L-Ewropa Tiegħek, Leħnek 2025 laqqgħet flimkien madwar 90 student u studenta mill-UE, mill-pajjiżi kandidati u mir-Renju Unit. Valeriia Makarenko waslet minn Kharkiv, belt mifnija bil-gwerra, fl-Ukrajna biex tirrappreżenta lil pajjiżha fl-avveniment. Hija qaltilna għaliex il-parteċipazzjoni f’L-Ewropa Tiegħek, Leħnek kienet importanti ħafna għaż-żgħażagħ Ukreni,u qasmet t-tamietha li l-ġenerazzjoni tagħha, imsawra mir-reżiljenza u l-unità matul il-gwerra, twassal lill-Ukrajna lejn futur aħjar.

1) Għaliex taħseb li huwa importanti li ż-żgħażagħ jattendu avvenimenti tal-UE bħal L-Ewropa Tiegħek, Leħnek?

Nemmen li l-attendenza għal avvenimenti tal-UE bħal L-Ewropa Tiegħek, Leħnek hija kruċjali għaż-żgħażagħ għax tagħtihom pjattaforma biex jesprimu l-opinjonijiet tagħhom, jieħdu sehem f’diskussjonijiet sinifikanti u jsawru b’mod attiv il-futur tal-Ewropa. Dawn l-avvenimenti jipprovdu opportunitajiet mitqilhom deheb biex wieħed jitgħallem dwar il-proċessi tat-teħid tad-deċiżjonijiet, jiżviluppa ħiliet ta’ tmexxija u joħloq kuntatti ma’ pari minn pajjiżi differenti. Fir-rigward taż-żgħażagħ Ukreni, il-parteċipazzjoni hija saħansitra aktar sinifikanti peress li tippermettilna naqsmu l-esperjenzi awtentiċi tagħna, nippromovu l-integrazzjoni Ewropea tal-Ukrajna u nrawmu s-solidarjetà fost iż-żgħażagħ Ewropej.

2) Kif taħseb li l-gwerra kellha impatt fuq iż-żgħażagħ fl-Ukrajna?
Bla dubju, il-gwerra fuq skala sħiħa biddlet b’mod sinifikanti l-ħajja taż-żgħażagħ fl-Ukrajna, u affettwat l-edukazzjoni, is-saħħa mentali u s-sens ta’ sigurtà ġenerali tagħhom. Pereżempju, ħafna kellhom jadattaw għall-istudju online jew jirrilokaw, spiss f’kundizzjonijiet instabbli. Madankollu, il-gwerra ġabet magħha wkoll ir-reżiljenza – iż-żgħażagħ Ukreni mhux biss saru simboli ta’ poter u qawwa, iżda saru wkoll aktar involuti fil-volontarjat, fl-attiviżmu u fil-ħidma ta’ bini mill-ġdid, bħal proġetti ta’ ppjanar urban. Minkejja d-diffikultajiet, nibqgħu determinati li nħarsu l-identità tagħna u nikkontribwixxu għall-futur ta’ pajjiżna.

3) X’inhuma t-tamiet tiegħek għall-futur taż-żgħażagħ fl-Ukrajna?
Żgur li l-ġejjieni huwa kwistjoni kkumplikata għal kważi kull persuna żagħżugħa Ukrena. Il-komunità tiegħi u jien nittamaw li ż-żgħażagħ kollha fl-Ukrajna jkollhom aċċess għal edukazzjoni ta’ kwalità, opportunitajiet għal żvilupp professjonali u futur sigur f’Ukrajna b’saħħitha u indipendenti. Nittama wkoll li l-komunità internazzjonali tkompli tappoġġja lill-Ukrajna fil-bini mill-ġdid sabiex iż-żgħażagħ ikunu jistgħu jirnexxu aktar milli sempliċiment jibqgħu ħajjin. Il-qawwa taż-żgħażagħ Ukreni hija tassew kbira, għalhekk huwa ta’ ispirazzjoni li naraw aktar u aktar żgħażagħ jipparteċipaw fi proġetti differenti fl-edukazzjoni, ix-xjenza, ir-restawr tal-infrastruttura u oqsma oħra. L-aktar importanti, nittama li l-ġenerazzjoni tagħna, imsawra mir-reżiljenza u l-unità, twassal lill-Ukrajna għal futur aħjar, aktar innovattiv u demokratiku.

4) Ħsibijietek tal-aħħar dwar l-avveniment?  

