KESE info

Fil-ftuħ tas-sessjoni plenarja ta’ Mejju, il-President tal-KESE enfasizzat li: “Magħqudin jeħtiġilna naffaċċjaw il-konsegwenzi tal-gwerra fl-Ukrajna u l-isfidi ġeopolitiċi li għandna quddiemna. L-Ewropa jeħtiġilha tevolvi minn pijuniera fil-ġestjoni tal-kriżi għal pijuniera dinjija fit-tfassil tal-futur”.

“Il-Kremlin huwa żbaljat: dwar il-kapaċitajiet militari tiegħu, dwar is-saħħa tar-reżistenza Ukrena, dwar id-determinazzjoni u l-għaqda Ewropea”, qal il-President tal-Kunsill Ewropew, Charles Michel, li ppropona approċċ ġdid għan-negozjati dwar it-tkabbir.

Fid-dawl tal-progress bil-mod tan-negozjati mal-pajjiżi tal-Balkani tal-Punent, u l-applikazzjonijiet il-ġodda għal sħubija mill-Ukrajna, il-Georgia, u l-Moldova, l-UE għandha tipprevedi approċċ ta’ “integrazzjoni proporzjonata u kkontrollata”.

Skont Michel, “soluzzjoni li tkun ibbażata fuq integrazzjoni gradwali u progressiva matul il-proċess ta’ adeżjoni”.

Il-President tal-Kunsill Ewropew tkellem ukoll dwar il-ħolqien ta’ komunità ġeopolitika Ewropea, hekk kif l-UE qed tassumi tmexxija politika akbar. Il-politika barranija tkun qasam ewlieni ta’ kooperazzjoni fi ħdan din il-Komunità. “L-għan huwa li tinħoloq konverġenza u tiġi approfondita l-kooperazzjoni operattiva biex jiġu indirizzati l-isfidi komuni, il-paċi, l-istabbiltà u s-sigurtà fil-kontinent tagħna”, qal il-President.

Madankollu, huwa ċċara li “din l-inizjattiva bl-ebda mod mhi maħsuba biex tissostitwixxi t-tkabbir jew biex tinstab skuża ġdida għal prokrastinazzjoni. Lanqas ma hija garanzija għal dawk li jipparteċipaw li xi darba se jkunu membri tal-UE”. (at)

B’reazzjoni għall-istrumentalizzazzjoni tal-migranti sponsorjata mill-istat fil-fruntieri esterni tal-UE, il-KESE organizza konferenza dwar dan is-suġġett, fejn enfasizza l-momentum li fuqu hija bbażata l-Ewropizzazzjoni tal-politika dwar il-migrazzjoni. S’issa, il-mexxejja awtoritarji strumentalizzaw it-tbatija umanitarja biex jirrikattaw lill-Ewropa, peress li jafu li hemm lakuni eżistenti fil-politika dwar il-migrazzjoni fil-kontinent.

Il-konferenza intitolata Lejn l-Ewropizzazzjoni tal-politika dwar il-migrazzjoni? Tagħlimiet li għandhom jinsiltu mill-istrumentalizzazzjoni tal-migranti u l-gwerra fl-Ukrajna saret b’mod konġunt mal-laqgħa tas-Sezzjoni għar-Relazzjonijiet Esterni (REX).

Ta’ min jinnota li l-istrumentalizzazzjoni tal-migranti mir-reġim Belarussu ma kienx l-ewwel każ ta’ dan it-tip, peress li kien twettqu abbużi simili wkoll mit-Turkija, il-Libja u l-Marokk.

Fir-rigward tal-istrumentalizzazzjoni tal-migranti bħala arma f’idejn il-mexxejja awtoritarji, il-Viċi President għall-Promozzjoni tal-Istil ta’ Ħajja Ewropew Tagħna, Margaritis Schinas qal: “It-tagħlima ewlenija li nistgħu nisiltu mill-politiki tagħna hija li sakemm ma nkunux nistgħu nipproduċu sistema tal-migrazzjoni komuni u miftiehma, se nkunu fil-mira.”

Il-President tal-KESE Christa Schweng enfasizzat: “Din il-kriżi tar-refuġjati għamiltha ċara li l-migrazzjoni tolqot lill-Istati Membri kollha. L-UE għandha tuża dan il-momentun biex timxi ’l quddiem bil-Patt Ġdid dwar il-Migrazzjoni u l-Ażil sabiex twassal għall-bidla sistemika meħtieġa biex tiġi żviluppata politika dwar il-migrazzjoni u l-ażil tal-UE razzjonali u bbażata fuq id-drittijiet.”

“Issa huwa ż-żmien tal-ġeopolitika. Bl-istess mod kif ingħaqdna fil-pandemija, din il-gwerra qed ikollha l-istess effett fuq l-opinjoni pubblika Ewropea u dan huwa importanti ħafna”, enfasizza l-Viċi President għall-Promozzjoni tal-Istil ta’ Ħajja Ewropew Tagħna, Margaritis Schinas. (at)

Il-Kumitat Ekonomiku u Soċjali Ewropew ħeġġeġ lill-istituzzjonijiet tal-UE biex jadottaw tolleranza żero lejn l-attitudnijiet u l-prattiki tal-Istati Membri li jfixklu l-ħidma tas-soċjetà ċivili u jnaqqsu l-ispazju tagħha fl-Ewropa.

Sabiex jiġu miġġielda dawn l-iżviluppi, il-KESE qed jitlob lill-UE tieħu għadd ta’ miżuri, bħaż-żamma ta’ fondi tal-UE minn pajjiżi li ma jirrispettawx il-valuri tal-UE, sabiex tiġi żgurata l-parteċipazzjoni sħiħa tas-soċjetà ċivili fl-istadji kollha tat-tfassil tal-politika u biex tiġi salvagwardjata d-demokrazija parteċipattiva fl-Ewropa.

Fl-Opinjoni Ir-rwol tal-organizzazzjonijiet tas-soċjetà ċivili bħala gwardjani tal-ġid komuni fl-irkupru ta’ wara l-pandemija, il-KESE ddikjara li s-soċjetà ċivili Ewropea għadha qed tiffaċċja bosta ostakli sostanzjali, minħabba li l-ispazju tagħha tnaqqas drastikament f’xi partijiet tal-UE. Dan minkejja l-fatt li s-soċjetà ċivili kellha rwol ewlieni biex ittaffi l-effetti tal-pandemija u li l-għajnuna tagħha għar-refuġjati Ukreni kienet eżemplari mill-ewwel jum tal-aggressjoni Russa.

“Is-soċjetà ċivili kienet forza mexxejja biex tgħin lis-soċjetà tagħna tgħaddi mill-pandemija tal-COVID-19. U issa, il-kriżi tal-Ukrajna wriet b’mod ċar il-valur u s-sinifikat tas-soċjetà ċivili għad-demokraziji tagħna”, qal ir-relatur tal-Opinjoni, Ioannis Vardakastanis.

