KESE info

Fis-27 ta’ Jannar, il-Prim Ministru tal-Portugall, António Costa, ippreżenta l-prijoritajiet ta’ pajjiżu għall-presidenza tal-UE matul il-plenarja tal-KESE. Il-Portugall ressaq l-aġenda soċjali fil-quċċata tal-programm tal-presidenza tiegħu u talab lill-KESE jipprovdi l-għarfien espert tiegħu dwar seba’ suġġetti ewlenin għall-futur tal-UE.

Bil-motto "Wasal żmien l-azzjoni: irkupru ġust, ekoloġiku u diġitali”, il-presidenza se tiffoka fuq tliet priijoritajiet ewlenin: il-promozzjoni tal-irkupru, bis-saħħa tal-effett ta’ lieva mit-tranżizzjoni klimatika u dik diġitali; l-implimentazzjoni tal-Pilastru Ewropew tad-Drittijiet Soċjali; u t-tisħiħ tal-awtonomija tal-Ewropa filwaqt li tibqa’ miftuħa għad-dinja.

“Dawn il-prijoritajiet jimxu id f’id perfettament mal-prijoritajiet tal-Kumitat tagħna: qed nippromovu UE li tkun ekonomikament prospera, soċjalment inklużiva u ambjentalment sostenibbli”, qalet il-President tal-KESE, Christa Schweng.

“Il-ġlieda kontra l-pandemija tal-COVID-19 tat xhieda tal-valur miżjud li tirrappreżenta l-Unjoni Ewropea tagħna. Il-bidu tal-proċess tat-tilqim, minn naħa, u l-approvazzjoni tal-QFP u tal-programm Next Generation EU, min-naħa l-oħra, fetħu l-bieb għat-tama u taw tifsira ġdida lill-kelma “komunità””, enfasizza s-Sur Costa.

L-avveniment ċentrali tal-Presidenza Portugiża se jkun is-Summit Soċjali, li huwa ppjanat li jsir f’Porto fis-7 ta’ Mejju.

Huwa enfasizza li: “L-għan ewlieni tiegħu huwa li jagħti impetu politiku b’saħħtu lill-Pjan ta’ Azzjoni li l-Kummissjoni se tippreżenta f’Marzu u li jimplimenta l-Pilastru tal-UE dwar id-Drittijiet Soċjali, l-aqwa vaċċin kontra l-inugwaljanza soċjali, il-populiżmu u l-biża’”.

Il-Prim Ministru qal ukoll li biex jinkiseb dan l-objettiv fundamentali, il-Presidenza Portugiża qed isserraħ fuq il-kontribut ewlieni u l-parteċipazzjoni attiva tal-KESE. Il-presidenza talbet lill-KESE jipprovdi l-għarfien espert tiegħu dwar seba’ suġġetti ewlenin għall-futur tal-UE. (mr)

Il-presidenza tal-KESE, bl-enfasi tagħha fuq il-bini ta’ UE ekonomikament, soċjalment u ambjentalment aktar b’saħħitha, tappoġġja l-isforzi tal-Kummissjoni biex l-Ewropa terġa’ lura fuq saqajha wara l-kriżi tal-COVID-19. Dan huwa l-messaġġ li l-President tal-KESE Christa Schweng bagħtet lill-Viċi President tal-Kummissjoni Ewropea għar-Relazzjonijiet Interistituzzjonali u l-Prospettiva, Maroš Šefčovič, li kien qed jattendi s-sessjoni plenarja ta’ Jannar tal-Kumitat.

Is-Sinjura Schweng offriet l-appoġġ sħiħ tal-KESE lill-Kummissjoni, u tenniet l-impenn li sar f’Lulju 2020 bl-adozzjoni tal-kontribut tal-KESE għall-programm ta’ ħidma tal-Kummissjoni għall-2021: “Il-Kumitat jixtieq jagħti kontribut qawwi għall-irkupru u r-reżiljenza futura tal-Ewropa biex tiġi żgurata Ewropa li tkun ekonomikament prospera, soċjalment inklużiva u ambjentalment sostenibbli”, qalet is-Sinjura Schweng. “L-isfida quddiemna li hija responsabbiltà tagħna li niffaċċjaw hija li nindirizzaw b’mod effettiv it-tbatija ekonomika u soċjali kkawżata mill-COVID-19.”

Min-naħa tiegħu, is-Sur Šefčovič qal li l-programm ta’ ħidma tal-Kummissjoni għall-2021 tfassal biex jgħin lill-UE timxi ’l quddiem u tħalli warajha l-fraġilità kkawżata mill-kriżi u toħloq momentum ġdid permezz ta’ soluzzjonijiet li jibqgħu validi fil-futur: “L-Unjoni tagħna wriet ammont kbir ta’ solidarjetà u unità. Mhux biss nirkupraw iżda nimxu ’l quddiem, u wara l-isfidi kollha tal-2020, issa huwa ż-żmien li ningranaw l-irkupru tagħna mill-kriżi tal-COVID-19 u nfasslu l-ġejjiieni li nixtiequ fl-Unjoni tagħna.”

