KESE info

Mikuláš Bek, il-Ministru Ċek għall-Affarijiet Ewropej, żvela l-ħames prijoritajiet politiċi li aktarx se jkollha l-Presidenza Ċeka li jmiss tal-Kunsill tal-UE, f’diskors lill-membri tal-KESE li sar fi Praga fit-28 ta’ April 2022.

Is-Sur Bek żvela l-prijoritajiet politiċi mistennija tal-Presidenza Ċeka waqt laqgħa tal-Bureau tal-KESE, u saħaq li l-enfasi ser tkun fuq it-tranżizzjoni ekoloġika u diġitali iżda wkoll, fid-dawl tal-avvenimenti reċenti, fuq is-sigurtà.

Bil-motto “L-Ewropa bħala kompitu”, meħud minn diskors tal-Kap tal-Istat Ċek Václav Havel f’Aachen, il-presidenza Ċeka tal-UE ser tiffoka fuq:

1) il-ġestjoni tal-kriżi tar-refuġjati u l-irkupru fl-Ukrajna;
2) is-sigurtà tal-enerġija fl-Ewropa;
3) it-tisħiħ tal-kapaċità tad-difiża Ewropea u tas-sigurtà taċ-ċiberspazju;
4) ir-reżiljenza strateġika tal-ekonomija Ewropea;
5) ir-reżiljenza tal-istituzzjonijiet demokratiċi.

B’referenza għall-iżviluppi fil-kriżi fl-Ukrajna, huwa qal li “l-iżgurar ta’ aċċess għal sorsi tal-enerġija affordabbli, sostenibbli iżda wkoll affidabbli ser ikun wieħed mill-akbar sfidi li l-UE qatt iffaċċjat”.

Fid-dibattitu, il-membri tal-KESE ħeġġew lill-ministru biex iżid l-appoġġ tal-UE u tal-gvernijiet nazzjonali lill-organizzazzjonijiet tas-soċjetà ċivili, u qalu li dawn l-organizzazzjonijiet jinsabu fil-linja ta’ quddiem fil-kriżi umanitarja li ġabet magħha l-invażjoni Russa fl-Ukrajna u għandhom bżonn appoġġ prattiku urġenti.

Is-solidarjetà Ewropea kienet element ewlieni ieħor fid-diskussjoni: il-membri enfasizzaw li jkun possibbli biss li jitwaqqfu l-importazzjonijiet tal-enerġija mir-Russja jekk l-Istati Membri kollha tal-UE jingħaqdu flimkien u jaqsmu bejniethom is-sorsi tal-enerġija disponibbli.

Diversi kelliema wissew ukoll kontra nuqqas ta’ kunsiderazzjoni tal-aspetti soċjali matul il-presidenza Ċeka tal-Kunsill fit-tieni nofs tal-2022. Biż-żieda fil-prezzijiet tal-enerġija u tal-ikel, il-faqar qed jiżdied u qed jhedded il-koeżjoni soċjali.

F’seminar li sar bħala parti mill-avveniment, dwar “Taħlita tal-enerġija ottimali għal enerġija sostenibbli u affordabbli”, il-President tal-KESE Christa Schweng irrimarkat li t-tnaqqis tad-dipendenza tal-enerġija tal-UE minn pajjiżi terzi huwa essenzjali. It-triq ’il quddiem hija li jiġu diversifikati s-sorsi tal-enerġija u jiżdied l-investiment fl-enerġija rinnovabbli.

Qalet li “Biex tiġi żgurata tranżizzjoni b’suċċess, l-organizzazzjonijiet tas-soċjetà ċivili għandu jkollhom rwol ewlieni fid-definizzjoni u l-implimentazzjoni tal-politiki”. (mp)

Il-KESE laqa’ l-proposta tal-Kummissjoni Ewropea għal Direttiva dwar it-titjib tal-kundizzjonijiet tax-xogħol fix-xogħol fuq il-pjattaformi. Huwa faħħar l-inizjattiva bħala pass tant meħtieġ lejn l-istabbiliment ta’ kriterji ċari u definiti sew għall-klassifikazzjoni tar-relazzjonijiet tal-impjieg u għar-regolamentazzjoni tal-użu tal-algoritmi fir-reklutaġġ u l-impjegar ta’ ħaddiema fuq il-pjattaformi.

Il-KESE qal li kien ġustifikat l-użu ta’ strument legali vinkolanti, direttiva, sabiex jiġi regolat ix-xogħol fuq il-pjattaformi, billi d-diversità kbira ħafna bejn kundizzjonijiet tax-xogħol u l-liġijiet f’kull Stat Membru sikwit twassal għat-trattament ħażin tal-ħaddiema fuq il-pjattaformi u fi standards għall-protezzjoni tal-ħaddiema dejjem jonqsu fil-livell nazzjonali u tal-UE. L-Opinjoni ġiet adottata fis-sessjoni plenarja tal-KESE f’Marzu, b’149 vot favur, 80 vot kontra u 17-il astensjoni.

Ir-relatur għall-Opinjoni, Cinzia del Rio, qalet: Naraw eżempji ċari ta’ diskriminazzjoni u trattament mhux ugwali tal-ħaddiema fuq il-pjattaformi madwar l-UE. Is-sitwazzjoni fl-Istati Membri hija estremament diversa – hija ġungla regolatorja li jeħtieġ li tinħall. Id-direttiva proposta għandha l-għan li tipprovdi qafas regolatorju flessibbli, li jista’ jiġi adattat fil-livell nazzjonali u li jqis id-disparitajiet fil-kundizzjonijiet tax-xogħol tan-nies.

Il-kwistjoni l-iktar importanti hija bla dubju l-klassifikazzjoni legali tar-relazzjoni tal-impjieg u d-distinzjoni ċara tagħha minn impjieg indipendenti ġenwin. Għal dan il-għan, jeħtieġ li jiġi identifikat b’mod ċar l-impjegatur legalment responsabbli, kemm biex jiġi żgurat il-ħlas xieraq tat-taxxi u l-kontribuzzjonijiet soċjali kif ukoll biex ikun jista’ jsir negozjar kollettiv. Fil-fehma tal-KESE, madankollu, it-test tal-proposta tal-Kummissjoni huwa wisq ġeneriku u vag dwar din il-kwistjoni, kif ukoll dwar għadd ta’ punti oħrajn, bħad-dritt kemm tal-ħaddiema kif ukoll tar-rappreżentanti tal-unions għal informazzjoni u konsultazzjoni.

