b’saħħithom għall-protezzjoni tal-innovazzjoni Ewropea fil-kuntest ta’ akkwiżizzjonijiet barranin;
• Kompetizzjoni simplifikata u aktar mgħaġġla u proċeduri ta’ għajnuna mill-Istat biex tiżdied l-effiċjenza; u
• Politika bbilanċjata ta’ fużjonijiet li tippromovi l-innovazzjoni, is-sostenibbiltà u l-investiment fl-infrastruttura. (ll)

Il-Kumitat Ekonomiku u Soċjali Ewropew (KESE) appella għal bidliet fir-regoli tal-Unjoni Ewropea dwar l-għajnuna mill-Istat sabiex jiġu rikonoxxuti u akkomodati aħjar il-ħtiġijiet tal-entitajiet tal-ekonomija soċjali, li jaqdu rwol kritiku fl-indirizzar tal-isfidi tas-soċjetà.

Fl-Opinjoni tiegħu dwar Kif għandhom jiġu appoġġjati l-entitajiet tal-ekonomija soċjali f’konformità mar-regoli dwar l-għajnuna mill-Istat: xi riflessjonijiet wara s-suġġerimenti li saru fir-rapport ta’ Enrico Letta, li ġiet adottata fis-sessjoni plenarja tiegħu ta’ Jannar, il-KESE wissa li r-regolamenti eżistenti jonqsu milli jipprovdu appoġġ adegwat lil dawn l-intrapriżi, li ħafna drai jinvestu l-profitti tagħhom fi sforzi biex jintlaħqu l-objettivi soċjali minflok iqassumhom lill-investituri.

“Irridu nissensibilizzaw aktar nies rigward il-benefiċċji ta’ regolamentazzjoni effettiva b’rabta mal-kompetizzjoni u l-għajnuna mill-Istat kemm għall-intrapriżi tal-ekonomija soċjali kif ukoll għas-sistema kollha ta’ servizzi ta’ interess ġenerali”, sostna ir-relatur tal-Opinjoni, Giuseppe Guerini.

L-entitajiet tal-ekonomija soċjali – li jvarjaw minn kooperattivi għal soċjetajiet mutwi u fondazzjonijiet – jimpjegaw aktar minn 11-il miljun persuna madwar l-UE, jiġifieri 6.3 % tal-popolazzjoni attiva. Dawn joperaw f’oqsma bħas-servizzi soċjali u tas-saħħa, l-enerġija rinnovabbli u t-tnaqqis tal-faqar. Minkejja l-kontribut tagħhom, ħafna jiffaċċjaw ostakli sistemiċi biex jiżguraw kapital ta’ investiment fit-tul u jinnavigaw il-proċessi tal-akkwist pubbliku, peress li l-qafas regolatorju attwali spiss jonqos milli jqis in-natura mingħajr skop ta’ qligħ jew ibbażata fuq is-solidarjetà tagħhom.

Fost affarijiet oħra, l-Opinjoni tal-KESE tenfasizza l-fatt li l-awtoritajiet pubbliċi mhux qed jużaw biżżejjed l-għodod eżistenti bħar-Regolament Ġenerali ta’ Eżenzjoni ta’ Kategorija (GBER) u l-qafas għas-servizzi ta’ interess ekonomiku ġenerali.

Huwa għalhekk li l-Kumitat qed jappella għas-semplifikazzjoni u l-modernizzazzjoni tar-regoli kumplessi żżejjed u skaduti fl-ambitu tal-GBER għall-appoġġ tal-impjieg ta’ ħaddiema żvantaġġati u b’diżabilità, f’konformità ma’ xi wħud mir-rakkomandazzjonijiet tar-Rapport ta’ Letta dwar is-suq uniku.

