KESE info

Il-Konferenza dwar in-Nisa fis-Suq tax-Xogħol organizzata mill-KESE biex ifakkar il-Jum Internazzjonali tan-Nisa saret fit-8 ta’ Marzu fid-dell tal-gwerra. Il-parteċipanti sellmu lin-nisa Ukreni rimarkabbli għas-saħħa, il-qlubija u r-reżiljenza tagħhom.

Fid-diskors inawgurali tagħha, il-President tal-KESE Christa Schweng irreferiet għan-nisa u l-bniet Ukreni li qegħdin jiġu kostretti jitilqu minn pajjiżhom u dan jitfagħhom f’riskju ogħla ta’ vjolenza.

Bl-istess ħsieb, il-President tal-Grupp ad hoc dwar l-Ugwaljanza u membru tal-KESE, Maria Nikolopoulou, enfasizzat: “In-nisa, l-ommijiet, il-konjuġi jinsabu mwaħħlin f’żona ta’ gwerra, ħafna mnnhom qegħdin isiru suldati huma stess, oħrajn qegħdin jippruvaw jaħarbu mill-atroċitajiet tal-attakki. Nagħqdu leħinna mas-soċjetajiet ċivili li qegħdin jappellaw biex il-gwerra tieqaf, fil-pajjiżi kollha”.

Il-pandemija tal-COVID-19 kompliet twessa’ d-disparità bejn il-ġeneri fl-impjiegi u kkontribwixxiet ukoll għal żieda fil-vjolenza u l-fastidju fuq il-post tax-xogħol.

Il-Kummissarju għall-Ugwaljanza, Helena Dalli, ħabbret li l-Kummissjoni Ewropea ser tippreżenta proposta għal direttiva dwar il-ġlieda kontra l-vjolenza fuq in-nisa u l-vjolenza domestika li għandha tkun vinkolanti fl-Istati Membri kollha.

Fir-rigward tas-settur tal-intelliġenza artifiċjali, in-nisa jikkostitwixxu biss 16 % tal-forza tax-xogħol, u dan ifisser li 84 % tal-irġiel jieħdu d-deċiżjonijiet kollha u t-tmexxija. “Jekk in-nisa jkunu assenti minn dawn is-setturi, dan ifisser li d-dinja l-ġdida kollha tagħna ser tissawwar mill-irġiel, bil-preġudizzju possibbli tagħhom”, qalet is-Sinjura Schweng.  (at)

Din is-sena 2022, il-Kumitat Ekonomiku u Soċjali Ewropew (KESE) se jorganizza b’mod konġunt l-ewwel Premjijiet tal-UE għall-Produzzjoni Organika mal-Kummissjoni Ewropea, il-Kumitat Ewropew tar-Reġjuni (KtR), COPA-COGECA u IFOAM Organics Europe, bil-għan li tiġi rikonoxxuta l-eċċellenza u jiġu ppremjati l-aħjar u l-aktar atturi innovattivi fil-katina tal-valur tal-produzzjoni organika tal-UE.

Il-premjijiet #EUOrganic jinkludu 7 kategoriji u 8 premjijiet għall-aħjar produzzjoni organika:

1. bidwi (femminil u maskil)
2. reġjun
3. belt
4. bijodistrett
5. intrapriżi żgħar u ta’ daqs medju
6. bejjiegħ bl-imnut
7. ristorant

Il-KESE, li ilu snin jirrakkomanda politika dwar l-ikel aktar sostenibbli u komprensiva fl-UE, se jkun responsabbli għal tliet premjijiet: l-aħjar SME organika, l-aħjar bejjiegħ bl-imnut tal-ikel organiku, u l-aħjar ristorant organiku. Il-formola ta’ applikazzjoni hija disponibbli hawnhekk. 

L-applikazzjonijiet online se jkunu miftuħa mill-25 ta’ Marzu sat-8 ta’ Ġunju 2022, u se jkunu disponibbli hawnhekk.

Se tiġi organizzata ċerimonja fil-Jum Organiku tal-UE fit-23 ta’ Settembru 2022, fejn ir-rebbieħa se jippreżentaw il-proġetti innovattivi tagħhom u jingħataw rikonoxximent mhux finanzjarju.

