KESE info

Billi l-kanċer huwa mistenni li jsir il-kawża ewlenija tal-mewt fl-UE, il-Pjan Ewropew biex Jingħeleb il-Kanċer huwa ċertament f’waqtu. Il-KESE jilqa’ dan il-pjan li huwa pass importanti fil-ġlieda kontra l-kanċer. Madankollu, forom mhux solvuti ta’ inugwaljanza reġjonali u soċjali jfissru li għad hemm lok għal titjib.

Il-KESE jappoġġja b’mod qawwi l-pjan il-ġdid tal-Kummissjoni ta’ EUR 4 biljun biex tiffinanzja l-azzjoni fir-rigward tal-kanċer, l-ewwel dokument ta’ strateġija mill-1990 li tiffoka fuq il-ġlieda kontra din il-marda kiefra.

“L-UE teħtieġ Pjan Marshall ġdid għall-onkoloġija, u dan huwa pass fid-direzzjoni t-tajba. M’għandhiex naħlu din l-opportunità”, enfasizzat Malgorzata Anna Bogusz, relatur għall-Opinjoni tal-KESE dwar Pjan tal-Ewropa biex Jingħeleb il-Kanċer.

“Il-pjan huwa adatt għall-miri li huwa mfassal għalihom billi jkopri ħafna mill-aspetti ewlenin tal-ġlieda kontra l-kanċer,” qalet Milena Angelova, korelatur tal-Opinjoni.

Il-mortalità u l-morbidità tal-kanċer huma korrelatati mat-tip ta’ kanċer, mal-post fejn jinsab il-pazjent u mad-diżlivell soċjali. L-attenzjoni trid tkun iffokata fuq differenzi fl-infrastruttura reġjonali u fl-iżbilanċi soċjali f’termini ta’ impjieg u ġeneru.

Il-KESE jinkoraġġixxi lill-Istati Membri biex ikunu proattivi, u jenfasizza l-ħtieġa għal prevenzjoni effettiva tal-forom ta’ kanċer okkupazzjonali, u jappella għal aktar riċerka dwar l-esponiment għall-karċinoġeni, il-mutaġeni u s-sustanzi kimiċi li jinterferixxu mas-sistema endokrinali u l-kawżi tal-kanċer okkupazzjonali, b’mod partikolari fin-nisa.

L-aħħar iżda mhux l-inqas, l-Opinjoni tenfasizza r-rwol ewlieni tal-imsieħba soċjali u l-organizzazzjonijiet tas-soċjetà ċivili fejn jirrigwarda s-sensibilizzazzjoni u l-promozzjoni ta’ kampanji dwar stil ta’ għajxien f’saħħtu. (at)

Il-Kumitat Ekonomiku u Soċjali Ewropew wiegħed l-impenn kontinwu tiegħu li jaħdem flimkien mal-Kummissjoni Ewropea u ma’ istituzzjonijiet oħrajn tal-UE biex jiddefendi u jimplimenta l-valuri ewlenin tal-UE, b’mod partikolari l-istat tad-dritt, id-drittijiet fundamentali u d-demokrazija.

F’dibattitu mal-Kummissarju Ewropew, Didier Reynders, dwar il-valuri Ewropej waqt is-sessjoni plenarja tal-10 ta’ Ġunju, il-KESE talab aktar involviment demokratiku tal-organizzazzjonijiet tas-soċjetà ċivili u taċ-ċittadini fil-livell tal-UE, bil-ħsieb li l-parteċipazzjoni tagħhom testendi lil hinn mill-elezzjonijiet u biex jiġi ffaċilitat djalogu ċivili sinifikanti. Il-membri tal-KESE saħqu b’mod partikolari wkoll biex id-drittijiet soċjali u ekonomiċi jiġu rikonoxxuti bħala drittijiet fundamentali fl-UE.

Fil-plenarja, il-KESE ppreżenta u adotta l-Opinjonijiet tiegħu dwar Pjan ta’ Azzjoni għad-Demokrazija Ewropea (EDAP) u dwar Strateġija ġdida għall-implimentazzjoni tal-Karta tad-Drittijiet Fundamentali, fejn ta l-appoġġ tiegħu għall-inizjattivi reċenti tal-Kummissjoni mmirati biex jipproteġu l-valuri demokratiċi u d-drittijiet taċ-ċittadini fl-UE.

