KESE info

Dibattitu dwar l-isfidi u l-prospetti għall-SMEs fl-UE ospitat mill-KESE laqa’ l-miżuri mħabbra fid-diskors dwar l-Istat tal-Unjoni u ddiskuta l-proposti tal-KESE biex it-trasferimenti tan-negozji jsiru aktar faċli fost it-tħassib dwar in-numru dejjem jikber tagħhom. 

Il-plenarja tal-KESE fit-22 ta’ Settembru inkludiet dibattitu dwar is-suġġett “SMEs fl-Ewropa – sfidi u perspettivi”. Fid-dibattitu pparteċipaw David Clarinval, Ministru Belġjan għall-SMEs, Isabelle Schömann, Segretarju Konfederali tal-Konfederazzjoni Ewropea tat-Trade Unions, u Véronique Willems, Segretarju Ġenerali ta’ SMEunited, u waqtu ġie ppreżentat ukoll rapport tal-KESE dwar it-trasferimenti tan-negozju fl-UE.

Is-Sur Clarinval pinġa stampa mħallta tas-sitwazzjoni li jiffaċċjaw l-SMEs Belġjani, bis-saħħiet tagħhom – id-diġitalizzazzjoni, l-innovazzjoni, l-aċċess għall-finanzi – u d-dgħufijiet – nuqqas ta’ ħaddiema tas-sengħa, indiċjar awtomatiku tas-salarji, ħlasijiet tard. “Is-suq uniku huwa fundamentali għal dawn in-negozji,” huwa qal. “Madanakollu mhux dejjem huwa perfett, u anke issa r-reazzjonijiet għall-kwistjonijiet tal-enerġija jistgħu jibqgħu fil-livell nazzjonali f’ħafna każijiet.” Imbagħad iddeskriva l-miżuri stabbiliti mill-awtoritajiet Belġjani biex jgħinu lill-kumpaniji jiffaċċjaw il-kriżi tal-enerġija, b’enfasi fuq skemi ta’ flessibbiltà tal-ħlas. 

Is-Sinjura Schömann ammettiet li veru li tajjeb li l-SMEs jiġu appoġġjati matul dawn iż-żminijiet ħorox, billi jiġu riveduti r-regoli tal-għajnuna mill-Istat u l-politika tal-kompetizzjoni. Veru li tajjeb li jsir investiment fl-edukazzjoni, fit-titjib tal-ħiliet u fit-taħriġ mill-ġdid biex il-kumpaniji jiġu megħjuna jiffaċċjaw it-tranżizzjonijiet ekoloġiċi u diġitali, iżda jkun żbaljat għan-negozji u l-SMEs li jħarsu lejn id-dimensjoni soċjali tat-tranżizzjoni doppja biss mil-lenti tal-ħiliet. Bl-istess mod fil-każ tal-kriżijiet reċenti, “Mhuwiex aċċettabbli li n-negozji, kemm jekk kbar kif ukoll jekk żgħar, ikollhom aċċess għall-flus pubbliċi mingħajr ebda kundizzjoni. Jeħtieġ li jkun hemm kundizzjonijiet soċjali biex jinżammu l-impjiegi – impjiegi ta’ kwalità,” argumentat,” li jinkludu wkoll l-eżerċizzju effettiv tad-demokrazija fuq il-post tax-xogħol permezz tal-infurmar u l-konsultazzjoni tal-ħaddiema. L-antiċipazzjoni tal-bidla mhijiex kwistjoni għan-negozji biss. Jeħtieġ li l-kumpaniji jindirizzaw dan flimkien mal-ħaddiema jekk kulħadd irid jaċċetta l-miżuri li jiddaħħlu fis-seħħ.”

Is-Sinjura Willems faħħret il-miżuri l-ġodda mħabbra fl-indirizz tal-President tal-Kummissjoni dwar l-Istat tal-Unjoni, partikolarment il-limiti tad-dħul għall-produtturi tal-elettriku u l-pakkett ta’ għajnuna għall-SMEs fil-bżonn, fuq kollox id-Direttiva dwar il-Ħlas Tard, għax “sempliċement mhux ġust li wieħed minn kull erbgħa fallimenti huma minħabba li l-fatturi ma jitħallsux fil-ħin. Il-Kummissjoni nediet bosta inizjattivi f’dan il-mandat li se jkollhom impatt fuq l-SMEs. Madankollu, għadna mhux se nsejħulha qafas legali abilitanti,” qalet, filwaqt li rrimarkat dak li l-organizzazzjoni tagħha tqis bħala l-elementi neqsin, b’mod partikolari l-ħtieġa li t-test tal-SMEs isir aktar effettiv u jtaffi l-piż regolatorju: l-approċċ “one-in, one-out” mhuwiex biżżejjed. Irridu naħdmu b’approċċ “one-in, more-out,” saħqet hi. (dm)

