KESE info

L-implimentazzjoni tal-Pjani Nazzjonali għall-Irkupru u r-Reżiljenza (NRRPs) fil-biċċa l-kbira tal-Istati Membri tal-UE teħtieġ sistemi ta’ governanza ċċarati. Id-distribuzzjoni tar-responsabbiltajiet bejn il-livelli ċentrali, reġjonali u lokali għadha mhix ċara. Il-KESE qed jallerta dwar dan u, fl-Opinjoni dwar L-Istrateġija Annwali għat-Tkabbir Sostenibbli 2021 adottata fis-sessjoni plenarja tiegħu ta’ Ottubru u mfassla minn Gonçalo Lobo Xavier, jenfasizza li l-mekkaniżmi għall-involviment tal-organizzazzjonijiet tas-soċjetà ċivili u l-imsieħba soċjali fil-fażijiet ta’ implimentazzjoni, monitoraġġ u aġġustament tal-NRRPs jeħtieġu aktar ċarezza.

Il-KESE diġà indika din il-kwistjoni fir-riżoluzzjoni tiegħu ta’ Frar, iżda s-sitwazzjoni baqgħet li kienet minkejja l-isforzi tal-Kummissjoni Ewropea. Il-KESE għaldaqstant jappella bil-qawwa għal aktar skrutinju ta’ dawn l-aspetti kruċjali għall-irkupru tal-UE.

“Niġbdu l-attenzjoni għall-ħtieġa li nkejlu l-progress fl-implimentazzjoni tal-Pjani Nazzjonali għall-Irkupru u r-Reżiljenza. Neħtieġu indikaturi ta’ monitoraġġ tajbin, peress li dawn huma essenzjali biex inwittu t-triq għall-iżvilupp u l-irkupru futur tal-UE. L-Istati Membri jridu jwieġbu b’mod adegwat għal din l-isfida: jeħtieġ li nkunu kuraġġużi biex ninfurmaw liċ-ċittadini dwar id-diffikultajiet kbar li ġejjin,” qal is-Sur Lobo Xavier, waqt id-dibattitu.

Fl-Opinjoni dwar Il-politika ekonomika taż-żona tal-euro 2021, abbozzata minn Kristi Sõber, il-KESE indika wkoll li l-pandemija għada ma spiċċatx u li r-riperkussjonijiet ekonomiċi se jinħassu għall-bosta snin. Għalhekk hija meħtieġa taħlita speċifika u ġdida ta’ politiki ekonomiċi u ta’ emerġenza. L-ekonomiji tal-UE u taż-żona tal-euro qed jerġgħu jikbru malajr. Fl-istess ħin, madankollu, l-UE għaddejja mill-aktar perjodu diffiċli fl-istorja ekonomika tal-integrazzjoni Ewropea. F’dan iż-żmien kritiku, l-infiq tal-gvern biss jista’ jgħin biex itaffi s-sitwazzjoni.

Il-KESE japprezza r-reazzjoni rapida fil-livell tal-UE u dak nazzjonali kontra l-pandemija u jilqa’ l-fatt li l-isforzi konġunti saru parti sostanzjali mill-istrateġija ta’ rkupru. Waqt id-diskors tagħha fil-plenarja, is-Sinjura Sõber qalet: “Speċjalment fl-ewwel nofs tal-2020, l-Inizjattivi ta’ Investiment fir-Rispons għall-Coronavirus għenu biex jittaffew iċ-ċirkostanzi ekonomiċi diffiċli ħafna, prinċipalment billi stabbilizzaw is-swieq, l-impjiegi u l-introjtu personali. Dan l-ewwel pass kien segwit minn NextGenerationEU, il-kontribut fiskali robust u innovattiv ħafna. Iż-żewġ inizjattivi kienu rispons rapidu u flessibbli għall-pandemija. (mp)

Il-Kummissjoni Ewropea għandha timxi ‘l quddiem fil-proċess tal-valutazzjoni tal-impatt multisettorjali tat-teknoloġiji l-ġodda tal-5G u tas-6G. Jinħtieġu għodod u miżuri biex jiġu indirizzati r-riskji u l-vulnerabbiltajiet. Fl-Opinjoni mfassla minn Dumitru Fornea u adottata mill-assemblea fis-sessjoni plenarja ta’ Ottubru, il-KESE jieħu pożizzjoni soda, u jinnota li l-kwistjonijiet soċjali, tas-saħħa u ambjentali jeħtieġ li jiġu eżaminati, bl-involviment taċ-ċittadini u l-atturi rilevanti kollha, minkejja l-fatt li d-dibattitu dwar l-implimentazzjoni tan-networks 5G inbidel f’diskussjoni politika kontroversjali.

