KESE info

Studenti tal-iskola postsekondarja mill-Ewropa kollha ppreżentaw proposti konkreti għal azzjoni klimatika lill-Viċi President Eżekuttiv tal-Kummissjoni Ewropea Frans Timmermans - l-eżitu ta’ Summit virtwali taż-Żgħażagħ dwar il-Klima organizzat mill-Kumitat Ekonomiku u Soċjali Ewropew fit-18-19 ta’ Marzu 2021.

“Iż-żgħażagħ Ewropej għandhom vuċi b’rabta mal-ġejjieni tal-UE: mingħajr is-sejħa tagħkom għal azzjoni, il-Patt Ekoloġiku Ewropew ma setax iseħħ”, qal is-Sur Timmermans huwa u jintoduċi l-avveniment L-Ewropa Tiegħek, Leħnek 2021. “Jiena tassew impressjonat bil-fehim fil-fond tagħkom tal-problema tat-tibdil fil-klima u bil-mod kif ippreżentajtu l-proposti tagħkom lili. Dan huwa l-mod kif ngħixu - billi nifhmu lil xulxin. Huwa diffiċli ferm li tobgħod persuna li tista’ tifhem,” ikkonkluda.

Wara jumejn ta’ dibattiti virtwali mqanqla, aktar minn 234 student ta’ bejn is-16 u t-18-il sena minn 28 pajjż li ħadmu b’mod parallel f’45 kamra ta’ negozjati virtwali żviluppaw rakkomandazzjonijiet prattiċi, li wara ppreżentawhom matul sessjoni plenarja finali.

L-istudenti kellhom jassumu r-rwol ta’ grupp ta’ partijiet ikkonċernati , billi ssimulawKonferenza tan-Nazzjonijiet Uniti dwar it-Tibdil fil-Klima (COP), u ħadmu flimkien ma’ gruppi oħrajn biex jiżviluppaw pjan li jrażżan it-tisħin globali għal livelli sikuri ta’ ferm inqas minn 1.5ºC sa tmiem is-seklu. Il-gruppi kienu jirrappreżentaw setturi u industriji mill-ħajja reali, li l-attivitajiet u l-appoġġ tagħhom jinfluwenzaw it-tisħin globali:

Il-proposti kienu jinkludu:

• It-tħawwil ta’ siġar fil-belt u l-installazzjoni ta’ ġonna vertikali
• “Ecological-Manhattan-Project” għall-UE, b’investiment ta’ ammonti kbar f’teknoloġiji ġodda
• L-investiment f’aktar edukazzjoni għall-pubbliku ġenerali
• L-implimentazzjoni ta’ politiki mfassla apposta li jirrispondu għaċ-ċirkostanzi speċifiċi ta’ kull pajjiż
• L-appoġġ għat-tisġir bħala waħda mill-aktar soluzzjonijiet effiċjenti fit-tul għat-tneħħija tal-karbonju
• L-introduzzjoni tal-idroġenu u l-bijogass filwaqt li jiġu eliminati gradwalment il-fjuwils fossili
• It-tnaqqis tad-distakk bejn in-nazzjonijiet żviluppati u dawk li qed jiżviluppaw

Il-pjan finali mfassal miż-żgħażagħ Ewropej ittraduċa f’żieda ta’ 1.4°C fit-temperatura sal-2100, u b’hekk laħaq l-għan tal-eżerċizzju, u ġie ppreżentat minn tmien studenti.

Cillian Lohan, Viċi President tal-KESE inkarigat mill-komunikazzjoni, għalaq l-avveniment billi qal: “Nittama li l-esperjenza ta’ “L-Ewropa Tiegħek, Leħnek” tħajjarkom tkunu ċittadini attiv, għandna bżonn il-parteċipazzjoni tagħkom biex id-demokrazija tkun b’saħħitha. Il-moviment taż-żgħażagħ wera li l-bidla tista’ toriġina mit-toroq. Illum qed ngħinu lil dawk is-sejħiet għal aktar azzjoni biex jidwu mal-kurituri tal-poter”.

Aktar dettalji dwar L-Ewropa Tiegħek, Leħnek 2021 jinsabu fil-paġna uffiċjali tal-avveniment. (ks)

Fl-20 ta’ Marzu, il-KESE ospita avveniment sekondarju virtwali flimkien ma’ L-Ewropa Tiegħek, Leħnek! Dwar Infasslu l-bidla sistemika, fejn laqqa’ flimkien diversi esperti, attivisti u influwenzaturi biex jaqsmu l-għarfien espert tagħhom dwar l-azzjoni klimatika fil-kuntest ta’ bidla sistemika.

L-avveniment kien ippresedut mill-Viċi President tal-KESE responsabbli għall-Komunikazzjoni, Cillian Lohan, li introduċa s-suġġett: “It-tibdil fil-klima qed jintensifika u bħala individwi huwa diffiċli li naraw soluzzjoni; din l-isfida teħtieġ bidla fundamentali fil-kultura, l-imġiba u l-valuri”.

L-avveniment huwa maqsum f'erba’ panels, kollha jiffukaw fuq il-ħtieġa għal bidla sistemika sabiex jiġi indirizzat it-tibdil fil-klima.

Virginijus Sinkevičius, il-Kummissarju Ewropew għall-Ambjent, l-Oċeani u s-Sajd, fetaħ l-ewwel panel b’messaġġ permezz ta’ filmat fejn enfasizza l-bżonn għal approċċ komprensiv: “It-tibdil fil-klima, it-telf tal-bijodiversità, it-tnaqqis tar-riżorsi u t-tniġġis huma konnessi, u jeħtieġ li nindirizzawhom flimkien. Ir-rispons tal-Kummissjoni Ewropea huwa l-Patt Ekoloġiku, iżda ċ-ċittadini għandhom rwol, billi għandna bżonn ideat friski li jridu jkunu sistemiċi”.

Josephine Becker, attivista tal-klima, semmiet il-kunċrett tal-ġustizzja klimatika: “L-Ewropa hija parzjalment responsabbli għal din il-kriżi klimatika, u għalhekk għandna dmir li naġixxu”.

Fit-tieni panel, Corina Angheloiu, Strateġista ta’ Livell Għoli fi ħdan il-Forum for the Future, tat il-fehmiet tagħha dwar l-aħjar approċċ biex tinbeda bidla sistemika: “IL-punt ta’ dħul ewlieni biex tinbeda bidla sistemika huwa l-valuri; sistemi ekonomiċi attwali jiffukaw fuq l-effiċjenza, iżda jekk inqiegħdu l-ġustizzja fil-qalba tas-sistema, nistgħu naraw il-konsegwenzi”.

Nisreen Elsaim, president tal-Grupp Konsultattiv dwar iż-Żgħażagħ tan-Nazzjonijiet Uniti, wasslet dan il-messaġġ: “Is-sistemi ekonomiċi u politiċi attwali mhumiex qed jaqdu l-iskopijiet tagħna u qed jagħmlu ħsara lill-ambjent tagħna. Mhux qed jaħdem il-maniġment imsejjes fuq riżultati”.

