KESE info

Jayant Narayan, mill-Forum Ekonomiku Dinji enfasizza din iċ-ċifra f’dibattitu dwar l-Intelliġenza Artifiċjali (IA) fis-sessjoni plenarja ta’ Lulju tal-Kumitat Ekonomiku u Soċjali Ewropew, fejn qal li biex tikkompeti l-Ewropa jeħtieġ li tinvesti f’azzjonijiet għall-perjodu ta' żmien medju sal-perjodu fit-tul biex tinħoloq ekosistema fejn l-IA tista’ tirnexxi.

L-aħħar sessjoni plenarja tal-KESE qabel il-waqfa tas-sajf inkludiet dibattitu dwar l-Intelliġenza Artifiċjali u l-valuri reali: il-futur diġitali tagħna ma’ Jayant Narayan, uffiċjal ewlieni tal-Global AI Alliance tal-Forum Ekonomiku Dinji.

B’enfasi fuq l-isfidi li qed jiffaċċjaw dawk l-SMEs li qed ifittxu li jintroduċu l-IA, Jayant Narayan enfasizza li filwaqt li kienu qed jibdew ifiġġu soluzzjonijiet ġodda bħall-IA bla kodiċi, li tippermetti lill-kumpaniji u lill-individwi jaħdmu fuq soluzzjonijiet tal-IA mingħajr ma jkollhom impjegati magħhom xjenzjati tad-data bit-taħriġ kollu li jeħtieġu, dawn mhumiex xi soluzzjoni maġika. Jeħtieġ ukoll li jkun hemm fokus fuq perjodu ta’ żmien medju sa twil fuq l-awtonomizzazzjoni tal-SMEs biex jiżviluppaw il-kapaċità lokali u interna meħtieġa biex jintroduċu l-IA. Huwa f’dan ir-rigward fejn toħroġ l-importanza ta’ aspetti essenzjali bħalma huma l-ħiliet, li, fil-każ tal-IA u x-xjenza tad-data, ma jistgħux jiġu żviluppati mil-lum għall-għada. Il-finanzjament u l-appoġġ għall-innovazzjoni jaqdu rwol ewlieni f’dan il-proċess.

Meta ġie mistoqsi għaliex l-Ewropa kienet għadha lura meta mqabbla mal-Istati Uniti u ċ-Ċina, is-Sur Narayan qal li filwaqt li kien hemm diversi raġunijiet għal dan, l-appoġġ u l-finanzjament mill-gvern kellhom rwol ewlieni, mit-twaqqif ta’ Silicon Valley sal-approvazzjoni bipartiġjana tal-Att reċenti dwar l-Innovazzjoni u l-Kompetizzjoni, li jinvolvi nfiq ta’ USD 250 biljun fuq it-teknoloġija u l-innovazzjoni.

“Dak il-finanzjament joħloq it-tip ta’ suq fejn il-biċċa l-kbira tar-riċerkaturi u x-xjenzjati tad-data tagħkom jispiċċaw imorru wkoll. U din mhijiex soluzzjoni fuq terminu qasir, iżda pjuttost hija perspettiva għall-perjodu ta’ żmien medju sa dak twil biex tinħoloq ekosistema fejn ma tiġġenerax biss valur lokali, iżda tkun int ukoll li jkollok pożizzjoni fuq quddiem”. Huwa kkwota studji reċenti li juru li filwaqt li 18% tax-xjenzati tal-IA tal-ogħla livell fid-dinja huma Ewropej, fl-Ewropa jaħdmu biss 10%.

Is-Sur Narayan indirizza wkoll il-kwistjoni tal-IA u s-soċjetà ċivili u jekk l-iżvilupp tal-IA kienx tabilħaqq għal kulħadd jew kienx pjuttost qed jaqdi l-interessi ta’ ċerti gruppi.