Waqt li kien qed jitkellem mill-marġni tas-sessjoni plenarja, is-Sur Fornea qal: “Id-diġitalizzazzjoni u l-iżvilupp rapidi tal-komunikazzjonijiet elettroniċi għandhom impatt qawwi fuq l-ekonomija u s-soċjetà inġenerali. Permezz tal-użu responsabbli ta’ dawn it-teknoloġiji, l-umanità għandha possibbiltà storika li tibni soċjetà aħjar. Madankollu, mingħajr diliġenza dovuta u kontroll demokratiku, il-komunitajiet tagħna jistgħu jiffaċċjaw sfidi serji fl-amministrazzjoni ta’ dawn is-sistemi teknoloġiċi fil-futur.”

Il-pandemija wriet li l-infrastuttura tal-komunikazzjonijiet elettroniċi taqdi rwol importanti fis-soċjetà u tista’ ttejjeb bil-bosta l-kwalità tal-ħajja taċ-ċittadini, b’impatt dirett fuq il-ġlieda kontra l-faqar. Madankollu, il-periklu potenzjali jeħtieġ li jiġi vvalutat kontinwament. Għal din ir-raġuni, il-KESE jirrakkomanda li għandhom jiġu allokati fondi Ewropej u nazzjonali sabiex jitwettqu riċerka multidixxiplinari u studji tal-impatt profondi li jiffokaw fuq il-bniedem u l-ambjent, u biex dawn ir-riżultati jixxerrdu bil-ħsieb li jinformaw lill-pubbliku u lil dawk li jieħdu d-deċiżjonijiet. (mp)

L-inizjattiva l-ġdida tal-Kummissjoni Ewropea biex tħaffef it-tkabbir ta’ suq għal fjuwils tal-avjazzjoni sostenibbli (SAF) hija pass fid-direzzjoni t-tajba, iżda huma meħtieġa xi modifiki biex jiġi żgurat li tista’ tiġi implimentata b’mod effettiv, mingħajr ma jinħolqu distorsjonijiet. Dan huwa l-messaġġ ewlieni tal-Opinjoni dwar il-proposta RefuelEU Aviation, abbozzata minn Thomas Kropp u adottata fil-plenarja ta’ Ottubru.

“Tabilħaqq huwa minnu li l-fjuwils tal-avjazzjoni sostenibbli – jekk jiġu prodotti fi kwantitajiet suffiċjenti u jkunu disponibbli għal-linji tal-ajru kollha – inaqqsu b’mod sinifikanti l-emissjonijiet tas-CO₂ tas-settur. Madankollu, mhuwiex ċar jekk l-approċċ segwit mill-Kummissjoni huwiex se jipprevjeni distorsjonijiet għall-kompetizzjoni,” qal is-Sur Kropp.

L-avjazzjoni hija settur tas-servizzi internazzjonali u tkopri żewġ swieq distinti b’dinamika differenti tas-suq: is-Suq Uniku Ewropew taż-ŻEE minn naħa waħda, u min-naħa l-oħra s-suq regolat fuq livell internazzjonali. L-abbozz ta’ proposta tal-Kummissjoni għandu jirrifletti b’mod ċar din id-differenza, u għandu jkollu l-għan li jżomm kundizzjonijiet ekwi fi ħdan iż-ŻEE, filwaqt li jippromovi b’mod proattiv u globali standards applikabbli għas-sostenibbiltà.

Dwar il-kwistjoni tal-emissjonijiet tas-CO2, is-Sur Kropp fassal Opinjoni dwar Skema ta’ Kumpens u Tnaqqis tal-Karbonju għall-Avjazzjoni Internazzjonali (CORSIA), li ġiet adottata wkoll fil-plenarja ta’ Ottubru. Fid-dokument, il-KESE japprova l-proposta tal-Kummissjoni li temenda d-Direttiva 2003/87/KE fir-rigward tan-notifika ta’ kumpens fl-2021, li tappoġġja l-adozzjoni urġenti tagħha sabiex tinkiseb ċertezza legali. (mp)

L-avvenimenti reċenti kkawżati mill-COVID-19, it-temp estrem minħabba t-taqlib fil-klima, l-attakki ċibernetiċi u l-Brexit juru l-ħtieġa li nerġgħu nikkunsidraw il-prijoritajiet u mtejbu r-reżiljenza u s-sostenibbiltà tas-sistemi tal-ikel tal-UE, billi tissaħħaħ l-awtonomija tagħha. Is-sigurtà tal-ikel mhix awtomatika għal bosta ċittadini tal-UE.