Lewis Akenji, Direttur Maniġerjali tal-Hot or Cool Institute, spjega fid-diskussjoni waqt it-tielet panel dwar kif sistemi attwali jinfluwenzaw il-modi ta’ għajxien tan-nies kif ukoll l-għażla tat-trasport, ta’ xogħol, ta’ ikel, eċċ.: “Qed noħolqu inugwaljanzi li qed jikbru u qed nikkunsmaw wisq; is-sistemi ekonomiċi u politiċi tagħna mhux qed jagħmluna kuntenti”.

Saoi O'Connor, attivista favur il-klima, tkellmet dwar ir-rwol ta’ dawk li jieħdu d-deċiżjonijiet: "Il-mexxejja u l-politiċi jistgħu jitkellmu dwar ċifri u politiki, iżda ma jidhrux li jieħdu inkonsiderazzjoni r-realtajiet tan-nies".

L-aħħar panel wera eżempji speċifiċi ta’ inizjattivi favur bidla sistemika. Christian Kroll, CEO u fundatur tal-magna tat-tiftix fuq l-internet, Ecosia, spjega li l-profitti kollha tal-kumpanija jintużaw biex jitħawlu speċijiet differenti ta’ siġar b’valur miżjud għall-komunitajiet lokali madwar id-dinja.

Il-promotur tal-moda bil-galbu (slow fashion) u influwenzatur, Juliet Bonhomme, enfasizzat il-poter li l-konsumatur għandu permezz tal-għażliet li huwa jagħmel: “Flusna huma l-poter tagħna”.

L-avveniment ġie segwit fuq Facebook minn aktar minn 100 ruħ minn madwar l-Ewropa, li kellhom l-opportunità wkoll li jiskopru l-bidla sistemika permezz tal-arti, ma’ Sophie Ong u Tibor Miklos, żewġ artisti li ppreżentaw xogħlijiet imnebbħa mid-dibattiti immedjatament wara l-avveniment. (dgf)

Il-Kumitat Ekonomiku u Soċjali Ewropew intalab jingħaqad mal-korp ewlieni tal-Konferenza li għandu jwitti t-triq tal-iżvilupp futur tal-UE.

Il-President tal-Kummissjoni Ewropea, Ursula von der Leyen, fil-linji gwida politiċi tagħha ta’ Lulju 2019 għall-Kummissjoni li kienet għadha se tieħu l-mandat, appellat għal Konferenza dwar il-Futur tal-Ewropa sabiex iċ-ċittadini jkunu jistgħu jgħidu tagħhom dwar l-iżvilupp futur tal-UE.

Fuq dan ġiet iffirmata Dikjarazzjoni Konġunta dwar il-Konferenza dwar il-Futur tal-Ewropa fl-10 ta’ Marzu 2021 mill-Presidenti tat-tliet istituzzjonijiet prinċipali tal-UE (il-Parlament Ewropew, il-Kummissjoni Ewropea u l-Kunsill tal-UE), li ddefinixxew il-kamp ta’ applikazzjoni preċiż tagħha (impenn maċ-ċittadini), il-kontenut (il-ksiba tat-tranżizzjoni ekoloġika u dik diġitali u t-tisħħ tar-reżiljenza, il-kompetittività u s-solidarjetà tal-Ewropa) u l-iskeda taż-żmien (il-konklużjonijiet għandhom jkunu lesti sar-rebbiegħa 2022).

Il-Bord Eżekuttiv huwa l-pilastru tal-governanza tal-Konferenza dwar il-Futur tal-Ewropa, peress li jara l-ħidma tal-Konferenza u jirrapporta direttament lill-plenarja tal-Konferenza.

Il-KESE, bħala dar is-soċjetà ċivili Ewropea u l-pont bejn l-istituzzjonijiet Ewropej u s-soċjetà ċivili organizzata, ġie mistieden jingħaqad mal-Bord Eżekuttiv.

Christa Schweng, President tal-KESE, ħadet sehem fil-laqgħat kollha tal-Bord Eżekuttiv.

Sadanittant, il-KESE qiegħed jirfina l-kontribut tiegħu għall-Konferenza dwar il-Futur tal-Ewropa, u jista’ jiddependi fuq mill-inqas tliet aspetti b’saħħithom ewlenin:

• it-329 membru li ġejjin mill-aspetti kollha tal-ħajja (impjegaturi, trade unions u s-soċjetà ċivili b’mod ġenerali) u mis-27 Stat Membru;
• in-network stabbilit tiegħu mal-kunsilli ekonomiċi u soċjali nazzjonali; u
• il-Grupp ta’ Kuntatt tiegħu, network ta’ organizzazzjonijiet tas-soċjetà ċivili, li, filwaqt li mhux rappreżentant direttament fil-KESE, għandu rabtiet b'saħħithom miegħu, u b’hekk iżid il-viżibilità tiegħu.

Il-KESE huwa konvint, iktar minn qatt qabel, li permezz ta’ kontributi speċifiċi u konkreti għall-Konferenza dwar il-Futur tal-Ewropa, jista’ jagħmel differenza, u jiżgura li leħen is-soċjetà ċivili Ewropea ser jinstema’ b’mod ċar u tond. (sm)

Matul l-ewwel miżuri ta’ lockdown b’riżultat tal-pandemija tal-COVID-19, l-għadd ta’ teleħaddiema sploda minn 5 % għal 40 % tal-forza tax-xogħol fl-UE. Sena wara, filwaqt li t-telexogħol baqa’ għaddej, għad hemm diffikultà biex issir valutazzjoni xierqa tal-impatt tiegħu fuq l-impjegaturi, l-impjegati u s-soċjetà kollha kemm hi. Il-KESE jindika l-ħtieġa għal aktar riċerka u għal perspettiva fit-tul, bil-ħsieb li jiġu sfruttati l-benefiċċji u jittaffew ir-riskji ta’ din il-forma ta’ xogħol.

Minkejja l-opportunitajiet ovvji li joffri kemm lill-ħaddiema kif ukoll lil min iħaddem, bħal produttività akbar, arranġamenti tax-xogħol aktar flessibbli u awtonomija akbar, it-telexogħol xorta jista’ jkollu impatt negattiv fuq il-ħajja tax-xogħol u dik privata taċ-ċittadini. Matul il-pandemija, il-linja bejn it-tnejn xi drabi ma kinitx ċara, b’ammont eċċessiv u ħinijiet itwal ta’ xogħol, u ħin ta’ mistrieħ insuffiċjenti.

Peress li t-telexogħol sar parti minn kultura ta’ attività kontinwa, fejn ħafna ħaddiema jsibuha diffiċli jiskonnettjaw, it-telexogħol jista’ jkollu effetti fuq is-saħħa mentali u fiżika tal-popolazzjoni u l-benesseri tagħha. F’żewġ Opinjonijiet dwar it-telexogħol adottati fis-sessjoni plenarja ta’ Marzu, il-Kumitat Ekonomiku u Soċjali Ewropew (KESE) innota li n-nisa huma partikolarment vulnerabbli għall-aspetti negattivi tat-telexogħol, peress li jaħdmu mid-dar aktar ta’ spiss u jkollhom jikkombinaw ix-xogħol mal-faċendi tad-dar.

