Fl-aħħar sena, il-kompetittività telgħet ’il fuq fl-iskala tal-prijoritajiet tal-UE fil-politika Ewropea u ħadd ma jista’ jinjora l-importanza tagħha għall-futur tal-UE.
Fl-aħħar sena, il-kompetittività telgħet ’il fuq fl-iskala tal-prijoritajiet tal-UE fil-politika Ewropea u ħadd ma jista’ jinjora l-importanza tagħha għall-futur tal-UE.
Il-kompetittività kienet tema ewlenija tad-diskors annwali li l-President tal-Kummissjoni Ursula von der Leyen tat lill-Parlament Ewropew f’Settembru tas-sena l-oħra dwar l-Istat tal-Unjoni. Von der Leyen wiegħdet li tagħmel dak li hemm bżonn biex tiddefendi l-vantaġġ kompetittiv tal-Ewropa.
Il-kumpaniji Ewropej qed jitħabtu biex jirreklutaw ħaddiema tas-sengħa, ir-regolamentazzjoni tas-setturi ewlenin hija aktar stretta milli fil-pajjiżi kompetituri l-oħra, jiġifieri l-Istati Uniti u ċ-Ċina, il-livell tal-investiment fir-riċerka u l-iżvilupp huwa aktar baxx, u l-infrastruttura fiżika u diġitali qed iżżomm lura l-kummerċ u t-tkabbir ekonomiku. Dawn l-isfidi huma magħrufa sew u ġew dokumentati f’diversi studji.
Von der Leyen inkarigat ukoll lil Mario Draghi, eks kap tal-Bank Ċentrali Ewropew, biex iressaq proposti konkreti dwar kif tista’ tittejjeb il-kompetittività tal-UE. Dan jintlaqa’ tajjeb. Madankollu, is-suġġerimenti tajbin mhux se jkunu biżżejjed, irid ikun hemm ukoll ir-rieda politika u l-kapaċità biex jiġu implimentati.
L-UE stabbiliet għaliha nnifisha l-għan li ssaħħaħ ir-reżiljenza u l-influwenza tagħha fid-dinja, iżda qed titlef il-kompetittività meħtieġa biex jintlaħaq dan l-għan. Is-sehem tal-UE fl-ekonomija dinjija huwa mbassar li jonqos b’mod kostanti minn kważi 15% għal 9% biss sal-2050.
Għalhekk, bilfors iridu jittejbu l-produttività u l-kompetittività tal-UE. Għal dan il-għan, l-UE trid tadotta aġenda tal-kompetittività, li, b’konformità mal-prinċipji tas-suq uniku u tal-ekonomija soċjali tas-suq, tħares ’il quddiem, tkun definita tajjeb u kkoordinata, u tippromovi l-prosperità tan-negozji u tal-ħaddiema, ittejjeb il-kapaċità tagħhom li jinnovaw, jinvestu u jinnegozjaw u jikkompetu fis-suq globali għall-ġid komuni, kif ukoll tixpruna t-tranżizzjoni tagħna lejn in-newtralità klimatika. Dan huwa essenzjali mhux biss biex jiġu żgurati l-prosperità, l-innovazzjoni, l-investiment, il-kummerċ u t-tkabbir futuri, iżda wkoll biex jinħolqu impjiegi ta’ kwalità tajba u jogħlew l-istandards tal-għajxien.
Din hija r-raġuni għaliex il-kumpaniji tal-UE għandhom aspettattivi ċari b’dan il-momentum il-ġdid, u qed jitolbu pożizzjonament ġdid għall-kompetittività fi ħdan qafas ekonomiku u soċjetali usa’ fit-tul.
Il-KESE ilu jaħdem biex jidentifika l-fatturi u l-atturi li jinfluwenzaw il-kompetittività u l-produttività fit-tul u li jridu jiġu kkunsidrati f’viżjoni integrata. Ħdimna dwar l-ekosistemi tal-kompetittività bl-ambizzjoni li nispjegaw lis-servizzi tal-Kummissjoni liema huma l-indikaturi li għandhom ikomplu jtejbu jew jikkomplementaw.
Għalhekk, l-approċċ ibbażat fuq il-pajjiż għall-valutazzjoni tal-kwistjonijiet u kif għandhom jissolvew jidher li huwa angolu kruċjali li l-Kummissjoni ma indirizzatx biżżejjed fiż-żewġ komunikazzjonijiet tagħha dwar il-kompetittività fit-tul.
B’mod aktar ġenerali, il-Kummissjoni fasslet lista ta’ 17-il fattur ta’ prestazzjoni li għandhom jiġu vvalutati kull sena għad-9 dimensjonijiet tal-kompetittività identifikat. Iżda jeħtieġ ukoll li l-Istati Membri jirrispettawhom bis-sħiħ u li l-Kummissjoni jkollha l-mezzi adegwati ta’ infurzar biex tobbligahom jagħmlu dan. Dan huwa dak li qed nitolbu.