Kont tassew ispirata. Anki billi ngħid kelmtejn mal-oħrajn, nisma’ jew nanalizza dak li kienu qed jgħidu parteċipanti oħra, nista’ ngħid li, iva, din hija xena ta’ qawwa liema bħalha, u sempliċiment billi ningħaqdu, nistgħu nuru dak li aħna verament kapaċi nwettqu. Pereżempju, ċerti proġetti li għamilna tassew għenuna nifhmu pajjiżi oħra aħjar. Smajt tant fatti dwar pajjiżi differenti li ma kontx smajt qabel. Ninsab kuntenta ħafna, u kburija li kont hemm. 

Valeriia Makarenko hija studenta ta’ 16-il sena minn Kharkiv, l-Ukrajna. Hija tattendi l-10 grad fil-liċeo ta’ Kharkiv #99.

Il-Kumitat Ekonomiku u Soċjali Ewropew (KESE) ħareġ rakkomandazzjonijiet ewlenin dwar is-Semestru Ewropew 2025 – Pakkett tal-Ħarifa, li jħeġġu investimenti strateġiċi u kooperazzjoni aktar b’saħħitha biex jissaħħu r-reżiljenza u l-kompetittività tal-UE.

Il-KESE ressaq ir-rakkomandazzjonijiet tiegħu f’Opinjoni adottata fis-sessjoni plenarja tiegħu fi Frar, fejn għamel enfasi fuq is-sostenibbiltà, ir-riformi tas-suq tax-xogħol u allinjament aħjar bejn il-politiki nazzjonali u tal-UE, waqt li appella għal involviment akbar tas-soċjetà ċivili.

Il-KESE ddispjaċih għan-nuqqas tal-Istħarriġ Annwali dwar it-Tkabbir Sostenibbli, dokument ta’ politika kruċjali. Huwa enfasizza l-ħtieġa li l-istituzzjonijiet tal-UE jħejju għar-riskji ġeopolitiċi li jaffettwaw il-kummerċ, l-inflazzjoni u t-tkabbir.

Il-KESE ta l-appoġġ tiegħu għall-inizjattiva Boxxla għall-Kompetittività u appella għal investimenti fis-setturi tal-enerġija u diġitali, inkluż Fond Ewropew għall-Investimenti Strateġiċi. Barra minn hekk, appella għal parteċipazzjoni aktar b’saħħitha tas-soċjetà ċivili, rieżami prammatiku tal-Faċilità għall-Irkupru u r-Reżiljenza (RRF), u kooperazzjoni msaħħa tal-Istati Membri biex jittejbu l-politiki ekonomiċi u l-produttività. (tk)

Il-politika ta’ koeżjoni ilha pilastru tal-integrazzjoni Ewropea, u tippromovi l-unità ekonomika, soċjali u ġeografika madwar l-UE. Hekk kif qed jissawwar il-Qafas Finanzjarju Pluriennali (QFP) ta’ wara l-2027, huwa essenzjali li tiġi modernizzata l-politika ta’ koeżjoni biex jiżdiedu l-effiċjenza, is-sostenibbiltà u r-rispons għal sfidi ġodda.

Fl-Opinjoni tiegħu adottata reċentement dwar It-tisħiħ tal-orjentazzjoni lejn ir-riżultati tal-politika ta’ koeżjoni wara l-2027, il-KESE enfasizza l-ħtieġa li jittieħed approċċ orjentat lejn ir-riżultati biex jiġi żgurat li l-politika ta’ koeżjoni tkompli tipprovdi benefiċċji tanġibbli waqt li tnaqqas l-inugwaljanzi u tippromovi l-kompetittività sostenibbli.

“Il-politika ta’ koeżjoni għandha tibqa’ l-istrument ewlieni tal-UE għall-iżvilupp reġjonali. Approċċ orjentat lejn ir-riżultati jiżgura li kull euro li jintefaq jikkontribwixxi għall-benesseri ekonomiku u soċjali,” qal ir-relatur għall-Opinjoni, David Sventek.

Il-QFP 2028+ se jeħtieġ bidla radikali biex jappoġġja l-iżvilupp reġjonali, it-tranżizzjoni ekoloġika u diġitali, u l-kompetittività ekonomika. Bi ħtiġijiet ta’ investiment li jaqbżu EUR 750-800 biljun fis-sena, huwa essenzjali li jkun hemm finanzjament b’saħħtu mill-UE.

Il-KESE jitlob li l-kapaċità fiskali tinżamm għal 1.8% tal-PDG tal-UE u li jiżdied il-finanzjament tal-politika ta’ koeżjoni. Il-prijoritajiet ewlenin jinkludu governanza kondiviża, politiki reġjonali mfassla apposta, finanzjament ibbażat fuq ir-riżultati, u proċessi simplifikati.