Iċ-ċifri pprovduti minn studju mwettaq mill-Eurofound urew li 30 % tat-teleħaddiema “regolari” ħadmu fil-ħin liberu tagħhom ta’ kuljum, jew bosta drabi fil-ġimgħa, u madwar 20 % ħadmu aktar minn 48 siegħa fil-ġimgħa. Madwar 40 % tat-teleħaddiema “regolari” kellhom inqas minn 11-il siegħa ta’ mistrieħ kuljum.

Sabiex jiġu minimizzati r-riskji u jiġu amplifikati l-benefiċċji tat-telexogħol fi żminijiet ta’ wara l-pandemija, il-KESE qed jappella lill-imsieħba soċjali fl-Istati Membri biex ifasslu regoli apposta għal kull pajjiż, u għal kull sitwazzjoni speċifika tas-setturi u l-kumpaniji, fil-qafas tad-djalogu soċjali eżistenti u s-sistemi ta’ negozjar kollettiv.

It-telexogħol għandu jkun regolat b’mod xieraq; hawnhekk huwa importanti li jiġi żgurat li jkun riversibbli ladarba l-kriżi tal-COVID-19 tasal fi tmiemha, u li jibqa’ volontarju. It-teleħaddiema għandu jkollhom l-istess drittijiet individwali u kollettivi u l-istess ammont ta’ xogħol bħall-kollegi tagħhom li jaħdmu fil-bini tal-impjegaturi tagħhom. Il-KESE qal li l-arranġamenti tat-telexogħol għandhom jiġu stabbiliti bil-miktub, filwaqt li jiggarantixxu trattament ugwali u kundizzjonijiet ta’ saħħa u sigurtà ugwali fuq il-post tax-xogħol.

“It-telexogħol se jkun karatteristika tas-swieq tax-xogħol futuri, iżda ma nistgħux nippermettu li dan iwassal għal rigress soċjali u l-iżolament tal-ħaddiema. Dan jista’ jgħin liċ-ċittadini jirrikonċiljaw il-ħajja professjonali ma’ dik personali, iżda ma nistgħux nippermettu kwalunkwe diskriminazzjoni jew differenza fit-trattament bejn dawk li jaħdmu d-dar u dawk li jiddeċiedu li jmorru fl-uffiċċju,” qal ir-relatur tal-Opinjoni dwar L-isfidi tat-telexogħol, Carlos Manuel Trindade.

Il-KESE nnota li minħabba l-fatt li dan il-mod ta’ ħidma qed jinfirex malajr, u fid-dawl tat-tagħlimiet meħuda mill-pandemija, il-ftehimiet eżistenti tal-UE li jkopru t-telexogħol għandhom jiġu vvalutati biex ikun żgurat li dawn jibqgħu effettivi fiċ-ċirkostanzi l-ġodda.

Il-Ftehim Qafas dwar it-Telexogħol tal-2002 u dak dwar id-Diġitalizzazzjoni tal-2020, iffirmati mill-imsieħba soċjali fil-livell tal-UE, huma partikolarment rilevanti. Dawn għandhom jitqiesu mill-Istati Membri u l-imsieħba soċjali meta jfasslu l-oqfsa nazzjonali għall-kumpaniji u l-ħaddiema li jużaw din il-forma ta’ xogħol.

Barra minn hekk, inizjattiva Ewropea tista’ potenzjalment titnieda taħt it-Trattat dwar il-Funzjonament tal-Unjoni Ewropea u/jew fil-livell tal-Istati Membri sabiex jiġi protett u implimentat id-dritt għall-iskonnessjoni.

L-UE u l-Istati Membri għandhom jagħmlu użu wkoll mil-leġiżlazzjoni eżistenti, bħad-Direttiva dwar il-Ħin tax-Xogħol u d-Direttiva dwar il-bilanċ bejn ix-xogħol u l-ħajja privata, li hija applikabbli bis-sħiħ għat-telexogħol. Dawk id-Direttivi għandhom jiġu trasposti fil-liġi nazzjonali u implimentati kif xieraq, peress li dan “bla dubju se jwassal għal titjib fil-kundizzjonijiet tax-xogħol tat-teleħaddiema”.

l-KESE ġibed l-attenzjoni wkoll għar-riskju li t-telexogħol jintuża biex jiġi impost piż doppju ta’ xogħol bil-ħlas u mingħajr ħlas. Ix-xogħol tad-dar għadu mhux jinqasam b’mod ugwali bejn in-nisa u l-irġiel, li fil-parti huwa piż li jinġarr min-nisa, u dan inaqqas il-kapaċità tagħhom li jkunu produttivi fix-xogħol bil-ħlas u jista’ wkoll idgħajjef il-prospetti professjonali tagħhom.

“Kemm is-soċjetà inġenerali, kif ukoll in-negozji jeħtiġilhom jagħmlu dak kollu possibbli biex iġibu fix-xejn dawn l-isterjotipi marbuta mal-ġeneru u jirrikonoxxu lin-nisa bħala ħaddiema fihom infushom lil hinn mill-ħafna rwoli u kwalitajiet oħra tagħhom. L-ispiża ekonomika u soċjali ta’ dawn il-preġudizzji għas-soċjetà hija kbira ħafna,” qalet ir-relatur tal-Opinjoni, Milena Angelova.

F’dan ir-rigward, il-KESE appella wkoll għal “Ftehim ta’ Kura għall-Ewropa”, filwaqt li enfasizza li infrastruttura u servizzi ta’ kura disponibbli, aċċessibbli u affordabbli għat-tfal, il-persuni bi bżonnijiet speċjali u l-anzjani huma prerekwiżit kruċjali ieħor għal telexogħol ugwali bejn il-ġeneri.

Fl-24 ta’ Marzu, il-KESE ospita dibattitu mal-Kummissarju tal-UE għall-Ugwaljanza, Helena Dalli, dwar l-istrateġija l-ġdida dwar id-drittijiet tal-persuni b’diżabbiltà, imnedija reċentement mill-Kummissjoni Ewropea.

L-istrateġija, li se tkun fis-seħħ mill-2021 sal-2030, għandha l-għan li tiżgura implimentazzjoni sħiħa fl-UE tal-Konvenzjoni tan-NU dwar id-Drittijiet ta’ Persuni b’Diżabbiltà (UNCRPD). Il-UNCRPD hija trattat rivoluzzjonarju li biddlet il-perċezzjoni tad-diżabbiltà billi adottat approċċ ibbażat fuq id-drittijiet tal-bniedem u tagħti lis-soċjetà r-responsabbiltà għat-tneħħija tal-ostakli li jipprevjenu lin-nies ikkonċernati milli jkunu inklużi bis-sħiħ fis-soċjetà.

