EESC info

Sa seisiún iomlánach a bhí ag CESE i mí an Mheithimh, d’fhógair an tUasal Frans Timmermans bearta chun na daoine is leochailí a chosaint sa chás go leathnófar praghsáil carbóin go praghsanna breoslaí téimh agus iompair. Thug sé éisteacht chomh maith do thograí CESE chun feabhas a chur ar an gcinnteoireacht chorparáideach maidir leis an aistriú glas trí idirphlé sóisialta a bhunú.

Agus í ag cur fáilte roimh Frans Timmermans, Leas-Uachtarán Feidhmiúcháin de chuid an Choimisiúin Eorpaigh, bhí an méid seo a leanas le rá ag Christa Schweng, Uachtarán CESE: “Straitéis fáis uaillmhianach atá sa Chomhaontú Glas, agus é mar aidhm aige aeráidneodracht san Aontas Eorpach a bhaint amach faoi 2050 agus ugach eacnamaíoch a thabhairt. Ní mór, áfach, na gnéithe sóisialta, saothair, sláinte agus cothromais den chomhaontú a neartú ar mhaithe lena chinntiú nach bhfágfar aon duine, pobal, earnáil ná réigiún ar gcúl.”

Chuir an tUasal Timmermans in iúl gurb í an ghné shóisialta san aistriú glas an chloch is mó ar phaidrín an Choimisiúin i bhfianaise a dhona atá na héagothromaíochtaí sóisialta tar éis dóibh imeacht chun donais mar gheall ar an bpaindéim. Thug sé cuntas ar na príomhghnéithe den phacáiste “Fit for 55” atá le seoladh an 14 Iúil (astaíochtaí gás ceaptha teasa a laghdú faoi 55 %).

Leis an bpacáiste, déanfar deimhin de go bhfuil “an chothroime shóisialta fite fuaite leis na tograí nua”, arsa an tUasal Timmerans, trí:

• an t-ualach oibre maidir le gníomhú ar son na haeráide a roinnt go cothrom idir na tionscail, na rialtais agus daoine aonair, agus;
• sásra sóisialta a thabhairt isteach chun an tionchar atá ag bearta, ar nós trádáil astaíochtaí a smaoinítear ar a leathnú go breoslaí téimh agus iompair, ar na daoine is leochailí a mhaolú.

“Ní mór dúinn teaghlaigh leochaileacha a chosaint i gcoinne méaduithe a d’fhéadfaí a chur i bhfeidhm ar phraghsanna breoslaí téimh agus iompair, go háirithe i réigiúin nach bhfuil teacht éasca ar roghanna glana iontu,” arsa an tUasal Timmermans. “Mar sin, dá mbeimis chun trádáil astaíochtaí a thabhairt isteach maidir leis na breoslaí sin, d’fhágfadh sé sin go mbeadh orainn a bheith níos dáiríre fós faoinár dtiomantas don chothroime shóisialta. Ag an am céanna, bheadh gá le togra maidir leis an tionchar sóisalta a chuirfí isteach taobh le haon togra a bhaineann le trádáil astaíochtaí sna hearnálacha nua sin.”

Mar chuid den díospóireacht, mhínigh CESE don Uasal Timmermans conas mar a d’fhéadfaí comhaontú sóisialta a chur i dtoll a chéile mar ghné lárnach den Chomhaontú Glas. Tá na tograí, arna leagan amach ag an rapóirtéir Norbert Kluge i dtuairim dar teideal Ní bheidh aon Chomhaontú Glas gan comhaontú sóisialta, dírithe ar rannpháirtíocht níos láidre na n-oibrithe sa chinnteoireacht chorparáideach agus ar an bhfreagracht shóisialta chorparáideach.

“Creidimid gur féidir linn, trí ghlór na n-oibrithe a thabhairt isteach, feabhas a chur ar cháilíocht na gcinntí eacnamaíocha a dhéanann cuideachtaí agus iad i mbun aistriú chuig samhail ghlas”, arsa an tUasal Kluge.

“Go hiondúil, is gnáth go dtugtar tús áite san fhaisnéis, comhairliúchán agus rannpháirtíocht ar leibhéal na bhfostaithe do chur chuige níos fadtréimhsí agus d’fheabhas a chur ar cháilíocht na cinnteoireachta i gclár oibre athchóirithe eacnamaíoch.” arsa an tUasal Kluge.

É sin ráite, cuireann CESE i bhfáth gur cinnte nach mbaineann comhaontú sóisialta, mar chuid riachtanach de chomhaontú glas nua, le hobair amháin. Baineann sé le hioncam, slándáil shóisialta agus tacaíocht fhioscach do gach duine a bhfuil gá acu léi, lena n-áirítear iad siúd nach bhfuil aon rochtain acu ar obair ar chor ar bith. (dm)

I measc phríomhthosaíochtaí an Aontais sna blianta beaga amach romhainn, ní mór geilleagar an Aontais a chur ar bhóthar a leasa athuair chun aistriú inbhuanaithe a bhaint amach agus rathúnas a chur ar fáil do mhuintir agus do ghnólachtaí na hEorpa. Is é sin príomhéirim an Rúin maidir le hionchur CESE i gclár oibre an Choimisiúin Eorpaigh do 2020, a glacadh ag seisiún iomlánach CESE i mí an Mheithimh.