Huwa u jikkummneta dwar il-miżuri attwali kontra l-pandemija, huwa enfasizza li l-isforzi u l-ħidma tal-Kummissjoni lejn Unjoni tas-Saħħa tal-UE ppermettew lill-UE tiegħu approċċ koordinat lejn it-tilqim u tassigura l-portafoll l-iktar usa’ ta’ tilqim fid-dinja, li jammonta għal 2.3 biljun doża. (mp)

Aktar ċarezza, aktar trasparenza finanzjarja, regoli stretti dwar il-fastidju u sanzjonijiet aktar b'saħħithom għan-nuqqas ta' konformità. Fit-28 ta' Jannar 2021, il-membri tal-KESE vvutaw gal bidliet kbar għall-Kodiċi ta' Kondotta tagħhom. Dan huwa l-ewwel pass importanti fir-riforma tal-Kumitat li qiegħda twettaq it-tmexxija l-ġdida tal-KESE.

Ir-regoli l-ġodda jinkludu għadd ta' titjib biex jiġi evitat b'mod effettiv il-fastidju u biex każijiet ta' mġiba ħażina jiġu ttrattati b'mod effiċjenti. Għalkemm l-ewwel prijorità hija l-prevenzjoni, issa se jkun possibbli li jiġu imposti firxa ta' sanzjonijiet fuq membru ta' Kumitat f'każ konfermat ta' għemil ħażin.

Il-President tal-KESE, Christa Schweng, wegħdet li ssaħħaħ il-Kodiċi ta' Kondotta f'Ottubru li għadda, fil-bidu tal-Presidenza tagħha. "Wettaqna din il-wegħda. Il-ħidma kbira tal-kummissjoni tar-Regoli ta’ Proċedura kisbet appoġġ wiesa’ għal din il-proposta. Dan juri l-impenn tagħna għal standards etiċi għolja u metodi ta' ħidma moderni u trasparenti", qalet is-Sinjura Schweng.

F'każ ta' allegazzjoni ta' imġiba ħażina, il-kwistjoni se tiġi investigata mill-Kumitat tal-Etika l-ġdid, li se jkollu setgħat investigattivi definiti b'mod ċar. Kemm il-membri tal-KESE kif ukoll il-persunal se jkunu jistgħu jressqu lmenti lill-Kumitat tal-Etika. F'każ li ssir investigazzjoni, kull informatur rikonoxxut se jiġi protett u l-Kumitat se jikkoopera mill-qrib mal-OLAF.

Skont l-eżitu tal-investigazzjoni u l-gravità tal-imġiba ħażina, il-membri jistgħu jiġu imposti fuqhom għadd ta' sanzjonijiet, fosthom:

• it-tneħħija minn kariga, waħda jew aktar, okkupati mill-membru fil-Kumitat;
• it-tiswija ta' kwalunkwe ħsara;
• it-telf temporanju tad-dritt għall-indennizz tas-sussistenza ta' kuljum li l-membru jirċievi;
• is-sospensjoni mill-parteċipazzjoni fl-attivitajiet jew fil-missjonijiet, kollha jew uħud minnhom, tal-KESE;
• il-projbizzjoni ta’ rappreżentanza tal-KESE fi kwalunkwe forum nazzjonali, interistituzzjonali jew internazzjonali;
• it-telf tad-drittijiet ta’ aċċess għal informazzjoni kunfidenzjali jew klassifikata.

Fl-aktar każijiet gravi, se jkun possibbli wkoll li membru jitkeċċa mill-KESE.

Ir-regoli aġġornati jżidu aktar it-trasparenza finanzjarja, speċjalment fir-rigward tar-rimborż ta' missjonijiet jew attivitajiet tal-membri. Kull sena l-membri se jkunu obbligati jippreżentaw dikjarazzjoni finanzjarja li se tkun disponibbli fuq is-sit web tal-KESE. Id-dokument jikkjarafika wkoll il-każijiet ta' kunflitt ta’ interess potenzjali.

It-tibdil iqis it-talbiet u r-rakkomandazzjonijiet tal-Parlament Ewropew, kif ukoll ir-rakkomandazzjonijiet tal-Ombudsman Ewropew u tal-Uffiċċju Ewropew ta' Kontra l-Frodi (OLAF).

Għall-ewwel darba mill-iffirmar tal-Ftehim dwar il-Kummerċ u l-Kooperazzjoni bejn l-UE u r-Renju Unit, Michel Barnier, il-Kap tat-Task Force tal-Kummissjoni Ewropea għar-Relazzjonijiet mar-Renju Unit, esprima l-fehmiet tiegħu pubblikament dwar it-test matul dibattitu fis-sessjoni plenarja ta’ Jannar tal-Kumitat Ekonomiku u Soċjali Ewropew.

Fid-diskors tiegħu, is-Sur Barnier enfasizza li ma kien hemm xejn pożittiv dwar il-Brexit: “Dan huwa divorzju, u ħadd ma għandu jkun kuntent wara divorzju. Iżda dan il-ftehim li lħaqna mar-Renju Unit juri li l-UE mhijiex ħabs, kif iriduna nemmnu xi demagogi fuq il-lemin u x-xellug; nistgħu noħorġu minnha, iżda dawk li jixtiequ joħorġu jridu jiffaċċjaw il-konsegwenzi fil-forma ta’ distorsjonijiet u turbulenzi”.