“Nilqgħu l-Istrateġija ġdida tal-UE dwar id-Diżabbiltà. Madwar 87 miljun persuna fl-UE għandhom xi forma ta’ diżabbiltà, u aktar minn nofshom iħossuhom diskriminati”, qalet il-President tal-KESE, Christa Schweng fil-kummenti tal-ftuħ tagħha.

Hija fakkret li l-KESE kien l-ewwel istituzzjoni li adotta Opinjonijiet fuq inizjattiva proprja fl-2019 fejn appella għal Aġenda ġdida dwar id-Drittijiet tal-Persuni b’Diżabbiltà li tkun allinjata bis-sħiħ mal-UNCRPD: “Ninsab kuntenta li ħafna mir-rakkomandazzjonijiet li aħna konna ressaqna ġew riflessi fl-Istrateġija tal-UE dwar il-Persuni b’Diżabbiltà proposta ftit tal-ġimgħat ilu”.

Il-KESE insista fuq l-implimentazzjoni sħiħa tal-UNCRPD, kemm fl-Opinjonijiet tiegħu kif ukoll permezz tal-ħidma tal-Grupp ta’ Studju tematiku tiegħu dwar id-drittijiet tal-persuni b’diżabbiltà, li ġie stabbilit biex jimmonitorja kif l-UNCRPD qed tiġi implimentata mill-Istati Membri.

L-Opinjoni dwar It-tiswir tal-aġenda tal-UE għal drittijiet tal-persuni b'diżabbiltà 2020-2030 mhijiex l-uniku test tal-KESE dwar dan is-suġġett, huwa adotta bosta oħrajn ukoll, bħar-rapport ta’ informazzjoni u l-Opinjoni dwar id-drittijiet tal-persuni b’diżabbiltà biex jivvutaw fl-elezzjonijiet tal-Parlament Ewropew. Il-KESE se janalizza l-istrateġija l-ġdida f’Opinjoni ġdida, li għandha tiġi ppreżentata fis-sessjoni plenarja ta’ Lulju.

“Għaxar snin wara li l-UE rratifikat l-UNCRPD, issa huwa ż-żmien li nsaħħu l-azzjoni Ewropea fil-qasam tal-politiki dwar id-diżabbiltà. L-għan tagħna huwa li nwasslu bidliet pożittivi għall-ħajjiet tal-persuni b’diżabbiltà fl-UE u lil hinn, sabiex ikunu jistgħu jipparteċipaw fuq bażi ugwali mal-oħrajn mingħajr ebda eċċezzjoni”, qalet il-Kummissarju Dalli.

Il-membri tal-KESE tkellmu favur l-istrateġija l-ġdida, iżda wissew li, meta jimplimentawha, l-UE u l-Istati Membri jeħtiġilhom jqisu l-effetti devastanti tal-pandemija fuq il-persuni b’diżabilità, speċjalment fil-qasam tal-impjieg u tal-edukazzjoni, fejn ġew aggravati l-inugwaljanzi eżistenti. (ll)

It-trasport ferrovjarju għad irid jagħmel progress politiku, regolatorju u kulturali, għalkemm 25 sena ta’ liberalizzazzjoni għamlu ħafna progress lejn il-ftuħ tas-swieq u lejn il-kisba ta’ armonizzazzjoni teknika. Dan huwa l-messaġġ ewlieni ta’ Opinjoni dwar Żona Ferrovjarja Unika Ewropea adottata fis-sessjoni plenarja tal-KESE ta’ Marzu.

Hemm bżonn ta’ analiżi imparzjali taż-Żona Ferrovjarja Unika Ewropea u l-kisbiet tagħha u s-Sena Ewropea tal-Ferroviji 2021 tista’ tipprovdi opportunità eċċellenti sabiex jingħata rendikont tal-iżviluppi u jiġu stabbiliti għanijiet ġodda għall-futur, jenfasizza l-KESE.

Waqt li tkellem waqt id-dibattitu tal-plenarja, ir-relatur tal-Opinjoni, Stefan Back, qal: “Il-ferroviji jeħtieġu bidla fil-kultura u approċċ li huwa ħafna aktar iċċentrat fuq il-ħtiġijiet tal-konsumaturi, fir-rigward kemm tat-trasport tal-passiġġieri kif ukoll tat-trasport tal-merkanzija. Is-Sena Ewropea tal-Ferroviji 2021 għandha tintuża bħala opportunità biex tiġi promossa din il-bidla fl-imġiba u tiġi żviluppata kooperazzjoni aktar faċli bejn l-operaturi u l-konsumaturi u biex tiġi sfruttata d-diġitalizzazzjoni.”

Il-pandemija tal-COVID-19 waqqfet jew imblukkat il-proġetti, li issa jridu jitkomplew. L-għajnuna mill-Istat tibqa’ kruċjali biex tiżgura li s-servizzi essenzjali wara l-kriżi u l-kuntratti ta’ servizz pubbliku jistgħu jiggarantixxu servizzi għall-passiġġieri aċċessibbli, affordabbli u inklużivi għal kulħadd. Fil-fehma tal-KESE, din hija waħda mill-aktar miżuri effettivi u effiċjenti biex jiġi promoss it-trasport ferrovjarju tal-passiġġieri. (mp)

Il-pass tat-trasformazzjoni lejn l-Unjoni tal-Enerġija jeħtieġ li jiżdied b’mod sinifikanti jekk irridu nilħqu l-objettivi tal-enerġija u tal-klima tal-UE għall-2050, iżda li ninjoraw is-sitwazzjoni soċjali u ekonomika fi Stati Membri individwali jista’ jkun perikoluż, jargumenta l-KESE f’Opinjoni reċenti.

Jekk ma jitqiesux biżżejjed il-kundizzjonijiet soċjali u ekonomiċi fl-Istati Membri differenti, dan jista’ jhedded l-aċċettazzjoni soċjali għall-investiment u r-riformi mmirati biex jaċċelleraw it-tranżizzjoni tal-enerġija, jisħaq il-KESE.

Fl-Opinjoni, abbozzata minn Lutz Ribbe u adottata fis-sessjoni plenarja ta’ Marzu, il-KESE jistabbilixxi l-pożizzjoni tiegħu dwar ir-rapporti tal-2020 dwar l-Istat tal-Unjoni tal-Enerġija u l-Valutazzjoni tal-Pjani Nazzjonali għall-Enerġija u l-Klima (NECPs), u qal li, minkejja li l-objettivi tal-enerġija u l-klima għall-2020 fil-parti l-kbira ntlaħqu, dan mgħandux iwassal għal kompjaċenza.

L-objettivi għat-30 sena li jmiss, b’bidu mis-snin 2020, iridu jkunu aktar ambizzjużi u tassew iqiegħdu liċ-ċittadini tal-Ewropa fil-qalba tal-Unjoni tal-Enerġija.