Matul il-plenarja ta’ Settembru, il-KESE adotta Opinjoni fuq inizjattiva proprja dwar it-Test taż-Żgħażagħ tal-UE. Iż-żgħażagħ ilhom jitolbu li leħinhom jinstema’ fil-proċessi tat-teħid tad-deċiżjonijiet għal snin sħaħ. B’din l-Opinjoni, il-KESE jsir l-ewwel korp tal-UE li jappoġġja s-sejħa tagħhom għal mekkaniżmu li jivvaluta l-impatt tal-leġiżlazzjoni futura fuq iż-żgħażagħ.

Il-KESE jemmen li biex jinkiseb impatt dejjiemi u legat lil hinn mis-Sena Ewropea taż-Żgħażagħ, jeħtieġ li ż-żgħażagħ jiġu involuti fit-tfassil ta’ politika.

Ir-relatur tal-KESE tal-Opinjoni, Katrīna Leitāne, qalet li ż-żgħażagħ qed jappellaw għat-Test taż-Żgħażagħ tal-UE. Sabiex ir-regolamenti u l-politiki jsiru aħjar, għandu jiġi introdott it-Test taż-Żgħażagħ tal-UE: għodda tal-analiżi tal-impatt imfassla biex jiġi żgurat li ma jkun hemm l-ebda impatt negattiv ta’ kwalunkwe politika fuq iż-żgħażagħ u l-ġenerazzjonijiet futuri billi jkun hemm diskors bi skop maż-żgħażagħ u jiġu proposti miżuri ta’ mitigazzjoni.

Il-KESE jirrikonoxxi r-referenza għat-Test taż-Żgħażagħ tal-UE fil-Komunikazzjoni tal-Kummissjoni Ewropea dwar ir-riżultat finali tal-Konferenza dwar il-Futur tal-Ewropa. Madankollu, huwa jenfasizza li l-proposta tal-Kummissjoni ma tilħaqx l-għanijiet tal-proposta oriġinali, hija nieqsa minn involviment sinifikanti mal-organizzazzjonijiet u l-esperti taż-żgħażagħ u tonqos milli tqis b’mod sistematiku liż-żgħażagħ fil-politiki kollha sabiex jitqies l-impatt fit-tul tal-politiki fuq il-ġenerazzjonijiet futuri.

Il-KESE jappella wkoll għal kooperazzjoni interistituzzjonali akbar billi jiġu allinjati inizjattivi eżistenti ta’ suċċess bħad-Djalogu tal-UE maż-Żgħażagħ, “L-Ewropa Tiegħek, Leħnek” u l-Avveniment Ewropew taż-Żgħażagħ. Barra minn hekk, il-Kumitat jiddeskrivi lista ta’ proposti dwar il-parteċipazzjoni taż-żgħażagħ fil-KESE u ser jikkunsidra modi kif il-kunċett tat-Test taż-Żgħażagħ tal-UE jiġi inkorporat fil-ħidma tiegħu. (gb)

F’Opinjoni fuq inizjattiva proprja, il-KESE jipproponi li jinħoloq fond ta’ aġġustament għall-klima biex jiġi żgurat rispons rapidu għal kriżijiet ġodda tal-klima u tal-enerġija. Il-fond ta’ aġġustament għall-klima jikkomplementa l-politiki eżistenti tal-UE u jiżgura użu aktar effettiv tal-finanzjament eżistenti.

Pereżempju, filwaqt li pprovda appoġġ impressjonanti lill-Istati Membri mill-2002, il-Fond ta’ Solidarjetà tal-UE, bil-baġit annwali tiegħu ta’ EUR 500 miljun, ma jistax ikopri l-ispejjeż tal-ħsara kkawżata minn diżastri naturali fl-2021. L-għargħar fl-Ewropa tal-Punent biss swew madwar EUR 38 biljun.

Ir-Relatur Ioannis Vardakastanis jgħid: “il-viżjoni tagħna għal fond ta’ aġġustament għall-klima hija li niżguraw mekkaniżmu ta’ finanzjament b’saħħtu bl-użu ta’ fondi eżistenti tal-UE biex jirrispondu malajr għall-emerġenzi u jgħinu biex komunitajiet bil-ħsara jinbnew mill-ġdid. Huwa mod ambizzjuż ħafna biex jerġgħu jinbnew u jiġu protetti żoni milquta minn kriżijiet urġenti tal-klima, l-enerġija u l-ambjent”.