Il-president tal-KESE, Christa Schweng qalet: “Kullimkien hemm sfidi għall-valuri tal-UE; il-valuri ma jistgħux jitqiesu bħala ħaġa ċerta, anke f’pajjiżi bi tradizzjonijiet demokratiċi stabbiliti sew. Is-soċjetà ċivili għandha ħafna aspettattivi f’termini ta’ rispons tal-UE, u trid li jkollha involviment attiv fid-diskussjonijiet nazzjonali u Ewropej dwar id-difiża ta’ dawn il-valuri.”

Is-Sur Reyners qal: “Ħafna mill-problemi se jirrikjedu approċċ tas-soċjetà sħiħa u kooperazzjoni internazzjonali, fi sforz ikkoordinat mill-gvernijiet, is-soċjetà ċivili, ir-riċerkaturi u l-verifikaturi tal-fatti, is-settur privat, il-midja u ċ-ċittadini. Nilqa’ bi pjaċir din il-kooperazzjoni siewja mal-Kumitat tagħkom f’dan ir-rigward.”

Fl-Opinjoni tiegħu dwar l-istrateġija rigward il-Karta, il-KESE talab miżuri biex jipproteġu u jappoġġjaw lill-organizzazzjonijiet tas-soċjetà ċivili, li għandhom jinkludu mekkaniżmu ta’ allert għad-detezzjoni u r-rappurtar ta’ fastidju. Talab li l-imsieħba soċjali jingħataw rwol akbar fil-promozzjoni u l-implimentazzjoni tad-drittijiet stabbiliti mill-Karta.

Fl-Opinjoni tiegħu dwar l-EDAP, il-KESE rrakkomanda li l-Kummissjoni żżid pilastru separat għall-involviment tas-soċjetà ċivili u tal-imsieħba soċjali, u għall-promozzjoni tad-demokrazija fil-qasam tax -xogħol. Huwa qal li kien diżappuntat li l-EDAP naqas milli jindirizza r-rwol importanti tad-djalogu soċjali u n-negozjar kollettiv biex inaqqsu l-inugwaljanzi u jinkoraġġixxu lill-Ewropej iħaddnu ideali demokratiċi. (ll)

L-10 Jum tal-IĊE, iddedikat għall-Inizjattiva taċ-Ċittadini Ewropej, sar eċċezzjonalment online u fuq jumejn. Il-President tal-KESE Christa Schweng, il-Viċi President tal-Kummissjoni Ewropea Věra Jourová u l-Viċi President tal-Parlament Ewropew Pedro Silva Pereira evalwaw l-istat ta’ dan l-istrument uniku ta’ demokrazija parteċipattiva.

Fir-rimarki introduttorji tagħha, is-Sinjura Schweng saħqet li fattur ewlieni ta’ kull proċess parteċipattiv huwa l-impatt tiegħu: “Nuqqas ta' impatt jista’ joħloq diżappunt, diżimpenn u frustrazzjoni fost iċ-ċittadini.” Żiedet tgħid:“Huwa biss billi żżid l-impatt tagħha li l-IĊE ssir għodda b’saħħitha li tkun tista’ terġa’ tgħaqqad l-UE maċ-ċittadini tagħha”.

S’issa, sitt inizjattivi biss irnexxielhom jilħqu l-limiti meħtieġa għall-iffirmar mill-2012 u l-impatt tagħhom kien pjuttost limitat u wasal tard. Madankollu, hemm raġunijiet għall-ottimiżmu minħabba li l-2021 rat jidħlu fis-seħħ l-ewwel żewġ biċċiet ta’ leġiżlazzjoni ispirati mill-Inizjattivi taċ-Ċittadini Ewropej: id-Direttiva dwar l-Ilma tax-Xorb, li kienet influwenzata mill-inizjattiva Right2Water, u l-hekk imsejjaħ Regolament dwar it-Trasparenza, li huwa segwitu għall-inizjattiva Ban glyphosate.

Fil-messaġġ bil-video tagħha, is-Sinjura Jourová ġibdet l-attenzjoni għall-bidliet u t-titjib introdotti mir-Regolament IĊE l-ġdid, li daħal fis-seħħ f'Jannar 2020. Hija mbagħad spjegat li l-impatt reali tal-inizjattivi tal-IĊE jmur lil hinn mis-segwitu leġiżlattiv: “Anke inizjattivi li ma jilħqux l-aħħar stadji formali tal-proċess jista’ jkollhom ukoll impatti multipli,” qalet. “Mill-mument li ċ-ċittadini jibdew Inizjattiva taċ-Ċittadini Ewropej, huma jġibu l-kwistjoni li jimpurtahom minnha fl-ispazju pubbliku. U dan jiġġenera għarfien u jipproduċi effetti.”