Issa li s-soċjetà ċivili dalwaqt se jkollha rwol ewlieni fil-bini mill-effetti devastanti tal-kriżi tal-COVID-19, li se jirrikjedu l-parteċipazzjoni tal-partijiet kollha tas-soċjetà, l-UE trid tiżgura li jkun hemm djalogu bejn is-soċjetà ċivili u dawk li jfasslu l-politika, peress li n-nuqqas ta’ tali djalogu huwa wieħed mill-ostakli ewlenin li qed tiffaċċja s-soċjetà ċivili tal-Ewropa fil-livelli kollha.

Ostaklu ieħor huwa n-nuqqas ta’ involviment sinifikanti tas-soċjetà ċivili fil-proċessi tat-teħid tad-deċiżjonijiet b’rabta ma’ politiki u leġiżlazzjoni importanti.

Fil-fehma tal-KESE, l-istituzzjonijiet tal-UE għandhom jadottaw “tolleranza żero” għal dawn l-attitudnijiet u għandhom jirreaġixxu “b’mod qawwi u mingħajr kompromess”, peress li l-inklużjoni tas-soċjetà ċivili fil-proċess tat-tfassil tal-politika hija inseparabbli mill-valuri tal-UE u t-Trattati tal-UE. Biex jiġu eliminati prattiki bħal dawn, għandhom jiġu stabbiliti regolamenti legali fil-livell Ewropew u f’dak nazzjonali.

L-organizzazzjonijiet tas-soċjetà ċivili għandhom jingħataw appoġġ finanzjarju u tekniku mill-UE, l-awtoritajiet lokali u nazzjonali biex jiżviluppaw ir-rwoli tagħhom, iżda mingħajr ma jikkompromettu l-indipendenza tagħhom. (ll)

Il-KESE adotta Riżoluzzjoni ġdida dwar l-involviment tas-soċjetà ċivili organizzata fl-implimentazzjoni u l-monitoraġġ tal-Pjani Nazzjonali għall-Irkupru u r-Reżiljenza. Fil-fatt, minn konsultazzjoni reċenti ħareġ fid-dieher li, għall-kuntrarju ta’ dak li huwa stabbilit fir-regolamentazzjoni, is-soċjetà ċivili organizzata mhijiex involuta biżżejjed f’dawn il-pjani.

Il-Kumitat jappella għal regoli ċari biex dan jiġi rimedjat b’mod effettiv, u biex l-ekonomija terġa’ lura fit-triq it-tajba. Matul id-dibattitu dwar l-adozzjoni ta’ din ir-Riżoluzzjoni, il-President tal-KESE Christa Schweng irrimarkat li l-involviment tas-soċjetà ċivili organizzata fir-riformi stabbiliti fil-Pjani Nazzjonali għall-Irkupru u r-Reżiljenza huwa essenzjali għat-titjib tal-kwalità, it-trasparenza u l-implimentazzjoni ta’ politiki ġodda. Gonçalo Lobo Xavier, Viċi President tal-Grupp ad hoc dwar is-Semestru Ewropew, qasam uħud mill-konklużjonijiet ewlenin tal-konsultazzjoni.

“B’mod ġenerali, il-kontenut finali tal-Pjani Nazzjonali għall-Irkupru u r-Reżiljenza huwa vvalutat b’mod pożittiv mis-soċjetà ċivili organizzata. Madankollu, id-dimensjoni soċjali ħafna drabi mhijiex żviluppata biżżejjed", huwa rrimarka. Il-President tal-GSE,Javier Doz Orrit, ippreżenta r-rakkomandazzjonijiet ewlenin. Huwa stieden ukoll lill-Istati Membri “jikkonformaw b’mod urġenti mar-regoli stabbiliti fil-Faċilità għall-Irkupru u r-Reżiljenza”, u lill-Kummissjoni Ewropea u lill-Parlament biex jinfurzaw dan. Il-Viċi President tal-GSE, Luca Jahier, qasam xi prattiki tajbin, u qal li li “n-nuqqas ta’ parteċipazzjoni effettiva u ta’ kwalità tas-soċjetà ċivili organizzata fil-governanza ekonomika tal-UE mhux se tiġi solvuta mingħajr riforma tas-Semestru Ewropew”.

Valdis Dombrovskis, Viċi President Eżekuttiv tal-Kummissjoni Ewropea, li ħa sehem ukoll fid-dibattitu, enfasizza l-impatt tal-invażjoni Russa tal-Ukrajna fuq l-irkupru ekonomiku globali u l-UE, u l-miżuri meħtieġa biex dan l-impatt jiġi assorbit u biex nimxu ’l quddiem. (tk)

Il-politika ta’ koeżjoni hija kruċjali biex tingħeleb il-kriżi tal-COVID-19, tinkiseb in-newtralità klimatika sal-2050 u jitnaqqsu d-disparitajiet fl-Ewropa. Opinjoni reċenti tal-KESE twissi li l-aktar sfida serja għaliha fil-futur prevedibbli hija l-gwerra fl-Ukrajna.

Hija meħtieġa azzjoni rapida sabiex jiġu mgħejuna r-refuġjati u tiġi żgurata l-integrazzjoni tal-Ukrajna fl-Ewropa. Fl-Opinjoni tiegħu, il-KESE enfasizza wkoll li huwa favur ħafna li l-Ukrajna tissieħeb fl-UE mingħajr dewmien, u appella sabiex il-politika ta’ koeżjoni u l-istrumenti finanzjarji assoċjati jiġu adattati kif meħtieġ.

B’mod speċifiku, il-Kumitat jissuġġerixxi li jinħoloq fond separat tal-UE li jiffaċilita r-rikostruzzjoni u l-iżvilupp wara l-gwerra. L-Opinjoni, adottata fil-plenarja ta’ Mejju, tanalizza l-Komunikazzjoni tal-Kummissjoni dwar ir-rapport tagħha dwar Il-Koeżjoni fl-Ewropa sal-2050.

Ir-rapport ġie ppubblikat ġimagħtejn wara l-invażjoni tar-Russja fl-Ukrajna – u għalhekk ma jqisx il-konsegwenzi tagħha. Ir-relatur Krzysztof Balon qal: “Fuq terminu qasir u medju, l-akbar sfida għall-politika ta’ koeżjoni hija l-aggressjoni Russa, li fil-fatt hija wkoll att ta’ aggressjoni kontra l-Unjoni Ewropea”. Il-korelatur Gonçalo Lobo Xavier żied jgħid li: “Il-politika ta’ koeżjoni għadha strument fundamentali għall-irkupru u r-reżiljenza tal-ekonomija Ewropea, u għandu jkun hemm enfasi partikolari fuq l-SMEs”.  (tk)

Il-gwerra fl-Ukrajna, li kkawżat fluss bla preċedent ta’ refuġjati biex ifittxu kenn fl-UE, tindika ħtieġa urġenti għal regolamenti Ewropej komuni effettivi, umani u umanitarji dwar il-migrazzjoni u l-ażil f’żona Schengen miftuħa iżda wkoll sigura, skont Opinjoni tal-Kumitat Ekonomiku u Soċjali Ewropew (KESE) adottata fis-sessjoni plenarja tiegħu f’Mejju.