Barra minn hekk, il-kriżi tal-enerġija attwali ma kinitx fuq l-aġenda meta tfasslu l-baġit tal-Qafas Finanzjarju Pluriennali tal-UE għall-2021 sal-2027 u l-pjan ta’ rkupru NextGenerationEU. Il-fond ta’ aġġustament għall-klima jindirizza l-ħtieġa għal investiment urġenti f’sorsi alternattivi tal-enerġija b’mod aktar effettiv mill-mekkaniżmi eżistenti. Dan huwa speċjalment rilevanti issa, fejn ħafna nies ma jistgħux iħallsu l-kontijiet tal-gass jew tad-dawl tagħhom.

“M’aħniex lesti b’mod adegwat biex nirrispondu għall-emerġenzi u d-diżastri minħabba t-tibdil fil-klima u l-kriżi tal-enerġija, jew f’termini ta’ volum ta’ fondi jew ta’ puntwalità”, tgħid Judith Vorbach, korelatur għall-Opinjoni. “L-istabbiliment ta’ fond ta’ aġġustament għall-klima jkun għodda importanti biex tissolva dil-problema”. (tk)

F’Opinjoni fuq inizjattiva proprja, il-KESE jistieden lill-Kummissjoni tiddeskrivi d-dispożizzjonijiet li huma meħtieġa biex it-tassonomija tas-sostenibbiltà tal-UE tiġi estiża għall-objettivi soċjali. Il-Kummissjoni għandha l-mandat mir-Regolament dwar it-Tassonomija biex tippubblika rapport relatat, iżda s’issa naqset milli tagħmel dan.

“Il-KESE jappella għal tassonomija tal-UE olistika, li tinkludi s-sostenibbiltà ambjentali kif ukoll dik soċjali. Tassonomija soċjali tgħin biex l-investiment jiġi kanalizzat lejn l-għanijiet soċjali”, tgħid ir-relatur Judith Vorbach. “Għandha tikkostitwixxi standard tad-deheb, li jirrifletti livell ogħla ta’ ambizzjoni minn dak previst fil-leġiżlazzjoni”.

It-tassonomija tal-UE hija sistema ta’ klassifikazzjoni li tistabbilixxi lista ta’ attivitajiet ekonomiċi ambjentalment sostenibbli biex tiżdied l-iskala tal-investiment sostenibbli b’appoġġ għall-Patt Ekoloġiku Ewropew.

Il-KESE huwa tal-fehma li tassonomija soċjali tgħin biex tindirizza talbiet fittizji min-negozji li jridu jattiraw investituri soċjalment responsabbli, billi tipprovdi informazzjoni preċiża dwar l-impronta soċjali tagħhom. Tassonomija soċjali inkwadrata b’mod intelliġenti tista’ tikkontribwixxi ħafna biex jiġi evitat l-hekk imsejjaħ ħasil soċjali (social washing) l-istess bħall-greenwashing.

Kęstutis Kupšys, membru tal-grupp ta’ studju, jenfasizza li l-industrija finanzjarja hija ħerqana li tiddiskuti t-tassonomija soċjali. “Hemm domanda għal prodotti finanzjarji sostenibbli fis-suq, inkluż għas-sostenibbiltà soċjali”, huwa qal. “Sakemm ma jkollniex klassifikazzjoni ċara dwar dak li jitqies bħala ‘soċjali’, dan l-aspett se jkun nieqes mill-qasam tal-investimenti sostenibbli.” (tk)

Fis-26 ta’ Settembru, il-KESE organizza konferenza dwar l-aħħar Rapport tal-Kummissjoni Ewropea dwar l-Istat tad-Dritt biex jiddiskuti modi kif jiġi żgurat li r-rakkomandazzjonijiet li saru fir-rapport jirriżultaw f’titjib tanġibbli fl-Istati Membri.

Ir-Rapport tal-Kummissjoni Ewropea dwar l-Istat tad-Dritt għall-ewwel darba jinvolvi rakkomandazzjonijiet speċifiċi għall-pajjiż fir-rigward tal-ġustizzja, il-korruzzjoni, il-media, u sistema ta’ kontrokontrolli. Il-progress kien irregolari fl-Unjoni, u għad hemm tħassib serju f’għadd ta’ Stati Membri.

