KESE info

Il-Kumitat Ekonomiku u Soċjali Ewropew (KESE) stieden lill-Parlament Ewropew (PE), lill-Kunsill tal-UE u lill-Istati Membri biex jemendaw b’mod urġenti l-Att Elettorali tal-1976 b’mod li jiggarantixxi li ċ-ċittadini kollha tal-UE b’diżabilità jkollhom dritt ġenwin li jivvutaw fl-elezzjonijiet tal-PE fl-2024.

Fl-Opinjoni tiegħu dwar Il-ħtieġa li jiġu garantiti drittijiet reali ta’ persuni b’diżabilità biex jivvutaw fl-elezzjonijiet tal-Parlament Ewropew, adottata fit-2 ta’ Diċembru, il-KESE qal li kien qed jitlob li fit-test tal-Att jingħataw kjarifiki dwar il-prinċipji tal-universalità, is-segretezza u l-kapaċità diretta.

Dan itemm id-diskriminazzjoni kontra l-votanti b’diżabilità minħabba r-regoli jew l-arranġamenti attwali fi Stati Membri differenti, li jvarjaw b’mod konsiderevoli minn pajjiż għal ieħor. Dan jista’ wkoll ineħħi l-ostakli legali jew tekniċi attwalment fis-seħħ fl-Ewropa kollha, li qed iċaħħdu miljuni mid-drittijiet tal-vot tagħhom.

L-Opinjoni hija segwitu għar-rapport ta’ informazzjoni tal-KESE li sab li, minħabba dawn l-ostakli, l-ebda pajjiż tal-UE ma seta’ jiggarantixxi li l-elezzjonijiet ikunu kompletament aċċessibbli għal kulħadd.

Is-sejbiet tar-rapport, ippubblikati xahrejn qabel l-elezzjonijiet tal-PE tal-2019, ġew ikkonfermati aktar tard mir-rapporti elettorali mill-midja u l-organizzazzjonijiet tas-soċjetà ċivili.

“Il-KESE jqis li tali diskriminazzjoni hija inaċċettabbli u tmur kontra l-valuri fundamentali tal-UE, it-Trattati u l-atti legali u politiċi internazzjonali ewlenin,” qal Krzysztof Pater, l-awtur tar-rapport u tal-Opinjoni.

“Dak li qed nitolbu għandu x’jaqsam mal-prinċipju tad-drittijiet ugwali għal kulħadd. Kif jista’ jkun li fis-seklu 21, miljuni ta’ ċittadini tal-UE b’diżabilità ma jistgħux igawdu d-dritt tagħhom li jivvutaw, u dawk li jieħdu d-deċiżjonijiet kważi ma jagħmlu xejn biex ibiddlu dan? Din hija kwistjoni kruċjali għad-demokrazija tal-UE. Fuq kollox, din hija kwistjoni tad-dinjità umana”, enfasizza s-Sur Pater.

Fil-fehma tal-KESE, il-prattiki eżistenti li jiddiskriminaw kontra ċ-ċittadini tal-UE b’diżabilità jistgħu jitneħħew malajr billi jiġi emendat l-Att Elettorali b’mod li jdaħħal obbligu għall-pajjiżi tal-UE biex jimplimentaw standards li jiggarantixxu li dawn il-persuni jkollhom dritt ġenwin li jivvutaw.

Dawn l-istandards jinkludu ż-żieda ta’stqarrija li tistipula li l-ebda ċittadin tal-UE ma jista’ jiġi mċaħħad mid-dritt tiegħu li jivvota fl-elezzjonijiet tal-PE minħabba kundizzjoni ta’ diżabilità jew saħħa abbażi ta’ regolamenti nazzjonali.