“L-aggressjoni militari Russa kontra l-Ukrajna hija fattur ta’ bidla radikali. Storikament, hija l-akbar theddida li qatt kien hemm għall-funzjonament taż-żona Schengen u s-sigurtà tal-UE. L-avvenimenti terribbli fl-Ukrajna jaffermaw mill-ġdid l-importanza tas-sigurtà fil-fruntieri esterni fiż-żona Schengen u l-istabbiltà bħala prerekweżit tas-sigurtà interna tal-Ewropa”, qal ir-relatur tal-Opinjoni dwar il-Pakkett tal-Unjoni tas-Sigurtà/ Pakkett ta’ Schengen, Krzysztof Balon.

Huwa qal li l-KESE jappoġġja l-pożizzjoni tal-Kummissjoni li kwalunkwe għeluq tal-fruntieri bejn il-pajjiżi tas-Schengen għandu jkun biss temporanju.

Fl-Opinjoni, li evalwat il-pakkett reċenti tal-Kummissjoni li jaġġorna r-regoli dwar iż-żona Schengen, il-KESE ddikjara li t-tħassib tal-Istati Membri dwar is-sigurtà għandu jiġi indirizzat aħjar billi jiżdiedu u jissaħħu l-kooperazzjoni u l-koordinazzjoni bejn l-awtoritajiet tal-infurzar tal-liġi, pjuttost milli jiġu introdotti mill-ġdid il-kontrolli fil-fruntieri interni.

L-Opinjoni tagħmel enfasi kbira fuq li jiġi żgurat li l-UE u l-Istati Membri, meta jiġġestixxu l-fruntieri, il-migrazzjoni u l-ażil, jirrispettaw il-Karta tad-Drittijiet Fundamentali f’kull ħin, b’mod partikolari il-libertà ta’ moviment u ta’ residenza, kif ukoll id-dritt għall-ażil u l-prinċipju ta’ non-refoulement. L-istess japplika għall-każijiet kollha ta’ kooperazzjoni mill-pulizija u ġudizzjarja bejn l-Istati Membri.

Il-KESE stieden lill-Istati Membri jappoġġjaw b’mod proattiv il-mekkaniżmu ta’ solidarjetà u r-responsabbiltà kondiviża għall-ġestjoni tal-migrazzjoni f’konformità mad-dispożizzjonijiet dwar il-Patt Ġdid dwar il-Migrazzjoni u l-Ażil.

Il-mekkaniżmi ta’ solidarjetà jistgħu jiġu żviluppati bejn l-Istati Membri abbażi tad-Direttiva dwar il-Protezzjoni Temporanja, li għadha kif ġiet attivata fil-kuntest tal-aggressjoni Russa kontra l-Ukrajna, u li l-KESE japprezza ferm din l-attivazzjoni. Il-Kummissjoni għandha tqis ukoll l-implimentazzjoni tad-Direttiva dwar il-Protezzjoni Temporanja għal nazzjonali ta’ pajjiż terz f’sitwazzjonijiet futuri ta’ kriżi severa u urġenti.

Il-KESE tenna wkoll it-tħassib tiegħu dwar l-esklużjoni kontinwa tar-Rumanija, il-Bulgarija, il-Kroazja u Ċipru miż-żona Schengen u jingħaqad mal-Kummissjoni fl-appell tagħha għal azzjoni rapida u deċiżiva mill-Kunsill sabiex din tinbidel. (ll)

Filwaqt li l-KESE jemmen li miżuri aktar b’saħħithom f’erba’ oqsma speċifiċi jagħmlu l-pjan aktar effettiv, bi pjaċir jinnota li ħafna mill-proposti tiegħu ġew adottati.

F’Opinjoni adottata fis-sessjoni plenarja tiegħu ta’ Mejju, il-KESE ta l-appoġġ tiegħu lill-Pjan ta’ Azzjoni għall-Ekonomija Soċjali tal-Kummissjoni Ewropea, li jindirizza ħafna mill-proposti li l-KESE għamel għal aktar minn għaxar snin.

“Ninsabu ħerqana li naraw li dan il-pjan tant mistenni jiġi adottat, iżda l-ħidma għadha kif bdiet,” qal ir-relatur tal-Opinjoni Giuseppe Guerini. “Issa wasal iż-żmien li dan il-pjan jiġi implimentat b’miżuri kuraġġużi u fit-tul. Il-KESE għandu ħafna proposti innovattivi u konkreti biex jiżgura li l-potenzjal tal-ekonomija soċjali jiġi sfruttat bis-sħiħ f’kemm jista’ jkun Stati Membri tal-UE”.

Fil-pjan, il-KESE jidentifika erba’ oqsma ewlenin fejn jemmen li jistgħu jittieħdu miżuri aktar b’saħħithom:

•    Forom aktar aġli ta’ kooperazzjoni bejn l-amministrazzjonijiet pubbliċi u l-intrapriżi tal-ekonomija soċjali li jaħdmu flimkien lokalment fuq il-provvista ta’ servizzi ta’ interess ġenerali, b’distinzjoni ċara fid-Direttiva dwar l-Akkwist Pubbliku bejn it-twettiq tal-interess ġenerali u l-attivitajiet immexxijin mill-kompetizzjoni.

•    Azzjoni regolatorja, possibbilment fil-forma ta’ linji gwida, biex jiġu ċċarati r-rekwiżiti għall-aċċess għall-għajnuna mill-Istat u l-ammont ta’ appoġġ disponibbli għall-Istati Membri, sabiex ikunu jistgħu jużaw il-flessibbiltà kollha disponibbli biex jgħinu lill-intrapriżi tal-ekonomija soċjali. Mhux se jkun biżżejjed li jiġu organizzati sessjonijiet ta’ ħidma u webinars, kif tissuġġerixxi l-Kummissjoni.

•    Sistema ta’ krediti u self garantiti, kif diġà tinsab fis-seħħ għall-SMEs madwar l-UE, stabbilita mill-Istati Membri bl-appoġġ tal-UE. Huwa tajjeb ħafna li jitnedew prodotti finanzjarji ġodda biex jiġi mobilizzat il-finanzjament privat għall-intrapriżi tal-ekonomija soċjali, iżda ħafna minnhom jeħtieġu appoġġ biex jiksbu aċċess biss għall-kreditu ta’ kuljum.

•    Huwa tajjeb li tiġi applikata tassazzjoni speċifika għall-ekonomija soċjali, iżda l-Istati Membri jeħtieġ li jkunu akkumpanjati fit-triq lejn armonizzazzjoni fiskali kkoordinata, forsi ispirata minn prattiki tajbin f’xi wħud minnhom, bħal eżenzjonijiet mit-taxxa fuq profitti mhux distribwiti, rati tal-VAT aktar baxxi, tnaqqis jew eżenzjonijiet mill-ispejjeż tal-assigurazzjoni soċjali. (dm)

Il-Kumitat Ekonomiku u Soċjali Ewropew (KESE) jappoġġja l-inizjattiva tal-Kummissjoni Ewropea li testendi l-lista ta’ reati tal-UE għall-forom kollha tar-reati ta’ mibegħda u d-diskors ta’ mibegħda f’Opinjoni adottata fis-sessjoni plenarja tiegħu ta’ Mejju, u jħeġġeġ lill-Kunsill jadotta din il-proposta.