Chuir CESE in iúl sa rún a thábhachtaí a bheidh an téarnamh agus an atógáil i ndiaidh na paindéime. Ní mór infheistíocht agus athchóirithe araon a chur i bhfeidhm chun an ghéarchéim eacnamaíoch agus shóisialta a shárú agus chun athléimneacht na hEorpa a threisiú in aghaidh suaití amach anseo, rud ba cheart a bheith bunaithe ar an bhfás cuimsitheach inbhuanaithe, ar obair chuibhiúil agus ar cheartas sóisialta.

Ba cheart an méid seo a leanas a bheith i gceist leis na príomhcholúin:

• leas iomlán a bhaint as acmhainneacht an Mhargaidh Aonair;
• Spriocanna Forbartha Inbhuanaithe a bhaint amach;
• geilleagar ciorclach a chruthú agus aeráidneodracht a bhaint amach faoi 2050;
• an dea-rialachas agus an chuntasacht dhaonlathach a áirithiú.

Agus í ag trácht ar ghlacadh an Rúin, bhí an méid seo a leanas le rá ag Uachtarán CESE, Christa Schweng: “Tá súil agam go gcuirfidh moltaí CESE, a rinneadh i bhfad roimh ré, ionchur luachmhar ar fáil maidir le clár oibre an Choimisiúin atá le teacht. Tá CESE lántiomanta i gcónaí tacaíocht a thabhairt do na sé phríomhuaillmhian de chuid an Choimisiúin agus do chomhlíonadh a róil trí idirphlé laistigh den tsochaí shibhialta agus leis na hinstitiúidí Eorpacha a éascú d’fhonn na huaillmhianta sin a chur i bhfeidhm”.

Dúirt Christa Schweng freisin go ndéanfaí próiseas fíordhaonlathach den phróiseas téarnaimh agus athmhúnlúcháin i leith thodhchaí na hEorpa má tá gach saoránach rannpháirteach ann trí mheán eagraíochtaí na sochaí sibhialta: “Táim ag brath ar an gCoimisiún moltaí shochaí shibhialta eagraithe na hEorpa a chur san áireamh agus tosaíochtaí na bliana seo chugainn á leagan síos aige.”

Agus an ailse ar tí iompú ina príomhchúis bháis san Aontas, níl amhras ar bith ach gur tráthúil é Plean na hEorpa um Shárú na hAilse Is díol mór sásaimh do CESE an plean seo óir is cloch mhíle é sa chomhrac in aghaidh na hailse. Mar sin féin, i bhfianaise na n-éagothromaíochtaí réigiúnacha agus sóisialta nár réitíodh go fóill, is léir go bhféadfaí cúrsaí a fheabhsú tuilleadh fós.

Tacaíonn CESE go láidir le plean nua de chuid an Choimisiúin ar fiú EUR 4 bhilliún é chun gníomhaíocht i gcoinne na hailse a mhaoiniú, arb é sin an chéad doiciméad straitéise a cuireadh le chéile ó bhí 1990 ann ina ndírítear ar an gcomhrac i gcoinne an sciúirse seo.

“Tá Plean Marshall nua i leith na hoinceolaíochta de dhíth ar an Aontas agus is céim sa treo ceart é sin. Ní féidir linn an deis seo a chur amú”, a dúirt Małgorzata Anna Bogusz, rapóirtéir na tuairime ó CESE maidir le Plean na hEorpa um Shárú na hAilse.

“Tá an straitéis oiriúnach don fheidhm atá léi ós rud é go gcumhdaítear roinnt mhaith de na príomhghnéithe den chomhrac in aghaidh na hailse inti”, arsa Milena Angelova, comhrapóirtéir na tuairime.

Déantar an bhásmhaireacht agus an ghalracht ailse a chomhghaolú leis an gcineál ailse, le suíomh an othair agus lena ghrádán sóisialta. Ní mór aird a dhíriú ar na neamhréireachtaí ó thaobh bonneagar réigiúnach de agus ar na héagothromaíochtaí sóisialta ó thaobh fostaíochta agus inscne de.

Molann CESE do na Ballstáit a bheith réamhghníomhach agus é á chur i bhfáth aige an gá atá le foirmeacha den ailse cheirde a chosc go héifeachtach. Chuige sin, iarrann sé go ndéanfaí tuilleadh taighde ar nochtadh do charcanaiginí, só-ghineacha agus suaiteoirí inchríneacha agus ar na cúiseanna atá leis an ailse cheirde, go háirithe i gcás na mban.

Agus an meall mór ar deireadh, leagtar béim sa tuairim ar an bpríomhról atá ag na comhpháirtithe sóisialta agus ag eagraíochtaí na sochaí sibhialta a mhéid a bhaineann le múscailt feasachta agus feachtais chun stíl mhaireachtála shláintiúil a chur chun cinn. (at)

Tá sé geallta go tréan ag Coiste Eacnamaíoch agus Sóisialta na hEorpa (CESE) oibriú go leanúnach i gcomhar leis an gCoimisiún Eorpach agus le hinstitiúidí AE eile chun bunluachanna an Aontais a chosaint agus a chur chun feidhme, go háirithe an smacht reachta, na cearta bunúsacha agus an daonlathas.