L-għan tal-ftehim kien li jiġu regolarizzati l-aspetti ekonomiċi u dawk relatati mal-kummerċ tar-relazzjoni bejn l-UE u r-Renju Unit wara l-Brexit, bl-għarfien li dan ma kienx punt ta’ tmiem: “Mhux talli se jkun meħtieġ li niżguraw l-implimentazzjoni xierqa ta’ dan il-ftehim, iżda ċertament se jkollu jiġi ssupplimentat fil-futur għal ċerti temi li r-Renju Unit ma riedx jinkludi din id-darba, bħad-difiża jew il-politika barranija”.

Is-Sur Barnier enfasizza wkoll li l-ħidma tal-Kummissjoni Ewropea ma ntemmitx: il-Kummissjoni se tissorvelja l-implimentazzjoni tal-ftehim u żżomm ħarsa mill-qrib fuq kwalunkwe proposta min-naħa tar-Renju Unit li tista’ tirriżulta f’diverġenza regolatorja.

Il-President tal-KESE Christa Schweng irringrazzjat lis-Sur Barnier għall-ħidma tiegħu matul in-negozjati dwar il-Brexit u għat-“trasparenza eżemplari tiegħu u għaż-żmien li ntuża biex iżżomm lis-soċjetà ċivili infurmata matul il-proċess tan-negozjati”, billi is-Sur Barnier ta ħames diskorsi differenti fid-dibattiti plenarji tal-KESE.

Jack O’Connor, il-President tal-Grupp ta’ Segwitu tal-KESE dwar il-Brexit, faħħar il-mod li bih is-Sur Barnier indirizza s-sitwazzjoni fl-Irlanda matul in-negozjati tal-Brexit u fakkar l-impenn tal-KESE u tal-Grupp ta’ Segwitu tiegħu dwar il-Brexit biex jaqdu r-rwol tagħhom ħalli jottimizzaw il-potenzjal ta’ dan il-ftehim, b’mod partikolari fir-rigward tas-soċjetà ċivili tar-Renju Unit. (dgf)

L-ammont ta’ nies li qed jgħixu fil-faqar jista’ jitnaqqas b’50% fl-għaxar snin li ġejjin, qal ir-relatur speċjali tan-NU dwar il-faqar estrem u d-drittijiet tal-bniedem waqt is-sessjoni plenarja ta’ Jannar tal-KESE, fejn tkellem ukoll dwar is-sejbiet tal-missjoni tiegħu fl-istituzzjonijiet tal-UE.

It-tnaqqis tal-faqar irid ikun wieħed mill-prijoritajiet ewlenin tal-pjan ta’ azzjoni li jmiss tal-Kummissjoni Ewropea għall-implimentazzjoni tal-Pilastru Ewropew tad-Drittijiet Soċjali, qal Oliver De Schutter, relatur speċjali tan-NU dwar il-faqar estrem u d-drittijiet tal-bniedem.

Is-Sur De Schutter irrimarka li l-faqar fl-UE qed jolqot dejjem iktar lin-nisa u lill-familji b’ġenitur wieħed.

Huwa wissa wkoll li l-Patt Ekoloġiku tal-Kummissjoni, filwaqt li jinkludi dimensjoni soċjali b’saħħitha, mhuwiex sostitut għal strateġija għat-tnaqqis tal-faqar: “It-tnaqqis tal-faqar mhuwiex oġġettiv fih innifsu tal-Patt Ekoloġiku,” huwa enfasizza.

Huwa spjega li ġew identifikati tliet ostakli strutturali għall-ġlieda kontra l-faqar fl-UE.

• Id-dumping fiskali fil-pajjiżi tal-UE, fejn f’dawn l-aħħar 20 sena, il-piż tat-taxxa gradwalment ġie trasferit mill-korporazzjonijiet u l-individwi l-aktar sinjuri għall-ħaddiema, il-konsumaturi u l-familji bi dħul baxx.
• Il-kundizzjonijiet tax-xogħol u l-ispiża tal-forza tax-xogħol, permezz ta’ politiki li kellhom l-għan li jtejbu l-kompetittività fil-prezzijiet billi jnaqqsu l-pagi u l-kontribuzzjonijiet soċjali mħallsa mill-impjegaturi.
• Il-qafas makroekonomiku fi ħdan l-unjoni ekonomika u monetarja, b’mod partikolari l-Patt ta' Stabbiltà u Tkabbir, li kien jeħtieġ li jiġi rivedut mill-iktar fis, bl-eżenzjoni tal-investiment soċjali fis-saħħa u l-edukazzjoni mill-miżuri ta’ dixxiplina fiskali.

Is-Sur De Schutter qal li għandhom jiġu inklużi tliet objettivi ambizzjużi fil-pjan ta’ azzjoni tal-Kummissjoni għall-implimentazzjoni tal-Pilastru Ewropew tad-Drittijiet Soċjali:

• Strateġija għat-tnaqqis tal-faqar sal-2030, bl-għan ambizzjuż ta’ tnaqqis ta’ 50% fl-għadd ta’ persuni fir-riskju tal-faqar.
• Garanzija għat-tfal li tkopri ħames oqsma essenzjali: l-aċċess għall-edukazzjoni, il-kura bikrija tat-tfal, in-nutrizzjoni, l-akkomodazzjoni u l-kura tas-saħħa. Dan għandu jinvolvi l-appoġġ tal-familji billi jkunu pprovduti dħul deċenti, xogħol u aċċess għall-benefiċċji.
• Strument ġdid legalment vinkolanti dwar skemi ta’ dħul minimu, li jiżgura li tali skemi fl-UE jkunu adegwati u li l-Istati Membri jsegwu metodoloġija komuni.