Dawn l-inċertezzi legali f’xi sitwazzjonijiet jistgħu jiffavorixxu l-ħolqien u l-proliferazzjoni ta’ forom ta’ xogħol mhux iddikjarati u sitwazzjonijiet deplorabbli ta’ sfruttament u kompetizzjoni bejn il-ħaddiema stess, li jistgħu jkunu taħt xi prattiki ta’ sottokuntrattar illegali, qal il-KESE. 

Il-Grupp ta’ Min Iħaddem tal-KESE ressaq kontroopinjoni, li kisbet aktar minn 30% tal-voti mitfugħa u ġiet ippubblikata bħala Appendiċi għall-Opinjoni adottata. Il-Grupp ta’ Min Iħaddem oppona l-użu ta’ direttiva li tirregola x-xogħol fuq il-pjattaformi, bil-biża’ li tali leġiżlazzjoni vinkolanti tkun tirrappreżenta soluzzjoni “waħda tajba għal kulħadd”. Dan jista’ jsir ostaklu għall-innovazzjoni u l-investiment fit-twaqqif u l-iżvilupp tal-pjattaformi diġitali fl-UE.

Ma jaqblux ukoll dwar l-introduzzjoni ta’ definizzjoni legali tal-UE dwar min hu ħaddiem u minn hu impjegat indipendenti fuq il-pjattaformi, billi ma tkunx tista’ tirrispetta l-mudelli differenti użati fil-pajjiżi differenti jew iżżomm il-pass ma’ żviluppi dinamiċi li jseħħu fis-swieq tax-xogħol. (ll)
 

Il-KESE appella lill-Istati Membri tal-UE biex iżidu l-isforzi tagħhom u jimplimentaw id-Direttiva tal-UE li tipprevedi sanzjonijiet kontra l-impjegaturi ta’ ċittadini minn pajjiżi terzi b’residenza irregolari. F’Opinjoni adottata reċentement, il-KESE wissa dwar it-traspożizzjoni u l-implimentazzjoni difettużi tad-Direttiva fl-UE kollha.

Peress li ħafna drabi huwa sors ta’ sfruttament tal-ħaddiema, l-impjieg ta’ migranti b’residenza illegali huwa wkoll fattur ta’ attrazzjoni għall-faċilitazzjoni ta’ immigrazzjoni illegali; kull sena, dan jaħsad il-ħajja ta’ eluf ta’ persuni li jibdew vjaġġi perikolużi biex jaslu fl-Ewropa. Il-KESE jgħid li ż-żewġ prattiki kriminali għandhom jiġu indirizzati b’azzjoni deċiżiva fil-livell tal-UE u f’dak nazzjonali.

Fl-Opinjoni tiegħu, il-KESE enfasizza li s-severità tas-sanzjonijiet tvarja b’mod konsiderevoli bejn l-Istati Membri u, fil-biċċa l-kbira tal-każijiet, ftit li xejn jiskoraġġixxu lill-imjegaturi milli jimpjegaw ċittadini minn pajjiżi terzi b’residenza illegali. 

Nuqqas ieħor tad-Direttiva huwa l-inabbiltà tagħha li tħeġġeġ lill-migranti jressqu lmenti uffiċjali kontra l-impjegaturi. Dan huwa minħabba l-biża’, ħafna drabi ġustifikata u leġittima, tal-migranti li jintbagħtu lura lejn il-pajjiżi ta’ oriġini tagħhom. Aħna nappoġġjaw bil-qawwa lill-Kummissjoni meta tgħid li se tniedi proċeduri ta’ ksur kontra l-Istati Membri jekk dawn xorta jonqsu milli jipprovdu l-informazzjoni rilevanti kollha dwar l-implimentazzjoni tal-obbligi ewlenin li jirriżultaw mid-Direttiva fir-rigward tas-sanzjonijiet, l-ispezzjonijiet u l-protezzjoni tad-drittijiet tal-migranti, qal ir-relatur tal-Opinjoni, Carlos Manuel Trindade. 

F’Opinjoni oħra, il-KESE analizza l-Pjan ta’ azzjoni tal-UE mġedded kontra l-faċilitazzjoni ta’ immigrazzjoni illegali (2021-2025). Huwa laqa’ l-approċċ komprensiv tiegħu għal din il-kwistjoni, u faħħru bħala l-kontinwazzjoni tal-ħidma tiegħu fil-ġlieda kontra din l-attività perikoluża u kriminali. Skont ċifri tal-Europol, aktar minn 90 % ta’ dawk li daħlu fl-UE b’mod illegali, f’xi punt vjaġġaw permezz tan-networks għall-faċilitazzjoni ta’ immigrazzjoni illegali.

Il-ġlieda kontra l-faċilitazzjoni ta’ immigrazzjoni illegali hija meqjusa bħala prijorità taħt il-Patt il-Ġdid tal-UE dwar il-Migrazzjoni u l-Ażil, peress li ħasdet il-ħajja ta’ migranti nisa, tfal u rġiel. Din tikser id-drittijiet tagħhom u tieħu vantaġġ minn dawk li jippruvaw jidħlu fl-UE. Hija wkoll theddida għas-sigurtà Ewropea.

Il-ġlieda kontra l-faċilitazzjoni ta’ immigrazzjoni illegali qatt ma tista’ tiġi diretta kontra l-migranti nfushom jew kontra l-għajnuna li jingħataw u dik umanitarja. Ma jridx ikun hemm kriminalizzazzjoni tas-solidarjetà, qal ir-relatur tal-Opinjoni José Antonio Moreno Diaz. Aħna nifhmu li s-salvagwardja tal-fruntieri esterni tal-UE hija prijorità, iżda dawn għandhom dejjem jiġu mħarsa b’rispett għad-drittijiet tal-bniedem.

Fl-Opinjoni tiegħu dwar It-titjib tal-protezzjoni ambjentali permezz tad-dritt kriminali, adottata fis-sessjoni plenarja ta’ Marzu, il-KESE ssuġġerixxa li l-UE għandha timponi sanzjonijet kriminali għall-akbar numru possibbli ta’ reati ambjentali.

Ir-rapport analizza d-Direttiva dwar ir-Reati Ambjentali l-ġdida u ta suġġerimenti dwar metodi prattiċi biex din issir tassew effettiva, proporzjonata u dissważiva.

