KESE info

Il-KESE u l-Kummissjoni Ewropea jeħtieġ li jaħdmu flimkien għal Ewropa li tegħleb il-pandemija u tikkonsolida l-irkupru – Ewropa prosperuża, soċjalment inklużiva u ambjentalment sostenibbli. Dan kien il-messaġġ ewlieni tal-President tal-KESE Christa Schweng lill-President tal-Kummissjoni Ewropea Ursula von der Leyen u lill-Viċi President għar-Relazzjonijiet Interistituzzjonali u l-Prospettiva Maroš Šefčovič fis-sessjoni plenarja tal-KESE ta’ Diċembru.

Is-Sinjura Schweng laqgħet il-fatt li bosta proposti u rakkomandazzjonijiet tal-KESE, kif iddikjarat fir-Riżoluzzjoni tal-KESE ta’ Ġunju 2021, ġew riflessi fil-Programm ta’ Ħidma tal-Kummissjoni Ewropea għall-2022, u qalet li “l-prijoritajiet tagħna huma marbuta mill-qrib ma’ dawk tal-Kummissjoni Ewropea, u għaldaqstant se nkomplu nappoġġjaw l-implimentazzjoni tal-għanijiet ambizzjużi tagħha. Jeħtieġ ukoll li niżguraw li s-soċjetà ċivili organizzata tirnexxi u tgħix f’soċjetà miftuħa u bbażata fuq il-valuri. Ejjew ningħaqdu flimkien u nagħmlu l-Ewropa post mill-aqwa fejn wieħed jistabbilixxi ruħu u jirnexxi!”.

Is-Sinjura von der Leyen irrikonoxxiet il-ħidma li wettaq il-KESE, u qalet li “l-Kumitat dejjem kien ta’ appoġġ kbir u impenjat sew fil-missjoni tiegħu: li jsemma’ l-vuċi tan-nies, il-vuċi tan-negozji, tal-ħaddiema u ta’ organizzazzjonijiet oħra tas-soċjetà ċivili. Se nibqgħu msieħba li naħdmu mill-qrib, kemm fl-ippjanar tal-politika annwali kif ukoll fl-iżvilupp tal-viżjoni fit-tul tagħna”.

Is-Sur Šefčovič tenna kliemha u rringrazzja lill-Kumitat għall-kooperazzjoni mill-qrib tiegħu mal-Kummissjoni Ewropea, u qal li din żammet “ir-rabta bejn iż-żewġ istituzzjonijiet ħajja u b’saħħitha”, u nnota wkoll li “l-membri tal-KESE huma l-aqwa ambaxxaturi tal-Unjoni Ewropea”. (mp)

Il-Kumitat Ekonomiku u Soċjali Ewropew (KESE) laqa’ d-dikjarazzjoni tal-2022 bħala s-Sena Ewropea taż-Żgħażagħ iżda wissa li għandha tmur lil hinn minn sempliċi attivitajiet promozzjonali u għandha tikkontribwixxi għall-istrateġija tal-UE għaż-żgħażagħ bi pjani u impenn ċari. L-inizjattiva trid tilħaq l-aktar żgħażagħ vulnerabbli u dawk f’żoni żvantaġġati.

Biex tikseb dan, l-UE għandha tiżviluppa indikaturi u għanijiet ċari li jiffukkaw fuq il-politiki għaż-żgħażagħ u fuq il-ħidma f’setturi differenti, sabiex l-attivitajiet li jiġu organizzati ma jsirux għan fihom innifishom. Dan qalu l-KESE fl-Opinjoni dwar is-Sena Ewropea taż-Żgħażagħ 2022.

“Il-KESE jispera li jikkollabora b’mod pożittiv mas-Sena Ewropea taż-Żgħażagħ 2022. Irridu li din twassal għal riżultati konkreti għaż-żgħażagħ Ewropej f’oqsma ta’ politika li jħallu iimpatt fuq ħajjithom,” qal ir-relatur għall-Opinjoni, Michael McLoughlin.

Madankollu, il-KESE wera t-tħassib li l-aġenda u l-prijoritajiet għas-sena jidhru imballati, peress li fihom numru kbir ħafna ta’ impenji, referenzi għal inizjattivi oħra, baġits u oqsma ta’ politika.

“Huwa importanti li l-proposta tkun ċara u ffukkata. Xi kultant aħjar ftit inqas, u jista’ jkun hemm biża’ li lista twila ta’ oqsma ta’ politika u responsabbiltajiet kondiviżi tista’ titlef is-sens ta’ enfasi ċara fuq l-eżiti, ir-responsabbiltà u r-riżultati,” enfasizza s-Sur McLoughlin.