Sa díospóireacht maidir le luachanna Eorpacha le Didier Reynders, an Coimisinéir Eorpach um Cheartas, a tionóladh ag an seisiún iomlánach a reáchtáil CESE an 10 Meitheamh, d’iarr an Coiste go mbeadh eagraíochtaí na sochaí sibhialta rannpháirteach ar bhealach níos mó ar leibhéal an Aontais ar mhaithe le rannpháirtíocht a leathnú go réimsí eile de bhreis ar thoghcháin agus idirphlé sibhialta fiúntach a éascú. Chomh maith leis sin, leag comhaltaí CESE béim ar leith ar an tábhacht atá le cearta sóisialta agus eacnamaíocha a aithint mar bhunluachanna AE.

Le linn an tseisiúin iomlánaigh, rinne CESE tuairimí uaidh maidir leis an bPlean Gníomhaíochta um an Daonlathas Eorpach (EDAP) agus an Straitéis nua maidir leis an gCairt um Chearta Bunúsacha a chur chun feidhme a chur i láthair agus a ghlacadh, tuairimí ina léiríonn sé a thacaíocht do thionscnaimh nua an Choimisiúin arb é is aidhm dóibh luachanna daonlathacha agus cearta na saoránach san Aontas a chosaint.

Seo mar a labhair Christa Schweng, Uachtarán CESE: “Tá amhras á chaitheamh ar luachanna an Aontais i ngach áit; ní féidir slán talamh a dhéanamh díobh, fiú i dtíortha ina bhfuil traidisiúin dhaonlathacha sheanbhunaithe. I dtaca le freagairt an Aontais, tá an tsochaí shibhialta ag súil le cuid mhaith agus teastaíonn uaithi a bheith rannpháirteach sa phlé náisiúnta agus sa phlé Eorpach maidir le cosaint na luachanna sin.”

Bhí an méid seo a leanas le rá ag an Uasal Reynders: “Chun dul i ngleic le cuid mhaith de na fadhbanna, tá gá le cur chuige cuimsitheach ón tsochaí agus le comhar idirnáisiúnta ina bhfeicfear iarracht chomhordaithe ar thaobh na rialtas, na sochaí sibhialta, taighdeoirí agus seiceálaithe firicí, na hearnála príobháidí, na meán agus na saoránach. Is díol sásaimh dom go bhfuil bhur gCoiste ag comhoibriú go tairbheach i ndáil leis sin.”

Sa tuairim maidir leis an straitéis i leith na Cairte, d’iarr CESE go mbeadh bearta ann chun eagraíochtaí na sochaí sibhialta a chosaint agus chun tacú leo. Ba cheart sásra foláirimh a bheith san áireamh sna bearta sin chun ciapadh a aithint agus a thuairisciú. Chomh maith leis sin, d’iarr an Coiste go dtabharfaí ról níos mó do na comhpháirtithe sóisialta maidir leis na cearta atá leagtha síos sa Chairt a chur chun cinn agus a chur chun feidhme.

Sa tuairim maidir le EDAP, mhol CESE don Choimisiún colún speisialta a chur leis an bplean a bheadh tiomnaithe do rannpháirtíocht na sochaí sibhialta agus na gcomhpháirtithe sóisialta, agus do chur chun cinn dhaonlathas an tsaothair. Dúirt an Coiste go raibh díomá air nár tugadh aghaidh in EDAP ar an ról tábhachtach atá ag an idirphlé sóisialta agus ag an gcómhargáil chun éagothromaíochtaí a laghdú agus muintir na hEorpa a spreagadh chun glacadh le hidéil dhaonlathacha. (ll)

Bhí an 10ú heagrán de Lá an Tionscnaimh Eorpaigh ó na Saoránaigh (TES) ar siúl go heisceachtúil ar líne i mbliana agus ar feadh dhá lá seachas lá amháin. Rinne Uachtarán CESE, Christa Schweng, Leas-Uachtarán an Choimisiúin Eorpaigh, Věra Jourová, agus Leas-Uachtarán Pharlaimint na hEorpa, Pedro Silva Pereira, measúnú ar chás na hionstraime uathúla seo a bhaineann leis an daonlathas rannpháirtíochta.

Ina ráiteas tosaigh, chuir Christa Schweng i dtábhacht go bhfuil an tionchar a bhíonn ag próiseas rannpháirtíochta ar cheann de na príomhghnéithe a bhaineann le próiseas den chineál sin: “Feictear díomá, neamhshuim agus frustrachas i measc saoránach mura mbíonn dea-thionchar ag an bpróiseas.” Bhí an méid seo le rá aici freisin: “Is tríd an tionchar atá ag TES a mhéadú is fearr is féidir uirlis láidir a dhéanamh de lena bhféadfar nasc nua a chruthú idir an tAontas agus na saoránaigh.”

Go dtí seo, ní raibh ach sé thionscnamh ann ó 2012 i leith a raibh an líon is gá sínithe acu agus ba bheag agus ba mhall an tionchar a bhí acu. Mar sin féin, tá cúiseanna dóchais ann sa mhéid gur tháinig an chéad dá phíosa reachtaíochta arna spreagadh ag TES i bhfeidhm in 2021: an Treoir maidir le hUisce Óil a raibh tionchar ag Tionscnamh Right2Water uirthi agus Rialachán na Trédhearcachta (mar a thugtar air) ar cuid é den obair a lean an Tionscnamh Ban Glyphosate.