L-organizzazzjonijiet tas-soċjetà ċivili raw direttament iż-żieda fid-diskors ta’ mibegħda u r-reati ta’ mibegħda, kemm bħala miri ta’ mibegħda huma stess kif ukoll meta jassistu l-komunitajiet milquta. B’riżultat ta’ dan, il-Kumitat jirrikonoxxi l-ħtieġa li jiġu salvagwardjati d-dinjità tal-bniedem, id-drittijiet fundamentali u l-ugwaljanza. “Id-demokrazija, u l-UE nnifisha, mhumiex possibbli jekk in-nies ikunu qed jgħixu fil-biża’ u l-mistħija,” qal ir-relatur Cristian Pîrvulescu.
Premezz tal-avvanzi fil-media soċjali, u bis-saħħa tal-moviment liberu, is-sfera pubblika tal-UE saret aktar integrata. Għalhekk, bażi komuni issa hija indispensabbli sabiex il-mibegħda tiġi miġġielda b’mod effettiv. Is-sensibilizzazzjoni u l-edukazzjoni huma meħtieġa wkoll biex jiġi identifikat l-impatt ta’ dawn l-azzjonijiet u biex jiġu evitati. Il-Kumitat jirrakkomanda li tingħata attenzjoni speċjali lil dawk li għandhom rwol importanti fil-ġlieda kontra l-mibegħda bħall-għalliema, il-ġurnalisti u l-persunal tal-infurzar tal-liġi. Il-Kumitat jistieden ukoll lill-mexxejja politiċi jaġixxu b’mod responsabbli.

Il-KESE jenfasizza r-rwol kritiku li jaqdu l-imsieħba soċjali fl-iżjed livell bażiku fil-prevenzjoni tar-reati ta’ mibegħda u l-ġlieda kontrihom. “L-organizzazzjonijiet tas-soċjetà ċivili huma l-għassiesa tas-soċjetà tagħna kontra l-mibegħda” tgħid il-korelatur Milena Angelova. L-UE għandha tippromovi l-kodiċijiet ta’ kondotta u l-prattiki tajba tagħhom, u tipprovdi aktar finanzjament biex tagħmel l-aqwa użu mill-għarfien espert tagħhom. (gb)

Żieda qawwija fit-tħaddim tat-tfal u x-xogħol furzat, kif ukoll l-isfruttament kontinwu tal-ħaddiema madwar id-dinja jagħmlu l-azzjoni tal-UE dwar xogħol deċenti dejjem aktar urġenti.

Is-seduta dwar “Xogħol deċenti madwar id-dinja”, li saret fl-4 ta’ Mejju, laqqgħet flimkien membri tal-KESE, rappreżentanti mill-istituzzjonijiet Ewropej u l-Organizzazzjoni Internazzjonali tax-Xogħol (ILO), kif ukoll akkademiċi u organizzazzjonijiet tas-soċjetà ċivili.

Is-seduta saret biex jinġabar il-kontribut għall-Opinjoni li jmiss tal-KESE dwar is-suġġett, b’enfasi fuq il-Komunikazzjoni tal-Kummissjoni dwar Xogħol Deċenti madwar id-Dinja, adottata fi Frar, u l-proposta tagħha għal Direttiva dwar id-Diliġenza Dovuta tas-Sostenibbiltà Korporattiva.

B’dawn l-inizjattivi, il-Kummissjoni qed tistinka biex tippożizzjona lill-UE bħala promotur ta’ xogħol deċenti, kemm f’darha kif ukoll madwar id-dinja, u biex tippermetti lil miljuni ta’ nies jaħdmu u jgħixu b’dinjità.

“Għandna ħolma ta’ ġejjieni fejn ix-xogħol huwa deċenti. Iżda x-xogħol deċenti għadu mhuwiex realtà għal mijiet ta’ miljuni ta’ nies madwar id-dinja, li jagħmel il-kisba tal-Għanijiet ta’ Żvilupp Sostenibbli kompitu diffiċli”, qalet ir-relatur tal-Opinjoni tal-KESE, María del Carmen Barrera Chamorro.

Il-pandemija tal-COVID-19 kompliet taggrava s-sitwazzjoni fid-dinja tax-xogħol, b’ħafna pajjiżi jirrapportaw żieda qawwija fil-kundizzjonijiet prekarji tax-xogħol. Dan affettwa b’mod sproporzjonat lin-nisa u lill-gruppi vulnerabbli bħat-tfal u l-ħaddiema fl-ekonomija informali. L-għadd ta’ tfal involuti fix-xogħol kien beda tiela’ saħansitra qabel il-pandemija, peress li fil-perjodu ta’ bejn l-2016 u l-2020 rajna żieda ta’ aktar minn 8 miljuni, wara li kien naqas preċedentement.

Bħalissa dan jgħodd 160 miljun tifel u tifla, jew wieħed minn kull għaxart itfal madwar id-dinja. 25 miljun persuna qed jesperjenzaw sitwazzjoni ta’ xogħol furzat. Fin-nuqqas ta’ kopertura suffiċjenti tal-protezzjoni soċjali, 46 miljun tifel u tifla addizzjonali jistgħu jisfaw vittmi tat-tħaddim tat-tfal fil-futur qrib.

L-għan tal-isforz tal-UE huwa li tħeġġeġ imġiba korporattiva sostenibbli u responsabbli fis-swieq domestiċi, f’pajjiżi mhux tal-UE u tul il-ktajjen tal-valur globali. L-għodod ewlenin se jkunu l-politiki tal-UE għar-responsabbiltà korporattiva u t-trasparenza. Huwa ppjanat ukoll strument legali li jipprojbixxi prodotti magħmula minn xogħol furzat. Il-politiki kollha se jippromovu l-ugwaljanza bejn il-ġeneri u n-nondiskriminazzjoni.

“Aħna nilqgħu l-inizjattiva tal-Kummissjoni, iżda jeħtieġ li jkollna aġenda aktar ambizzjuża u politika integrata bbażata fuq id-drittijiet universali tal-bniedem. Ix-xogħol deċenti huwa fl-interess tan-nies, iżda wkoll tal-kumpaniji, il-konsumaturi u l-pjaneta “, temmet tgħid is-Sinjura Barrera Chamorro. (ll)

Seduta tal-KESE li saret fit-8 ta’ April, li laqqgħet flimkien atturi ewlenin fil-politika dwar id-diżabilità, inklużi l-imsieħba soċjali u l-organizzazzjonijiet tas-soċjetà ċivili, tindika l-ħtieġa li tiżdied ir-rata ta’ impjieg tal-persuni b’diżabilità, speċjalment iż-żgħażagħ. Minkejja l-isforzi legali, id-data turi li ħafna minnhom għadhom qed jiffaċċjaw diskriminazzjoni fid-dinja tax-xogħol minħabba sterjotipi li juru li mhumiex produttivi.

