Xahar wara t-tmiem tat-tmexxija brutali ta’ Bashar al-Assad, ir-rispons uffiċjali tal-UE jibqa’ fil-biċċa l-kbira limitat għat-tħabbir ta’ assistenza għall-iżvilupp u l-istabbilizzazzjoni ekonomika. Għadu mhux ċar jekk u meta ser jitneħħew is-sanzjonijiet fuq is-Sirja. L-appoġġ Ewropew ser jiddependi mill-protezzjonijiet għall-minoranzi u garanziji oħra, li l-prospetti tagħhom għadhom inċerti. Id-dinamika politika, ta’ sigurtà u umanitarja kumplessa tas-Sirja tissuġġerixxi li kwalunkwe konsolidazzjoni demokratika ser tkun twila u ta’ sfida. Din is-sitwazzjoni ser tevalwa l-kapaċità tal-UE li titkellem b’vuċi waħda u taġixxi b’mod konġunt dwar il-futur tal-pajjiż. Minflok, ħafna pajjiżi Ewropej ma damux biex enfasizzaw prijorità immedjata u komuni: ir-ritorn ta’ Sirjani spostati. F’Diċembru, ftit jiem wara li r-reġim ta’ Assad tilef lil Damasku, l-Awstrija – fejn il-mexxej tal-FPÖ Herbert Kickl irċieva mandat biex jifforma gvern ġdid – ħabbar “bonus ta’ ritorn” u programm ta’ deportazzjoni għal dawk b’rekords kriminali. Fin-Netherlands, il-gvern ta’ koalizzjoni mmexxi min-nazzjonalista tal-lemin Geert Wilders qed jippjana li jidentifika żoni sikuri għar-ritorni. Il-Ġermanja ħabbret ukoll li l-protezzjoni mogħtija lis-Sirjani ser tiġi “rieżaminata u revokata” jekk il-pajjiż jistabbilizza ruħu. Pajjiżi Ewropej oħra għamlu dikjarazzjonijiet simili jew qed isegwu s-sitwazzjoni mill-qrib. Fid-dawl ta’ dan, anke d-deċiżjoni dwar it-tneħħija tas-sanzjonijiet tista’ tkun xprunata mill-għan li jiġu implimentati r-ritorni aktar milli minn bidla fil-fehmiet dwar it-tmexxija l-ġdida tas-Sirja.
Bl-appoġġ dejjem jikber fl-Ewropa għall-partiti tal-lemin estrem u kontra l-immigrazzjoni – u l-elezzjonijiet federali Ġermaniżi imminenti – il-viżjoni tal-Istati Membri għas-Sirja tinsab f’riskju li tiġi ddettata minn prijoritajiet domestiċi u kalkoli elettorali fuq terminu qasir. Bejn l-2015 u l-2024, aktar minn miljun Sirjan ingħataw protezzjoni mill-Istati Membri tal-UE, ħafna minnhom fil-Ġermanja. Il-preżenza tagħhom saret kwistjoni politika u soċjetali kontenzjuża. Fost inċidenti ta’ sigurtà ppubbliċizzati ħafna, inflazzjoni għolja, u żieda fl-ispejjeż tal-enerġija, is-sentiment pubbliku f’ħafna pajjiżi li jospitaw refuġjati sar inqas akkoljenti. Din il-bidla normalizzat ir-retorika u l-politiki ostili. Minkejja l-appelli mill-Kummissjoni Ewropea u l-UNHCR biex jieħdu approċċ kawt għar-ritorni, din id-dinamika tista’ timbotta lill-gvernijiet Ewropej biex jaċċellerawhom, anke b’mod unilaterali.
