Il-COP28 tipprovdi mument kruċjali għan-nazzjonijiet biex jaffermaw mill-ġdid u jsaħħu l-impenji tagħhom fil-ġlieda kontra t-tibdil fil-klima. Il-Ftehim ta’ Pariġi, stabbilit matul il-COP21, witta t-triq għal sforzi kollettivi biex tiġi limitata ż-żieda fit-temperatura globali. Fil-COP28, il-pajjiżi għandhom l-opportunità li jirrevedu u jsaħħu l-miri klimatiċi tagħhom, billi jiżguraw li dawn jallinjaw mal-aħħar valutazzjonijiet xjentifiċi u l-urġenza dejjem akbar tal-kriżi klimatika.

Il-konferenza COP28 se tiltaqa’ mit-30 ta’ Novembru sat-12 ta’ Diċembru 2023 f'Dubai, l-Emirati Għarab Magħquda (UAE). Il-KESE qed jipparteċipa b’mod attiv fin-negozjati annwali.

Waqt il-COP28, se jiġi konkluż l-ewwel Rendikont Globali tal-implimentazzjoni tal-Ftehim ta’ Pariġi. Kull rendikont huwa proċess ta’ sentejn, imwettaq kull ħames snin, biex jiġi vvalutat il-progress kollettiv tad-dinja lejn il-kisba tal-għanijiet klimatiċi tagħha. L-ewwel Rendikont Globali jinsab fil-punt tan-nofs tal-implimentazzjoni tal-Aġenda 2030 għall-Iżvilupp Sostenibbli u l-SDGs tagħha, inkluż l-Għan 13 (azzjoni klimatika). 

F’ittra lill-partiti mibgħuta f’Lulju 2023, il-presidenza ħabbret li l-COP28 se tiffoka fuq erba’ bidliet fil-paradigma:

• It-tħaffif tat-tranżizzjoni tal-enerġija u t-tnaqqis tal-emissjonijiet qabel l-2030;
• It-trasformazzjoni tal-finanzjament għall-klima billi jitwettqu wegħdiet antiki u jiġi stabbilit il-qafas għal ftehim ġdid dwar il-finanzi;
• It-tqegħid tan-natura, in-nies, il-ħajjiet u l-għajxien fil-qalba tal-azzjoni klimatika; u
• Il-mobilizzazzjoni għall-aktar COP inklużiva li qatt saret.

Il-KESE se jkun parti mid-delegazzjoni tal-UE u ser jiddependi fuq il-parteċipazzjoni tal-President tal-KESE, Oliver Röpke, is-sitt membri tal-Grupp Ad Hoc dwar il-COP, Peter Schmidt,  Isabel Caño Aguilar, Josep Puxeu Rocamora, Antje Sabine Gerstein,  Neža Repanšek  u Arnaud Schwartz kif ukoll id-delegat żagħżugħa għall-UNFCCC Diandra NÍ Bhuachalla. (ks)