Filwaqt li kkwota studji li juru li bejn 30 u 40% tad-dħul reċenti ta’ Amazon wasal permezz ta’ rakkomandazzjonijiet xprunati mill-IA lill-konsumaturi, is-Sur Narayan enfasizza li l-IA hija tabilħaqq mifruxa ħafna, u li din kienet ir-raġuni għaliex ir-robustezza, l-ispjegabbiltà, il-fiduċja u t-trasparenza huma tant essenzjali. Kien qed isir progress dwar l-ispjegabbiltà u s-sikurezza, iżda permezz ta’ soluzzjonijiet mill-aktar avvanzati li mhux kulħadd jista’ jkun mistenni li jkollu aċċess għalihom.

Filwaqt li ma kien hemm l-ebda nuqqas ta’ prinċipji “disponibbli”, huwa qal li l-akbar tħassib huwa jekk dawn humiex verament qed jiġu implimentati fil-prattika u jekk l-interessi tas-soċjetà ċivili humiex qed jiġu salvagwardjati. Huwa bassar li l-progress fl-implimentazzjoni se jiġi minn taħlita ta’ regolamentazzjoni tas-settur pubbliku u oqfsa tal-industrija. Permezz tad-djalogu bejn l-industrija u r-regolaturi l-affarijiet se jevolvu, possibbilment jilħqu punt fejn l-industrija tibda tieħu azzjoni anke fuq bażi volontarja.

L-Opinjoni tal-KESE dwar l-involviment strutturat taż-żgħażagħ fir-rigward tal-klima u s-sostenibbiltà fil-proċess tat-teħid tad-deċiżjonijiet tal-UE pproponiet l-istabbiliment ta’ Round Table taż-Żgħażagħ dwar il-Klima u s-Sostenibbiltà, li tkun ospitata mill-KESE flimkien mal-Kummissjoni Ewropea, il-Parlament Ewropew u l-organizzazzjonijiet taż-żgħażagħ.

Il-Kummissjoni laqgħet l-inizjattiva bħala għodda utli biex jissaħħaħ ir-rwol konsultattiv tal-KESE u biex il-ġenerazzjoni żagħżugħa tingħata opportunità biex tikkondividi l-fehmiet tagħha dwar il-Patt Ekoloġiku Ewropew. L-ewwel laqgħa, bi 11-il rappreżentant taż-żgħażagħ, saret fit-13 ta’ Lulju 2021, bil-parteċipazzjoni tal-Viċi President Eżekuttiv Frans Timmermans.

“Grazzi għalikom, is-sens ta’ urġenza fil-popolazzjoni tagħna huwa akbar. Ilkoll kemm aħna rridu naħdmu bla ma nistennew li dan ikun għall-benefiċċju tagħna stess, iżda pjuttost għal dak tal-ġenerazzjonijiet futuri. Xi wħud minnkom jistgħu jaħsbu li mhux qed nagħmlu biżżejjed, iżda nwiegħed li qed nagħmel l-almu tiegħi sa fejn nista’, u nittama li nistgħu nsibu xi bażi komuni biex niġġieldu għas-sewwa”, enfasizza l-Viċi President Timmermans.

Matul il-laqgħa, ir-rappreżentanti żgħażagħ ippreżentaw lis-Sur Timmermans dokument, li ngħata bidu minn Generation Climate Europe u l-Forum Ewropew taż-Żgħażagħ, bi proposti speċifiċi b’rabta mas-sistema ekonomika tal-UE, inkluż il-ġestjoni tal-UE tar-riżorsi naturali u l-indikaturi tal-progress.