Minn mindu waqa’ r-reġim ta’ Assad f’Diċembru, aktar minn 125 000 refuġjat diġà rritornaw lejn is-Sirja, l-aktar minn pajjiżi ġirien. Madankollu, il-prospettivi tagħhom xejn mhuma inkoraġġanti. Anke qabel l-avvenimenti reċenti, aktar minn nofs il-popolazzjoni tas-Sirja ffaċċjat insigurtà tal-ikel, bi tliet miljun ruħ isofru ġuħ serju. B’ħafna djar meqruda mill-kunflitt, il-faċilitajiet ospitanti diġà jinsabu mimlijin. Skont l-UNHCR, hemm bżonn ta’ kważi EUR 300 miljun għall-kenn, għall-ikel u għall-ilma għal dawk li jirritornaw lura. Waqt li l-UE u l-Istati Membri għandhom jiżviluppaw approċċi kkoordinati biex jiffaċilitaw ir-ripatrijazzjoni sikura u volontarja tas-Sirjani fuq perjodu twil, il-prijorità immedjata għandha tkun li jiġu indirizzati l-ħtiġijiet umanitarji tal-pajjiż f’dan il-kuntest. Il-pressjoni fuq ir-refuġjati biex jirritornaw malajr lejn pajjiż mifni bil-gwerra u instabbli tista’ fil-fatt tkun kontroproduttiva, sitwazzjoni li tkompli tillimita l-aċċess għall-ikel, l-enerġija u l-kenn. Ir-ritorni fuq skala kbira jistgħu jfixklu wkoll in-nisġa etnika u soċjoekonomika ta’ reġjuni li diġà huma fraġli. Approċċ bilanċjat u sostenibbli huwa ġġustifikat ukoll mill-kontribut potenzjali tad-dijaspora Sirjana għall-isforzi ta’ rikostruzzjoni. Il-pajjiż ser ikollu bżonn inġiniera, tobba, amministraturi u għalliema kif ukoll ħaddiema manwali b’diversi livelli ta’ ħiliet. Is-Sirjani kisbu ħiliet u esperjenza siewja fl-Ewropa f’diversi setturi rilevanti, inklużi l-edukazzjoni, il-kostruzzjoni u l-kura tas-saħħa, iżda mhux ser ikun faċli li jiġu reklutati l-persuni t-tajba. Ritorn permanenti m’għandux ikun prekondizzjoni sabiex ikun hemm kontribut għar-rikostruzzjoni: rimessi mill-Ewropa jistgħu jaqdu rwol kruċjali fit-tnaqqis tal-faqar u l-iżvilupp sostenibbli. Permezz tal-impenn tad-dijaspora, is-Sirjani bbażati fl-Ewropa jistgħu jgħinu wkoll biex jissaħħu r-rabtiet diplomatiċi u kulturali bejn l-UE u s-Sirja wara l-waqgħa ta’ Assad.
Madankollu, l-Istati Membri jistgħu jsibuha diffiċli jadottaw approċċ ibbilanċjat u jonqsu milli jsegwu aġenda koordinata. Xi pajjiżi jistgħu jipprijoritizzaw l-istabbiltà fit-tul u r-rikostruzzjoni tas-Sirja, u jippermettu li r-ritorni jseħħu b’mod spontanju. Oħrajn jistgħu jgħaġġlu biex joffru inċentivi finanzjarji għar-ripatrijazzjoni volontarja jew saħansitra jirrevedu b’mod sistematiku l-istatus tas-Sirjani hekk kif is-sitwazzjoni umanitarja titjieb, anke bi ftit. Madankollu, l-implimentazzjoni ta’ rieżami sistematiku tal-istatus ta’ refuġjat ser tiffaċċja ostakli legali sinifikanti, u tinvolvi spejjeż finanzjarji u amministrattivi konsiderevoli. Sadanittant, kwalunkwe inċentiv għar-ritorn ser ikollu jqis il-fatt li l-biċċa l-kbira tas-Sirjani spostati fl-Ewropa issa huma stabbiliti, b’aktar minn 300 000 persuna li kisbu ċ-ċittadinanza tal-UE. Fl-istess ħin, il-prospetti ekonomiċi u tax-xogħol skoraġġanti tal-pajjiż jistgħu jiskoraġġixxu saħansitra lil dawk l-aktar motivati milli jirritornaw lura. Mistoqsija fundamentali f’dan il-kuntest ser tkun jekk is-Sirjani jitħallewx jinvolvu ruħhom fl-hekk imsejħa “movimenti pendulari” – jirritornaw għal perjodi limitati, bil-pajjiżi ospitanti Ewropej ikomplu joffru