L-istandards meħtieġa biex jiġu ċċarati l-prinċipji ta’ kapaċità diretta u segretezza se jiżguraw li l-persuni kollha b’diżabilità, irrispettivament mit-tip ta’ diżabilità tagħhom, ikunu jistgħu jivvutaw mingħajr assistenza u b’mod sigriet. (ll)

Dikjarazzjoni konġunta minn Christa Schweng, President tal-Kumitat Ekonomiku u Soċjali Ewropew (KESE) u Jack O’Connor, President tal-Grupp ta’ Segwitu tal-KESE dwar il-Brexit

Nifirħu lin-negozjaturi tal-Unjoni Ewropea u tar-Renju Unit talli kkonkludew b’suċċess negozjati mill-aktar kumplessi u diffiċli biex jintlaħaq Ftehim Kummerċjali li huwa ta’ importanza vitali għaċ-ċittadini tar-Renju Unit u tal-Ewropa kollha kemm hi.

Il-KESE jinsab lest li jibni r-rabtiet kollha possibbli mas-Soċjetà Ċivili fir-Renju Unit.

L-ewwel nett, huwa ta’ sodisfazzjon kbir li fl-aħħar, wara negozjati twal u kumplessi, l-UE u l-gvern tar-Renju Unit irnexxielhom jilħqu qbil dwar il-ftehim ta’ sħubija.

Wara d-deċiżjoni tar-Renju Unit li joħroġ mill-Unjoni Ewropea fil-31 ta’ Jannar 2020, wara 47 sena ta’ sħubija mal-UE, kien assolutament vitali li nkunu nafu l-mod li bih se jkunu rregolati r-relazzjonijiet futuri bejn iż-żewġ imsieħba.

Il-ftehim ta’ sħubija se jkun il-pedament li fuqu se jinbnew ir-relazzjonijiet futuri bejn l-UE u r-Renju Unit.

F’isem il-KESE, nifirħu bil-qalb lis-Sur Michel Barnier, il-Kap negozjatur tal-UE u t-tim tiegħu li wrew professjonaliżmu, reżiljenza u esperjenza indiskutibbli, filwaqt li ħadmu bla heda biex iżommu front Ewropew magħqud.

Naturalment, irridu nifirħu wkoll lid-delegazzjoni tar-Renju Unit li ħadmet b’suċċess biex tissiġilla l-ftehim. Aħna għalkollox konxji li dan ma kien faċli xejn.

Mill-1 ta’ Jannar 2021, il-kumpaniji, il-ħaddiema u ċ-ċittadini fuq iż-żewġ naħat tal-Kanal se jkunu jistgħu jorganizzaw lilhom infushom. Il-ftehim ta’ sħubija jġib iċ-ċertezza, l-element kruċjali biex il-kumpaniji jippjanaw l-investimenti tagħhom, biex il-ħaddiema jiddeċiedu fejn se jaħdmu u biex iċ-ċittadini jiddeċiedu fejn iridu jgħixu.

Bħala l-KESE, segwejna n-negozjati tal-Brexit mill-qrib, inkluż permezz tal-grupp ta’ ħidma ad hoc li stabbilejna.

Ir-rwol tagħna se jiffoka fuq li nfittxu li nottimizzaw il-kooperazzjoni mal-istituzzjonijiet Ewropej l-oħrajn u mal-partijiet ikkonċernati ewlenin, u nibnu r-rabtiet kollha possibbli mas-Soċjetà Ċivili fir-Renju Unit. Aħna nemmnu, aktar minn qatt qabel, li din għandha tkun il-missjoni tal-KESE għas-snin li ġejjin.

Christa Schweng

President tal-Kumitat Ekonomiku u Soċjali Ewropew (KESE)

Jack O'Connor

President tal-Grupp ta’ Segwitu tal-Brexit tal-KESE

Il-KESE jilqa’ l-adozzjoni mill-Kapijiet ta’ Stat u ta’ Gvern tal-UE tal-Qafas Finanzjarju Pluriennali (QFP) 2021-2027 fl-10 ta’ Diċembru 2020. Il-kompromess dwar il-baġit Ewropew u l-fond ta’ rkupru flimkien ma’ mekkaniżmu tal-istat tad-dritt iqis il-kontribut proattiv u komprensiv tal-KESE favur QFP aktar ambizzjuż għall-UE.

