EESC info

Tharraing Jayant Narayan ón bhFóram Eacnamaíoch Domhanda aird ar na figiúirí sin le linn díospóireacht ar an Intleacht Shaorga (IS) ag seisiún iomlánach mhí Iúil Choiste Eacnamaíoch agus Sóisialta na hEorpa. Dúirt sé go mbeidh ar an Eoraip infheistíocht a dhéanamh i ngníomhaíochtaí meántéarmacha agus fadtéarmacha ionas gur féidir léi a bheith iomaíoch agus éiceachóras a chruthú inar féidir le IS dul chun cinn suntasach a dhéanamh.

Mar chuid de sheisiún iomlánach deireanach CESE roimh shos an tsamhraidh, tionóladh díospóireacht dar teideal An Intleacht Shaorga agus fíorluachanna: ár dtodhchaí dhigiteach agus bhí Jayant Narayan, ceannaire na Comhghuaillíochta Domhanda um Intleacht Shaorga san Fhóram Eacnamaíoch Domhanda i láthair.

Agus é ag díriú ar na dúshláin atá roimh na fiontair bheaga agus mheánmhéide (FBManna) ar mhaith leo úsáid a bhaint as IS, chuir Jayant Narayan i bhfios go láidir go raibh réitigh nua ag teacht chun cinn, amhail IS gan cód, lenar féidir le comhlachtaí agus daoine aonair oibriú ar réitigh IS gan eolaithe sonraí atá oilte go hiomlán a bheith fostaithe acu, ach nár cheart a mheas gur réiteach gasta é an méid sin. Chuir sé in iúl go láidir gur gá díriú go meántéarmach agus go fadtéarmach ar FBManna a chumhachtú chun an cumas áitiúil agus inmheánach is gá a fhorbairt d’fhonn IS a chur in úsáid. Tá gnéithe éagsúla, amhail scileanna, ag teastáil chuige sin agus, i gcás IS agus na heolaíochta sonraí, ní féidir na scileanna is gá a fhorbairt thar oíche. Tá ról lárnach ag an gcistiú agus ag nuálaíocht sa phróiseas sin, dar le Narayan.

Nuair a cuireadh ceist ar Narayan maidir leis an bhfáth a bhfuil an Eoraip ag titim chun deiridh ar na Stáit Aontaithe agus ar an tSín, dúirt sé cé go raibh iomaí cúis leis sin; bhí ról tábhachtach ag tacaíocht na rialtas agus ag an gcisitiú, mar shampla, ó theacht chun cinn Silicon Valley go dtí an Gníomh um Nuálaíocht agus Iomaíochas a formheasadh go dépháirteach le déanaí agus lena leagtar síos go leithdháilfear USD 250 billiún ar an teicneolaíocht agus an nuálaíocht.

‘Le cistiú den chineál sin, cruthaítear an cineál margaidh ina n-oibreoidh formhór na dtaighdeoirí agus na n-eolaithe sonraí ardleibhéil sa deireadh. Agus ní réiteach gearrthéarmach é sin. Is dearcadh meántéarmach agus fadtéarmach é maidir le héiceachóras a chruthú ina ndírítear ní hamháin ar luach áitiúil a ghiniúint, ach ar a bheith ar thús cadhnaíochta laistigh den éiceachóras sin chomh maith.’ Luaigh sé staidéir a rinneadh le déanaí ina léirítear gur as an Eoraip iad 18 % de thaighdeoirí ardleibhéil an domhain cé nach n-oibríonn ach 10 % díobh san Eoraip.

Thug Narayan aghaidh ar an gceist maidir le IS agus an tsochaí shibhialta agus ar cé acu atá nó nach bhfuil forbairt IS ag dul chun leasa na sochaí ina hiomláine nó chun leasa grúpaí áirithe amháin.

Agus é ag lua staidéar ina léirítear gurbh as moltaí faoi thiomáint IS a d’eascair idir 30 % agus 40 % d’ioncam Amazon a gineadh le déanaí, chuir Narayan i bhfáth a rábaí atá IS agus gurb é sin a fáth a bhfuil an stóinseacht, an inmhínitheacht, an mhuinín agus an trédhearcacht chomh ríthábhachtach sin. Dúirt sé go raibh dul chun cinn á dhéanamh maidir leis an inmhínitheacht agus leis an tsábháilteacht, ach go raibh sé sin á dhéanamh trí réitigh ceannródaíocha agus nach féidir a bheith ag súil leis go mbeadh rochtain ag gach duine ar a leithéid de réitigh.

Cé gur admhaigh sé nach raibh easpa prionsabal ‘ann’, dúirt sé gurb é an imní is mó atá romhainn féachaint an bhfuil na prionsabail sin á gcur i bhfeidhm go fírinneach agus an bhfuil leasanna na sochaí sibhialta á gcosaint acu. Thuar sé go n-eascródh dul chun cinn as meascán de chreataí rialála san earnáil phoiblí agus de chreataí tionscail. Dar leis, tiocfadh athrú ar chúrsaí trí idirphlé idir an lucht tionscail agus na rialtóirí agus go mb’fhéidir go gcuirfeadh an lucht tionscail tús leis an ngníomhaíocht, fiú ar bhonn deonach, amach anseo.