Dwar l-indikaturi, il-quċċata tal-lista tinkludi:
Aċċess għall-finanzi, b’kost raġonevoli iżda mingħajr ma jiġu ppenalizzati l-ġenerazzjonijiet futuri.
Fir-rigward tas-servizzi pubbliċi u l-infrastruttura kritika, jeħtieġ li ninvestu u nkejlu aħjar dawn l-investimenti. Nipproponu sitt parametri ta’ evalwazzjoni f’dan ir-rigward.
Dwar ir-riċerka u l-innovazzjoni: żieda fil-kooperazzjoni hija essenzjali, sew jekk pubblika/privata, reġjonali, kif ukoll jekk globali.
Dwar in-networks tad-data u l-enerġija, is-sigurtà, newtralità fil-prezzijiet u newtralità klimatika huma l-kliem ewlenin.
F’termini ta’ ċirkolarità, ir-rwol tal-UE ma għandux għalfejn jintwera aktar, iżda jeħtieġ li nagħtu attenzjoni biex nibbilanċjaw il-kompetizzjoni bejn l-operaturi.
Il-qafas leġiżlattiv tal-UE dwar id-diġitalizzazzjoni huwa prekursur: konnettività, IA, data, eċċ. F’dan il-qafas leġiżlattiv, jeħtiġilna nilqgħu l-isfida li nibbilanċjaw l-aspetti umani mal-wegħdiet tat-teknoloġija diġitali.
L-edukazzjoni u t-taħriġ iridu jkunu kapaċi jindirizzaw l-isfidi demografiċi u soċjoloġiċi.
F’termini ta’ awtonomija strateġika u kummerċ, id-dipendenzi tagħna huma d-dgħufijiet tagħna. In-negozji jeħtieġ li jorganizzaw lilhom infushom mill-ġdid u l-UE jeħtieġ li tipprovdi qafas abilitanti li jindirizza din l-isfida.
Fl-aħħar nett, dwar is-suq uniku, aħna ntennu bis-sħiħ il-ħtieġa li l-Istati Membri jsegwu r-regoli tal-acquis communautaire u l-prinċipji tat-Trattati. It-tneħħija tal-ostakli u kontroll ġenwin. Ir-rieda politika tal-gvernijiet tal-UE biex jimplimentaw dak li jinnegozjaw fi Brussell, u l-kapaċità tal-Kummissjoni li taħdem f’servizzi interdipartimentali u mhux b’mod kompartimentalizzat li jikkontribwixxi għal aktar inkonsistenzi. Dan huwa dak li għandna bżonn.
Qatt mhu se ngħiduh biżżejjed.
U f’dan il-kuntest, ejjew inserrħu fuq Brussell għar-riżultati tal-kontrolli tal-kompetittività u nużaw ir-raggruppamenti industrijali reġjonali fil-livell nazzjonali. L-għodod hemm qegħdin, ejja nużawhom.
Għall-kolonna tagħna “Mistoqsija lil ...” staqsejna lil Emilie Prouzet, membru tal-KESE u relatur tal-Opinjoni tal-KESE dwar “Il-kompetittività fit-tul tal-UE: inħarsu lil hinn mill-2030”, x’inhu meħtieġ biex tiġi żgurata l-kompetittività fit-tul fl-UE. L-Opinjoni hija ppjanata għall-adozzjoni fis-sessjoni plenarja ta’ Marzu.
Għall-kolonna tagħna “Mistoqsija lil ...” staqsejna lil Emilie Prouzet, membru tal-KESE u relatur tal-Opinjoni tal-KESE dwar “Il-kompetittività fit-tul tal-UE: inħarsu lil hinn mill-2030”, x’inhu meħtieġ biex tiġi żgurata l-kompetittività fit-tul fl-UE. L-Opinjoni hija ppjanata għall-adozzjoni fis-sessjoni plenarja ta’ Marzu.
Mill-istabbiliment tas-suq uniku Ewropew ’il hawn, l-armonizzazzjoni u r-rikonoxximent reċiproku tal-istandards ippermettew lill-kumpaniji jbigħu l-prodotti tagħhom f’suq ta’ aktar minn 450 miljun persuna. Is-suq uniku jirrappreżenta 61 % tal-kummerċ intra-UE mill-kumpaniji, u huwa l-bażi tal-prosperità ekonomika tal-Ewropa, u b’hekk jibbenefika liċ-ċittadini, lill-konsumaturi, lill-ħaddiema u lill-kumpaniji tagħha. Il-Kummissjoni Ewropea tistma li 25 % tal-prodott domestiku gross tal-UE huwa ġġenerat mis-suq intern.
