KESE info

137 mit-329 membru tal-Kumitat Ekonomiku u Soċjali Ewropew ser ikunu membri ġodda fil-KESE hekk kif f’Ottubru jibda l-mandat tiegħu għall-perjodu 2020-2025.

Il-membri l-ġodda fil-KESE se jibdew il-mandat tagħhom f’kuntest ta’ restrizzjonijiet tal-COVID-19, hekk kif it-tbegħid soċjali u l-laqgħat ibridi għadhom in-norma fi Brussell peress li r-rati tal-infezzjoni żdiedu madwar l-Ewropa.

It-329 membru tal-KESE jinħatru mill-ġdid kull ħames snin, kif stabbilit mit-Trattati. Din id-darba aktar minn 40% tal-membri se jkunu ġodda, u dawn se jġibu magħhom il-perspettivi u l-ideat friski tagħhom kif ukoll enerġija ġdida fil-ħidma tagħhom flimkien mal-membri li qed jirritornaw.

In-nisa se jiffurmaw 33% tal-membri fil-mandat il-ġdid, żieda minn 27.30% fl-aħħar mandat u 24.70% fl-2010-2015. Il-pajjiżi bl-aktar membri nisa ser ikunu l-Estonja, b’85.71%, u r-Repubblika Ċeka u l-Kroazja jsegwu b’66.67%. Fit-tarf l-ieħor tal-iskala, il-Portugall u Ċipru ma għandhomx nisa fir-rappreżentanza tagħhom. L-Iżvezja għandha bilanċ perfett bejn il-ġeneri.

L-iżgħar membru għandu 27 sena, filwaqt li l-aktar membru anzjan, li għandu jippresjedi s-sessjoni plenarja li ser teleġġi l-mexxejja l-ġodda, għandu 76 sena.

Il-membri jinħatru mill-Kunsill għal perjodu ta’ ħames snin, abbażi tan-nomini mill-Istati Membri. Il-lista sħiħa tal-membri għall-mandat il-ġdid – mill-2020 sal-2025 – dalwaqt ser tkun disponibbli fuq is-sit web tal-KESE.

It-329 membru ġdid jew ikkonfermat mill-ġdid għandhom jiltaqgħu għall-ewwel darba fi Brussell fis-27 ta’ Ottubru. Fit-28 ta’ Ottubru huma se jeleġġu President ġdid u żewġ Viċi Presidenti (għall-Komunikazzjoni u għall-Baġit rispettivament) għal mandat ta’ sentejn u nofs. 

Il-pożizzjoni tal-president iddur bejn it-tliet gruppi tal-Kumitat (Grupp ta’ Min Iħaddem, tal-Ħaddiema u Diversità Ewropa). Iż-żewġ presidenti preċedenti ġew eletti mill-Grupp tal-Ħaddiema u mill-Grupp Diversità Ewropa.

Kull membru se jingħaqad ma’ wieħed mit-tliet Gruppi, li se jeleġġi wkoll il-president tal-Grupp tiegħu għal mandat ta’ sentejn u nofs li jista’ jiġġedded.

Ir-rwol ewlieni tal-KESE huwa li jagħti pariri lil dawk li jfasslu l-liġijiet tal-UE (il-Kummissjoni Ewropea, il-Parlament Ewropew u l-Kunsill) dwar abbozzi ta’ leġiżlazzjoni u politiki permezz tal-ħidma tas-sitt sezzjonijiet tiegħu u kummissjoni konsultattiva waħda, li jkopru firxa wiesgħa ta’ oqsma ta’ politika, bħal kwistjonijiet soċjali, ekonomiċi, agrikoli, ambjentali u tat-trasport. (dm)

Fis-17 ta’ Settembru, il-Kumitat Ekonomiku u Soċjali Ewropew (KESE) ospita ċ-ċerimonja ta’ tmiem il-mandat tiegħu matul l-aħħar sessjoni plenarja qabel il-mandat li jmiss f’Ottubru. Luca Jahier, President tal-KESE minn April 2018, wera l-gratitudni tiegħu lill-membri kollha u enfasizza l-kontribut importanti tal-organizzazzjonijiet tas-soċjetà ċivili rrappreżentati fil-KESE għall-proġett Ewropew.

Fl-aħħar diskors tiegħu bħala president, Luca Jahier tkellem dwar il-prijoritajiet ewlenin tal-mandat tiegħu, jiġifieri l-iżvilupp sostenibbli, ir-relazzjoni msaħħa bejn l-UE u l-Afrika, it-tkabbir tal-UE, u l-kultura bħala element ta’ għaqda fl-Ewropa. Huwa saħaq ukoll dwar il-kontribut li għamel il-KESE f’dawn l-aħħar ftit snin biex jiġu indirizzati l-isfidi li qed tiffaċċja l-UE: pereżempju, il-KESE kien l-ewwel istituzzjoni Ewropea li pproponiet Unjoni Ewropea tas-Saħħa. Huwa wera t-tama li l-KESE jkun jista’ jieħu sehem attiv fil-Konferenza dwar il-Ġejjieni tal-Ewropa proposta mill-Kummissjoni Ewropea u mill-Parlament Ewropew.