Sa tuairim ó CESE a bhaineann le rannpháirtíocht struchtúrtha na hóige maidir leis an aeráid agus an inbhuanaitheacht i bpróiseas cinnteoireachta an Aontais, moladh go gcuirfí Cruinniú Comhchéime na hÓige maidir leis an Aeráid agus an Inbhuanaitheacht ar bun, a reáchtálfadh CESE in éineacht leis an gCoimisiún Eorpach, Parlaimint na hEorpa agus eagraíochtaí óige.

Ba dhíol sásaimh don Choimisiún an tionscamh a d’fhéadfadh a bheith ina uirlis thábhachtach chun ról comhairleach CESE a neartú agus deis a thabhairt don aos óg a gcuid tuairimí ar an gComhaontú Glas don Eoraip a roinnt. Bhí 11 ionadaí óige agus an Leas-Uachtarán Feidhmiúcháin, Frans Timmermans, i láthair ag an gcéad chruinniú a bhí ar siúl an 13 Iúil 2021.

‘A bhuí libhse, tá tuiscint níos fearr ag ár bpobail ar an ngá atá ann gníomhú go práinneach. Ní mór dúinn go léir oibriú go díograiseach agus go neamhleithleach ar mhaithe leis na glúnta atá le teacht. B’fhéidir go gceapann cuid agaibh nach leor é an méid atá ar bun againn, ach geallaim daoibh go bhfuil mo sheacht ndícheall á dhéanamh agam. Tá súil agam go mbeimid in ann teacht ar chomhdhearcadh éigin chun dul i ngleic leis an ábhar práinne seo le chéile’, a mhaígh an Leas-Uachtarán Timmermans.

Le linn an chruinnithe, chuir na hionadaithe óga páipéar faoi bhráid Timmermans ar chuir Generation Climate Europe agus Fóram Eorpach na nÓg tús leis. Cuirtear tograí sonracha a bhaineann le córas eacnamaíoch an Aontais, amhail bainistiú an Aontais maidir le hacmhainní nádúrtha agus táscairí dul chun cinn, san áireamh sa phaipéar sin.

‘Uair sna naoi n-airde a fhaightear deis mar seo míchothromaíochtaí córasacha a leigheas agus céimeanna a ghlacadh chun droim láimhe a thabhairt do chleachtais neamh-inbhuanaithe’, a dúirt Leas-Uachtarán CESE, Cillian Lohan, mar fhocal scoir. Mar sin féin, tá tacaíocht de dhíth ar dhaoine óga. Tá spreagadh, cothú agus fíorspás i réimse bheartais an Aontais de dhíth ar éiceachóras an ghníomhaíochais. Níl spásanna don idirphlé luachmhar ach amháin má eascraíonn gníomhaíocht astu. Seo linn agus déanaimis é! (mr)

Is féidir leis an rathúnas eacnamaíoch, cúram an chomhshaoil agus folláine daoine a bheith fite fuaite le chéile agus ní mór dóibh a bheith amhlaidh. Ba é sin an phríomhtheachtaireacht a thug Uachtarán Choiste Eacnamaíoch agus Sóisialta na hEorpa (CESE), Christa Schweng, ag an díospóireacht dar teideal Geilleagar iar-COVID a fheidhmíonn do chách – i dtreo gheilleagar na dea-bhaile? a tionóladh ag seisiún iomlánach CESE an 7 Iúil 2021.

D’áitigh Christa Schweng go bhfuil sé soiléir go mbeidh gá sa todhchaí faireachán a dhéanamh ar ghnéithe níos leithne ná na gnéithe a léirítear san olltáirgeacht intíre agus tábhacht a thabhairt do na gnéithe sin : ‘Is gnéithe ríthábhachtacha iad an tsláinte, an nádúr daonna, an t-oideachas, ár gcumas nuálaithe agus ár bpobail’, a dúirt sí.

Agus í ag tagairt do ‘coincheap an rathúnais agus an deis a d’fhéadfadh a bheith ann dul chun cinn sóisialta a dhéanamh ar an leibhéal domhanda a chomhcheangal’ agus Spriocanna Forbartha Inbhuanaithe 2030 a bheith mar bhonn leis an méid sin, luaigh Schweng: ‘Is mithid anois don Aontas dul i mbun obair ar straitéis chuimsitheach: tá CESE réidh chun tacú leis an machnamh atá déanta ar an mbonn a leagfar síos do gheilleagar iar-COVID a fheidhmíonn do chách, lena gcuirtear san áireamh táscairí nua maidir leis an bhfeidhmiú eacnamaíoch agus an dul chun cinn sóisialta lena dtugtar léargas córasach ar fholláine daoine.’