L-iskop prinċipali tas-seduta kien li l-Istrateġija l-ġdida tal-UE dwar id-Drittijiet tal-Persuni b’Diżabilità rrikonoxxiet il-problemi li jiffaċċjaw iż-żgħażagħ b’diżabilità fl-oqsma tal-impjieg u tal-edukazzjoni. Madankollu, l-imsieħba soċjali għad iridu jaraw kemm se jkunu ambizzjużi dawn l-isforzi.

Iż-żgħażagħ b’diżabiltià jiffaċċjaw ostakli meta jiġu biex jidħlu fis-suq tax-xogħol u dawn l-ostakli jeżistu fis-settur privat kif ukoll fis-settur pubbliku. Tabilħaqq, ir-rata tal-qgħad fost il-persuni b’diżabilità hija sproporzjonatament għolja meta mqabbla mal-popolazzjoni ġenerali, speċjalment għan-nisa u ż-żgħażagħ. Skont l-aħħar data reċenti disponibbli fil-livell tal-UE, il-persuni b’diżabilità huma 24.4% inqas probabbli li jiġu impjegati. Il-pandemija tal-COVID-19 jidher li żiedet din l-inugwaljanza.

Daphne Nathalie Ahrendt, Maniġer ta’ livell għoli fir-Riċerka fi ħdan l-Aġenzija Eurofound, ippreżentat ir-riżultati ta’ stħarriġ mill-Eurofound: 27% tar-rispondenti b’diżabilità kienu qiegħda, meta mqabbla ma’ 12% tar-rispondenti mingħajr diżabilità. 55% minnhom huma kkunsidrati bħala finanzjarjament fraġli, meta mqabbla ma’ 38% ta’ persuni ta’ mparhom mingħajr diżabilità. Il-biċċa l-kbira tar-rispondenti b’diżabilità huma aktar probabbli li jiffaċċjaw depressjoni u solitudni.

Skont Francesca Sbianchi mill-Kumitat taż-Żgħażgħa fi ħdan il-Forum Ewropew dwar id-Diżabbiltà, “ħafna minna qed naffaċċjaw żieda fl-għoli tal-ħajja u b’hekk niddependu minn servizzi ta’ appoġġ u benefiċċji kontra d-diżabilità biex ngħixu bid-dinjità”. Wieħed mill-prerekwiżiti ewlenin biex tintemm parti minn din l-inugwaljanza hija li l-persuni b’diżabilità jkunu jistgħu jżommu l-benefiċċji kontra d-diżabilità meta jibdew jaħdmu, sabiex jingħataw iż-żmien biex isiru indipendenti finanzjarjament.

Stefan Tromel mill-Organizzazzjoni Internazzjonali tax-Xogħol indika li, għalkemm il-forom ġodda ta’ impjieg jirrappreżentaw opportunitajiet li jiġu inklużi aktar persuni b’diżabilità, id-data tal-OECD turina li għad hemm diskrepanza fil-ħiliet diġitali bejn persuni b’diżabilità u dawk mingħajr diżabilità, u x-xogħol mill-bogħod għandu jibqa’ alternattiva. Sabiex tintemm din id-diskrepanza u titjieb l-aċċessibbiltà fuq il-post tax-xogħol, it-trade unions jeħtieġ li jaħdmu flimkien mal-imsieħba soċjali: il-kumitati ekonomiċi u soċjali ta’ kull pajjiż jistgħu jkunu pjattaforma tajba li tipprovdi dan l-ispazju.

Il-persuni b’diżabilità jiffaċċjaw diskriminazzjoni akbar jekk ikunu żagħżagħ. Peress li l-2022 hija s-Sena Ewropea taż-Żgħażagħ, huwa essenzjali li jinkiseb fehim aħjar tar-realtà li qed jiffaċċja dan il-grupp partikolari. (rl)

Il-Kumitat qed jappella lill-Kummissjoni Ewropea twettaq valutazzjonijiet tal-impatt aktar immirati tal-proposti tagħha għal sorsi ġodda ta’ finanzjament għall-baġit tal-UE biex jitħallas lura d-dejn tan-NextGenerationEU.

B’mod ġenerali, il-KESE jaqbel mad-dħul propost tal-UE minn “riżorsi proprji” għall-baġit. Madankollu, iridu jkunu iżjed stabbli u ġusti u m’għandhomx ikunu ta’ piż għall-unitajiet domestiċi jew in-negozji.

F’Opinjoni adottata fis-sessjoni plenarja tiegħu f’Mejju, il-KESE jappella lill-Kummissjoni wkoll biex tassigura li l-proposti tagħha jkunu jifilħu għal xokkijiet ekonomiċi u jwissi li dawn il-proposti jistgħu jisfaw fix-xejn minħabba l-konsegwenzi ta’ spejjeż tal-enerġija ogħla minħabba l-gwerra fl-Ukrajna.

“Id-disinn tar-riżorsi proprji ġodda m’għandux jipperikola l-baġits ta’ programmi u strumenti oħrajn tal-UE, u għandu jevita li jżid il-kontribuzzjonijiet ta’ riżorsi bbażati fuq l-ING,” qal ir-relatur tal-Opinjoni, Philip von Brockdorff. Il-korelatur, Antonio García del Riego, żied jgħid: “Il-KESE japplawdi l-isforzi tal-OECD biex jiġi żgurat li korporazzjonijiet globali jiġu intaxxati fejn iseħħu l-attività ekonomika u l-ħolqien tal-valur, iżda jwissi li n-negozji tal-UE m’għandhomx jitqiegħdu fi żvantaġġ kompetittiv bl-implimentazzjoni tar-regoli ġodda qabel ma jagħmlu dan l-imsieħba kummerjali ewlenin”. (tk)

Ir-regoli dwar il-fużjonijiet, l-antitrust u l-kontroll tal-għajnuna mill-Istat għandhom jiġu riveduti biex jaqdu l-ambizzjonijiet klimatiċi u diġitali tal-Unjoni u jgħinu tinkiseb awtonomija strateġika, li kollha kemm huma se jeħtieġġu investiment massiv. Żewġ Opinjonijiet ġodda tal-KESE jispjegaw kif għandha ssir din ir-reviżjoni.

Dibattitu li sar fid-19 ta’ Mejju waqt il-plenarja tal-KESE ffoka fuq żewġ rapporti ġodda li jindirizzaw il-politika tal-kompetizzjoni tal-UE u l-għajnuna mill-Istat għas-servizzi tas-saħħa u soċjali f’kuntest globali li nbidel.
Fir-rapport dwar “Politika ta’ kompetizzjoni lesta għal sfidi ġodda”, il-KESE ħeġġeġ lill-Kummissjoni Ewropea biex tagħmel iktar minn qatt qabel fir-reviżjoni tal-politika tal-kompetizzjoni tal-UE li għaddejja bħalissa. 

Il-miżuri meħuda biex tiġi indirizzata l-COVID-19 u aktar tard l-aggressjoni Russa fl-Ukrajna għenu ħafna lin-negozji, iżda jeħtieġ li jittejbu. Hemm ukoll il-ħtieġa li jiġi żgurat li l-kriterji ta’ eliġibbiltà jippermettu lis-setturi kollha jibbenefikaw u ma jagħlqux il-bibien għan-negozji l-aktar milquta. 