Is-Sur Silva Pereira qal li l-Parlament Ewropew kien għadu qed imexxi d-dibattitu dwar kif ikun hemm sensibilizzazzjoni dwar l-IĊEu kif jista’ jittejjeb il-mod ta’ kif taħdem: "Huwa importanti li jiġi żgurat li jekk inizjattiva jirnexxilha tilħaq l-aħħar stadju, din tiġi kkunsidrati serjament u indirizzata kif suppost.” (na)

B’nefqa annwali li tammonta għal madwar 14 % (jew EUR 2 triljun) tal-PDG kumplessiv tal-UE, il-gvernijiet huma l-akbar konsumaturi tal-Ewropa. In-nefqa tagħhom ġejja prinċipalment minn offerti pubbliċi biex jixtru x-xogħlijiet, is-servizzi u l-provvisti li jeħtieġu mill-kumpaniji.

Saret ħidma konsiderevoli fl-UE f’dawn l-aħħar snin biex l-awtoritajiet pubbliċi jiġu mħeġġa jadottaw xejriet ta’ konsum aktar sostenibbli, u jħarsu lil hinn mill-ħtiġijiet tagħhom fuq medda qasira ta’ żmien u jqisu l-impatti fit-tul ta’ kull akkwist.

Mill-2017 ’l hawn il-Kummissjoni Ewropea ħarġet gwida fil-forma ta’ kriterji dwar l-Akkwist Pubbliku Ekoloġiku, fejn introduċiet b’mod gradwali elementi tal-ekonomija ċirkolari sabiex jingħalqu l-loops tal-enerġija u l-materjali fil-ktajjen tal-provvista, filwaqt li jiġu minimizzati l-impatti negattivi ambjentali u l-ħolqien tal-iskart.

Madankollu, dawn il-miżuri kellhom impatt limitat peress li wieħed ikun konformi magħhom huwa volontarju. Il-KESE jemmen li wasal iż-żmien li jiġu introdotti kriterji minimi obbligatorji għall-Akkwist Pubbliku Ekoloġiku u li l-ekonomija ċirkolari tingħata spinta qawwija permezz tad-direttivi dwar l-akkwist u leġiżlazzjoni speċifika għas-settur.

L-akkwist pubbliku ċirkolari għandu jippermetti lill-amministrazzjonijiet jimxu lil hinn mill-kriterju tal-prezz l-iktar baxx fil-ħin tal-akkwist.

“L-akkwist sikwit huwa kontroversjali għaliex il-kriterji tal-għażla għal proġetti ħafna drabi jixxaqilbu lejn naħa waħda, mingħajr kunsiderazzjoni għall-impatt taċ-ċiklu tal-ħjja jew il-kisbiet ta’ proġett,” qal is-Sur Wyckmans. “L-idea li l-prezz l-iktar baxx għandu jkun l-uniku kriterju ta’ allokazzjoni għandha titqiegħed fil-ġenb u minflok jiġi favorit il-”valur għall-flus”, li jinkludi l-innovazzjoni, il-kwalità ta’ prodotti u servizzi, is-sostenibbiltà, l-ekoloġizzazzjoni u l-impatt soċjali.”

Il-Kummissjoni Ewropea diġà żviluppat għadd ta’ mudelli għall-ispejjeż tul iċ-ċiklu tal-ħajja (LCC) li huma disponibbli b’xejn lix-xerrejja biex jiċċekkjaw skont il-prodotti u s-servizzi. Dawn l-għodod jippermettu lill-awtoritajiet pubbliċi jikkunsidraw l-ispejjeż tul iċ-ċiklu tal-ħajja tal-prodott, ix-xogħol jew is-servizz, mix-xiri sal-operat u l-manutenzjoni sa tmiem il-ħajja. Dawn issa jridu jiġu aġġornati, qal il-KESE, biex jinkludi l-prezz tal-karbonju.