Il-KESE jaqbel li l-perjodu u l-kuntest li fihom ittieħdet id-deċiżjoni biex l-2022 tintgħażel bħala s-Sena taż-Żgħażagħ kienu korretti. Il-kriżi tal-COVID-19 kienet partikolarment ħarxa fuq iż-żgħażagħ u se jkollha konsegwenzi dejjiema għall-edukazzjoni tagħhom u għall-benesseri soċjali, finanzjarju u mentali tagħhom. Madankollu, il-KESE jibża’ li l-proposta ġiet żviluppata malajr ħafna.

Dan jippreżenta l-periklu li inizjattivi importanti relatati maż-żgħażagħ jintużaw aktar bħala dikjarazzjonijiet politiċi ta’ profil għoli milli bħala żvilupp sistematiku fit-tul.

Dan jippreżenta wkoll sfida biex is-Sena tiġi implimentata fil-livell nazzjonali, peress li ż-żmien li l-awtoritajiet nazzjonali kellhom biex ifasslu azzjonijiet fl-Istati Membri differenti kien qasir ħafna. Jistgħu wkoll ikollhom diffikultajiet jiksbu l-fondi biex ikopru l-ispejjeż tal-attivitajiet maħsuba għas-Sena.

Il-KESE għalhekk jipproponi baġit b’total ta’ EUR 10 miljun, minflok it-EUR 8 miljun proposti, li minnhom EUR 2 miljun jintużaw għall-koordinazzjoni fil-livell nazzjonali. Dan huwa meħtieġ sabiex jiġi żgurat impatt suffiċjenti u titħeġġeġ il-parteċipazzjoni. (ll)

F’Opinjoni reċenti, il-KESE jitlob li jsir aktar biex jiġu mmirati n-nies u l-organizzazzjonijiet li huma s-sors tad-diżinformazzjoni, filwaqt li tingħata prijorità lill-prevenzjoni aktar milli l-kura.

Il-pandemija tal-COVID-19 enfasizzat dejjem iżjed it-theddida tad-diżinformazzjoni. Fuq dan l-isfond, wara valutazzjoni kritika, il-Kummissjoni Ewropea ppubblikat gwida f’Mejju 2021 bil-għan li ssaħħaħ il-Kodiċi ta’ Prattika dwar id-Diżinformazzjoni tal-UE sabiex toħloq spazju online iżjed sikur u li jispira fiduċja.

F’Opinjoni maħruġa bħala tweġiba, il-KESE jgħid.li l-Kummissjoni tiffoka wisq fuq kontenut u l-moderazzjoni tiegħu – u mhux biżżejjed fuq dawk li joħolqu u jxerrduh l-ewwelnett.

Il-kontenut qed jinbidel il-ħin kollu l-pjattaformi li jintużaw jevolvu, iżda l-atturi ewlenin bażikament jibqgħu l-istess u l-motivi tagħhom ma jinbidlux, qal Thierryu Libaert, relatur għall-Opinjoni.
 
Il-KESE jinnota li d-diżinformazzjoni hija negozju li qed jikber sew u jilqa’ l-enfasi tal-Kummissjoni fuq il-ġlieda kontra s-setgħa ta’ gwadann finanzjarju li għandha d-diżinformazzjoni. L-informazzjoni falza tinxtered sitt darbiet aktar malajr mill-informazzjoni vera, tirċievi “likes” u “shares” aktar siktwit, toħloq aktar attività online, tiġġenera iktar viżitaturi, u għaldaqstant aktar valur u aktar dħul mir-reklamar.

Kif żvelat reċentement il-whistleblower dwar Facebook, Frances Haugen, bil-kontra li jiġġieled kontra dan il-fenomenu, l-impjegatur tagħha għamlu parti integrali tal-mudell kummerċjali tiegħu.

Madankollu, sabiex tiġi indirizzata aħjar id-diżinformazzjoni fis-sors, il-Kummissjoni għandha tikkunsidera “armata” ta’ għodod aktar vinkolanti ekonomiċi, legali u finanzjarji, li jmorru lil hinn mill-impenji volontarji ta’ dawk li jirreklamaw online.

L-Unjoni Ewropea trid takkwista aktar kapaċitajiet biex tkun tista’ tiġġieled b’mod effettiv kontra d-diżinformazzjoni, li tinxtered sistematikament minn poteri ostili, sikwit xprunata minn gvernijiet ta’ ċerti pajjiżi terzi, fosthom ir-Russja u ċ-Ċina, qal ir-relatur.

L-awtoritajiet nazzjonali jeħtieġu aktar appoġġ mis-servizzi tal-intelliġenza, qal il-KESE, filwaqt li ħeġġeġ kooperazzjoni u qsim tal-għarfien mal-UE kollha. Madankollu, billi l-libertà tal-midja u sistemi legali huma f’riskju f’diversi pajjiżi tal-UE, il-Kummissjoni trid tiżgura li l-ġlieda kontra d-diżinformazzjoni ma tintużax bħala skuża biex jiġu limitati l-libertajiet pubbliċi - l-ewwel u qabel kollox il-libertà tal-espressjoni.