Bl-appoġġ tal-irkupru Ewropew u billi jgħin fil-bini ta’ Unjoni Ewropea aktar b’saħħitha, ekoloġika u diġitali, il-Kumitat qed ikompli jaqdi rwol uniku fit-tfassil tal-politika tal-UE. Il-kontribut tiegħu bħala leħen l-organizzazzjonijiet tas-soċjetà ċivili għal darb’ oħra wera li kien ta’ importanza, bħalma rajna bl-Opinjonijiet numerużi tal-KESE dwar il-baġit fit-tul tal-UE li ġew meqjusa u adottati mill-istituzzjonijiet l-oħrajn tal-UE.

“Huwa d-dmir tagħna li nikkomunikaw il-benefiċċji li ż-żieda fil-baġit 2021-2027 se jkollha għas-soċjetà ċivili. Ninnota b’sodisfazzjon li l-kontribut tal-KESE għamel differenza. Il-Ftehim dwar il-Qafas Finanzjarju Pluriennali l-ġdid u dwar il-Faċilità l-ġdida għall-Irkupru u r-Reżiljenza huwa f’waqtu. Nittamaw li dan se jkun il-punt tat-tluq għal irkupru rapidu għall-Ewropa u l-ewwel pedament ta’ Unjoni iktar b’saħħitha u ekoloġika u li r-riżultat aħħari se jkun konformi mal-ambizzjonijiet u l-ħtiġijiet tal-UE,” qal Cillian Lohan, Viċi President tal-KESE għall-komunikazzjoni.

AqraPresident tal-KESE Christa Schweng Stqarrija dwar il-Qafas Finanzjarju Pluriennali 2021-2027 u l-Fond għall-Irkupru.

Għal informazzjoni dwar l-Opinjonijiet tal-KESE li huma riflessi fil-QFP, jekk jogħġbok ara din l-appendiċi.(mp)

L-aħħar inizjattivi tal-Kummissjoni Ewropea biex jiġu rregolati s-servizzi u s-swieq diġitali se jiżguraw li l-fornituri jieħdu r-responsabbiltà għas-servizzi li joffru u li l-ġganti diġitali ma jimponux ir-regoli tagħhom stess fuq is-swieq tal-Ewropa, qalet il-Viċi President Eżekuttiv tal-Kummissjoni, Margrethe Vestager, waqt il-plenarja ta’ Diċembru tal-KESE.

L-Att dwar is-Servizzi Diġitali u l-Att dwar is-Swieq Diġitali tal-Kummissjoni Ewropea, ippubblikati fil-15 ta’ Diċembru, se jgħinu lid-demokrazija Ewropea tilħaq mal-aħħar għoxrin sena ta’ żvilupp diġitali, u se jiddefinixxu kif għandhom jiġu pprovduti s-servizzi diġitali u kif għandhom jaħdmu s-swieq diġitali, qalet is-Sinjura Vestager lill-plenarja tal-KESE matul dibattitu dwar Ewropa lesta għall-era diġitali.

Il-President tal-KESE, Christa Schweng, enfasizzat li t-tranżizzjoni diġitali saret importanti iktar minn qatt qabel bħala waħda miż-żewġ komponenti fundamentali tal-irkupru tal-Ewropa mill-kriżi tal-COVID-19, flimkien mat-tranżizzjoni ekoloġika.

Il-President tal-KESE kkwotat studju reċenti li skontu, sal-2030, il-kontribut addizzjonali kumulattiv tal-PDG tat-teknoloġiji diġitali ġodda jista’ jammonta għal EUR 2,2 triljun fl-UE – l-ekwivalenti tal-PDG ikkombinat ta’ Spanja u tan-Netherlands għall-2019.