Il-KESE laqa’ b’sodisfazzjon l-estensjoni tal-lista ta’ reati kriminali ambjentali minn disgħa għal tmintax, iżda jemmen li d-direttiva għandha tkopri l-akbar għadd possibbli ta’ reati ambjentali. Huwa wkoll tal-opinjoni li, biex ikunu effettivi, proporzjonati u dissważivi, il-limiti massimi għas-sanzjonijiet għandhom ikunu ogħla sostanzjalment.

Proposta oħra li hemm fir-rapport hija biex ir-reati ambjentali jaqgħu fil-ġurisdizzjoni tal-Uffiċċju tal-Prosekutur Pubbliku Ewropew, peress li ħafna minnhom huwa magħruf li għandhom konnessjonijiet mal-kriminalità organizzata.

Il-KESE qed jitlob ukoll li r-reat ta’ ekoċidju jiġi minqux fid-direttiva, u jiġi ddefinit bħala “atti illegali jew malizzjużi mwettqa fl-għarfien sħiħ li hemm probabbiltà sostanzjali li dawn l-atti jagħmlu ħsara serja u mifruxa jew fit-tul lill-ambjent”. Il-KESE jinnota li l-kunflitti armati huma prattikament dejjem, min-natura tagħhom stess, ekoċidji. 

Il-kriminalità ambjentali hija r-raba’ kategorija ta’ kriminalità li tħalli l-aktar qligħ globalment u qed tiżdied fl-UE. Filwaqt li l-għadd ta’ sentenzi transfruntiera ma żdidux b’mod sostanzjali, ir-rata ta’ reati ambjentali mwettqa fl-Ewropa kibret.
Madankollu, il-KESE jisħaq li r-riformulazzjoni tad-direttiva mhix biżżejjed. Waħda mid-dgħufijiet indikati fil-valutazzjonijiet tad-direttiva attwali hija l-implimentazzjoni fl-Istati Membri. Il-KESE għalhekk jenfasizza l-ħtieġa li tissaħħaħ il-katina tal-infurzar u jissuġġerixxi li l-Istati Membri tal-UE għandhom jistabbilixxu forzi tal-pulizija speċjalizzati, prosekuturi, imħallfin u qrati fil-qasam tar-reati ambjentali.

Id-Direttiva tal-2008 dwar il-Kriminalità Ambjentali hija l-istrument vinkolanti prinċipali fis-seħħ fl-UE biex tindirizza r-reati kriminali. Evalwazzjoni mwettqa fl-2019 u fl-2020 turi li din ma kellhiex wisq effett fil-prattika. Matul l-aħħar għaxar snin, l-għadd ta’ każijiet ta’ kriminalità ambjentali investigati u kkundannati b’suċċess baqa’ baxx, is-sanzjonijiet imposti ma kinux dissważivi biżżejjed, u ma kien hemm l-ebda kooperazzjoni transfruntiera sistematika. Wara l-evalwazzjoni, il-Kummissjoni ddeċidiet li tibdilha b’Direttiva ġdida tal-UE. (mr)
 

L-Unjoni Ewropea għandha obbligu li tiddefendi l-valuri fundamentali tagħna, inklużi d-drittijiet ta’ persuni li jagħmlu parti minn minoranzi. Għal din ir-raġuni, il-KESE appoġġja bis-sħiħ l-istabbiliment tal-Istrateġija tal-Kummissjoni Ewropea dwar il-ġlieda kontra l-antisemitiżmu u t-trawwim tal-ħajja Lhudija fil-plenarja tiegħu ta’ Marzu.

Il-KESE huwa konvint li l-antisemitiżmu huwa test tal-idea Ewropea, l-istat tad-dritt, id-drittijiet fundamentali u d-demokrazija, jispjega r-relatur Ákos Topolánszky.

Il-Kumitat ifaħħar l-istrateġija li għandha l-għan mhux biss li tindirizza l-antisemitiżmu, iżda wkoll li tippromovi l-ħajja Lhudija, u li tistabbilixxi politiki pubbliċi u kooperazzjoni fil-livell komunitarju għall-promozzjoni tal-aċċettazzjoni reċiproka.

Il-KESE jqis li huwa essenzjali li jiġu mifhuma l-għeruq u l-kawżi tal-forom kollha ta’ vjolenza kontra l-persuni u l-komunitajiet Lhud, sabiex tkun tista’ tittieħed azzjoni effettiva mhux biss permezz tas-sistema tal-ġustizzja kriminali, iżda wkoll permezz ta’ sistema aktar effettiva ta’ azzjoni mill-komunità u s-soċjetà. 

Barra minn hekk, bħala parti integrali mill-identità Ewropea, il-kultura Lhudija għandha ssir aktar aċċessibbli għaċ-ċittadini u l-pubbliku inġenerali. Il-Kumitat jitlob lill-istituzzjonijiet tal-UE, lill-Istati Membri u lill-imsieħba soċjali biex jippreżentaw u jiċċelebraw kif imiss ir-rwol tal-komunità Lhudija fl-UE bħala parti integrali u inaljenabbli ta’ kultura komuni.

Il-Kumitat jemmen li l-istrumenti kostituzzjonali u legali tal-UE kollha għandhom jintużaw b’mod sistematiku biex jiġġieldu l-kontenut antisemitiku fil-midja, u l-għarfien u l-fehim tal-ħajja Lhudija għandhom jittejbu permezz ta’ rapportar aktar bilanċjat u sensittiv. 

Fil-biċċa l-kbira tal-każijiet, ir-rappreżentanza tal-komunitajiet Lhud u tal-membri tagħhom fil-midja tradizzjonali u soċjali hija limitata ħafna, u tiffoka primarjament fuq l-impatt tal-vjolenza u t-terroriżmu antisemitiċi. Madankollu, hemm ukoll il-ħtieġa li jiġi ppreżentat kontenut pożittiv lil hinn minn dan kollu bħala rikonoxximent tal-importanza tal-koeżistenza soċjali. 