B’mod partikolari għal pajjiżi li jinsabu fuq il-fruntiera mar-Russja, il-Kummissjoni għandha tippromovi aktar azzjoni rigward kontenut prodott f’lingwi barra l-Ingliż u tiffoka aktar fuq pjattaformi inqas magħrufa, bħal Vkontakte, Rumble, Odysee, Gab u Parler, kif ukoll fuq dawk l-iktar magħrufin. Filwaqt li tal-ewwel għandhom udjenzi iżgħar, jafu jkunu inqas trasparenti u jimmiraw b’iżjed faċilità lejn gruppi speċifiċi.

Billi qed jinħolqu networks ġodda l-ħin kollu, u l-użu tagħhom qed isir dejjem iżjed sofistikar (bħal “deep fakes”) u xi applikazzjonijiet jistgħu jintużaw kemm bħala pjattaforma kif ukoll bħala servizz għal messaġġi privati (bħal Telegram), riskji ġodda jridu jiġu indirizzati malli jinstabu. (dm)

Fl-aħħar plenarja tiegħu, il-Kumitat Ekonomiku u Soċjali Ewropew kellu dibattitu mal-Kummissarju Ewropew McGuinness dwar kif tista’ tinkiseb sistema ekonomika u finanzjarja Ewropea aktar ekoloġika, aktar sostenibbli u aktar diġitalizzata.

Matul il-Plenarja ġew adottati għadd ta’ Opinjonijiet fi sforz biex jgħinu jwittu t-triq għal UE verament sostenibbli. F’Opinjoni fuq inizjattiva proprja, il-KESE jipproponi li jiġu żviluppati sensiela ta’ indikaturi ġodda biex jikkomplementaw il-PDG u jgħinu fit-tranżizzjoni. F’Opinjoni oħra, il-KESE jappoġġja l-għan li l-investimenti jiġu orjentat mill-ġdid, iżda huwa tal-fehma li l-biċċa l-kbira tal-miżuri proposti tal-KE fl-istrateġija mġedda tagħha dwar il-finanzi sostenibbli spiss jidhru wisq eżitanti u ma jqisux il-kunċett kritiku tas-sostenibbiltà soċjali. Barra minn hekk, it-tassonomija tal-UE ma tħaddanx għanijiet ambjentali u soċjali b’mod ugwali u tħalli dubji dwar ċerti attivitajiet ekonomiċi kontroversjali. Fl-aħħar nett, f’Opinjoni oħra, il-KESE jilqa’ l-idea ta’ Standard Ewropew għall-Bonds Ekoloġiċi volontarju ġdid, u jagħmel rakkomandazzjonijiet kritiċi dwar kif dan jista’ jinbidel fi strument verament b’saħħtu biex jgħin lill-investituri jidderieġu l-investimenti fi proġetti li għandhom impatt pożittiv fuq l-ambjent. (tk)

Il-Kumitat Ekonomiku u Soċjali Ewropew (KESE) talab lill-UE u lill-Istati Membri biex joffru appoġġ sistematiku u maħsub għall-volontarjat. B’dan il-mod, huwa jirrikonoxxi l-impatt enormi tal-volontarjat fuq l-iżvilupp soċjali tal-Ewropa u r-rwol kruċjali tiegħu fl-implimentazzjoni tal-Għanijiet ta’ Żvilupp Sostenibbli tan-NU u t-trawwim tal-inklużjoni soċjali.

Fl-Opinjoni fuq inizjattiva proprja tiegħu dwar il-volontarjat, il-KESE ppropona li l-UE tiddikjara l-2025 is-Sena Ewropea tal-Volontarjat, testendi l-iskemi tal-volontarjat tal-UE u tiffinanzja lill-anzjani u tiżviluppa metodu mal-UE kollha biex tiġbor data dwar il-volontarjat li pajjiżi u organizzazzjonijiet ikunu jistgħu jaqsmu bejniethom.

Ir-relatur tal-Opinjoni, Krzsysztof Pater, qal: “Il-futur tal-Ewropa mhux ħa jinbena minn dawk li jieħdu d-deċiżjonijeit, mill-politiċi jew mill-organizzazzjonijiet tas-soċjetà ċivili, iżda minn ċittadini u volontieri attivi – minn persuni li jiddedikaw il-ħin liberu tagħhom għall-benefiċċju tas-soċjetà.”

Fl-Ewropa, kull sena wieħed minn kull ħamsa huwa involut fil-volontarjat. Stħarriġ reċenti wera li 25% taż-żgħażagħ Ewropej kienu involuti f’attività organizzata ta’ volontarjat kull sena. Kuljum, voluntieri ta’ kull età u ta’ kull sfond soċjali jiddedikat ħinhom għal attivitajiet għal persuni oħrajn jew għall-ambjent, u b’hekk isaħħu s-soċjetà u jibnu futur sostenibbli.