Mill-istabbiliment tas-suq uniku Ewropew ’il hawn, l-armonizzazzjoni u r-rikonoxximent reċiproku tal-istandards ippermettew lill-kumpaniji jbigħu l-prodotti tagħhom f’suq ta’ aktar minn 450 miljun persuna. Is-suq uniku jirrappreżenta 61 % tal-kummerċ intra-UE mill-kumpaniji, u huwa l-bażi tal-prosperità ekonomika tal-Ewropa, u b’hekk jibbenefika liċ-ċittadini, lill-konsumaturi, lill-ħaddiema u lill-kumpaniji tagħha. Il-Kummissjoni Ewropea tistma li 25 % tal-prodott domestiku gross tal-UE huwa ġġenerat mis-suq intern.
Madankollu, l-iżviluppi l-ġodda, bħat-trasformazzjoni diġitali u t-tranżizzjoni lejn ekonomija inqas intensiva fil-karbonju u aktar sostenibbli, jeħtieġu aġġustamenti ġodda, kif jirrikjedu wkoll il-ħtiġijiet li qed jinbidlu tal-konsumaturi, l-impjegati u l-kumpaniji u l-kundizzjonijiet ġeopolitiċi l-ġodda.
Il-kontinwazzjoni b’suċċess tas-suq uniku teħtieġ titjib f’diversi oqsma – fost l-oħrajn fil-politika Ewropea dwar l-enerġija u l-industrija –, kif ukoll unjoni tal-enerġija, unjoni bankarja, qafas aktar favorevoli għan-negozji kbar u żgħar, aktar appoġġ pubbliku għall-proġett Ewropew, servizzi pubbliċi aktar effiċjenti u infrastruttura mtejba għall-IT, l-enerġija u t-trasport.
Fid-dawl taż-żewġ rapporti storiċi mfassla mill-Eks Prim Ministri Taljani, Enrico Letta (“Il-Futur tas-Suq Uniku”) u Mario Draghi (dwar il-futur tal-kompetittività Ewropea) u li se jiġu ppubblikati fl-ewwel nofs tal-2024, il-Grupp ta’ Min Iħaddem tal-KESE ġabar fil-qosor il-messaġġi ewlenin tiegħu għall-futur ta’ suċċess tas-suq intern tal-UE f’dokument ta’ paġna waħda dwar “Is-suq uniku tal-UE: il-ġenerazzjoni li jmiss”.
Il-5 Rapport dwar l-Iżvilupp Sostenibbli tal-Ewropa żvela li bir-ritmu attwali, l-UE mhix mistennija tilħaq terz tal-Għanijiet ta’ Żvilupp Sostenibbli (SDGs) sal-2030. Ir-rapport, li tfassal b’mod konġunt mas-soċjetà ċivili, jenfasizza l-istaġnar u r-rigressjoni fl-għanijiet ambjentali u soċjali f’ħafna pajjiżi Ewropej, u li aggravaw bil-kriżijiet li seħħew wara l-2020. L-SDGs ikopru oqsma bħalma huma t-tnaqqis tal-faqar, l-ebda ġuħ, is-saħħa, l-edukazzjoni, l-ugwaljanza bejn il-ġeneri, l-azzjoni klimatika, u l-ilma nadif.
Il-5 Rapport dwar l-Iżvilupp Sostenibbli tal-Ewropa żvela li bir-ritmu attwali, l-UE mhix mistennija tilħaq terz tal-Għanijiet ta’ Żvilupp Sostenibbli (SDGs) sal-2030. Ir-rapport, li tfassal b’mod konġunt mas-soċjetà ċivili, jenfasizza l-istaġnar u r-rigressjoni fl-għanijiet ambjentali u soċjali f’ħafna pajjiżi Ewropej, u li aggravaw bil-kriżijiet li seħħew wara l-2020. L-SDGs ikopru oqsma bħalma huma t-tnaqqis tal-faqar, l-ebda ġuħ, is-saħħa, l-edukazzjoni, l-ugwaljanza bejn il-ġeneri, l-azzjoni klimatika, u l-ilma nadif.
Biex dan jiġi indirizzat, ġew proposti għaxar azzjonijiet politiċi deċiżivi biex jiġu evitati punti kritiċi ambjentali u soċjali irriversibbli. Din l-urġenza ġiet enfasizzata matul avveniment koospitat mis-Sezzjoni għall-Agrikoltura, l-Iżvilupp Rurali u l-Ambjent (NAT) tal-Kumitat Ekonomiku u Soċjali Ewropew (KESE) u min-Network ta’ Soluzzjonijiet ta’ Żvilupp Sostenibbli tan-NU (SDSN). Ir-rapport għandu l-għan li jiggwida lill-UE biex tagħti spinta lit-tmexxija tagħha rigward l-SDGs qabel l-elezzjonijiet Ewropej ta’ Ġunju 2024 u s-Summit tal-Futur ta’ Settembru 2024 li tlaqqa’ mis-Segretarju Ġenerali tan-NU.