Il-President tal-Kummissjoni Ewropea, Ursula von der Leyen, bagħtet messaġġ vidjo biex tfaħħar “il-ħidma eċċellenti” tal-KESE fl-aħħar ħames snin u l-kontribut importanti tiegħu għall-proċedura leġiżlattiva tal-UE. David Sassoli, President tal-Parlament Ewropew, bagħat ukoll messaġġ vidjo fejn esprima r-rieda tiegħu li jaħdem aktar mill-qrib mal-KESE biex joħloq djalogu strutturat mas-soċjetà ċivili organizzata. Klara Dobrev, Viċi President tal-Parlament Ewropew, tkellmet waqt il-plenarja tal-KESE biex tisħaq dwar il-fatt li “xejn ma jista’ jinbidel fid-dinja mingħajr l-appoġġ tal-poplu; u r-rwol tal-KESE huwa li jidħol f’kuntatt mas-soċjetà ċivili organizzata, ma’ persuni reali, ilkoll bi sfondi u ħtiġijiet differenti”. (dgf)

Il-pandemija tal-coronavirus qed tagħmel ħerba fis-settur tat-turiżmu tal-Ewropa. Fi żmien sitt xhur nofs in-negozji jistgħu jgħibu sakemm l-UE ma tiħux passi malajr, jgħid il-Kumitat Ekonomiku u Soċjali Ewropew f’Opinjoni ġdida.

F’Opinjoni ta’ Panagiotis Gkofas, li adotta f’Settembru, il-KESE jistqarr li tinħtieġ azzjoni tal-UE biex in-negozji fil-qasam tat-turiżmu jibqgħu f’wiċċ l-ilma u l-ħaddiema tagħhom jibqgħu impjegati fil-kuntest tal-kriżi tal-COVID-19. U m’hemmx ħin x’nitilfu: jekk nistennew sitt xhur oħra nofs dawn in-negozji jaf ikunu għalqu.

Biex jappoġġja d-dikjarazzjonijiet tiegħu, il-KESE wettaq stħarriġ online matul is-sajf li involva 175 organizzazzjoni li jirrappreżentaw eluf ta’ negozji tat-turiżmu u li jimpjegaw mijiet ta’ eluf ta’ ħaddiema fl-UE.

It-tweġibiet tagħhom għall-kwestjonarju tal-KESE pittru stampa ta’ diżastru imminenti.

88,2 % ta’ dawk li wieġbu qalu li l-kriżi tal-COVID-19 affettwathom b’mod “negattiv ħafna”, 80,6 % bassru li l-effetti tagħha se jolqtuhom b’mod aktar qawwi fil-perjodu twil u 45 % jaħsbu li jkunu għadhom jeżistu fl-2021.

L-Opinjoni tfasslet b’reazzjoni għall-Komunikazzjoni tal-Kummissjoni Ewropea dwar It-turiżmu u t-trasport fl-2020 u lil hinn.

Is-settur tat-turiżmu fl-UE huwa stmat li qed jitlef madwar EUR 1 biljun fi dħul fix-xahar u jista’ jitlef 6,4 miljun impjieg fl-2020 bħala riżultat tal-COVID-19.

Biex tagħti spinta mill-ġdid lill-industrija, l-ewwel u qabel kollox l-UE trid tieħu azzjoni biex tirrestawra l-fiduċja tan-nies fis-sikurezza tal-ivvjaġġar, jistqarr il-KESE.

Sakemm tinstab tilqima, il-KESE jappoġġja l-idea ta’ passaport tas-saħħa tal-UE b’Formola armonizzata għal-Lokalizzazzjoni tal-Passiġġieri (PLF) u kodiċi QR flimkien ma’ Pjattaforma multilingwi għall-Assistenza tas-Saħħa.

In-nies ikunu jistgħu jużaw il-kodiċi QR biex jaċċessaw l-informazzjoni u s-servizzi tas-saħħa fil-pajjiż li jkunu qed iżuru u jkollhom aċċess ta’ emerġenza għas-sistemi tas-saħħa u tas-sigurtà soċjali.

Prijorità ewlenija oħra hija li jkun hemm likwidità disponibbli malajr kemm jista’ jkun għan-negozji fil-qasam tat-turiżmu u l-impjegati tagħhom, peress li n-nuqqas ta’ fluss ta' flus qed jhedded is-sopravivenza tagħhom.

Fil-fehma tal-KESE, il-programm SURE għall-mitigazzjoni tal-qgħad għandu jipprovdi għajnuna għall-ħaddiema qiegħda fis-settur tat-turiżmu u kumpens tal-pagi għall-SMEs sa mill-inqas it-30 ta’ Ġunju 2021.

Il-Kumitat jemmen ukoll li l-UE għandha twaqqaf mekkaniżmu għall-monitoraġġ tal-implimentazzjoni ta’ miżuri ta’ appoġġ peress li ħafna minn dawk li wieġbu l-istħarriġ ilmentaw li ma ngħataw l-ebda għajnuna finanzjarja wara li l-UE ħabbret li kienet qed tagħmel fondi disponibbli. (dm)

Il-Kumitat Ekonomiku u Soċjali Ewropew (KESE) adotta Opinjoni dwar Pagi minimi deċenti fl-Ewropa kollha li fiha ta l-kontribuzzjoni tiegħu għad-dibattitu kontinwu mal-UE kollha dwar is-suġġett.