Sa teachtaireacht físeáin uaithi, tharraing Věra Jourová aird ar na hathruithe agus na feabhsuithe a tugadh isteach leis an Rialachán nua maidir le TES, a tháinig i bhfeidhm i mí Eanáir 2020. Mhínigh sí ansin go dtéann fíorthionchar thionscnaimh TES níos faide ná reachtaíocht bhreise: “Is iomaí tionchar a d’fhéadfadh a bheith fiú ag na tionscnaimh sin nach mbaineann céimeanna foirmiúla deiridh an phróisis amach,” a dúirt sí. “Ón uair a chuireann saoránaigh tús le tionscnamh TES, bíonn an cheist a bhfuil suim acu inti tugtha isteach sa spás poiblí acu. Músclaítear feasacht leis seo agus bíonn dea-thionchar mar thoradh air.”

Dúirt an tUasal Silva Pereira go raibh an díospóireacht á stiúradh go fóill ag Parlaimint na hEorpa maidir leis an gcaoi is fearr le feasacht a mhúscailt i dtaca le TES agus ar an mbealach ar féidir feabhas a chur ar an gcaoi a n-oibríonn sé: “Tá sé tábhachtach a áirithiú, má éiríonn le tionscnamh an chéim dheiridh a bhaint amach, go ndéanfar machnamh domhain air agus go dtabharfar aghaidh cheart air.” (na)

I bhfianaise a gcaiteachais bhliantúil de thuairim is 14% (nó €2 thrilliún) de OTI iomlán an Aontais, is iad na rialtais na tomhaltóirí is mó san Eoraip. Eascraíonn a gcaiteachas go príomha as tairiscintí poiblí chun oibreacha, seirbhísí agus soláthairtí a cheannach ó chuideachtaí.

Rinneadh obair shuntasach le blianta beaga anuas san Aontas chun údaráis phoiblí a spreagadh patrúin tomhaltais níos inbhuanaithe a ghlacadh, ar patrúin iad a théann thar na riachtanais ghearrthéarmacha agus a chuireann tionchair fhadtéarmacha gach ceannacháin san áireamh.

Ó 2017 i leith, tá treoir eisithe ag an gCoimisiún Eorpach i bhfoirm na gcritéar maidir le Soláthar Poiblí Glas lena dtugtar isteach gnéithe an gheilleagair chiorclaigh de réir a chéile d’fhonn lúba ábhair agus fuinnimh i slabhraí soláthair a dhúnadh agus lena laghdaítear an tionchar diúltach ar an gcomhshaol agus cruthú dramhaíola ag an am céanna.

É sin ráite, ní raibh ach tionchar beag ag na bearta sin ós rud é gur comhlíonadh deonach atá i gceist. Creideann CESE gur mithid íoscheanglas éigeantach a thabhairt isteach i leith na gcritéar maidir le Soláthar Poiblí Glas agus borradh láidir a chur faoin ngeilleagar ciorclach trí threoracha maidir le soláthar poiblí agus reachtaíocht a bhaineann le hearnálacha sonracha.

Cuirfidh an soláthar poiblí ciorclach ar a gcumas do lucht riaracháin dul níos faide ná an critéar praghais is ísle tráth an cheannaigh.

“Is minic a mheastar go bhfuil conspóid ag baint leis an soláthar toisc go mbíonn na critéir roghnúcháin do thionscadail thar a bheith aontaobhach i bhfad rómhinic. Ní chuirtear an tionchar saolré nó an méid a bhaintear amach le tionscadal san áireamh”, arsa an tUasal Wyckmans. “Ba cheart droim láimhe a thabhairt leis an smaoineamh gur cheart an praghas is ísle a bheith mar an t-aon critéar leithdháilte agus cur chuige a chuireann 'luach ar airgead' ar fáil a ghlacadh, lena gcuimsítear nuálaíocht, caighdeán na dtáirgí agus seirbhísí, inbhuanaitheacht, glasú agus tionchar sóisialta.”

Tá roinnt teimpléad maidir le costáil saolré forbartha ag an gCoimisiún Eorpach cheana féin agus tá fáil ag soláthróirí orthu saor in aisce chun gur féidir leo iad a sheiceáil i gcomparáid le táirgí agus seirbhísí. Leis na huirlisí sin, is féidir leis na húdaráis phoiblí costais saolré an táirge, na hoibre nó na seirbhíse ó chéim an cheannacháin, na hoibríochta agus na cothabhála go dtí deireadh na saolré a chur san áireamh. Creideann CESE gur cheart na teimpléid sin a uasghrádú ionas go gcuirfear an costas carbóin san áireamh.

Ina theannta sin, creideann CESE go bhfuil sé ríthábhachtach a áirithiú go mbeidh deis ag fiontair bheaga agus mheánmhéide tairiscintí a chur isteach ar chonarthaí poiblí ciorclacha agus go bhfaighidh siad an cúnamh atá ag teastáil uathu. Tá acmhainneacht ollmhór ag baint leis na fiontair sin ach tá baol ann go gcuirfear i leataobh iad mar gheall ar chastacht an nós imeachta. Ní féidir leo cur le tairiscintí áitiúla agus tairiscintí atá dírithe ar an duine ach amháin má chuirtear an tacaíocht riachtanach ar fáil. (dm)

Is díol sásaimh do CESE an tionscnamh ón gCoimisiún maidir le bearta ceangailteacha trédhearcachta pá. Measann sé, áfach, gur cheart an treoir atá beartaithe a neartú i roinnt réimsí agus bearta breise a dhéanamh chun aghaidh a thabhairt ar na bunchúiseanna atá leis an mbearna phá idir na hinscní.