opportunitajiet sostenibbli għal ritorn aktar permanenti.Dawn il-mistoqsijiet inevitabbilment ser ikunu marbuta ma’ diskussjonijiet usa’ dwar il-politika tal-UE dwar il-migrazzjoni. In-negozjati futuri dwar ir-riforma tad-Direttiva tal-UE li tirregola r-ritorni, li għaliha dalwaqt hija mistennija proposta mill-Kummissjoni Ewropea, jistgħu jiksbu momentum deċiżiv skont id-diskussjonijiet li qed jevolvu dwar ir-ritorni tas-Sirjani. Iżda r-riforma tad-Direttiva bl-istess mod tista’ twassal għal aktar diviżjonijiet fost l-Istati Membri tal-UE. Peress li l-politiki dwar il-migrazzjoni jeħtieġu riflessjoni mill-ġdid fundamentali biex l-isfidi tal-lum jiġu indirizzati b’mod effettiv, l-approċċ tal-UE għas-Sirjani spostati x’aktarx li jikkostitwixxi l-ewwel punt kritiku ta’ bidla deċiżiva fiċ-ċiklu l-ġdid.
Copyright: Polish Presidency. Council of the European Union
Fl-1 ta’ Jannar, il-Polonja ħadet it-tmun tal-Kunsill tal-UE mill-Ungerija u, għalhekk, ser ikollha l-presidenza tal-Kunsill matul l-ewwel sitt xhur tas-sena. Il-Presidenza Pollakka se tibda fi żmien trasformattiv għall-Ewropa, li jikkoinċidi mal-bidu tal-mandat il-ġdid tal-Kummissjoni Ewropea.
Fl-1 ta’ Jannar, il-Polonja ħadet it-tmun tal-Kunsill tal-UE mill-Ungerija u, għalhekk, ser ikollha l-presidenza tal-Kunsill matul l-ewwel sitt xhur tas-sena. Il-Presidenza Pollakka se tibda fi żmien trasformattiv għall-Ewropa, li jikkoinċidi mal-bidu tal-mandat il-ġdid tal-Kummissjoni Ewropea.
Fid-dawl tal-aggressjoni Russa kontra l-Ukrajna li qed tkompli bla heda, u tensjonijiet ġeopolitiċi daqs qatt qabel fl-istorja reċenti tal-Ewropa, il-Polonja qed tiffoka l-prijoritajiet tagħha fuq it-tema ġenerali tas-sigurtà. Dan jinkludi s-sigurtà esterna, interna, ekonomika, tal-enerġija, tal-ikel u tas-saħħa, kif ukoll l-iżgurar tal-istat tad-dritt.
Dawn il-prijoritajiet jirriflettu tajjeb l-impenn tal-Kumitat Ekonomiku u Soċjali Ewropew li jrawwem il-koeżjoni, iħares il-valuri demokratiċi, u jiżgura prosperità stabbli. “Fil-KESE, aħna kburin li aħna msieħeb affidabbli u koinvolt tal-Presidenza Pollakka, u nimpenjaw ruħna li naqdu rwol attiv fit-tfassil tal-prijoritajiet politiċi li ser jiddefinixxu dan iċ-ċiklu Ewropew ġdid”, qal il-President tal-KESE Oliver Röpke.
Fuq talba tal-Presidenza Pollakka, il-KESE se jabbozza 14-il Opinjoni esploratorja. Ikkonsulta l-fuljett il-ġdid tagħna u skopri aktar dwarhom u ħidma oħra tal-KESE matul l-ewwel nofs tal-2025. Tista’ tiskopri wkoll min huma l-membri Pollakki tal-KESE u liema organizzazzjonijiet jirrappreżentaw. Il-fuljett huwa disponibbli esklużivament online bl-Ingliż, bil-Pollakk, bil-Franċiż u bil-Ġermaniż. (ll)
L-industrija tal-Ewropa qed tiffaċċja ħafna sfidi differenti, inklużi prezzijiet tal-enerġija estremament għoljin, diffikultà biex tattira forza tax-xogħol b’ħiliet speċjalizzati u aċċess għall-finanzjament. Fl-2023, l-UE ressqet il-Pjan Industrijali tal-Patt Ekoloġiku, li jiffoka fuq il-kisba tan-newtralità karbonika.Fil-preżentazzjoni tagħha tal-linji gwida politiċi l-ħarifa li għaddiet, il-President Ursula Von der Leyen semmiet “Patt Industrijali Nadif” għal industriji kompetittivi u impjiegi ta’ kwalità, b’konsistenza mar-rapport ta’ Draghi.