Fir-rigward tal-qafas ġenerali tal-dritt tal-kompetizzjoni, filwaqt li aġġusta ruħu għal għadd ta’ sfidi, ma żviluppax biżżejjed biex jassorbi l-għanijiet strateġiċi tal-UE – jiġifieri t-tranżizzjoni ekoloġika u dik diġitali iżda wkoll ir-reżiljenza. Il-KESE jenfasizza li dawn l-ambizzjonijiet jeħtieġu investiment pubbliku u privat enormi u għandhom jingħataw l-appoġġ massimu.

Il-miżuri biex jiġu kkontrollati l-konċentrazzjonijiet u l-fużjonijiet xi drabi jidhru li qed jostakolaw l-isforz biex l-Unjoni tibqa’ kompetittiva fir-rigward tal-Istati Uniti u ċ-Ċina. Id-dispożizzjonijiet dwar l-abbuż ta’ pożizzjoni dominanti mhumiex neċessarjament imfassla għall-isfidi ekoloġiċi u diġitali l-ġodda. 

“Nissuġġerixxu xi aġġustamenti tekniċi biex jiġi ffaċilitat l-aċċess għall-appoġġ, iżda wkoll modi aħjar kif jitqiesu l-innovazzjoni u l-iżviluppi diġitali. Għamilna wkoll suġġerimenti biex is-setturi kollha jkunu jistgħu jibbenefikaw, mhux biss l-industrija. Qed naħseb b’mod partikolari fis-settur tal-kummerċ u l-SMEs,” qalet ir-relatur tal-Opinjoni, Emilie Prouzet.

F’Opinjoni oħra, il-KESE indirizza l-għajnuna mill-istat għas-servizzi tas-saħħa u soċjali. 

Ir-relatur Giuseppe Guerini (Diversità Ewropa, IT) qal li “il-pandemija tal-COVID-19 uriet li s-sistemi tas-saħħa u tal-protezzjoni soċjali jeħtieġ li jkunu jistgħu jaġġustaw malajr għal kwalunkwe bidla u li l-miżuri li nipproponu jgħinu jissemplifikaw u jgħaġġlu l-għoti tal-għajnuna mill-Istati.”

Il-KESE jindika li dan is-settur ma tantx għandu impatt fuq il-kompetizzjoni transkonfinali. Is-servizzi tas-saħħa u dawk soċjali huma fil-biċċa l-kbira organizzati lokalment fil-pajjiżi u essenzjalment jintużaw fejn jiġu pprovduti. L-għajnuna mill-istat lil dan is-settur m’għandhiex titqies li xxekkel lill-kompetizzjoni.

Proposta importanti oħra tikkonċerna l-ammont massimu ta’ għajnuna mill-Istat permessa. Il-KESE jgħid li l-limitu biex tiġi nnotifikata l-għajnuna lill-Kummissjoni (attwalment EUR 500 000 fuq tliet snin fiskali), li jwassal għal proċess twil u kumpless, għandu jkun ogħla għal dawn is-servizzi milli għal servizzi oħra ta’ interess ġenerali. Dan ikun iġġustifikat mir-rwol tagħhom ta’ interess pubbliku, l-impatt limitat tagħhom fuq il-kummerċ transkonfinali u r-ritorn tal-inflazzjoni. (dm)

F’Opinjoni proposta mill-Kummissjoni Konsultattiva dwar il-Bidliet Industrijali (CCMI) u adottata fis-sessjoni plenarja ta’ Mejju, il-Kumitat Ekonomiku u Soċjali Ewropew (KESE) jirrakkomanda li l-Kummissjoni Ewropea u l-gvernijiet nazzjonali, f’konsultazzjoni mal-partijiet interessati kollha fl-industrija tal-imballaġġ, jieħdu l-passi meħtieġa matul iċ-ċiklu tal-ħajja ta’ kull prodott biex tiżdied is-sostenibbiltà tal-industrija.

Il-parti l-kbira tal-ammonti enormi ta’ materjali tal-imballaġġ użati attwalment għas-sikurezza, l-iġjene, it-trasport, il-preservazzjoni, il-preżentazzjoni, u l-applikazzjoni ta’ kull tip ta’ merkanzija – kemm jekk għal skopijiet industrijali, xogħol ta’ kostruzzjoni, sistemi ta’ komunikazzjoni, jew konsum individwali – huma magħmula minn fibri karboniċi jew metalliċi, li huma riżorsi limitati.

“Il-leġiżlazzjoni futura tal-UE għandha tiffoka fuq iċ-ċiklu tal-ħajja fl-intier tiegħu tal-prodotti biex tippromovi l-ekonomija ċirkolari. Il-produzzjoni, il-konsum u t-trattament tal-iskart fl-industrija tal-imballaġġ huma kruċjali biex isir progress lejn futur sostenibbli”, qal ir-relatur tal-Opinjoni, Matteo Carlo Borsani.

L-Opinjoni tinkludi lista ta’ materja prima preferuta: l-imballaġġ magħmul minn fibri naturali u materjali naturali oħrajn jista’ effettivament jissepara t-tkabbir mill-użu tar-riżorsi. Il-materjali rinnovabbli huma dejjiema, attraenti, riċiklabbli u bijodegradabbli.

Il-perċezzjonijiet tal-konsumaturi u l-interazzjonijiet mal-imballaġġ qed jevolvu wkoll. Huwa kruċjali li l-industrija u l-konsumaturi jibdlu d-drawwiet tagħhom fir-rigward tal-imballaġġ.

Il-KESE jappella wkoll għall-implimentazzjoni ta’ djalogu soċjali Ewropew fl-industrija tal-imballaġġ, li jinvolvi l-federazzjonijiet tat-trade unions u l-federazzjonijiet ta’ min iħaddem. Meta wieħed iqis l-importanza tal-imballaġġ fl-oqsma kollha tal-ekonomija, l-Opinjoni tenfasizza wkoll il-ħtieġa li l-Kummissjoni Ewropea tistabbilixxi forum annwali dwar l-imballaġġ u l-iskart mill-imballaġġ. Il-forum ilaqqa’ flimkien il-partijiet interessati u r-rappreżentanti mill-istituzzjonijiet Ewropej biex jimmonitorjaw l-implimentazzjoni tad-Direttiva u jidentifikaw l-aħjar prattiki fir-rigward ta’ regolamenti dwar l-imballaġġ sostenibbli. (ks/rl)

F’Opinjoni adottata fil-plenarja ta’ Mejju, il-Kumitat Ekonomiku u Soċjali Ewropew (KESE) jappoġġja l-Komunikazzjoni tal-Kummissjoni Ewropea dwar iċ-ċikli tal-karbonju sostenibbli u jgħid li jemmen li l-Politika Agrikola Komuni (PAK) trid tipprovdi l-qafas strateġiku li jwitti t-triq għal tranżizzjoni lejn livelli baxxi ta’ emissjonijiet tal-karbonju fl-agrikoltura.