Sa tuairim uaidh a glacadh an 9 Meitheamh, chuir CESE in iúl gur díol sásaimh dó an togra ón gCoimisiún le haghaidh treoir maidir le bearta ceangailteacha trédhearcachta pá, lena gcuideofar le hoibrithe a gceart chun pá comhionainn a fhorfheidhmiú i gcásanna ina mbíonn siad thíos le hidirdhealú pá.

Os a choinne sin, measann CESE nach mór an treoir atá beartaithe a neartú i roinnt réimsí, lena n-áirítear na critéir a úsáidtear chun luach na hoibre, raon feidhme roinnt bearta trédhearcachta agus ról na gcomhpháirtithe sóisialta agus na cómhargála a chinneadh.

Pá comhionann agus obair ar comhionann a luach

Tá feidhm ag prionsabal “an phá chomhionainn as obair ar comhionann a luach” maidir le “catagóirí oibrithe”, ar catagóirí iad a bheidh sonraithe ag an bhfostóir faoin togra ón gCoimisiún. Tá CESE den tuairim go bhfuil sé ríthábhachtach go mbeidh sásraí ann chun a chinntiú go ndéantar catagóirí oibrithe a eagrú ar bhealach atá inscne-neodrach agus a mbeidh ionadaithe na n-oibrithe agus na gceardchumann rannpháirteach iontu, i gcomhréir leis an dlí agus an cleachtas náisiúnta.

Le bearta breise arb é is aidhm dóibh aghaidh a thabhairt ar na saincheisteanna struchtúracha is cúis leis an mbearna phá idir na hinscní, ba cheart na nithe seo a leanas a chur san áireamh: cúram leanaí leordhóthanach agus inrochtana, tionscnaimh múscailte feasachta, ionadaíocht níos fearr do mhná i bpoist chinnteoireachta a chinntiú agus deireadh a chur le dídhreasachtaí cánach maidir le fostaíocht na mban. Tá an tuarascáil le fáil ina hiomláine anseo. (na)

Ní mór don Aontas cuspóirí uaillmhianacha eacnamaíocha a leagan síos d’fhonn an euro a neartú. Tá tábhacht leis seo, murab ionann is riamh, i bhfianaise a thapa atá an geilleagar domhanda ag athrú agus i bhfianaise an róil atá ag an Aontas faoi láthair ó thaobh nuálaíochta agus iomaíochais de agus ó thaobh timpeallacht atá fabhrach don infheistíocht a chothú.

I dtuairim uaidh a glacadh ag an seisiún iomlánach a bhí aige i mí an Mheithimh 2021, chuir CESE in iúl gur dhíol sásaimh dó an Teachtaireacht ón gCoimisiún The European economic and financial system: fostering openness, strength and resilience [Córas eacnamaíoch agus airgeadais na hEorpa: oscailteacht, neart agus athléimneacht á gcothú]. Mar gheall ar an gclaochlú de thoradh na paindéime, tá athrú suntasach tagtha ar chothromaíocht na cumhachta eacnamaíche ar fud an domhain. Ba cheart don Aontas Eorpach, dá bhrí sin, beart a dhéanamh go tapa chun cur le hathléimneacht eacnamaíoch na hEorpa. Go háirithe, aontaíonn CESE gur gá ról idirnáisiúnta an euro a neartú chun go mbeadh sé ina uirlis lárnach maidir le ról na hEorpa sa domhan a neartú.

Bhí Tomasz Wróblewski (Grúpa I, Grúpa na bhFostóirí) ina rapóirtéir ar an tuairim seo ó CESE. Dar leis, ba cheart don Choimisiún díriú níos mó ar na cúiseanna a bhfuil ról idirnáisiúnta an euro ag dul i laige. “Cé gur fíor go bhfuil staid dhomhanda an euro ag dul i laige, tá staid an dollar ag dul i laige ar ráta níos tapa fós,” a dúirt sé. “Ina ainneoin sin, bíonn tionchar ag nithe éagsúla ar staid an euro.” Ar an gcéad dul síos, níl ann do chómhargadh chomhtháite le haghaidh seirbhísí airgeadais. Mura gcuirtear an tAontas Baincéireachta agus Aontas na Margaí Caipitil i gcrích, beidh sé deacair dul in iomaíocht leis an dollar.”

Molann CESE aird bhreise a thabhairt ar gheilleagair na Síne atá ag fás go gasta agus iarrann sé plean gníomhaíochta a bheith ann a chuireann an méid sin san áireamh. Tá ról renminbi na Síne ag dul i méid sa trádáil agus san imréiteach idirnáisiúnta. Tá an tSín ag obair go dian freisin ar a hairgeadra digiteach, rud a fhágann go bhfuil an tSín chun tosaigh ar an gcuid is mó den domhan. Ní mór don Aontas freagairt go gasta agus tá CESE i bhfách leis an togra maidir le euro digiteach a chruthú. Seo an méid a dúirt Tomasz Wróblewski: “D’fhéadfadh sé go mbeadh réitigh níos tarraingtí ag an Eoraip sa réimse seo i bhfianaise a thiomanta atáimid do chosaint sonraí pearsanta agus do phríobháideachas úsáideoirí.” (na)

Ag comhdháil bhliantúil a Ghrúpa um an Seimeastar Eorpach a tionóladh go cianda an 31 Bealtaine thug CESE foláireamh gur fada ó bheith sásúil í rannpháirtíocht eagraíochtaí na sochaí sibhialta i bhformhór thíortha an Aontais.