L-industrija tal-Ewropa qed tiffaċċja ħafna sfidi differenti, inklużi prezzijiet tal-enerġija estremament għoljin, diffikultà biex tattira forza tax-xogħol b’ħiliet speċjalizzati u aċċess għall-finanzjament. Fl-2023, l-UE ressqet il-Pjan Industrijali tal-Patt Ekoloġiku, li jiffoka fuq il-kisba tan-newtralità karbonika.Fil-preżentazzjoni tagħha tal-linji gwida politiċi l-ħarifa li għaddiet, il-President Ursula Von der Leyen semmiet “Patt Industrijali Nadif” għal industriji kompetittivi u impjiegi ta’ kwalità, b’konsistenza mar-rapport ta’ Draghi.
L-industrija hija parti essenzjali mit-tranżizzjoni doppja ekoloġika u diġitali, u mis-sistema ekonomika tagħna. Iżda dan il-ftehim il-ġdid xi jfisser għall-ħaddiema? Li jkun hemm forza tax-xogħol b’saħħitha, membri ta’ unions, imħallsa tajjeb u b’kundizzjonijiet tax-xogħol tajbin, hija kwistjoni li ma tikkonċernax biss lit-trade unions, iżda wkoll lis-soċjetà inġenerali, id-demokrazija u l-istabbiltà soċjali, kif ukoll il-produttività tal-kumpaniji.
Mingħajr gwida xierqa u finanzjament pubbliku suffiċjenti, dan il-ftehim jista’ jispiċċa jibbaża fuq il-partijiet tar-rapport ta’ Draghi u tal-aġenda tal-kompetittività li huma l-aktar favur id-deregolamentazzjoni. Dan jista’ jipperikola l-mudell soċjali Ewropew billi jippromovi mudell dannuż ta’ kompetizzjoni li jixpruna ġirja lejn tnaqqis fil-pagi u l-kundizzjonijiet tax-xogħol.
Biex jindirizzaw dan it-tħassib, fl-14 ta’ Frar, il-Grupp tal-Ħaddiema tal-KESE u l-Konfederazzjoni Ewropea tat-Trade Unions (KETU) qed jorganizzaw konferenza konġunta dwar il-politika industrijali Ewropea għal impjiegi ta’ kwalità fil-bini tal-KESE. Nilqgħu lill-partijiet kollha interessati fid-diskussjoni biex jimmarkaw dan l-avveniment fil-kalendarju tagħhom u jingħaqdu mad-diskussjoni.
F’Diċembru, il-KESE ospita l-wiri tal-film Under the Grey Sky, dwar ġurnalisti Belarussi li ħallsu prezz personali qares ħafna talli rapportaw dwar it-taqlib politiku f’pajjiżhom
F’Diċembru, il-KESE ospita l-wiri tal-film Under the Grey Sky, dwar ġurnalisti Belarussi li ħallsu prezz personali qares ħafna talli rapportaw dwar it-taqlib politiku f’pajjiżhom
Under the Grey Sky, l-ewwel film tar-reġista Belarussa Pollakka Mara Tamkovich, jirrakkonta l-istorja ta’ qsim il-qalb ta’ Lena, ġurnalista Belarussa li spiċċat il-ħabs wara li xandret dirett l-azzjoni repressiva tal-gvern fuq dimostrazzjoni paċifika fil-Pjazza Peremen f’Minsk. Fl-2020 il-Belarussja nħakment minn mewġa bla preċedent ta’ protesti b’reazzjoni għall-elezzjonijiet imbagħbsa li fihom reġa’ ġie elett għas-sitt darba Aleksandr Lukashenko.