Din l-Opinjoni esploratorja ntalbet mill-Parlament Ewropew, wara t-tħabbira tal-Kummissjoni li kienet qed tikkunsidra li tipproponi strument legali biex tiżgura li kull ħaddiem tal-UE huwa intitolat għal paga minima li tippermetti livell ta’ għajxien deċenti.

Fl-opinjoni, il-KESE argumenta li pagi minimi ġusti jistgħu jgħinu biex jitnaqqas il-faqar fost in-nies foqra li jaħdmu, flimkien ma’ politiki ta’ inklużjoni ċċentrati fuq il-persuna, integrati u attivi.

Madankollu, huwa enfasizza li kwalunkwe inizjattiva tal-UE bħal din għandha tissawwar fuq il-bażi ta’ analiżi preċiża tas-sitwazzjoni fl-Istati Membri, u għandha tirrispetta bis-sħiħ ir-rwol u l-awtonomija tal-imsieħba soċjali, kif ukoll il-mudelli differenti ta' relazzjonijiet industrijali.

Fir-rigward tar-rotta li jeħtieġ tittieħed, it-tliet gruppi fi ħdan il-KESE, li jirrappreżentaw lil min iħaddem, lit-trade unions u lill-organizzazzjonijiet tas-soċjetà ċivili tal-UE, esprimew fehmiet diverġenti.

F'isem il-Grupp ta’ Min Iħaddem tal-KESE, ir-relatur Stefano Mallia qal: “Il-Grupp ta’ Min Iħaddem jemmen li l-UE m’għandha l-ebda kompetenza fuq il-paga, u l-livelli ta’ paga b'mod partikolari, u li l-iffissar ta’ pagi minimi hija kwistjoni nazzjonali, magħmula skond karatteristiċi speċifiċi tas-sistemi nazzjonali rispettivi. Kwalunkwe azzjoni żbaljata min-naħa tal-UE għandha tiġi evitata, speċjalment f’dan il-mument partikolari. Fejn l-imsieħba soċjali jeħtieġu appoġġ, għandna nħarsu lejn l-indirizzar ta’ ħtiġijiet speċifiċi billi nippromovu skambji tal-aħjar prattiki u l-bini tal-kapaċità u ma naqgħux fin-nasba li noħorġu b’approċċ ta ’daqs wieħed għal kulħadd li jista’ jkollu konsegwenzi negattivi serji.”

Ir-relatur Oliver Röpke, li jirrappreżenta l-Grupp tal-Ħaddiema tal-KESE, qal: “L-iżgurar li l-ħaddiema madwar l-UE jibbenefikaw minn pagi minimi deċenti għandu jkun parti essenzjali mill-istrateġija ta’ rkupru tal-UE. Għall-grupp tal-Ħaddiema, huwa inkontestabbli li l-ħaddiema kollha għandhom ikunu protetti minn pagi minimi ġusti li jippermettu standard ta’ għajxien deċenti kull fejn jaħdmu. In-negozjar kollettiv jibqa’ l-aktar mod effettiv biex jiġu ggarantiti pagi ġusti u għandu wkoll jissaħħaħ u jiġi promoss fl-Istati Membri kollha. Għaldaqstant nilqgħu r-rikonoxximent tal-Kummissjoni li hemm kamp ta’ applikazzjoni għall-azzjoni tal-UE sabiex tippromovi r-rwol ta’ negozjar kollettiv fl-appoġġ tal-adegwatezza u l-kopertura tal-paga minima.” (ll)

L-emerġenza klimatika li qed tiffaċċja d-dinja llum immobilizzat miljuni ta’ żgħażagħ madwar id-dinja, li ħafna minnhom huma milqutin serjament mit-theddida li toħloq għall-futur tagħhom. Fl-istess ħin, huma ż-żgħażagħ li għal diversi drabi wrew l-enerġija, il-kreattività u l-motivazzjoni tagħhom li jisfidaw il-mudelli attwali mhux sostenibbli u jħeġġu lil dawk li jieħdu d-deċiżjonijiet biex jadottaw politiki ambizzjużi. Madankollu għad hemm distakk kbir bejn li jingħataw widen, u li tittieħed azzjoni dwar dak li jgħidu.

F’din l-Opinjoni, il-KESE jipprova jnaqqas dan id-distakk, filwaqt li jqis li l-involviment strutturat u formali taż-żgħażagħ huwa kruċjali fl-istadji kollha tal-proċessi tat-teħid tad-deċiżjonijiet tal-UE.

“L-Ewropa, u d-dinja, għandhom bżonn ambizzjoni, tmexxija u azzjoni. Is-sistemi tagħna huma bbażati fuq is-self mill-futur, issa wasal iż-żmien li nibdew ninvestu fil-futur”, saħaq Cillian Lohan, ir-relatur tal-Opinjoni.