Cillian Lohan, Viċi President tal-KESE kkonkluda: “Din hija opportunità ta’ darba f’ġenerazzjoni biex jiġu indirizzati l-inugwaljanzi sistemiċi u ssir tranżizzjoni lil hinn minn prattiki li mhumiex sostenibbli. Madankollu, iż-żgħażagħ jeħtieġu appoġġ. L-ekosistema tal-attiviżmu teħtieġ l-inkoraġġiment, in-nutrizzjoni, u l-ispazju reali fl-arena politika tal-UE. L-ispazji għad-djalogu huma ta’ valur biss jekk jiġu segwiti bl-azzjoni. Ejja nagħmlu dan flimkien!” (mr)

Il-prosperità ekonomika, il-kura tal-ambjent u l-benesseri tan-nies jistgħu u għandhom jimxu id f’id. Dan kien il-messaġġ ewlieni tal-President tal-KESE, Christa Schweng, fid-dibattitu dwar “L-ekonomija wara l-COVID għal kulħadd – Lejn ekonomija ta’ benesseri?”, waqt is-sessjoni plenarja tal-KESE fis-7 ta’ Lulju 2021.

Is-Sinjura Schweng qalet li fil-futur jidher ċar li se jkollna bżonn nissorveljaw u napprezzaw aspetti oħrajn minbarra dwak riflessi fil-PDG: "Aspetti bħal saħħitna, in-natura tagħna, l-edukazzjoni tagħna, il-kapaċità tagħna ta’ innovazzjoni, u l-importanza tal-komunitajiet tagħna."

B’referenza għal “kombinament tal-idea ta’ prosperità mal-possibbiltà ta’ progress soċjali fuq skala dinjija”, bl-Għanijiet ta’ Żvilupp Sostenibbli 2030 bħala l-pedament, is-Sinjura Schweng żiedet tgħid: “Wasal iż-żmien biex l-UE taħdem fuq strateġija komprensiva: il-KESE jinsab lest joffri l-appoġġ għar-riflessjoni dwar il-pedamenti għall-ekonomija ta’ wara l-COVID, ekonomija li hi tajba għal kulħadd u tinkludi indikaturi ġodda tal-prestazzjoni ekonomika u l-progress soċjali li jistgħu jagħtu stampa komprensiva tal-benesseri tan-nies.”

Peter Schmidt, president tas-Sezzjoni għall-Agrikoltura, l-Iżvilupp Rurali u l-Ambjent (NAT) u relatur għall-Opinjoni dwar L-ekonomija sostenibbli li neħtieġu, irrimarka li ekonomija ta’ benesseri hija bbażata fuq servizz liċ-ċittadini u li l-UE għandha taħtaf l-opportunità li ġabet magħha l-pandemija biex tirrifletti dwar id-dgħufijiet tagħna u tressaq proposti. (mp)

Strateġija ta’ finanzjament li tiffunzjona sew hija fundamentali biex jinġabru l-fondi meħtieġa għall-irkupru tal-Unjoni Ewropea fis-swieq kapitali internazzjonali. Fl-Opinjoni tiegħu, mfassla mir-relatur Judith Vorbach u adottata fis-sessjoni plenarja ta’ Lulju, il-Kumitat enfasizza li l-implimentazzjoni bla xkiel ta’ NextGenerationEU teħtieġ finanzjament sod u sostenibbli, flimkien ma’ ġestjoni tar-riskju solida u spejjeż tas-self baxxi.

Is-Sinjura Vorbach tkellmet waqt id-dibattitu u sostniet li: “Is-self fl-ambitu ta’ NextGenerationEU għandu jkun ibbażata fuq il-kontroll demokratiku, il-leġittimità u t-trasparenza. Strateġija ta’ finanzjament effettiva li tkun magħmulha minn finanzjament stabbli u sostenibbli, ġestjoni tar-riskju soda kif ukoll affidabbiltà kreditizja għolja u spejjeż tas-self baxxi, hija fl-interess pubbliku, u speċjalment fl-interess tas-soċjetà ċivili li fl-aħħar mill-aħħar iġġorr ir-riskji tas-suq”.