Is-Sinjura Schweng qalet li neħtieġu approċċ Ewropew għad-diġitalizzazzjoni, iċċentrat fuq il-bniedem. Mingħajr il-fiduċja taċ-ċittadini u tan-negozji mhux se nkunu nistgħu naħtfu l-opportunitajiet offruti mid-diġitalizzazzjoni. Għal dak il-għan, huwa importanti li jinbena Spazju Ewropew tad-Data fejn id-data tagħna tkun protetta u jiġu żgurati l-privatezza u l-awtodeterminazzjoni. Neħtieġu wkoll li nibnu sovranità teknoloġika tal-UE filwaqt li nżommu l-kummerċ diġitali globali.

Is-Sinjura Vestager ippreżentat l-elementi prinċipali tal-istrateġija diġitali tal-Kummissjoni, strateġija li tagħti attenzjoni partikolari lit-tisħiħ tal-investiment privat u li tistrieħ fuq l-inizjattivi ewlenin (relatati mal-ħiliet diġitali, is-servizzi pubbliċi diġitali u ċ-cibersigurtà) u fuq il-bini u l-użu tal-kapaċitajiet diġitali.

Is-Sinjura Vestager qalet li issa, l-Att dwar is-Servizzi Diġitali se jiżgura li l-fornituri tas-servizzi diġitali jassumu r-responsabbiltà u jagħtu rendikont għas-servizzi li jipprovdu u li huwa possibbli li l-fiduċja terġa’ tinbena. Il-kontenut u l-prodotti illegali online li ma jissodisfawx ir-regoli li għandna għall-prodotti fiżiċi huma l-problema. It-tnejn li huma jridu jiġu rranġati, u għandhom jiġu rranġati fuq skala Ewropea.

Hija kompliet tgħid li l-Att dwar is-Swieq Diġitali se jibgħat messaġġ lill-kumpaniji ġganti: li jistgħu jagħmlu negozju fl-Ewropa kemm iridu, jista’ jkollhom suċċess kemm iridu, iżda hemm lista ta’ dak li għandhom u m'għandhomx jagħmlu meta jilħqu l-pożizzjoni ta’ kontroll, sabiex ikun hemm il-kompetizzjoni ġusta u jservu lill-konsumaturi bl-aħjar mod possibli. Il-punt fundamentali hawnhekk huwa li s-suq għandu jservi lilna bħala konsumaturi u li rridu teknoloġija li nistgħu verament nafdaw. (dm)

Il-KESE huwa favur sett ta’ prinċipji komuni għas-servizzi pubbliċi sabiex jgħinu lill-Istati Membri jikkonformaw bis-sħiħ mad-demokrazija u l-istat tad-dritt.

F’Opinjoni adottata mill-assemblea plenarja fit-2 ta’ Diċembru, il-KESE jirrimarka li s-servizzi pubbliċi, billi jiżguraw aċċess ugwali u universali għas-servizzi lil kulħadd, inklużi gruppi vulnerabbli u żvantaġġati, jikkontribwixxu għal progress soċjali u għal soċjetà dinamika. Huma jistgħu jaġixxu bħala “stabilizzaturi awtomatiċi” kruċjali fi żminijiet ta’ kriżi, li f’dawn l-aħħar snin żdiedu f’oqsma bħas-sigurtà, l-ekonomija, l-ażil, l-ambjent, il-klima u s-saħħa.

Ir-relatur tal-KESE Christian Moos spjega: “L-amministrazzjoni u s-servizzi pubbliċi huma l-aktar rabta importanti bejn il-gvernijiet u s-soċjetà ċivili. Huma fundamentali għar-reżiljenza tad-demokrazija liberali fl-Ewropa. L-UE teħtieġ mekkaniżmi effettivi li jiggarantixxu r-rispett sħiħ tal-istat tad-dritt u l-imparzjalità tal-amministrazzjoni pubblika fl-Istati Membri”.