Approċċ immexxi mir-riżultati jsaħħaħ l-effiċjenza iżda jeħtieġ implimentazzjoni u sorveljanza aħjar. L-ibbilanċjar tal-kompetittività mal-investiment soċjali, it-tisħiħ tal-appoġġ tekniku, u l-iżgurar tat-trasparenza se jfissru li l-politika ta’ koeżjoni tħalli impatt ikbar, kif ukoll irawmu r-reżiljenza ekonomika u jnaqqsu d-disparitajiet madwar l-Ewropa. (tk)

Iffaċċjata b’theddid għas-sigurtà li qed jiżdied, l-Ewropa teħtieġ b’mod urġenti strateġija unifikata ta’ finanzjament għad-difiża. Bi tweġiba għal talba mill-Presidenza Pollakka tal-UE li jmiss, il-KESE adotta Opinjoni li tappella għal azzjoni kuraġġuża: aktar investiment f’sistemi moderni, kooperazzjoni approfondita man-NATO, u finanzjament akbar fi ħdan il-qafas finanzjarju tal-UE.

Ir-riskji għas-sigurtà tal-Ewropa qed jiżdiedu, u dan jesponi d-dipendenza tagħha fuq fornituri esterni tad-difiża – 78 % tal-EUR 75 biljun minfuqa mill-pajjiżi tal-UE fuq l-akkwist tad-difiża fuq perjodu ta’ sena marru għand fornituri mhux tal-UE. It-tisħiħ tal-bażi industrijali u teknoloġika tad-difiża Ewropea (EDTIB) huwa kruċjali biex titnaqqas din id-dipendenza.

“Il-mekkaniżmi ta’ finanzjament tad-difiża tal-UE jridu jiġu riveduti biex jiġu indirizzati l-isfidi kontemporanji,” jispjega r-relatur tal-Opinjoni tal-KESE dwar Il-Finanzjament għad-Difiża fl-UE, Marcin Nowacki. “Ir-regoli baġitarji eżistenti jillimitaw l-infiq militari, u waqt li inizjattivi bħall-Fond Ewropew għad-Difiża (EDF) u l-Faċilità Ewropea għall-Paċi (EPF) jirrappreżentaw il-progress, dawn għadhom insuffiċjenti biex jindirizzaw l-iskala tat-theddid attwali.”

Il-kooperazzjoni tan-NATO hija essenzjali għall-interoperabbiltà u għal strateġija unifikata. L-akkwist konġunt, is-sħubijiet taċ-ċibersigurtà u tas-sigurtà spazjali, u l-proġett satellitari IRIS2 ser isaħħu r-reżiljenza. Il-finanzjament għad-difiża jrid ikun allinjat mal-prijoritajiet usa’ tal-UE mingħajr ma jikkomprometti l-għanijiet soċjali u ambjentali. L-investiment strateġiku, l-innovazzjoni u l-ippjanar fit-tul huma kruċjali biex jiġu żgurati s-sigurtà u l-awtonomija tal-Ewropa. (tk)

It-turiżmu huwa mutur għall-ekonomija tal-UE u jista’ jsaħħaħ il-kompetittività tal-Ewropa. Wasal iż-żmien li nikkunsidraw mill-ġdid il-mod kif jaħdem it-turiżmu u nimxu lil hinn mis-sostenibbiltà lejn turiżmu riġenerattiv – fejn id-destinazzjonijiet mhux biss jissopravivu iżda jirnexxu.

Il-Kumitat Ekonomiku u Soċjali Ewropew (KESE) qed iħeġġeġ lill-Unjoni Ewropea tittrasforma s-settur tat-turiżmu tagħha, u tenfasizza s-sostenibbiltà u r-riġenerazzjoni biex jiġu żgurati benefiċċji ekonomiċi u ambjentali fit-tul.

Hekk kif it-turiżmu jibqa’ pilastru importanti għall-ekonomija tal-UE, b’mod partikolari fir-reġjuni li jiddependu ħafna mill-industrija, il-KESE qiegħed jappoġġja tranżizzjoni aċċellerata lejn it-turiżmu sostenibbli u ċaqliqa lejn strateġiji għal turiżmu riġenerattiv, kif deskritt fl-Opinjoni tiegħu dwar It-turiżmu fl-UE: is-sostenibbiltà bħala xprun għall-kompetittività fit-tul.

“Irridu niżguraw li t-turiżmu jkollu rwol fir-rilanċ tal-kompetittività Ewropea. Dan huwa essenzjali, peress li t-turiżmu huwa parti tant importanti mill-PDG ta’ ħafna Stati Membri u reġjuni, kif ukoll tal-ktajjen tal-valur tagħhom,” qalet ir-relatur għall-Opinjoni, Isabel Yglesias.