Fil-fehma tal-KESE, huwa kritiku li jiġi żviluppat sett ta’ għodod li jinkludi miżuri ta’ ġestjoni tar-riskju biex jgħinu lill-ktajjen tal-provvista tal-ikel jindirizzaw sitwazzjonijiet estremi li jgħinu lill-awtoritajiet, lill-bdiewa u lill-industrija jieħdu azzjoni immedjata.
Il-KESE, fl-Opinjoni fuq inizjattiva proprja tiegħu dwar L-awtonomija strateġika u s-sigurtà u s-sostenibbiltà tal-ikel, jipproponi definizzjoni ta’ awtonomija strateġika miftuħa li tapplika għal sistemi tal-ikel ibbażati fuq il-produzzjoni tal-ikel, il-forza tax-xogħol u l-kummerċ ġust, bil-għan ġenerali li jiġu żgurati s-sigurtà u s-sostenibbiltà tal-ikel għaċ-ċittadini kollha tal-UE permezz ta’ katina tal-provvista tal-ikel ġusta, tajba għas-saħħa, sostenibbli u reżiljenti.
“L-irziezet, l-art agrikola fertili u l-ilma huma assi strateġiċi u għandhom ikunu protetti madwar l-UE: dawn jikkostitwixxu s-sinsla tal-awtonomija strateġika u miftuħa tal-ikel tagħna,” enfasizza r-relatur tal-KESE għal din l-Opinjoni Klaas Johan Osinga. (mr)

Il-KESE jistieden lil dawk li jfasslu l-politika biex jimplimentaw strateġija komprensiva u olistika għal żvilupp rurali u urban bilanċjat, koeżiv, ekwu u sostenibbli. Dan se jinvolvi l-isfruttar għaqli tar-rwol tal-komunitajiet lokali, it-tisħiħ tal-industriji tradizzjonali u l-ħolqien ta’ attivitajiet ekonomiċi u opportunitajiet ta’ impjiegi ġodda fiż-żoni rurali, filwaqt li jitrawmu sinerġiji maż-żoni urbani.

L-Opinjoni tal-KESE Lejn strateġija olistika dwar l-iżvilupp rurali/urban sostenibbli tagħmel diversi rakkomandazzjonijiet, ibbażati fuq l-involviment ta’ diversi partijiet u approċċ minn isfel għal fuq, li huma l-ingredjenti ewlenin sabiex jiġu żgurati s-sostenibbiltà u s-sjieda lokali tal-politiki rurali.

Koordinazzjoni trasversali u politiki mfasslin apposta huma kruċjali

“Huwa essenzjali li nimxu lejn approċċ integrat għall-azzjoni u l-finanzjament fil-politiki varji li għandhom impatt fuq iż-żoni rurali. Jeħtieġ li jiġi żgurat li ż-żoni rurali ma jkunux biss sostenibbli iżda anke postijiet attraenti biex wieħed jgħix fihom. Il-kwalità tal-ħajja fid-dinja rurali se titkejjel biż-żieda fl-għadd ta’ żgħażagħ u inizjattivi ġodda li jipprovdu impjiegi ta’ kwalità u mħallsa tajjeb”, indika r-relatur Josep Puxeu Rocamora. (mr)

Il-qafas fiskali tal-UE jeħtieġ li jiġi rivedut Dan għandu jsir mhux biss biex l-ekonomija tiġi stabbilizzata fuq terminu medju, iżda wkoll biex tiġi ffinanzjata t-trasformazzjoni soċjoekoloġika tal-ekonomija tagħna u biex jiġu garantiti impjiegi sħaħ, impjiegi ta’ kwalità għolja u tranżizzjonijiet ġusti. L-opinjoni mfassla minn Dominika Biegon u adottata mill-assemblea fis-sessjoni plenarja ta’ Ottubru hija ċara: il-Kummissjoni Ewropea għandha tipproċedi bir-reviżjoni tal-qafas ta’ governanza ekonomika tal-UE.

Meta tkellmet waqt id-dibattitu, is-Sinjura Biegon qalet: “Il-KESE jippromovi soluzzjonijiet prammatiċi għall-futur tal-qafas fiskali tal-UE: l-Opinjoni tagħna turi kif jistgħu jingħelbu l-firdiet ideoloġiċi fid-dibattitu dwar id-djun sovrani. Ir-regoli fiskali tal-UE jistgħu jittejbu b’mod sinifikanti mingħajr ma jinbidlu t-Trattati tal-UE. Nistgħu ntemmu n-nuqqas kroniku ta’ investiment pubbliku u nagħtu lill-Istati Membri aktar liberta biex jiġġieldu t-tnaqqis fir-ritmu ekonomiku b’mod adegwat fil-futur mingħajr ma jipperikolaw is-sostenibbiltà fiskali. L-istituzzjonijiet tal-UE m’għandhomx jitilfu l-ħin biex jipproponu riformi sabiex iwittu t-triq għal irkupru sostenibbli u tranżizzjoni ġusta."