Fl-aħħar nett, il-KESE jħeġġeġ lill-Kummissjoni Ewropea tagħti lill-ġlieda kontra l-antisemitiżmu u lill-aġenda strateġika favur il-promozzjoni tal-ħajja Lhudija dimensjoni esterna b’saħħitha, fl-aspetti kollha tal-kooperazzjoni mal-pajjiżi terzi u l-organizzazzjonijiet internazzjonali. Il-Kumitat jiġbed l-attenzjoni għall-politika tal-viċinat tagħna u l-istrumenti ta’ kooperazzjoni għall-iżvilupp, kif ukoll l-istrumenti biex il-pajjiżi kandidati tal-UE jitqarrbu lejn l-UE, bħala mekkaniżmi adatti għall-ġlieda kontra l-antisemitiżmu u l-promozzjoni tal-ħajja Lhudija. (gb)

Il-KESE jappoġġja l-miżuri proposti mill-Kummissjoni biex jiġi miġġieled l-użu ħażin tal-kumpaniji fittizji u tiġi stabbilita tassazzjoni korporattiva minima effettiva, iżda jixtieq li dawn jissaħħu. F’żewġ Opinjonijiet adottati fil-plenarja tiegħu ta’ Marzu, il-KESE indika nuqqasijiet possibbli u ssuġġerixxa żidiet importanti. 

L-iżgurar ta’ tassazzjoni effettiva u ġusta fis-suq uniku kollu huwa kruċjali sabiex jiġi stimulat irkupru ġenwin wara l-pandemija tal-COVID-19 u l-iffinanzjar tat-tranżizzjoni diġitali u ekoloġika. Fiż-żewġ Opinjonijiet, il-KESE laqa’ l-proposti tal-Kummissjoni biex jiġi miġġieled l-użu tal-kumpaniji fittizji għall-evitar tat-tassazzjoni u tiġi introdotta tassazzjoni effettiva minima tal-kumpaniji, iżda indika lakuni possibbli u ssuġġerixxa miżuri addizzjonali ewlenin. 

Benjamin Rizzo, relatur tal-Opinjoni dwar il-ġlieda kontra l-użu ta’ entitajiet fittizji qal: “Il-kumpaniji fittizji li ġew stabbiliti fl-Istati Membri jeħtieġ li jinġiebu f’konformità mal-proposta tal-Kummissjoni, u l-kollaborazzjoni bejn l-Istati Membri hija aktar prijoritarja minn qatt qabel biex jiġi evitat it-tnaqqis tas-setgħat fiskali tal-UE.” 

Javier Doz Orrit, il-korelatur tal-Opinjoni, qal: “Jekk id-Direttiva kontra l-kumpaniji fittizji tikkomplementa l-pakkett leġiżlattiv tal-Kummissjoni kontra l-ħasil tal-flus, regola kontra “abilitanti professjonali” li jimmaniġġjaw kumpaniji fittizji għandha tikkomplementaha aktar”. 

Krister Andersson, ir-relatur tal-Opinjoni dwar tassazzjoni minima effettiva tal-kumpaniji, qal: “L-OECD hija mistennija tippreżenta regoli importanti dwar portijiet sikuri, preżentazzjoni semplifikata ta’ dokumenti amministrattivi u punti importanti oħrajn. Anke dawn ir-regoli għandhom jiġu inklużi fid-Direttiva. Huwa essenzjali li l-leġiżlazzjoni tiġi trasposta b’mod uniformi fl-UE u tiġi applikata bl-istess mod, u fuq livell globali.” 

Petru Sorin Dandea, korelatur tal-Opinjoni, qal: “il-KESE kien japprezza li kieku saret valutazzjoni tal-impatt tal-partijiet tad-Direttiva li jagħmluha konformi mad-dritt tal-Unjoni. Nappellaw sabiex issir din l-analiżi u li tkun disponibbli għall-pubbliku.” (tk)
 

Il-Bauhaus Ewropea l-Ġdida tqiegħed dimensjoni kulturali u kreattiva fil-qalba tal-Patt Ekoloġiku Ewropew u l-mewġa ta’ rinnovazzjoni, u tipprovdi punt tat-tluq għat-tranżizzjoni ekoloġika. B’dan il-kliem, il-President tal-KESE, Christa Schweng, ġabret fil-qosor il-pożizzjoni tal-KESE dwar din l-inizjattiva l-ġdida tal-Kummissjoni meta ltaqgħet mal-Kummissarju għall-Innovazzjoni, ir-Riċerka, il-Kultura, l-Edukazzjoni u ż-Żgħażagħ, Mariya Gabriel, fis-sessjoni plenarja tal-KESE fit-23 ta’ Marzu 2022.

“Naqblu bis-sħiħ mal-għan li ċ-ċittadini kollha jkollhom aċċess għal oġġetti ċirkolari u b’intensità inqas qawwija tal-karbonju fil-post tal-għajxien u tax-xogħol tagħhom, fil-bini pubbliku u fl-akkomodazzjonijiet tagħhom, permezz ta’ esperjenzi konkreti,” qalet is-Sinjura Schweng. Hija u tenfasizza l-importanza li jiġu involuti l-organizzazzjonijiet tas-soċjetà ċivili u li nħarsu lejn il-futur, hija żiedet tgħid: “Il-KESE huwa lest li jkun involut b’mod attiv fl-approċċ parteċipattiv tal-moviment tal-Bauhaus Ewropea l-Ġdida sabiex jiġi żgurat djalogu produttiv maċ-ċittadini u s-soċjetà ċivili, u b’hekk jinstabu soluzzjonijiet li jtejbu l-ħajja ta’ kuljum tagħhom.”

Mentri rreferiet għall-konsegwenzi serji tal-pandemija u l-gwerra li faqqgħet fl-Ukrajna, is-Sinjura Gabriel enfasizzat l-importanza ta’ proġetti bħal dawn illum il-ġurnata: “Naħseb li huwa aktar importanti minn qatt qabel li nkunu nistgħu naraw tama fil-futur tagħna, u li nkomplu naħdmu flimkien għal dan. U dan huwa eżattament dak li tirrappreżenta l-Bauhaus Ewropea l-Ġdida. Il-KESE huwa msieħeb essenzjali għas-suċċess tagħha. Flimkien, se niżguraw li tiġi implimentata b’mod li tkun qrib kemm jista’ jkun tal-komunitajiet lokali, iċ-ċittadini Ewropej u darhom.”

Il-Kummissarju ġġudikat l-approċċ parteċipattiv bħala “element kruċjali li jżomm id-djalogu maċ-ċittadini,” u żidiet tgħid li “hija preċiżament din l-idea ta’ kokreazzjoni u kooperazzjoni li ispirat l-inizjattiva tagħna”. Hija faħħret il-proposti tal-KESE, bħas-suġġeriment li titwaqqaf pjattaforma tas-soċjetà ċivili biex tipprovdi appoġġ fil-livell lokali u l-intenzjoni li tiġi organizzata konferenza speċifika b’rabta mal-festival annwali tal-Bauhaus Ewropea l-Ġdida mid-9 sat-12 ta’ Ġunju 2022. Pass importanti ieħor se jkun it-tnedija f’April 2022 tal-Laboratorju tal-Bauhaus Ewropea l-Ġdida, grupp ta’ riflessjoni u azzjoni dwar il-kokreazzjoni, il-ħolqien ta’ prototipi u l-ittestjar.

