KESE info

Jeħtieġ li ninvestu dejjem aktar fis-sorsi tal-enerġija rinnovabbli biex niżguraw futur aktar ekoloġiku, aktar sikur u aktar affordabbli għall-Ewropa: il-President tal-KESE Christa Schweng u l-Kummissarju għall-Enerġija Kadri Simsom esprimew din il-konvinzjoni flimkien fis-sessjoni plenarja tal-KESE fit-22 ta’ Marzu.

Hija u tinnota li l-prezzijiet tal-enerġija li qed jogħlew b’mod esaġerat, l-inflazzjoni u t-tkabbir ekonomiku baxx wasslu għal sena ta’ sfida kbira għaċ-ċittadini u n-negozji, is-Sinjura Schweng qalet li “l-ħidma favur tranżizzjoni lejn enerġija nadifa fl-Ewropa, l-aċċellerazzjoni tat-tnedija ta’ sorsi ta’ enerġija rinnovabbli, prezzijiet affordabbli tal-enerġija u l-iżgurar u d-diversifikazzjoni tal-provvista tal-enerġija tagħna għadhom l-ogħla prijoritajiet għall-KESE”.

Is-Sinjura Simson iddeskriviet it-triq ’il quddiem għall-politika dwar l-enerġija għall-UE: “Kieku kelli nwieġeb din il-mistoqsija b’kelma waħda biss, din tkun “rinnovabbli”. Għaliex din hija l-ogħla prijorità tal-Kummissjoni fil-qasam tal-politika dwar l-enerġija – li timxi ’l quddiem u twettaq l-objettivi tagħna dwar l-enerġija rinnovabbli”.

Għall-ewwel darba fl-istorja, l-UE m’għadhiex tiddependi mill-enerġija Russa. Permezz tad-diversifikazzjoni tal-provvista tal-gass, it-tnaqqis fid-domanda, iż-żieda fl-effiċjenza u promozzjoni aktar b’saħħitha tal-enerġija rinnovabbli, l-UE temmet id-dipendenza massiva mir-Russja.

39 % tal-elettriku tal-UE issa jiġi minn sorsi rinnovabbli. L-2022 kienet sena rekord: l-UE iġġenerat aktar elettriku mir-riħ u l-enerġija solari milli mill-gass, u l-kapaċità tal-enerġija mir-riħ żdiedet bi 15-il GW u dik tal-enerġija solari b’41 GW. (mp)

F’dibattitu mal-Ministru għax-Xogħol tal-Italja li ġie organizzat fit-22 ta’ Marzu, il-KESE appoġġja l-inizjattiva tal-Kummissjoni li għandha l-għan li ssaħħaħ ir-rwol u l-indipendenza tal-korpi nazzjonali tal-ugwaljanza fi sforz biex jitneħħew il-prattiki ta’ diskriminazzjoni fis-swieq tax-xogħol tal-UE.

Iż-żewġ naħat sostnew li huma jikkondividu l-għanijiet tal-proposta tal-Kummissjoni għal Direttiva dwar standards għall-korpi tal-ugwaljanza sabiex tiżdied l-effikaċja tagħhom. Il-proposta ġiet ippreżentata minħabba li l-miżuri leġiżlattivi attwali dwar l-ugwaljanza ma rnexxilhomx jinfurzaw b’mod adegwat il-liġi tal-UE dwar il-ġlieda kontra t-trattament mhux ugwali u d-diskriminazzjoni.

Fl-Opinjoni tiegħu dwar It-tisħiħ tar-rwol u tal-indipendenza tal-korpi tal-ugwaljanza, li ġiet adottata fis-sessjoni plenarja wara d-dibattitu, il-KESE jenfasizza l-importanza li jinstab il-bilanċ it-tajjeb bejn il-prinċipju tas-sussidjarjetà u li jiġu stabbiliti standards vinkolanti sabiex il-korpi tal-ugwaljanza jsiru aktar b’saħħithom u effiċjenti – pożizzjoni li ġiet mtennija mill-Ministru Taljan waqt id-dibattitu.