F’dan il-kuntest, il-KESE jipproponi li jiġu organizzati Round Tables għaż-Żgħażagħ dwar il-Klima u s-Sostenibbiltà f’kollaborazzjoni mal-Kummissjoni u l-Parlament, kif ukoll l-inklużjoni ta’ persuna delegata żagħżugħa fid-delegazzjoni uffiċjali tal-UE għal-laqgħat tal-COP tal-UNFCCC.

Din hija opportunità ta’ darba f’ġenerazzjoni waħda biex jiġu indirizzati l-inugwaljanzi sistemiċi u ssir tranżizzjoni għal futur aħjar. (mr)

Il-KESE ilu għal snin fuq quddiem fil-promozzjoni ta’ politika komprensiva tal-UE dwar l-ikel, bil-għan li jiġu pprovduti dieti tajbin għas-saħħa minn sistemi sostenibbli tal-ikel, tiġi stabbilita rabta bejn l-agrikoltura u n-nutrizzjoni u s-servizzi tal-ekosistema, u jiġu żgurati ktajjen ta' provvista li jipproteġu s-saħħa pubblika għas-soċjetà Ewropea kollha.

Fil-fehma tal-Kumitat, l-istrateġija proposta ta’ ‘Mill-Għalqa sal-Platt’ ma tirriflettix biżżejjed dawn l-għanijiet.

Għodda kruċjali biex titwettaq din l-istrateġija huwa l-baġit tal-Politika Agrikola Komuni (PAK), peress li jirrappreżenta 40 % tal-infiq totali tal-UE. Għalhekk, il-baġit tal-PAK għandu jiġi miżjud biex ikun konformi ma’ dawn l-għanijiet.

L-istrateġija ma tindirizzax lanqas il-kwistjoni dwar il-ġestjoni sostenibbli tal-art u dwar l-aċċess għall-art, wieħed mill-ostakli ewlenin għat-tiġdid tal-popolazzjoni fis-settur agrikolu. Fl-istess ħin il-funzjoni ta’ appoġġ għall-introjtu tal-pagamenti tal-PAK hija essenzjali u se tibqa’ hekk għas-snin li ġejjin, anke jekk jittieħdu passi biex jiġi żgurat li l-prezzijiet tal-ikel ikunu jirriflettu l-ispejjeż veri tal-produzzjoni.

Tħassib ieħor ewlieni għall-bdiewa tal-UE huwa dak li jkollhom jikkompetu ma’ prodotti importati li ma jilħqux il-miri stabbiliti għas-sostenibbiltà. Għalhekk, il-Kumitat iħeġġeġ lill-UE biex fil-ftehimiet ta’ kummerċ preferenzjali tiżgura standards li tassew ikunu reċiproċi.

L-Ewropa u d-dinja għad iridu jagħmlu ħafna iktar biex isiru sostenibbli għal kollox. L-Ewropa għandha l-għodod u l-għarfien espert biex tasal. Ejjew nagħtu prova li għandna wkoll ir-rieda politika u l-impenn meħtieġa, u nuru t-triq lill-oħrajn. (mr)

Il-Kumitat Ekonomiku u Soċjali Ewropew ħeġġeġ lill-UE u lill-Istati Membri għall-ħidma dwar kjarifiki għat-termini tal-impjieg fl-ekonomija tal-pjattaformi, peress li nuqqas ta’ definizzjonijiet standardizzati kemm dwar l-istatus tal-ħaddiema kif ukoll dwar dak tal-impjegaturi jista’ jikkomplika l-applikazzjoni tal-leġiżlazzjoni tax-xogħol u ta’ ħafna drittijiet tal-protezzjoni tax-xogħol.

Il-kunċetti ewlenin li jirrikjedu kjarifiki huma dawk li jiddefinixxu l-pjattaformi bħala “intermedjarji tal-provvista u d-domanda” aktar milli dawk li jiddefinixxu lil “impjegaturi”. Dan iwassal biex il-ħaddiema jitqiesu bħala “persuni li jaħdmu għal rashom” minflok “impjegati”, li ħafna drabi jwassal biex tineħħilhom il-protezzjoni legali u soċjali, inklużi s-saħħa u s-sigurtà fuq il-post tax-xogħol jew il-protezzjoni tal-impjiegi, li l-importanza tagħhom ħarġet b’mod partikolari matul il-pandemija attwali.

Bħala l-kejl li jiddetermina jekk ħaddiem huwiex impjegat jew ħaddiem għal rasu, il-KESE ssuġġerixxa li l-UE u l-Istati Membri għandhom jadottaw il-kunċett ta’ dipendenza u subordinazzjoni ekonomika. Qal ukoll li l-UE u l-Istati Membri għandhom jikkunsidraw bir-reqqa l-adozzjoni tal-prinċipju li ħaddiem jitqies bħala impjegat fin-nuqqas ta’ prova kuntrarja. Madankollu, il-ħaddiema ġenwinament indipendenti għandhom ikunu jistgħu jżommu dak l-istatus jekk ikunu jixtiequ jagħmlu dan.

Il-KESE wissa wkoll li r-riskji li ma għandhomx jiġi sottovalutati, filwaqt li semma l-flessibbiltà u l-awtonomija tax-xogħol, id-dħul supplementari għall-ħaddiema u l-aċċess aktar faċli għal persuni vulnerabbli għall-impjieg bħala wħud mill-benefiċċji li ġġib magħha l-ekonomija tal-pjattaformi.