Fis-sessjoni plenarja tiegħu ta’ Marzu, il-KESE adotta Opinjoni dwar ir-riformulazzjoni tad-Direttiva dwar ir-Rendiment tal-Bini fl-Użu tal-Enerġija (EPBD). Huwa laqa’ l-fatt li l-proposta l-ġdida tal-Kummissjoni tqis il-kwistjonijiet enfasizzati f’Opinjonijiet preċedenti tal-KESE.

Huwa u jikkummenta dwar l-adozzjoni tad-dokument, ir-relatur Mordechaj Martin Salamon qal li “il-KESE jilqa’ b’sodisfazzjon kbir l-approċċ tal-UE għaliex isaħħaħ ir-rinnovazzjoni, partikolarment tal-bini bl-agħar rendiment, u jwitti t-triq għall-Unjoni Ewropea lejn tisħin u tkessiħ dekarbonizzati: miżuri fil-livell tal-UE huma aktar effiċjent biex iħaffu t-tranżizzjoni neċessarja.”

Id-Direttiva aġġornata dwar ir-rendiment tal-bini fl-użu tal-enerġija għandha l-għan li tgħin biex jintlaħaq ambjent mibni effiċjenti fl-enerġija, ta’ kwalità għolja u kompletament ħieles mill-fossili, u tipprovdi l-għodod biex jiġi indirizzat b’mod effettiv il-faqar fl-enerġija u tiġi rimedjata s-sitwazzjoni ta’ nuqqas strutturali għal żmien twil ta’ investiment fil-kostruzzjoni.

Iż-żidiet qawwija reċenti fil-prezzijiet għall-enerġija u l-prospettiva ta’ prezzijiet għoljin għallinqas għal żmien medju wrew li huwa saħansitra aktar importanti minn qatt qabel li tiġi stabbilita strateġija biex ittaffi u telimina l-faqar enerġetiku. 

Fl-2018, 6.8% tan-nies madwar l-UE (madwar 30.3 miljun) ma setgħux ilaħħqu mal-kontijiet tal-utilitajiet, u għalhekk kienu f’riskju li jkollhom il-provvista tagħhom maqtugħa; żviluppi reċenti aggravaw din il-problema. 

Biex tiżgura akkomodazzjoni deċenti, affordabbli u tajba għas-saħħa għal kulħadd, l-UE għandha timplimenta miżuri fit-tul biex ittejjeb l-effiċjenza enerġetika tal-bini, inkluża t-tneħħija sikura tal-asbestos. Dan huwa aktar u aktar urġenti minħabba li t-tisħin u t-tkessiħ ibbażati fuq il-fjuwils fossili se jsiru aktar għaljin bl-ispejjeż dejjem jiżdiedu tal-kwoti tas-Sistema tal-UE għall-Iskambju ta’ Kwoti tal-Emissjonijiet (EU ETS). (mp)

Proċeduri ġusti u d-djalogu mal-komunitajiet lokali se jagħmlu lill-Ewropej konxji tal-benefiċċji tat-tranżizzjoni tal-enerġija, filwaqt li jimmotivawhom biex jipparteċipaw fiha, jgħid il-KESE f’Opinjoni adottata fis-sessjoni plenarja ta’ Marzu.

Fl-Opinjoni tiegħu “Liema kundizzjonijiet huma meħtieġa biex titrawwem l-aċċettabbiltà soċjali tal-enerġija u t-tranżizzjoni lejn livell baxx ta’ emissjonijiet tal-karbonju?” il-KESE enfasizza li t-trawwim ta’ fiduċja reċiproka mal-partijiet interessati kollha huwa kruċjali biex is-soċjetà taċċetta din it-tranżizzjoni. 

“Il-miżuri kollha b’rabta mat-tranżizzjoni tal-enerġija jeħtieġu komunikazzjoni miftuħa u parteċipazzjoni sħiħa kmieni kemm jista’ jkun fil-fażi ta’ żvilupp tal-proġett u fil-livelli adegwati kollha, mill-UE sal-gvern lokali,” qal ir-relatur Arnaud Schwartz.

Il-korelatur Jean Coulon qal: “L-appoġġ mis-soċjetà ċivili huwa estremament importanti biex tiġi żgurata s-sjieda tal-komunità, peress li l-organizzazzjonijiet lokali jistgħu jikkontribwixxu għad-dibattitu pubbliku b’mod aktar faċli u jużaw data xjentifika biex jiġġieldu kwalunkwe idea falza li tista’ tiċċirkola.”

L-Unjoni Ewropea teħtieġ it-tranżizzjoni tal-enerġija għax hija aktar nadifa u aktar ġusta kemm mil-lat individwali kif ukoll mil-lat kollettiv. Fuq medda twila ta’ żmien din se tkun ukoll irħas għaċ-ċittadini. Madankollu, din tirrikjedi bidliet individwali u kollettivi u, fuq terminu qasir, id-dekarbonizzazzjoni tista’ tinvolvi spejjeż ogħla għall-produtturi u prezzijiet ogħla għall-konsumaturi.

Għalhekk huwa kruċjali li l-popolazzjoni u l-partijiet interessati kollha jsaħħu l-fiduċja reċiproka tagħhom u jaċċettaw it-trasformazzjoni u l-bidliet tekniċi tagħha, mill-ippjanar sal-implimentazzjoni. Biex jinkiseb dan, il-proċess għandu jkun indipendenti, trasparenti u inklużiv, l-informazzjoni pprovduta għandha tkun ta’ kwalità għolja u faċilment aċċessibbli, u dawk li jieħdu d-deċiżjonijiet għandhom ikunu responsabbli. (mp)

Il-proposta għall-aġġornament tar-Regolament dwar in-Networks Trans-Ewropej tat-Trasport hija neċessarja u pożitiva, jekk l-UE verament trid tikkontribwixxi għas-sostenibbiltà u għall-mobbiltà intelliġenti, inkluż permezz tal-ferroviji. Dan kien il-messaġġ ewlieni tal-Opinjoni dwar ir-Reviżjoni tar-Regolament dwar it-TEN-T u l-Kurituri tat-Trasport Ferrovjarju tal-Merkanzija adottata fis-sessjoni plenarja ta’ Marzu.