Fl-avveniment, il-kelliema enfasizzaw il-ħtieġa għal azzjoni minnufih qabel l-2030 biex jiġu evitati punti kritiċi irriversibbli. Camilla Brückner min-NU/UNDP, Zakia Khattabi, Ministru Federali Belġjan għall-Klima, u Petra Petan mill-Kummissjoni Ewropea, saħqu dwar l-importanza li nżommu l-impenn għall-Aġenda 2030 u l-Ftehim ta’ Pariġi dwar il-Klima.
Guillaume Lafortune, Viċi President tal-SDSN tan-NU, ippreżenta r-rapport u l-għaxar azzjonijiet prijoritarji mmirati lejn il-partiti politiċi, il-Parlament Ewropew li jmiss, il-Kummissjoni Ewropea li jmiss, il-Kunsill Ewropew, u l-Istati Membri. Is-sejħa għal azzjoni, iffirmata b’mod konġunt mill-KESE u l-SDSN, tħeġġeġ lill-mexxejja Ewropej jaħdmu flimkien għal Patt Ewropew għall-Futur li jkun ekoloġiku, soċjali u internazzjonali. Peter Schmidt, il-President tas-Sezzjoni NAT tal-KESE, enfasizza li s-sitt snin li ġejjin huma kruċjali biex jintlaħaq progress fl-Aġenda 2030, u enfasizza l-impenn tal-KESE li jħeġġeġ lill-istituzzjonijiet tal-UE favur l-SDGs u l-involviment sinifikanti tas-soċjetà ċivili. Is-sejħa għal azzjoni tinsab f’pożizzjoni li tiggwida lill-mexxejja Ewropej lejn patt Ewropew komprensiv allinjat mal-għanijiet ekoloġiċi u soċjali li l-KESE jippromovi. (ks)
Il-Kumitat Ekonomiku u Soċjali Ewropew (KESE) qed ifassal viżjoni għall-Politika Agrikola Komuni (PAK) ta’ wara l-2027 biex jiġu żgurati r-reżiljenza u s-sostenibbiltà fl-agrikoltura Ewropea. Il-KESE ngħata l-kompitu mill-Presidenza Belġjana tal-Kunsill tal-UE u abbozza Opinjoni, adottata f’Jannar, li fiha enfasizza l-ħtieġa għal qafas ta’ politika stabbli u fit-tul li jappoġġja l-produzzjoni sostenibbli tal-ikel, l-awtonomija strateġika miftuħa, u l-iżvilupp rurali.
Il-Kumitat Ekonomiku u Soċjali Ewropew (KESE) qed ifassal viżjoni għall-Politika Agrikola Komuni (PAK) ta’ wara l-2027 biex jiġu żgurati r-reżiljenza u s-sostenibbiltà fl-agrikoltura Ewropea. Il-KESE ngħata l-kompitu mill-Presidenza Belġjana tal-Kunsill tal-UE u abbozza Opinjoni, adottata f’Jannar, li fiha enfasizza l-ħtieġa għal qafas ta’ politika stabbli u fit-tul li jappoġġja l-produzzjoni sostenibbli tal-ikel, l-awtonomija strateġika miftuħa, u l-iżvilupp rurali.
B’94.8 % tal-azjendi agrikoli fl-UE li huma proprjetà tal-familja, is-settur qed jiffaċċja sfidi bħal introjti aktar baxxi, tnaqqis fl-għadd ta’ azjendi agrikoli, diffikultajiet fit-tiġdid ġenerazzjonali, u ħruġ sinifikanti tal-forza tax-xogħol. Minkejja t-tnaqqis fl-allokazzjonijiet baġitarji għall-PAK (inqas minn 25 % tal-2021), il-KESE jappella għal finanzjament tal-PAK li jkun proporzjonat mal-għanijiet ta’ sostenibbiltà tagħha. Hija rakkomandata bidla minn appoġġ bażiku għall-introjtu għal inċentivi finanzjarji għal servizzi ambjentali u soċjali, li tippermetti flessibbiltà għal azjendi agrikoli żgħar tal-familja matul perjodu ta’ tranżizzjoni.
It-tħassib dwar standards tal-għajxien ġusti għall-bdiewa tal-UE, aggravat mill-inflazzjoni, il-volatilità tas-suq tal-enerġija u t-tibdil fil-klima, jenfasizza l-ħtieġa għal riformi tal-PAK. Il-KESE jixtieq jara li dawn l-isfidi jiġu indirizzati fil-PAK ta’ wara l-2027 li għandha tiffoka fuq kundizzjonijiet tax-xogħol deċenti, tippromovi dieti aktar tajbin għas-saħħa, tnaqqas il-ħela tal-ikel, u tirregola s-swieq tal-ikel. Qed jiġu proposti komponenti kontroċikliċi u appoġġ għall-produzzjoni tal-enerġija rinnovabbli biex jittaffa l-impatt taż-żidiet fil-prezzijiet tal-enerġija u tal-interruzzjonijiet fil-provvista. L-iskemi tal-assigurazzjoni tas-sħubija pubblika-privata u l-investiment fl-innovazzjoni u fit-teknoloġiji diġitali huma miżuri ssuġġeriti biex jiġu miġġielda l-kundizzjonijiet klimatiċi estremi u l-bdiewa jiġu awtonomizzati.