Skont il-KESE, l-għażla tal-Kummissjoni Ewropea li ssaħħaħ il-kompetenzi tagħha u r-riżorsi umani sabiex tiġġestixxi l-finanzjament ta’ NextGenerationEU hija aħbar tajba. Minħabba l-interess pubbliku qawwi fil-finanzjament sod, huwa importanti li l-istrateġija tiġi ġestita direttament mill-Kummissjoni u ma tiġix esternalizzata. Il-KESE jappella għal bilanċ bejn il-ġeneri fil-ħatra tal-persunal li se jkun responsabbli għal dan il-kompitu.

Il-Kumitat jappella wkoll għall-istabbiliment ta’ bord konsultattiv, li fih ikunu rappreżentati l-Kummissjoni, il-Parlament Ewropew, il-Kunsill, l-imsieħba soċjali u s-soċjetà ċivili organizzata. (mp)

L-aħħar inizjattivi tal-Kummissjoni dwar id-drittijiet tat-tfal jitolbu lil dawk li jfasslu l-politika fil-livell Ewropew u nazzjonali biex jaħdmu lejn il-ġid komuni tat-tfal kollha li qed jitrabbew fl-UE. Iż-żewġ inizjattivi huma ambizzjużi u kuraġġużi fl-approċċ tagħhom biex jiżguraw ħajja ħielsa minn kwalunkwe diskriminazzjoni għal kull tifel u tifla u ġew approvati mill-KESE.

Il-Kumitat Ekonomiku u Soċjali Ewropew (KESE) appoġġa l-Strateġija tal-UE dwar id-drittijiet tat-tfal u l-Proposta għal Rakkomandazzjoni tal-Kunsill li tistabbilixxi Garanzija għat-Tfal tal-UE legalment vinkolanti. Il-KESE jemmen li l-implimentazzjoni ta’ dawn l-inizjattivi se tappoġġja l-isforzi fil-livell tal-UE u dak nazzjonali biex jiġi promoss il-benesseri tat-tfal u jitnaqqas il-faqar fost it-tfal.

Fl-Opinjoni dwar Garanzija Ewropea għat-Tfal, adottata fis-sessjoni plenarja ta’ Lulju, il-KESE enfasizza li l-ġlieda kontra l-faqar fost it-tfal, id-diskriminazzjoni, id-deprivazzjoni u l-esklużjoni soċjali tirrikjedi approċċ ikkoordinat fil-livell Ewropew u min-naħa tas-soċjetà kollha, li jiżgura li d-drittijiet tat-tfal jiġu integrati f’politiki differenti u li dawn il-politiki jkollhom effetti abilitanti u dejjiema fuq is-saħħa u l-benesseri tat-tfal.

“Iċ-ċifra ta’ tifel jew tifla minn kull erbat itfal madwar l-UE li qed jitrabbew fir-riskju tal-faqar mhijiex aċċettabbli. Għandna bżonn politiki u oqfsa legali b’saħħithom biex inkissru ċ-ċiklu spiss interġenerazzjonali tal-iżvantaġġ u nreġġgħu lura din ix-xejra. Jeħtieġ li jkollna mira ambizzjuża intiża li toħroġ lit-tfal kollha mill-faqar sal-2030 u mhux biss ħames miljun tifel u tifla, li hija l-mira tal-faqar attwali taħt il-Pilastru Ewropew tad-Drittijiet Soċjali (EPSR),” stqarret ir-relatur tal-Opinjoni, Kinga Joó.

It-tfal jeħtieġu attenzjoni mis-saffi kollha tas-soċjetà. Il-konsolidazzjoni tad-drittijiet tagħhom għandha tkun prijorità għall-UE. Għal dan il-għan, neħtieġu strateġija inklużiva, trasversali u intersezzjonali, politika ġenwina bbażata fuq l-ekwità, biex niżguraw opportunitajiet indaqs u inklużjoni għat-tfal kollha, irrispettivament miċ-ċirkostanzi tagħhom,” qalet il-korelatur Maria del Carmen Barrera Chamorro.