L-organizzazzjonijiet tas-soċjetà ċivili jridu jkunu wkoll involuti aktar fis-Semestru Ewropew kemm fil-livell nazzjonali kif ukoll fil-livell tal-UE. Il-prinċipju tas-sħubija, li ilu tradizzjoni fil-governanza tal-Fondi Strutturali u ta’ Investiment Ewropej, għandu jservi bħala pjan ta’ azzjoni għal mekkaniżmu tal-involviment effettiv tas-soċjetà ċivili. (mp)

F’Opinjoni fuq inizjattiva proprja adottata fis-sessjoni plenarja ta’ Ottubru, il-KESE stabbilixxa miżuri għar-reklamar biex jadatta għall-isfidi tat-tibdil fil-klima u l-irkupru wara l-pandemija filwaqt li jkompli jaqdi r-rwol importanti tiegħu fl-ekonomija u l-kultura tal-Ewropa.

Il-Kumitat Ekonomiku u Soċjali Ewropew jirrakkomanda qafas għal industrija moderna tar-reklamar li żżomm rwol fundamentali fit-tkabbir ekonomiku, il-ħolqien tal-impjiegi u l-appoġġ għall-kultura Ewropea, filwaqt li ssir lieva affidabbli għal konsum responsabbli.

Skont diversi studji, kull euro li jintefaq fuq ir-reklamar jiġġenera 5 sa 7 darbiet aktar għall-ekonomija tal-Ewropa. Qed jinfirxu prodotti u servizzi ġodda, il-kompetizzjoni qed tespandi u l-aċċess pubbliku għall-midja, l-arti u l-isport qed jiġi ffinanzjat. Iżda fl-istess ħin, l-industrija ħafna drabi tiġi kkritikata talli tippromovi konsum żejjed u għal impatti negattivi fuq is-soċjetà u l-ambjent.

“Qed nippruvaw nesploraw il-mod kif dan is-settur għandu jevolvi sabiex jibqa’ effiċjenti iżda fl-istess ħin jiżgura li l-iżvilupp tiegħu jkun kompatibbli mal-iżvilupp sostenibbli,” spjega Thierry Libaert, relatur tal-Opinjoni.

L-ewwel nett, il-KESE jistieden lin-negozji u lill-aġenziji biex jiddibattu dwar kif jistgħu jnaqqsu l-emissjonijiet tagħhom tal-gassijiet serra b’55 % sal-2030 u biex ikunu newtrali f’termini ta’ emissjonijiet tal-karbonju sal-2050.

Is-sostenibbiltà għandha tiġi inkorporata f’kull kampanja promozzjonali. F’termini prattiċi, l-operaturi tar-reklamar jistgħu jiġu mħeġġa jnaqqsu l-konsum tal-enerġija tal-billboards diġitali jew jagħmluhom aktar riċiklabbli. Biex jiġu limitati l-impatti ambjentali tar-reklamar stampat, in-negozji jistgħu jużaw karta minn foresti ġestiti b’mod sostenibbli, ttikkettata PEFC u FSC, u linek b’tossiċità baxxa li jikkonformaw mal-istandards REACH tal-UE u tal-GreenGuard.

Il-prattiki ta’ reklamar jistgħu wkoll “iħeġġu” lill-konsumaturi biex inaqqsu l-impronta ambjentali kollettiva tagħhom. Pereżempju, ir-reklami jistgħu jinkoraġġixxu l-kondiviżjoni tal-karozzi billi juru inqas sewwieqa waħedhom fil-karozzi tagħhom. Il-prattika tajba għandha tissaħħaħ permezz ta’ enfasi aktar qawwija fuq kwistjonijiet ambjentali fil-korsijiet universitarji għall-professjonijiet tal-komunikazzjoni.

Diskussjoni oħra li jmissha ilha li saret hija dwar rappreżentazzjonijiet mhux realistiċi, bħal prodotti dannużi li jintużaw darba biss li qed jiġu ppreżentati bħala “sostenibbli”. Fil-fatt, studju tal-2020 mill-awtoritajiet nazzjonali tal-konsumatur u l-Kummissjoni Ewropea sab li 42 % tad-dikjarazzjonijiet tal-prodotti “ekoloġiċi” fuq is-siti web tal-kumpaniji ma kinux veri jew kienu eżaġerati.

Fil-fehma tal-KESE, kunsens usa’ fi ħdan il-katina tar-reklamar dwar il-ħtieġa li tiġi pprovduta informazzjoni fattwali u preċiża jippermetti li aktar konsumaturi jidentifikaw prodotti b’impatt ambjentali ġenwinament imnaqqas. Hawnhekk il-Kummissjoni Ewropea għandha rwol fil-ħidma biex titwettaq regolamentazzjoni fl-UE kollha li tappoġġja l-industrija tar-reklamar fil-ġlieda tagħha kontra d-diżinformazzjoni.