Is-Sur Ribbe qal: "It-tranżizzjoni tal-enerġija tkun f’riskju jekk il-politiċi jwiegħdu l-parteċipazzjoni lil parti wiesgħa tas-soċjetà, iżda fir-realtà ma jqisux din il-wegħda bis-serjetà u ma jwettquhiex." (mp)

Il-KESE jilqa’ l-Pjan ta’ Azzjoni l-ġdid tal-Komunikazzjoni dwar is-self improduttiv, iżda huwa tal-fehma li huwa nieqes minn proposti ġodda adatti għaż-żminijiet tal-COVID-19, li jħalli lill-Ewropa tiffaċċja żmien straordinarju b’regoli miktuba għal żminijiet ordinarji.

F’Opinjoni adottata mill-assemblea plenarja fil-25 ta’ Marzu, il-KESE analizza l-istrateġija għat-trattament ta’ self improduttiv. Il-Kummissjoni Ewropea stabbilixxiet it-tħassib ewlieni tagħha dwar setturi speċifiċi tal-ekonomija, bħall-banek, ix-xerrejja tal-kreditu, is-servizzjanti tal-kreditu. Madankollu, il-KESE ddeskriva l-perspettiva tas-soċjetà usa’ Ewropea.

"Il-KESE għandu għal qalbu l-istabbiltà tas-settur bankajru", qal ir-relatur tal-Opinjoni, Kęstutis Kupšys. “Iżda għandna għal qalbna wkoll in-negozji li huma midjuna u li ma jistgħux jibqgħu jħallsu d-djun tagħhom, kif ukoll negozji vijabbli li jistgħu jeħtieġu flus addizzjonali mill-banek. Kellna wkoll ċittadini vulnerabbli f’moħħna, dawk li huma midjuna u li waslu biex isiru vittmi ta’ “fondi opportunistiċi”. Fl-aħħar nett, kellna f’moħħna l-kontribwenti kollha: meta, jew aħjar, jekk il-fondi pubbliċi huma allokati biex jinxtraw portafolli ta’ self improduttiv, huma dawk li jħallsu biex isalvaw il-banek minn djun irrekuperabbli”.

Il-KESE jirrakkomanda li qabel kollox jiġu indirizzati l-kawżi fundamentali tas-self improduttiv sabiex jiġi evitat li jakkumula fil-futur. L-aħjar mod huwa li jiġi żgurat li l-kompetittività titjieb b’mod kostanti, b’enfasi fuq il-kontinwità tan-negozju u l-irkupru ekonomiku, filwaqt li jitkompla l-iżvilupp ta’ sistemi tas-sigurtà soċjali solidi, jiġi miġġieled il-faqar, id-dejn eċċessiv u l-qgħad, u jiġu ggarantiti pagi adegwati u implimentati miżuri kontroċikliċi tal-politika ekonomika fi żminijiet ta’ kriżi.

Fid-dawl tal-impatt tal-coronavirus fuq l-ekonomija tal-UE, il-volum ta’ self improduttiv huwa mistenni li jiżdied madwar l-UE. Sabiex jitnaqqsu l-konsegwenzi negattivi, il-KESE jappella sabiex il-miżuri ta’ salvataġġ għall-għajnuna lill-istituzzjonijiet ta’ kreditu jimxu id f’id ma’ miżuri ta’ għajnuna tal-gvern għal mutwatarji li minħabba l-pandemija spiċċaw f’diffikultà.

Filwaqt li l-Kummissjoni Ewropea tipproponi aktar żvilupp ta’ swieq sekondarji għal assi f'diffikultà, il-KESE jemmen li l-ħtieġa għal suq tas-self improduttiv pan-UE u transfruntier hija esaġerata. Huwa perikoluż li jiġi pprovdut “passaport” operattiv fl-UE kollha għall-kolletturi tad-dejn mingħajr superviżjoni xierqa kemm mill-pajjiżi “ta’ oriġini” kif ukoll minn dawk “ospitanti”. Dan l-approċċ jista’ biss jiġi ġustifikat jekk ikun hemm sett ta’ miżuri ta’ kontrobilanċ li jgħinu biex jiġu mħarsa mutwatarji li jinsabu f’diffikultà: standard ta’ protezzjoni tal-konsumatur madwar l-UE kollha għall-kolletturi tad-dejn.

Barra minn hekk, hemm dubji serji dwar jekk l-operazzjonijiet transfruntiera tax-xerrejja tal-kreditu jipprovdux benefiċċji ekonomiċi tanġibbli għas-sistema ekonomika b’mod ġenerali, u mhux biss għall-banek, ix-xerrejja tal-kreditu u s-servizzjanti tal-kreditu.

Fejn jidħol il-bejgħ ta’ self improduttiv lil kumpaniji li jiġġestixxu l-assi (magħrufa fil-lingwaġġ komuni bħala “banek tal-assi ħżiena”), il-KESE jemmen li din għandha tibqa’ l-eċċezzjoni. Trid tingħata preferenza lil ftehimiet bilaterali ta’ ristrutturazzjoni bejn l-istituzzjoni tal-kreditu u l-mutwatarju, b’enfasi fuq il-kontinwità tan-negozju u l-irkupru ekonomiku.

Skont Kęstutis Kupšys, id-dokument tal-Kummissjoni Ewropea tittratta biss b’mod limitat, f’termini teknokratiċi, kwistjoni li taffettwa lil ħafna sezzjonijiet tas-soċjetà “fil-lokal tagħhom”. “Il-messaġġ li rridu nwasslu huwa li l-kwistjoni tas-self improduttiv m’għandhiex tiġi magħquda ma’ kwistjonijiet relatati mal-preservazzjoni tal-istabbiltà finanzjarja”, huwa kkummenta. “Kollox ma’ kollox, naraw li l-mod xieraq biex nittrattaw is-self improduttiv huwa fi ħdan il-banek, mhux billi nqiegħduhom fis-suq meta s-self isir dubjuż. Id-djun m’għandhomx isiru komodità!” (na)

Fis-sessjoni plenarja tiegħu ta’ Marzu, il-Kumitat Ekonomiku u Soċjali Ewropew adotta opinjoni li tipproponi li tappoġġja l-investiment fl-esplorazzjoni u l-estrazzjoni ta’ materja prima kritika u l-użu ta’ materjali sekondarji mill-iskart, peress li dan huwa essenzjali għat-tranżizzjoni ekoloġika fl-UE.

F’Settembru 2020, il-Kummissjoni Ewropea adottat il-Pjan ta ’Azzjoni għall-Materja Prima Kritika tagħha, bil-għan li tnaqqas id-dipendenza fuq materja prima kritika primarja u ssaħħaħ is-sors domestiku ta’ materja prima fl-UE. L-Opinjoni adottata mill-KESE tilqa’ dan l-approċċ,peress li tappoġġja “bis-sħiħ it-tranżizzjoni ekoloġika tas-settur tal-enerġija” u tqis “l-estrazzjoni tal-materja prima meħtieġa għall-użu tat-teknoloġiji ekoloġiċi bħala pass fundamentali”.