Lena u l-operatur tal-kamera tagħha Olya ġew arrestati wara li komplew jiffilmjaw il-protesti minkejja li kienu traċċati minn drone tal-pulizija. Wara serje ta’ avvenimenti assurdi denji ta’ Kafka, Lena l-ewwel ġiet mixlija li organizzat irvellijiet u fixklet it-trasport pubbliku, imma wara l-akkużi nbidlu għal tradiment kontra l-pajjiż. Dik li suppost kienet detenzjoni amministrattiva ta’ sebat ijiem inbidlet f’sentenza ta’ tmien snin ħabs wara proċess bil-bibien magħluqin. Il-kollega tagħha ngħatat sentenza ta’ sentejn. Ilya, ir-raġel ta’ Lena li wkoll safa mhedded mill-pulizija tar-reġim, ipprova b’kull mod possibbli joħroġha mill-ħabs, u saħansitra pprova jipperswadiha tammetti l-ħtija bi skambju għal-libertà. Għal Lena dan kien inaċċettabbli.
Il-film huwa ispirat mill-istorja vera ta’ Katsiaryna Andreyeva, ġurnalista tal-istazzjoni televiżiv Belarussu Belsat, żewġha Ihar Iljash u l-kollega tagħha Darya Chultsova. Minkejja li Darya skontat is-sentenza tagħha ta’ sentejn, Katsiaryna u Ihar għadhom il-ħabs, u qed jiskontaw sentenza ta’ ħabs imtawla ta’ tmien snin u tliet xhur. U bħalhom hemm ferm aktar: l-Assoċjazzjoni Belarussa tal-Ġurnalisti ddikjarat li sa tmiem l-2024 l-għadd ta’ ġurnalisti l-ħabs fil-Belarussja kien 45. Ħafna jkomplu jiffaċċjaw pressjoni anke wara li jħallu pajjiżhom.
Fit-13 ta’ Diċembru, Under the Grey Sky intwera fil-Kumitat Ekonomiku u Soċjali Ewropew (KESE) fil-preżenza tas-Sinjura Tamkovich u bħala parti minn seminar dwar ir-rwol tal-media indipendenti Belarussa fit-trawwim ta’ soċjetà aktar reżiljenti u demokratika.
KESE Info tkellem mas-Sinjura Tamkovich dwar il-film:
Il-film kemm isegwi b’mod preċiż l-avvenimenti li seħħew tabilħaqq u d-destin ta’ Katsiaryna Andreyeva? Użajt xi filmati oriġinali tal-protesti tal-2020 u l-każ tas-Sinjura Andreyeva?
Il-filmati oriġinali ntużaw diversi drabi fil-film. Il-ġbid tal-protesta li l-protagonisti kienu qed ixandru fil-bidu tal-film sar mis-Sinjura Andreyeva u s-Sinjura Chultsova; dawk huma filmati awtentiċi li użajna fil-ħdim tax-xena bl-atturi. Anke l-filmat tad-detenzjoni ta’ Raman Bandarenka li l-protagonisti jaraw fuq il-laptop tagħhom huwa reali (op-ed l-attivist Raman Bandarenka nqatel bis-swat minn persuni b’wiċċhom mgħammad wara li pprova jwaqqafhom milli jqaċċtu żigarelli ħomor u bojod li jissimbolizzaw il-bandiera tal-Belarussja qabel l-okkupazzjoni Sovjetika). Fi tmiem il-film, nuri montaġġ ta’ xandiriet diretti tal-protesti meħudin minn Katsiaryna bħala forma ta’ epilogu.
Il-plott tal-film isegwi mill-qrib ħafna r-realtà: il-mod kif ġew arrestati u kkundannati l-ġurnalisti, u l-pieni li ngħataw. Iżda l-għan tiegħi ma kienx li nagħti analiżi preċiża tal-avvenimenti, iżda pjuttost li nipprovdi l-verità emozzjonali tal-għażliet li kellhom jagħmlu n-nies u l-għażliet diffiċli li kellhom iħabbtu wiċċhom magħhom. Il-protagonisti tajniehom ismijiet differenti biex nisseparawhom ftit minn dawk li servewhom ta’ ispirazzjoni fil-ħajja reali, iżda wkoll biex nistiednu l-udjenza tirrifletti dwar dik l-istorja bħala waħda minn ħafna, bħala metafora għal dak li għadda minnu n-nazzjon kollu.