“Il-parteċipazzjoni ta’ gruppi differenti fis-suq tax-xogħol mhijiex biss kwistjoni ta’ ġustizzja. Hija tagħmel sens kbir minn perspettiva ekonomika u soċjali. Madankollu, il-Kumitat għadu mħassab dwar il-fatt li l-protezzjoni kontra d-diskriminazzjoni u l-inuwgwaljanza għadha mhijiex uniformi fl-Unjoni, u jappoġġja l-mekkaniżmi b’saħħithom għall-monitoraġġ tagħhom, inkluż permezz tat-tisħiħ tal-korpi nazzjonali tal-ugwaljanza,” qalet il-President tal-KESE Christa Schweng.

Il-Ministru Calderone qalet li l-gvern tagħha jaqbel mal-għan tal-Kummissjoni, madankollu hija enfasizzat li huwa importanti li tiġi żgurata l-konsistenza mas-sistemi nazzjonali u mal-korpi li diġà jeżistu, bħall-kunsilli dwar l-ugwaljanza fl-Italja li jissalvagwardjaw l-ugwaljanza fil-livell nazzjonali u dak reġjonali.

“L-inklużjoni li qed niddiskutu dwarha llum trid tibqa’ fil-qalba tal-aġenda soċjali Ewropea, fuq bażi ugwali mad-diskussjoni li għaddejja bħalissa dwar ir-riforma tal-governanza ekonomika u finanzjarja tal-UE. Nafu kemm għadu diffiċli li jiġu żgurati opportunitajiet indaqs b’mod effettiv fis-suq tax-xogħol. Ċerti gruppi soċjali għadhom jaffaċċjaw ostakli enormi biex jaċċessaw is-swieq tax-xogħol u l-protezzjoni soċjali”, qalet is-Sinjura Calderone.

Il-Ministru enfasizzat li d-differenza bejn il-ġeneri fir-rati tal-impjieg għadhom ’il fuq minn 10 % fil-livell tal-UE. Ma hemmx pajjiż wieħed fl-UE fejn din id-differenza bejn il-ġeneri – għad-detriment tan-nisa kullimkien – ma teżistix. Il-gradwati żgħażagħ ukoll isibuha diffiċli biex isibu impjieg. Il-persuni b’diżabilità u l-migranti legali u r-refuġjati għadhom iħabbtu wiċċhom ma’ diskriminazzjoni meta jfittxu impjieg jew jippruvaw iżommu impjieg. (ll)

Waqt li tkellmet fis-sessjoni plenarja ta’ Marzu tal-KESE, il-President tal-Kunsill Ekonomiku u Soċjali tan-Nazzjonijiet Uniti (ECOSOC) irrakkomandat rwol b’saħħtu għas-soċjetà ċivili fl-implimentazzjoni tal-Aġenda 2030.

L-Ambaxxatriċi Lachezara Stoeva, President tal-ECOSOC tan-NU, qalet li l-atturi tas-soċjetà ċivili huma alleati indispensabbli sabiex jimplimentaw l-Għanijiet ta’ Żvilupp Sostenibbli.

“Irridu nkunu ambizzjużi; l-isfidi globali jeħtieġu risposti globali”, qalet il-President tal-KESE Christa Schweng. Hija żiedet tgħid li “Is-soċjetà ċivili għandu jkollha post mal-mejda waqt is-Summit tal-Għanijiet ta’ Żvilupp Sostenibbli ta’ Settembru, b’involviment aktar strutturat u konkret”.

L-Ambaxxatriċi tan-NU Lachezara Stoeva qalet: “Ma nistgħu nagħmlu xejn mingħajr is-soċjetà ċivili. Is-soċjetà ċivili Ewropea ta’ spiss kellha rwol ta’ tmexxija fil-ħsieb li jħares ’il quddiem. Il-KESE, bin-natura tiegħu ta’ diversi partijiet interessati, għandu l-kapaċità lli jikkontribwixxi u jagħmel il-politiki pubbliċi aktar bbilanċjati, ekwi u reattivi”.