Minbarra l-ħaddiema bit-theddida li jinċaħdulhom id-drittijiet bażiċi tagħhom, inklużi d-drittijiet tagħhom li jorganizzaw lilhom infushom u għal negozjar kollettiv, hemm ukoll theddid għas-soċjetà inġenerali, minħabba r-riskju akbar ta’ kompetizzjoni bbażata fuq it-twaqqigħ tal-istandards soċjali. Dan għandu wkoll konsegwenzi dannużi kemm għall-impjegaturi, li huma soġġetti għal pressjoni kompetittiva mhux sostenibbli, kif ukoll għall-Istati Membri, li jitilfu d-dħul mit-taxxa u l-kontribuzzjonijiet tas-sigurtà soċjali.

Il-KESE ppreżenta l-argumenti tiegħu fl-Opinjoni dwar Xogħol ġust fl-ekonomija tal-pjattaformi, adottata fis-sessjoni plenarja ta’ Settembru u abbozzata fuq talba mill-presidenza Ġermaniża tal-UE. Ir-relatur tal-Opinjoni kien il-membru Portugiż Carlos Manuel Trindade. (ll)

L-UE ilha sa mill-1992 tipprova timplimenta strateġiji tal-bijodiversità mingħajr ebda riżultat sinifikanti. Dan huwa primarjament minħabba implimentazzjoni fqira tal-qafas leġiżlattiv, u minħabba nuqqas ta’ fondi għall-miżuri meħtieġa.

Il-KESE jilqa’ bi pjaċir l-impenn u sforzi mġeddin tal-Kummissjoni biex tiżviluppa Strateġija tal-UE li tistabbilixxi miri biex jintlaħqu sal-2030, bħala wieħed mill-perkorsi lejn il-kisba tal-Patt Ekoloġiku tal-UE. 

Skont ir-relatur Antonello Pezzini u l-korelatur Lutz Ribbe, din l-istrateġija hija t-triq ’il quddiem biex il-bijodiversità tal-Ewropa titpoġġa fil-qalba tal-irkupru wara l-COVID-19 għall-benefiċċju tan-nies, il-klima u l-pjaneta, filwaqt li nreġġgħu n-natura lura f’ħajjitna.

L-UE jeħtieġ iżżid b’mod sostanzjali l-isforzi tagħha biex tipproteġi r-riżorsi naturali li fadlilna, permezz ta’ kampanji ta’ sensibilizzazzjoni u ta’ komunikazzjoni. Il-KESE jqis li hemm bżonn li jikber id-daqs taż-żoni protetti, b’mod partikolari taż-żoni bi protezzjoni stretta, li jiġu restawrati l-ħabitats u li jiġi indirizzat id-deklin tal-ispeċi.

Il-KESE jenfasizza wkoll li l-bdiewa u s-sidien tal-foresti ma jistgħux ikunu mistennija jġorru l-piż finanzjarju għall-protezzjoni tal-bijodiversità. Minflok, għandha tkun opportunità interessanti ta’ sors ta’ introjtu għalihom meta huma jipprovdu “ben u valur pubbliku”.

Fit-tħejjija għal-laqgħa li jmiss tal-Konvenzjoni dwar id-Diversità Bijoloġika fiċ-Ċina fl-2021, irid isir ħafna iktar biex nissalvagwardjaw il-bijodiversità globali. Issa wasal iż-żmien li l-Ewropa tassumi r-rwol tagħha ta’ tmexxija, u tikkonvinċi lill-partijiet l-oħra li l-istrateġiji adottati ta’ min jiġu segwiti. (mr)

Il-kriżi tal-COVID-19 li għadha għaddejja uriet il-fraġilità tal-ktajjen tal-provvista globali. Din kixfet ukoll il-vulnerabbiltà tal-ħaddiema u l-impatti negattivi soċjali, tas-saħħa u tas-sikurezza tal-operazzjonijiet tan-negozju fil-ktajjen tal-provvista tal-lum. F’mument kruċjali għal azzjoni politika u teħid ta’ deċiżjonijiet konkreti, il-Presidenza Ġermaniża tal-UE u l-Parlament Ewropew talbu lill-KESE għar-rakkomandazzjonijiet tiegħu. F’żewġ opinjonijiet adottati fis-sessjoni plenarja tiegħu ta’ Settembru, huwa jappella lill-Kummissjoni Ewropea biex tiżviluppa Pjan ta’ Azzjoni Ewropew u tressaq obbligi ta’ diliġenza dovuta obbligatorji fil-ktajjen tal-provvista globali.

F’opinjoni esploratorja, il-KESE jappella għal Pjan ta’ Azzjoni Ewropew dwar id-drittijiet tal-bniedem, ix-xogħol deċenti u s-sostenibbiltà fil-ktajjen tal-provvista globali, b’leġiżlazzjoni vinkolanti transsettorjali tal-UE dwar diliġenza dovuta tad-drittijiet tal-bniedem u kondotta kummerċjali responsabbli fuq quddiem nett. Definizzjoni wiesgħa għandha tkopri d-drittijiet tal-bniedem, inklużi d-drittijiet tal-ħaddiema u tat-trade unions, u tibni fuq firxa ta’ strumenti internazzjonali.