Thug Peter Schmidt,Cathaoirleach na Rannóige um Thalmhaíocht, Forbairt Tuaithe agus an Comhshaol (Rannóg NAT) agus rapóirtéir thuairim CESE dar teidealAn geilleagar Inbhuanaithe atá de dhíth orainn, le fios go bhfuil geilleagar na dea-bhaile bunaithe ar sheirbhísí don duine agus nach mór don Aontas an deis atá curtha ar fáil ag an bpaindéim a thapú chun machnamh a dhéanamh ar a laigí agus tograí nua a dhéanamh. (mp)

Tá straitéis cistiúcháin a fheidhmíonn go maith ríthábhachtach chun airgead a chruinniú le haghaidh théarnamh an Aontais ar na margaí caipitil idirnáisiúnta. Ina thuairim a dhréachtaigh Judith Vorbach agus a glacadh ag seisiún iomlánach mhí Iúil, cuireann Coiste Eacnamaíoch agus Sóisialta na hEorpa (CESE) i bhfios go láidir go bhfuil gá le cistiú fónta agus inbhuanaithe, bainistíocht fhónta riosca agus costais ísle iasachtaíochta chun go gcuirfear NextGenerationEU chun feidhme go rianúil.

Agus í ag labhairt le linn na díospóireachta, luaigh Judith Vorbach: ‘Ní mór aon iasachtaí a fhaightear faoi NextGenerationEU a rialú go daonlathach, go dlisteanach agus go trédhearcach. Rachadh straitéis cistiúcháin éifeachtach a bhfuil cistiú cobhsaí agus inbhuanaithe, bainistíocht fhónta riosca, ardacmhainneacht creidmheasa agus costais ísle iasachtaíochta ag baint léi chun leasa an phobail, agus chun leasa na sochaí sibhialta go háirithe, arb í a iompraíonn na rioscaí margaidh ar deireadh thiar’.

Ba dhíol sásaimh do CESE gur chinn an Coimisiún Eorpach a chuid inniúlachtaí agus acmhainní daonna féin a neartú d’fhonn dul i ngleic le cistiú NextGenerationEU. I bhfianaise leas láidir an phobail i gcistiú fónta NextGenerationEU, tá sé tábhachtach go ndéanfaidh an Coimisiún an straitéis a bhainistiú go díreach agus nach ndéanfar í a sheachfhoinsiú. Iarrann CESE go mbeadh cothromaíocht inscne ann agus na baill foirne á gceapadh chun an tasc sin a thabhairt i gcrích.

Ina theannta sin, iarrann CESE go mbunófar bord comhairleach ar a mbeidh ionadaithe ón gCoimisiún, ó Pharlaimint na hEorpa, ón gComhairle, ó na comhpháirtithe sóisialta agus ón tsochaí shibhialta eagraithe. (mp)

Sna tionscnaimh is déanaí ón gCoimisiún maidir le cearta leanaí, iarrtar ar lucht déanta beartas san Aontas Eorpach agus sna Ballstáit oibriú ar son leas coiteann na leanaí uile atá ag fás aníos san Aontas. Cur chuige uaillmhianach misniúil atá á chur chun cinn leis an dá thionscnamh sa mhéid is go bhféachann siad lena chinntiú go mbeidh saol saor ó leithcheal ag gach uile leanbh agus tá formheas CESE faighte ag na tionscnaimh sin freisin.

Thug Coiste Eacnamaíoch agus Sóisialta na hEorpa (CESE) a thacaíocht do Straitéis an Aontais Eorpaigh maidir le Cearta an Linbh agus don togra le haghaidh Moladh ón gComhairle lena mbunaítear an Ráthaíocht Eorpach do Leanaí atá ceangailteach ó thaobh dlí. Tá CESE den bharúil go gcuirfeadh cur chun feidhme na dtionscnamh sin le hiarrachtaí ar leibhéal an Aontais agus ar an leibhéal náisiúnta folláine leanaí a chur chun cinn agus bochtaineacht leanaí a laghdú.

Sa tuairim uaidh maidir leis an Ráthaíocht Eorpach do Leanaí, a glacadh ag an seisiún iomlánach i mí Iúil, chuir CESE in iúl go láidir gur ghá cur chuige comhordaithe ar leibhéal na hEorpa agus na sochaí ina hiomláine sa chomhrac in aghaidh na bochtaineachta, an idirdhealaithe, na díothachta agus an eisiaimh shóisialta, d’fhonn a chinntiú go ndéanfaí cearta an linbh a phríomhshruthú i mbeartais éagsúla agus go mbeadh éifeachtaí fadtéarmacha acu ar shláinte agus ar fholláine leanaí.

Bhí an méid seo a leanas le rá ag Kinga Joó, rapóirtéir na tuairime: ‘Ní fhéadaimid cur suas leis go bhfuil duine as gach ceathrar leanaí atá ag fás aníos san Eoraip i mbaol bochtaineachta. Tá beartais agus creataí dlíthiúla láidre de dhíth orainn chun timthriall an mhíbhuntáiste a bhriseadh, ar timthriall é a leanann ar aghaidh ó ghlúin go chéile go minic, agus chun a mhalairt de threocht a chur ina háit. Ní mór dúinn sprioc uaillmhianach a chur romhainn atá dírithe ar gach leanbh a thógáil ón mbochtaineacht faoi 2030, seachas leor a ghabháil le cúig mhilliún leanbh a shaoradh, arb é sin an sprioc faoi Cholún Eorpach na gCeart Sóisialta’.