“Huwa meħtieġ appoġġ sistematiku u komplet fil-livell tal-UE u dak nazzjonali għaliex l-impatt tal-volontarjat huwa ħafna drabi ikbar mill-ispejjeż potenzjali,” qal is-Sur Pater. Skont id-data disponibbli, l-attività tal-voluntieri għandha valur ekonomiku reali, li f’ħafna pajjiżi jammonta għal aktar minn 2% tal-PDG.

Mill-aħħar Sena Ewropea tal-Volontarjat fl-2011, il-volontarjat beda gradwalment jisparixxi mill-aġenda Ewropea. Deher biss b’mod sporadiku: l-UE ħolqot il-Voluntiera tal-Għajnuna tal-UE u l-Korp Ewropew ta’ Solidarjetà u għamlet il-volontarjat prijorità fil-programm tagħha "L-Ewropa għaċ-Ċittadini".

Fil-fehma tal-KESE, il-kontribut tal-voluntieri, u l-benessri u s-sens ta’ konnessjoni li jesperjenzaw, jistħoqqilhom rikonoxximent usa’. (ll)

Il-COVID-19 wasslet għal żieda sinifikanti fil-qgħad fost iż-żgħażagħ f’bosta Stati Membri, b’żieda fl-għadd ta’ żgħażagħ li huma barra mill-edukazzjoni, impjieg jew taħriġ (NEETs). F’Opinjoni fuq inizjattiva proprja, il-Kumitat Ekonomiku u Soċjali Ewropew (KESE) isostni li l-pjani nazzjonali ta’ rkupru jirrappreżentaw opportunità biex tinbidel ix-xejra u jiġi żgurat xogħol deċenti għaż-żgħażagħ Ewropej kollha.

“Il-pjani nazzjonali ta’ rkupru huma ta’ opportunità unika li jeħtieġ li tinħataf permezz ta’ governanza inklużiva u bi djalogu miftuħ u trasparenti”, qalet ir-relatur tal-Opinjoni Nicoletta Merlo.

Is-Sinjura Merlo esprimiet dispjaċir li ma kienx hemm “konsultazzjoni sinifikanti mal-imsieħba soċjali, l-organizzazzjonijiet taż-żgħażagħ jew mas-soċjetà ċivili organizzata” matul it-tħejjija tal-pjani nazzjonali ta’ rkupru, u hija qalet li l-KESE appella sabiex dawn il-partijiet ikkonċernati jiġu involuti fl-implimentazzjoni u l-monitoraġġ ta’ dawn il-pjani.

“B’dan il-mod nistgħu nissalvagwardjaw id-djalogu soċjali fil-livell nazzjonali, li huwa essenzjali sabiex niżguraw li l-fondi pubbliċi jintefqu sew sabiex ikollna rkupru inklużiv. Nixtiequ li l-Istati Membri jiżviluppaw xogħlijiet ta’ kwalità u servizzi inklużivi għaż-żgħażagħ, u b’mod partikolari dawk b’diżabbiltajiet u dawk li huma vulnerabbli għal raġunijiet differenti”, enfasizzat is-Sinjura Merlo.

Il-pjani għandhom jagħtu attenzjoni partikolari għat-titjib tal-ħiliet taż-żgħażagħ li għandhom dan il-bżonn, u jagħmlu enfasi fuq il-kuntratti ta’ impjieg indefiniti u kundizzjonijiet ta’ xogħol deċenti li jillimitaw ir-riskju ta’ bosta żgħażagħ li jispiċċaw f’impjieg prekarju, kif qed jiġri ta’ spiss.

Skont iċ-ċifri reċenti tal-Eurostat, persuna minn kull sitta li huma taħt it-30 sena jitilfu xogħolhom minħabba l-konsegwenzi ekonomiċi tal-COVID-19. Huwa partikolarment ta’ tħassib l-għadd dejjem jikber ta’ NEETs li s-sitwazzjoni tagħhom qiegħda tmur dejjem aktar għall-agħar minħabba tluq bikri mill-iskola, in-nuqqas ta’ gwida adegwata, it-telf ta’ impjiegi u n-nuqqas ta’ opportunitajiet ta’ impjieg.

Mod wieħed kif iż-żgħażagħ jitwaqqfu milli ma jkomplux jistudjaw huwa li jiġu promossi traineeships ta’ kwalità, li jistgħu jgħinu liż-żgħażagħ jintegraw ruħhom b’mod aktar faċli fis-swieq tax-xogħol. Għal din ir-raġuni, il-KESE jappella għal projbizzjoni fuq internships mingħajr ħlas u għal remunerazzjoni deċenti għat-trainees kollha. (ll)

Biċ-Ċina u r-Russja fuq l-offensiva, sħubija transatlantika mġedda u affidabbli hija ċ-ċavetta biex jinżammu l-ordni legali internazzjonali u l-paċi. Il-KESE jappoġġja l-idea ta’ Alleanza tad-Demokraziji, li tiżgura li s-soċjetà ċivili jkollha vuċi sinifikanti fid-difiża konġunta tal-valuri u d-drittijiet universali.