Il-KESE jemmen ukoll li huwa vitali li jiġi żgurat li l-SMEs ikollhom l-opportunità jagħmlu offerta għal kuntratti ċirkolari pubbliċi u jingħataw l-għajnuna li jeħtieġu. Dawn joffru potenzjal enormi iżda huma fil-periklu li jitwarrbu minħabba l-kumplessità tal-proċedura. Huwa biss jekk jiġi pprovdut l-appoġġ meħtieġ li jkunu jistgħu jikkontribwixxu għal offerti lokali u orjentati lejn il-bniedem. (dm)

Il-KESE jilqa’ l-inizjattiva tal-Kummissjoni dwar trasparenza fil-pagi vinkolanti, iżda jqis li d-Direttiva proposta għandha tissaħħaħ f’diversi oqsma u għandhom jittieħdu aktar miżuri biex jiġu indirizzati l-kawżi ewlenin tad-differenza bejn il-ġeneri fil-pagi.

Fl-Opinjoni tiegħu adottata fid-9 ta’ Ġunju, il-KESE jilqa’ l-proposta tal-Kummissjoni għal direttiva dwar miżuri vinkolanti ta’ trasparenza fil-pagi, li tgħin lill-ħaddiema jinfurzaw id-dritt tagħhom għal paga ugwali f’każijiet fejn kienu vittmi ta’ diskriminazzjoni fil-paga.

Madankollu, il-KESE jikkunsidra li d-direttiva proposta teħtieġ tissaħħaħ f’numru ta’ oqsma, inklużi l-kriterji użati biex jiġi ddeterminat il-valur tax-xogħol, l-ambitu ta’ xi miżuri ta’ trasparenza u r-rwol tal-imsieħba soċjali u n-negozjar kollettiv.

Paga ugwali u xogħol ta' valur ugwali

Il-prinċipju ta’ “paga ugwali għal xogħol ugwali” japplika għal “kategoriji ta’ ħaddiema” li, skont il-proposta tal-Kummissjoni, huma speċifikati minn min iħaddem. Il-KESE jemmen li huwa kruċjali li jkun hemm mekkaniżmi biex jiġi żgurat li l-kategoriji ta’ ħaddiema jiġu determinati b’mod newtrali mil-lat tal-ġeneru, li jinvolvi t-trade unions u r-rappreżentanti tal-ħaddiema, skont il-liġi u l-prattika nazzjonali.

Miżuri oħrajn immirati biex jindirizzaw il-kwistjonijiet strutturali fil-qofol tad-differenza bejn il-ġeneri fil-pagi għandhom jinkludu wkoll il-garanzija ta’ kura tat-tfal adegwata u aċċessibbli, inizjattivi ta’ sensibilizzazzjoni, l-iżgurar ta’ rappreżentanza aħjar tan-nisa f’pożizzjonijiet ta’ teħid ta’ deċiżjonijiet, u l-eliminazzjoni ta’ diżinċentivi relatati mat-taxxa għall-impjieg tan-nisa. L-istorja sħiħ fuq il-web hija disponibbli hawnhekk. (na)

L-UE teħtieġ tistabbilixxi objettivi ekonomiċi ambizzjużi biex issaħħaħ l-euro. Dan sar saħansitra aktar importanti minħabba l-pass tal-bidla fl-ekonomija globali u l-pożizzjoni attwali tal-UE f’termini ta’ innovazzjoni, kompetittività u trawwim ta’ ambjent regolatorju li jiffavorixxi l-investiment.

F’Opinjoni adottata fis-sessjoni plenarja tiegħu ta’ Ġunju, il-KESE laqa’ l-Komunikazzjoni tal-Kummissjoni Ewropea dwar Is-sistema ekonomika u finanzjarja Ewropea: it-trawwim tal-ftuħ, tas-saħħa u tar-reżiljenza. Peress li t-trasformazzjoni ta’ wara l-pandemija qed tikkawża bidla sinifikanti fil-bilanċ globali tal-poter ekonomiku, l-UE għandha taġixxi malajr biex iżżid ir-reżiljenza ekonomika tal-Ewropa. B’mod partikolari, il-Kumitat jaqbel mal-ħtieġa biex jissaħħaħ ir-rwol internazzjonali tal-euro bħala għodda ewlenija għat-tisħiħ tal-pożizzjoni globali tal-Ewropa.

Tomasz Wróblewski (Grupp I, Grupp ta’ Min Iħaddem) kien relatur għall-Opinjoni tal-KESE. Huwa jaħseb li l-Kummissjoni għandha tiffoka aktar fuq ir-raġunijiet għad-dgħajfien tar-rwol internazzjonali tal-euro. Huwa qal “il-pożizzjoni globali tal-euro qed tiddgħajjef, iżda mhux malajr daqs dik tad-dollaru.” “Dan ma jbiddilx il-fatt li l-pożizzjoni tal-euro hija affettwata minn affarijiet differenti. L-ewwel nett, in-nuqqas ta’ suq komuni integrat għas-servizzi finanzjarji. Mingħajr it-tlestija tal-Unjoni Bankarja u tal-Unjoni tas-Swieq Kapitali se jkun diffiċli għalina li nikkompetu mad-dollaru.”

