Grupp Permanenti dwar it-Trasport

Il-Grupp Permanenti dwar it-Trasport jaġixxi bħala grupp ta’ riflessjoni intern għas-Sezzjoni TEN dwar kwistjonijiet tat-trasport, u għandu l-kompitu partikolari li jantiċipa sfidi ġodda u jiżviluppa u jirrevedi ideat u kunċetti ġodda. L-għan tal-Grupp huwa li jirrifletti dwar il-perspettivi u l-ideat, kif ukoll dwar ir-rwol ġenerali li l-KESE, bħala rappreżentant tas-soċjetà ċivili tal-Ewropa, jista’ jkollu fit-tiswir tal-futur tat-trasport tal-Ewropa.

Matul il-mandat 2025-2028, il-Grupp Permanenti dwar it-Trasport se jiffoka fuq is-suġġetti li ġejjin:

• it-tranżizzjoni ekoloġika, id-dekarbonizzazzjoni, il-kompetittività industrijali u aġġornamenti regolatorji;
• is-sigurtà, ir-reżiljenza u l-mobbiltà militari;
• il-konnettività, l-infrastruttura u l-intermodalità;
• l-isfidi fir-rigward tal-mobbiltà soċjali, urbana u territorjali.

Qafas Finanzjarju Pluriennali 2028-2034

Il‑Grupp Permanenti dwar it-Trasport iltaqa’ mal-Unità għall-Investiment fit-Trasport tad-DĠ MOVE u ma’ diversi partijiet ikkonċernati biex jiddiskutu l-proposta tal-Kummissjoni Ewropea għall-Qafas Finanzjarju Pluriennali 2028-2034, b’enfasi fuq l-objettivi tat-trasport. Id-diskussjonijiet enfasizzaw erba’ prijoritajiet ewlenin:

• l-appoġġ għal proġetti transfruntiera u ta’ interess komuni tan-Network trans-Ewropew tat-trasport (TEN‑T);
• l-iżvilupp ta’ infrastruttura intelliġenti, dekarbonizzata u sostenibbli tan-Network TEN‑T;
• konnettività mtejba ma’ pajjiżi terzi; u
• modifika tal-infrastruttura tat-trasport ċivili għall-mobbiltà militari.