Il-KESE kkontribwixxa b’mod attiv għall-ewwel Rieżami Volontarji globali tal-UE, li ser jiġi ppreżentat waqt il-Forum Politiku ta’ Livell Għoli f’Lulju. B’mod partikolari, il-Kumitat qed jipproduċi kontribut “mudell” tas-soċjetà ċivili, li jista’ jintuża bħala l-aħjar prattika għal reġjuni oħra madwar id-dinja. (mt)

Il-KESE ta l-appoġġ tiegħu għall-proposta tal-Kummissjoni għal rakkomandazzjoni tal-Kunsill dwar introjtu minimu adegwat, u ddeskriviha bħala parti neċessarja mill-isforzi biex jiġi miġġieled il-faqar u biex tintlaħaq il-mira tal-UE li tnaqqas l-għadd ta’ persuni f’riskju b’mill-inqas 15-il miljun sal-aħħar tad-deċennju.

Fl-Opinjoni adottata fis-sessjoni plenarja tiegħu f'Marzu, il-KESE qal li laqa’ b’mod partikolari l-implimentazzjoni ta’ kriterji realistiċi u mhux restrittivi żżejjed biex id-dħul minimu jsir disponibbli għal kulħadd, f’livell li jiggarantixxi lin-nies ħajja ta’ dinjità, fejn ħadd ma jitħalla jibqa’ lura.

L-iżgurar li l-iskemi ta’ dħul minimu jipprovdu riżorsi suffiċjenti jeħtieġ ukoll li jinżammu konformi mal-inflazzjoni, li hija mistennija li tiżdied b’6,5 % oħra fl-2023 (fil-kuntest taż-żieda fl-għoli tal-ħajja mqanqla minn żidiet riċenti fil-prezzijiet tal-ikel u l-enerġija). Għal dan il-għan, il-KESE jipproponi li l-Istati Membri jivvalutaw il-livelli tad-dħul minimu fuq bażi annwali, skont il-livell tal-inflazzjoni.

Dan għandu jiġi mmonitorjat mill-organizzazzjonijiet tas-soċjetà ċivili, l-imsieħba soċjali u l-organizzazzjonijiet għall-benesseri.

“Skemi ta’ dħul minimu effettivi jistgħu jgħinu biex jiggarantixxu li d-drittijiet tal-bniedem ikunu rispettati, jiżguraw li n-nies jgħixu b’dinjità, jgħinuhom jibqgħu attivi u inklużi fis-soċjetà u jgħinu biex jintegrawhom f’impjiegi ta’ kwalità tajba,” qal ir-rapporteur tal-Opinjoni, Jason Deguara, u żied jgħid li n-nies li jaħdmu għal rashom għandhom ukoll ikunu kompletament intitolati għad-dħul minimu u benefiċċji oħra.

Ir-relatur Paul Soete qal: “Il-mira tal-UE hija stabbilita biex tnaqqas l-għadd ta’ persuni f’riskju ta’ faqar b’mill-inqas 15-il miljun sal-2030. Mal-ewwel daqqa t’għajn, din il-mira ma tantx tidher ambizzjuża, iżda l-gwida pprovduta lill-Istati Membri u l-bażi għal metodoloġija soda żgur jagħmluha pass importanti ’l quddiem.”

Il-livelli ta’ dħul minimu u l-kompożizzjoni jvarjaw b’mod konsiderevoli fost l-istati soċjali b’mod ġenerali, u dan huwa wkoll il-każ fl-UE. Is-sitwazzjoni tas-suq tax-xogħol tal-benefiċjarji tal-introjtu minimu tvarja b’mod sinifikanti fost l-Istati Membri.

L-ebda wieħed mill-pajjiżi tal-UE bħalissa ma jiżgura appoġġ adegwat għad-dħul għal familji bla xogħol biex jiġu evitati r-riskji tal-faqar. Minħabba kundizzjonijiet ta’ eliġibbiltà, bħall-età minima, l-istatus ta’ residenza, il-persuni bla dar jew kwistjonijiet ta’ kompożizzjoni tal-familja, xi 20 % tan-nies bla xogħol ma huma eliġibbli biex jirċievu l-ebda appoġġ.
Hemm ukoll problema ta’ nuqqas ta’ użu tal-introjtu minimu stmat għal bejn 30 % u 50 %, fil-biċċa l-kbira minħabba piżijiet amministrattivi. (ll)

F’Marzu li għadda, b’reazzjoni għar-rapport tal-Kummissjoni Ewropea dwar ix-xejriet u l-kwistjonijiet li għandhom jiġu sorveljati, il-KESE enfasizza li seta’ kkontribwixxa aktar kieku kien involut mill-bidu nett tal-eżerċizzju ta’ prospettiva.