Il-KESE jirrakkomanda wkoll li tingħata aktar attenzjoni lill-ekonomija taċ-Ċina li qed tikber b’rata mgħaġġla u jappella għal pjan ta’ azzjoni li jqis dan. Ir-rwol tar-renminbi Ċiniż qed jikber fil-kummerċ u l-ikklirjar internazzjonali. Iċ-Ċina qed taħdem ukoll b’mod intensiv fuq il-munita diġitali tagħha, u qed tħalli l-parti l-kbira tad-dinja warajha. L-UE għandha tirreaġixxi malajr u l-KESE jappoġġja l-proposta li jinħoloq euro diġitali. “F’dan id-dominju,” jirrimarka s-Sur Wróblewski, “l-Ewropa jista’ jkollha soluzzjonijiet aktar attraenti, minħabba l-impenn tagħna għall-protezzjoni tad-data personali u l-privatezza tal-utent.” (na)

L-involviment tas-soċjetà ċivili organizzata għadu ’l bogħod milli jkun sodisfaċenti fil-biċċa l-kbira tal-pajjiżi tal-UE, il-KESE wissa fil-konferenza annwali tal-Grupp tas-Semestru Ewropew tiegħu, li saret mill-bogħod fil-31 ta’ Mejju.

Il-konferenza dwar Nibnu Ewropa reżiljentri – Is-Soċjetà Ċivili Organizzata fil-Pjani Nazzjonali għall-Irkupru u r-Reżiljenza rat kontributi minn kelliema ewlenin mill-istituzzjonijiet tal-UE, il-Kunsilli Ekonomiċi u Soċjali Nazzjonali, il-gruppi ta’ riflessjoni u l-organizzazzjonijiet tas-soċjetà ċivili tal-UE. Iffokat fuq tliet suġġetti: l-involviment tas-soċjetà ċivili organizzata fil-Pjani Nazzjonali għall-Irkupru u r-Reżiljenza (NRRPs), it-tranżizzjoni ġusta lejn ekonomija Ewropea ekoloġika, diġitali u sostenibbli u l-limplimentazzjoni tal-PIlastru Ewropew tad-Drittijiet Soċjali.

Il-President tal-Kumitat Christa Schweng fetħet id-dibattitu billi enfasizzat l-isfida li nittrasforma din il-kriżi f’sensiela ta’ possibilitajiet ġodda. Sfida partikolari hija li jiġi sfruttat b’suċċess il-potenzjal tal-Faċilità għall-Irkupru u r-Reżiljenza: “Il-biċċa l-kbira tal-Istati Membri ma ħadux sehem f’konsultazzjoni suffiċjenti mas-soċjetà ċivili organizzata, jew għamlu dan tard wisq”, innotat is-Sinjura Schweng. “Is-sitwazzjoni issa hija sensiela ta’ Pjani Nazzjonali għall-Irkupru u r-Reżiljenza li jvarjaw mhux ħażin fil-kwalità u l-metodoloġija u qed niġu fid-dubju dawn il-pjani humiex qed jilħqu l-ħtiġijiet fuq il-post”.

Tiziano Treu, President tal-Kunsill Ekonomiku u Soċjali Nazzjonali tal-Italja (CNEL), qal li r-rwol tal-Konferenza dwar il-Futur tal-Ewropa kien li toffri forma ġdida ta’ governanza Ewropea, li trid tiġi simplifikata u tkun iktar effettiva, u trid tinkludi regoli xierqa biex jiġi żgurat l-involviment tas-soċjetà ċivili organizzata.