Ir-Regolament il-ġdid se jaġġorna l-qafas regolatorju eżistenti li jmur lura għall-2013 u se jgħin biex, f’termini ta’ infrastruttura, jinkisbu l-għanijiet stabbiliti fil-Patt Ekoloġiku, fl-Istrateġija Komprensiva għal Mobilità Sostenibbli u Intelliġenti u fil-Pjan ta’ Azzjoni dwar il-Ferroviji. 

Huwa u jitkellem dwar l-adozzjoni tal-Opinjoni, is-Sur Back qal:Kien wasal iż-żmien li jiġi propost regolament ġdid li jqis il-kuntest ta’ politika attwali u jikkapitalizza fuq it-tagħlimiet misluta f’dawn l-aħħar ftit snin. Il-pjan li jissaħħu r-regoli dwar l-implimentazzjoni tat-TEN-T huwa aħbar tajba ħafna, għaliex it-tnedija tar-regolament attwali intlaqtet minn dewmien sinifikanti u ma kinitx sodisfaċenti.

Il-Kumitat japprezza b’mod partikolari l-intenzjoni tal-Kummissjoni Ewropea li tqiegħed il-koeżjoni fil-qalba tal-proposta. Dan ifisser li meta jiġi implimentat in-network se jiġu żgurati l-aċċessibbiltà u l-konnettività fir-reġjuni kollha tal-UE kemm għat-traffiku tal-passiġġieri kif ukoll tal-merkanzija. Barra minn hekk, ir-regolament il-ġdid għandu jwassal ukoll għal koordinazzjoni u interkonnessjoni effiċjenti bejn, minn naħa, it-traffiku fuq distanzi twal, reġjonali u lokali u, min-naħa l-oħra, it-trasport fin-nodi urbani.

Mil-lat tekniku, il-KESE huwa favur armonizzazzjoni dejjem akbar tar-rekwiżiti tal-infrastruttura tan-networks ewlenin u komprensivi u tal-istabbiliment ta’ passi ewlenin: l-implimentazzjoni tan-network ewlieni sal-2030, tan-network ewlieni estiż sal-2040 u tan-network komprensiv sal-2050. Fir-rigward tal-iskadenza tal-2030, il-KESE jtenni d-dubji tiegħu dwar il-fattibbiltà espressi fir-rapport ta’ evalwazzjoni tal-2020 tiegħu, iżda jikkunsidra li l-iskadenza għandha tinżamm biex issir pressjoni fuq l-Istati Membri. (mp)

F’Opinjoni fuq inizjattiva proprja, il-KESE ppropona li titwaqqaf aġenzija Ewropea biex tagħmel tajjeb għan-nuqqasijiet tal-Mekkaniżmu tal-UE għall-Protezzjoni Ċivili, li ma jidhirx li għadu kapaċi jirrispondi għad-diżastri relatati mat-tibdil fil-klima u katastrofi multipli, bħall-gwerra attwali fl-Ukrajna. 

L-aġenzija, kif proposta mill-KESE, tgħaqqad il-protezzjoni ċivili u l-għajnuna umanitarja b’mod aktar konsistenti, u twitti t-triq għal azzjoni tal-politika barranija aktar b’saħħitha.

Minkejja r-rinforzi u l-adattament legali tal-Mekkaniżmu tal-UE għall-Protezzjoni Ċivili (UCPM) f’Mejju 2021, il-gwerra fl-Ukrajna wriet il-ħtieġa urġenti li jittejjeb il-mekkaniżmu u li l-protezzjoni ċivili u l-għajnuna umanitarja jkunu konnessi b’mod aktar koerenti.

Christophe Quarez, relatur tal-Opinjoni dwar It-tisħiħ tal-Mekkaniżmu tal-Unjoni għall-Protezzjoni Ċivili rrimarka li: Fid-dawl ta’ dawn l-isfidi ġodda kollha, u speċjalment bil-gwerra fl-Ukrajna, aħna tal-fehma li l-mekkaniżmu ma għandux biżżejjed għodda jew li dawn mhumiex effiċjenti biżżejjed. Il-proposta għall-ħolqien ta’ aġenzija Ewropea għall-protezzjoni ċivili u l-għajnuna umanitarja se tgħin lill-popolazzjoni Ukrena u se tindirizza aħjar kwistjonijiet oħra marbuta ma’ diżastri u sitwazzjonijiet ta’ kriżi umanitarja.

Violeta Jelić, korelatur għall-Opinjoni, żiedet tgħid li: Il-protezzjoni ċivili teħtieġ rikonoxximent aħjar tal-valur u tal-importanza tagħha mill-pajjiżi parteċipanti kollha f’dan l-att pur ta’ solidarjetà u sens ta’ appartenenza.

Il-KESE jqis li d-dimensjoni diplomatika tal-protezzjoni ċivili tal-UE mhijiex żviluppata biżżejjed. Peress li l-Unjoni Ewropea ilha tkun minn ta’ l-ewwel li tibgħat l-għajnuna umanitarja lill-pajjiżi ġirien, il-mekkaniżmu għall-protezzjoni ċivili sar għodda b’saħħitha fis-sett ta’ għodod tal-politika barranija tal-UE.

Il-KESE ppropona wkoll emenda leġiżlattiva sabiex jiġi awtorizzat rispons awtomatiku u immedjat fil-qafas tal-mekkaniżmu f’każ ta’ diżastru maħluq mill-bniedem, kemm fit-territorju tal-UE kif ukoll lil hinn minnu. (at)

Fid-29 ta’ Marzu, il-KESE organizza l-ewwel Forum tas-Soċjetà Ċivili Ewropea dwar il-Kummerċ u l-Iżvilupp Sostenibbli, li laqqa’ s-soċjetà ċivili, l-akkademja, u l-istituzzjonijiet tal-UE u internazzjonali biex jiddiskutu ideat innovattivi u rakkomandazzjonijiet konkreti dwar il-futur tal-politika kummerċjali tal-UE. 