Madankollu, fl-Opinjoni tiegħu l-KESE jappella għal miżuri addizzjonali biex jagħmlu dan l-approċċ possibbli, billi l-esplorazzjoni u l-estrazzjoni huma attivitajiet ta 'riskju għoli. Ir-relatur Dumitru Fornea, enfasizza din il-fehma meta qal: “L-inċentivar kemm tal-provenjenza primarja kif ukoll sekondarja huwa essenzjali, u għalhekk għandna bżonn ngħinu l-investiment fis-settur tal-estrazzjoni u nħaffu l-analiżi tal-iskart li potenzjalment fih materjali ta ’valur.”

Il-korelatur Michal Pintér spjega li dan l-appoġġ jista 'jieħu diversi forom: huwa qal "Għandna bżonn ngħinu l-investiment permezz ta' garanziji ta’ self, reġimi ta' deprezzament u għajnuna mill-istat, iżda wkoll billi niżviluppaw proċess ta’ awtorizzazzjoni razzjonalizzat għall-attivitajiet tal-minjieri."

L-Opinjoni tenfasizza wkoll l-importanza li titwessa’ d-definizzjoni ta' materja prima kritika, li tradizzjonalment tinftiehem bħala materja li ġejja mis-settur tal-minjieri. Fil-fehma tal-KESE, din hija ristretta wisq u tillimita t-tkabbir tal-enerġiji ekoloġiċi, billi l-materjali bbażati fuq l-injam jistgħu jintużaw b'mod effiċjenti f'ħafna aktar applikazzjonijiet milli fil-passat.

Is-settur tal-materja prima għandu potenzjal ekonomiku kbir ħafna. Huwa jipprovdi madwar 350 000 impjieg fi ħdan l-UE, u aktar minn 30 miljun impjieg fl-industriji tal-manifattura downstream li jiddependu minn aċċess affidabbli u bla xkiel għal materja prima minerali. L-OECD tbassar li l-użu globali tal-materja se jirdoppja sal-2060, u l-użu tal-metall b’mod partikolari huwa mistenni li jikber b’150 %. Dan x'aktarx iżid il-pressjoni fuq ir-riżorsi tal-pjaneta u jipperikola l-gwadann fil-benesseri globali.

Filwaqt li tqis dan, l-Opinjoni tenfasizza l-importanza li jiġu integrati dimensjonijiet ġodda fil-metodoloġija użata biex tiġi stabbilita lista tal-minerali kritiċi. Il-KESE jqis li l-Kummissjoni Ewropea għandha tqis “il-ħtiġijiet u l-interessi tan-nies u tal-ekonomiji fil-pajjiżi li minnhom il-materja prima għandha tiġi esportata lejn l-Ewropa”. Għandhom għallhekk jiġu definiti kriterji adatti biex jiġi vverifikat jekk il-ktajjen tal-provvista globali għal dan it-tip ta’ materja prima jikkonformawx mal-prinċipji etiċi. (ks)

Fis-sessjoni plenarja tiegħu ta’ Marzu, il-KESE adotta Opinjoni li tipproponi arranġamenti u sytrumenti ta’ governanza aktar preċiżi u operattivi sabiex jiġi implimentat ir-regolament il-ġdid dwar il-batteriji bl-involviment tal-partijiet interessati kollha. Fil-fehma tal-KESE, dan jista’ jikkontribwixxi għall-iżvilupp ta’ qafas tal-Unjoni li jkopri ċ-ċiklu tal-ħajja kollu tal-batteriji fl-UE.

Fl-10 ta’ Diċembru 2020, il-Kummissjoni Ewropea ppreżentat proposta għal Regolament dwar batteriji u l-iskart tal-batteriji. Il-proposta hija konformi mal-Patt Ekoloġiku Ewropew;, li jippromovi d-dekarbonizzazzjoni tal-ekonomija tal-UE sabiex tilħaq in-newtralità klimatika sal-2050.

L-Opinjoni adottata mill-KESE tappoġġja l-miżuri stabbiliti fir-Regolament: bis-saħħa tal-istandards il-ġodda tagħha rigward batteriji, il-Kummissjoni se tippromovi wkoll fil-livell globali t-tranżizzjoni ekoloġika u tistabbilixxi pjan għal aktar inizjattivi li jaqgħu taħt il-politika tagħha favur prodotti sostenibbli.

Madankollu, fl-Opinjoni tiegħu l-KESE jappella għal strumenti u arranġamenti ta’ governanza aktar preċiżi u funzjonali sabiex jiġi implimentat ir-regolament il-ġdid, bil-partijiet interessati kollha involuti. Fi kliem ir-relatur, Bruno Choix: “Ir-regolament propost għandu l-għan li jiżviluppa qafas tal-Unjoni li jkopri ċ-ċiklu tal-ħajja kollu tal-batteriji, inklużi regoli armonizzati u aktar ambizzjużi għall-batteriji, il-komponenti, l-iskart tal-batteriji u l-materjali riċiklati. Permezz ta’ dan ir-regolament, il-Kummissjoni beħsieba tippromovi l-innovazzjoni kif ukoll l-iżvilupp u l-implimentazzjoni tal-għarfien espert teknoloġiku tal-UE”.

Il-korelatur, Frank Uhlig, spjega li dan l-appoġġ jista’ jieħu diversi forom: “Fir-rigward tal-implimentazzjoni tad-diliġenza dovuta għall-monitoraġġ tal-katina tal-provvista tal-batteriji, aħna nitolbu trasparenza sħiħa fl-implimentazzjoni ta’ din is-sistema ta’ monitoraġġ. Ir-riċiklaġġ, ir-rinnovazzjoni u l-użu mill-ġdid tal-batteriji jgħinu biex tiġi żgurata l-katina tal-valur upstream. Huwa essenzjali l-appoġġ tar-riċerka u l-iżvilupp fuq l-ekodisinn”.

Il-KESE jirrakkomanda li jiġu indirizzati l-isfidi f’dan il-qasam billi jissaħħu r-rwol u r-riżorsi tal-ECHA (Aġenzija Ewropea għas-Sustanzi Kimiċi) u tal-OSHA (Aġenzija Ewropea għas-Sigurtà u s-Saħħa fuq il-Post tax-Xogħol).

Il-KESE jipproponi li jiġi introdott il-kunċett ta’ “tmiem l-użu” li jikkomplementa dak ta’ “tmiem il-ħajja” sabiex jiġu promossi l-użu mill-ġdid, ir-rinnovazzjoni jew it-tieni ħajja u r-riċiklaġġ tal-batteriji.

Batteriji li jitqiegħdu fis-suq tal-UE għandhom isiru sostenibbli, ta’ prestazzjoni għolja u sikuri tul iċ-ċiklu kollu tal-ħajja tagħhom. Dan ifisser batteriji li jiġu prodotti bl-inqas impatt ambjentali possibbli, bl-użu ta’ materjali miksuba f’konformità sħiħa mad-drittijiet tal-bniedem kif ukoll ma’ standards soċjali u ekoloġiċi. Il-batteriji għandhom ikunu dejjiema u sikuri, u fi tmiem ħajjithom għandhom jingħataw skop ġdid, jiġu mmanifatturati mill-ġdid jew riċiklati, u b’hekk jerġgħu jiddaħħlu materjali ta’ valur lura fl-ekonomija. (ks)

Permezz tal-pjan ta’ azzjoni ġdid, il-Kummissjoni Ewropea turi li hija determinata li timpedixxi li l-Ewropa toħroġ telliefa fil-konfront tal-Istati Uniti u l-Asja kemm fir-riċerka bażika kif ukoll dik applikata, fil-privattivi u fil-prodotti u s-servizzi tat-teknoloġija avvanzata, jgħid il-KESE f’rapport adottat fil-plenarja ta’ Marzu.