Dan l-approċċ għandu jipprovdi wkoll inċentivi biex dawk li jirreklamaw iħossuhom responsabbli biex jikkonformaw ma’ dawn l-istandards. L-appoġġ inaqqas ir-riskju li dawk li jirreklamaw jemigraw lejn kumpaniji tat-teknoloġija barranin li jikkontrollaw il-parti l-kbira tas-sistemi ta’ reklamar diġitali u jsaħħu industrija li tibqa’ ċentrali għat-tranżizzjoni tal-Ewropa għal konsum aktar sostenibbli. (dm)

 

Strateġija industrijali ta’ wara l-pandemija sabiex tiżgura rkupru b’saħħtu trid tinkludi lis-soċjetà ċivili, jenfasizza l-KESE f’rapport reċenti dwar l-abbozz ta’ strateġija industrijali ġdida tal-UE. Hija trid tiffoka fuq is-sostenibbiltà u l-benesseri, tkejjel l-impatt soċjali u tippromovi sistema tal-kura tas-saħħa effiċjenti u aċċessibbli.

Il-pandemija tal-COVID-19 esponiet dgħufijiet fl-ambjent ekonomiku tal-Ewropa, b’mod partikolari inugwaljanzi reġjonali, diskrepanza fil-ħiliet, u riskji fir-rigward tas-suq uniku u l-provvista ta’ oġġetti strateġiċi. Fid-dawl ta’ dawn il-lezzjonijiet, il-Kummissjoni Ewropea aġġornat il-pjan tagħha għal xenarju industrijali aktar ekoloġiku, diġitali u kompetittiv, l-Istrateġija Industrija ġdida għall-Ewropa.

Il-KESE fassal rapport dwar l-aġġornamenti, u Opinjoni supplimentari li tenfasizza l-kundizzjonijiet għal ekosistema tal-kura tas-saħħa inklużiva u innovattiva li tista’ tirfed l-industrija fl-UE.

Fir-rapport, il-KESE jappella sabiex il-gruppi kollha involuti fl-ekonomija tal-Ewropa jsawru l-futur tagħha, mit-trade unions, l-industrija u l-SMEs għal organizzazzjonijiet oħra tas-soċjetà ċivili u l-awtoritajiet pubbliċi. L-istrateġija attwali tiffoka fuq in-negozju, iżda huwa essenzjali li l-għarfien tal-imsieħba soċjali jiġi inkluż fit-tfassil tal-għanijiet, il-miri u l-indikaturi meħtieġa għal bidla b’suċċess, isostni l-KESE. Il-KESE jenfasizza wkoll li l-kompetittività ma tistax tkun l-uniku indikatur għal strateġija vijabbli fit-tul. Huwa meħtieġ sett usa’ ta’ indikaturi ewlenin tal-prestazzjoni minn dak propost mill-istrateġija. Il-KESE jemmen li l-kompetittività u l-investiment mhumiex biżżejjed. L-indikaturi ewlenin tal-prestazzjoni jridu jippromovu wkoll benesseri soċjali u tkabbir sostenibbli jekk l-industriji tal-Ewropa jridu jkunu tassew sostenibbli.

L-oqsma importanti li għandhom jitkejlu huma l-impatti tal-kundizzjonijiet tax-xogħol u tal-produzzjoni fuq is-soċjetà u l-ambjent, kif ukoll il-kwalità tal-impjiegi.

Sett ieħor ta’ indikaturi għandu janalizza l-bidla lejn ekonomija ċirkolari “mingħajr skart”. Fl-aħħar nett, fatturi li jkollhom impatt fuq l-industriji kollha, bħall-investiment fir-riċerka u l-iżvilupp, għandhom jiġu monitorjati wkoll sabiex jiġi żgurat li l-kumpaniji u l-impjiegi jservu għal żmien twil.

Proġetti importanti ta’ interess Ewropew komuni (IPCEIs) huma proġetti mifruxa mal-Ewropa kollha li jappoġġjaw l-iżvilupp ta’ innovazzjonijiet kruċjali għat-tranżizzjoni doppja ekoloġika u diġitali. Il-KESE jargumenta li l-ewwel nett, l-għarfien tal-organizzazzjonijiet tal-ħaddiema huwa meħtieġ biex dawn il-proġetti jiġu implimentati tajjeb. It-tieni, l-IPCEIs jridu jiġu vvalutati skont il-valur u l-impjiegi li joħolqu, kif ukoll skont il-ħiliet li l-ħaddiema u n-negozji jeħtieġu fl-industriji modernizzati.

L-istandards huma strument ieħor importanti biex tiġi stabbilita mill-ġdid tmexxija Ewropea fil-produzzjoni industrijali. Il-Kumitat jinsisti li t-tixrid tal-istandards żviluppati mill-kumpaniji Ewropej ma għandux ikun biss f’idejn il-kumpaniji nfushom: il-Kummissjoni għandha tappoġġjahom u tgħinhom ixerrdu dawn l-istandards.

L-Opinjoni supplementari teżamina kif l-istrateġija tista’ ttejjeb l-aċċess għal kura tas-saħħa aktar ġusta u kkoordinata b’mod aħjar fl-Ewropa.