Is-Sinjura Yglesias qalet li l-Opinjoni bniet fuq id-Dikjarazzjoni ta’ Palma, adottata matul il-Presidenza Spanjola tal-Kunsill fit-tieni nofs tal-2023, li kienet iġġenerat kunsens wiesa’ dwar kif jiġi żgurat li s-sostenibbiltà tkun fil-qalba tal-futur tat-turiżmu.

Biex jinkiseb dan, l-istituzzjonijiet Ewropej u l-gvernijiet nazzjonali, reġjonali u lokali jridu jappoġġjaw b’mod attiv is-settur fit-tranżizzjonijiet tiegħu, u fl-istess ħin jiġi żgurat djalogu kontinwu mal-partijiet ikkonċernati rilevanti kollha u jissaħħaħ id-djalogu soċjali.

Filwaqt li l-isforzi ta’ sostenibbiltà fit-turiżmu għamlu ħafna progress, iż-żieda fl-ivvjaġġar wara l-pandemija poġġiet pressjoni fuq ħafna destinazzjonijiet popolari. Din iż-żieda qed tagħmilha aktar diffiċli għar-reġjuni biex jibbilanċjaw it-tkabbir ekonomiku mal-iżvilupp sostenibbli, waqt li jiffaċċjaw in-nuqqas ta’ persunal u spariġġ bejn l-impjiegi disponibbli u l-ħiliet tal-ħaddiema.

Huwa għalhekk li l-KESE qed jappella wkoll għal bidla lejn turiżmu riġenerattiv, u biex dan jiġi inkluż fl-Istrateġija Ewropea għal Turiżmu Sostenibbli, li l-Kummissjoni Ewropea ser tippreżenta fix-xhur li ġejjin.

Għall-kuntrarju tat-turiżmu sostenibbli tradizzjonali, li jiffoka fuq it-tnaqqis tal-ħsara ambjentali, it-turiżmu riġenerattiv għandu l-għan li jirrestawra u jsaħħaħ il-kapital naturali, soċjali u ekonomiku. Dan l-approċċ li jħares ’il quddiem jintegra l-prinċipji tal-ekonomija ċirkolari u jfittex li jħalli impatt pożittiv dejjiemi fuq id-destinazzjonijiet u l-komunitajiet lokali. (ll)

Il-bdiewa Ewropej jiffaċċjaw kriżijiet dejjem akbar, minn temp estrem sa instabbiltà tas-suq u kompetizzjoni inġusta. Il-Kumitat Ekonomiku u Soċjali Ewropew (KESE) iwissi li l-politiki attwali tal-UE jonqsu milli jipproteġu lill-bdiewa u jappella għal riformi urġenti biex jiġi żgurat id-dħul, tissaħħaħ is-setgħa tan-negozjar u tiġi żgurata agrikoltura sostenibbli.

F’Opinjoni mitluba mill-Presidenza Pollakka tal-UE, il-KESE appella għal sistema agrikola aktar reżiljenti, li tqiegħed lill-bdiewa fil-qalba tagħha.

“Il-biedja hija professjoni nobbli b’żewġ objettivi ewlenin: il-produzzjoni ta’ ikel sikur tal-ogħla kwalità għall-konsum mill-bniedem u ż-żamma u t-titjib tal-ambjent. Kulma nitolbu għal dan huwa paga onesta għal jum ta’ xogħol ġenwin u rispett u prezz ġust għall-ikel li nipprovdu,” qal Joe Healy, wieħed mit-tliet relaturi tal-Opinjoni.

Skont il-KESE, il-Politika Agrikola Komuni (PAK) mhijiex mgħammra biżżejjed biex tindirizza l-isfidi tal-lum. L-għodod finanzjarji li tirrakkomanda biex jiġu appoġġjati l-bdiewa jinkludu assigurazzjoni pubblika kontra d-diżastri naturali, għajnuna kontroċiklika u pagamenti diretti. Il-fondi mutwi, li diġà jintużaw f’ċerti pajjiżi tal-UE, jistgħu jipprovdu xibka ta’ sikurezza addizzjonali, iffinanzjata b’mod kollettiv mill-bdiewa, l-industrija, il-gvernijiet reġjonali u l-UE.

Peress li hija ppjanata reviżjoni tal-PAK wara l-2027, il-KESE rrakkomanda li l-baġit tagħha jerġa’ lura għal mill-inqas 0,5 % tal-PDG tal-UE. Huma meħtieġa regolamenti kummerċjali aktar stretti biex jiġi żgurat li l-prodotti importati jissodisfaw l-istandards ambjentali u tax-xogħol tal-UE.