F’Opinjoni fuq inizjattiva proprja adottata fis-sessjoni plenarja tiegħu ta’ Diċembru, il-KESE saħaq li, flimkien, l-UE u l-Istati Uniti għandhom ikunu l-gwardjani tal-istat tad-dritt u d-drittijiet tal-bniedem għal kulħadd, u enfasizza l-importanza tar-relazzjonijiet translatlantiċi għar-rwol tal-Ewropa fid-dinja.

Christian Moos, relatur għall-Opinjoni, saħaq li: “L-idea ta’ drittijiet tal-bniedem universali tibqa’ tgħaqqad partijiet kbar tal-UE mad-demokraziji ħielsa tad-dinja, fuq kollox l-Istati Uniti tal-Amerka."

Peter Clever, korelatur żied jgħid li: “Il-karattru universali tad-drittijiet tal-bniedem joħroġ minn dan l-impenn volontarju komprensiv ta’ kulħadd fl-implimentazzjoni [ta’ dawn id-drittijiet]. Dan hu dak li jagħmilhom prezzjużi bħala bażi għad-djalogu u l-fehim”.

Għal dan il-għan, il-KESE jenfasizza bil-qawwa li soċjetà ċivili vibranti biss tista’ toħloq entużjażmu u tissalvagwardja l-valuri, u jħeġġeġ lill-UE tistabbilixxi pjattaforma transatlantika għas-soċjetà ċivili organizzata b’punti ta’ kuntatt fl-Amerika ta’ Fuq u fl-Ewropa. Barra dan, id-djalogu mas-soċjetà ċivili transatlantiku għandu jkun ibbażat fuq firxa ta’ temi, li jinkludu d-drittijiet ċivili, id-diżinformazzjoni u l-azzjoni dwar il-klima.

Il-KESE jappoġġja bil-qawwa l-idea ta’ Alleanza tad-Demokraziji u jappella lill-UE biex tingħaqad fi front komuni mal-Istati Unit u mad-demokraziji l-oħra tad-dinja biex issegwi “strateġija ta’ trażżin kooperattiv fil-konfront taċ-Ċina: trażżin kooperattiv li jirrispetta u jissalvagwardja l-interessi leġittimi Ċiniżi, iżda jwassal għal reazzjonijiet diplomatiċi ċari u robusti meta jinkisru d-drittijiet, bħal fil-każ tad-dimostranti Ujguri u f'Hong Kong. (at)

Il-Kummissjoni Ewropea ppreżentat il-pakkett leġiżlattiv il-ġdid tagħha tal-2021 kontra l-ħasil tal-flus u kontra l-finanzjament tat-terroriżmu (AML/CFT) lill-koleġiżlaturi u lill-Kumitat Ekonomiku u Soċjali Ewropew.

Fl-Opinjoni tiegħu, li ġiet adottata matul is-sessjoni plenarja ta’ Diċembru, il-KESE jappoġġja bis-sħiħ il-proposti, iżda jenfasizza wkoll l-urġenza li jiġu implimentati dawn il-miżuri u jissuġġerixxi żidiet ewlenin. Il-ħolqien tal-Awtorità l-ġdida għall-Ġlieda kontra l-Ħasil tal-Flus (AMLA) intlaqa’ sew. Il-Kumitat itenni wkoll il-proposta tiegħu għal Patt Ewropew għall-ġlieda kontra l-imġiba li tagħmel ħsara lill-prinċipji etiċi u politiċi tad-demokraziji tagħna u timmina l-beni pubbliċi, u jissuġġerixxi l-ħolqien ta’ korp konsultattiv ġdid tas-soċjetà ċivili fil-qasam tal-ġlieda kontra l-ħasil tal-flus. Barra minn hekk, ir-Regolament dwar il-kriptoassi jeħtieġ ukoll li jiġi implimentat b’urġenza. Il-Kummissjoni Ewropea għandha tinsisti wkoll għal azzjoni urġenti fir-rigward tat-traspożizzjoni tardiva u mhux kompluta tad-Direttivi preċedenti dwar il-ġlieda kontra l-ħasil tal-flus f’xi Stati Membri, u għandhom jiġu stabbiliti miżuri speċifiċi għall-monitoraġġ tal-kumpaniji fittizji. Il-Kummissjoni għandha tikkunsidra wkoll kif testendi l-miżuri għall-kanali tal-ħasil tal-flus barra mis-sistema finanzjarja. Fl-aħħar nett, il-KESE jemmen bis-sħiħ li jeħtieġ li titfassal lista ġdida, realistika u komprensiva ta’ pajjiżi terzi b’riskju kbir. (tk)