Għalkemm iż-żieda reċenti fil-limiti massimi tal-għajnuna de minimis – EUR 300 000 għall-kumpaniji ordinarji u EUR 750 000 għall-entitajiet tas-servizzi ta’ interess ekonomiku ġenerali – hija milqugħa, il-KESE jargumenta wkoll li strumenti aktar imfassla apposta, bħall-GBER jew id-dispożizzjonijiet speċifiċi tas-servizzi ta’ interess ekonomiku ġenerali, jindirizzaw aħjar il-ħtiġijiet tal-entitajiet tal-ekonomija soċjali f’oqsma bħas-servizzi tas-saħħa u dawk soċjali. (ll)

minn Stefano Mallia, President tal-Grupp ta’ Min Iħaddem tal-KESE

Fid-29 ta’ Jannar, il-Kummissjoni Ewropea adottat il-Boxxla għall-Kompetittività, pass kritiku u f’waqtu biex tingħata spinta mill-ġdid lill-magna ekonomika tal-Ewropa li se tfassal it-triq tal-UE għall-ħames snin li ġejjin.

L-impjegaturi tal-UE ilhom ħafna favur aġenda globali tal-kompetittività, u nilqgħu t-tliet pilastri tal-boxxla: li jiċċekken id-distakk bejn l-innovazzjoni u l-produttività, li d-dekarbonizzazzjoni tiġi kkombinata mal-kompetittività, u li jitnaqqsu d-dipendenzi għall-iżgurar tal-ktajjen tal-provvista. Dawn huma kruċjali biex jiġi żgurat li l-Ewropa tkun tista’ tikkompeti globalment, tattira u żżomm it-talent u trawwem l-innovazzjoni.

Madankollu, is-suċċess aħħari tal-boxxla jiddependi fuq l-iżvilupp ta’ miżuri konkreti u l-implimentazzjoni f’waqtha tagħhom. Inizjattivi ewlenin bħall-pakkett ta’ Simplifikazzjoni Omnibus, il-Patt għal Industrija Nadifa u l-istrateġija orizzontali biex jiġi approfondit is-suq uniku se jkollhom rwol deċiżiv. Madankollu, strateġiji b'dehra ġdida u titli attraenti waħedhom ma jistgħux jipproteġuna mill-isfidi li għandna quddiemna.

Pereżempju, is-semplifikazzjoni tal-qafas regolatorju hija l-ewwel u l-aktar pass urġenti. It-tnaqqis mill-piż tal-burokrazija u l-promozzjoni tal-veloċità u l-flessibbiltà huma essenzjali. Għal żmien twil wisq, in-negozji tal-UE tħabtu ma’ kumplessità żejda u teħid ta’ deċiżjonijiet kajman. Neħtieġu wkoll implimentazzjoni sinifikanti tal-kontroll tal-kompetittività, sabiex miżuri leġiżlattivi u regolatorji ġodda jappoġġjaw, aktar milli jfixklu, it-tkabbir tan-negozju.

Il-boxxla ġustament tiffoka fuq it-trawwim tal-innovazzjoni permezz ta’ Unjoni tas-Swieq Kapitali robusta u l-indirizzar tal-ostakli strutturali biex jiġi sfruttat il-potenzjal tal-Ewropa fit-teknoloġija profonda, l-enerġija nadifa u l-manifattura avvanzata, waqt li tinħoloq ekosistema fertili għal kumpaniji start-up u negozji li qed jespandu.

L-Unjoni tas-Swieq Kapitali li qatt ma tlestietx hija tabilħaqq tfakkira li ma nistgħux naffordjaw dewmien. Filwaqt li l-boxxla tippromovi koordinazzjoni aħjar tal-investimenti tal-gvern nazzjonali, hija nieqsa minn pjan ċar dwar sorsi komuni oħra ta’ finanzjament. Iżda d-dinja mhijiex se tistenniena.

It-tellieqa bdiet u issa wasal iż-żmien li nagħtu s-salt. L-isfruttar tal-kompetittività mhuwiex biss imperattiv ekonomiku, iżda huwa l-muftieħ għall-prosperità kondiviża għal kulħadd. In-negozji Ewropej huma, u se jibqgħu, parti mis-soluzzjoni.