Il-President tal-KESE, Christa Schweng, qalet li, anke qabel il-COVID-19, waħda minn kull ħames persuni kienet fil-periklu tal-faqar u l-esklużjoni soċjali fl-UE u li dan kien falliment tas-soċjetajiet Ewropej żviluppati tagħna. “Wieħed mill-aħjar modi biex ngħinu lin-nies joħorġu mill-faqar u biex nipprevjenu l-faqar huwa li nibnu reżiljenza soċjetali u individwali,” qalet is-Sinjura Schweng.

Hija mbagħad rrimarkat li barra l-finanzjament, kien ukoll il-ħtieġa li jittieħed approċċ ibbażat fuq id-drittijiet li jirrikonoxxi lin-nisa milquta mill-faqar mhux biss bħala detenturi ta’ drittijiet iżda wkoll aġenti għal bidla. Hija qalet li l-impenn li ħadd ma jitħalla lura kien jinvolvi l-abilitazzjoni jew l-abilitazzjoni mill-ġdid tan-nies biex ikollhom rwol pożittiv fis-soċjetà. (at/mp)

Fis-27 ta’ Jannar, il-KESE kellu dibattitu mal-Kummissarju Johansson matul is-sessjoni plenarja tiegħu, eżatt qabel ma adotta l-Opinjoni tiegħu dwar Patt Ġdid dwar il-Migrazzjoni u l-Ażil. Fl-Opinjoni, il-Kumitat esprima riżervi dwar jekk il-Patt hux se jgħin fl-iżvilupp ta’ qafas Ewropew komuni għall-ġestjoni tal-migrazzjoni li jkun kemm effettiv kif ukoll konformi mal-valuri tal-UE.

Ir-relatur għall-Opinjoni, José Antonio Moreno Diaz, qal, “Kellna ħafna tamiet għal dan il-patt iżda jkolli ngħid li ninsabu ftit iddiżappuntati. L-analiżi tal-Kummissjoni hija tajba, u naqblu dwar il-konklużjonijiet, iżda aħna frustrati bid-dettalji u xi jfissru fejn jidħlu l-proposti.”

Il-korelatur, Cristian Pîrvulescu, iddispjaċih dwar in-nuqqas ta’ progress fuq ċerti kwistjonijiet li huma indirizzati fil-patt. “Jiddispjaċina ngħidu li ma kienx hemm ħafna progress, iżda ttieħdu ħafna passi lura minflok quddiem. Aħna ninkoraġixxu lill-Kummissjoni tieħu approċċ iktar qalbieni lejn uħud minn dawn il-kwistjonijiet.”

L-oġġezzjoni ewlenija tal-KESE kienet li l-patt iffoka primarjament fuq ir-ritorni u l-ġestjoni tal-fruntieri, aspejjeż tal-indirizzar ta’ kwistjonijiet jaħarqu oħrajn, bħal kanali ta’ immigrazzjoni regolari, perkorsi sikuri għall-ażil u l-integrazzjoni tal-migranti. Barra minn hekk, uħud mis-soluzzjonijiet proposti jistgħu ma jkunux fattibbli fil-prattika.

Il-Kummissarju Ewropew, Ylva Johansson, qalet li “xejn ma taqbel” mal-kritika li l-Kummissjoni kienet nieqsa mill-ambizzjoni. “Ir-realtà tal-lum hija differenti ħafna mill-2015, meta kellna influss massiv ta’ refuġjati u r-rilokazzjoni kienet kwistjoni kbira”, hija qalet, u spjegat li l-maġġoranza l-kbira ta’ wasliet ġodda irregolari llum ma kinux refuġjati. Għalhekk, deċiżjonijiet u ritorni rapidi kienu importanti ħafna, iżda anke l-bżonn li jiġi garantit proċess ġust għal dawk kollha qed ifittxu ażil.

“Dawk eliġibbli biex jibqgħu merħba bihom u rriduhom ikunu parti mis-soċjetà tagħna,” qalet is-Sinjura Johansson.

Waqt id-dibattitu, il-KESE esprima t-tħassib kbir tiegħu dwar id-destin ta’ migranti mal-fruntiera tal-UE mal-Bożnija-Ħerzegovina. (na)

Rapport reċenti tal-KESE jilqa’ l-proposta tal-Kummissjoni biex jiġi rivedut ir-Regolament ta’ Aarhus tal-UE u biex jittejjeb l-aċċess għal rieżami amministrattiv u ġudizjarju fi kwistjonijiet ambjentali għal individwi u NGOs, iżda jenfasizza li r-regolament aġġornat mhuwiex biżżejjed.

Minkejja li ilha mill-2005 parti għall-Konvenzjoni ta’ Aarhus, l-Unjoni Ewropea għadha ma kkonformatx bis-sħiħ għad-dispożizzjonijiet tagħha dwar l-aċċess għall-ġustizzja.

Ir-regolament emendat propost mill-Kummissjoni huwa pass ’il quddiem u għodda essenzjali għall-implimentazzjoni tal-Patt Ekoloġiku Ewropew, qal il-KESE, li ġeneralment laqa’ b’sodisfazzjon l-emendi proposti f’rapport adottat f’Jannar.