L-Opinjoni tal-KESE dwar ir-Rapport ta’ Strateġija Prospettiva 2022, li ġiet adottata fis-sessjoni plenarja ta’ Marzu, tenfasizza li l-KESE jista’ jsaħħaħ l-kapaċita ta’ analiżi u ta’ prospettiva tal-UE. Il-Kumitat, li josserva u jisma’ lis-soċjetà ċivili, jinsab fl-aħjar pożizzjoni biex jidentifika xejriet emerġenti. Biex juri dan, il-KESE ta wkoll kontribut bikri għar-rapport ta’ prospettiva strateġika 2023 li jmiss.

Ir-relatur, Angelo Pagliara, spjega wħud mill-kunsiderazzjonijiet tal-Opinjoni: “Ħafna mill-kwistjonijiet fir-rapport tal-Kummissjoni diġà ġew indirizzati mill-KESE fl-Opinjonijiet tiegħu fis-snin preċedenti. Il-KESE għandu għarfien espert u esperjenza b’saħħithom ħafna. Għalhekk, irrikorru għandna, involvuna aktar, għaliex il-kontribut tagħna huwa siewi ħafna”.

Ir-Rapport ta’ Prospettiva Strateġika 2022 janalizza liema huwa l-aħjar mod biex jiġu allinjati l-ambizzjonijiet klimatiċi tal-UE u l-għanijiet diġitali tagħha, li potenzjalment jistgħu jkunu kunfliġġenti, u jidentifika l-għaxar oqsma ewlenin fejn jeħtieġ li tittieħed azzjoni biex jiġu masimizzati s-sinerġiji u l-konsistenza. F’dan ir-rigward, il-KESE jappella għal aġenda ta’ prospettiva strateġika li tkun immirata lejn mudell ta’ żvilupp ġdid li jikkombina s-sostenibbiltà ekonomika, ambjentali u soċjali, u jpoġġi lin-nies fiċ-ċentru tiegħu.

Waħda mid-dgħufijiet ewlenin li l-KESE osserva fir-rapport tal-2022 hija n-nuqqas ta’ stampa ċara tar-riskji u x-xenarji f’każ li l-UE tonqos milli tilħaq l-għanijiet tagħha fir-rigward tad-disponibbiltà tal-materja prima, tal-metalli tal-materjali tal-art rari, u tar-riżorsi tal-ilma.

B’ħarsa ’l quddiem għar-rapport ta’ prospettiva strateġika 2023 li jmiss, li l-Kummissjoni mistennija li tippubblika fit-tieni kwart tal-2023 u li se jiffoka Ewropa sostenibbli mil-lat soċjali u ekonomiku, il-KESE identifika l-oqsma li ġejjin li jeħtieġu attenzjoni speċjali:

• is-sistemi ta’ provvista u r-reżiljenza tas-settur agroalimentari tal-Ewropa;
• il-promozzjoni ta’ sistema industrijali Ewropea b’saħħitha, koeżiva u innovattiva li tkun kapaċi toħloq impjiegi ta’ kwalità;
• Il-ħtieġa li tinkiseb awtonomija strateġika tal-enerġija u li jiġu appoġġjati n-negozji u l-ħaddiema, fid-dawl ta’ dak li sar matul il-kriżi tal-pandemija. (dm)

Fil-plenarja tiegħu ta’ Marzu, il-KESE adotta Opinjoni li tħeġġeġ lill-istituzzjonijiet Ewropej jindirizzaw l-implimentazzjoni frammentata tas-sanzjonijiet tal-politika estera fl-Istati Membri kollha. Il-KESE huwa mħasseb dwar dawn l-inkonsistenzi u jappella għal azzjoni immedjata biex tiġi offruta għajnuna umanitarja u jiġu protetti l-ġurnalisti fil-pajjiżi sanzjonati.

