Minn Cillian Lohan 

Il-moviment tal-persuni madwar l-UE ġab miegħu diversi benefiċċji għal dawk kollha involuti. Il-moviment taż-żgħażagħ kien partikolarment importanti, peress li ppermettielhom jesperjenzaw kulturi differenti fl-Ewropa u jgħixu l-istil ta’ ħajja f’pajjiżi Ewropej oħra. Ippermettielhom ukoll jifhmu li għandna ħafna komuni. Żjara f’pajjiż ieħor għal xogħol jew studju tgħinna lkoll nifhmu l-umanità komuni tagħna. Irrispettivament mil-lingwa, id-dieta tagħna jew it-temp tagħna, naqsmu tant affarijiet – ir-relazzjonijiet mal-familja u l-ħbieb, it-tamiet u t-taħbit ta’ kuljum, l-isfidi u l-opportunitajiet. 

Huma skambji bejn il-pajjiżi bħal dawn li joħolqu soċjetà ta’ adulti li juru simpatija u fehim fil-konfront ta’ persuni oħra. M’għadniex inqisu liċ-ċittadini Ewropej ġirien tagħna bħala stranġieri, iżda bħala ħbieb. 

M’għandniex nissottovalutaw ir-rwol li dan kollu għandu fiż-żamma tal-paċi u l-istabbiltà fil-kontinent tagħna. Il-moviment taż-żgħażagħ huwa l-pedament tal-kooperazzjoni u l-kollaborazzjoni dejjiema.

Huwa f’dan il-kuntest li pproponejt Opinjoni fuq Inizjattiva Proprja dwar il-mobilità taż-żgħażagħ u r-relazzjonijiet bejniethom f’UE ta’ wara l-Brexit. B’ħidma mal-kollegi tiegħi, mal-persunal u mal-membri, aħna kkonsultajna b’mod wiesa’ mal-gruppi affettwati. Dan il-proċess kien jinvolvi rappreżentanti tal-UE u rappreżentanti tar-Renju Unit f’laqgħat online, b’attendenza fiżika, tqassim ta’ stħarriġiet, u skambju ta’ emails. Il-ħidma tagħna ġiet appoġġjata bis-sħiħ fil-plenarja tagħna tal-KESE b’vot qawwi ħafna. 

L-istituzzjonijiet Ewropej wieġbu b’offerta wiesgħa ta’ skemi ta’ mobilità mtejba għaż-żgħażagħ fir-Renju Unit. L-ewwel reazzjoni min-naħa tar-Renju Unit kienet ta’ rifjut, iżda se nkomplu naħdmu biex nuru l-benefiċċji għan-naħat kollha.

Nenfasizzaw li mhumiex biss l-istudenti universitarji jew dawk f’edukazzjoni full-time li jibbenefikaw minn programmi bħall-Erasmus+ jew il-programm Ewropa Kreattiva. Dawn it-tipi ta’ inizjattivi tal-UE jippermettu liż-żgħażagħ minn kull qasam tal-ħajja jaċċessaw programmi ta’ skambju u esperjenzi li huma diffiċli biex jinkisbu mod ieħor.

Hemm kalkolu skjett tal-kost finanzjarju involut u tar-redditu finanzjarju. Dan huwa biss aspett wieħed tal-valur. Il-valur vera tal-mobilità u l-iskambji jinsab fl-esperjenza kondiviża u l-fehim kondiviż. Kontinent mimli ħajja u multikulturali għandu bżonn interazzjoni u moviment tan-nies. Fil-KESE, ser inkomplu nagħmlu pressjoni għal dan. Meta nipprattikaw dak li nippridkaw, u biex immexxu bl-eżempju, qed inkomplu naħdmu mas-soċjetà ċivili fir-Renju Unit. 

Għandna Memorandum ta’ Qbil mal-Alleanza tas-Soċjetà Ċivili tar-Renju Unit, u MtQ speċifiku ma’ SAFE fl-Iskozja (b’ħidma mal-eks membru tal-KESE Irene Oldfather). Ser inkomplu din il-ħidma u nsaħħuha. Is-settur taż-żgħażagħ wera tmexxija fi żminijiet ta’ taqlib, mhux l-inqas fil-qasam tal-azzjoni klimatika. Ejjew naħdmu flimkien fil-livell istituzzjonali biex nipprovdulhom l-għodod kollha li jeħtieġu biex jamplifikaw il-ħidma tagħhom, u biex nisfruttaw il-qawwa taż-żgħażagħ għal futur aħjar għalina lkoll.