Il-Konferenza dwar il-ġeopolitika tal-Patt Ekoloġiku Ewropew, li tħejjiet mill-KESE flimkien man-Network ta’ Soluzzjonijiet ta’ Żvilupp Sostenibbli (SDSN), enfasizzat l-implikazzjonijiet ġeopolitiċi fuq firxa wiesgħa tal-Patt Ekoloġiku, kemm għall-Ewropa kif ukoll għad-dinja fit-totalità tagħha. Il-KESE huwa lest li jagħti sehmu f’dan il-proċess, filwaqt li jiżgura sjieda ċara tas-soċjetà ċivili tal-Patt Ekoloġiku Ewropew.

Wara kważi 30 sena mill-Konvenzjoni Qafas tan-Nazzjonijiet Uniti dwar it-Tibdil fil-Klima, l-emissjonijiet li huma ta’ ħsara għall-klima żdiedu bil-kbir sew, skont ir-rapport dwar id-diskrepanza fl-emissjonijiet li ħareġ f’Ottubru 2021.

Christa Schweng, President tal-KESE, enfasizzat: “Huwa għalhekk li t-tranżizzjoni ekoloġika hija kwistjoni ta’ sopravivenza kemm għall-Ewropa kif ukoll għad-dinja fil-wisa’ kollha tagħha. Is-soċjetà ċivili organizzata jista’ jkollha rwol kruċjali f’dan ir-rigward. M’għandniex ninsew li tranżizzjoni ekoloġika ta’ suċċess teħtieġ, l-ewwel u qabel kollox, l-appoġġ taċ-ċittadini tagħna.”

Il-Kummissarju għall-Enerġija Kadri Simson żiedet tgħid: “Il-relazzjonijiet mal-imsieħba tagħna se jinbidlu. Kulħadd irid ikun involut jekk irridu nsolvu l-kriżi klimatika. Sistema ġdida tal-enerġija se ġġib magħha relazzjonijiet ġodda.”

Barbara Pompili, il-Ministru Franċiż għat-tranżizzjoni ekoloġika, qalet li l-Patt Ekoloġiku u t-tranżizzjoni ekoloġika ser jaffettwaw b’mod drammatiku r-relazzjonijiet internazzjonali. L-Ewropa għandha tkun ambizzjuża kemm jista’ jkun fit-tnaqqis tal-emissjonijiet, fil-protezzjoni u r-restawr tal-bijodiversità u fil-ġlieda kontra t-tniġġis. Is-solidarjetà għandha rwol vitali fl-iżgurar tal-Patt Ekoloġiku u fl-iżgurar ta’ tranżizzjoni verament ġusta. L-enfasi ewlenija għandha tkun fuq it-tranżizzjoni ekoloġika tas-settur tal-enerġija, u l-azzjonijiet ġeopolitiċi tal-UE għandhom għalhekk jgħinu biex titnaqqas il-volatilità tal-prezzijiet tal-enerġija, filwaqt li jitnaqqsu r-riskji relatati mal-promozzjoni u l-espansjoni tal-użu tal-enerġija nadifa. Awtonomija strateġika miftuħa teħtieġ ktajjen tal-valur ġodda, fejn l-iżviluppi kollha għandhom ikunu akkumpanjati minn impjiegi lokali ta’ kwalità u redditi għall-komunitajiet lokali. (at)

Il-51 laqgħa tal-Kumitat ta’ Segwitu tal-Balkani tal-Punent poġġiet fiċ-ċentru tal-attenzjoni r-riżoluzzjoni tal-kunflitti u n-normalizzazzjoni tar-relazzjonijiet bejn il-Kosovo* u s-Serbja. Il-laqgħa, ippreseduta minn Ionuţ Sibian, ospitat kelliema prominenti mill-gradi ta’ uffiċjali tal-UE, esperti tal-Balkani tal-Punent, kif ukoll rappreżentanti tas-soċjetà ċivili mill-komunitajiet lokali, li kollha qablu li d-djalogu ffaċilitat mill-UE kien l-uniku mod biex nimxu ’l quddiem.

Miroslav Lajčák, Rappreżentant Speċjali tal-Unjoni Ewropea għad-Djalogu bejn Belgrad u Pristina u kwistjonijiet reġjonali oħrajn tal-Balkani tal-Punent, ipprovda ħarsa ġenerali tad-djalogu ffaċilitat mill-U u sfidi relatati, u wera dispjaċir li għal darb’oħra d-deċiżjoni kellha tkun iffokata fuq ir-riżoluzzjoni tal-kunflitt, milli fuq it-tlestija tal-proċess ta’ normalizzazzjoni.

