Napplawdu l-kuraġġ u s-solidarjetà tas-soċjetà ċivili tal-Ewropa
Għeżież qarrejja,
Fil-15 ta’ Frar kellna ċ-ċerimonja ta’ premjazzjoni għar-rebbieħa tal-Premju għas-Solidarjetà Ċivili tagħna, li tnediet f’Lulju 2020 hekk kif l-Ewropa kienet qed tilgħaq il-feriti mill-ewwel mewġa tal-pandemija tal-COVID-19. Dan kien ftit wara tmiem l-ewwel lockdown, li ħalliena magħluqin f’darna, insegwu r-rapporti fuq il-mezzi tax-xandir juru xeni ta’ qsim il-qalb mill-isptarijiet tal-Ewropa u nċapċpu għall-ħaddiema mediċi kull filgħaxija.
Iżda rapporti dwar atti ta’ solidarjetà malajr bdew jaslulna minn kull parti tal-UE, li taw xhieda li ħafna nies kienu qed imeddu idejhom biex jgħinu – minn dawk l-iżjed vulnerabbli fostna, sa dawk l-iżjed milquta mill-kriżi, jew fi kwalunkwe mod meħtieġ.
Pereżempju, kienu qed jimmanifatturaw u jiddistribwixxu maskri u lbies mediku, jittrasformaw lukandi fi sptarjiet ta’ emerġenza, ifornu ikel lill-anzjani jew lil persuni vulnerabbli, jipprovdu appoġġ diġitali għat-tagħlim skolastiku mid-dar jew sempliċiment imexxu proġetti tal-arti jew ta’ divertiment sabiex il-ħajja fil-pandemija tkun iżjed sopportabbli.
Is-soċjetà ċivili, permezz tal-organizzazzjonijiet u n-nies tagħha, kienet fuq quddiem nett f’dawn l-azzjonijiet. Mingħajr l-għajnuna tagħhom fil-prattika u fuq il-post, il-prezz li kien ikollna nħallsu għal din il-pandemija kienet tkun bil-wisq akbar.
Sabiex nirrikkonoxxu dan l-impenn entużjażmanti u l-ħidma fil-livell l-eqreb taċ-ċittadini, fl-2020 ddeċidejna li temporanjament nissospendu l-Premju tas-Soċjetà Ċivili tagħna, li tajna kull sena mill-2006 ’l hawn lil organizzazzjonijiet tas-soċjetà ċivili u individwi li l-proġetti eċċezzjonali tagħhom jiċċelebraw l-identità Ewropea tagħna u l-valuri komuni tagħna f’qasam ta’ ħidma partikolari.
Ħa postu Premju tas-Solidarjetà Ċivili uniku, ta’ darba, bit-tema “Is-Soċjetà Ċivili kontra l-COVID-19”, iddedikat speċifikament għall-ġlieda kontra l-coronavirus u l-konsegwenzi terribbli tagħha.
Minflok is-soltu ħames rebbieħa, ridna nagħtu l-premju lil ammont ta’ proġetti, massimu ta’ 29, li twettqu minn individwi, organizzazzjonijiet tas-soċjetà ċivili u kumpaniji. Il-proġetti kellhom ikunu strettament mingħajr skop ta’ qligħ u ffinanzjati pubblikament sa mhux aktar minn 50%. Konna qed infittxu rebbieħ wieħed minn kull Stat Membru u mir-Renju Unit, bħala ġest biex nuru li nixtiequ nżommu rabtiet mill-qrib mas-soċjetà ċivili tar-Renju Unit minkejja l-fatt li l-pajjiż qed joħroġ mill-UE, u ma’ dawn rebbieħ wieħed b’fokus transfruntier jew pan-Ewropew.
Il-kompetizzjoni ntemmet fit-30 ta’ Settembru, u sa dakinhar konna rċevejna sa 250 applikazzjoni minn madwar l-UE. Il-kandidati kollha tagħna kienu dimostrazzjoni tal-impenn ġeneruż taċ-ċittadini u tas-soċjetà ċivili fil-prattika. Il-proġetti kollha kellhom is-solidarjetà bħala l-forza mexxejja tagħhom, iżda aħna ġbarnihom taħt ħames temi ewlenin: il-provvista tal-ikel u l-għajnuna lil gruppi vulnerabbli, it-tagħmir mediku, servizzi ta’ konsultazzjoni, servizzi edukattivi u informazzjoni dwar il-pandemija u offerti kulturali.
Wara konsiderazzjoni bir-reqqa, għażilna 23 rebbieħ li jolqtu l-ħames temi, li aħna naħsbu jirrappreżentaw l-aħjar li s-soċjetà ċivili qed tagħmel madwar l-Ewropa biex tgħin lill-komunitajiet jgħaddu mill-pandemija. Qed nippremjajw kull wieħed u waħda minnhom EUR 10,000 u nittamaw li dan l-inċentiv finanzjarju se jgħinhom ikomplu b’xogħolhom u li l-premju jżid il-viżibilità tal-proġetti tagħhom.
Nittamaw ukoll li nqajmu kuxjenza dwar l-importanza mhux biss ta’ dawn il-proġetti iżda wkoll ta’ għadd kbir ta’ inizjattivi taċ-ċittadini oħrajn sinifikanti u kreattivi li qed jitwettqu fl-UE. Kollha kemm huma qed juru li s-solidarjetà hija l-muftieħ biex tingħeleb kwalunkwe kriżi. Permezz ta’ xogħolhom, qed jibnu ġejjieni aħjar għall-Ewropa, li nisperaw toħroġ minn din il-kriżi aktar b’saħħitha u aktar magħquda.
Għaldaqstant, fiċ-ċerimonja ta’ premjazzjoni li seħħet kompletament mill-bogħod fil-15 ta’ Frar, l-applawż tagħna ma kienx biss għat-23 rebbieħ. Fraħna lis-soċjetà ċivili kollha tal-Ewropea u lil dawk il-ħafna organizzazzjonijiet, kumpaniji u individwi fi ħdanha li wrew u jibqgħu juru solidarjetà, kuraġġ u responsabbiltà ċivika bla preċedent f’dawn iż-żminijiet diffiċli u ta’ sfida.
Cillian Lohan
Viċi President għall-Komunikazzjoni
Inqas