Skont id-data tal-Eurostat għall-2019, 18-il miljun tifel u tifla, jew 22,2 %, kienu qed jikbru f’riskju ta’ faqar u esklużjoni soċjali fl-UE. Il-faqar diġitali u enerġetiku huwa daqstant detrimntali għat-tfal u fil-fehma tal-KESE għandu jiġi indirizzat ukoll fi ħdan il-Garanzija għat-Tfal. Madwar 5,4 % tat-tfal tal-età tal-iskola fl-Ewropa jgħixu f’unitajiet domestiċi li ma jistgħux jaffordjaw kompjuter jew konnessjoni tal-internet. Madwar 25 % taċ-ċittadini Ewropej jgħixu f’unitajiet domestiċi foqra fl-enerġija u dan jaffettwa wkoll il-kwalità tal-ħajja u tas-saħħa tat-tfal.

Biex it-tfal Ewropej jinħarġu mill-faqar, il-KESE jirrakkomanda li l-Istati Membri kollha jallokaw tal-anqas 5 % tal-fondi tal-FSE+ għal dan il-għan. Skont ir-regolament il-ġdid, huma biss dawk l-Istati Membri li fihom il-faqar fost it-tfal jaqbeż il-medja tal-UE ta’ 23,4 % li huma meħtieġa jallokaw dan il-perċentwal tar-riżorsi finanzjarji tal-FSE + tagħhom biex jiġġielduh. S’issa, 11-il pajjiż biss għamlu dan. (ll)

In-nies għandhom igawdu r-rata lokali meta jużaw il-mobiles tagħhom kull fejn ikunu fl-UE, sostna l-Kumitat Ekonomiku u Soċjali Ewropew f’Opinjoni li ġiet adottata dan l-aħħar dwar ir-rieżami propost tar-regoli tal-UE dwar ir-roaming.

Fil-fehma tal-KESE, l-għan tal-UE fir-regolamentazzjoni tas-servizzi tar-roaming għandu jkun li tinħoloq żona tariffarja unika, li toffri konsum għat-telefonati u d-data bir-rati lokali għan-nies kollha li jkollhom abbonament tal-mobile fl-Ewropa, bl-istess veloċità u aċċess għall-infrastruttura irrispettivament mill-pajjiż minn fejn issir it-telefonata jew il-pajjiż fejn persuna tirċievi t-telefonata.

Filwaqt li jilqa’ r-rieżami dwar ir-Regolament dwar ir-roaming propost mill-Kummissjoni Ewropea u l-għanijiet tiegħu bħala pass pożittiv fid-direzzjoni t-tajba, il-KESE jemmen li għandu jiġi stabbilit objettiv aktar ambizzjuż.

“L-idea li fuqha hija bbażata l-proposta tal-Kummissjoni hija li s-servizzi tar-roaming għandhom jiġu pprovduti bl-istess kundizzjonijiet li japplikaw fil-pajjiż tal-individwu, mingħajr ebda restrizzjoni għall-aċċess. Din hija proposta tajba”, qal Christophe Lefèvre, ir-relatur tal-Opinjoni tal-KESE li ġiet adottata fis-sessjoni plenarja ta’ Lulju. “Madankollu, nemmnu li għandna mmorru lil hinn mill-kundizzjonijiet u niżguraw li l-persuni fl-Ewropa ma għandhomx għalfejn iħallsu aktar għall-komunikazzjonijiet tal-mobile meta huma jsiefru”.

Il-KESE jenfasizza wkoll li mhuwiex biżżejjed li jiġi stipulat li, meta kwalità jew veloċitajiet simili jkunu disponibbli fuq network ta’ Stat Membru ieħor, l-operatur domestiku ma għandux deliberatament jipprovdi servizz tar-roaming ta’ kwalità inferjuri. Dan ifisser li, pereżempju, jekk konsumatur għandu konnettività tal-4G f’pajjiżu, ma għandux jiġi mġiegħel juża t-3G meta jkun qiegħed roaming meta l-4G ikun disponibbli fil-pajjiż fejn il-konsumatur qiegħed iżur.