Marko Prelec, mill-Grupp dwar il-Kriżi, iddikjara li ftehim komprensiv bejn il-Kosovo u s-Serbja ma kienx għan realistiku għalissa, peress li kwalunkwe ftehim bħal dan ikun jinkludu rikonoxximent reċiproku.

Leon Hartwell, miċ-Ċentru għall-Analiżi tal-Politika Ewropea, ilmenta dwar il-fatt li ftit li xejn hemm rieda politika biex jiġu implimentati t-30 ftehim innegozjati mill-UE bejn il-Kosovo u s-Serbja.

Branislav Staníček, mis-Servizz ta’ Riċerka tal-Parlament Ewropew (EPRS), enfasizza l-importanza ta’ kooperazzjoni transatlantika biex id-djalogu ta’ normalizzazzjoni jirnexxi. Il-parteċipanti mill-organizzazzjoni tas-soċjetà ċivili lokali minn Belgrade, Pristina u Mitrovica ta’ Fuq enfasizzaw l-importanza li jinħolqu kundizzjonijiet sabiex titnaqqas id-diviżjoni etnika bejn il-komunitajiet.

*Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244 u l-Opinjoni tal-QIĠ dwar id-dikjarazzjoni tal-indipendenza tal-Kosovo. (at)

Il-Kumitat Ekonomiku u Soċjali Ewropew (KESE) appella għal sensiela ta’ miżuri biex jiġi żgurat li kulħadd jiġi kkonsultat u jibbenefika mill-proposti tal-pakkett “lesti għall-mira ta’ 55 %” tal-Kummissjoni Ewropea, li jpoġġu lill-UE fit-triq it-tajba biex tnaqqas l-emissjonijiet tal-karbonju b’55 % sal-2030.

“It-tilħiq tal-miri riveduti tal-2030, kif propost fil-pakkett “lesti għall-mira ta’ 55 %”, se jkollu impatt mhux uniformi fuq ir-reġjuni u l-komunitajiet madwar l-Ewropa. Għalhekk, huwa ta’ importanza kbira li l-mekkaniżmi ta’ solidarjetà jitfasslu sew u jiġu ffinanzjati b’mod adegwat, sabiex niksbu tranżizzjoni soċjalment ġusta, kompettitiva u ekoloġika”, qal Cillian Lohan, Viċi President tal-KESE.

L-Opinjonijiet u l-konklużjonijiet komuni tal-KESE

Fl-Opinjonijiet tiegħu (total ta’ 22 Opinjoni), il-KESE< style="color:blue">< class="underline">jappoġġja bil-qawwa l-pakkkett bħala strument meħtieġ biex tiġi aċċellerata t-tranżizzjoni tal-enerġija u tinkiseb in-newtralità klimatika. Madankollu, huwa jenfasizza li l-politiki jridu jiżguraw il-bilanċ it-tajjeb bejn l-ekwità soċjali, it-tnaqqis tal-emissjonijiet u l-kompettività.

Ir-rakkomandazzjonijiet komuni tal-KESE:

• Għalkemm ċerti setturi huma milquta bil-kbir mill-miżuri proposti tal-pakkett, it-tranżizzjoni lejn industrija ekoloġika se tiġġenera possibiltajiet għal setturi oħra. L-għan irid ikun li jiġu żgurati politiki bilanċjati li jappoġġjaw lil dawk li ntlaqtu ħażin mit-tranżizzjoni klimatika.
• Huma meħtieġa programmi ta’ titjib tal-ħiliet u ta’ taħriġ mill-ġdid kemm għall-imprendituri kif ukoll għall-ħaddiema sabiex jiġi żgurat l-aċċess għat-teknoloġiji l-aktar ġodda disponibbli u għal ħiliet diġitali u sostenibbli.
• L-involviment tas-soċjetà ċivili huwa fundamentali għat-trasparenza, ir-responsabbiltà, u għall-istabbiliment ta’ politika ekonomika bilanċjata fl-UE, fejn l-interessi kollha jiġu rikonċiljati.
• L-imsieħba soċjali u l-organizzazzjonijiet rilevanti tas-soċjetà ċivili għandhom rwol importanti x’jaqdu u jridu jkunu involuti kemm fil-fażijiet tal-ippjanar kif ukoll f’dawk tal-implimentazzjoni tal-pakkett Lesti għall-Mira ta’ 55 %.