Il-Kunsill tal-Unjoni Ewropea jistabbilixxi s-sanzjonijiet tal-politika estera għall-Istati Membri kollha. Madankollu, l-implimentazzjoni u l-infurzar tagħhom bħalissa huma deċentralizzati. Dan irriżulta f’taħlita kbira ta’ definizzjonijiet, kampijiet ta’ applikazzjoni, penali u kapaċitajiet investigattivi fl-Istati Membri. Il-frammentazzjoni ddgħajjef l-effettività tas-sanzjonijiet tal-UE u tirriskja li taqsam l-Unjoni, b’xi pajjiżi aktar laxki fuq il-ksur tas-sanzjonijiet minn oħrajn. Biex tindirizza dawn il-kwistjonijiet, il-Kummissjoni Ewropea pproponiet direttiva biex tistandardizza r-reati kriminali u l-pieni għall-ksur tas-sanzjonijiet tal-UE.

Permezz tal-Opinjoni tiegħu dwar il-ksur tas-sanzjonijiet / ir-reati fl-UE, il-KESE jħeġġeġ lill-istituzzjonijiet tal-UE biex jespandu l-konċessjoni umanitarja bil-għan li jiġu evitati kwalunkwe konsegwenzi negattivi mhux intenzjonati fuq l-għajnuna u l-assistenza umanitarja. “Irridu nipproteġu t-twassil tal-għajnuna umanitarja lill-persuni fil-bżonn li jgħixu f’pajjiżi sanzjonati,” spjega l-membru tal-KESE José Antonio Moreno Díaz, relatur tal-Opinjoni. “Nitolbu eżenzjoni umanitarja permanenti sabiex jiġi żgurat li l-persunal li jaħdem fil-qasam umanitarju jkun jista’ jaħdem mingħajr ma jirriskja r-responsabbiltà kriminali”.

Il-Kumitat enfasizza l-bżonn li tiġi pprovduta informazzjoni adegwata u appoġġ proattiv lis-settur privat u lill-organizzazzjonijiet tas-soċjetà ċivili, sabiex ikunu jistgħu jaġġustaw għal leġiżlazzjoni ġdida u jikkonformaw mar-rekwiżiti ta’ miżuri ta’ sanzjoni. L-Istati Membri jridu jkunu attrezzati b’biżżejjed kapaċitajiet amministrattivi, fondi, u persunal imħarreġ biex jidentifikaw, iħarrku u jikkastigaw ksur ta’ sanzjonijiet. (gb)

Fil-plenarja ta’ Marzu, il-Kumitat Ekonomiku u Soċjali Ewropew (KESE) adotta Opinjoni dwar Strateġija tal-UE dwar il-fertilizzanti, li fiha appella għad-disponibbiltà, l-affordabbiltà u s-sostenibbiltà.

Il-kriżi globali tal-fertilizzanti laħqet livell kritiku fl-Ewropa, fejn il-bdiewa qed jiffaċċjaw sfidi mingħajr preċedent minħabba prezzijiet rekord u l-iskarsezzi fil-provvista. Din il-kriżi ġiet aggravata mill-gwerra reċenti fl-Ukrajna, li għamlitha theddida serja għall-agrikoltura Ewropea u s-sigurtà tal-ikel globali.

Fil-plenarja tiegħu ta’ Marzu, il-KESE laqa’ l-Komunikazzjoni tal-Kummissjoni dwar L-iżgurar tad-disponibbiltà u l-affordabbiltà tal-fertilizzanti, u enfasizza l-ħtieġa għal miżuri domestiċi ta’ emerġenza biex jiġi limitat l-impatt tal-kriżi.

“Il-bdiewa jiffaċċjaw prezzijiet għoljin għall-fertilizzanti li għandhom impatt fuq il-konsumaturi. Aħna nilqgħu l-Komunikazzjoni tal-Kummissjoni Ewropea dwar l-iżgurar tad-disponibbiltà u l-affordabbiltà tagħhom. Madankollu, jinħtieġu wkoll miżuri ta’ emerġenza u aktar fit-tul biex jiġi limitat l-impatt tal-kriżi,” qal Arnold Puech d’Alissac, relatur għall-Opinjoni tal-KESE.