Parti mill-problema hija infrastruttura lokali fqira, u huwa għalhekk li l-UE għandha tkun lesta li tinvesti f’infrastruttura sabiex timla l-lakuni eżistenti u tiżgura li ma jkun hemm l-ebda “żona bajda”, jiġifieri reġjuni li ma għandhomx kopertura adegwata tal-internet bil-broadband, li ħafna minnhom jinsabu f’żoni rurali u li jiskoraġġixxu r-residenti u n-negozji potenzjali.

Barra minn hekk, il-KESE jinsisti fuq il-ħtieġa li jiġi mitlub li jintbagħtu twissijiet multipli lill-konsumaturi sabiex dawn jiġu protetti minn ħasdiet bil-kont. Meta l-konsumaturi jkunu qed joqorbu lejn il-limiti tal-abbonamenti tagħhom, l-operatur għandu jibqa’ jwissi lill-konsumaturi kull darba li jiġi kkunsmat il-volum stabbilit fit-twissija preċedenti, b’mod partikolari waqt l-istess telefonata jew sessjoni ta’ użu tad-data.

Fl-aħħar nett, il-KESE jirrimarka li l-kwistjoni tal-użu ġust hija kruċjali. Għalkemm il-kuntratti kollha tal-komunikazzjoni mobbli jsemmu użu ġust b’rabta mar-roaming, il-KESE jiddispjaċih li r-Regolament jonqos milli jiddefinixxih. Bil-pandemija tal-COVID-19, in-nies saru jiddependu ħafna fuq l-attivitajiet online u l-użu ġust ħa tifsira kompletament ġdida. Il-KESE jsostni li dan huwa sinifikanti għal studenti tal-Erasmus li jattendu università barra minn pajjiżhom, li jsegwu lezzjonijiet fuq Teams, Zoom jew fuq xi pjattaforma oħra. Dawn l-applikazzjonijiet jużaw ħafna data, u għalhekk l-istudenti malajr jilħqu l-limitu massimu tagħhom ta’ kull xahar. Ikun ġust li l-persuni f’sitwazzjoni simili jkollhom l-istess limitu fil-pajjiż fejn ikunu qegħdin iżuru daqs kemm għandhom f’pajjiżhom. (dm)

L-istrateġija kummerċjali l-ġdida mnedija mill-Kummissjoni toffri prinċipji ta’ impenn li se jappoġġjaw lill-UE fil-kisba tal-objettivi tal-politika interna u esterna. Barra minn hekk, il-modernizzazzjoni tal-Organizzazzjoni Dinjija tal-Kummerċ (WTO) se tkun fundamentali biex jinkisbu riżultati għall-ġenerazzjonijiet futuri.

“Jeħtieġ li jkollna approċċ ċar, inkunu miftuħa u assertivi, sabiex intejbu l-involviment tal-partijiet interessati fil-politika kummerċjali peress li n-narattiva tal-kummerċ internazzjonali qiegħda tinbidel”, qal Timo Vuori, relatur tal-Opinjoni tal-KESE dwar ir-rieżami tal-politika kummerċjali.

Issa huwa ż-żmien li l-Ewropa twarrab l-inġenwità u tadotta profil aktar assertiv meta l-UE tiddefendi b’mod unilaterali l-valuri u l-impenji kummerċjali proprji. Fejn id-WTO ma tistax taġixxi jew twettaq bis-sħiħ, l-UE għandha tkun tista’ sserraħ fuq firxa wiesgħa ta’ Ftehimiet ta’ Kummerċ Ħieles li jirriflettu l-prinċipji Ewropej u l-istandards internazzjonali kondiviżi ma’ ekonomiji ewlenin u emerġenti fil-kummerċ internazzjonali.