Il-KESE jirrakkomanda enfasi fuq il-governanza, id-diversifikazzjoni tal-provvista u l-kura tas-saħħa diġitali, li lkoll huma konnessi. Negozji mmexxija aħjar jippermettu lis-suq uniku jopera aktar bla xkiel, u b’hekk irawwem negozji ġodda. B’riżultat ta’ dan, għadd akbar ta’ produtturi jagħmlu l-aċċess għall-oġġetti u s-servizzi tal-kura tas-saħħa aktar affidabbli, hekk ukoll l-inċentivi sabiex il-manifattura ta’ materjali u prodotti essenzjali terġa’ tinġieb lejn l-Ewropa.

Miżuri li jippermettu sistemi diġitali tal-kura tas-saħħa li jaħdmu bejn l-organizzazzjonijiet u lil hinn mill-fruntieri jsaħħu aktar is-suq uniku għall-industrija u jtejbu l-aċċess għall-kura. Għall-istess raġunijiet, il-KESE jappella għal azzjoni biex jiġu promossi sinerġiji bejn is-setturi pubbliċi u privati, il-kumpaniji kbar u l-SMEs u l-investimenti fir-riċerka u l-iżvilupp, u t-taħriġ tal-ħaddiema kollha li għandhom x’jaqsmu mal-kura tas-saħħa. (dm)

Żieda fid-djalogu dwar it-tranżizzjoni lejn soċjetà newtrali għall-klima, il-Kumitat Ekonomiku u Soċjali Ewropew (KESE) talab li tittieħed aktar azzjoni biex tiġi protetta l-industrija Ewropea tal-ħġieġ.

Il-KESE qed jitlob lil dawk li jfasslu l-politika tal-UE biex iqiegħdu s-settur tal-ħġieġ fil-qalba tal-prijoritajiet ta’ politika attwali bħall-pakkett “Lesti għall-mira ta' 55 %”, il-Pakkett dwar l-Ekonomija Ċirkolari, l-Aġenda Diġitali, l-aġenda tal-ktajjen tal-valur strateġiċi, u l-politika kummerċjali internazzjonali tal-UE u l-istrumenti assoċjati.

Il-Kumitat Ekonomiku u Soċjali Ewropew (KESE) laqa' l-politiki tal-UE li jappoġġjaw l-industrija tal-ħġieġ sabiex tkun tista' ssir it-tranżizzjoni lejn soċjetà newtrali għall-klima. Huwa jara l-Mewġa ta’ Rinnovazzjoni tal-UE bħala sors kbir immens ta’ opportunitajiet kummerċjali għall-ħġieġ, li twassal għal investimenti, filwaqt li tikkontribwixxi b’mod qawwi għat-tnaqqis tal-emissjonijiet tas-CO₂ mill-bini. Madankollu, il-KESE rrakkomanda bil-qawwa li sseħħ ukoll tranżizzjoni tal-enerġija fi ħdan is-settur tal-ħġieġ, li se jirċievi appoġġ finanzjarju għan-nefqa kemm kapitali kif ukoll dik għall-operat u mhux se jkun espost għal kompetizzjoni inġusta minn barra s-suq tal-UE.

Fl-Opinjoni tiegħu fuq inizjattiva proprja dwar is-suġġett, adottata fis-sessjoni plenarja tiegħu ta’ Ottubru, il-KESE jappella għal azzjonijiet paralleli multipli biex l-industrija tal-ħġieġ issir aktar ekoloġika u effiċjenti fl-enerġija, filwaqt li tissaħħaħ il-kompetittività u jinżammu impjiegi ta’ kwalità.

“Il-ħġieġ jinsab kullimkien, mill-mobbiltà għall-kostruzzjoni, mid-difiża għal smartphones. Biex tisfrutta bis-sħiħ il-potenzjal tas-swieq il-ġodda tal-ħġieġ filwaqt li tlaħħaq mal-isfidi tat-tranżizzjonijiet ekoloġiċi u diġitali, l-UE teħtieġ strateġija industrijali għall-ħġieġ”, qal ir-relatur tal-opinjoni, Aurel Laurenţiu Plosceanu.

Il-KESE jistieden lill-Kummissjoni u lill-Parlament jiżviluppaw politiki ġodda tal-UE dwar l-għanijiet klimatiċi u l-ktajjen tal-valur strateġiċi sabiex terġa’ tinbeda l-produzzjoni taċ-ċelloli fotovoltajċi fl-Ewropa u tiġi ssalvagwardjata l-produzzjoni ta’ prodotti tal-ħġieġ strateġiċi oħra u l-ktajjen tal-valur relatati.

Il-KESE innota li l-industrija tal-ħġieġ Ewropea tinsab f’salib it-toroq. Minn naħa, il-ħġieġ irid ilaħħaq mat-trasformazzjonijiet strutturali li jakkumpanjaw it-tranżizzjonijiet diġitali u ekoloġiċi. Il-produzzjoni se jkollha ssir newtrali għall-karbonju u ċirkolari fi tliet deċennji, filwaqt li l-proċessi se jkunu saħansitra aktar awtomatizzati u diġitali fis-snin li ġejjin.