Il-Viċi President tal-Grupp tas-Semestru Ewropew, Luca Jahier, qal: “”Pilastru taċ-Ċittadini” iktar b’saħħtu, li jinkludi s-soċjetà ċivili organizzata u l-awtoritajiet reġjonali u lokali, f’allenza mal-parlament nazzjonali, se jkun kruċjali biex jiġi żgurat li l-proċessi ta’ riformi u l-investimenti jiġu monitorjati b’mod adatt u jġibu magħhom l-involviment neċessarju tal-partijiet interessati leġittimi”. (na)

Sabiex jikkontribwixxi għas-Summit tan-Nazzjonijiet Uniti (NU) dwar is-Sistemi tal-Ikel tal-2021, il-KESE organizza seduta online fit-28 ta’ Mejju sabiex jesplora l-vulnerabbiltajiet u l-inugwaljanzi tas-sistemi tal-ikel Ewrope, u sabiex jidentifika kif jistgħu jinkisbu ktajjen ta’ provvista aktar ekwi u ġusti. Kelliema ta’ livell għoli min-NU, mill-Kummissjoni Ewropea u mill-Parlament Ewropew skambjaw il-fehmiet tagħhom dwar it-tibdil meħtieġ sabiex jissaħħu l-ekwità u l-ġustizzja u għal approċċ ibbażat fuq id-drittijiet fit-tranżizzjoni lejn sistemi tal-ikel aktar sostenibbli.

Il-pandemija tal-COVID-19 hija sinjal ta’ twissija għal bidla. Għalkemm il-bdiewa u l-ħaddiema tas-sistema tal-ikel kienu fuq l-ewwel linja matul il-kriżi tal-COVID-19, u pprovdew provvista ta’ ikel mingħajr interruzzjoni għall-Ewropej kollha, “din il-kriżi enfasizzat il-fatt li l-ikel jitwassal “mill-għalqa sal-platt” m’għandux jitqies bħala fatt ovvju”, qal Andreas Thurner, president tal-Grupp ta’ Studju tal-KESE dwar Sistemi Sostenibbli tal-Ikel.

Il-KESE żviluppa bosta proposti u ideat speċifiċi matul is-snin, li jistgħu jinġabru f’ħames settijiet ta’ rakkomandazzjonijiet li għandhom jikkontribwixxu għas-Summit tan-NU dwar is-Sistemi tal-Ikel:

I. Trawwim ta’ politiki dwar l-ikel komprensivi u integrati;

II. Promozzjoni ta’ dieti aktar tajbin għas-saħħa u aktar sostenibbli;

III. Żgurar ta’ prezzijiet ġusti u projbizzjoni ta’ prattiki kummerċjali inġusti;

IV. Tisħiħ tal-potenzjal tal-ktajjen ta’ provvista tal-ikel qosra u tal-agroekoloġija;

V. Żgurar ta’ involviment u parteċipazzjoni strutturati tas-soċjetà ċivili.

Il-Kumitat jappoġġja l-ekoloġizzazzjoni tat-trasport, iżda jenfasizza li t-tranżizzjoni tal-enerġija għandha tkun ġusta u tipprovdi alternattivi vijabbli u realistiċi li jqisu l-karatteristiċi speċifiċi ekonomiċi u soċjali u l-ħtiġijiet tal-partijiet kollha tal-Ewropa, inklużi ż-żoni rurali.

Dan huwa l-messaġġ ewlieni ta’ Opinjoni li tfasslet minn Pierre Jean Coulon u Lidija Pavić-Rogošić u ġiet adottata fis-sessjoni plenarja ta’ Ġunju tal-Kumitat. Il-KESE jadotta pożizzjoni ċara fil-valutazzjoni tiegħu dwar il-White Paper tat-Trasport tal-2011 li għandha l-għan li twaqqaf id-dipendenza tas-sistema tat-trasport miż-żejt tal-fjuwil mingħajr ma tikkomprometti l-effiċjenza tas-sistema u l-mobilità.

Li jkun hemm limitazzjonijiet fuq il-mezzi tat-trasport mhijiex alternattiva: il-mira għandha tkun il-komodalità, mhux il-bidla modali. Barra minn hekk, it-tranżizzjoni ekoloġika jenħtieġ tkun soċjalment ġusta kif ukoll tippreserva l-kompetittività tat-trasport Ewropew, bl-implimentazzjoni sħiħa taż-Żona Ewropea tat-Trasport bħala parti mis-Suq Uniku. Id-dewmien f’dan ir-rigward huwa ta’ diżappunt.

“Li nrażżnu l-mobilità mhijiex alternattiva. Aħna nappoġġjaw kull miżura mmirata biex it-trasport isir aktar effiċjenti fl-enerġija u biex jitnaqqsu l-emissjonijiet", qal is-Sur Coulon. “L-Ewropa tinsab għaddejja minn perjodu ta’ tfixkil, iżda dan mgħandux iwassal għal bidla fid-direzzjoni f’termini ta’ aspettattivi soċjali u ambjentali tad-diversi inizjattivi Ewropej.”