Il-KESE ppropona diversi miżuri korrettivi biex jittejjeb il-funzjonament tas-suq tal-fertilizzanti tal-UE, inkluż appoġġ dirett għall-iżjed manifatturi tan-nitroġenu u l-bdiewa milquta permezz tal-għajnuna mill-Istat.
Madankollu, il-Kumitat jenfasizza wkoll il-ħtieġa li jiġu indirizzati l-provvista u l-prezzijiet tal-fertilizzanti billi jiġu ffaċilitati l-importazzjonijiet u l-kompetizzjoni domestika. Dan jista’ jinkiseb billi jiġu sospiżi t-tariffi tal-importazzjoni tal-UE fuq il-fertilizzanti kollha, tiġi ffaċilitata l-loġistika tal-fertilizzanti u jiġu pprovduti flessibbiltajiet regolatorji.

Minbarra miżuri fuq perjodu qasir ta’ żmien, il-KESE appella wkoll għal soluzzjonijiet fuq terminu medju biex tiġi limitata d-dipendenza tal-UE minn fertilizzanti minerali importati u biex titnaqqas l-impronta ambjentali tal-fertilizzazzjoni tal-għelejjel.
Il-KESE laqa’ wkoll b’sodisfazzjon l-istabbiliment fl-2023 ta’ osservatorju ġdid b’rabta mas-suq tal-fertilizzanti bil-għan li jiżdied il-livell ta’ trasparenza fis-suq Ewropew tal-fertilizzanti permezz tal-pubblikazzjoni regolari tal-prezzijiet rappreżentattivi għas-suq intern kif ukoll ta’ statistika dwar il-produzzjoni u l-użu tal-fertilizzanti.

Fix-xena internazzjonali, il-KESE jħeġġeġ lill-UE żżid il-miżuri kontra n-nuqqas ta’ sigurtà globali tal-ikel, bis-saħħa tal-promozzjoni tat-trasparenza, id-disponibbiltà u l-użu effettiv tal-fertilizzanti. Il-kummerċ globali tal-fertilizzanti għandu jiġi ffaċilitat billi s-swieq jinżammu miftuħa, jiġu evitati r-restrizzjonijiet u l-projbizzjonijiet fuq l-esportazzjoni, tiżdied il-produzzjoni tal-fertilizzanti fl-Ewropa u jiġu estiżi r-rotot tal-loġistika. (ks)

Hemm wisq ostakli li għadhom idgħajfu l-potenzjal tas-sistemi tal-enerġija diġitali. Huwa diffiċli li jiġu implimentati soluzzjonijiet aktar intelliġenti, speċjalment minħabba proċeduri amministrattivi kbar, nuqqas ta’ inċentivi effettivi, u l-inflessibbiltà tan-network ta’ trażmissjoni u distribuzzjoni minħabba nuqqas ta’ investiment fl-infrastruttura tal-enerġija.

Dawn huma l-konklużjonijiet ewlenin milħuqa fl-Opinjoni tal-KESE “Pjan ta’ azzjoni tal-UE għad-diġitalizzazzjoni tas-settur tal-enerġija”.

L-Opinjoni tfasslet mir-relatur Thomas Kattnig u l-korelatur Zsolt Kükedi u ġiet adottata fis-sessjoni plenarja ta’ Marzu.

B’mod ġenerali, il-KESE jappoġġja l-objettivi u l-biċċa l-kbira tal-miżuri proposti fil-pjan ta’ azzjoni tal-Kummissjoni Ewropea. Madankollu, fil-fehma tal-KESE, il-Kummissjoni tonqos milli tintegraha fil-politika ġenerali tal-enerġija u toħloq approċċ silo. Id-diġitalizzazzjoni tas-sistema tal-enerġija għandha twassal għal soluzzjonijiet kooperattivi fejn l-utenti jkollhom inċentivi biex jipparteċipaw fis-sistema tal-enerġija diġitalizzata.

Fid-disinn futur tal-infrastruttura tal-enerġija, il-konsumaturi kollha għandhom ikunu involuti b’mod attiv fl-iżvilupp ta’ sistemi ta’ enerġija intelliġenti. “Huwa estremament importanti li jissaħħaħ ir-rwol tal-konsumaturi attivi fid-diġitalizzazzjoni u li jiġu mħeġġa u jkunu jistgħu jużaw kemm jista’ jkun soluzzjonijiet intelliġenti,” qal is-Sur Kükedi.