Sett ta’ prinċipji komuni

Il-KESE jidentifika sett ta’ prinċipji komuni għas-servizzi u l-amministrazzjonijiet pubbliċi:

• Id-dritt għal amministrazzjoni tajba jsaħħaħ il-fiduċja tas-soċjetà. It-trasparenza fis-servizzi pubbliċi tiżgura sorveljenza indipendenti u tikkontribwixxi għall-ġlieda kontra l-korruzzjoni.
• Is-servizzi pubbliċi għandhom funzjoni protettiva fir-rigward tal-istat tad-dritt. Il-persunal li jaħdem fis-servizzi pubbliċi għandu jkun protett sabiex ikun jista’ jirrifjuta li jobdi struzzjonijiet ta’ servizzi illeġittimi. 
• Is-servizzi pubbliċi jridu jiżguraw aċċess liberu għall-informazzjoni u jibqgħu disponibbli għall-kulħadd minn persuna għal persuna, irrispettivament mid-diġitalizzazzjoni.

Il-KESE jissuġġerixxi wkoll li s-servizzi pubbliċi għandhom ikunu interoperabbli fil-livell Ewropew. L-iskambji u r-rotazzjoni tax-xogħol bejn is-servizzi pubbliċi tal-Istati Membri għandhom ikunu possibbli. Is-servizzi pubbliċi kollha involuti fl-għoti tal-fondi Ewropej iridu jirrispettaw u jimplimentaw il-prinċipji tas-servizzi pubbliċi. (na)

Il-Patt Ġdid dwar il-Migrazzjoni u l-Ażil tal-UE ġie kkritikat bil-qawwa matul konferenza ta’ livell għoli organizzata mill-KESE. Ir-rappreżentanti tas-soċjetà ċivili, il-gruppi ta’ riflessjoni u l-Parlament Ewropew sabu li l-patt il-ġdid ma jwassalx għall-bidliet meħtieġa biex tinħoloq sistema Ewropea komuni xierqa għall-migrazzjoni u l-ażil.

Fis-26 ta’ Novembru partijiet interessati inklużi l-Kummissjoni Ewropea, il-Parlament u l-Kunsill, gruppi ta’ riflessjoni, imsieħba soċjali u organizzazzjonijiet tas-soċjetà ċivili ħadu sehem f'seduta virtwali dwar il-Patt iĠdid dwar il-Migrazzjoni u l-Ażil. Il-konferenza, organizzata mis-Sezzjoni għax-Xogħol, l-Affarijiet Soċjali u ċ-Ċittadinanza (SOC) tal-KESE, esplorat jekk il-patt ġdid iġibx il-bidla sistemika meħtieġa biex jingħeleb l-imblokk attwali u tiġi żviluppata politika tal-UE dwar l-ażil u l-migrazzjoni sostenibbli, razzjonali u bbażata fuq id-drittijiet.

Il-kritika minn membri differenti tal-bord iffokat fuq tliet aspetti ewlenin: it-triq leġiżlattiva magħżula, sostnuta mill-intergovernamentaliżmu u li tippermetti n-negozjati biex jibdew qabel is-sottomissjoni ta’ proposta leġiżlattiva mill-Kummissjoni; il-fehim dualistiku tal-migranti jew bħala refuġjati reali jew individwi illegali li jistgħu jitkeċċew; u l-mekkaniżmu ta’ sponsorizzazzjoni tar-ritorn li għadu kif ġie introdott, li jippermetti lill-Istati Membri jikkontribwixxu għas-solidarjetà billi jwettqu proċeduri ta’ tkeċċija ta’ pajjiżi oħra.

Il-membri tal-grupp ta’ studju tal-KESE dwar din l-inizjattiva esprimew dispjaċir dwar il-fatt li l-patt iddedika l-biċċa l-kbira tal-proposti tiegħu għall-ġestjoni tal-fruntieri esterni filwaqt li naqas milli jagħti l-attenzjoni dovuta lil kanali regolari ta’ immigrazzjoni, lil perkorsi sikuri għall-ażil jew lill-inklużjoni u l-integrazzjoni ta’ ċittadini ta’ pajjiżi terzi fl-UE. “Aħna ftit diżappuntati mill-kontenut ta’ dan il-patt,” qal José Antonio Moreno Díaz, ir-relatur tal-KESE għall-Opinjoni dwar il-Patt Ġdid dwar il-Migrazzjoni u l-Ażil. “Nittamaw għal patt aktar ambizzjuż u kostruttiv li jkun aktar realistiku fir-rigward tad-drittijiet tal-bniedem.” (na)