Sfond

Il-Kummissjoni ddefiniet mira ta’ 25 % tal-art agrikola tal-UE taħt biedja organika sal-2030. B’appoġġ għal dik il-mira, il-Kummissjoni adottat il-Pjan ta’ Azzjoni għall-Iżvilupp tal-Produzzjoni Organika f’Marzu 2021. Dan il-pjan ta’ azzjoni huwa bbażat fuq il-kunċett li, sabiex jiġu stimulati l-produzzjoni organika u l-konsum tal-prodotti organiċi, huwa kruċjali li l-pubbliku jsir aktar konxju tal-karatteristiċi u l-benefiċċji tagħhom. Għalhekk, il-pjan ta’ azzjoni jinkludi premjijiet annwali bħala waħda mill-istrateġiji biex jintlaħaq dan l-għan. (mr)

Fis-sessjoni plenarja tiegħu tal-24 ta’ Frar, il-Kumitat Ekonomiku u Soċjali Ewropew (KESE) ippreżenta l-Opinjoni “Lesti għall-mira ta’ 55 %”: Nilħqu l-mira klimatika tal-UE għall-2030 fi triqitna lejn in-newtralità klimatika. Il-KESE ressaq proposti konkreti biex jgħin ħalli jitħaffef il-pass tat-tranżizzjoni tal-enerġija, sabiex l-UE tkun tista’ tnaqqas l-emissjonijiet netti ta’ gassijiet serra b’mill-inqas 55 % sal-2030.

It-tilħiq tal-miri riveduti tal-2030, kif propost fil-pakkett “lesti għall-mira ta’ 55 %”, se jkollu impatt mhux uniformi fuq ir-reġjuni, il-komunitajiet u l-individwi madwar l-Ewropa.

Sabiex jiġi indirizzat dan it-tħassib, il-KESE jirrakkomanda li l-Kummissjoni Ewropea twettaq immappjar granulari tal-impatt li t-tranżizzjoni se jkollha fuq l-impjieg u l-ħiliet fil-pajjiżi, ir-reġjuni u s-setturi differenti, inkluż fuq is-sottokuntratturi u l-ktajjen tal-valur downstream.

Jeħtieġ li nibdew mudell li jirriżulta f’ekonomija prospera, sostenibbli u kompetittiva. B’hekk, il-KESE qed jirrakkomanda li l-proposti leġiżlattivi kollha mressqa fil-qafas tal-pakkett “lesti għall-mira ta’ 55 %” għandhom ikunu soġġetti għal verifika tal-kompetittività sabiex l-implikazzjonijiet sħaħ fuq l-intrapriżi jkunu mifhuma sew.

L-imsieħba soċjali u l-organizzazzjonijiet ewlenin tas-soċjetà ċivili għandhom rwol importanti x’jaqdu u jridu jkunu involuti kemm fil-fażijiet tal-ippjanar kif ukoll f’dawk tal-implimentazzjoni tal-pakkett “lesti għall-mira ta’ 55 %”.

Għaldaqstant, “il-KESE jappoġġja l-istabbiliment tal-‘Kummissjonijiet ta’ Tranżizzjoni Ġusta’ tripartitiċi biex jippermettu lill-awtoritajiet reġjonali, lill-imsieħba soċjali u lill-organizzazzjonijiet tas-soċjetà ċivili jipparteċipaw fl-implimentazzjoni tal-pjani nazzjonali u reġjonali ta’ tranżizzjoni ġusta”, enfasizza s-Sur Lohan.

L-indirizzar tat-tibdil fil-klima se jkollu implikazzjonijiet finanzjarji, soċjali u ambjentali enormi. “Din hija r-raġuni għaliex jeħtieġ li niżguraw li l-pakkett “lesti għall-mira ta’ 55 %” ikun pass importanti, aktar milli ostaklu, lejn ekonomija Ewropea newtrali f’termini ta’ emissjonijiet netti sal-2050,” indika s-Sur Mallia. (mr)

Miżuri ta’ emerġenza meħuda mill-awtoritajiet pubbliċi f’ċirkostanzi straordinarji għandhom dejjem ikunu strettament proporzjonati, limitati b’mod ċar fiż-żmien u sorveljati mill-qrib. Huma u jindirizzaw il-plenarja tal-KESE fit-23 ta’ Frar 2022, Christa Schweng, il-President tal-KESE u Věra Jourová, il-Viċi President tal-Kummissjoni Ewropea għall-Valuri u t-Trasparenza, ħadu pożizzjoni soda.

