Il-mistieden sorpriża

Kull xahar, aħna nistednukom tiskopru personalità li ħidmietha u l-impenn tagħha huma ta’ ispirazzjoni għal ħafna nies.

Għall-edizzjoni ta’ Settembru stedinna lil Sébastien Maillard, id-direttur tal-Fondazzjoni Jacques Delors f’Pariġi. Huwa jaqsam magħna l-fehim tiegħu tal-kunċett ta’ “sħubija Ewropea”, li huwa partikolarment importanti f’dan il-perjodu ta’ dibattitu dwar il-futur tal-Ewropa, li l-quċċata tiegħu ser tkun il-Presidenza Franċiża fl-ewwel nofs tal-2022.

Sébastien Maillard huwa d-direttur tal-Istitut Jacques Delors f’Pariġi. B’tim ta’ 20 impjegat, dan il-grupp ta’ riflessjoni janalizza kwistjonijiet Ewropej u jfassal ideat operazzjonali għall-avvanz tal-integrazzjoni Ewropea f’diversi setturi ewlenin, flimkien mal-imsieħba tiegħu f’Berlin u Brussell. L-akkademja tiegħu, l-Académie Notre Europe, tissensibilizza persuni bejn 18 u 30 sena dwar kwistjonijiet Ewropej.

Sébastien Maillard, wara karriera bħala ġurnalist mal-gazzetta La Croix issieħeb mal-grupp ta’ riflessjoni li twaqqaf minn Jacques Delors, president anzjan tal-Kummissjoni Ewropea. Huwa kien il-korrispondent fi Brussell (2007-2010) u f’Ruma (2013-2016), fejn kien kodiriġent tas-servizz internazzjonali u fl-2017 segwa mill-qrib il-kampanja ta’ Emmanuel Macron. Speċjalista fl-affarijiet Ewropej, li għallem fis-Sciences Po f’Pariġi u għal Boston College, huwa kkollabora wkoll ma’ TheWorldPost, The German Times u ġurnali oħra. Huwa membru ta’ diversi organizzazzjonijiet Ewropej (Moviment Ewropew, Robert Schuman House, Dar l-Ewropa). Huwa l-awtur ta’ “Qu’avons-nous fait de l’Europe?” (X’għamilna bl-Ewropa?), 2013, b’daħla ta’ Jacques Delors, u ktieb ta’ intervisti ma’ Enrico Letta, "Faire l’Europe dans un monde de brutes” (Nagħmlu l-Ewropa f’dinja ta’ slavaġġ), 2017, ippubblikat fl-2019 u tradott f’diversi lingwi. (ehp)