B’mod parallel mal-ħidma tiegħu fuq il-Pjan ta ’Azzjoni, il-KESE ilu jipprovdi l-parir tiegħu lill-Parlament Ewropew dwar inizjattiva legali Ewropea li tintroduċi diliġenza dovuta obbligatorja dwar id-drittijiet tal-bniedem u l-impatti ambjentali fil-prattiki kummerċjali. L-inizjattiva, imħabbra mill-Kummissarju Ewropew Didier Reynders f’April 2020 u mistennija fl-2021, se tagħmilha legalment vinkolanti għall-kumpaniji li joperaw fl-UE biex jidentifikaw, jipprevjenu, jimmitigaw u jqisu l-impatti negattivi tal-attivitajiet tagħhom fuq id-drittijiet tal-bniedem u tal-ħaddiema u fuq l-ambjent. (dgf)

L-iżgurar ta’ aċċess sostenibbli għall-materja prima, inklużi l-metalli, il-minerali industrijali u l-materja prima tal-kostruzzjoni, u b’mod partikolari l-materja prima kritika (CRM), huwa ta’ importanza kbira għall-ekonomija Ewropea, fejn mill-inqas 30 miljun impjieg jiddependu mid-disponibbiltà tal-materja prima. Il-pandemija tal-COVID-19 li tinsab għaddejja qed tenfasizza l-importanza tat-trasformazzjoni diġitali. 

Fil-plenarja tiegħu ta’ Settembru, u f’mument kruċjali għall-implimentazzjoni tal-Patt Ekoloġiku u l-Pjan ta’ rkupru tal-UE, il-KESE adotta Opinjoni fuq inizjattiva proprja dwar L-estrazzjoni diġitali fl-Ewropa: soluzzjonijiet ġodda għall-produzzjoni sostenibbli tal-materja prima.

Id-diġitalizzazzjoni tas-settur tal-materja prima tal-UE hija opportunità unika biex tissaħħaħ ir-reżiljenza tal-ktajjen tal-provvista industrijali Ewropej, biex tittejjeb il-prestazzjoni ambjentali tas-settur tal-minerali u biex jiżdiedu t-trasparenza u d-djalogi maċ-ċittadini u l-komunitajiet affettwati mill-attivitajiet ta’ estrazzjoni.

Ir-relatur għall-Opinjoni Marian Krzaklewski qal li “t-trasformazzjoni diġitali tas-settur tal-estrazzjoni teħtieġ sforz ambizzjuż biex jitwettqu bidliet legali u regolatorji, u li dan l-isforz għandu jsir taħt l-awspiċju tal-organizzazzjonijiet sovranazzjonali u fil-livell tad-dritt internazzjonali”.

Il-KESE jenfasizza l-importanza li jkun hemm network globali u komprensiv tal-intelligence dwar il-minerali sabiex jirfed it-trasformazzjoni diġitali u t-teħid tad-deċiżjonijiet b'mod informat fil-livell tal-UE. Iċ-Ċentru Konġunt tar-Riċerka (JRC) qed jiżviluppa u jżomm sistema ta' informazzjoni Ewropea dwar il-materja prima, kif rikonoxxut mill-KESE.

Il-KESE jemmen li l-UE u l-Istati Membri għandhom jappoġġjaw b’mod attiv it-trasformazzjoni diġitali tas-settur tal-estrazzjoni tal-UE. Dan huwa pass kruċjali biex tiżdied ir-reżiljenza tal-industrija tal-UE u tal-katina tal-valur tal-materja prima. Il-minjieri li jużaw it-teknoloġiji diġitali, inklużi l-awtomatizzazzjoni integrata, in-networks konjittivi u l-użu ta’ analitika f’ħin reali huma aktar effiċjenti, nodfa u sikuri. L-impronti ambjentali mnaqqsa u l-ambjenti aktar sikuri huma eħfef biex jinkisbu fil-“minjieri intelliġenti”, u dan huwa kruċjali biex tinkiseb il-liċenzja soċjali biex joperaw fl-Ewropa. (ks)

Il-KESE jistieden lill-Kummissjoni Ewropea tiżviluppa pjan direzzjonali komprensiv għall-irkupru tas-settur tal-avjazzjoni Ewropew kollu, b’riżorsi speċifiċi sabiex jiġu appoġġjati s-sottosetturi kollha u l-forza tax-xogħol tagħhom. Fl-Opinjoni mħejjija minn Thomas Kropp u adottata fis-sessjoni plenarja ta’ Settembru, il-Kumitat qabel li hija meħtieġa politika ta’ rkupru ambizzjuża u koordinata, sabiex issir distinzjoni ċara bejn il-fażi inizjali ta’ rkupru, fuq terminu qasir, u l-ħtieġa li tiġi żgurata l-kompetittività internazzjonali tas-settur u kundizzjonijiet ekwivalenti ta’ kompetizzjoni fuq perjodu ta’ żmien medju u twil.