Is éard a dúirt Maria del Carmen Barrera Chamorro, comhrapóirtéir na tuairime: ‘Ní foláir do leibhéil uile na sochaí a n-aird a dhíriú ar leanaí na hEorpa. Ba cheart é a bheith de thosaíocht ag an Aontas a gcearta siúd a chomhdhlúthú. Chuige sin, tá gá le straitéis chuimsitheach chothrománach thrasnach, agus le fíorbheartas atá bunaithe ar chothromas, chun comhdheiseanna agus an cuimsiú sóisialta a áirithiú do gach leanbh, beag beann ar a gcúinsí pearsanta’.

De réir sonraí ó Eurostat do 2019, bhí 18 milliún leanbh (22.2 %) ag fás aníos agus iad i mbaol bochtaineachta agus eisiaimh shóisialta san Aontas. Dar le CESE, tá an bhochtaineacht dhigiteach agus fuinnimh chomh díobhálach céanna do leanaí agus ba cheart aghaidh a thabhairt air sin freisin mar chuid den Ráthaíocht Eorpach do Leanaí. I gcás 5.4 % de na leanaí san Eoraip atá in aois scoile, tá cónaí orthu i dteaghlaigh nach acmhainn dóibh ríomhaire ná nasc idirlín a bheith acu. Tá thart ar 25 % de mhuintir na hEorpa ina gcónaí i dteaghlaigh atá bocht ó thaobh fuinnimh de, agus bíonn tionchar aige sin freisin ar chaighdeán saoil agus sláinte leanaí.

D’fhonn leanaí Eorpacha a thógáil ón mbochtaineacht, molann CESE do na Ballstáit uile 5 % ar a laghad de chistiú CSE+ a leithdháileadh chun na críche sin. De réir an rialacháin nua, ní cheanglaítear ach ar na Ballstáit sin inar mó leibhéal na bochtaineachta leanaí ná meánleibhéal an Aontais, mar atá 23.4 %, an céatadán céanna dá n-acmhainní airgeadais CSE+ a chur in áirithe chun dul i ngleic leis an bhfadhb. Go nuige seo, ní dhearna ach 11 thír amhlaidh. (ll)

Ba cheart an ráta áitiúil a bheith ar fáil do dhaoine agus fón póca á úsáid acu is cuma cén áit a bhfuil siad san Aontas; sin a bhí le rá ag Coiste Eacnamaíoch agus Sóisialta na hEorpa i dtuairim uaidh a glacadh le déanaí maidir le hathchóiriú beartaithe ar rialacha fánaíochta an Aontais.

Is é an sprioc atá le baint amach ag an Aontas maidir le rialáil seirbhísí fánaíochta ná limistéar taraife aonair a bhunú ina gceadaítear glaonna agus tomhaltas sonraí ar rátaí áitiúla do na daoine go léir a bhfuil síntiús teileafóin acu san Eoraip, limistéar a mbeadh an luas agus an rochtain chéanna ar bhonneagair ann beag beann ar thír an ghlao nó an ghlactha.

Cé gur díol sásaimh do CESE an togra ón gCoimisiún maidir le hathbhreithniú ar an Rialachán Fánaíochta agus na spriocanna atá leis sin, tá sé den tuairim gur cheart cuspóir níos uaillmhianaí a shocrú.

‘Is é an smaoineamh atá taobh thiar de thogra an Choimisiúin go mbeidh seirbhísí fánaíochta á gcur ar fáil faoi na coinníollacha céanna agus atá ann sa tír bhaile, gan aon srianta ar rochtain. Is togra maith é’ arsa Christophe Lefèvre, rapóirtéir don tuairim ó CESE a glacadh ag seisiún iomlánach mhí Iúil. ‘Mar sin féin, táimid den tuairim nach leor aonfhoirmeacht coinníollacha agus gur cheart a chinntiú nach mbeidh ar dhaoine san Eoraip níos mó a íoc as an gcumarsáid mhóibíleach nuair a théann siad thar lear.’

Tá CESE á chur i bhfáth freisin nach leor a shonrú, i gcás inarb ionann cáilíocht nó luas seirbhísí i líonra Ballstáit eile, nár cheart don oibritheoir baile seirbhís fánaíochta ar cháilíocht níos ísle a chur ar fáil d’aon turas. Ciallaíonn sé sin, mar shampla, sa chás go bhfuil nascacht 4G ag tomhaltóir sa bhaile, nach mbeadh sé d’iallach air nó uirthi nascacht 3G a úsáid le linn fánaíochta más rud é go bhfuil 4G ar fáil sa tír ar thaistil sé nó sí chuici.

Cuid den fhadhb ná go bhfuil an bonneagar áitiúil lag, rud a fhágann gur cheart don Aontas a bheith réidh infheistiú sa bhonneagar chun bearnaí atá ann cheana a dhúnadh agus lena chinntiú nach bhfuil aon ‘limistéir éanasctha’ ann, i.e. réigiúin ina bhfuil an clúdach idirlín leathanbhanda neamhleor, arb i limistéir thuaithe atá roinnt mhaith díobh, rud a chuireann cónaitheoirí agus gnólachtaí féideartha ón doras.

Sa bhreis air sin, tá CESE teann ar an ngá níos mó ná foláireamh amháin a sheoladh chuig tomhaltóirí le hiad a chosaint ar bhille an-ard gan choinne. I gcás ina bhfuil uasteorainneacha an tsíntiúis beagnach sáraithe, ba cheart don oibritheoir foláireamh a sheoladh chuig an tomhaltóir aon uair a ídítear arís an t-uasmhéid a socraíodh don fholáireamh roimhe sin, go háirithe le linn an ghlao chéanna nó le linn an tseisiúin úsáide sonraí chéanna.