B’reazzjoni għall-urġenza tal-azzjoni klimatika, l-Unjoni Ewropea naqqxet il-mira tan-newtralità klimatika fl-ekonomija kollha sal-2050 fil-leġiżlazzjoni. Biex tinkiseb din il-mira ambizzjuża għandhom jiġu stabbiliti ċikli tal-karbonju sostenibbli u reżistenti għall-klima permezz ta’ azzjonijiet ewlenin bħar-riċiklaġġ tal-karbonju mill-flussi ta’ skart, minn sorsi sostenibbli ta’ bijomassa jew direttament mill-atmosfera u billi jiżdiedu s-soluzzjonijiet għat-tneħħija tal-karbonju li jaqbdu d-diossidu tal-karbonju (CO₂) mill-atmosfera u jaħżnuh fit-tul.

“Biex tinstab soluzzjoni għan-newtralità karbonika hemm bżonn li jitnaqqsu l-emissjonijiet ta’ gassijiet sera, jinstabu alternattivi ekoloġiċi għall-karbonju fossili u jiżdiedu l-bjar ta’ karbonju”, qal ir-relatur tal-Opinjoni, Arnold Puech d'Alissac. Huwa żied jgħid li l-KESE jappoġġja l-Komunikazzjoni tal-Kummissjoni Ewropea dwar iċ-ċikli tal-karbonju, li tipproponi żewġ soluzzjonijiet għat-tneħħija u s-sekwestru tal-karbonju: soluzzjonijiet ibbażati fuq in-natura (jiġifieri s-sekwestru tal-karbonju) u soluzzjonijiet teknoloġiċi industrijali.

Il-KESE għalhekk iħeġġeġ lill-Kummissjoni Ewropea tadotta approċċ olistiku f’dan ir-rigward: iż-żieda tal-bjar ta’ karbonju u l-akbar sostituzzjoni possibbli tal-karbonju fossili se jeħtieġu żieda fil-bijomassa prodotta, b'impatt fuq is-settur tal-art. Is-settur tal-art jista’ jiġi involut b’mod attiv fil-ġlieda kontra t-tisħin globali u fl-istess ħin jikkontribwixxi għal tranżizzjoni usa’ għal sistema alimentari sostenibbli.

Is-sekwestru tal-karbonju m’għandux jiġi kkunsidrat biss bħala opportunità kummerċjali, iżda wkoll bħala element ewlieni tal-agrikoltura Ewropea fil-futur u bħala għodda għall-azzjoni klimatika: il-krediti tal-karbonju għandhom jagħtu rimunerazzjoni għal servizz, jiġifieri s-sekwestru tal-karbonju atmosferiku, iżda għandhom ukoll jappoġġjaw it-tranżizzjoni karbonika tas-settur agrikolu.

Il-Kumitat jenfasizza wkoll ir-rwol essenzjali li l-PAK trid taqdi biex tipprovdi l-qafas politiku li jwitti t-triq għat-tranżizzjoni lejn livell baxx ta’ emissjonijiet tal-karbonju fl-agrikoltura, jiġifieri settur agrikolu li jarmi anqas u li jissekwestra aktar emissjonijiet. Madankollu, il-KESE jenfasizza wkoll li l-ħżin tal-karbonju ma għandux ikun kundizzjont tal-PAK, iżda li għandu jitwaqqaf u jinżamm suq speċifiku għalih. Il-KESE jqis li l-iżvilupp tas-sekwestru tal-karbonsju se jirrikjedi qafas legali ċar li huwa kondiviż mill-Istati Membri, u li jqis id-differenzi fil-livell ta’ investiment u ta’ appoġġ li l-Istati Membri jistgħu jipprovdu. (ks)

L-indipendenza enerġetika hija kruċjali għall-futur tal-Ewropa: jeħtieġ li l-UE tiżgura l-provvisti tal-enerġija tagħha malajr kemm jista’ jkun, ittemm id-dipendenza tagħha mill-gass Russu u taċċelera drastikament it-tranżizzjoni lejn enerġija nadifa. Dan huwa l-messaġġ ewlieni tal-Opinjoni “REPowerEU: Azzjoni Ewropea Konġunta għal enerġija aktar affordabbli, sikura u sostenibbli”, abbozzata minn Thomas Kattnig, Alena Mastantuono u Simo Tiainen, li ġiet adottata fis-sessjoni plenarja ta’ Mejju.

Il-KESE jappoġġja l-Komunikazzjoni tal-Kummissjoni Ewropea dwar “REPowerEU”, li ġiet approvata mill-Kulleġġ fl-istess ġurnata tal-Opinjoni, u jgħid li hija f’konformità mal-objettivi tal-Patt Ekoloġiku Ewropew u tal-Unjoni Ewropea tal-Enerġija. Barra minn hekk, il-proposta tistabbilixxi azzjonijiet ġodda biex tiżdied il-produzzjoni tal-enerġija ekoloġika, jiġu diversifikati l-provvisti u titnaqqas id-domanda għall-gass Russu, li wasslet għal żidiet sinifikanti fil-prezzijiet tas-suq tal-elettriku minħabba manipulazzjoni tas-suq.

Il-Kumitat iwissi wkoll li l-UE trid tkun partikolarment attenta meta tiġi biex tissostitwixxi l-gass Russu b’riżorsi oħra, u jeħtieġ li jitqies l-impatt tagħhom fuq l-ambjent u l-prospett li minflok’ issir tiddependi minn pajjiżi terzi li ma jikkondividux il-valuri Ewropej.

Is-sitwazzjoni ġeopolitika attwali kkawżata mill-invażjoni Russa tal-Ukrajna kompliet taggrava ’ż-żieda bla preċedent fil-prezzijiet tal-enerġija li ffaċċjat l-UE f’dawn l-aħħar xhur. Għalhekk, huwa estremament importanti li jittieħdu passi immedjati biex jittaffa l-impatt tal-prezzijiet għoljin għall-unitajiet domestiċi, il-bdiewa, in-negozji u l-industrija Ewropej. (mp)

Minn Awwissu 2020 ’il hawn, ir-reġim awtoritarju ta’ Aleksandr Lukashenko wettaq attakk tal-massa fuq is-soċjetà ċivili, il-ġurnalisti indipendenti, il-bloggers u l-kittieba fil-Belarussja. Il-KESE ppubblika Rapport ta’ informazzjoni dwar is-sitwazzjoni tal-midja fil-pajjiż, fejn għamel rakkomandazzjonijiet dwar kif għandhom jiġu assistiti l-kumpaniji tal-midja u l-ġurnalisti Belarussi li ħarbu mill-pajjiż u dawk li baqgħu fil-pajjiż biex jiġġieldu kontra r-reġim.

Il-membru tal-KESE u relatur tar-Rapport, Tatjana Babrauskienė, li ppreżentat ir-Rapport ta’ Informazzjoni dwar Appoġġ għas-settur tal-midja indipendenti fil-Belarussja fis-sessjoni plenarja tal-KESE ta’ Mejju, enfasizzat il-kontribut sinifikanti tal-esperta maħtura, il-ġurnalista indipendenti Belarussa Hanna Liubakova, għall-abbozzar ġenerali tar-rapport u enfasizzat: “Huwa importanti li tiġi rikonoxxuta l-ħidma inkredibbli tal-ġurnalisti Belarussi, li spiss poġġew ħajjithom u l-familji tagħhom f’riskju sempliċiment biex ikollna l-verità. Id-dmir tagħna huwa li nipproteġuhom u nappoġġjawhom.”