Organizzat fi żmien kruċjali għall-kummerċ u l-iżvilupp sostenibbli, l-avveniment inkluda sensiela ta’ sessjonijiet fi gruppi iżgħar li koprew bosta kwistjonijiet mid-drittijiet sostantivi, sal-monitoraġġ, l-infurzar u ħafna aktar, u l-parteċipanti ġew mistiedna jesprimu fehmiethom bħala parti minn rieżami kontinwu tal-pjan ta’ azzjoni ta’ 15-il punt dwar il-kummerċ u l-iżvilupp sostenibbli u dawr żviluppi reċenti fil-pajjiżi msieħba tal-UE. 

“Il-KESE jimpenja ruħu li jkun forza mexxejja għal dibattitu ambizzjuż dwar il-kummerċ u l-iżvilupp sostenibbli li jirrifletti l-aspettattivi għoljin tas-soċjetà ċivili”, affermat mill-ġdid il-President tal-Kumitat Christa Schweng. Hija rreferiet ukoll għall-isfidi ġeopolitiċi ta’ żminijietna: Il-gwerra fl-Ukrajna, bħal ħafna gwerer oħra, għandha dimensjoni marbuta mas-sostenibbiltà: tikkonċerna r-riżorsi u d-dipendenzi f’dinja milquta mit-tibdil fil-klima.

Bernd Lange, President tal-Kumitat tal-Parlament Ewropew għall-Kummerċ Internazzjonali, enfasizza li l-qafas globali nbidel b’riżultat tal-pandemija tal-COVID-19 u l-aggressjoni Russa. Is-sistema multilaterali tinsab f’periklu, qal, u huwa ċar li għandha ssir enfasi akbar fuq il-ftehimiet kummerċjali bilaterali.

Luisa Santos minn Business Europe taqbel mal-fehma li l-multilateraliżmu għaddej minn kriżi, iżda żiedet tgħid: Ma rridux naqtgħu qalbna, għaliex jeħtieġ li l-istituzzjonijiet multilaterali jżommu d-djalogu, u enfasizzat għadd ta’ inizjattivi ambjentali reċenti fil-livell tal-Organizzazzjoni Dinjija tal-Kummerċ (WTO). 

Anaïs Berthier minn Client Earth temmen li l-politika kummerċjali tal-UE hija iżolata wisq mill-politiki l-oħra, bħall-politika ambjentali u dik klimatika. Hija enfasizzat li: L-inizjattivi awtonomi meħuda għandhom jiggarantixxu li l-prodotti li jitqiegħdu fis-suq tal-UE jissodisfaw il-kriterji ta’ sostenibbiltà. 

Maria Martin-Prat, Deputat Direttur Ġenerali għall-Kummerċ fil-Kummissjoni Ewropea, li qed tmexxi l-ħidma li għaddejja dwar ir-rieżami tal-kummerċ u l-iżvilupp sostenibbli, qalet li l-koerenza mhijiex l-għan, iżda li hija effettiva u twassal għall-bidla. 

Jean-Marie Paugam, Deputat Direttur Ġenerali tad-WTO, enfasizza li l-kummerċ m’għandux ikun ostaklu għall-politiki ambjentali. “Għall-iżvilupp sostenibbli, għandna mekkaniżmu ta’ notifiki ta’ miżuri kummerċjali u miżuri kummerċjali kbar ħafna ġew ingranati ma’ objettivi ambjentali”. 

Tanja Buzek, President tal-Kumitat ta’ Segwitu tal-KESE dwar il-Kummerċ Internazzjonali u relatur tal-Opinjoni tal-KESE dwar ir-rieżami tal-Kummerċ u l-Iżvilupp Sostenibbli, stabbiliet miri ambizzjużi meta qalet li “l-prijoritajiet tagħhna fir-rieżami tal-kummerċ u l-iżvilupp sostenibbli għandhom jiġu kkunsidrati minn perspettiva ġdida, li jfisser ukoll li nkissru l-kompartamentalizzazzjoni”. Rieżami ambizzjuż irid jinkludi approċċ ta’ infurzar sanzjonabbli mġedded b’monitoraġġ aktar b’saħħtu tas-soċjetà ċivili, bl-użu ta’ strumenti innovattivi u t-tisħiħ tal-ingranaġġ għall-kummerċ u l-iżvilupp sostenibbli. (at)
 

F’rapport reċenti, il-KESE qal li l-organizzazzjonijiet tas-soċjetà ċivili għandhom ikunu involuti mill-qrib fin-negozjar ta’ ftehimiet ġodda ta’ kummerċ ħieles fil-politika kummerċjali l-ġdida tal-UE. 

Il-KESE jemmen bis-sħiħ li l-organizzazzjonijiet tas-soċjetà ċivili u l-imsieħba soċjali għandhom jingħataw siġġu fin-negozjati għall-istrateġija kummerċjali l-ġdida tal-UE. Dan se jgħin biex jiġi żgurat li l-benefiċċji ta’ din il-politika jitqassmu ġenwinament fost il-parteċipanti kollha, kemm fl-UE kif ukoll fil-pajjiżi msieħba. 

Fi Frar 2021, il-Kummissjoni Ewropea stabbiliet politika kummerċjali ġdida miftuħa, sostenibbli u assertiva, li permezz tagħha l-UE ssir aktar stretta fil-konfront tal-imsieħba kummerċjali tagħha u tagħti importanza ewlenija lis-sostenibbiltà. Il-KESE huwa tal-fehma, madankollu, li hemm għadd ta’ prerekwiżiti għall-implimentazzjoni ta’ din il-politika.

F’Opinjoni fuq inizjattiva proprja adottata fil-plenarja tal-KESE f’Marzu, ir-rappreżentanti tal-organizzazzjonijiet tas-soċjetà ċivili ġibdu l-attenzjoni għall-fatt li jinħtieġ qafas ġdid għall-ftehimiet ta’ kummerċ ħieles u investiment, sabiex jiġu inklużi l-organizzazzjonijiet tas-soċjetà ċivili u, fl-istess ħin, ikun hemm sensibilizzazzjoni tal-pubbliku.

Stefano Palmieri, membru tal-KESE u relatur għall-Opinjoni, enfasizza li:tinħtieġ metodoloġija ġdida ta’ negozjar, li tistabbilixxi pjan direzzjonali ġdid, li jipprevedi l-involviment attiv tal-organizzazzjonijiet tas-soċjetà ċivili u tal-imsieħba soċjali fl-istadji kollha tan-negozjati.