Bi tħejjija għall-elezzjonijiet tal-Parlament Ewropew tal-2024, il-KESE jenfasizza l-ħtieġa li l-PAK tissawwar biex tissodisfa l-ħtiġijiet soċjetali u agrikoli li qed jevolvu. Huwa jenfasizza l-importanza tal-involviment tal-partijiet ikkonċernati, il-flessibbiltà għall-Istati Membri, u proċessi amministrattivi semplifikati fit-tfassil u l-adattament tal-pjani strateġiċi. Fl-aħħar nett, il-KESE jipprevedi PAK li ssib bilanċ bejn l-iżgurar tas-sigurtà tal-ikel, il-protezzjoni tal-ambjent u l-promozzjoni tal-benesseri tal-bdiewa Ewropej quddiem l-isfidi globali.(ks)
Bl-elezzjonijiet Ewropej f’Ġunju 2024 iwittu t-triq għall-futur tal-Ewropa, il-KESE, bħala msieħeb istituzzjonali tas-soċjetà ċivili, qed jorganizza l-ewwel Ġimgħa tas-Soċjetà Ċivili tiegħu, bit-titolu Ilkoll Flimkien għad-Demokrazija!
Bl-elezzjonijiet Ewropej f’Ġunju 2024 iwittu t-triq għall-futur tal-Ewropa, il-KESE, bħala msieħeb istituzzjonali tas-soċjetà ċivili, qed jorganizza l-ewwel Ġimgħa tas-Soċjetà Ċivili tiegħu, bit-titolu Ilkoll Flimkien għad-Demokrazija!
Se tieħu sehem?
Se niġbru flimkien nies ta’ firxa ta’ etajiet u b’varjetà ta’ sfondi, fosthom żgħażagħ, ġurnalisti, u rappreżentanti tal-istituzzjonijiet tal-UE, biex jinvolvu ruħhom f’dibattitu mqanqal dwar kwistjonijiet li jaffettwaw il-ħajja tagħna ta’ kuljum u l-futur tal-Ewropa. Se nindirizzaw id-diversi theddidiet u sfidi għall-valuri demokratiċi, kif ukoll dak li s-soċjetà ċivili tistenna mill-mexxejja futuri tal-Ewropa. Il-proposti tagħna mbagħad jiġu inkorporati fir-Riżoluzzjoni tal-KESE għall-elezzjonijiet u proposti ta’ politika speċifiċi.
#CivSocWeek se tiġbor flimkien ħames inizjattivi ewlenin tal-KESE:
Il-Ġranet tas-Soċjetà Ċivili – avveniment annwali ewlieni li jenfasizza l-firxa wiesgħa ta’ kontributi mis-soċjetà ċivili organizzata għall-bini ta’ UE li hija aktar konformi mal-aspettattivi taċ-ċittadini dwar kwistjonijiet kruċjali għas-soċjetajiet demokratiċi tagħna. L-għan huwa li jiġi mħeġġeġ involviment akbar tas-soċjetà ċivili fil-proġett Ewropew fil-livelli kollha.
Jum l-Inizjattiva taċ-Ċittadini Ewropej – konferenza annwali ta’ livell għoli, li tipprovdi forum u pjattaforma fejn organizzaturi u partijiet ikkonċernati rreġistrati u futuri tal-Inizjattiva taċ-Ċittadini Ewropej (IĊE) jistgħu jiskambjaw informazzjoni u esperjenzi u jippreżentaw l-attivitajiet tagħhom relatati mal-IĊE lill-pubbliku.
L-Ewropa Tiegħek, Leħnek avveniment taż-żgħażagħ li jgħaqqad liż-żgħażagħ, mill-Istati Membri, mill-pajjiżi kandidati u mir-Renju Unit, mal-UE, u jispirahom jeżerċitaw id-dritt demokratiku tagħhom li jivvutaw. Permezz ta’ sessjonijiet ta’ konsultazzjoni dinamiċi, il-parteċipanti żgħażagħ se jinvolvu ruħhom f’dibattiti, irawmu l-kollaborazzjoni, u jilħqu kunsens.
Premju għas-Soċjetà Ċivili – premju annwali li jippremja proġetti effettivi, innovattivi u kreattivi mmexxija mis-soċjetà ċivili u l-individwi. Din is-sena l-premju se jingħata għal inizjattivi li jappoġġjaw il-benesseri mentali fl-Ewropa fuq bażi individwali jew kollettiva.