B’referenza għall-kriżi tal-COVID-19 u l-istat ta’ emerġenza ddikjarat minn ħafna Stati Membri tal-UE biex jipproteġu s-saħħa pubblika, li rriżultaw f’restrizzjonijiet fuq diversi drittijiet u libertajiet fundamentali, is-Sinjura Schweng qalet: “Il-pandemija hija test tal-istress għas-soċjetajiet tagħna u għad-demokraziji tagħna. Mill-perspettiva tad-drittijiet fundamentali, l-istat tad-dritt u d-demokrazija, il-KESE ħass li kien essenzjali li s-sitwazzjoni tiġi mmonitorjata mill-qrib. Aħna smajna b’mod partikolari lill-atturi tas-soċjetà ċivili rigward il-konsegwenzi, l-isfidi u l-istrateġiji ta’ ħruġ relatati mal-kriżi. Jeħtieġ li l-UE toħroġ mill-kriżi tal-COVID-19 u ssaħħaħ il-valuri komuni tagħha.”

Is-Sinjura Jourová enfasizzat li l-pandemija tal-COVID-19 uriet bil-qawwa kemm id-drittijiet fundamentali u l-valuri demokratiċi tagħna kienu vitali għall-ħajja tagħna ta’ kuljum u kif dawn ma setgħux jittieħdu bħala fatt: “Tagħlima importanti mill-kriżi tas-saħħa kienet li l-miżuri meħtieġa għall-ġlieda kontra l-pandemija m’għandhomx jittieħdu għad-detriment tal-protezzjoni tal-valuri demokratiċi u d-drittijiet fundamentali. Jeħtieġ li nkunu viġilanti u niddefendu d-drittijiet fundamentali u l-valuri komuni tagħna, li għandhom ikunu ċentrali għar-rispons tagħna għall-COVID-19.”

Il-pożizzjoni tal-KESE dwar l-impatt tal-COVID-19 fuq id-drittijiet fundamentali u l-istat tad-dritt madwar l-UE u l-futur tad-demokrazija ġiet deskritta fl-Opinjoni ppreżentata mill-Grupp dwar id-Drittijiet Fundamentali u l-Istat tad-Dritt tal-KESE, abbozzata minn José Antonio Moreno Díaz u Cristian Pîrvulescu. Fid-dokument, adottat mill-plenarja, il-Kumitat jirrimarka li l-miżuri speċjali biex tiġi indirizzata l-kriżi tal-COVID-19 għandhom jibqgħu eċċezzjonali u limitati fiż-żmien, u m’għandhomx imorru kontra l-istat tad-dritt jew jipperikolaw id-demokrazija, is-separazzjoni tas-setgħat u d-drittijiet fundamentali tal-abitanti Ewropej. (mp)

L-ekoloġizzazzjoni tat-trasport marittimu u fl-ilmijiet navigabbli interni trid tqis is-saħħa u l-kwalità tal-ħajja tal-popolazzjonijiet li jgħixu qrib il-kanali tan-navigazzjoni jew il-portijiet. Dan huwa l-messaġġ ewlieni tal-Opinjoni tal-KESE li tfasslet minn Pierre Jean Coulon, u li ġiet adottata fis-sessjoni plenarja ta’ Frar tal-Kumitat.

Fl-Opinjoni, il-KESE jindirizza d-dimensjoni soċjali tal-kwistjonijiet marbuta mat-trasport marittimu lokali u reġjonali, u jagħmel rakkomandazzjonijiet li huma essenzjali għat-tisħiħ fil-futur tal-ekonomija l-blu, u li jikkomplementaw il-konklużjonijiet taż-żewġ Opinjonijiet li ġew adottati reċentement: FuelEU Maritime (TEN/751) u NAIADES III (TEN/752).

Waqt li kien qed jitkellem mill-marġni tas-sessjoni plenarja, is-Sur Coulon qal: “Neħtieġu approċċ innovattiv u sostenibbli li jikkombina l-objettivi ekoloġiċi u tas-saħħa. Fit-trasport marittimu, hemm bżonn ta’ kooperazzjoni mill-qrib mal-partijiet interessati kollha fir-raggruppament u l-katina tal-provvista biex jintlaħaq l-għan aħħari. Hija meħtieġa wkoll kooperazzjoni mill-qrib biex jiġu żgurati l-benefiċċji evidenti tal-ħolqien ta’ terminals intermodali, li jippermettu l-iżvilupp tat-trasport fl-ilmijiet navigabbli interni fil-bliet u jikkontribwixxu għal kwalità tal-ħajja aħjar”.