Barra minn hekk, is-servizzi ġodda mmexxija mid-data u soluzzjonijiet teknoloġiċi innovattivi jirriskjaw li ma jiġux implimentati malajr biżżejjed peress li ma jkunx hemm biżżejjed ħaddiema tas-sengħa u professjonisti mħarrġa biex jgħinu fl-implimentazzjoni tagħhom. Sabiex jintlaħqu dawn l-għanijiet, iridu jiġu adottati miżuri mmirati tal-politika tas-suq tax-xogħol u tal-edukazzjoni. “Neħtieġu approċċ ikkoordinat u kooperazzjoni mill-qrib mal-imsieħba soċjali. L-involviment tal-organizzazzjonijiet tas-soċjetà ċivili huwa essenzjali,” qal is-Sur Kattnig. (mp)

Fit-23 ta’ Marzu, il-KESE adotta żewġ Opinjonijiet dwar l-aktar ħidma reċenti tal-Kummissjoni biex tkompli tiżviluppa Unjoni tas-Swieq Kapitali tal-UE frammentata u sottożviluppata: Att ġdid dwar il-kwotazzjoni fil-borża u rieżami tar-Regolament dwar l-Infrastruttura tas-Suq Ewropew (EMIR).

Permezz ta’ Att ġdid dwar il-kwotazzjoni fil-borża, il-Kummissjoni għandha l-għan li tnaqqas il-piż amministrattiv tal-proċess tal-kwotazzjoni fil-borża fuq il-kumpaniji ta’ kull daqs, b’mod partikolari l-SMEs, sabiex ikunu jistgħu jaċċessaw aħjar il-finanzjament billi jiġu kkwotati fil-boroż tas-swieq pubbliċi Ewropej.

Il-KESE jilqa’ l-inizjattiva peress li ż-żieda tal-finanzjament mill-bejgħ ta’ ishma u t-tnaqqis tad-dipendenza mill-finanzjament bankarju għall-kumpaniji Ewropej huwa essenzjali biex jiġu żgurati l-irkupru ta’ wara l-pandemija u l-bini ta’ sistema ekonomika reżiljenti. Il-Kumitat jemmen li jekk il-kumpaniji tal-familja jinġiebu fis-swieq kapitali, dan jagħti lok biex jiġi sfruttat il-potenzjal mhux mimsus ħalli jiġi attirat il-kapital għat-tkabbir.

Ir-relatur tal-KESE Kęstutis Kupšys jispjega li “r-reġim tal-ishma bi drittijiet ta’ vot multiplu jgħin lill-familji jżommu l-kontroll, u b’hekk il-kwotazzjoni fil-borża ssir aktar attraenti għalihom. Huwa importanti wkoll li jiġi ssemplifikat il-kontenut ta’ prospett li jnaqqas b’mod sinifikanti l-ispejjeż u l-piż għall-emittenti. Madankollu, l-użu ta’ dokumenti tal-ħruġ bl-“Ingliż biss”, skont il-proposta tal-Kummissjoni, ixekkel l-iżvilupp ta’ bażi nazzjonali ta’ investiment għall-konsumatur.”

Il-Kummissjoni pproponiet ukoll Regolament ġdid dwar l-Infrastruttura tas-Suq Ewropew (EMIR) biex ittejjeb il-kapaċità ta’ kklerjar fi ħdan l-UE. Fir-rigward tal-EMIR, il-KESE kien qiegħed jistenna pożizzjoni aktar ċara dwar it-tnaqqis tal-esponiment għal kontropartijiet ċentrali tar-Renju Unit u regoli u inċentivi aktar speċifiċi biex jiġi xprunat iċ-ċaqliq lejn kontropartijiet ċentrali bbażati fl-UE wara l-Brexit.