Il-Kummissjoni Ewropea u l-partijiet interessati tal-avjazzjoni għandhom jerġgħu lura għall-fażi ta’ diskussjoni biex jiċċaraw l-ambizzjoni tar-Regolament il-ġdid dwar l-Ajru Uniku Ewropew (SES), jgħid il-KESE f’opinjoni li għadha kif ġiet adottata.

Fil-fatt, għadu mhux ċar jekk l-abbozz tal-proposta tal-Kummissjoni hux se jkun biżżejjed biex jintlaħqu l-għanijiet oriġinali tal-SES f'termini ta’ tnaqqis ta' emissjonijiet ta’ CO2 u titjib tal-effiċjenza tal-immaniġġjar tat-traffiku tal-ajru u s-servizzi ta' navigazzjoni tal-ajru (ATM/ANS).

Il-KESE ta prijorità lill-kwistjoni f'opinjoni abbozzata minn Dumitru Fornea u adottata fis-sessjoni plenarja.

Meta kkummenta waqt id-dibattitu, is-Sur Fornea qal: "il-funzjoni tal-maniġer tan-network għandha tiġi ċċarata, speċjalment l-ambitu ġenerali u l-impatt tiegħu fuq l-ippjanar tal-linji tal-ajru, il-ġestjoni tal-kapaċità, id-disinn tal-ispazju tal-ajru, l-ambjent u l-prijoritizzazzjoni tat-talbiet. Il-partijiet interessati kollha fl-avjazzjoni għandhom ikunu involuti biex jilħqu deċiżjonijiet maġġuri; il-prinċipju ta’ konsultazzjoni sinifikanti jeħtieġ li jkun parti mill-proposta qafas".

Il-proposta tal-Kummissjoni hija nieqsa wkoll minn kwalunkwe referenza għall-konsegwenzi drammatiċi tal-kriżi COVID-19 fuq l-industrija. F’dan ir-rigward, il-KESE jirrakkomanda li jitwettaq studju tal-impatt sabiex tingħata kunsiderazzjoni adegwata lill-konsegwenzi soċjali u ekonomiċi tal-pandemija tal-coronavirus kemm għall-ħaddiema kif ukoll għall-utenti tas-servizz. (mp)

It-teknoloġiji tal-blockchain jistgħu joffru soluzzjonijiet utli għall-industrija tal-minjieri tal-futur, iżda t-tranżizzjoni diġitali trid tqis il-konsegwenzi soċjali. Dan kien il-messaġġ ewlieni mir-round table online organizzat mill-Kummissjoni Konsultattiva dwar il-Bidliet Industrijali (CCMI) tal-KESE fl-14 ta’ Diċembru 2020.

“Il-kumpaniji tal-minjieri li laqgħu u implimentaw it-tranżizzjoni diġitali raw titjib fis-sikurezza, is-sostenibbiltà, il-produttività u l-profitti tagħhom. Il-blockchain huwa l-futur tal-industrija, iżda l-governanza tagħha jeħtieġ li tiġi diskussa. Irridu nimminimizzaw l-iżbilanċi soċjali u territorjali li ġabet magħha t-trasformazzjoni tal-attivitajiet bħala parti mill-Patt Ekoloġiku ġdid u l-ekonomija ċirkolari,” qal Pietro De Lotto, il-prsident tas-CCMI.