Min-naħa l-oħra, il-ħġieġ se jkun fuq quddiem ta’ dawk it-tranżizzjonijiet u fis-snin li ġejjin se jkun hemm opportunitajiet ġodda ta’ negozju għal ħafna prodotti tal-ħġieġ.

L-UE għandha tikklassifika l-ħġieġ bħala materjal permanenti u għandha tirrikonoxxi l-benefiċċji tiegħu fil-kontribut għal sistemi ta’ imballaġġ sostenibbli u prinċipji ta’ ekonomija ċirkolari. Hemm potenzjal kbir biex jinħolqu impjiegi ġodda fis-settur tar-riċiklaġġ tal-ħġieġ, u biex jiġu attirati ħaddiema ġodda b’talent,” qal Gerald Kreuzer, korelatur għall-Opinjoni.

Il-KESE għalhekk iħeġġeġ lill-UE tirrikonoxxi li l-ħġieġ huwa vitali għall-produzzjoni tal-enerġija ekoloġika. (ks)

Il-Kumitat Ekonomiku u Soċjali Ewropew (KESE) esprima xi riżervi għall-proposta reċenti tal-Kummissjoni dwar l-introduzzjoni ta’ tagħlim imħallat – it-tagħlim tradizzjonali mmexxi mill-għalliema flimkien ma’ attivitajiet online jew indipendenti – fl-edukazzjoni primarja u sekondarja, u jqajjem dubji dwar it-tempestività tiegħu fid-dawl tal-effett kbir li l-pandemija tal-COVID-19 kellha fuq is-sistemi edukattivi fl-Ewropa u lil hinn.

F’Opinjoni dwar it-tagħlim imħallat adottata matul is-sessjoni plenarja tiegħu ta’ Ottubru, il-KESE qajjem dubji dwar l-adegwatezza ta’ dan il-mod ta’ tagħlim għall-istudenti tal-iskejjel primarji u l-ewwel snin tal-iskejjel sekondarji, u sostna li dan għandu jiġi introdott għall-klassijiet superjuri, peress li studenti iżgħar, speċjalment dawk fl-ewwel snin tal-iskola primarja, ġeneralment ma jkunux maturi biżżejjed biex jitgħallmu waħedhom.

“Għandna dubju dwar kemm huwa ż-żmien ideali biex jiġi introdott jew imħeġġeġ it-tagħlim imħallat fl-iskejjel. Il-pandemija tal-COVID-19 kellha impatt enormi fuq is-sistemi edukattivi u fuq it-tfal, speċjalment it-tfal żgħar li għadhom kemm jibdew l-esperjenza skolastika tagħhom. It-tagħlim imħallat jinkludi it-tagħlim indipendenti u jirrikjedi ċertu ħiliet”, sostniet ir-relatur tal-Opinjoni, Tatjana Babrauskienė.

Il-KESE jirrikonoxxi li t-tagħlim imħallat jista’ jtejjeb l-aċċess għall-edukazzjoni, it-taħriġ, u l-ħiliet diġitali, kif ħareġ fid-dieher matul il-kriżi tal-COVID-19.

Madankollu, il-pandemija wriet ukoll li ċerti studenti ma għandhomx ir-riżorsi – prattiċi jew personali – biex jitgħallmu b’dan il-mod, li fl-agħar xenarju jista’ jwassalhom biex jitilqu mill-iskola. Barra minn hekk, il-pandemija wriet li l-edukazzjoni tinvolvi kuntatt mill-qrib mal-pari, li huwa essenzjali għas-soċjalizzazzjoni u s-saħħa mentali tat-tfal.

“Ma nistgħux nissottovalutaw l-importanza tar-rwol soċjali tal-edukazzjoni. L-edukazzjoni mhijiex biss dwar ix-xjenza, il-fiżika jew il-matematika: iżda hija wkoll dwar li t-tfal imorru l-iskola flimkien, jitħalltu, u jiltaqgħu ma’ tfal tamparhom. Din hija kwistjoni ta’ edukazzjoni fiżika u ta’ saħħa mentali”, qal il-korelatur Michael McLoughlin.

Il-KESE ppreżenta 21 rakkomandazzjoni sabiex jiġi żgurat li t-tagħlim imħallat ikollu rwol pożittiv fl-edukazzjoni. Punt ewlieni huwa li t-tagħlim imħallat għandu jiġi implimentat u ffinanzjat sabiex isaħħaħ l-edukazzjoni u t-taħriġ għall-istudenti kollha, b’enfasi partikolari fuq dawk li ġejjin minn sfondi b’introjtu aktar baxx, tfal b’diżabilitajiet u tfal minn żoni rurali.