Seminar għall-Ġurnalisti se jlaqqa’ flimkien ġurnalisti mill-Istati Membri biex jingħaqdu fid-diskussjonijiet dwar l-istat tad-demokrazija fl-Unjoni u l-elezzjonijiet Ewropej li ġejjin u biex jesperjenzaw direttament kif jaħdem il-Kumitat.
Ingħaqad magħna u ispira ruħek mill-workshops tagħna mmexxija mill-esperti u mid-dibatitti ta’ livell għoli. Semma leħnek dwar kwistjonijiet ewlenin għaċ-ċiklu leġiżlattiv il-ġdid u għamel kuntatt mal-assoċjazzjonijiet tas-soċjetà ċivili u ma’ dawk li jfasslu l-bidla minn madwar l-Ewropa kollha!
Fl-24 ta’ Jannar, is-soċjetà ċivili Ewropea bagħtet ittra miftuħa lill-Presidenti tal-Kummissjoni Ewropea u tal-Parlament Ewropew, u lill-Presidenza Belġjana tal-Kunsill tal-Unjoni Ewropea. Il-firmatarji tal-ittra ħeġġew lit-tliet istituzzjonijiet ewlenin tal-Unjoni Ewropea (UE) involuti fit-teħid ta’ deċiżjonijiet tal-UE biex jieħdu miżuri konkreti favur l-implimentazzjoni ta’ djalogu miftuħ, trasparenti u regolari mal-organizzazzjonijiet tas-soċjetà ċivili, kif stabbilit fl-Artikolu 11 tat-Trattat dwar l-Unjoni Ewropea, fl-oqsma kollha ta’ politika.
Fl-24 ta’ Jannar, is-soċjetà ċivili Ewropea bagħtet ittra miftuħa lill-Presidenti tal-Kummissjoni Ewropea u tal-Parlament Ewropew, u lill-Presidenza Belġjana tal-Kunsill tal-Unjoni Ewropea. Il-firmatarji tal-ittra ħeġġew lit-tliet istituzzjonijiet ewlenin tal-Unjoni Ewropea (UE) involuti fit-teħid ta’ deċiżjonijiet tal-UE biex jieħdu miżuri konkreti favur l-implimentazzjoni ta’ djalogu miftuħ, trasparenti u regolari mal-organizzazzjonijiet tas-soċjetà ċivili, kif stabbilit fl-Artikolu 11 tat-Trattat dwar l-Unjoni Ewropea, fl-oqsma kollha ta’ politika.
L-ittra miftuħa kienet proposta mill-Grupp tal-Organizzazzjonijiet tas-Soċjetà Ċivili tal-KESE u Civil Society Europe, u tinkludi proposti speċifiċi għall-implimentazzjoni. L-ittra kisbet l-appoġġ ta’ 156 firmatarju minn 26 Stat Membru. Il-firmatarji inkludew 39 network Ewropew, 85 organizzazzjoni nazzjonali u 60 membru tal-Grupp tal-Organizzazzjonijiet tas-Soċjetà Ċivili tal-KESE.
Id-djalogu ċivili għadu frammentat u mhux strutturat fl-istituzzjonijiet kollha tal-UE, minkejja d-dispożizzjonijiet legali. Huwa għalhekk li l-firmatarji tal-ittra miftuħa #EUCivilDialogueNow qed jitolbu lill-istituzzjonijiet tal-UE biex:
jibdew proċess għal ftehim interistituzzjonali dwar id-djalogu ċivili;
jistabbilixxu f’kull istituzzjoni pożizzjonijiet ta’ tmexxija inkarigati mir-relazzjonijiet mas-soċjetà ċivili;
jinkoraġġixxu u jippromovu kooperazzjoni akbar bejn l-atturi ċivili u soċjali.
Dawn l-isforzi jridu jibnu fuq ir-rakkomandazzjonijiet tal-Konferenza dwar il-Futur tal-Ewropa. Bħala l-ewwel pass, il-firmatarji ssuġġerew Komunikazzjoni tal-Kummissjoni Ewropea dwar it-tisħiħ tad-djalogu ċivili fil-livell tal-UE.
Is-sejħa tal-Kumitat Ekonomiku u Soċjali Ewropew għal Patt Blu tal-UE qed tikseb appoġġ minn dawk li jfasslu l-politika u mis-soċjetà ċivili. Dan il-momentum huwa xprunat minn rikonoxximent dejjem akbar tal-urġenza li tiġi indirizzata l-iskarsezza tal-ilma, u l-potenzjal tal-Patt Blu li jipprovdi soluzzjoni komprensiva.