Il-pubbliku ġenerali fil-Belarussja jaf x’ġara lis-Sinjura Andreyeva u ġurnalisti oħra bħalha? Taf kemm nies sofrew l-istess destin jew simili bħal tagħha?
L-għadd ta’ arresti politiċi u azzjonijiet ta’ repressjoni fil-Belarussja tant huwa kbir li kważi impossibbli li ma tkunx konxju tas-sitwazzjoni. Wara l-2020, mill-inqas 130 000 persuna sofrew forom differenti ta’ repressjoni u madwar 500 000 telqu mill-pajjiż. L-ammont huwa tant kbir li diffiċli jibqa’ mistur.
F’dawn l-aħħar snin l-għadd uffiċjali ta’ priġunieri politiċi (dawk akkużati jew ikkundannati fuq akkużi kriminali) fil-Belarussja baqa’ 1 300 persuna. Iżda trid tifhem li mijiet, jekk mhux eluf, diġà servew il-piena tagħhom, xi wħud ingħataw ħelsien aktar kmieni u ħafna minn dawk li għadhom kif ġew ikkundannati jibżgħu jitolbu l-istatus ta’ priġunier politiku. Din hija katina sistematika ta’ repressjoni li tiċċaqlaq b’mod kostanti, bi priġunieri ġodda jieħdu post dawk li jinħelsu.
X’kienet il-motivazzjoni ewlenija tiegħek biex tipproduċi dan il-film? X’qed tittama li tikseb bih?
Bħala Belarussa ħassejt li kelli li nagħmel xi ħaġa meta r-reġim Belarussu ħonoq il-protesta tal-2020 b’tant brutalità. Bħala eks ġurnalista nista’ nirrelata b’mod qawwi mal-perspettiva tal-protagonisti tiegħi. Bħala reġista rajt storja b’saħħitha li tqanqal sentimenti profondi. Ħassejt li kelli nirrakkontaha.
X’messaġġ ewlieni jew emozzjoni tittama li se jieħdu magħhom l-ispettaturi wara li jaraw l-film tiegħek?
Nittama tabilħaqq li n-nies jirriflettu tassew dwar xi tfisser il-libertà, xi prezz iridu jħallsu biex jiksbuha u jekk fil-fatt japprezzawx dak li għandhom. Nittama li jaħsbu dwar Kacia, Ihar u kull persuna li tinsab il-ħabs, peress li l-libertà hija xi ħaġa li ħafna nies fl-Ewropa jieħdu bħala fatt.
X’għandha tagħmel l-UE – l-istituzzjonijiet tagħha, is-soċjetà ċivili, l-assoċjazzjonijiet tal-ġurnalisti u tad-drittijiet tal-bniedem u l-gvernijiet nazzjonali – biex tgħin?
Inħeġġeġ lill-UE biex lill-Belarussja ma tinsihiex u ma tqishiex kawża mitlufa. L-appoġġ tal-UE huwa dak li jippermetti lill-kultura u lill-media tagħna, u lis-soċjetà ċivili jibqgħu ħajjin taħt din il-pressjoni tremenda u, għalkemm għalissa dan jista’ jinħass bħala investiment fit-tul, se jkun vallapena.
Il-Kumitat Ekonomiku u Soċjali Ewropew (KESE), bħala l-imsieħeb istituzzjonali tas-soċjetà ċivili, huwa kburi jħabbar it-tieni edizzjoni tal-Ġimgħa tas-Soċjetà Ċivili!
Il-Kumitat Ekonomiku u Soċjali Ewropew (KESE), bħala l-imsieħeb istituzzjonali tas-soċjetà ċivili, huwa kburi jħabbar it-tieni edizzjoni tal-Ġimgħa tas-Soċjetà Ċivili!