Ir-relatur tal-KESE Florian Marin qal: “M’hemmx pjan ċar b’miżuri speċifiċi għall-ħolqien ta’ suq tal-ikklerjar kompetittiv u kkonsolidat. Jiddispjaċina li l-qafas attwali ma ġiex ivvalutat wara ħames snin, u nipproponu li l-Awtorità Ewropea tat-Titoli u s-Swieq (ESMA) toħroġ rapport sena wara d-dħul fis-seħħ tar-Regolament dwar ir-raġunijiet għall-użu ta’ kontropartijiet ċentrali mhux tal-UE.” (tk)

L-applikazzjoni EYou li tagħmel l-UE aktar aċċessibbli għaż-żgħażagħ kienet il-proposta li rċeviet l-aktar voti matul l-avveniment ewlieni tal-KESE.

Il-105 studenti tal-iskola sekondarja minn 35 skola mill-Istati Membri kollha tal-UE u s-seba’ pajjiżi kandidati li ġew Brussell fit-23 u l-24 ta’ Marzu għall-avveniment L-Ewropa Tiegħek, Leħnek ressqu l-ħames rakkomandazzjonijiet li ġejjin:

1.    UE semplifikata: applikazzjoni EYou li tippermetti liż-żgħażagħ jinvolvu ruħhom direttament mal-politiċi u mas-soċjetà ċivili billi jagħżlu l-interessi ewlenin tagħhom u jsegwu l-aħħar żviluppi fil-livell lokali;
2.    Il-pjattaforma E-Youth għall-informazzjoni dwar l-UE biex tiġi ssemplifikata l-politika għall-ġenerazzjonijiet iżgħar, u tagħtihom forum fejn leħinhom jingħata widen;
3.    Il-pjattaforma tal-EYout(h)rust se żżid it-trasparenza fil-politika fil-livell lokali, nazzjonali u tal-UE;
4.    Il-proġett Youth Democratic Opinion (YDO) li se jtejjeb il-kwalità tal-edukazzjoni ċivika u l-involviment fl-Ewropa billi jistabbilixxi programm ta’ ambaxxaturi tal-UE li jiġbor il-fehmiet taż-żgħażagħ u jipproponi rakkomandazzjonijiet lil dawk li jfasslu l-politika;
5.    Aktar inizjattivi ffinanzjati mill-UE mexxijin MIŻ-żgħażagħ GĦAŻ-żgħażagħ.

“Għidulna x’inhuma l-aspettattivi u t-tamiet tagħkom għall-futur tal-Ewropa,” talbet il-President tal-KESE Christa Schweng lill-istudenti miġbura għall-avveniment. “Biex tindirizza sfidi ġodda, jeħtieġ li l-UE tagħti widen liż-żgħażagħ u tadotta ideat ġodda.”
 
Il-Viċi President tal-KESE għall-Komunikazzjoni Cillian Lohan qal lill-istudenti li l-KESE se jippreżenta r-rakkomandazzjonijiet tagħhom fl-Avveniment Ewropew taż-Żgħażagħ (EYE) tal-Parlament Ewropew fi Strasburgu f’Ġunju 2023. Fil-fehma tal-Viċi President Lohan, “meta d-difetti tas-sistema jibdew joħorġu fid-dieher jew meta din tkun f’riskju, ilkoll kemm aħna rridu nintensifikaw l-attivitajiet privati tagħna u nsiru attivi. Illum, intom għamiltu dan il-pass: grazzi.”

Id-diskussjonijiet urew li ż-żgħażagħ jemmnu li bħalissa ma hemm l-ebda spazju biex isemmgħu leħinhom fl-Unjoni Ewropea. Il-membru tal-KESE Neža Repanšek assigurathom li din il-frustrazzjoni hija punt ta’ tluq tajjeb għall-bidla: “Il-motivazzjoni li wasslitni biex nipparteċipa b’mod attiv nibtet mill-frustrazzjoni. Rajt li meta ż-żgħażagħ jingħaqdu flimkien, nistgħu nkunu forza qawwija.”

L-14-il edizzjoni tal-avveniment L-Ewropa Tiegħek, Leħnek iffokat fuq “Djalogi maż-Żgħażagħ dwar id-Demokrazija” u għall-ewwel darba pparteċipaw fih studenti mill-Ukrajna u l-Moldova. (gb/tk)