Waqt li kien qed jitkellem mill-marġni tas-sessjoni plenarja, is-Sur Kropp qal li: “Għalkemm is-settur tal-avjazzjoni iffaċċja kriżijiet qabel, din il-kriżi hija waħda mingħajr preċedent. Skont stimi aġġornati, is-settur mhux se jirkupra kompletament qabel l-2024. L-istituzzjonijiet Ewropej u korpi internazzjonali oħra għad iridu jikkoordinaw miżuri regolatorji biex jistabbilixxu standards internazzjonali. Is-settur tal-avjazzjoni ma jikkonċernax biss lil-linji tal-ajru: huwa wkoll dwar partijiet importanti oħrajn, bħall-ajruporti, il-fornituri tas-servizzi tan-navigazzjoni bl-ajru, fornituri tas-servizzi fuq l-art u fornituri ta’ servizzi oħrajn, li jeħtieġ li jitqiesu lkoll sabiex jinstabu soluzzjonijiet.”

B’mod ġenerali, il-Kummissjoni jeħtiġilha tfittex li jkun hemm bilanċ xieraq bejn il-miżuri ta’ rkupru u r-rekwiżiti finanzjarji li jirriżultaw mill-Patt Ekoloġiku Ewropew, sabiex jiġi evitat li jiġu imposti piżijiet regolatorji addizzjonali, b’mod partikolari fil-fażi ta’ rkupru, peress li s-settur kollu jinsab fraġli mil-lat finanzjarju.

It-tranżizzjoni enerġetika teħtieġ viżjoni politika ċara, peress li mhijiex biss kwistjoni teknoloġika iżda wkoll sfida soċjali profonda. Fl-Opinjoni mħejjija minn Lutz Ribbe u Thomas Kattnig, adottata fis-sessjoni plenarja tal-Kumitat f’Settembru, il-KESE jenfasizza li s-sistema tal-enerġija futura se teħtieġ elementi ċentralizzati u deċentralizzati. Madankollu, l-organizzazzjoni tagħha ma tistax titħalla għal riħha.

Matul id-dibattitu, is-Sur Ribbe qal li: “Tinħtieġ viżjoni ċara dwar jekk għandhiex tingħata prijorità lid-deċentralizzazzjoni jew liċ-ċentralizzazzjoni. Wara kollox, it-tranżizzjoni enerġetika tal-Ewropa qabelxejn teħtieġ ċertezza ta’ investiment kemm mis-settur pubbliku kif ukoll mis-settur privat, li tista’ tinkiseb biss jekk jittieħdu deċiżjonijiet fundamentali ċara.”

Fuq l-istess nota, is-Sur Kattnig żid jgħid li: “Il-ħaddiema, it-trade unions u l-konsumaturi jeħtiġilhom ikunu involuti fit-tranżizzjoni enerġetika, kif imwiegħed minn dawk li jfasslu l-politika u kif mitlub bil-qawwa mill-KESE. Madankollu, hawnhekk ukoll, il-Kummissjoni u l-Istati Membri ħallew aktar mistoqsijiet miftuħa milli tweġibiet. Barra minn hekk, l-inizjattivi attwali tal-politika dwar l-enerġija se jipprevjenu l-parteċipazzjoni wiesgħa taċ-ċittadini, aktar milli jħeġġuha.”

Sistemi ċentralizzati u deċentralizzati għandhom kemm vantaġġi kif ukoll żvantaġġi. F’sistema ċentralizzata, il-ħolqien tal-valur huwa tipikament ikkonċentrat fuq numru żgħir ta’ atturi. F’sistema deċentralizzata, madankollu, il-konsumaturi jistgħu jikkontribwixxu bħala klijenti attivi, komunitajiet tal-enerġija taċ-ċittadini, bdiewa, SMEs u intrapriżi muniċipali. (mp)

Ir-rieżami tal-governanza ekonomika 2020 tal-Kummissjoni Ewropea huwa f’waqtu u għandu jwitti t-triq għal riforma komprensiva, u jagħmel “bidla” għal qafas rivedut u bbilanċjat mill-ġdid minflok “ritorn” għan-normal. F’Opinjoni abbozzata minn Judith Vorbach u Tommaso Di Fazio u li ġiet adottat fis-sessjoni plenarja ta’ Settembru, il-KESE jsostni li tinħtieġ politika ekonomika ġdida fil-livell tal-UE, politika li tenfasizza l-prosperità biex jiġi promoss il-benesseri tan-nies kif ukoll firxa ta’ objettivi tal-politika ewlenin, bħat-tkabbir sostenibbli u inklużiv, livell massimu ta’ impjiegi u x-xogħol deċenti, it-tqassim ġust tal-ġid materjali, is-saħħa pubblika u l-kwalità tal-ħajja, is-sostenibbiltà ambjentali, l-istabbiltà tas-suq finanzjarju u l-istabbiltà fil-prezzijiet, ir-relazzjonijiet kummerċjali bbilanċjati sew, ekonomija soċjali tas-suq kompetittiva u finanzi pubbliċi stabbli.