Tħassib ewlieni ieħor huwa l-bejgħ bi prezzijiet orħos mill-kost, prattika li tpoġġi lill-bdiewa taħt pressjoni finanzjarja estrema. Il-KESE qed iħeġġeġ lil dawk li jfasslu l-politika tal-UE biex, abbażi tal-liġijiet dwar il-katina alimentari ta’ Spanja bħala mudell, jikkunsidraw bis-serjetà l-projbizzjoni ta’ xiri bi prezzijiet orħos mill-kost biex jiġi evitat li bejjiegħa bl-imnut kbar jimbuttaw lill-bdiewa barra mis-suq.

Sabiex jittejbu t-trasparenza u s-saħħa fis-suq tal-bdiewa, il-KESE ppropona ċentru diġitali tal-UE għall-monitoraġġ tal-prezzijiet, l-ispejjeż u l-profitti. Huwa rrakkomanda wkoll negozjati kollettivi dwar il-prezzijiet u aktar appoġġ għall-kooperattivi u l-organizzazzjonijiet tal-produtturi. Hemm bżonn ta’ aktar indipendenza ekonomika u kompetittività fis-settur tal-agrikoltura tal-UE.

Għalkemm l-għanijiet klimatiċi huma essenzjali, il-bdiewa ma jistgħux iġarrbu l-kostijiet waħedhom. Fond għas-sostenibbiltà jista’ jgħinhom fit-tranżizzjoni lejn prattiki aktar ekoloġiċi. L-Opinjoni wissiet dwar ir-riskju ta’ rilokazzjoni tal-emissjonijiet tal-karbonju, peress li r-regoli stretti tal-UE jpoġġu lill-bdiewa lokali fi żvantaġġ meta mqabbla ma’ kompetituri mhux tal-UE.

Il-KESE enfasizza l-importanza tal-investiment fl-iżvilupp rurali, l-innovazzjoni u regoli tal-PAK aktar sempliċi. Peress li l-bdiewa jinsabu taħt pressjoni dejjem akbar, l-urġenza hija ċara: il-mexxejja tal-UE jridu jaġixxu qabel ma jisparixxu aktar azjendi agrikoli. (ks)

L-UE tinsab f’salib it-toroq kritiku f’dak li jirrigwarda l-iżvilupp tal-IA. Għalkemm huwa minnu li l-kumpaniji fl-Istati Uniti jiddominaw is-suq tal-intelliġenza artifiċjali ġenerattiva (IA ġenerattiva) – li jħaddan 80% tal-investiment privat globali – iċ-Ċina qed tavvanza b’mod rapidu. Biex jidentifika dak li huwa meħtieġ biex jiġi żgurat li l-Ewropa tibqa’ kompetittiva, il-Kumitat Ekonomiku u Soċjali Ewropew (KESE) ippubblika studju ġdid f’kollaborazzjoni maċ-Ċentru għall-Istudji Politiċi Ewropej (CEPS).

L-istudju, li tħejja taħt il-kappa tas-Sezzjoni għas-Suq Uniku, il-Produzzjoni u l-Konsum (INT) tal-KESE, u li ġie diskuss regolarment fl-Osservatorju tas-Suq Uniku Diġitali tal-KESE, jeżamina l-opportunitajiet, l-isfidi u l-miżuri ta’ politika ewlenin meħtieġa biex jissaħħaħ ix-xenarju tal-IA fl-Ewropa.

Rakkomandazzjonijiet ewlenin għall-UE:

• Tingħata spinta lill-investiment fl-IA u l-potenza komputazzjonali – L-Ewropa trid iżżid l-investiment fl-infrastruttura tal-IA biex trawwem l-innovazzjoni.
• Issir enfasi fuq tliet setturi b’potenzjal għoli – L-IA tista’ tixpruna t-tkabbir fl-industrija tal-karozzi, l-enerġija nadifa u l-edukazzjoni.
• Il-promozzjoni tal-IA b’sors miftuħ – L-inkoraġġiment ta’ mudelli tal-IA miftuħa jtejjeb l-aċċessibbiltà u l-kompetizzjoni.
• Integrazzjoni aħjar tal-isforzi tar-R&Ż fl-UE.