Madankollu, ir-relatur Arnaud Schwartz, innota diversi lakuni fir-regolament il-ġdid li jistgħu jintużaw mill-istituzzjonijiet tal-UE sabiex jevitaw li jieħdu responsabbiltà.

Pereżempju, il-KESE ma japprovax il-proposta tal-Kummissjoni li jiġu esklużi l-atti tal-UE li jinvolvu “miżuri nazzjonali ta’ implimentazzjoni”, peress li hemm possibbiltà reali li din l-esklużjoni tista’ tinvalida jew iddgħajjef is-siwi tar-regolament tal-Kummissjoni.

Barra minn hekk, il-KESE huwa mħasseb dwar ir-riforma tal-”mekkaniżmu ta’ rieżami intern”, li fir-Regolament ta’ Aarhus oriġinali ppermetta lill-NGOs ambjentali jisfidaw l-atti u l-omissjonijiet amministrattivi tal-UE. Jekk l-organizzazzjonijiet tas-soċjetà ċivili jitħallew iwettqu rieżami biss ladarba jkunu ġew adottati l-miżuri ta’ implimentazzjoni, dan jipprevjeni ħafna atti u omissjonijiet tal-UE, jekk mhux il-biċċa l-kbira minnhom, minn rieżami intern.

Il-KESE jappella wkoll lill-Kummissjoni biex tiffaċilta l-aċċess għall-ġustizzja għall-organizzazzjonijiet tas-soċjetà ċivili kollha.

"L-imsieħba soċjali huma atturi ewlenin fi kwistjonijiet ambjentali, u għandhom ikunu rikonoxxuti b’mod espliċitu fir-rigward l-aċċess għall-ġustizzja,” enfasizzat Isabel Caño Aguilar, korelatur tal-KESE. “Biex ir-rieżami ġudizzjarju jkun aċċessibbli fil-prattika, l-organizzazzjonijiet tas-soċjetà ċivili ma għandhomx iħabbtu wiċċhom ma’ piżijiet żejda, bħal spejjeż addizzjonali u miżuri burokratiċi," ikkonkludiet is-Sinjura Caño. (mr)

Il-KESE jafferma mill-ġdid li t-tnaqqis tal-emissjonijiet tal-gassijiet b’effett ta’ serra b’mill-inqas 55% sal-2030 huwa l-għażla t-tajba. Madankollu, fl-Opinjoni tiegħu It-tisħiħ tal-ambizzjoni klimatika tal-Ewropa, il-KESE jenfasizza l-ħtieġa li jissaħħu l-isforzi lejn il-miri intermedji sabiex jitħaffef il-proċess, jew inkella hemm ir-riskju li ma jintlaħaqx l-għan ta’ newtralità klimatika sal-2050.

Huwa minnu li l-COVID-19 ġabet magħha problemi ekonomiċi kbar ħafna. Madankollu, ir-ridirezzjoni tal-investiment lejn il-pjan ta’ rkupru fetħet il-bieb għal strateġija ġdida: “infiq fuq l-irkupru kkombinat ma’ azzjoni klimatika ambizzjuża”, enfasizza l-korelatur tal-KESE, Jan Dirx.

“Din l-Opinjoni tenfaizza wkoll il-ħtieġa li tissaħħaħ il-bijoekonomija u li jiġu sostituti l-fjuwils fossili, u, b’konsegwenza ta’ dan, huwa kritiku li nagħtu prijorità lill-aġġornament tal-leġiżlazzjoni Ewropea dwar it-tranżizzjoni lejn fjuwils rinnovabbli,” enfasizza r-relatur tal-KESE, Arnold Puech d’Alissac.

Huwa dejjem iżjed essenzjali li nużaw kull għodda possibbli biex ngħollu l-livell tal-ambizzjoni klimatika: il-Patt Ekoloġiku, il-Liġi dwar il-Klima, il-fond ta’ rkupru Next Generation EU, il-PAK, l-istrateġiji Mill-Għalqa sal-Platt u tal-Bijodiversità, il-politiki u l-ftehimiet kummerċjali, eċċ. Kollha kemm huma għandhom ikunu marbuta b’mod konsistenti, biex jassiguraw li t-tranżizzjoni ma tħalli lil ħadd jibqa’ lura.

Iċ-ċittadini huma “msieħba kruċjali fil-ġlieda kontra t-tibdil fil-klima”, u prerekwiżit biex il-politika dwar il-klima tirnexxi fl-UE.

Huwa għalhekk li l-KESE tenna l-proposta tiegħu li tinħoloq Pjattaforma tal-Partijiet Interessati tal-Patt Klimatiku Ewropew, ibbażata fuq il-prinċipji tal-inklużività, it-trasparenza u l-parteċipazzjoni ġenwina u s-sjieda minn partijiet interessat fil-klima fil-livelli kollha. (mr)

Fit-13 ta’ Jannar, il-Kummissjoni Konsultattiva dwar il-Bidliet Industrijali (CCMI) tal-Kumitat Ekonomiku u Soċjali Ewropew kellha l-laqgħa inawgurali tal-mandat il-ġdid tagħha u adottat il-programm ta’ ħidma tagħha għall-2021.

Il-president tas-CCMI, Pietro Francesco De Lotto, il-viċi president Monika Sitárová, il-membri u d-delegati esterni, b’mandat minn Novembru 2020 sa Novembru 2025, adottaw unanimament il-Linji Gwida Politiċi u l-Programm ta’ Ħidma tas-CCMI għall-2021.