Il-KESE jħeġġeġ ukoll proċess ta’ skambju ta’ fehmiet miftuħ, kontinwu u trasparenti rigward l-implimentazzjoni tal-White Paper. “Il-Kumitat jiġbed l-attenzjoni dwar l-importanza li jinkiseb l-appoġġ tas-soċjetà ċivili u tal-partijiet ikkonċernati, inkluż permezz ta’ djalogu parteċipattiv", żiedet tgħid is-Sinjura Pavić-Rogošić. “Fehim tajjeb u aċċettazzjoni wiesgħa tal-għanijiet strateġiċi se jkunu ta’ għajnuna kbira biex jinkisbu r-riżultati.” (mp)

Fis-17 ta’ Ġunju, il-Kumitat Ekonomiku u Soċjali Ewropew (KESE) u l-Kummissjoni Konsultattiva dwar il-Bidliet Industrijali (CCMI) tiegħu kellhom dibattitu mqanqal fejn eżaminaw il-fehmiet tas-soċjetà ċivili organizzata wara l-pubblikazzjoni tal-Aġġornament tal-Kummissjoni Ewropea għall-Istrateġija Industrijali Ġdida. Id-dibattitu, li huwa l-ewwel wieħed f’sensiela ta’ attivitajiet konġunti mis-sezzjonijiet tal-KESE dwar is-suġġett, staqsa jekk l-istrateġija aġġornata fihiex biżżejjed elementi biex jissaħħu r-reżiljenza u l-awtonomija strateġika tal-industrija tal-UE. 

Fil-5 ta’ Mejju 2021, il-Kummissjoni aġġornat l-Istrateġija Industrijali tal-UE sabiex tassigura li l-ambizzjoni industrijali tagħha tieħu kont sħiħ taċ-ċirkostanzi l-ġodda wara l-kriżi tal-COVID-19 u fit-trasformazzjoni lejn ekonomija aktar sostenibbli, diġitali, reżiljenti u kompetittiva globalment.

Il-President tas-CCMI, Pietro Francesco De Lotto, li ppreseda d-dibattitu, qal: “Il-pandemija tal-COVID-19 aċċellerat ħafna proċessi li kienu diġà għaddejjin. Il-ħeffa li biha s-soċjetà u l-industrija kellhom jadottaw proċessi ta’ diġitalizzazzjoni f’dawn l-aħħar 16-il xahar hija mingħajr preċedent u l-bidliet li esperjenzajna huma rivoluzzjonarji, l-ewwel bil-ktajjen tal-provvista, imbagħad b’tagħmir mediku u wara dan, bil-vaċċini. ''

Il-President tas-Sezzjoni għas-Suq Uniku, il-Produzzjoni u l-Konsum (INT), Alain Coheur, li kien kopresident tad-dibattitu, iddeskriva l-kuntest tal-ħidma tat-tieni panel, fejn qal: ’Il-kriżi ġabet kwistjonijiet oħra fuq il-mejda li ma ssemmewx fl-ewwel Komunikazzjoni dwar l-istrateġija industrijali f’Marzu 2020. Irridu naraw din il-kriżi bħala opportunità biex iż-żona Ewropea tingħata awtonomija industrijali”.

Antony Whelan, konsulent diġitali tal-President tal-Kummissjoni Ewropea, Ursula Von der Leyen, ippreżenta l-għodod tal-Kummissjoni li jkejlu d-dipendenza tal-UE, u qal: “Fl-eżerċizzju tagħna minn isfel għal fuq identifikajna għadd limitat ħafna ta’ żoni fejn l-UE kollha kemm hi hija f’sitwazzjoni ta’ dipendenza inkwetanti.”

Il-KESE ser jorganizza sensiela ta’ dibattiti dwar l-istrateġija industrinali: seba’ webinars, li jibdew b’dak attwali fis-17 ta’ Ġunju. Dibattitu ta’ għeluq ta’ livell għoli huwa ppjanat għal Marzu 2022. (ks)

Il-Kumitat ta’ Segwitu tal-KESE dwar ir-Relazzjonijiet Trans-Atlantiċi ltaqa’ ftit jiem qabel is-summit ta’ livell għoli bejn l-UE u l-Istati Uniti sabiex jiddiskuti firxa wiesgħa ta’ suġġetti ta’ importanza għas-soċjetà ċivili, l-ewwel u qabel kollox dwar it-tibdil fil-klima u l-kummerċ.