Dan ġie mtenni mill-membru tas-CCMI, Hilde Van Laere: “Il-blockchain hija fil-qalba tat-tranżizzjoni diġitali u għandha l-potenzjal li tittrasforma n-negozji u s-soċjetà kollha kemm hi, mhux biss l-industrija tal-minjieri. Biddlet kull intrapriża f’kull settur u ttrasformat ukoll il-kuntest tat-tħaffir fil-minjieri. Bil-kapaċità tagħha li tipprovdi sikurezza u trasparenza fit-tranżizzjoni tan-negozju, kif ukoll li tirreġistra bidliet fid-okumenti u l-ftehimiet tan-negozju, it-teknoloġija tal-blockchain għandha applikazzjonijiet utli ħafna fil-qasam tal-minjieri.”

Firxa wiesgħa ta’ partijiet interessati operazzjonali u istituzzjonali ngħaqdu fid-dibattitu: l-Organizzazzjoni tal-Minjieri tal-Iżvezja, Minespider, Kamni Chain, IndustriALL Norway, l-Osservatorju Internazzjonali tal-Materji Prima, l-Organizzazzjoni għall-Kooperazzjoni u l-Iżvilupp Ekonomiċi (OECD), il-Kummissjoni Ewropea u s-Servizz Ewropew għall-Azzjoni Esterna (EEAS).

Il-webinar kien parti mill-ħidma ta’ segwitu dwar l-Opinjoni CCMI/176 dwar L-estrazzjoni diġitali fl-Ewropa: Soluzzjonijiet ġodda għall-produzzjoni sostenibbli tal-materja prima, imfassla minn Marian Krzaklewski u Hilde Van Laere, li l-KESE adotta fis-sessjoni plenarja tiegħu f’Settembru. (mp)

Il-KESE bi pjaċir jara r-rakkomandazzjonijiet tiegħu riflessi fil-proposti tal-Kummissjoni Ewropea għal Patt Klimatiku Ewropew li jappoġġja l-azzjoni klimatika eżistenti u ġdida permezz tat-tagħlim bejn il-pari, l-edukazzjoni, il-bini tal-kapaċità, it-tneħħija tal-ostakli, u aċċess aktar faċli għall-finanzjament.

Bl-introduzzjoni tal-kunċett ta’ newtralità karbonika globali, il-Ftehim ta’ Pariġi biddel id-diskors politiku u qiegħed lill-gvernijiet u l-partijiet interessati fuq mogħdija orjentata lejn l-azzjoni. Dan ir-riżultat ma kienx ikun possibbli mingħajr il-mobilizzazzjoni bla preċedent tal-partijiet interessati kollha tas-soċjetà ċivili. Il-parteċipazzjoni attiva tal-”partijiet kollha tas-soċjetà” hija prerekwiżit għal politika tal-klima li tirnexxi fi ħdan l-UE.

Il-membru tal-KESE Peter Schmidt qal: “Il-Patt Klimatiku huwa opportunità importanti biex jiġi mfassal approċċ innovattiv li se jirrifletti, jappoġġja u jispira azzjoni li diġà qed issir fis-soċjetà ċivili, fil-komunitajiet, il-bliet u r-reġjuni.”

Il-KESE jixtieq jaħdem mal-Kummissjoni Ewropea u ma’ korpi oħrajn tal-UE biex joħolqu b’mod kondiviż Pjattaforma tal-Partijiet Interessati tal-Patt Klimatiku Ewropew ibbażata fuq il-prinċipji tal-inklużività, it-trasparenza u l-parteċipazzjoni ġenwina, kif ukoll is-sjieda minn atturi klimatiċi fil-livelli kollha.

Barra minn hekk, l-istabbiliment ta’ Forum tal-UE dwar il-Finanzjament għall-Klima bħala parti mill-Patt għandu jistimola proċessi ta’ tagħlim li huma tassew reċiproċi, jiffaċilitaw l-aċċess għall-finanzjament u jneħħu l-ostakli. Mekkaniżmu għall-involviment taż-żgħażagħ fil-klima u s-sostenibilità, bħal Round Tables taż-Żgħażagħ dwar il-Klima u s-Sostenibbiltà proposti mill-KESE, għandu jkun parti integrali ta’ dan il-Patt. (mr)

Wara l-elezzjonijiet fl-Istati Uniti, il-Kumitat ta’ Segwitu tal-KESE dwar ir-Relazzjonijiet Transatlantiċi ltaqa’ fil-15 ta’ Diċembru sabiex jiistabbilixxi mill-ġdid sħubija b’saħħitha mas-soċjetà ċivili tal-Istati Uniti.