It-trasport marittimu jammonta għal madwar 75% tat-trasport tal-merkanzija fl-UE. Għalhekk huwa ferm importanti li jinstab bilanċ bejn l-aspetti ekonomiċi, soċjali u ambjentali permezz ta’ approċċ integrat. L-awtoritajiet tal-port u l-partijiet interessati fis-settur tat-trasport għandhom jaħdmu flimkien mal-awtoritajiet lokali u reġjonali biex jiġu kkunsidrati mill-ġdid ir-rabtiet bejn il-bliet, il-portijiet u l-modi ta’ trasport.

Tħassib ieħor li jeħtieġ li jiġi indirizzat huwa it-taħriġ tal-persunal, il-prospetti ta’ impjieg, it-trattament inugwali bejn l-irġiel u n-nisa, u l-bidliet profondi li ġabu magħhom id-diġitalizzazzjoni u l-awtomatizzazzjoni tal-impjiegi. (mp)

Il-KESE u d-DĠ ECFIN organizzaw konferenza online dwar il-qafas ta’ governanza ekonomika tal-UE bħala parti mid-dibattitu pubbliku relatat. L-avveniment kellu l-għan li jinvolvi lis-soċjetà ċivili bil-ħsieb li jinbena kunsens dwar il-futur tal-qafas ta’ governanza ekonomika.

Il-President tal-KESE Christa Schweng fetħet billi ddikjarat li “minflok ritorn għan-normal, aħna nirrakkomandaw bidla għal qafas ta’ governanza ekonomika rivedut u bilanċjat mill-ġdid orjentat lejn il-prosperità.” Hija enfasizzat ukoll il-ħtieġa li jiġu involuti l-partijiet interessati ewlenin kollha, inklużi l-organizzazzjonijiet tas-soċjetà ċivili. Imbagħad segwa l-Kummissarju għall-Ekonomija, Paolo Gentiloni, li ddikjara li “il-bini ta’ kunsens fil-ħin għall-2023 mhux se jkun biċċa xogħol faċli, iżda rridu naħtfu din l-opportunità unika biex nallinjaw ir-regoli fiskali tagħna mal-ambizzjoni tagħna għal tkabbir b’saħħtu, sostenibbli u inklużiv fl-Ewropa”. Il-Membru tal-Parlament Ewropew Margarida Marques imbagħad ippreżentat ir-rapport tal-PE dwar ir-reviżjoni tal-qafas leġiżlattiv makroekonomiku, u kienet segwita minn diskussjoni tal-panel. L-aħħar parti kienet iddedikata għal kif qafas ta’ governanza ekonomika mġedded jista’ jsolvi l-isfida tad-diskrepanza fl-investiment sabiex tinkiseb it-tranżizzjoni doppja. Ir-relatur tal-KESE Dominika Biegon ippreżentat l-Opinjoni fuq inizjattiva proprja tagħha dwar “Riforma tal-qafas fiskali tal-Unjoni Ewropea għal irkupru sostenibbli u tranżizzjoni ġusta”. (tk)

Alexander Kleinig huwa d-Direttur il-ġdid tal-KESE għall-Komunikazzjoni u r-Relazzjonijiet Interistituzzjonali. Is-Sur Kleinig beda l-karriera tiegħu fil-Parlament Ewropew fl-1996 bħala amministratur tal-Kumitat għall-Impjiegi u l-Affarijiet Soċjali. Fl-2005 ingħaqad mad-DĠ COMM tal-Parlament Ewropew bħala direttur ta’ proġett għaċ-ċentru tal-viżitaturi, fejn ħa ħsieb it-tnedija u l-ġestjoni tal-Parlamentarium bejn l-2011 u l-2018.

“Ninsab impressjonat bil-livell ta’ kwalità tad-dibattiti u l-professjonaliżmu tal-persunal tal-Kumitat. Kull fejn immur qed niltaqa’ ma’ kollegi li huma impenjati, kburin b’xogħolhom u entużjasti. Jiena wkoll emozzjonat b’mod sinċier mill-merħba amikevoli li rċevejt mill-persunal tad-Direttorat D. Nixtieq nieħu din l-opportunità biex nirringrazzja lill-predeċessur tiegħi, is-Sinjura Eleonora Di Nicolantonio, li ħadet ħsieb tant tajjeb tal-ġestjoni tad-direttorat fil-passat.”