Il-KESE kkritika d-diversi għodod ta’ negozjar użati mill-UE, u jemmen li wasal iż-żmien li titfassal strateġija ġdida għan-negozjar, bi standards u proċeduri ġodda biex jiġi żgurat l-involviment wiesa’ u kostruttiv tas-soċjetà ċivili u tal-imsieba soċjali. L-ewwel pass lejn dan ikun l-iffirmar ta’ memorandum ta’ qbil bejn il-partijiet fin-negozjati, li jiggarantixxi li ż-żewġ partijiet jikkompletaw l-istadji varji tan-negozjati. It-tieni pass huwa r-riforma fil-fond tal-Gruppi Konsultattivi Domestiċi. L-Opinjoni tissuġġerixxi li kull ftehim iffirmat irid iħaddan protokoll dwar il-funzjonament tal-Gruppi Konsultattivi Domestiċi.

Dan il-proċess ta’ riforma doppja se jibni fuq il-politika kummerċjali l-ġdida tal-UE u jgħin biex jintlaħqu l-għanijiet tagħha. 

Studenti minn skejjel sekondarji mill-Ewropa kollha ppreżentaw tmien proposti konkreti lil Věra Jourová, Viċi President tal-Kummissjoni Ewropea għall-Valuri u t-Trasparenza. L-istudenti kienu qed jieħdu sehem fl-avveniment virtwali għaż-żgħażagħ, L-Ewropa Tiegħek, Leħnek! (YEYS2022). Intitolat “Il-verità dwar il-gideb. Iż-żgħażagħ jisfidaw id-diżinformazzjoni”, l-avveniment ġie ospitat mill-KESE bejn il-31 ta’ Marzu u l-1 ta’ April 2022. 

Wara jumejn ta’ diskussjonijiet u dibattiti virtwali mqanqla, id-99 student ta’ bejn is-16 u t-18-il sena li pparteċipaw fl-avveniment #YEYS2022 ħarġu b’sett ta’ rakkomandazzjonijiet speċifiċi, li ppreżentaw u ddiskutew mal-Viċi President Věra Jourová.

“L-edukazzjoni hija kruċjali biex tiżdied ir-reżiljenza tas-soċjetà tagħna kontra d-diżinformazzjoni u l-aħbarijiet foloz,” qalet is-Sinjura Jourová, hi u tagħlaq l-avveniment L-Ewropa Tiegħek, Leħnek 2022. Il-Viċi President Jourová indirizzat fid-dettall ir-rakkomandazzjonijiet tal-istudenti u ddiskutiethom waħda waħda mal-istudenti. “Id-diżinformazzjoni hija theddida għas-soċjetà tagħna, speċjalment fi żminijiet ta’ gwerra. Jeħtiġilna nindirizzawha filwaqt li nippreżervaw il-libertà tal-espressjoni,” temmet tgħid. 

L-għan tal-avveniment #YEYS2022 se jkun li ssir sensibilizzazzjoni dwar il-perikli tad-diżinformazzjoni u li l-istudenti jiġu mħeġġa jsiru aktar attivi fil-ġlieda kontra l-aħbarijiet foloz. Waqt l-avveniment, iż-żgħażagħ ġew imħarrġa jidentifikaw faċilment id-diżinformazzjoni u jaġixxu kontriha. Huma ħadmu fi gruppi żgħar u f’sessjonijiet ta’ ħidma differenti u żviluppaw kampanja ta’ diżinformazzjoni, li aktar tard kellha tiġi indirizzata permezz ta’ kontrokampanja b’saħħitha ta’ informazzjoni.   

L-istudenti ntlaqgħu minn Christa Schweng, President tal-KESE, li qalet: “L-aħbarijiet foloz qed jinfirxu b’mod kostanti f’tentattiv biex idgħajfu l-valuri Ewropej u d-demokrazija fl-Ewropa. #YEYS2022 huwa opportunità għaż-żgħażagħ biex jiżviluppaw ħsieb kritiku u jitgħallmu dwar għodod għall-ġlieda kontra d-diżinformazzjoni. Iż-żgħażagħ huma kruċjali biex jissawwar futur aħjar għall-Ewropa.”

Cillian Lohan, Viċi President tal-KESE għall-komunikazzjoni, għalaq l-avveniment b’dawn il-kummenti: “Bħala rappreżentanti tas-soċjetà ċivili, nixtiequ niltaqgħu aktar maż-żgħażagħ tagħna, nisimgħu l-approċċi tagħhom li jixhdu mħuħ miftuħa kif ukoll nikkombinaw it-tħassib tagħna mal-immaġinazzjoni u l-viżjoni tagħhom għall-futur.” 

L-Ewropa Tiegħek, Leħnek 2022! – YEYS2022 – intgħażel bħala wieħed mill-avvenimenti ewlenin li qed iseħħu matul is-Sena Ewropea taż-Żgħażagħ 2022.

Aktar dettalji dwar YEYS 2022 jinsabu fil-paġna uffiċjali tal-avveniment. (ks)
 

Il-KESE ċċelebra Jum l-Ewropa 2022 fis-7 ta’ Mejju b’enfasi kemm fuq iż-żgħażagħ kif ukoll fuq l-appoġġ għall-Ukrajna.

Il-KESE ngħaqad ma’ istituzzjonijiet u korpi oħra tal-UE fi Brussell biex ifakkar Jum l-Ewropa b’enfasi fuq it-temi prinċipali ta’ din is-sena, iż-żgħażagħ u l-Ukrajna.

Minkejja li ż-żgħożija kienet it-tema prinċipali f’din is-Sena Ewropea taż-Żgħażagħ, il-KESE b’mod parallel, permezz tal-paġna web speċifika li nħolqot għal dan l-avveniment online, appella b’mod qawwi għall-appoġġ u s-sostenn għall-Ukrajna.

Jum l-Ewropa jiġi ċċelebrat kull sena fi Brussell u fi bliet oħra fl-UE sabiex jitfakkar l-anniversarju tad-dikjarazzjoni storika ta’ Robert Schuman, li tħabbret fid-9 ta’ Mejju 1950. Hija opportunità sabiex inħarsu lejn dak li kisbet l-UE permezz tal-paċi, il-kooperazzjoni u s-solidarjetà u nimxu ’l quddiem lejn dak li nittamaw li niksbu fil-futur. F’dan il-jum, l-UE tistieden liċ-ċittadini tal-Ewropa kollha biex jitgħallmu dwar kif jaħdmu l-istituzzjonijiet tagħha u x’tista’ tagħmel l-UE għalihom.

Skopri aktar hawn (ck)