Bil-presidenza l-ġdida tal-Istati Uniti appik li tibda l-mandat tagħha, l-UE u l-Istati Uniti issa għandhom opportunità uniku, wara t-tfixkil kbir ta’ dawn l-aħħar snin, li jġeddu s-sħubija u l-ħbiberija tagħhom abbażi ta’ valuri demokratiċi, storja u interessi komuni.

Sabiex jinbeda mill-ġdid id-djalogu tas-soċjetà ċivili, il-Kumitat ta’ Segwitu tal-KESE dwar ir-Relazzjonijiet Transatlantiċi ltaqa’ fil-15 ta’ Diċembru, u ħadu sehem fil-laqgħa wkoll l-MEP Radosław Sikorski u l-membru tal-Kungress tal-Istati Uniti, William Hurd.

Is-Sur Sikorski enfasizza r-rwol kruċjali tal-kuntatti personali bejn in-nies u kooperazzjoni bejn is-soċjetà ċivili iktar b’saħħitha konformi mal-aġenda transatlantika ġdida. “Id-differenzi ta’ politika bejn l-UE u l-Istati Uniti ma sparixxewx, iżda rieda tajba, pożizzjonijiet ugwali u fiduċja f’xulxin huma bidu tajjeb,” huwa qal.

Is-Sur Hurd appoġġja bil-qalb id-djalogu transatlantiku: “L-Amerika li tinsab fuq quddiem mhijiex l-Amerika waħedha. Irridu nuru l-kapaċità li nibnu alleanzi”. Huwa enfasizza li kien ta’ importanza kbira li l-UE u l-Istati Uniti jikkooperaw quddiem Ċina li qed tkun dejjem iżjed assertiva fix-xena internazzjonali.

Peter Chase, Senior Fellow fi ħdan il-Fond Marshall Ġermaniż tal-Istati Uniti, irrimarka li strateġija ambizzjuża hija kruċjali għar-relazzjonijiet ekonomiċi transatlantiċi: “ekonomija b’saħħitha “tmantni” lis-soċjetà ċivili, it-think tanks, in-negozji u l-investimenti”.

Matthias Jørgensen mid-Direttorat Ġenerali tal-Kummissjoni Ewropea għall-Kummerċ, ippreżenta l-aġenda transatlantika l-ġdida tal-Kummissjoni, u stieden lill-Istati Uniti tingħaqad fil-ġlieda għal-dinja aktar f’saħħitha, sikura, prosperuża u demokratika wara l-COVID-19, u biex naħdmu flimkien biex nipproteġu lill-pjaneta, it-teknoloġija, il-kummerċ u l-istandards.

Garrett Workman, direttur anzjan għall-Affarijiet Ewropej fi ħdan il-Kamra tal-Kummerċ tal-Istati Uniti, ikkummenta li "il-kummerċ huwa l-bażi biex nagħmlu tajjeb għan-nuqqasijiet li saru mill-politika tal-Istati Uniti f’dawn l-aħħar snin".

Il-KESE ppreżenta wkoll “Building bridges across the Atlantic”, proġett ambizzjuż li jenfasizza r-rwol tas-soċjetà ċivili u l-importanza tal-impatt tagħha fuq sħubija transatlantika mġedda. Il-proġett għandu l-għan li jgħaqqad lin-nies u l-attivitajiet tagħhom u li jsemma’ ilħna liberali fuq iż-żewġ naħat tal-Atlantiku fi żmien meta s-sejba ta’ bażi komuni u l-identifikazzjoni ta’ soluzzjonijiet huma aktar importanti minn qatt qabel. (at)