L-aktar element b’saħħtu tal-proposta l-ġdida taż-Żona Ewropea tar-Riċerka (ŻER) huwa l-enfasi tagħha fuq proċess rapidu li permezz tiegħu r-riżultati tar-riċerka u l-innovazzjoni jissarfu f’negozji u impjiegi sostenibbli, jenfasizza l-Kumitat Ekonomiku u Soċjali Ewropew (KESE).

“Huwa assolutament neċessarju li ż-ŻER l-ġdida ma tkunx sempliċiment verżjoni ġdida tal-istess ħaġa”, itenni r-relatur tal-Opinjoni Paul Rübig. “Dan il-Patt il-Ġdid se jagħti spinta lill-impatt tar-riċerka u l-innovazzjoni fi żmien meta l-innovazzjoni se tkun deċiżiva, mhux biss għall-ekonomija tal-Ewropa milquta mill-COVID, iżda wkoll għas-sopravivenza tal-pjaneta”.

Meta mqabbel mal-Istati Uniti u l-Asja, ir-riċerka Ewropea mxiet b’pass aktar kajman biex tikkonverti r-riżultati tar-riċerka u l-iżvilupp fi prodotti u servizzi innovattivi. L-Ewropa għadha lura meta mqabbla mal-Asja fil-prestazzjoni tal-privattivi (fl-2019, l-Asja ppreżentat 65 % tal-applikazzjonijiet globali għal privattivi, mentri l-Ewropa ppreżentat biss 11,3 %), u speċjalment fin-negozji tas-servizzi diġitali u l-innovazzjonijiet li jagħtu spinta lit-teknoloġija (technology-push innovations), jiġifieri prodotti ġodda xprunati mir-riċerka u l-iżvilupp f’teknoloġija ġdida. B’mod aktar ġenerali, matul dawn l-aħħar 20 sena, l-Asja, speċjalment iċ-Ċina u l-Korea, tejbet bil-kbir il-prestazzjoni tar-riċerka, it-teknoloġija u l-innovazzjoni tagħha. Iż-ŻER il-ġdida għandha tgħin lill-Ewropa tirkupra permezz ta’ investimenti u aktar mobbiltà.

Filwaqt li jappoġġja l-pjan ta’ azzjoni tal-Kummissjoni, il-KESE jindika ħames setturi ewlenin li ma ġewx inklużi fil-lista ta’ teknoloġiji diġitali strateġiċi, iżda li huma vitali għall-prosperità tal-Ewropa:

• il-mudelli kummerċjali diġitali;
• it-teknoloġiji ta’ manifattura tal-prodotti u tal-ikel;
• ir-riċerka klinika u s-settur tal-farmaċewtiku u tal-bijoteknoloġija;
• it-teknoloġiji tal-ispazju;
• l-ilma nadif u s-sanità.

Punt ewlieni ieħor li jagħmel il-KESE fl-Opinjoni tiegħu huwa l-ħtieġa li jkun hemm bilanċ bejn l-eċċellenza u r-rapidità tat-trasferiment tar-riżultati tar-riċerka u l-iżvilupp fi prodotti u servizzi innovattivi. Għall-impriżi r-rapidità hija essenzjali, filwaqt li x-xjentisti jaspiraw li jilħqu l-eċċellenza u jitolbu aktar ħin u flus għar-riċerka u l-innovazzjoni. Il-politika tar-riċerka, it-teknoloġija u l-innovazzjoni tal-Kummissjoni għandha tirrikonċilja dawn iż-żewġ tendenzi. (dm)

Iż-żoni rurali għandhom isiru aktar attraenti għaż-żgħażagħ u n-negozji. Dan itejjeb il-kwalità tal-ħajja tal-Ewropej kollha, u jippermettilhom jagħżlu fejn iridu jgħixu u jaħdmu. Din kienet waħda mill-konklużjonijiet ewlenin mid-dibattitu intitolat Lejn strateġija olistika dwar l-iżvilupp rurali u urban sostenibbli, li sar fil-KESE fit-8 ta’ Marzu.

L-iżvilupp fiż-żoni rurali u urbani tal-Ewropa mhux iseħħ bl-istess mod. Huwa kruċjali li jitrawmu politiki li jrażżnu din it-tendenza, jiżguraw tranżizzjoni ġusta u sostenibbli lejn ekonomija tal-benesseri fl-oqsma kollha u jiġi promoss il-bilanċ mill-ġdid tal-popolazzjoni. B’mod partikolari, iż-żoni rural, li jaqdu rwol kritiku fil-koeżjoni ekonomika u soċjali, fir-reżiljenza tar-reġjuni, u fil-kontribut ta’ servizzi innumerabbli mid-diversi ekosistemi lokali, inkluża l-produzzjoni tal-ikel, għandhom isiru aktar attraenti għaż-żgħażagħ u n-negozji.

Peter Schmidt, President tas-Sezzjoni għall-Agrikoltura, l-Iżvilupp Rurali u l-Ambjent (NAT) tal-KESE, qal: “L-irkupru ta’ wara l-COVID joffri l-opportunità perfetta sabiex jitħejjew strateġiji li jiżguraw li l-ebda żona jew ċittadin jitħalla jibqa’ lura fit-tranżizzjoni ġusta għal Unjoni Ewropea prosperuża, sostenibbli u newtrali għall-klima.”

“Issa li l-UE approvat pakkett kuraġġuż għall-irkupru, meta jiġu allokati l-fondi jridu jitqiesu d-distakki bejn it-territorji tal-UE,” iddikjara Stefano Palmieri, membru tal-KESE u President tas-Sezzjoni għall-Unjoni Ekonomika u Monetarja u l-Koeżjoni Ekonomika u Soċjali tal-KESE.

Deša Srsen, mill-uffċċju tal-Viċi President tal-Kummissjoni Dubravka Šuica, enfasizzat: “L-ambizzjoni tagħna hija li nagħtu impetu liż-żoni rurali permezz tal-Viżjoni Rurali fit-Tul, li l-Kumissjoni qed tipprepara u li għandha tiġi adottata f’Ġunju.”

Josep Puxeu Rocamora, relatur għall-Opinjoni tal-KESE dwar Approċċ integrat għar-reġjuni vulnerabbli tal-UE, enfasizza li l-integrazzjoni taż-żoni rurali u vulnerabbli kienet kumplessa ħafna, peress li tolqot kull politika eżistenti tal-UE. “Biex niżviluppaw dawn iż-żoni, nipproponu ‘kuntratt territorjali’ li għandu jkun parteċipattiv, adattat għall-karatteristiċi tat-territorji u jippreserva l-wirt storiku, kulturali u naturali tagħhom.” (mr)

L-Istati Membri jridu jiggarantixxu ġbir preċiż tad-data u politiki xierqa biex tiġi żgurata l-implimentazzjoni effettiva tal-pjan ta’ azzjoni tal-UE kontra r-razziżmu u biex jinkixfu r-razziżmu u d-diskriminazzjoni etnika, li marru għall-agħar matul il-pandemija tal-COVID-19 fl-Ewropa.