Is-sejħa tal-Kumitat Ekonomiku u Soċjali Ewropew għal Patt Blu tal-UE qed tikseb appoġġ minn dawk li jfasslu l-politika u mis-soċjetà ċivili. Dan il-momentum huwa xprunat minn rikonoxximent dejjem akbar tal-urġenza li tiġi indirizzata l-iskarsezza tal-ilma, u l-potenzjal tal-Patt Blu li jipprovdi soluzzjoni komprensiva.
Avveniment reċenti fil-Kumitat Ekonomiku u Soċjali Ewropew (KESE) laqqa’ flimkien partijiet ikkonċernati ewlenin biex jiddiskutu l-Patt Blu u l-potenzjal tiegħu li jittrasforma l-prattiki tal-ġestjoni tal-ilma madwar il-kontinent, b’enfasi fuq il-baċiri tax-xmajjar.
“Qed niffaċċjaw kriżi tal-ilma ta’ proporzjonijiet bla preċedent”, qal il-President tal-KESE Oliver Röpke. B’referenza għall-elezzjonijiet Ewropej li ġejjin f’Ġunju, huwa nnota li l-ilma huwa suġġett li jikkonċerna lil kull ċittadin. “Dawk li jieħdu d-deċiżjonijiet fl-UE kif se jindirizzaw il-kwistjoni tal-ilma u l-isfidi li għandna quddiemna? Wasal iż-żmien li nistaqsu dawn il-mistoqsijiet”.
L-MEP Pernille Weiss, fl-istess ħin li tenniet is-sejħiet għal soluzzjoni komprensiva, irrakkomandat fond iddedikat għat-tranżizzjoni tal-ilma biex jappoġġja lin-negozji u lill-komunitajiet fit-tranżizzjoni lejn prattiki tal-ilma sostenibbli. Ir-Rapporteur Speċjali tan-NU Pedro Arrojo-Agudo enfasizza li l-iskarsezza tal-ilma u t-tibdil fil-klima ma jagħfu bl-ebda fruntieri, u appella lill-UE biex tkun minn ta’ quddiem biex issib soluzzjoni globali għall-kriżi tal-ilma.
Is-sejħa tal-KESE għal Patt Blu tal-UE ntlaqgħet minn firxa wiesgħa ta’ partijiet ikkonċernati, fosthom il-Compagnie Nationale du Rhône (CNR), kumpanija Franċiża ta’ interess pubbliku li tamministra x-xmara Rhône. Id-Direttur tar-Riżorsi tal-Ilma tas-CNR, Eric Divet, wera r-riżultati pożittivi tal-kumpanija fil-ġestjoni sostenibbli tal-ilma, inklużi l-isforzi li jiġu restawrati l-artijiet mistagħdra, li titjieb il-bijodiversità tax-xmajjar u li jsir adattament għat-tibdil fil-klima.
Il-Kummissjoni Ewropea mistennija tiżvela l-inizjattiva tagħha dwar ir-reżiljenza tal-ilma fix-xhur li ġejjin. Il-KESE jinsab lest li jikkollabora mal-istituzzjonijiet u l-partijiet ikkonċernati tal-UE biex jiżgura li l-proposti tiegħu għal Patt Blu tal-UE jkunu parti mill-prijoritajiet tal-Kummissjoni Ewropea li jmiss. (gb)
L-applikazzjonijiet għal avvenimenti tal-imsieħba jiftħu bejn l-4 u s-17 ta’ Marzu, b’avvenimenti li se jsiru bejn d-29 ta’ Mejju u l-1 ta’ Settembru.
Kull sena, il-Ġimgħa Ekoloġika tal-UE tkun akkumpanjata minn mijiet ta’ avvenimenti tal-imsieħba madwar l-Ewropa u lil hinn minnha, organizzati minn diversi istituzzjonijiet, NGOs, rappreżentanti tan-negozju, akkademiċi, skejjel, u amministrazzjonijiet lokali, reġjonali u nazzjonali, fost ħafna oħrajn.
It-tema tal-avvenimenti tal-imsieħba fl-2024 se tkun ir-reżiljenza tal-ilma. L-objettiv huwa li tiġi stimulata konverżazzjoni madwar l-UE kollha dwar il-preżent u l-futur tal-ilma tal-UE, b’enfasi fuq it-trawwim tas-sensibilizzazzjoni u l-promozzjoni ta’ soluzzjonijiet pożittivi u kollaborattivi.
Kull tip ta’ avveniment merħba bih, minn workshops u diskussjonijiet pubbliċi għal wirjiet u avvenimenti ta’ sensibilizzazzjoni għall-familji. L-attivitajiet jistgħu jsiru fil-livell lokali, reġjonali, nazzjonali jew Ewropew. Aktar informazzjoni u skeda ta’ żmien huma disponibbli hawnhekk.