It-tisħiħ tal-pożizzjoni tas-soċjetà ċivili fil-governanza tal-IA
L-istudju jenfasizza l-importanza tal-organizzazzjonijiet tas-soċjetà ċivili fit-tfassil tal-politiki u l-governanza tal-IA. Biex jissaħħu l-inklużività u l-adozzjoni etika tal-IA, ir-rapport jirrakkomanda:

• Programmi ta’ litteriżmu fl-IA – Inizjattivi ta’ taħriġ u djalogu soċjali biex tissaħħaħ il-pożizzjoni tal-ħaddiema u l-pubbliku.
• Approċċ intiż li jħaddan l-aspett soċjali – L-iżgurar li l-iżvilupp tal-IA jkun iċċentrat fuq il-bniedem u allinjat mal-ħtiġijiet tas-soċjetà.
• Żieda fil-finanzjament għall-organizzazzjonijiet tas-soċjetà ċivili – Appoġġ għal organizzazzjonijiet mingħajr skop ta’ qligħ li jnaqqsu d-distakk bejn it-teknoloġija tal-IA u l-fehim pubbliku.
• Adozzjoni etika tal-IA – Prijoritizzazzjoni ta’ sistemi tal-IA affidabbli li jallinjaw mal-valuri Ewropej.

L-isfruttar tal-potenzjal tal-KESE fil-politika dwar l-IA
Il-KESE jinsab f’pożizzjoni tajba biex jiffaċilita l-involviment strutturat tal-organizzazzjonijiet tas-soċjetà ċivili fil-politika dwar l-IA. L-istudju jirrakkomanda l-promozzjoni tal-IA b’sors miftuħ u l-promozzjoni tal-innovazzjoni etika permezz tal-akkwist pubbliku u l-iskemi ta’ finanzjament, u li l-KESE jservi bħala ċentru ċentrali biex jikkollabora mal-organizzazzjonijiet tas-soċjetà ċivili u l-komunitajiet b’sors miftuħ u jissensibilizza lill-pubbliku dwar l-impatt tal-IA fuq is-soċjetà.

L-istudju jintroduċi wkoll glossarju unifikat tal-IA biex jiġi stabbilit lingwaġġ komuni, li jiżgura komunikazzjoni effettiva fost dawk li jfasslu l-politika, l-iżviluppaturi u l-utenti – li huwa kruċjali għall-iżvilupp, il-governanza u l-użu responsabbli tal-IA fis-setturi kollha.

Dan l-istudju se jiġi kondiviż ma’ istituzzjonijiet ewlenin tal-UE u huwa mistenni li jikkontribwixxi għall-politiki futuri dwar l-IA. Aqra r-rapport kollu hawnhekk. (vk)

Mill-Grupp tal-Organizzazzjonijiet tas-Soċjetà Ċivili tal-KESE

Il-KESE għandu jkun involut mill-bidu nett fl-inizjattivi tal-Kummissjoni Ewropea biex jissaħħaħ l-involviment mas-soċjetà ċivili. Skont il-Grupp tal-Organizzazzjonijiet tas-Soċjetà Ċivili tal-KESE, l-istudju li jmiss tal-KESE dwar L-immappjar tal-prattiki tad-djalogu ċivili fl-Istituzzjonijiet tal-UE jista’ jipprovdi kontribut siewi.

Wara l-bidu taċ-ċiklu politiku l-ġdid tal-UE, u t-tħabbir ta’ Strateġija tal-UE għall-appoġġ, il-protezzjoni u t-tisħiħ tas-soċjetà ċivili għat-tielet kwart tal-2025 fil-Programm ta’ Ħidma tal-Kummissjoni, il-Grupp tal-Organizzazzjonijiet tas-Soċjetà Ċivili organizza konferenza biex jenfasizza l-azzjonijiet ewlenin meħtieġa għall-mandat 2024-2029. Għall-avveniment fit-3 ta’ Marzu attendew ċittadini u madwar 100 rappreżentant minn organizzazzjonijiet tas-soċjetà ċivili nazzjonali u Ewropej.

Séamus Boland, il-President tal-Grupp tal-Organizzazzjonijiet tas-Soċjetà Ċivili, qal li l-organizzazzjonijiet tas-soċjetà ċivili għandhom rwol x’jaqdu biex jiżguraw li t-tfassil tal-politika jkun infurmat u li jwieġeb għall-ħtiġijiet taċ-ċittadini. Huwa tenna t-talba tal-Grupp u tal-Kumitat biex il-KESE jkun involut fil-Pjattaforma tas-Soċjetà Ċivili ppjanata mill-Kummissjoni.

“Il-KESE, bl-esperjenza tiegħu u l-pjattaforma li jipprovdi, jeħtieġlu jkun involut mill-bidu fl-inizjattivi tal-Kummissjoni Ewropea biex jiżdied l-involviment mas-soċjetà ċivili. Il-KESE jeħtieġlu jieħu sehem fil-governanza u jkun parti ewlenija mill-inizjattiva dwar il-ħolqien ta’ Pjattaforma tas-Soċjetà Ċivili,” sostna s-Sur Boland.