“Sinjali inkoraġġanti f’kull aspett ġejjin miż-żewġ naħat tal-Atlantiku”, qal Christian Moos, President tal-Kumitat ta’ Segwitu tal-KESE dwar ir-Relazzjonijiet Trans-Atlantiċi.

David Livingston, konsulent ta’ livell għoli għall-Mibgħut Speċjali Presidenzjali tal-Istati Uniti għall-Klima John Kerry, ikkonferma li l-amministrazzjoni attwali issa tinsab impenjata bis-sħiħ sabiex jintlaħqu, iżda wkoll li jmorru lil hinn, l-objettivi tal-Ftehim ta’ Pariġi. “Mhux se jkun aċċettabbli”, huwa sostna, “li l-pajjiżi atturi ewlenin jħallu li tintemm is-sena 2021 mingħajr ma jkun hemm aġġornamenti sostanzjali għall-kontributi stabbilit fil-livell nazzjonali tagħhom, li huma fil-qalba tal-Ftehim ta’ Pariġi”.

“Il-parteċipazzjoni attiva tas-soċjetà ċivili fl-Istati Uniti flimkien mal-UE u ma’ pajjiżi oħra ppermettiet lill-Istati Uniti jżommu l-involviment, minkejja n-nuqqas ta’ impenn mill-amministrazzjoni preċedenti”, innotat Elina Bardram, mid-Direttorat Ġenerali tal-Kummissjoni Ewropea għall-Azzjoni Klimatika (DĠ CLIMA).

Emilie Bel mill-Kunsill Atlantika enfasizzat li l-Ewropej huma lesti li jibnu aġenda kummerċjali pożittiva, iżda fuq bażi bilanċjata b’mod ugwali.

Marjorie Chorlins mill-Kamra tal-Kummerċ tal-Istati Uniti, affermat li, minkejja t-turbulenza politika trans-Atlantika u r-reċessjoni kkawżata mill-COVID-19, l-Istati Uniti u l-Ewropa baqgħu s-swieq l-aktar importanti ta’ xulxin. Ir-rapport Transatlantic Economy 2021 (Ekonomija Trans-Atlantika 2021), li għadu kif ġie ppubblikat, juri li ż-żewġ msieħba jirrappreżentaw perċentwali sostanzjali tal-konsum globali u tal-PDG globali. 

Tanja Buzek, il-President tal-Kumitat ta’ Segwitu tal-KESE dwar il-Kummerċ Internazzjonali, enfasizzat l-importanza tal-involviment tas-soċjetà ċivili għal politika kummerċjali trasparenti u l-ħtieġa għal koalizjonijiet b’saħħithom sabiex tiġi riformata l-Organizzazzjoni Dinjija tal-Kummerċ. (at)

Fit-tieni nofs tal-2021, is-Slovenja ser ikollha l-Presidenza tal-Kunsill tal-UE għat-tieni darba. U għat-tieni darba f’mument kritiku għall-Ewropa.

Fl-2008, l-UE kienet qed tiffaċċja l-kriżi finanzjarja u llum għadha qed tissielet mal-konsegwenzi soċjoekonomiċi tal-pandemija tal-COVID-19. Għalhekk, mhuwiex sorprendenti li t-tħejjija u r-reżiljenza tal-UE għall-kriżijiet, b’mod partikolari l-kriżijiet tas-saħħa, huma fost il-prijoritajiet ewlenin tal-Presidenza Slovena, flimkien ma’ sfidi strateġiċi oħra, bħaċ-ċibersigurtà. Huwa wkoll matul il-Presidenza Slovena li għandha tiġi implimentata l-biċċa l-kbira tal-kompiti relatati mal-Konferenza dwar il-Futur tal-Ewropa.

Il-KESE jinsab ħerqan biex jaħdem mill-qrib mal-Presidenza Slovena, speċjalment peress li għandna l-istess prijoritajiet: l-irkupru, tranżizzjoni klimatika u dik diġitali ġusti u d-difiża tal-istat tad-dritt huma wkoll fil-qalba tal-ħidma tal-KESE.

Dan il-fuljett huwa disponibbli bl-EN, il-FR, il-DE u s-SL fis-sit web tal-KESE. Tista’ titlob kopja stampata billi tikkuntattja lil vipcese@eesc.europa.eu.