Ghlac príomhchainteoirí ó institiúidí an Aontais, Comhairlí Eacnamaíocha agus Sóisialta Náisiúnta, meithleacha machnaimh agus eagraíochtaí sochaí sibhialta an Aontais páirt sa chomhdháil Eoraip athléimneach a thógáil – an tsochaí shibhialta agus na Pleananna Náisiúnta Téarnaimh agus Athléimneachta. Díríodh sa chomhdháil ar thrí ábhar: rannpháirtíocht eagraíochtaí na sochaí sibhialta sna Pleananna Náisiúnta Téarnaimh agus Athléimneachta, aistriú cóir i dtreo geilleagair Eorpaigh atá glas, digiteach agus inbhuanaithe agus cur chun feidhme cholún Eorpach na gceart sóisialta.

Chuir Christa Schweng, Uachtarán CESE, tús leis an díospóireacht agus í ag cur béime ar an dúshlán a bhaineann le réimse féidearthachtaí nua a dhéanamh den ghéarchéim reatha. Dúshlán ar leith is ea tairbhe a bhaint as acmhainneacht na Saoráide Téarnaimh agus Athléimneachta: “Ní dheachaigh formhór na mBallstát i mbun comhairliúchán leordhóthanach leis an tsochaí shibhialta eagraithe nó rinne siad a leithéid ródhéanach”, a dúirt an tUachtarán. Is éard atá againn faoi láthair sraith Pleananna Náisiúnta Téarnaimh agus Athléimneachta atá an-éagsúil óna chéile ó thaobh cáilíochta agus modheolaíochta de agus, le fírinne, tá amhras orainn go bhfuil na riachtanais ar an láthair á gcomhlíonadh ag na pleananna sin.”

Dúirt Uachtarán Chomhairle Eacnamaíoch agus Shóisialta na hIodáile (CNEL), Tiziano Treu, gurb é ról na Comhdhála ar Thodhchaí na hEorpa foirm nua rialachais Eorpaigh a leagan amach, ar foirm í is gá a dhéanamh níos simplí agus níos éifeachtaí agus nach mór rialacha cuí a bheith mar chuid di chun rannpháirtíocht na sochaí sibhialta eagraithe a chinntiú.

“Beidh 'Colún Saoránachta' níos láidre, lena gcuimsítear an tsochaí shibhialta eagraithe agus údaráis réigiúnacha agus áitiúla, i gcomhar le parlaimintí náisiúnta, ríthábhachtach chun a chinntiú go ndéanfar faireachán ceart ar phróisis athchóirithe agus infheistíochtaí agus chun rannpháirtíocht riachtanach na ngeallsealbhóirí dlisteanacha a bhaint amach”, arsa Leas-Uachtarán an Ghrúpa um an Seimeastar Eorpach, Luca Jahier. (na)

D’fhonn rannchuidiú le Cruinniú Mullaigh 2021 na Náisiún Aontaithe maidir le Córais Bhia, reáchtáil CESE éisteacht ar líne an 28 Bealtaine chun leochaileachtaí agus neamhionannais i gcórais bhia na hEorpa a fhiosrú agus chun a shainaithint conas slabhraí soláthair atá níos cothroime agus níos córa a bhaint amach. Chuir cainteoirí ardleibhéil ó na Náisiúin Aontaithe, ón gCoimisiún Eorpach agus ó Pharlaimint na hEorpa a dtuairimí i láthair faoi na hathruithe is gá a dhéanamh chun cothromas, cothroime agus cur chuige atá bunaithe ar chearta an duine a neartú san aistriú i dtreo córais bhia atá níos inbhuanaithe.

Gairm chun gnímh agus chun athruithe a dhéanamh ab ea paindéim COVID-19. In ainneoin feirmeoirí agus oibrithe an chórais bia a bheith ar an líne thosaigh ag comhrac in aghaidh ghéarchéim COVID-19 agus bia a bheith á sholáthar acu gan staonadh do mhuintir na hEorpa ar fad, dar le Andreas Thurner, Uachtarán Ghrúpa Téamach Staidéir CESE um Córais Bhia Inbhuanaithe, "go bhfuil sé léirithe ag an ngéarchéim seo nach féidir talamh slán a dhéanamh de gur féidir bia a sholáthar ‘ón bhfeirm go dtí an forc’".

Tá roinnt tograí agus smaointe sonracha forbartha ag CESE le himeacht ama, agus is féidir iad a rangú go hachomair i gcúig thacar moltaí a chuirfidh bonn eolais faoi Chruinniú Mullaigh na Náisiún Aontaithe maidir le Córais Bhia:

I. Beartais bhia chuimsitheacha agus chomhtháite a chothú;

II. Aistí bia níos sláintiúla agus níos inbhuanaithe a chur chun cinn;

III. Praghsanna córa a áirithiú agus cleachtais éagóracha trádála a thoirmeasc;

IV. Cur le hacmhainneacht slabhraí soláthair bia gairide agus na hagrai-éiceolaíochta;

V. Rannpháirtíocht struchtúrtha agus rannpháirtíocht na sochaí sibhialta a áirithiú.

Tacaíonn CESE le glasú an iompair, ach cuireann sé i dtábhacht nach mór don aistriú fuinnimh a bheith cothrom agus roghanna réadúla inmharthana a chur ar fáil lena gcuirfear gnéithe agus riachtanais shonracha eacnamaíocha agus shóisialta na réigiún uile san Eoraip san áireamh, lena n-áirítear ceantair thuaithe.