Matul il-kriżi tal-COVID-19, sar evidenti li t-tagħlim imħallat jirrikjedi ħin u kreattività konsiderevoli min-naħa tal-għalliema li huma mgħobbija żżejjed, u li huma essenzjali biex jiġi żgurat tfassil u superviżjoni effikaċi tat-tagħlim indipendenti.  

Diġà m’hemmx biżżejjed għalliema fl-Ewropa, parzjalment minħabba kwistjonijiet relatati mal-paga u kundizzjonijiet tax-xogħol diffiċli. Għalhekk huwa importanti li jiġu mmonitorjati l-impatti tat-tagħlim imħallat fuq il-kundizzjonijiet u t-tagħbijiet tax-xogħol biex jiġu evitati l-eżawriment. Sabiex titnaqqas il-pressjoni, il-KESE jistieden lill-awtoritajiet nazzjonali biex jappoġġjaw lill-għalliema waqt li jkunu qed jitħarrġu għal dan il-metodu ġdid ta’ tagħlim. (ll)

Ir-rati eċċessivi ta’ mortalità matul din il-kriżi pandemika żvelaw problemi strutturali u sistemiċi fil-mudell tal-kura fid-dar tal-anzjani. Barra minn hekk, iż-żieda fl-istennija tal-għomor u ż-żieda konsegwenti fin-numru ta’ anzjani fis-snin li ġejjin, jindikaw il-ħtieġa li l-mudell tal-kura jiġi riformat.

Fost l-isfidi ewlenin identifikati matul is-seduta tal-KESE Lejn mudell ġdid ta’ kura għall-anzjani: nitgħallmu mill-pandemija tal-COVID-19 kien hemm kif jiġu garantiti aċċessibbiltà aħjar, anke mil-lat ekonomiku, u kwalita aħjar tal-kura, kif ukoll numru adegwat ta’ indokraturi b’kundizzjonijiet tax-xogħol imtejba.  L-ideat espressi f’din is-seduta ser jikkontribwixxu għal Opinjoni fuq inizjattiva proprja li qed iħejji l-Kumitat dwar din it-tema.

Ir-relatur tal-Opinjoni, Miguel Ángel Cabra de Luna, qal li “din l-Opinjoni m’għandhiex tkun approċċ komprensiv għat-tixjiħ, iżda għandha tiffoka fuq il-kwistjoni tal-kura għall-anzjani, peress li dawn kienu l-aktar milquta mill-pandemija tal-COVID-19”.

Matul is-seduta ġew ippreżentati l-mudelli ta’ kura tas-saħħa mill-Istati Membri, fejn intwerew l-approċċi differenti u d-diffikultajiet minħabba l-pandemija.

Skont ir-rapport tal-2021 dwar il-kura fit-tul imħejji mill-Kummissjoni u l-Kumitat tal-Protezzjoni Soċjali, it-tixjiħ tal-popolazzjoni huwa mistenni li jwassal għal żieda ċara fid-domanda għall-kura fit-tul. In-numru ta’ persuni li għandhom 65 sena jew iktar huwa mistenni li jiżdied b’41 %, għal 130,1 miljun, matul it-30 sena li ġejjin.

Maciej Kucharczyk, Segretarju Ġenerali tal-AGE Platform Europe, qal li “l-iżvilupp ta’ sistemi ta’ kura tajba huwa opportunità u s-servizzi huma l-mezzi biex jiġu appoġġjati l-awtonomija, l-indipendenza u l-kwalità tal-ħajja tal-persuni”.

Tuscany Bell, mill-Federazzjoni Ewropea tal-Junjins tas-Servizzi Pubbliċi, qalet li “sabiex jiġi pprovdut servizz adegwat għall-persuni li għandhom bżonn il-kura, neħtieġu kundizzjonijiet adegwati tax-xogħol u livell suffiċjenti ta’ persunal kwalifikat. Fil-verità, illum numru insuffiċjenti ta’ indokraturi qegħdin jieħdu ħsieb wisq pazjenti.”

Peress li t-tixjiħ attiv għandu natura trasversali u jmiss kemm il-politiċi ekonomiċi kif ukoll dawk soċjali, hemm bżonn ta’ koordinazzjoni bejn is-servizzi soċjali u dawk tas-saħħa, sabiex il-kura fit-tul tkun aktar aċċessibbli, u b’hekk l-anzjani jkunu jistgħu jgawdu ħajja dinjituża. (at)

Is-seminar dwar “Nikkollegaw l-UE” 2021 f’Lisbona għadda. Għall-erbatax-il darba, iltqajna ma’ esperti tal-komunikazzjoni mis-soċjetà ċivili organizzata u ma’ uffiċjali tal-istampa biex nitkellmu dwar l-Ewropa li noħolmu dwarha. Issa wasal iż-żmien li l-ħolma ta’ Ewropa b’saħħitha, sigura, ġusta, inklużiva u ta’ tama ssir realtà.