Kif isostni l-korelatur tal-Opinjoni, Christophe Quarez, “Il-ħidma kollha jeħtieġ li titqiegħed fil-kuntest tal-multilateriżmu u r-riforma tad-WTO”.

Il-KESE jaqbel li l-modernizzar tad-WTO hija prijorità ewlenija. L-UE jeħtiġilha għalhekk tieħu rwol ta’ tmexxija fir-riformi ambizzjużi tad-WTO billi tkisser it-tabùs dwar l-aspetti soċjali u klimatiċi tal-kummerċ.

Politika kummerċjali li tagħti riżultati lin-nies

Il-KESE jilqa’ l-aġenda tal-kummerċ, li twieġeb għal uħud mit-tħassib tal-partijiet interessati. Madankollu, hija ma tqisx sew kif jista’ jittejjeb l-involviment tas-soċjetà ċivili.

Il-Kumitat jenfasizza l-ħtieġa ta’ kooperazzjoni kontinwa mas-soċjetà ċivili fil-livell nazzjonali u tal-UE, u li jiġi żgurat li l-politika kummerċjali żżid il-valur għall-ħajja tagħna ta’ kuljum.

Is-soċjetà ċivili saret imsieħeb attiv fil-politika kummerċjali, mit-tfassil sal-monitoraġġ tal-għodod u l-ftehimiet kummerċjali.

Il-KESE jappoġġja bis-sħiħ li l-UE jkollha rwol attiv fit-tfassil tar-regoli globali għal kummerċ aktar sostenibbli u ġust li jwassal għal prosperità u sigurtà mhux biss għall-imsieħba kummerċjali iżda wkoll għall-pajjiżi u l-poplu tagħhom. (at)

Din l-ewwel laqgħa bejn il-Kunsill Ekonomiku u Soċjali tal-Arġentina u l-KESE, organizzata mis-Sezzjoni REX, tmexxiet minn Christa Schweng, il-President tal-KESE, u Gustavo Beliz, il-President tal-Kunsill Ekonomiku u Soċjali tal-Arġentina.

Fil-kummenti tal-ftuħ tiegħu, il-President tal-Kunsill Ekonomiku u Soċjali tal-Arġentina, Gustavo Beliz, ġabar fil-qosor l-ewwel mitt jum tal-Kunsill Ekonomiku u Soċjali li għadu kif ġie stabbilit u qal:

“Fil-kunsill tagħna, inlaqqgħu flimkien nies b’fehmiet differenti ħafna, inklużi fehmiet ideoloġiċi differenti ferm, esperjenzi tal-ħajja tassew diversi u firxa wiesgħa ta’ sfondi soċjali. Din id-diversità hija l-akbar assi tal-kunsill. F’dawn l-ewwel mitt jum, urejna rispett kbir u impenjajna ruħna bis-sħiħ fil-ħidma tagħna. Nixtiequ nkomplu f’dan l-ispirtu flimkien mal-KESE, u għalhekk ninsabu verament kuntenti li għandna din l-opportunità.”

Christa Schweng, il-President tal-KESE, ferħet lill-Arġentina għat-twaqqif ta’ istituzzjoni li tippermetti lill-organizzazzjonijiet tas-soċjetà ċivili jesprimu l-fehmiet tagħhom u jressqu proposti ta’ politika. “Ninsabu kuntenti ferm dwar il-fatt li l-Arġentina waqqfet kunsill ekonomiku u soċjali li se jiffoka fuq kwistjonijiet ewlenin bħall-inklużjoni soċjali, l-ambjent u t-tibdil fil-klima, ix-xogħol, id-demokrazija innovattiva u s-sigurtà tal-ikel. L-Arġentina hija pajjiż li miegħu nikkondividu ħafna valuri u interessi, inkluż il-fehim tal-importanza tal-parteċipazzjoni tas-soċjetà ċivili.”