Il-programm ta’ ħidma huwa bbażat fuq tliet pilastri ewlenin:

• tranżizzjoni ekoloġika għall-industrija Ewropea;
• sforz komprensiv għad-diġitalizzazzjoni tas-setturi produttivi tal-Ewropa;
• It-tisħiħ tal-kompetittività globali tal-industrija Ewropea, b’konformità mar-rieżami tal-politika industrijali tal-Kummissjoni Ewropea għall-2021.

Fil-kummenti introduttorji tiegħu, is-Sur De Lotto enfasizza r-rwol uniku tas-CCMI fi ħdan il-KESE bħala ġabra ta’ għarfien espert industrijali speċjalizzat. Huwa rrifletta fuq il-kriżi attwali u qal:

“L-industrja Ewropea mhux biss trid toħroġ minn din il-kriżi; iżda trid toħloq il-kundizzjonijiet għal kompetittività globali aħjar ibbażata fuq l-enerġija u t-tranżizzjoni diġitali. Jeħtieġ li l-korpi, l-istituzzjonijiet u l-organizzazzjonijiet rilevanti Ewropej jappoġġjawha f’dan il-kompitu”, qal is-sur De Lotto.

Is-CCMI hija l-eredi tal-Kumitat Konsultattiv tal-Komunità Ewropea tal-Faħam u l-Azzar (KEFA), il-punt tat-tluq tal-Unjoni Ewropea kif nafuha llum il-ġurnata. Meta t-Trattat tal-KEFA skada fl-2002, intlaħaq ftehim li s-CCMI tiret u tkompli l-ħidma tagħha fir-rigward tal-attivitajiet u r-relazzjonijiet industrijali. (ks)

Il-Kumitat Ekonomiku u Soċjali Ewropew jilqa’ r-rakkomandazzjonijiet tal-Kummissjoni dwar il-politika ekonomika taż-żona tal-euro. Huwa jappoġġja bil-qawwa l-pakkett tan-NextGenerationEU u jappella biex il-ftehimiet meħtieġa jiġu konklużi malajr kemm jista’ jkun.

Madankollu, l-irkupru mill-kriżi tal-COVID-19 se jirnexxi biss jekk ikun akkumpanjat minn ristrutturar tal-ekonomija u s-soċjetà tagħna, u l-bini mill-ġdid tal-fiduċja huwa kruċjali sabiex tiġi stabbilizzata d-domanda. Dan jista’ jinkiseb permezz ta’:

• Tranżizzjoni għal forma ta’ governanza ekonomika aktar orjentata lejn il-prosperità u bbażata fuq is-solidarjetà. Il-KESE jappella biex il-proċess ta’ rieżami tal-governanza ekonomika mniedi mill-Kummissjoni jissokta mill-aktar fis possibbli.
• Żieda fl-investiment privat u pubbliku, b’‘regola tad-deheb’ għall-investiment pubbliku, biex jiġu salvagwardjati l-produttività u l-bażi soċjali u ambjentali għall-ġenerazzjonijiet futuri: “Dan ifisser li jitneħħa l-investiment nett mill-kalkolu tal-indikaturi tad-defiċit”, tispjega r-relatur, Judith Vorbach.
• L-implimentazzjoni tal-Pilastru Ewropew tad-Drittijiet Soċjali: l-inizjattivi għal Ewropa aktar soċjali jinkludu Proposta għal Direttiva dwar pagi minimi adegwati.
• Riforma tal-politiki tat-tassazzjoni, biex il-piż tat-taxxa jiċċaqlaq minn fuq ix-xogħol għal fuq bażijiet tat-taxxa li huma inqas detrimentali għall-provvista ta’ ħaddiema, waqt li jitqies ukoll l-impatt distribuzzjonali relatat. Il-KESE jappella għal progress sostanzjali fl-introduzzjoni ta’ riżorsi proprji ġodda, kif deskritt fil-pjan ta’ rkupru. (na)

Il-KESE appoġġja s-sejħa tal-Kummissjoni Ewropea għall-integrazzjoni tas-sistema tal-enerġija. Fil-futur, l-elettriku, it-tisħin u t-trasport għandhom ikunu kollha interkonnessi, bl-għan aħħari li tittejjeb l-effiċjenza u tinkiseb ekonomija newtrali għall-klima

F’Opinjoni mħejja minn Lutz Ribbe u adottata waqt is-sessjoni plenarja ta’ Jannar, il-KESE jindika li strateġija bħal din tista’ tikkontribwxxi sabiex tiġi żgurata provvista tal-enerġija, jitnaqqsu l-importazzjonijiet tal-enerġija u l-prezzijiet affordabbli jsiru realtà għall-konsumaturi Ewropej.

Fil-fehma tal-Kumitat, madankollu, il-Kummissjoni Ewropea tonqos milli ssemmi kif l-UE tista’ tikseb sigurtà tal-provvista bl-użu ta’ sorsi tal-enerġija li huma baxxi fil-karbonju jew li huma ħielsa mill-karbonju.

“It-tranżizzjoni tal-enerġija fl-Ewropa tista’ tkun ta’ suċċess biss jekk jiġu indirizzati l-kwistjonijiet kollha,” qal is-Sur Ribbe, meta tkellem mill-marġni tas-sessjoni plenarja.