Ir-reġistrazzjoni tiftaħ fi Frar 2025. Dalwaqt se jkun hemm aktar informazzjoni fuq il-paġna tal-avveniment #CivSocWeek u l-mezzi tal-media soċjali. Kompli segwina!
Minn Stefano Mallia, President tal-Grupp ta’ Min Iħaddem
“Nisfruttaw il-Kompetittività għal Prosperità Kondiviża” huwa l-għan ewlieni tal-prijoritajiet tal-Grupp tagħna li għadhom kif ġew adottati.
Quddiem l-isfidi globali attwali, il-prijoritizzazzjoni tal-kompetittività u l-ħolqien ta’ ambjent favorevoli għan-negozju jridu jkunu fuq quddiem nett tal-aġenda politika, appoġġjati minn azzjonijiet ta’ politika konkreti.
F’UE li tiffavorixxi n-negozju, il-kompetittività hija bbażata fuq l-eċċellenza u l-kompetizzjoni soda u mhux fuq is-sussidji jew il-protezzjoniżmu, u n-negozji għandhom aċċess kompetittiv għar-riżorsi kollha tal-produzzjoni li jeħtieġu.UE li tiffavorixxi n-negozju tfisser ukoll li jkollna regolament li jwassal għan-negozju u l-produttività, fejn il-piż amministrattiv jiġi minimizzat, u fejn is-Suq Uniku jiffunzjona bis-sħiħ. Barra minn hekk, fiduċja soda bejn l-intrapriżi u dawk li jfasslu l-politika hija kruċjali biex jiġi attirat l-investiment. Daqstant ieħor hija kruċjali l-ħtieġa li jiġu ssalvagwardjati l-interessi tal-kumpaniji tal-UE fil-konfront tal-kompetituri internazzjonali tagħhom.
Huwa għalhekk li qed nappellaw għal 10 settijiet ta’ azzjonijiet ta’ politika favur in-negozju bħala prijoritajiet ewlenin:
Riforma radikali tal-approċċ regolatorju
Sistemi ta’ Innovazzjoni Produttiva li jiffukaw fuq l-investiment u l-innovazzjoni
Kapaċità Teknoloġika Għolja fid-difiża, is-sigurtà u t-tranżizzjoni ekoloġika u l-appoġġ għal negozji ġodda fil-qasam tat-teknoloġija
Bażi Industrijali b’Saħħitha
Swieq Finanzjarji Integrati permezz tal-iżvilupp tal-Unjoni tas-Swieq Kapitali u l-Unjoni Bankarja
Aċċess Adegwat għax-Xogħol
Sistemi ta’ Enerġija u Trasport Effettivi
Kundizzjonijiet Indaqs tan-Negozjar
Tranżizzjoni Ekoloġika orjentata lejn in-Negozju
Finanzi Pubbliċi Effiċjenti
Dawn l-azzjonijiet huma urġenti jekk irridu nisfruttaw l-impatt pożittiv tan-negozji kompetittivi fuq ekonomija robusta u UE influwenti fil-livell globali.
Ir-rapporti ta’ Letta u ta’ Draghi kienu twissija: jekk l-UE mhix se terġa’ tikseb il-kompetittività tagħha, tista’ tħabbat wiċċha ma’ kompromessi diffiċli fil-qasam tal-benesseri, l-istandards ambjentali u l-libertajiet fundamentali.
Għall-edizzjoni ta’ din is-sena ta’ L-Ewropa Tiegħek, Leħnek, il-KESE rċieva mijiet ta’ applikazzjonijiet mill-iskejjel sekondarji fl-UE, mill-pajjiżi kandidati u mir-Renju Unit.
Għal l-edizzjoni ta’ din is-sena ta’ L-Ewropa Tiegħek, Leħnek, il-KESE rċieva mijiet ta’ applikazzjonijiet mill-iskejjel sekondarji fl-UE, mill-pajjiżi kandidati u mir-Renju Unit.