Huwa kruċjali li t-tranżizzjoni ma tħalli lil ħadd jibqa’ lura, li jfisser li ċ-ċittadini jeħtiġilhom ikunu fil-qalba tat-tranżizzjoni ekoloġika. (mr)

Il-Kumitat Ekonomiku u Soċjali Ewropew adotta Opinjoni fuq inizjattiva proprja dwar Kif l-industriji li jużaw ħafna riżorsi u enerġija jistgħu jisfruttaw il-pjan ta’ rkupru tal-UE fit-tranżizzjoni soċjalment aċċettabbli tagħhom lejn id-dekarbonizzazzjoni u d-diġitalizzazzjoni. Il-KESE jħeġġeġ lill-Kummissjoni u lill-istituzzjonijiet l-oħra tal-UE biex jiggarantixxu kundizzjonijiet ekwivalenti ta’ kompetizzjoni fi ħdan is-suq uniku, biex jiġu evitati vantaġġi żbilanċjati għall-industrija skont l-approċċ ta’ kull Stat Membru.

Il-produzzjoni industrijali fl-Ewropa ntlaqtet ħażin ħafna mill-pandemija, u l-kumpaniji Ewropej f’setturi b’konsum għoli ta’ riżorsi u enerġija, li diġà kienu jinsabu f’sitwazzjoni prekarja, issa jridu jaffaċċjaw ukoll din il-kriżi mhux mistennija. Fl-istess ħin, il-kumpaniji Ewropej f’setturi li jużaw ħafna riżorsi u enerġija qed jaffaċċjaw ukoll il-ħtieġa urġenti li jadattaw għall-objettivi ta’ politika Ewropej sabiex jiġi indirizzat it-tibdil fil-klima permezz tal-implimentazzjoni tal-Patt Ekoloġiku Ewropew.

“It-tranżizzjoni industrijali mhux se tinkiseb jekk it-tranżizzjoni tal-enerġija ma tiġix implimentata. Ir-riċerka u l-innovazzjoni u l-implimentazzjoni tajba tal-pjani ta’ rkupru tal-UE huma kruċjali għal tranżizzjoni ġusta f’konformità mal-għan tan-newtralità karbonika. Għaldaqstant, id-disponibbiltà ta’ sorsi ta’ enerġija suffiċjenti u affordabbli b’livell baxx ta’ emissjonijiet tal-karbonju li jagħmlu possibbli l-produzzjoni industrijali b’livell baxx ta’ emissjonijiet tal-karbonju se tkun kruċjali”, qal ir-relatur Andrés Barceló Delgado.

“Huwa fundamentali li tiġi żgurata tranżizzjoni ġusta għall-industriji li jużaw ħafna riżorsi u enerġija. Il-Faċilità għall-Irkupru tal-UE u l-pjani nazzjonali relatati għall-irkupru u r-reżiljenza jridu jwasslu għall-ħolqien u ż-żamma ta’ impjiegi ta’ kwalità, jinvolvu lill-imsieħba soċjali, u jappoġġjaw it-tranżizzjonijiet tal-ħaddiema permezz tat-taħriġ mill-ġdid u tat-titjib tal-ħiliet”, qal il-korelatur Enrico Gibellieri. (ks)
 

Il-Presidenza Franċiża tal-Kunsill tal-Unjoni Ewropea tinsab f’mument deċiżiv, fi żmien meta l-Unjoni Ewropea qed tiffaċċja bosta sfidi tas-saħħa, soċjali, ekonomiċi u ambjentali.

Fost il-prijoritajiet prinċipali tagħha hemm l-ambizzjoni ta’ Ewropa aktar sovrana fir-rigward tal-migrazzjoni, tad-difiża u tal-politika tal-viċinat, flimkien ma’ għanijiet prinċipali oħra, bħall-bini ta’ mudell Ewropew ġdid li jgħaqqad id-dimensjonijiet ekonomiċi, ambjentali u soċjali, jew it-tisħiħ tas-sens tagħna ta’ sħubija komuni, ir-raġuni għalfejn jeżisti l-proġett Ewropew u l-kwistjoni fil-qalba tal-konferenza dwar il-futur tal-Ewropa. Matul il-Presidenza tagħha tal-Kunsill tal-Unjoni Ewropea, Franza beħsiebha tisma’ b’attenzjoni liż-żgħażagħ, li fl-2022 se jkun fl-ewwel post minħabba s-Sena Ewropea taż-Żgħażagħ.

Determinat li jikkoopera mill-qrib mal-Presidenza Franċiża u li jsemma leħen l-organizzazzjonijiet tas-soċjetà ċivili Ewropea, il-Kumitat Ekonomiku u Soċjali Ewropew jinsab kuntent bil-possibbiltà li jaħdem magħha sabiex iwettaq Unjoni Ewropea b’saħħitha u qrib iċ-ċittadini tagħha. Dan il-fuljett jippreżenta l-attivitajiet u l-inizjattivi prinċipali li l-KESE se jwettaq biex jappoġġja l-isforzi ta’ din il-Presidenza.
Il-fuljett huwa disponibbli bl-EN, il-FR u l-DE fis-sit web tal-KESE. Tista’ titlob kopja stampata billi tikkuntattja lil vipcese@eesc.europa.eu.  (af)