Is é sin an phríomhtheachtaireacht a chuirtear chun tosaigh sa tuairim a dhréachtaigh Pierre Jean Coulon agus Lidija Pavić-Rogošić agus a glacadh ag seisiún iomlánach CESE i mí an Mheithimh. Ghlac CESE seasamh docht sa mheasúnú uaidh ar Pháipéar Bán 2011 maidir le hIompar, arb é is aidhm dó deireadh a chur le spleáchas an chórais iompair ar ola gan dochar a dhéanamh don éifeachtúlacht ná an tsoghluaisteacht a chur i mbaol.

Ní ghlacfar le srian a chur le modhanna iompair: cómhódúlacht an aidhm ba cheart a bheith ann seachas aistriú córa iompair. Ina theannta sin, ní mór don aistriú éiceolaíoch a bheith cothrom ó thaobh na sochaí de agus iomaíochas an iompair Eorpaigh a chaomhnú, agus an Limistéar Iompair Eorpach á chur chun feidhme ina iomláine mar chuid den Mhargadh Aonair. Is trua go bhfuil moilleanna ann i ndáil leis sin.

“Ní ghlacfar ach an oiread le srian a chur leis an tsoghluaisteacht. Tacaímid le haon bheart arb é is aidhm dó an t-iompar a dhéanamh níos éifeachtúla ó thaobh fuinnimh de agus astaíochtaí a laghdú,” arsa an tUasal Coulon. “Tréimhse achrannach atá ann don Eoraip faoi láthair, ach níor cheart athrú cúrsa a bheith mar thoradh air sin i ndáil le hionchais shóisialta agus chomhshaoil na dtionscnamh Eorpach éagsúil.”

Molann CESE freisin malartú barúlacha atá oscailte, leanúnach agus trédhearcach a bheith ann i dtaca le cur chun feidhme an Pháipéir Bháin. “Tarraingíonn an Coiste aird ar an tábhacht a bhaineann le tacaíocht na sochaí sibhialta agus na ngeallsealbhóirí a chinntiú, lena n-áirítear trí idirphlé rannpháirteach”, a dúirt Pavić-Rogošić. “Beidh tuiscint mhaith ar na spriocanna straitéiseacha agus glacadh ginearálta leo an-chabhrach chun dea-thorthaí a bhaint amach.” (mp)

An 17 Meitheamh, reáchtáil Coiste Eacnamaíoch agus Sóisialta na hEorpa (CESE) agus an Coimisiún Comhairleach um Athrú Tionsclaíoch (CCMI) in CESE díospóireacht bhríomhar inar scrúdaíodh tuairimí na sochaí sibhialta eagraithe tar éis don Choimisiún Eorpach an nuashonrú ar an Straitéis Tionsclaíochta Nua a fhoilsiú. Sa díospóireacht sin, arb í an chéad díospóireacht í mar chuid de shraith comhghníomhaíochtaí le rannóga CESE ar an ábhar, ceistíodh an bhfuil go leor gnéithe sa straitéis nuashonraithe chun feabhas a chur ar athléimneacht agus neamhspleáchas straitéiseach thionscal an Aontais. 

An 5 Bealtaine 2021, nuashonraigh an Coimisiún Straitéis Tionsclaíochta an Aontais chun a chinntiú go gcuirfear san áireamh i bhfís na straitéise maidir le hearnáil na tionsclaíochta go bhfuil cúinsí nua ann anois i bhfianaise ghéarchéim COVID-19 agus go spreagfar an t-aistriú chun geilleagar níos inbhuanaithe, níos digití, níos athléimní, agus atá níos iomaíche ar fud an domhain, a chur ar bun.

Dúirt Pietro Francesco De Lotto, Cathaoirleach CCMI agus an cathaoirleach a bhí ar an díospóireacht freisin, go bhfuil: “dlús curtha ag paindéim COVID-19 le go leor próiseas a bhí ar siúl cheana féin. Ní fhacthas riamh an luas a raibh ar an tsochaí agus ar an tionscal próisis digitithe a ghlacadh le 16 mhí anuas agus is athruithe ceannródaíocha atá feicthe againn; ar an gcéad dul síos, na slabhraí soláthair, ansin an trealamh leighis agus, ina dhiaidh sin, na vacsaíní. ”

Chuir Alain Coheur, Cathaoirleach ar an Rannóg um an Margadh Aonair, Táirgeacht agus Tomhaltas (INT), a bhí ina chomhchathaoirleach ar an díospóireacht, síos ar an gcomhthéacs ina ndéantar obair an dara painéal, agus dúirt: “Thug an ghéarchéim saincheisteanna eile chun tosaigh, saincheisteanna nach raibh luaite sa chéad Teachtaireacht maidir leis an straitéis tionsclaíochta i mí an Mhárta 2020. Ní mór an ghéarchéim seo a fheiceáil mar dheis chun neamhspleáchas tionsclaíoch a thabhairt don limistéar Eorpach”.