Peress li l-Patt Blu tal-UE huwa waħda mill-inizjattivi ewlenin tal-KESE, l-għażla ta’ din it-tema għall-avvenimenti tal-imsieħba tippreżenta okkażjoni tajba biex jiġu kkomunikati l-proposti ppreżentati fid-Dikjarazzjoni dwar il-Patt Blu tal-UE ta’ Ottubru 2023, li tappella għal strateġija ġdida u ambizzjuża dwar l-ilma għall-Ewropa, fuq l-istess livell mal-Patt Ekoloġiku tal-UE. (gb)
L-Ewropa qed taqa’ lura fil-kompetittività u jeħtieġ li tindirizza n-nuqqasijiet tas-suq uniku tagħha b’mod urġenti, iżda b’mod li jkun ta’ benefiċċju kemm għan-negozji kif ukoll għall-Ewropej.
L-Ewropa qed taqa’ lura fil-kompetittività u jeħtieġ li tindirizza n-nuqqasijiet tas-suq uniku tagħha b’mod urġenti, iżda b’mod li jkun ta’ benefiċċju kemm għan-negozji kif ukoll għall-Ewropej.
Fil-plenarja ta’ Jannar tal-KESE ġie organizzat dibattitu dwar il-kompetittività Ewropea u l-futur tas-suq intern. L-Opinjoni tal-KESE fiċ-ċentru ta’ dan id-dibattitu ntalbet mill-Presidenza Belġjana tal-UE, li wiegħdet li tuża s-sitt xhur tagħha biex tiffoka fuq il-kompetittività u s-suq uniku. L-Opinjoni ser tgħin ukoll fit-tfassil tar-rapport ta’ livell għoli ta’Enrico Letta dwar il-futur tas-suq uniku, li se jiġi ppreżentat lill-Kunsill Ewropew f’Marzu.
Fiha l-KESE jenfasizza li s-suq intern jeħtieġ li jlaħħaq mal-isfidi ta’ dinja differenti ħafna minn dik li nħoloq għaliha fis-snin disgħin tas-seklu l-ieħor. B’riżultat ta’ dan, l-UE qed tiffaċċja pressjonijiet multipli: li jinżammu kundizzjonijiet ekwivalenti ta' kompetizzjoni filwaqt li jiġu sussidjati l-industrija tagħha sabiex tgħin fil-finanzjament tat-tranżizzjoni ekoloġika; li jinżammu l-impjiegi fl-Ewropa filwaqt li jiġi żgurat li n-negozji tal-UE jibqgħu kompetittivi; u li tiġi żgurata l-materja prima filwaqt li jitħarsu l-istandards tax-xogħol u dawk ambjentali.
Ir-relatur Sandra Parthie qalet: “Is-suq uniku għen sabiex l-UE ssir wieħed mill-aktar blokk kummerċjali b’saħħtu fid-dinja, madankollu, din il-pożizzjoni b’saħħitha qed tmajna. Fl-Opinjoni tagħna nipproponu li jkun hemm enfasi fuq l-iżvilupp ta’ politika industrijali Ewropea li ma tkunx ir-riżultat ta’ 28 politika industrijali nazzjonali, iżda pjuttost perspettiva verament Ewropea tal-potenzjal industrijali tagħna”.
Markus Beyrer, Direttur Ġenerali ta’ Business Europe, tkellem waqt id-dibattitu, u qal: “Għandna problema bil-kompetittività. Qed noqogħdu lura meta mqabbla mal-kompetituri globali tagħna, u s-suq uniku huwa wieħed mill-għodod disponibbli għalina biex dan jiġi rimedjat. L-għan huwa li nipproduċu l-marġni li għandna bżonn biex nalimentaw il-mudell Ewropew kif nafuh, inklużi l-aspetti soċjali”.
Ludovic Voet, Segretarju Konfederali tal-Konfederazzjoni Ewropea tat-Trade Unions (ETUC), enfasizza li l-kuntratt soċjali Ewropew huwa l-bażi tas-suq uniku u li dan il-kuntratt jeħtieġ li jissaħħaħ, u qal: “Fis-sistema kompetittiva tagħna, in-negozji jeħtieġ li jħallsu salarji ġusti, joffru impjiegi tajbin u ma jagħmlux ħsara lill-ambjent. L-Ewropa trid iżżomm il-momentum għal tranżizzjoni ekoloġika ġusta”.
L-Opinjoni tal-KESE tinkludi proposta biex jinħatar Kummissarju għas-servizzi ta’ interess ekonomiku ġenerali fil-Kummissjoni li jmiss, bi pjan ta’ ħames snin għall-iżvilupp ta’ servizzi ta’ interess ekonomiku ġenerali siguri, ta’ kwalità tajba u sostenibbli. Dawn jammontaw għal 25% tal-PDG tal-UE u 20% tal-impjiegi totali, u jkopru setturi ewlenin bħat-trasport, l-enerġija, il-komunikazzjonijiet, l-aċċess għall-ilma u s-sanità. Madankollu, huma importanti ħafna wkoll fil-kura tas-saħħa u fis-servizzi soċjali. (dm)