Peress li s-sitwazzjoni tal-midja fil-Belarussja hija kwistjoni Ewropea, il-KESE jipproponi li l-Istati Membri mhux biss jistabbilixxu kooperazzjoni mal-aġenziji indipendenti tal-aħbarijiet fil-Belarussja iżda wkoll jgħinu fit-tixrid u r-rapportar ta’ aħbarijiet mill-pajjiż.

Ir-Rapport ta’ informazzjoni jressaq rakkomandazzjonijiet speċifiċi u jistabbilixxi eżempju globali ta’ appoġġ għal-libertà tal-midja fi kriżi:
•    eżenzjonijiet mill-ħtieġa ta’ viża lill-ġurnalisti Belarussi li jfittxu rifuġju mir-repressjoni;
•   l-istabbilment ta’ fondi nazzjonali u tal-UE fl-Istati Membri biex jappoġġjaw lill-midja indipendenti u lill-ġurnalisti Belarussi;
• appoġġ legali, finanzjarju u psikoloġiku għal ġurnalisti li jħarrbu r-ripressjoni;
•    l-integrazzjoni tal-ġurnalisti indipendenti Belarussi fl-Istati Membri tal-UE permezz ta’ impjiegi u boroż ta studju;
•    l-eliminazzjoni tal-burokrazija biex tinkiseb għajnuna finanzjarja mill-UE;
•  faċilitajiet tal-IT li jippermettu aċċess għall-internet u għoddod diġitali biex tiġi evitata ċ-ċensura.

Il-parteċipanti fis-seduta “Il-Politika taż-Żgħażagħ fil-Balkani tal-Punent, bħala parti mill-Aġenda ta’ Innovazzjoni għall-Balkani tal-Punent”, li saret mill-KESE, affermaw mill-ġdid l-importanza taż-żgħażagħ għall-futur tar-reġjun. Huma indikaw ukoll il-problema tal-“eżodu tal-imħuħ” u kif it-trasformazzjoni ta’ dan f’“ċirkolazzjoni tal-imħuħ” tista’ tistimula t-tkabbir u l-iżvilupp ekonomiku fil-Balkani tal-Punent.

Il-membru tal-KESE, Dragica Martinović Džamonja qalet: “Iż-żgħażagħ huma riżorsa vitali għall-iżvilupp u fattur essenzjali għall-paċi u l-istabbilità.”

B’mod simili, Andrej Zorko, huwa wkoll membru tal-KESE, qal: “Iż-żgħażagħ m’għandhomx ikunu s-suġġett ta’ proġett, iżda jridu jkunu komponent attiv tal-proċess tat-tfassil tal-politika.”

Dafina Peci, Direttur ta’ Tirana Kapitali Ewropea taż-Żgħażagħ 2022 enfasizzat l-importanza taż-żgħażagħ u l-orgnizzazzjonijiet tas-soċjetà ċivili, billi tat bħala eżempju l-ħidma tal-Pjattaforma taż-Żgħażagħ tal-Balkani tal-Punent, li ilha attiva għal xi snin fis-sitt pajjiżi tal-Balkani tal-Punent.

L-eżodu tal-imħuħ jista’ jinbidel f’kisba ta’ mħuħ

Edukazzjoni mhux adegwata, in-nuqqas ta’ ħiliet, kundizzjonijiet tax-xogħol ħżiena u opportunitajiet limitati ma jistgħux jiggarantixxu futur prosperuż għaż-żgħażagħ.

Albert Hani, Segretarju Ġenerali tal-Uffiċċju Reġjonali għall-Kooperazzjoni bejn iż-Żgħażagħ, qal li medja ta’ 52% taż-żgħażagħ jixtiequ jgħixu barra mir-reġjun. “Jekk il-gvernijiet se jippreswadu liż-żgħażagħ jibqgħu d-dar, iridu juru li huma impenjati favur il-ħtiġijiet u l-prijoritajiet taż-żgħażagħ,” huwa qal.

Milica Škiljević, manager ta’ proġetti fl-Iskola Miftuħa ta’ Belgrad, semmiet in-nuqqas ta’ informazzjoni dwar il-prospetti għall-karriera u għall-impjieg. 

Ognjen Marković, Kap ta’ tim fi ħdan il-Team Leader fil-Western Balkans Youth Lab Project fi ħdan il-Kunsill għall-Kooperazzjoni Reġjonali, spjega l-valur miżjud tal-parteċipazzjoni taż-żgħażagħ billi dawn jistgħu joffru għarfien espert, sakemm jitqiegħdu f’pożizzjoni indaqs ma’ dawk li jfasslu l-politika.

L-inizjattiva tal-Garanzija taż-Żgħażagħ għall-Balkani tal-Punent, flimkien man-networks taż-żgħażagħ u l-partijiet interessati nazzjonali, tista’ timmarka l-bidu ta’ proċess ta’ riforma, u b’hekk issaħħaħ l-impjegabbiltà fost il-ġenerazzjoni iktar żagħżugħa tar-reġjun. (at)

Fid-29 ta’ Mejju, il-Viċi President Giulia Barbucci ħadet sehem fit-42 edizzjoni tal-ġirja ta’ 20 km ta’ Brussell f’isem il-KESE, flimkien ma’ rappreżentanti ta’ istituzzjonijiet oħrajn tal-UE, inkluża Roberta Metsola, President tal-Parlament Ewropew.

Fil-fehma tas-Sinjura Barbucci, dan l-avveniment huwa importanti ferm, speċjalment bħalissa. “Il-maratona ta’ suċċess ta’ 20 km ta’ Brussell, li fiha ħadu sehem 33 000 ċittadin Ewropew u rappreżentanti tal-istituzzjonijiet tal-UE, bagħtet messaġġ qawwi favur il-paċi u s-solidarjetà mal-Ukrajna” qalet.

Din is sena, fil-ġirja ħadu sehem ’il fuq minn 33 000 persuna minn 137 nazzjonalità differenti, kif ukoll 800 membru tal-persunal mit-tim “Running for Europe”. Hekk kif ġara fl-2021, il-maratona intrebħet mill-Belġjan Amaury Paquet, li ġera d-distanza ta’ 20 km f’siegħa u sekonda.

L-avveniment ta’ din is-sena kien iddedikat għat-turija ta’ għaqda tal-Unjoni Ewropea mal-Ukrajna. Il-fondi miġbura għal dan l-avveniment se jingħataw lill-Organizzazzjoni Nazzjonali tal-Iscouts tal-Ukrajna biex jipprovdu ikel, mediċina, sleeping bags u provvisti oħrajn meħtieġa, flimkien mal-koordinazzjoni tal-appoġġ psikoloġiku għan-nies u l-komunitajiet milquta mill-kunflitt. (ehp)