Huwa argumenta li djalogu ċivili strutturat, regolari, trasparenti u inklużiv għandu jinbena fuq strutturi eżistenti u jlaqqa’ flimkien il-partijiet ikkonċernati rilevanti kollha. Konsegwentement, l-istituzzjonijiet Ewropej għandhom joħolqu grupp ta’ ħidma dwar id-djalogu ċivili, iffaċilitat mill-KESE.

“Grupp ta’ ħidma dwar id-djalogu ċivili jista’ joħloq pjan dettaljat għal ambjent aktar favorevoli għall-organizzazzjonijiet tas-soċjetà ċivili fil-proċess tat-tfassil tal-politika,” qal is-Sur Boland.  Dan jista’ jkun l-ewwel pass lejn djalogu ċivili aktar strutturat u jindirizza l-mistoqsijiet li ġejjin: min jiġi kkonsultat, dwar liema suġġetti, fuq liema skedi ta’ żmien, b’liema eżiti?

Barra minn hekk, il-grupp ta’ ħidma propost jista’ jibbaża fuq l-istudju li jmiss tal-KESE dwar il-prattiki ta’ djalogu eżistenti, intitolat L-immappjar tal-prattiki tad-djalogu ċivili fl-Istituzzjonijiet tal-UE.

L-istudju ġie kkummissjonat mill-KESE fuq talba tal-Grupp tal-Organizzazzjonijiet tas-Soċjetà Ċivili. Ir-riżultati mistennija jkunu disponibbli minn Lulju 2025. L-istudju jwettaq immappjar komprensiv tal-prattiki tad-djalogu ċivili fi ħdan l-istituzzjonijiet tal-UE: liema proċessi ta’ involviment tal-organizzazzjonijiet tas-soċjetà ċivili qed jiġu organizzati bħalissa u x’metodoloġija qed tintuża? L-għarfien dwar il-prattiki eżistenti għandu jinforma u jappoġġja l-ħidma lejn djalogu ċivili aktar strutturat fiċ-ċiklu leġiżlattiv il-ġdid. Is-sejbiet preliminari tal-istudju kienu diġà ppreżentati fil-konferenza minn Berta Mizsei miċ-Ċentru għall-Istudji Politiċi Ewropej (CEPS).

Il-Konferenza enfasizzat ukoll li s-saħħa finanzjarja tal-organizzazzjonijiet tas-soċjetà ċivili hija prekundizzjoni għad-djalogu u l-konnessjoni ta’ dawk li jfasslu l-politika mal-ħtiġijiet taċ-ċittadini. L-istabbiltà finanzjarja u l-indipendenza tagħhom iridu jiġu ggarantiti.

Il-konklużjonijiet u r-rakkomandazzjonijiet li ħarġu mill-konferenza jinsabu disponibbli fuq is-sit web tal-KESE.

Mill-Grupp tal-Ħaddiema tal-KESE

L-infiq fid-difiża u fl-istat soċjali għandu jimxi id f’id — m’għandniex nissagrifikaw l-istat soċjali biex nagħtu spinta lill-infiq fid-difiża. Stat soċjali b’saħħtu jibqa’ għodda ewlenija biex ma jħallix l-aspirazzjonijiet tal-partiti tal-lemin estrem li jirreplikaw l-awtokraziji tat-tip tal-Kremlin fl-UE.

Hekk kif bdiet ir-raba’ sena tal-gwerra fl-Ukrajna, ħafna vuċijiet qed jitolbu żieda fl-infiq fid-difiża, b’mod partikolari b’segwitu għall-bidliet politiċi fl-Istati Uniti. Il-protezzjoni tal-pajjiżi Ewropej ma tidhirx li għadha garantita. Id-diskussjonijiet dwar kwistjonijiet militari fil-livell tal-UE, iżda wkoll dwar iż-żieda fid-dejn, m’għadhomx tabù.

Madankollu, xi wħud minn dawn l-ilħna jiddeskrivu s-sitwazzjoni bħala kompromess ta’ newtralità baġitarja mal-istat soċjali, daqslikieku l-qawwa militari tal-Istati Uniti hija dovuta għan-nuqqas ta’ protezzjoni soċjali adegwata tal-pajjiż, jew daqslikieku l-armati tagħna jinsabu f’pożizzjoni dgħajfa minħabba l-pensjonijiet u s-sigurtà soċjali.