L-organizzaturi ta’ “L-Ewropa Tiegħek, Leħnek” eżaminaw u vvalutaw bir-reqqa l-applikazzjonijiet kollha, u għażlu 36 skola sekondarja li ser jieħdu sehem fl-avveniment “L-Ewropa Tiegħek, Leħnek 2025” nhar it-13 u l-14 ta’ Marzu!
“L-Ewropa Tiegħek, Leħnek”, li huwa l-avveniment annwali ewlieni tal-KESE għaż-żgħażagħ, din is-sena ser ilaqqa’ flimkien kważi 100 student u 37 għalliema. Dan l-avveniment ser ikun intitolat “Nagħtu vuċi liż-żgħażagħ” u ser isir fuq ġurnata u nofs. Ser jiffoka fuq ir-rwol li ż-żgħażagħ jista’ jkollhom biex isawru futur reżiljenti. Għandu l-għan li jawtonomizzahom jieħdu sehem f’azzjoni ċivika u jikkontribwixxu b’mod attiv għad-demokrazija parteċipattiva, kemm fil-komunitajiet tagħhom kif ukoll lil hinn minnhom.
Waqt li l-KESE jħejji biex jilqa’ lill-parteċipanti kollha ta’ “L-Ewropa Tiegħek, Leħnek”, il-membri tal-KESE ser iżuru l-iskejjel magħżula fil-bidu tal-2025 biex jiltaqgħu mal-istudenti u jiskambjaw l-ideat qabel l-avveniment ewlieni.
Is-sessjoni inawgurali u dik tal-għeluq tal-14 ta’ Marzu 2025 ser jixxandru dirett. Il-link li trid tuża biex tara dawn is-sessjonijiet ser tiġi ppubblikata fuq is-sit web tal-KESE, fuq il-paġna web uffiċjali ta’ L-Ewropa Tiegħek, Leħnek! 2025 | KESE, fejn tista’ ssib ukoll aktar informazzjoni u aġġornamenti dwar l-avveniment.
Immexxi mill-produttur tal-films Latvjan Gints Zilbalodis, dan il-film animat mfaħħar mill-kritiċi huwa koproduzzjoni bejn il-Latvja, Franza u l-Belġju. Dan kiseb rikonoxximent globali, u rebaħ il-Golden Globe Award for the Best Animated Feature u l-aqwa premjijiet f’festivals bħall-Annecy International Animation Film Festival, in-New York Film Critics Circle Awards u l-European Film Awards.
Segwi l-vjaġġ ta’ Cat, li rnexxielu jsalva u jinsab solitarju wara għargħar post-apokalittiku, huwa u jaffaċċja realtà ġdida u jitgħallem jikkollabora ma’ annimali sħabu fuq dgħajsa tas-salvataġġ.
L-avveniment huwa parti mis-sensiela ta’ skrinjar tal-films tal-KESE li tinsab għaddejja, organizzata fi sħubija ma’ LUX – Premju Ċinematografiku Ewropew tal-Udjenza tal-Parlament Ewropew, bl-għan jippromovi d-diversità kulturali u jqanqal djalogu dwar kwistjonijiet soċjali urġenti.
Eluf ta’ kopji tal-aħħar edizzjoni tal-fuljett popolari tal-KESE, il-Passaport għad-DemokrazijaEwropea, issa qed jitqassmu madwar l-Ewropa. Qed tistaqsi jekk il-Passaport għad-Demokrazija Ewropea huwiex disponibbli wkoll f’format elettroniku? It-tweġiba hija iva!
Eluf ta’ kopji tal-aħħar edizzjoni tal-fuljett popolari tal-KESE, il-Passaport għad-DemokrazijaEwropea, issa qed jitqassmu madwar l-Ewropa. Qed tistaqsi jekk il-Passaport għad-Demokrazija Ewropea huwiex disponibbli wkoll f’format elettroniku? It-tweġiba hija iva!
Il-verżjoni interattiva online, li fiha filmati, kwiżżijiet, mapep u ħafna aktar, diġà hija disponibbli fi 13-il lingwa, u huma ppjanati verżjonijiet lingwistiċi addizzjonali! Agħtiha titwila u skopri kif tista’ verament tagħmel differenza!