Dúirt Anthony Whelan, comhairleoir digiteach dʼUachtarán an Choimisiúin Eorpaigh, Ursula Von der Leyen, agus é ag cur uirlisí an Choimisiúin i láthair chun spleáchas an Aontais a mheas: “Inár gcleachtadh ón mbun aníos, dʼaithníomar líon an-teoranta réimsí ina bhfuil an tAontas ina iomláine i gcleithiúnas a chuireann imní orainn.”

Beidh sraith díospóireachtaí ag CESE ar an straitéis tionsclaíochta: seacht gcinn de sheimineáir ghréasáin, ag tosú leis an gceann reatha an 17 Meitheamh. Tá díospóireacht deiridh ardleibhéil beartaithe do mhí an Mhárta 2022. (ks)

Tháinig an Coiste Leantach um Chaidreamh Trasatlantach, a chuir CESE ar bun, le chéile cúpla lá roimh an gcruinniú mullaigh ardleibhéil AE-SAM chun plé a dhéanamh ar réimse leathan ábhar atá tábhachtach don tsochaí shibhialta, go mór mór an t-athrú aeráide agus cúrsaí trádála.

"Is údar mór misnigh a bhfuil ag tarlú i dtaca leis na hábhair sin ar dhá thaobh an Aigéin Atlantaigh", arsa Christian Moos, Uachtarán an Choiste Leantaigh um Chaidreamh Trasatlantach in CESE.

Dheimhnigh David Livingston, comhairleoir sinsearach do Thoscaire Speisialta Uachtaránachta na Stát Aontaithe maidir leis an Aeráid John Kerry, go raibh rialtas reatha SAM lántiomanta anois cuspóirí Chomhaontú Pháras a chomhlíonadh agus tuilleadh a dhéanamh ina theannta sin. “Ní chuirfear suas”, a dúirt sé, “le mórthíortha tábhachtacha a ligfidh 2021 tharstu gan a Rannchuidithe arna gCinneadh go Náisiúnta a thabhairt cothrom le dáta go mór óir is dlúthchuid lárnach de Chomhaontú Pháras iad.”

“A bhuí le rannpháirtíocht ghníomhach na sochaí sibhialta sna Stáit Aontaithe agus san Aontas Eorpach agus i dtíortha eile, bhí SAM in ann leanúint de bheith rannpháirteach, in ainneoin easpa tiomantais ón rialtas a bhí in oifig roimhe seo”, a dúirt Elina Bardram, ó Ard-Stiúrthóireacht an Choimisiúin Eorpaigh um Ghníomhú ar son na hAeráide (DG CLIMA).

Chuir Emilie Bel, saineolaí ó Chomhairle an Atlantaigh, i bhfios go láidir go raibh muintir na hEorpa réidh chun clár oibre dearfach trádála a chur i dtoll a chéile ar bhonn lánchothrom.

Dhearbhaigh Marjorie Chorlins ó Chomhlachas Tráchtála na Stát Aontaithe, in ainneoin na suaiteachta polaitiúla trasatlantaí agus an chúlaithe eacnamaíochta a tharla de dheasca COVID-19, go raibh na Stáit Aontaithe agus an Eoraip fós ar na margaí ba thábhachtaí dá chéile. Léiríodh i dTuarascáil 2021 maidir leis an nGeilleagar Trasatlantach, a foilsíodh le déanaí, gurb iad an dá chomhpháirtí sin faoi deara sciar suntasach den tomhaltas domhanda agus den OTI domhanda. 

Leag Tanja Buzek, Uachtarán an Choiste Leantaigh um Thrádáil Idirnáisiúnta in CESE, béim ar a thábhachtaí atá rannpháirtíocht na sochaí sibhialta ar mhaithe le beartas trédhearcach trádála agus ar an ngá atá le comhrialtais láidre chun an Eagraíocht Dhomhanda Trádála a athchóiriú. (at)

Sa dara leath de 2021 beidh Uachtaránacht Chomhairle an Aontais Eorpaigh ag an tSlóivéin den dara huair. Agus den dara huair is ag tráth cinniúnach don Eoraip a tharlóidh sin.

In 2008, bhí ar an Aontas dul i ngleic leis an ngéarchéim airgeadais agus inniu féin tá sé ag streachailt leis na hiarmhairtí sóisialta agus eacnamaíocha a bhaineann le paindéim COVID-19. Ní haon ionadh, dá bhrí sin, go bhfuil ullmhacht agus athléimneacht an Aontais i leith géarchéimeanna, go háirithe i réimse na sláinte, ar phríomhthosaíochtaí Uachtaránacht na Slóivéine, chomh maith le saincheisteanna straitéiseacha eile, amhail an chibearshlándáil. Beidh Uachtaránacht na Slóivéine freagrach freisin as go leor de na cúraimí a bhaineann leis an gComhdháil ar Thodhchaí na hEorpa a chur chun feidhme.

Tá CESE ag tnúth le bheith ag obair go dlúth le hUachtaránacht na Slóivéine, go háirithe ós rud é go bhfuil na tosaíochtaí céanna againn, mar atá an téarnamh eacnamaíoch, aistriú cóir aeráide agus aistriú cóir digiteach maille le cosaint an smachta reachta, ar cuid lárnach d’obair CESE freisin iad.

Tá an bróisiúr seo le fáil as EN, FR, DE agus SL ar shuíomh gréasáin CESE Is féidir cóipeanna clóite a ordú ó: vipcese@eesc.europa.eu.