“Il-Kummissjoni tiddikjara li 84 % tad-domanda għall-elettriku ser ikollha tiġi minn sorsi rinnovabbli, iżda tonqos milli tagħti dettalji dwar is-sorsi li minnhom għandu jiġi prodott il-bqija tal-elettriku. Bla dubju dan huwa inaċċettabbli. Is-sigurtà tal-provvista hija fundamentalment importanti għall-ekonomija u l-konsumaturi Ewropej, speċjalment hekk kif l-elettrifikazzjoni tal-provvista tat-tisħin u s-settur tat-trasport huma mistennija li jżidu d-domanda għall-elettriku, minkejja l-progress fl-effiċjenza.”

Il-KESE jaqbel mal-Kummissjoni li n-nuqqas jew l-inadegwatezza tal-ipprezzar tal-emissjonijiet tas-CO₂ fis-setturi tat-tisħin u tat-trasport huma problema serja għall-integrazzjoni tas-sistema.

Apparti dan, is-sorsi rinnovabbli mhux dejjem jintagħżlu flok il-karburanti fossili. F’ħafna Stati Membri, tassazzjoni qawwija fuq l-elettriku u imposti eċċessivi fuq in-network joħolqu distorsjonijiet fis-suq. F’dawn il-każijiet, l-użu ta’ elettriku żejjed sabiex tiġi prodotta s-sħana – l-aktar forma sempliċi ta’ integrazzjoni tas-sistema – mhijiex ekonomikament vijabbli.

Il-Kumitat għalhekk iħeġġeġ lill-Kummissjoni biex tressaq proposti konkreti għal soluzzjonijiet, minflok sempliċiment tiddeskrivi l-problema bi kliem xi ftit jew wisq inċert jew vag. (mp)

L-Unjoni Ewropea trid tegħleb il-kriżi tal-COVID-19 billi tibni mudell ġdid tas-soċjetà bbażat fuq ekonomiji aktar ekoloġiċi, aktar ġusti u aktar reżiljenti. Bħala enerġija nadifa, l-idroġenu jista’ jkun fattur ewlieni tat-trasformazzjoni. Din hija l-idea ewlenija wara Opinjoni minn Pierre Jean Coulon adottata fis-sessjoni plenarja ta’ Jannar tal-KESE.

Fid-dokument, il-KESE jappoġġja l-Istrateġija tal-UE għall-Idroġenu mressqa mill-Kummissjoni Ewropea bħala pass ’il quddiem fil-ħolqien ta’ ambjent favorevoli biex jiżdiedu l-provvista u d-domanda għall-idroġenu u biex tinkiseb ekonomija newtrali f’termini ta’ emissjonijiet tal-karbonju.

“L-idroġenu nadif għandu jsir prijorità ċara, peress li din hija l-unika għażla kompatibbli man-newtralità klimatika,” qal is-Sur Coulon matul id-dibattitu fil-plenarja. “Il-fondi Ewropej għall-irkupru għandhom jippermettu lin-negozji, l-innovaturi, il-ħaddiema u l-investituri li jaffermaw ir-rwol tagħhom bħala mexxejja dinjija fis-swieq tal-enerġija nadifa li qed jespandu.”

B’mod partikolari, il-KESE jappoġġja l-ħolqien ta’ Alleanza Ewropea għall-Idroġenu Nadif li għandha tingħata l-kompitu li tippjana l-investimenti fil-produzzjoni u torganizza d-domanda għal idroġenu nadif fl-UE.

Dan il-korp se jinkludi l-mexxejja tal-industrija, is-soċjetà ċivili, il-ministri nazzjonali u reġjonali u l-Bank Ewropew tal-Investiment. Peress li l-KESE se jaqdi rwol ewlieni biex titħaffef it-trasformazzjoni tal-industriji Ewropej, huwa essenzjali li jkun involut fil-kapaċità tiegħu bħala rappreżentant tas-soċjetà ċivili organizzata. (mp)

Stqarrija mill-President tal-Grupp ta’ Min Iħaddem tal-KESE, Stefano Mallia

L-impjegaturi tal-UE jilqgħu l-ftehim tal-Brexit u jawguraw mill-qalb lit-tim tan-negozjar tal-Kummissjoni Ewropea, li tmexxa b’ħila minn Michel Barnier. Madankollu, hekk kif in-negozji qed jippruvaw jifhmu t-trattat kummerċjali ta’ 1 200 paġna, huma qed jitolbu perjodu ta’ aġġustament biex jgħinhom fil-proċess diffiċli ta’ tagħlim tagħhom.

L-impjegaturi Ewropej jilqgħu b’sodisfazzjoni il-fatt li ntlaħaq Brexit b’mod ordnat u li nżammet l-integrità tas-suq uniku. Madankollu, anke jekk ma jiġu imposti l-ebda tariffa jew kwoti restrittiva fuq il-prodotti kkummerċjalizzati, l-għadd ta’ kontrolli doganali u regolatorji ġodda, inklużi regoli tal-oriġini u rekwiżiti stretti tal-kontenut lokali, se joħloq burokrazija li possibbilment tnaqqas ir-ritmu tal-proċessi, u l-ktajjen tal-provvista se jieħdu ż-żmien biex jaġġustaw għar-realtà l-ġdida. 