Ar deireadh, tá CESE á thabhairt le fios go bhfuil ceist na húsáide córa ríthábhachtach. Cé go luaitear úsáid chóir i dtaca le fánaíocht i ngach conradh cumarsáide móibílí, is oth le CESE nach bhfuil sé sainithe sa Rialachán. D’fhág paindéim COVID-19 go bhfuil daoine ag brath go mór ar ghníomhaíochtaí ar líne agus tá brí iomlán nua leis an úsáid chóir. Smaoinigh ar a bhfuil i gceist i gcás mhac léinn Erasmus atá ag freastal ar ollscoil thar lear, ag freastal ar ranganna ar Teams, ar Zoom nó ar ardán éigin eile, a áitíonn CESE. Ídítear an t-uafás sonraí ar an gcaoi sin, agus baintear an uasteorainn mhíosúil amach go tapa. Má táthar chun cothrom na Féinne a thabhairt do dhaoine sa chás sin, ní mór an uasteorainn chéanna a bheith ag daoine sa tír ar a bhfuil cuairt á tabhairt acu agus atá acu ina dtír bhaile. (dm)

Leis an straitéis nua trádála a sheol an Coimisiún cuirtear prionsabail rannpháirtíochta ar fáil a chabhróidh leis an Aontas a chuspóirí beartais a bhaint amach san Eoraip agus lasmuigh di. Ina theannta sin, beidh nuachóiriú na hEagraíochta Domhanda Trádála (EDT) ríthábhachtach chun freastal a dhéanamh ar na glúine atá le teacht.

“Teastaíonn cur chuige soiléir uainn agus is gá dúinn a bheith oscailte agus teanntásach le go mbeidh na páirtithe leasmhara níos rannpháirtí sa bheartas trádála, óir tá an trádáil idirnáisiúnta ag athrú.” Sin a dúirt Timo Vuori, rapóirtéir na tuairime maidir leis an athbhreithniú ar an mbeartas trádála.

Tá sé thar am ag an Eoraip an tsoineantacht a chaitheamh di agus a bheith níos teanntásaí nuair a bhíonn luachanna Eorpacha agus gealltanais trádála á gcosaint aici go haontaobhach. Sna cásanna sin nach féidir le EDT beart a dhéanamh nó toradh a bhaint amach, ba cheart don Aontas a bheith in ann brath ar réimse leathan Comhaontuithe Saorthrádála ina léirítear na prionsabail Eorpacha agus na caighdeáin idirnáisiúnta atá i gcoiteann aige leis na geilleagair is ceannródaí, nó atá ag teacht chun cinn, sa trádáil idirnáisiúnta.

Is é a dúirt Christophe Quarez, comhrapóirtéir na tuairime: “Is gá an obair go léir a chur i gcomhthéacs an iltaobhachais agus athchóiriú EDT”.

Tá CESE den tuairim freisin gur cheart tosaíocht a thabhairt do nuachóiriú EDT. Ní mór don Aontas ceannródaíocht a léiriú, mar sin, maidir leis an athchóiriú uaillmhianach ar EDT trí dhíriú ar ábhair thoirmiscthe a bhaineann le gnéithe sóisialta agus aeráide den trádáil.

Beartas trádála a thugann aghaidh ar riachtanais daoine

Tá CESE an-sásta leis an gclár oibre trádála a théann i ngleic le roinnt de na hábhair imní atá ag na páirtithe leasmhara. Mar sin féin, ní dhéantar aon mhachnamh inti faoin gcaoi ar féidir feabhas a chur ar rannpháirtíocht na sochaí sibhialta sa bheartas trádála.

Cuireann an Coiste i bhfios go láidir go bhfuil gá le comhar leanúnach leis an tsochaí shibhialta ar an leibhéal náisiúnta agus ar leibhéal an Aontais chun a áirithiú go gcuirfidh an beartas trádála luach breise lenár saol laethúil.

Ní mór go ndéanfaí comhpháirtí gníomhach sa bheartas trádála den tsochaí shibhialta, maidir le huirlisí trádála agus comhaontuithe a mhúnlú agus faireachán a dhéanamh orthu.

Tá CESE go mór i bhfabhar ról gníomhach a bheith ag an Aontas i múnlú rialacha domhanda le haghaidh trádáil níos inbhuanaithe agus níos córa, rud a chruthódh saibhreas agus slándáil, ní hamháin don lucht gnó, ach do thíortha agus do dhaoine freisin. (at)

Ba iad Christa Schweng, Uachtarán CESE, agus Gustavo Beliz, Uachtarán Chomhairle Eacnamaíoch agus Shóisialta (CES) na hAirgintíne, a rinne cathaoirleacht ar an gcéad chruinniú idir CES na hAirgintíne agus CESE, cruinniú a d’eagraigh Rannóg REX.

Agus an cruinniú á oscailt ag Uachtarán CES na hAirgintíne, Gustavo Beliz, rinne sé cur síos gairid ar an gcéad 100 lá ag CES nuabhunaithe na hAirgintíne:

“In CES na hAirgintíne, tugtar le chéile daoine a bhfuil tuairimí an-difriúil acu, ina measc tuairimí idé-eolaíocha an-difriúil, taithí an-éagsúil ar an saol agus réimse mór cúlraí sóisialta. Is í an éagsúlacht sin an acmhainn is mó atá ag CES. Sa chéad 100 lá sin, léiríomar an meas mór atá againn ar ár gcuid oibre agus cé chomh tiomanta agus atáimid. Is mian linn coinneáil leis an obair sin ar an dul céanna agus CESE inár dteannta agus táimid an-sásta an deis seo a fháil.”

Rinne Christa Schweng, Uachtarán CESE, comhghairdeas leis an Airgintín as foras a bhunú trínar féidir le heagraíochtaí na sochaí sibhialta a dtuairimí a nochtadh agus moltaí a dhéanamh maidir le beartais. “Táimid an-sásta go bhfuil Comhairle Eacnamaíoch agus Shóisialta curtha ar bun san Airgintín, comhairle a dhíreoidh ar shaincheisteanna amhail an cuimsiú sóisialta, an comhshaol agus an t-athrú aeráide, cúrsaí oibre, an daonlathas nuálach agus an tslándáil bia. Tá a lán luachanna agus leasanna i gcoiteann againn leis an Airgintín, mar shampla an tuiscint go bhfuil tábhacht le rannpháirtíocht na sochaí sibhialta.”

Bhí os cionn 90 duine ón dá thoscaireacht, thar ceann earnálacha éagsúla, i láthair ag an gcruinniú agus bhí plé bríomhar eatarthu ar réimse leathan saincheisteanna agus straitéisí. Díríodh sa phlé sin ar na tosaíochtaí maidir leis an téarnamh ó COVID-19, ar an gComhaontú Glas don Eoraip, ar oideachas agus ar phoist sa todhchaí agus ar thionchar na nuatheicneolaíochtaí ar mhargadh an tsaothair.

Chuir an dá thoscaireacht béim ar a thábhachtaí atá ról na gComhairlí chun comhthoil agus réitigh ar fhadhbanna sóisialta a fhorbairt, chomh maith leis an gcur chuige is gá chun teacht ar na réitigh sin, agus conas an méid sin a dhéanamh ar bhealach atá fréamhaithe go daingean i mbunchlocha an daonlathais rannpháirtíochta. (at)

Is beartas lárnach é comhpháirtíochtaí tallainne a chruthú le tíortha tionscnaimh agus idirthurais chun aghaidh a thabhairt ar an imirce. Ní mór don Eoraip díriú ar ghné sheachtrach an bheartais imirce a athrú chun go mbeadh an ghné sin mar chuid de chlár oibre geopholaitiúil agus geo-eacnamaíoch níos leithne, clár a mbeidh áit chuí aige i measc beartais eile.

‘Is é an nasc idir an gheopholaitíocht agus an imirce ábhar cainte an lae inniu. Is as an Afraic a thiocfaidh an chéad sreabhadh imirceach eile chuig an Eoraip,’ a mhaígh Dimitris Dimitriadis, cathaoirleach rannóg REX, ag an gcruinniú a tionóladh i mí Iúil 2021.

De réir sonraí ó mhí Eanáir 2020, meastar gur náisiúnaigh tríú tír iad 23 mhilliún duine de na 447 milliún duine a bhfuil cónaí orthu san Aontas Eorpach.

Cé go bhfuil comhpháirtíochtaí tallainne le tíortha tionscnaimh, idirthurais agus cinn scríbe fós á moladh sa chomhshocrú nua maidir le himirce agus tearmann, is cosúil nach féidir an comhshocrú sin a chur chun feidhme go héifeachtúil mar go bhfuil bacainní ar leith roimhe.

Dúirt Jean-Louis De Brouwer, Stiúrthóir an chláir ‘Gnóthaí Eorpacha’ in Institiúid Egmont gur dócha go bhfuil easpa muiníne agus dlúthpháirtíochta i leith an chomhshocraithe nua.

Ina theannta sin, luaigh Estrella Galán, a rinne ionadaíocht thar ceann Choimisiún na Spáinne um Chúnamh do Dhídheanaithe, gurb iad na tíortha iontrála a bhíonn thíos le saincheisteanna a bhaineann leis an imirce agus an tearmann. Dar léi ba cheart dul i ngleic leis na saincheisteanna sin ar bhealach atá níos comhréirí agus bunaithe ar fhreagracht chomhroinnte agus ar an dlúthpháirtíocht.

D’fhéadfadh beartas forbartha san Afraic deireadh a chur leis an imirce neamhdhleathach

D’fhéadfaí cobhsaíocht shóisialta, pholaitiúil agus eacnamaíoch a chruthú dá rannchuideofaí go dearfach leis an bhforbairt san Afraic, ar mór-roinn í atá leochaileach don athrú aeráide.

Mar a dúirt an Feisire de Pharlaimint na hEorpa agus an Chéad Leas-Chathaoirleach ar Choiste um Fhorbairt Pharlaimint na hEorpa, Pierrette Herzberger-Fofana, ‘Tá beartais forbartha agus an imirce fite fuaite le chéile.’

Lena chois sin, leag an Dr. Chiyoge B. Sifa ón gComhghuaillíocht Idirnáisiúnta Comhair (ICA) don Afraic, béim ar an tábhacht a bhaineann leis an gcomhpháirtíocht idir ICA agus an tAontas. Tá ról nach beag ag an gcomhpháirtíocht sin maidir le daoine óga a dhíspreagadh dul ar bhealaí na Meánmhara. (at)

Is céim ríthábhachtach í Straitéis nua an Aontais Eorpaigh maidir le hoiriúnú don athrú aeráide chun aeráidneodracht agus athléimneacht in aghaidh an athraithe aeráide a bhaint amach faoi 2050. Tacaíonn sochaí shibhialta na hEorpa go láidir le tiomantas an Choimisiúin iarrachtaí a neartú maidir leis an díonadh ar an athrú aeráide, an fhorbairt athléimneachta, an chosaint agus an ullmhacht.

Sa tuairim uaidh a bhaineann leis an straitéis nua a glacadh ag seisiún iomlánach mhí Iúil, chuir CESE i bhfios go láidir go bhfuil oiriúnú atá dírithe ar an gcothromas ríthábhachtach chun saol agus slite beatha shaoránaigh na hEorpa a chosaint, go háirithe i gcás na saoránach is leochailí, ionas nach bhfágfar aon duine ar lár.

Dá bhrí sin, cuireann CESE i bhfios go láidir an gá atá ann go gcuirfí béim chomhionann ar mhaolú agus oiriúnú a mhaoiniú, mar aon le treoirlínte oiriúnaithe sonracha, uirlisí faireacháin, tagarmharcanna agus táscairí. Chuideodh na huirlisí sin le trédhearcacht a sholáthar, le measúnú a dhéanamh ar dhul chun cinn an oiriúnaithe aeráide, agus leis an acmhainneacht áitiúil, náisiúnta agus réigiúnach a fhothú.

Is éard atá sa bhithgheilleagar agus san aistriú go dtí geilleagar ciorclach cineálacha cur chuige ríthábhachtacha agus nithiúla maidir leis an oiriúnú don athrú aeráide tráth atá an Eoraip i mbun téarnaimh.

‘Ní mór don Aontas an cineál nuálaíochta, infheistíochta agus trádála a chuireann feabhas ar an bhforbairt inbhuanaithe a chur chun cinn tuilleadh agus béim níos mó a leagan ar thábhacht na ngnéithe sin. Dá bhrí sin, ní mór an t-oiriúnú don athrú aeráide agus na costais a ghabhann leis a bheith mar chuid lárnach de straitéis tionsclaíochta an Aontais’, arsa Dimitris Dimitriadis, rapóirtéir na tuairime seo ó CESE.

Chun go dtiocfaidh an tAontas chun cinn mar cheannródaí domhanda i réimse an airgeadais inbhuanaithe, ní mór don Choimisiún ardchaighdeán a leagan síos agus prionsabail atá bunaithe ar an eolaíocht agus atá neodrach ó thaobh na teicneolaíochta de a leanúint, lena n-áirítear maidir le tacsanomaíocht an Aontais. (mr)

Beidh sé níos éasca earraí a aistriú trí úsáid a bhaint as meascán d'iompar ar uisce agus d’iompar ar talamh san Eoraip a luaithe a réiteofar fadhbanna a bhaineann leis an idirmhódúlacht. Sa tuairim a dhréachtaigh Stefan Back agus a glacadh ag seisiún iomlánach mhí Iúil, tugann Coiste Eacnamaíoch agus Sóisialta na hEorpa dá aire go mbíonn tionchar mór ag an easpa idir-inoibritheachta agus ag droch-bhonneagar ar fhorbairt iompair lastais chomhtháite, rud a fhágann gur minic nach bhfuil an dara rogha ag oibreoirí ach iompar de bhóthar a úsáid. Bíonn toradh iarmhartach diúltach aige sin ar an gcomhshaol.

Agus é ag labhairt ar ghlacadh na tuairime, dúirt Stefan Back go raibh cur chuige pragmatach agus tíosach ar acmhainní ó thaobh na rialála de dhíth ar an Aontas: ‘Ní mór dúinn aghaidh a thabhairt go díreach ar na saincheisteanna atá ar feitheamh agus réiteach tapa a fháil orthu. Ní mór don iompar ilmhódach agus don lóistíocht a bheith éifeachtúil agus inbhuanaithe, agus nuair a chuirtear i gcomparáid iad leis an iompar aonmhódúil de bhóthar go háirithe, níor cheart go mbeadh siad níos costasaí, níos moille ná níos neamhiontaofa. Ní leor creat rialála tiomnaithe a chur ar bun nó níos mó airgid a infheistiú chun réiteach inmharthana fadtéarmach a bhaint amach.’