Mill-Grupp tal-Ħaddiema, irridu nenfasizzaw żewġ kwistjonijiet:

• L-UE b’mod kumplessiv għandha t-tieni l-akbar nefqa militari fid-dinja. Waqt li f’ċerti każijiet tista’ tkun meħtieġa nefqa komuni jew addizzjonali, dak li huwa verament meħtieġ huma l-koordinazzjoni u l-proġetti konġunti li jiżguraw l-awtonomija strateġika. Għandna bżonn niddefendu lilna nfusna, mhux nikkompetu globalment mal-Istati Uniti.
• Stat soċjali li jiffunzjona tajjeb, flimkien ma’ sforzi biex jiġu miġġielda l-faqar u l-inugwaljanza, huwa għodda ewlenija biex il-lemin estrem ma jitħalliex jieħu l-kontroll f’ħafna Stati Membri. Dawn il-partiti tal-lemin estrem, li qed jiżdiedu fil-popolarità tagħhom, ftit li xejn għandhom inklinazzjoni għad-demokrazija, huma ostili b’mod miftuħ għal ħafna mill-valuri tagħna, jaspiraw li jirreplikaw l-awtokrazija tal-Kremlin fl-Istati Membri tagħna u, jekk ikunu fil-poter, se jiżguraw li ma tkun tista’ tiżviluppa l-ebda politika ta’ difiża kkoordinata.

Għalhekk, l-Istati Membri jeħtiġilhom iqisu li d-difiża u l-investiment soċjali jsaħħu lil xulxin b’mod reċiproku, u jippermettu wieħed lill-ieħor.

Il-Kumitat Ekonomiku u Soċjali Ewropew (KESE) organizza Forum ta’ Livell Għoli dwar id-Drittijiet tan-Nisa, li laqqa’ flimkien ilħna ewlenin biex jiġu indirizzati kwistjonijiet urġenti dwar id-drittijiet tan-nisa u jiddeskrivi l-prijoritajiet ewlenin qabel is-sessjoni li jmiss tal-Kummissjoni tan-Nazzjonijiet Uniti dwar l-Istatus tan-Nisa.

Il-messaġġ tal-Forum ta’ Livell Għoli tal-KESE dwar id-Drittijiet tan-Nisa kien ċar: progress sar, iżda dan mhuwiex biżżejjed. Minkejja li l-UE ħadet passi biex tipproteġi lin-nisa u l-bniet, il-forom strutturali ta’ inugwaljanza, l-istereotipi tal-ġeneri u r-rigressi kontra d-drittijiet tan-nisa għadhom jheddu l-kisbiet li nkisbu b’diffikultà fl-Ewropa. Sakemm jippersistu l-ostakli strutturali, il-parteċipazzjoni sħiħa tan-nisa fis-soċjetà se tkun limitata.

Il-Forum ta’ livell għoli, li sar fis-26 ta’ Frar matul is-sessjoni plenarja tal-KESE, laqqa’ flimkien il-President tal-Grupp Ad hoc tal-KESE dwar l-Ugwaljanza, Sif Holst, il-President tal-KESE Oliver Röpke, u l-Kummissarju Ewropew għall-Ugwaljanza kif ukoll għall-Preparatezza u għall-Ġestjoni tal-Kriżijiet, Hadja Lahbib, kif ukoll Carlien Scheele (Direttur tal-Istitut Ewropew għall-Ugwaljanza bejn il-Ġeneri), Florence Raes (Direttur tal-uffiċċju fi Brussell għan-Nisa tan-NU), Ayşe Yürekli (Rappreżentant tal-UE f’KAGIDER – Imprendituri Nisa tat-Turkija), Mary Collins (Segretarju Ġenerali tal-Lobby Ewropew tan-Nisa) u Cianán Russell (Uffiċjal Għoli tal-Politika f’ILGA Europe).

Il-Forum kien fih żewġ panels dinamiċi li jindirizzaw sfidi urġenti għall-ugwaljanza bejn il-ġeneri, kull wieħed marbut ma’ Opinjonijiet ewlenin tal-KESE adottati matul is-sessjoni. L-esperti, l-avukati u dawk li jfasslu l-politika ngħaqdu flimkien biex jaqsmu l-għarfien, jipproponu soluzzjonijiet u jsaħħu l-impenji biex javvanzaw id-drittijiet tan-nisa fl-Ewropa u lil hinn minnha.

L-ewwel panel iffoka fuq id-69 sessjoni li jmiss tal-Kummissjoni tan-NU dwar l-Istatus tan-Nisa (UNCSW69) waqt li t-tieni panel iffoka fuq il-vjolenza kontra n-nisa u l-bniet bħala kwistjoni tad-drittijiet tal-bniedem. Ġew adottati wkoll fil-plenarja wara l-forum żewġ Opinjonijiet relatati: Il-kontribut tal-KESE għall-prijoritajiet tal-UE fid-69 sessjoni tal-Kummissjoni tan-NU dwar l-Istatus tan-Nisa u Il-vjolenza kontra n-nisa bħala kwistjoni tad-drittijiet tal-bniedem: is-sitwazzjoni attwali tal-miżuri fl-UE kollha. (lm)