Din hija r-raġuni għaliex il-kumpaniji jeħtieġu perjodu ta’ aġġustament biex ilaħħqu mat-tibdil. Hemm bżonn li tiġi implimentata sistema heavy-duty, bħal ngħidu aħna SOLVIT għall-BREXIT, sabiex tappoġġja lin-negozji kollha, speċjalment l-SMEs

Fl-istess ħin, jidher ċar li hemm bżonn ritorn mal-mejda tan-negozjati sabiex is-settur tas-servizzi jiġi inkluż fil-ftehim, sabiex jiġi żgurat il-fluss mingħajr xkiel tad-data bejn l-UE u r-Renju Unit u jiġi garantit ir-rikonoxximent reċiproku tal-kwalifiki.

Jekk irridu li l-Ewropa u r-Renju Unit jibqgħu konnessi mill-qrib, hemm bżonn nissoktaw bil-ħidma dwar ir-relazzjoni tagħna. Ir-Renju Unit qatt ma jista’ jkun sempliċi biss pajjiż terz ieħor. Il-ftehim għandu jkun pjattaforma solida għall-kooperazzjoni futura f’għadd ta’ oqsma li għandhom impatt kbir fuq l-ambjent kompetittiv tagħna, li jvarjaw mit-tibdil fil-klima sat-trasformazzjoni diġitali, ir-riċerka u l-innovazzjoni u l-istandards. Iżda l-ftehim huwa biss l-aħħar stadju fil-proċess tal-bidu.

Is-soċjetà ċivili u l-impjegaturi b’mod partikolari iridu jikkumbattu biex iżommu miftuħin il-kanali tal-kummerċ u biex tinbena struttura soda li tippermetti li dan iseħħ. (dv/kr)

Mill-Grupp tal-Ħaddiema tal-KESE

F’webinar organizzat f’Jannar mill-Grupp tal-Ħaddiema tal-KESE, saret enfasi dwar il-ħtieġa li s-Summit Soċjali li jmiss f’Porto jwassal għal patt soċjali ġdid.

Aħna qed ngħixu fl-agħar kriżi tas-saħħa u ekonomika fl-istorja tal-Unjoni Ewropea. Madankollu, filwaqt li l-pandemija żiedet il-faqar, il-qgħad u l-inugwaljanza, dawn il-kwistjonijiet mhuma ġodda xejn.

Tard f’Jannar il-Grupp tal-Ħaddiema tal-KESE organizza webinar biex issir diskussjoni dwarhom ma’ Nicolas Schmit, Kummissarju Ewropew għall-Impjiegi u d-Drittijiet Soċja, Ana Mendes Godinho, Ministru tal-Portugall għall-Impjiegi, is-Solidarjetà u s-Sigurtà Soċjali (li għal raġunijiet ta’ saħħa kienet sostitwita mis-Segretarju tal-Istat għax-Xogħol u t-Taħriġ Vokazzjonali, Miguel Cabrita), Iratxe García Pérez, President tal-Grupp S&D fil-Parlament Ewropew, u Oliver Röpke, President tal-Grupp tal-Ħaddiema tal-KESE.

Il-kelliema rrimarkaw li l-għodod biex joffru l-għajnuna fejn hi meħtieġa jeżistu, u li hemm bżonn li dawn isiru realtà. Dak li huwa meħtieġ, aktar milli l-miri, huma politiki effettivi biex il-Pilastru Ewropew tad-Drittijiet Soċjali jsir realtà tanġibbli għaċ-ċittadini. Il-Pjan ta’ Azzjoni għall-Pilastru Ewropew tad-Drittijiet Soċjali irid ikollu miżuri u inizjattivi leġiżlattivi għall-perjodu ta’ żmien, qasir, medju u twil, kif ukoll baġit suffiċjenti.

Intqal li s-summit ta’ Porto irid iġib bidla fid-direzzjoni, peress li huwa magħruf li mhu se jkun hemm ebda rkupru jew sostenibbiltà mingħajr sostenibbiltà soċjali. Biex dan iseħħ jinħtieġ li s-soċjetà ċivili u l-imsieħba soċjali jiġu involuti fil-proċess, trid tiġi offruta pjattaforma ġenwina għal-leħen u l-parteċipazzjoni tal-ħaddiem, u jridu jittejbu n-negozjar kollettiv u l-ftehimiet kollettivi.

L-Aġenda ta’ Porto 2030 li tirriżulta mis-summit jinħtieġ li, minbarra l-COVID, tkopri u tindirizza kwistjonijiet strutturali marbutin mal-globalizzazzjoni, ir-ridistrubuzzjoni tal-ġid, il-protezzjoni tas-suq tax-xogħol, l-investiment soċjali, l-aġenda soċjali fil-Patt Ekoloġiku Ġdid u s-Semestru Ewropew, u t-tmiem tal-politiki ta’ awsterità, fost ħafna tħassib ieħor. Dan għandu jkun il-bidu ta’ patt soċjali ġdid, li jevita t-tentazzjoni li nerġgħu lura għall-istatus quo, u li jindika t-tip ta’ futur li xtaqna nibnu. Il-kelliema saħqu li rridu niżguraw li r-regoli eżistenti jiġu applikati u li dawk meħtieġa jkunu fis-seħħ, u li f’dan il-proċess ċ-ċittadini u l-Istati Membri jaħdmu flimkien b’solidarjetà, ugwaljanza u sostenibbiltà, biex nagħmlu investiment soċjali b’saħħtu fil-futur tagħna. (prp)