Minħabba li kwart tal-Ewropej iħossuhom diskriminati f’mill-inqas qasam wieħed f’ħajjithom u bid-diskriminazzjoni razzjali u etnika tilħaq livelli li qatt ma ntlaħqu qabel fl-impjieg, hemm sens ta’ urġenza dwar l-isforzi li tiġi aġġornata u msaħħa l-leġiżlazzjoni biex jiġi miġġieled ir-razziżmu fl-UE. Dan kien il-messaġġ li ħareġ mis-seduta virtwali li ġiet organizzata fit-18 ta’ Marzu mill-KESE.

Is-seduta “Unjoni ta’ Ugwaljanza: Pjan ta’ azzjoni tal-UE għall-ġlieda kontra r-razziżmu 2020-2025” laqqgħet flimkien kelliema mill-istituzzjonijiet tal-UE u minn pjattaformi Ewropej għall-ġlieda kontra r-razziżmu u għad-difiża tad-drittijiet tal-bniedem. Iċ-ċifri ppreżentati wrew stampa xejn sabiħa tas-sitwazzjoni fil-livell lokali.

Ir-relatur tal-Opinjoni tal-KESE dwar dan is-suġġett, Cristian Pîrvulescu, enfasizza kemm huwa f’waqtu l-pjan ta’ azzjoni tal-UE kontra r-razziżmu, li ġie fil-fatt ippreżentat f’mument fejn l-inugwaljanzi u d-diskriminazzjoni ġew approfonditi iktar minħabba l-pandemija.

Min-naħa tal-Kummissjoni Ewropea, Thibault Balthazar enfasizza r-rwol importanti tal-Istati Membri, u ħeġġiġhom jadottaw il-Pjani Nazzjonali ta’ Azzjoni, waqt li jinvolvu lis-soċjetà ċivili u l-korpi kompetenti fil-qasam tal-ugwaljanza. Aleksandra Wesoły ppreżentat strumenti tal-UE bħan-Network ta’ Sensibilizzazzjoni dwar ir-Radikalizzazzjoni u pjattaformi oħra li jgħinu fil-ġlieda kontra r-radikalizzazzjoni u n-narrattivi estremisti. Maria Daniella Marouda qalet li studju mwettaq mill-ECRI (Kummissjoni Ewropea kontra r-Razziżmu u l-Intolleranza) enfasizza l-progress li sar fil-qasam tal-leġiżlazzjoni kontra d-diskriminazzjoni.

Joanna Goodey mill-Aġenzija għad-Drittijiet Fundamentali enfasizzat li filwaqt li teżisti l-leġiżlazzjoni, hemm nuqqas ta’ data, u kien hemm bżonn li tinġabar data b'saħħitha u regolari sabiex il-pjan ta’ azzjoni jirnexxi.

Ir-relatur għall-Opinjoni tal-Kumitat tar-Reġjuni dwar Il-pjan ta’ azzjoni tal-UE kontra r-razziżmu, Yoomi Renström, enfasizza li l-awtoritajiet lokali u reġjonali kellhom bżonn jiġu rikonoxxuti bħala msieħba strateġiċi fit-tfassil, l-implimentazzjoni u l-monitoraġġ tal-pjani nazzjonali ta’ azzjoni.

Csaba Asztalos, President tal-Kunsill Rumen għall-Ġlieda kontra d-Diskriminazzjoni, enfasizza l-importanza ta’ bażijiet ta’ data aċċessibbli u strateġiji ċari ta’ komunikazzjoni, filwaqt li Marie Mescam, minn SOS Racisme, enfasizzat il-bżonn urġenti li jinħoloq spazju għad-djalogu fl-UE, fejn is-soċjetà ċivili, il-korpi għall-ugwaljanza u l-organizzazzjonijiet kontra r-razziżmu jistgħu jiskambjaw l-esperjenzi u jaqsmu l-għarfien tagħhom.

Juliana Wahlgren, uffiċjal responsabbli mill-kampanji ta’ sensibilizzazzjoni min-Network Ewropew kontra r-Razziżmu, esprimiet it-tama li jekk jiġu involuti persuni li ġejjin minn minoranzi etniċi jew razzjali, b’għarfien espert ewlieni mill-organizzazzjonijiet tas-soċjetà ċivili, dawn jistgħu jaqdu rwol sinfkanti fl-implimentazzjoni effettiva tal-pjan ta’ azzjoni. (mt)

Fis-sessjoni plenarja tiegħu ta’ Marzu, il-Kumitat Ekonomiku u Soċjali Ewropew ospita dibattitu ma’ Olivér Várhelyi, Kummissarju għall-Viċinat u t-Tkabbir, biex jiddiskuti s-sitwazzjoni attwali tal-adeżjoni tal-imsieħba tal-Balkani tal-Punent. Il-membri tal-KESE esprimew il-konvinzjoni li l-integrazzjoni tal-imsieħba tal-Balkani tal-Punent fl-UE hija investiment ġeostrateġiku fil-paċi u t-tkabbir ekonomiku.

Il-President tal-KESE, Christa Schweng, fetħet id-dibattitu billi saħqet li l-KESE jagħti importanza kbira lill-Balkani tal-Punent: “Il-Kumitat tagħna huwa tal-fehma li l-Balkani tal-Punent huma l-biċċa nieqsa li neħtieġu biex ngħaqqdu l-istampa kompluta fl-ambizzjoni tal-Unjoni Ewropea li toħloq Ewropa magħquda u sostenibbli, Ewropa adattata għall-futur,” qalet.

Óliver Várhelyi semma l-impatt li l-pandemija tal-COVID-19 kellha fuq il-Balkani tal-Punent u enfasizza li “l-Kummissjoni Ewropea kienet determinata li tkompli tappoġġja l-eqreb ġirien tagħna bil-mezzi kollha possibbli f’dawn iż-żminijiet diffiċli”. Is-Sur Várhelyi ppreżenta wkoll il-Pjan Ekonomiku u ta’ Investiment għall-Balkani tal-Punent tal-Kummissjoni, inizjattiva ta’ EUR 9 biljun bil-għan doppju li tingħata spinta lill-irkupru ekonomiku u li tittejjeb il-konverġenza tar-reġjun mal-Unjoni Ewropea. “L-ambizzjoni tal-pjan hija li tingħata spinta mhux biss lill-iżvilupp ekonomiku, lir-reżiljenza u lill-kompetittività tar-reġjun, iżda wkoll lill-koeżjoni soċjali tiegħu. Jeħtieġ li naħdemu flimkien biex niksbu dan,” saħaq is-Sur Várhelyi.