Giulia Barbucci: “Huwa essenzjali li tinżamm ġestjoni baġitarja soda u trasparenti”

It-trejdjunjonista Taljana Giulia Barbucci hija l-Viċi President l-ġdida tal-KESE b’responsabbiltà għall-baġit.

“Ninsab kuntenta li nagħmel parti minn presidenza li żewġ terzi tagħha huma nisa”, qalet is-Sinjura Barbucci waqt is-sessjoni plenarja. “L-ugwaljanza bejn il-ġeneri għadha kwistjoni miftuħa fil-KESE, l-istituzzjonijiet u l-Unjoni Ewropea kollha kemm hi.”

Giulia Barbucci ilha taħdem għas-CGIL (Confederazione Generale Italiana del Lavoro), l-akbar trejdjunjin fl-Italja, mill-1989. F’dan iż-żmien ta’ kriżi ekonomika, hija tqis li huwa essenzjali li tinżamm ġestjoni baġitarja soda u trasparenti, bi prijorità ewlenija waħda: li jiġi żgurat li l-membri jistgħu jwettqu l-ħidma politika tagħhom.

Ħidmet Giulia Barbucci minn dejjem iffokat fuq il-protezzjoni tal-ħaddiema taż-żewġ sessi. F’Lulju ta’ din is-sena kienet responsabbli għall-Opinjoni dwar Strateġija dwar l-ugwaljanza bejn il-ġeneri, li rrappreżentat il-kontribut tal-Kumitat għall-Kummissjoni Ewropea.

Fl-2002 ħadet sehem fin-negozjati dwar il-Qafas Ewropew dwar it-Teleħidma, li issa għandu jiġi rivedut minħabba l-pandemija. “Matul din il-kriżi tas-saħħa, in-negozji rnexxielhom jagħmlu li jistgħu, ta’ spiss mingħajr regoli ċari,” spjegat is-Sinjura Barucci. “L-impatt tat-telexogħol fuq in-nies u l-unitajiet domestiċi issa huwa enormi, madankollu, u n-nisa huma l-ewwel li jġorru l-konsegwenzi, peress li l-kompiti tagħhom jinkludu wkoll ix-xogħol ta’ kura. Għal din ir-raġuni huwa essenzjali li jiġi ssalvagwardjat id-dritt għall-iskonessjoni.” (na)

Ara messaġġ b’vidjow mill-Viċi President tal-KESE għall-baġit: