KESE info

Peress li l-iskarsezza tal-ilma u t-tniġġis qed ikomplu joħolqu sfidi globali, il-qafas ta’ politika attwali tal-UE jidher li mhuwiex biżżejjed. Biex jindirizzaw dan, għadd ta’ esperti tal-ogħla livell dwar l-ilma ltaqgħu fil-KESE fis-27 ta’ Frar biex jidentifikaw soluzzjonijiet potenzjali. Is-seduta tinawgura l-ħidma tal-KESE dwar l-ilma. 

Il-KESE qed iħejji sensiela ta’ Opinjonijiet fuq inizjattiva proprja u, fil-ħarifa, se jaqsam ir-rakkomandazzjonijiet tas-soċjetà ċivili għall-futur tal-ilma fl-UE.

Fis-sajf tal-2022, l-Ewropa esperjenzat l-aktar nixfiet severi f’dawn l-aħħar 500 sena. Minkejja li l-Patt Ekoloġiku tal-UE għandu proposti li jindirizzaw kwistjonijiet dwar l-ilma, dawn l-objettivi mhumiex integrati sew fil-politiki kollha tal-UE. Hemm bżonn ta’ bidla fl-iskala biex jiġu evitati l-iżbalji li saru qabel fil-politika tal-enerġija. 

Il-President tal-KESE, Christa Schweng, qalet: “L-UE għandha l-opportunità li tkun minn ta’ quddiem nett fil-qasam tal-ilma.”

Barra minn hekk, dan l-aħħar il-Parlament Ewropew talab strateġija komprensiva tal-UE dwar l-ilma Pernille Weiss, President tal-Grupp ta’ Membri tal-Parlament Ewropew dwar l-Ilma, qalet: “Nittama li l-Ewropa ssir xempju ta’ kif nieħdu ħsieb ir-riżorsi tal-ilma.”

Il-KESE se jħabrek favur strateġija komprensiva tal-UE dwar l-ilma permezz ta’ sensiela ta’ Opinjonijiet fuq inizjattiva proprja, inklużi proposti dwar il-ħarsien tar-riżorsi ta’ ilma nadif; l-antiċipazzjoni u l-mitigazzjoni tal-effetti tal-kunflitti internazzjonali kkawżati minn kwistjonijiet relatati mal-ilma; u l-ġestjoni sostenibbli tal-ilma.

Pietro Francesco De Lotto, President tal-Kummissjoni Konsultattiva dwar il-Bidliet Industrijali (CCMI), ġibed l-attenzjoni għad-dimensjoni industrijali tal-ilma: “It-teknoloġija effiċjenti fl-użu tal-ilma tagħmel parti importanti mis-soluzzjoni li neħtieġu, mhux biss għall-industrija, iżda għas-soċjetà kollha kemm hi.”

Salla Saastamoinen, Deputat Direttur Ġenerali għaċ-Ċentru Konġunt tar-Riċerka (JRC), qalet: “Il-JRC jikkondividi l-ambizzjoni tal-KESE favur approċċ olistiku għall-ġestjoni tal-ilma.”

Oliver Röpke, President tal-Grupp tal-Ħaddiema fil-KESE, saħaq fuq l-importanza tal-ilma bħala dritt tal-bniedem: “Is-solidarjetà u s-sostenibbiltà għandhom ikunu fil-qalba tas-soluzzjonijiet tagħna.” (gb)

Fis-sessjoni plenarja tal-KESE ta’ Frar, Sviatlana Tsikhanouskaya, mexxejja tal-oppożizzjoni demokratika Belarussa, appellat lill-istituzzjonijiet tal-UE biex jappoġġjaw lill-poplu Belarussu fil-ġlieda tiegħu kontra l-awtoritarjaniżmu. Il-Belarussja jistħoqqilha tkun parti mill-familja Ewropea, hija qalet, u dan jista’ jkun possibbli biss permezz tal-appoġġ attiv tal-istituzzjonijiet kollha tal-UE. 

Is-sitwazzjoni tad-drittijiet tal-bniedem qed tmur għall-agħar fil-Belarussja, b’madwar 1,500 ċittadin jinżammu detenuti għal raġunijiet politiċi, u kuljum medja ta’ 17-il persuna jintbagħtu l-ħabs. 

Il-President tal-KESE Christa Schweng qalet: “Il-politiċi kollha b’tendenzi awtoritarji jibżgħu mill-poplu tagħhom. Huma jibżgħu mis-soċjetà ċivili u r-rwol tagħha biex jiġu involuti forzi kreattivi ġodda sabiex ikunu jistgħu jfeġġu u jwettqu l-bidla”.

Is-Sinjura Tsikhanouskaya enfasizzat il-konnessjoni diretta bejn il-liberazzjoni tal-Belarussja u tal-Ukrajna: “Il-futur tal-Ewropa qed tiġi deċiża fil-kampijiet tal-battalja tal-Ukrajna, fir-reżistenza klandestina tal-Belarussja, u naturalment fil-bliet kapitali Ewropej”. Hija appellat lill-istituzzjonijiet tal-UE biex jappoġġjaw lin-nies li qed jiġġieldu fuq il-post u li jinsabu eżiljati, u ssuġġeriet li s-Sħubija tal-Lvant terġa’ tingħata l-ħajja li, li l-gvern Belarussu kien irtira minnha fl-2021, bil-kooperazzjoni mal-oppożizzjoni Belarussja. 

“Nappellaw lill-awtoritajiet biex jirrilaxxaw minnufih u mingħajr kundizzjonijiet lill-persuni u lit-trejdjunjonisti arrestati ”, qal il-President tal-Grupp tal-Ħaddiema tal-KESE Oliver Röpke.

“Bħala rappreżentanti tas-soċjetà ċivili, aħna ninsabu lesti biex inkunu l-vuċi tagħkom fl-istituzzjonijiet kollha tal-UE biex nippromovu l-ideat tagħkom li fil-fehma tagħkom jistgħu jgħinu s-sitwazzjoni fil-Belarussja”, enfasizza Stefano Mallia, President tal-Grupp ta' Min Iħaddem tal-KESE.

Il-Viċi President tal-Grupp tal-Organizzazzjonijiet tas-Soċjetà Ċivili Simo Tiainen qal: “Sinjura Tsikhanouskaya, inti mara b’saħħitha u kuraġġuża. Inti taħdem bla biża’ għal futur aħjar għall-pajjiżek. Aħna ninsabu viċin tiegħek. Il-futur tal-Belarussja mhuwiex id-dittatorjat, iżda d-demokrazija. (mt)
 

Jum biss qabel l-anniversarju tal-invażjoni tal-Ukrajna mir-Russja, il-KESE adotta Riżoluzzjoni li tappella għall-adeżjoni rapida tal-Ukrajna mal-UE b’rispett dovut għall-prinċipji tat-tkabbir. Il-KESE appoġġja l-istabbiliment ta’ tribunal internazzjonali speċjali dwar id-delitti ta’ aggressjoni kontra l-Ukrajna, u enfasizza li s-soċjetà ċivili trid tkompli tappoġġja lill-Ukrajna sakemm ikun meħtieġ.

Il-KESE adotta t-tielet Riżoluzzjoni tiegħu dwar l-Ukrajna, bl-isem L-Ukrajna: Sena wara l-invażjoni Russa – il-perspettiva tas-soċjetà ċivili Ewropea, waqt is-sessjoni plenarja tiegħu ta’ Frar. Ir-riżoluzzjoni ġiet adottata waqt dibattitu ma’ Oleksandra Matviichuk, kap taċ-Ċentru tal-Libertajiet Ċiviċi tal-Ukrajna u rebbieħa tal-Premju Nobel għall-Paċi għall-2022, u Lora Pappa, president tal-NGO Griega METAdrasi – Azzjoni għall-Iżvilupp tal-Migrazzjoni, dwar l-impatt tal-gwerra fuq in-nies fl-Ukrajna u fl-UE.

Fir-Riżoluzzjoni tiegħu, il-KESE saħaq favur l-adeżjoni tal-Ukrajna mal-Unjoni Ewropea. “Nappellaw għal proċess ta’ adeżjoni rapidu għall-Ukrajna mal-UE b’rispett dovut għall-prinċipji tat-tkabbir. Is-soċjetà ċivili Ukrajna u l-poplu Ukren jibqgħu l-ogħla prijorità għall-KESE,” qalet il-President tal-KESE Christa Schweng.

Ir-Riżoluzzjoni tappella biex jiġi stabbilit tribunal internazzjonali speċjali għad-delitti ta’ aggressjoni kontra l-Ukrajna. F’diskors emozzjonali, is-Sinjura Matviichuk irrapportat in-numru bla preċedent ta’ delitti tal-gwerra mwettqa mit-truppi Russi: “Sinjura Matviichuk irrapportat in-numru bla preċedent ta’ delitti tal-gwerra mwettqa mit-truppi Russi: “Wasal iż-żmien li l-kliem nibdluh f’deċiżjonijiet u li tingħata s-setgħa lill-proċeduri legali, għaliex il-paċi dejjiema hija impossibbli mingħajr ġustizzja."

Seamus Boland, il-president tal-Grupp tal-Organizzazzjonijiet tas-Soċjetà Ċivili, qal li “Aħna wkoll nappoġġjaw is-sejħa biex jiġi stabbilit tribunal internazzjonali speċjali għad-delitti ta’ aggressjoni kontra l-Ukrajna”.

Sena wara l-invażjoni, l-organizzazzjonijiet tas-soċjetà ċivili taw l-appoġġ tagħhom lil 8 miljun refuġjat u 6 miljun persuna spostata internament. Madankollu, “l-għeja qed tibda tidher,” ilmentat is-Sinjura Pappa.

Oliver Röpke, president tal-Grupp tal-Ħaddiema, qal li “Is-soċjetà ċivili Ukrena m’għandhiex tkun mistiedna hawn, għandha tkun minn ta’ ġewwa,” mentri Stefano Mallia, president tal-Grupp ta’ Min Iħaddem, żied jgħid li “Is-soċjetà ċivili lesta tagħmel dak kollu li jkun hemm bżonn u sakemm ikun hemm bżonn biex tappoġġja lill-Ukrajna fit-triq lejn l-irkupru”. (mt)

Fis-sessjoni plenarja tiegħu tat-22 ta’ Frar, il-KESE kellu dibattitu li wissa dwar id-diffikultà dejjem akbar tal-kumpaniji biex isibu forza tax-xogħol b’ħiliet speċjalizzati, u enfasizza l-ħtieġa urġenti għal strateġija komprensiva dwar il-ħiliet fil-livelli kollha. 

Id-dibattitu ġie organizzat fil-kuntest tas-Sena Ewropea tal-Ħiliet u b’rabta mal-adozzjoni tal-Opinjoni tal-KESE dwar “Appoġġ għall-iżviluppi fis-suq tax-xogħol”. Fost il-parteċipanti għad-dibatititu kien hemm id-Direttur għall-Impjiegi, ix-Xogħol u l-Affarijiet Soċjali tal-OECD Stefano Scarpetta, il-Viċi President ta’ SMEunited Marianna Panebarco, u l-President ta’ Social Economy Europe, Juan Antonio Pedreño.

Il-President tal-KESE Christa Schweng fetħet id-dibatittu, u qalet li: “Id-diġitalizzazzjoni, l-ekoloġizzazzjoni, u l-bidla fl-organizzazzjoni tax-xogħol li ġew aċċellerati b’konsegwenza tal-pandemija, urew li t-titjib tal-ħiliet u t-taħriġ mill-ġdid tal-ħaddiema huma importanti biex jinżammu l-impjegabbiltà u l-produttività tal-ħaddiema, speċjalment fis-soċjetà tagħna li qed tixjieħ”.

Il-kelliema esprimew it-tama tagħhom li s-Sena Ewropea tal-Ħiliet ma tisfax fix-xejn, iżda minflok turi li hija strument biex jiġu promossi t-tagħlim tul il-ħajja, it-taħriġ u t-taħriġ mill-ġdid.

Huma enfasizzaw diversi problemi dwar it-taħriġ, fosthom il-parteċipazzjoni limitata tal-ħaddiema għat-taħriġ minħabba, fost oħrajn, in-nuqqas ta’ ħin jew finanzjament, jew li t-taħriġ ma jkunx jikkorrispondi għall-ħtiġijiet tal-kumpaniji. 

Saret enfasi fuq ir-rwol vitali li l-imsieħba soċjali jista’ jkollhom biex jippromovu r-rikonoxximent tal-ħiliet biex jgħinu lin-nies jibqgħu impjegabbli. Ġie enfasizzat ukoll ir-rwol tad-djalogu soċjali bħala strument ewlieni biex jiġu identifikati l-ħtiġijiet u jiġu żviluppati l-ħiliet fil-postijiet tax-xogħol.

Saret enfasi speċjali fuq l-SMEs, kemm fl-Opinjoni tal-KESE kif ukoll fid-dibattitu, peress li dawn diġà qed isibuha diffiċli biex isibu ħaddiema kwalifikati jew biex joffru programmi ta’ taħriġ mfassla apposta. 

“It-trasformazzjoni tas-suq tax-xogħol Ewropew teħtieġ fehim tajjeb ta’ liema tip ta’ ħiliet huma meħtieġa għat-trasformazzjonijiet futuri tas-suq tax-xogħol, inkluż fl-SMEs,” qalet Mariya Mincheva, relatur tal-Opinjoni tal-KESE. 

Fl-Opinjoni, il-KESE saħaq li t-tagħlim tul il-ħajja għandu jsir parti integrali minn strateġiji usa’ ta’ tkabbir ekonomiku u pjani għall-irkupru u r-reżiljenza. Huwa ssuġġerixxa wkoll li l-SMEs għandhom jiġu mħeġġa jaħdmu f’networks li jinteraġixxu u jiġbru flimkien il-kapaċitajiet tagħhom biex jindirizzaw l-isfidi tat-tranżizzjoni doppja.

L-istimi juru li 128 miljun Ewropew se jkollhom itejbu l-ħiliet tagħhom jew jagħmlu taħriġ mill-ġdid sabiex jibqgħu attivi fis-suq tax-xogħol. Il-ħaddiema b’livell baxx ta’ ħiliet, li l-impjiegi tagħhom huma l-aktar f’riskju li jiġu awtomatizzati ħafna, huma l-inqas li jipparteċipaw fit-taħriġ, b’4 % biss jieħdu sehem fl-UE27 matul il-perjodu ta’ żmien osservat. 

Il-parteċipazzjoni tal-adulti b’mod ġenerali hija baxxa wkoll, bi 11 % biss jieħdu sehem f’perjodu partikolari. Il-ħaddiema ta’ bejn il-25 u l-34 sena huma l-aktar probabbli li jattendu taħriġ, bir-rata ta’ attendenza tagħhom hija ta’ 22 %, meta mqabbla mar-rata ta’ 8 % biss għall-gruppi ta’ età kollha. (ll)
 

F’Rapport ta’ Opinjoni fi Frar, il-KESE jenfasizza li l-awtoritajiet nazzjonali u lokali għandhom jiġu mħeġġa jwettqu valutazzjonijiet tal-impatt biex jaraw kif il-kiri ta’ akkomodazzjoni fuq medda qasira ta’ żmien permezz ta’ pjattaformi online qed jaffettwa l-ħajja tar-residenti u n-negozji lokali, bħal lukandi u faċilitajiet oħra ta’ ospitalità.

Ir-rapport jistabbilixxi l-pożizzjoni tal-KESE dwar ir-Regolament tal-Kummissjoni Ewropea dwar kiri ta’ akkomodazzjoni fuq medda qasira ta’ żmien . Il-KESE jixtieq li l-Kummissjoni tirrakkomanda li l-awtoritajiet nazzjonali u lokali jivvalutaw perjodikament kif l-attivitajiet ta’ kiri ta’ akkomodazzjoni fuq medda qasira ta’ żmien qed ikollhom impatt, direttament jew indirettament, fuq il-potenzjal tat-turiżmu lokali, il-ħajja tar-residenti lokali, l-akkomodazzjoni disponibbli għall-kiri fit-tul, is-suq lokali tal-akkomodazzjoni, l-għoli tal-ħajja fiż-żona, l-impjiegi, it-tniġġis, ir-rispett tat-tradizzjonijiet u n-negozji lokali.

L-isplużjoni riċenti fil-kiri ta’ akkomodazzjoni fuq medda qasira ta’ żmien permezz ta’ pjattaformi online, li issa jammonta għal madwar kwart tal-akkomodazzjoni turistika kollha fl-UE, poġġiet pressjoni fuq bosta komunitajiet. Filwaqt li xi reġjuni u bliet inqas magħrufa ggwadanjaw mill-iżvilupp tat-turiżmu lokali permezz tal-kiri ta’ akkomodazzjoni fuq medda qasira ta’ żmien aktar affordabbli, destinazzjonijiet turistiċi aktar popolari qed jilħqu punt kruċjali. F’Venezja u Firenze jew Barċellona, biex insemmu wħud minn dawn, il-kompetizzjoni poġġiet lil lukandi u stabbilimenti konvenzjonali oħra f’pożizzjoni ta’ kunflitt ma’ Airbnb u pjattaformi online oħra, u l-ħajja lokali kważi nbidlet f’waħda ta’ konġestjoni.

“Dak li sibna interessanti huma l-effetti sekondarji potenzjali tar-Regolament”, qalet Marinel Dănuț Mureșan, ir-relatur tal-Opinjoni. “Għalkemm ir-Regolament innifsu huwa biss dwar il-ġbir u l-kondiviżjoni tad-data dwar l-akkomodazzjoni fuq medda qasira ta’ żmien fil-livell tal-UE, indirettament, jekk l-awtoritajiet nazzjonali jkunu jistgħu jiksbu din id-data mill-pjattaformi, nistgħu niksbu iktar riżultati sostanzjali. Il-valutazzjonijiet tal-impatt ikunu għodda ewlenija għal dawk li jfasslu l-politika.”

Il-KESE ssuġġerixxa wkoll sistema ta’ poloz ta’ assigurazzjoni li għandhom jiġu adottati mill-ospitanti. Dawn jistgħu jissostitwixxu proċeduri ta’ awtorizzazzjoni onerużi, li r-Regolament jgħid li l-awtoritajiet lokali għandhom jevitaw li jimponuhom fuq in-negozji tal-kiri ta’ akkomodazzjoni fuq medda qasira ta’ żmien, iżda ma jgħidx kif. Dawn il-poloz tal-assigurazzjoni jkopru l-biċċa l-kbira tar-riskji li jirriżultaw mill-attivitajiet tal-kiri ta’ akkomodazzjoni fuq medda qasira ta’ żmien, u jħallu f’idejn l-assiguraturi biex jivverifikaw il-konformità tal-ospitant mar-regoli.

Proposti oħra tal-KESE biex jittejjeb ir-Regolament jinkludu proċess ta’ reġistrazzjoni semplifikat b’format uniformi madwar l-UE kollha u approċċ standardizzat għal-livell ta’ informazzjoni meħtieġ għall-attivitajiet kollha tal-kiri ta’ akkomodazzjoni fuq medda qasira ta’ żmien. (dm)

Matul is-sessjoni plenarja tiegħu tal-24 ta’ Frar, il-KESE adotta Opinjoni dwar il-Komunikazzjoni tal-Kummissjoni li tiddeskrivi l-proposti tagħha għal riforma tal-qafas tal-governanza ekonomika. Hemm bżonn ta’ ftehim rapidu, iżda l-pjan huwa nieqes mid-dettall, jenfasizza l-KESE.

Mill-Ftehim ta’ Maastricht fl-1992, il-qafas tal-governanza ekonomika tal-UE għen jinħolqu kundizzjonijiet li jwasslu għall-istabbiltà ekonomika, it-tkabbir u livell ogħla ta’ impjiegi fl-Ewropa. Madankollu, filwaqt li evolva maż-żmien, il-qafas sar dejjem aktar kumpless u mhux l-istrumenti u l-proċeduri kollha tiegħu għadhom rilevanti llum il-ġurnata. 

Filwaqt li l-KESE jaqbel dwar il-ħtieġa għal ftehim rapidu qabel il-proċessi baġitarji tal-Istati Membri għall-2024, huwa jenfasizza wkoll li ħafna dettalji għad iridu jiġu ffinalizzati. Il-“pjani strutturali fiskali” jridu jiżguraw li l-proporzjonijiet tad-dejn għall-PDG jitbaxxew jew jibqgħu f’livelli prudenti. Fl-istess ħin, ir-regoli jridu jħallu biżżejjed spazju fiskali għall-investimenti relatati mat-tranżizzjoni doppja ekoloġika u diġitali. B’mod aktar importanti, biex qafas riformat jirnexxi, is-sjieda mtejba tar-regoli hija kruċjali. 

“Huwa urġenti li jiġi riformat il-qafas fiskali. Ħafna Stati Membri ma kkonsolidawx biżżejjed il-finanzi pubbliċi tagħhom matul żminijiet tajbin,” qal ir-relatur tal-KESE Krister Andersson. “In-nuqqas ta’ politiki prudenti jagħmel ħsara lil dawk l-aktar vulnerabbli fis-soċjetà. It-tnaqqis fil-livelli tad-dejn u s-sostenibbiltà tad-dejn huma kruċjali. Naqblu dwar il-ħtieġa għal ftehim rapidu qabel il-proċessi baġitarji tal-Istati Membri għall-2024.” (tk)

F’Opinjoni adottata fit-23 ta’ Frar, il-KESE kkummenta dwar il-Komunikazzjoni tal-Kummissjoni Ewropea dwar l-Istħarriġ Annwali dwar it-Tkabbir Sostenibbli 2023, u ħeġġeġ lill-Kummissjoni tinvesti fil-komunikazzjoni tal-isfidi li qed tiffaċċja l-UE, u x’jeħtieġ li jsir biex dawn jingħelbu. 

L-Istħarriġ Annwali dwar it-Tkabbir Sostenibbli 2023, li jiddeskrivi l-prijoritajiet tal-politika ekonomika u tal-impjiegi għall-UE għat-12 sa t-18-il xahar li ġejjin, għandu l-għan li jtaffi l-impatt negattiv tax-xokkijiet fl-enerġija fuq terminu qasir, irawwem tkabbir sostenibbli u inklużiv u jżid ir-reżiljenza ekonomika u soċjali tal-UE fit-terminu medju. 

Fl-Opinjoni tiegħu, il-Kumitat laqa’ l-prijoritajiet stabbiliti fir-rigward tas-sostenibbiltà kompetittiva, kif ukoll l-attenzjoni mogħtija lit-tisħiħ tad-djalogu soċjali fl-UE. Barra minn hekk, il-KESE enfasizza l-importanza ta’ komunikazzjoni tajba u appella lill-Kummissjoni biex tinvesti fiha. Sabiex jittejjeb il-funzjonament tas-suq uniku, il-KESE appella għal kundizzjonijiet tax-xogħol ġusti, kompetizzjoni effettiva u kunsiderazzjoni aħjar tat-tħassib tas-soċjetà ċivili. Il-Kumitat ħeġġeġ ukoll lill-Istati Membri biex jadottaw approċċ realistiku, moderat u bbilanċjat meta jindirizzaw l-inflazzjoni. 

“Diskors b’saħħtu, affidabbli u konġunt dwar l-isfidi tagħna u kif l-UE mmobilizzat biex tegħlibhom huwa fundamentali għaċ-ċittadini, u se jevita nuqqas ta’ fehim dwar il-proġett Ewropew u jagħti spinta lill-idea ta’ ‘Ewropa għal Kulħadd’”, ikkummenta r-relatur tal-KESE Gonçalo Lobo Xavier. (tk)

Il-Ġranet tas-Soċjetà Ċivili 2023 tal-KESE, mill-1 sat-3 ta’ Marzu, ressqu sett ta’ proposti biex mhux biss jipproteġu iżda wkoll jwessgħu l-ispazju ċiviku tal-UE u jiżguraw li l-ġenerazzjonijiet żgħażagħ ikollhom pedament sod biex jibnu fuqu soċjetà ċivili vibranti.

L-avveniment ta’ tlett ijiem sar mill-1 sat-3 ta’ Marzu bit-titolu “L-organizzazzjonijiet tas-soċjetà ċivili: pilastru tad-demokrazija u attur ewlieni biex jingħelbu l-isfidi attwali”. L-avveniment fetaħ b’sejħa biex l-ispazju ċivili fl-UE jissaħħaħ kontra theddid intern u estern, u għalaq bil-preżentazzjoni ta’ sett ta’ konklużjonijiet imfassla minn tmien workshops interattivi. Il-proposti jkopru kwistjonijiet ewlenin għall-futur tas-soċjetà ċivili, u jvarjaw mill-elezzjonijiet tal-UE tal-2024, sal-futur tal-panels taċ-ċittadini fit-tfassil tal-politika tal-UE, is-Semestru Ewropew, u l-finanzjament tas-soċjetà ċivili u temi oħrajn.

Fil-ftuħ, il-President tal-KESE Christa Schweng enfasizzat li l-KESE kemm-il darba ġibed l-attenzjoni għat-theddid li qed jifni s-soċjetà ċivili. “Huwa għalhekk li aħna ċari daqs il-kristall fir-rispons tagħna dwar il-Pjan ta’ Azzjoni għad-Demokrazija Ewropea tal-Kummissjoni. Stedinna lill-Kummissjoni tistabbilixxi pilastru speċifiku għas-soċjetà ċivili u wassalna l-appell tal-organizzazzjonijiet u n-networks tas-soċjetà ċivili Ewopea għal Strateġija tas-Soċjetà Ċivili Ewropea.”

Dubravka Šuica, Kummissarju Ewropew għad-Demokrazija u d-Demografija, qablet li “ma nistgħux nieħdu d-demokrazija bħala fatt. Ma nistgħux nissottovalutaw is-soċjetà ċivili tagħna.” Hija enfasizzat l-azzjoni tal-Kummissjoni b’reazzjoni għall-Konferenza dwar il-Futur tal-Ewropa, bi 80 % tal-inizjattivi leġiżlattivi din is-sena li huma riżultat dirett tal-proposti taċ-ċittadini fil-Konferenza. “Ħadna l-impenn tagħkom bis-serjetà. Aħna ħadna bis-serjetà l-proposti tal-Konferenza.”

Madwar 500 parteċipant ħadu sehem f’dan l-avveniment, li sar b’attendenza fiżika biss għall-ewwel darba minn meta bdiet il-pandemija tal-COVID-19.

Il-konklużjonijiet sħaħ dalwaqt ser jiġu ppubblikati fuq is-sit web tal-KESE. Il-KESE ser jiżgura wkoll li jaslu għand l-istituzzjonijiet l-kbar tal-UE.

L-avvenimenti tal-Ġranet tas-Soċjetà Ċivili huma organizzati mill-KESE f’kooperazzjoni mal-Grupp ta’ Kuntatt tiegħu, li jlaqqa’ flimkien l-organizzazzjonijiet u n-networks tas-soċjetà ċivili pan-Ewropej.