Hija u tħeġġeġ lill-Kummissjoni u lill-Istati Membri biex jissoktaw bir-riflessjoni tagħhom dwar ir-regoli attwali tal-UE fid-dawl tal-pandemija tal-COVID-19, is-Sinjura Vorbach qalet li “Jeħtieġ li nirrevedu u nimmodernizzaw b’mod urġenti l-qafas tal-governanza ekonomika. Dan għandu jkun aktar ibbilanċjat u jkollu l-prosperità fil-qalba tiegħu, filwaqt li jippromovi l-benesseri tan-nies fl-Ewropa. Ħadd ma għandu jitħalla l-art. Mod wieħed kif dan jista’ jinkiseb huwa billi tiġi applikata r-“regola tad-deheb” għall-investiment pubbliku biex jiġu ssalvagwardjati l-produttività u l-bażi soċjali u ekoloġika għall-benesseri tal-ġenerazzjonijiet futuri. Punti importanti oħra huma l-iżgurar ta’ dħul pubbliku suffiċjenti, politika ta’ tassazzjoni ġusta u l-mitigazzjoni tal-influwenza ta’ indikaturi ekonomikament dubjużi fuq it-tfassil tal-politika. Huwa essenzjali wkoll li l-Parlament Ewropew, l-imsieħba soċjali u s-soċjetà ċivili kollha kemm hi jiġu involuti aktar mill-qrib.”

Huwa u jtenni l-kliem tagħha, is-Sur Di Fazio żied jgħid: “Il-kriżi tal-COVID-19 hija xokk enormi, li jirrikjedi setgħa finanzjarja sħiħa. Hemm bżonn ta’ armonija tal-għanijiet sabiex jitrażżnu l-konsegwenzi ekonomiċi u soċjali ta’ din il-pandemija u biex il-piż tad-dannu jinqasam b’mod ġust fi ħdan l-Istati Membri u bejniethom. Diġà ġew stabbiliti miżuri importanti fuq medda qasira ta’ żmien bħall-attivazzjoni tal-klawżola liberatorja ġenerali tal-qafas fiskali. Madankollu, minflok ma mmorru għal “ritorn għan-normal” malajr wisq, irridu nagħmlu qabża ’l quddiem u nagħmlu “bidla” lejn viżjoni ekonomika riveduta, waħda li żżid l-investiment fit-taħriġ, ir-riċerka u l-iżvilupp, u l-attivitajiet produttivi strateġiċi." (mp)

L-aġenda urbana u territorjali riveduta l-ġdida tal-UE trid tindirizza l-effetti tal-kriżi kkawżati mill-pandemija tal-COVID-19, u l-politika ta’ koeżjoni tista’ tkun l-għodda ġusta biex jiġi indirizzat l-irkupru ekonomiku tal-Ewropa. F’żewġ Opinjonijiet adottati fil-plenarja ta’ Settembru, il-KESE jeżamina l-politiki territorjali tal-UE u jistabbilixxi triq ’il quddiem.

Fl-ewwel Opinjoni, Petr Zahradník u Roman Haken jiffukaw fuq ir-reviżjoni tal-Karta ta’ Leipzig dwar il-Bliet Ewropej Sostenibbli u japprovaw is-sejħiet li saru fl-Aġenda Territorjali l-ġdida għall-2030 għal Ewropa ġusta u ekoloġika u għal dimensjoni territorjali aktar robusta fil-politiki kollha u fil-livelli kollha ta’ governanza.

Fil-livell lokali, il-kelmiet ewlenin għall-ġejjieni għandhom ikunu l-integrazzjoni, is-sostenibbiltà u r-reżiljenza tal-bliet u r-reġjuni. Waqt li tkellem fis-sessjoni plenarja, Petr Zahradník qal: “Il-potenzjal għall-implimentazzjoni ta’ proġetti integrati fl-iżvilupp territorjali u urban huwa enormi u l-istess huma l-benefiċċji assoċjati ma’ dan l-approċċ f’termini ta’ sinerġija tal-effetti, l-iffrankar tal-ispejjeż u l-ħolqien ta’ konnessjonijiet funzjonali.”

B’żieda ma’ dan, Roman Haken iddikjara: “Meta jitqiesu l-effetti tat-tibdil fil-klima, l-użu tar-riżorsi u l-ħtieġa li jitnaqqsu r-riskji ambjentali, is-sostenibbiltà u r-reżiljenza tal-bliet u r-reġjuni ma jistgħux jiġu indirizzati separatament. Għal din ir-raġuni, l-Aġenda Urbana għandha tkun ikkoordinata mill-qrib kemm jista’ jkun mal-politika ta’ koeżjoni territorjali.”

Għalhekk il-koeżjoni hija vitali; dan jinsab wkoll fil-qalba ta’ Opinjoni abbozzata minn Gonçalo Lobo Xavier, li fiha l-KESE jgħid li din tista’ tkun l-għodda ideali biex jiġu indirizzati l-ħafna sfidi li ġġib magħha l-pandemija tal-coronavirus u jistieden lill-Kummissjoni tieħu azzjoni. “Irridu naġixxu b’mod urġenti u nirreaġixxu malajr; il-mezzi finanzjarji biex jgħinu u jappoġġjaw lill-Istati Membri għandhom jintużaw b’konformità mal-kriterji rilevanti, iżda wkoll b’kuraġġ”, qal is-Sur Lobo Xavier. “Aktar minn qatt qabel, l-Ewropa teħtieġ approċċ differenzjat għal sfida waħda.” (mp)