I láthair na huaire, tá an t-iompar lastas ilmhódach ar díth éifeachtúlachta agus inbhuanaitheachta. Bíonn costas suntasach ag baint le modhanna éagsúla iompair ar uisce agus ar talamh a chomhcheangal mar gheall ar chostais trasloingsithe agus idirbhirt. Ina theannta sin, bíonn míbhuntáistí amhail tréimhsí fada seachadta, castacht, leibhéal riosca níos airde agus níos lú iontaofachta i gceist. Mar gheall ar an méid sin, níl an t-iompar ilmhódach tarraingteach faoi láthair. D’fhonn páirt iomlán a ghlacadh sa chóras iompair, ní mór don iompar ilmhódach a bheith iomaíoch ann féin agus ní mór dó sreafaí éifeachtúla agus rianúla a bhaint amach ar an gcostas céanna leis an iompar aonmhódúil. (mp)

Is díol sásaimh do Choiste Eacnamaíoch agus Sóisialta na hEorpa (CESE) Plean Gníomhaíochta an Aontais Eorpaigh maidir le sineirgí idir an tionscal sibhialta, an tionscal cosanta agus tionscal an spáis atá beartaithe. Is féidir leis an bplean gníomhaíochta feabhas a chur ar neamhspleáchas straitéiseach agus ceannasacht theicneolaíoch na hEorpa, slándáil na saoránach a fheabhsú agus dlús a chur le hiomaíochas, fás eacnamaíoch agus fostaíocht. Dá bhrí sin, tá CESE á iarraidh an 11 ghníomhaíocht a leagtar amach sa phlean a chur chun feidhme go mear, go láidir agus go huaillmhianach.

Ghlac CESE an tuairim Plean Gníomhaíochta an Aontais Eorpaigh maidir le sineirgí idir an tionscal sibhialta, an tionscal cosanta agus tionscal an spáis, ina leagann sé amach a bharúil maidir le plean gníomhaíochta an Choimisiúin, arb é is aidhm dó feabhas a chur ar shineirgí idir ionstraimí arna gcistiú ag an Aontas agus cros­toirchiú á éascú idir an tionscal sibhialta, an tionscal cosanta agus tionscal an spáis san am céanna.

Is i dtionscal cosanta na hEorpa a tháinig ann do cheann de na nuálaíochtaí is tábhachtaí agus is seanbhunaithe sa tionscal gluaisteán. Tar éis do Nils Ivar Bohlin, innealtóir meicniúil Sualannach, a bheith ag obair ar shuíocháin eisteilgthe do scairdeitleáin trodaíochta do chuideachta aerloingseoireachta Eorpach, dhear sé crios sábhála nua do chuideachta gluaisteán Eorpach. Agus é bunaithe ar an úim arna úsáid ag píolótaí scairdeitleáin, tá an crios sábhála trí phointe ina chaighdeán domhanda sa tionscal gluaisteán agus sábháladh os cionn aon mhilliún beatha daoine a bhuí leis ó tugadh isteach é.

Measann CESE gur colún de straitéis tionsclaíochta an Aontais é an plean gníomhaíochta agus go léiríonn sé an chaoi ar féidir cros-toirchiú a chinntiú idir an tionscal sibhialta, an tionscal cosanta agus tionscal an spáis agus díriú ar an nasc tábhachtach idir tionscal an spáis, an tionscal cosanta agus an tionscal slándála a fheabhsú.

‘I measc nithe eile, ba cheart tús áite a thabhairt do ghlacadh teicneolaíochtaí nua digiteacha agus teicneolaíochtaí eile atá ag teacht chun cinn sna réimsí cosanta agus slándála,’ a dúirt rapóirtéir na tuairime, Manuel Garcia Salgado. ‘Chun an méid sin a éascú, ba cheart a chinntiú go gcuirfear san áireamh sna tionscnaimh shibhialta ábhartha riachtanais chosanta agus slándála ón tús. Ar an dóigh sin, bainfear an leas is fearr is féidir as raon feidhme agus éifeachtúlacht ionstraimí cistiúcháin a bhaineann go sonrach leis an tionscal cosanta agus an tionscal slándála.’

Tá an éagsúlacht riachtanach don nuálaíocht, lena n-áirítear sa tionscal cosanta agus i dtionscal an spáis. Dá bhrí sin, tá CESE á iarraidh mná agus daoine óga a chuimsiú ar dhóigh níos fearr trí bheartais earcaíochta, coinneála agus cur chun cinn.

Bhí an méid seo a leanas le rá ag an gcomh-rapóirtéir, Jan Pie: ‘Sa lá atá inniu ann, is ceannaire domhanda i réimse na teicneolaíochta í an Eoraip ach tá infheistíocht ollmhór ó SAM agus ón tSín i dteicneolaíochtaí digiteacha nua agus teicneolaíochtaí eile atá ag teacht chun cinn amhail an intleacht shaorga, Idirlíon na Rudaí Nithiúla agus an blocshlabhra, etc. ag cur i gcoinne na ceannaireachta sin. Is dúshlán é an méid sin d'iomaíochas na hEorpa agus dá neamhspleáchas in earnálacha straitéiseacha amhail an earnáil slándála nó an earnáil cosanta.’

Dar le Pietro de Lotto, cathaoirleach an Choimisiúin Chomhairligh um Athruithe Tionsclaíocha in CESE, is sampla é an t-ábhar seo den chaoi ar cheart ceannasacht theicneolaíoch a bhaint amach atá folláin agus neamhionsaitheach. (ks)