“L-UE għandha dejjem tuża l-għodod kollha tagħha – inkluża l-kondizzjonalità baġitarja – biex tindirizza kwalunkwe attakk ġdid fuq id-demokrazija, l-istat tad-dritt jew id-drittijiet tal-bniedem, hekk kif jitfaċċaw, u kull fejn iseħħu,” qalet il-President tal-KESE Christa Schweng, li fetħet il-konferenza.

Il-Kummissarju Ewropew għall-Ġustizzja, Didier Reynders, spjega li “Din is-sena reġgħet uriet li huwa fundamentali li tiġi ankrata kultura b’saħħitha tal-istat tad-dritt fl-UE. Hekk kif naħdmu flimkien biex ngħinu lill-Ukrajna tiddefendi s-sovranità u l-integrità tagħha, nistgħu nibqgħu kredibbli biss jekk nipproteġu l-istat tad-dritt fl-Unjoni Ewropea wkoll.”

Il-konferenza kienet ukoll opportunità biex jiġi ppreżentat it-tieni rapport ta’ sinteżi mill-Grupp tal-KESE dwar id-Drittijiet Fundamentali u l-Istat tad-Dritt, li jagħti ħarsa ġenerali lejn iż-żjarat fil-pajjiżi organizzati mill-Grupp dwar id-Drittijiet Fundamentali u l-Istat tad-Dritt fid-Danimarka, il-Ġermanja, l-Irlanda, ir-Repubblika Ċeka, Spanja, Ċipru u l-Litwanja fl-2020 u l-2021. Cristian Pîrvulescu, President tal-Grupp dwar id-Drittijiet Fundamentali u l-Istat tad-Dritt, spjega li “Filwaqt li s-sistemi demokratiċi fil-pajjiżi li żorna wrew livell tajjeb ta’ reżiljenza b’mod ġenerali, il-ħtieġa għal salvagwardji u sistema effettiva ta’ kontrokontrolli, inkluż ir-rwol ta’ għassies li taqdi s-soċjetà ċivili, kienet aktar ċara minn qatt qabel.”

Fil-kummenti tal-għeluq tagħha, Edita Hrdá, Rappreżentant Permanenti tar-Repubblika Ċeka għall-UE, enfasizzat l-importanza tas-soċjetà ċivili: “Is-soċjetà ċivili kapaċi tagħti l-ħajja lid-drittijiet tal-bniedem. Il-promozzjoni tal-Istat tad-Dritt hija kompitu dejjiemi li ma jeħtieġx biss il-kooperazzjoni tagħna, iżda wkoll viġilanza kostanti.” (gb)

Fit-23 ta’ Settembru, il-Kumitat Ekonomiku u Soċjali Ewropew ħabbar ir-rebbieħa tal-ewwel Premijiet tal-UE għall-Produzzjoni Organika, koorganizzati mal-Kummissjoni Ewropea u msieħba oħra biex tiġi ppremjata l-eċċellenza fil-katina tal-valur tas-settur organiku Ewropew.

Ir-rebbieħa huma:
•    Għall-aħjar SME li tipproċessa ikel organiku: Goodvenience.bio GmbH – Magdala, Thüringen, il-Ġermanja
•    Għall-aħjar bejjiegħ bl-imnut tal-ikel organiku: La ferme à l’arbre de Liège – Lantin, Liège, il-Belġju
•    Għall-aħjar restorant li jservi ikel organiku: Lilla Bjers HB – Visby, il-Gżira ta’ Gotland, l-Iżvezja

Ir-rebbieħa tal-kategoriji kollha tħabbru waqt ċerimonja speċjali li saret fil-Kummissjoni Ewropea fl-okkażjoni tal-Jum Organiku tal-UE u ospitata mill-Kummissarju tal-UE għall-Agrikoltura, Janusz Wojciechowski.

Il-President tal-KESE Christa Schweng qalet: “Il-KESE ilu għal snin fuq quddiem nett biex jippromovi politika dwar l-ikel sostenibbli u komprensiva fl-UE. Għaldaqstant, aħna kburin ħafna li qegħdin norganizzaw dawn il-premjijiet b’mod konġunt, b’hekk nikkontribwixxu biex nissensibilizzaw lill-pubbliku dwar il-potenzjal tas-settur organiku li jgħin biex jinkisbu sistemi tal-ikel aktar sostenibbli”.

“Ir-rebbieħa llum urew kif huma jaħdmu ta’ kuljum biex jagħmlu t-tranżizzjoni għal sistemi tal-ikel aktar sostenibbli u ġusti realtà”, qal Peter Schmidt, President tas-Sezzjoni għall-Agrikoltura, l-Iżvilupp Rurali u l-Ambjent (NAT) tal-KESE.

Il-premijiet ġew imnedija bħala parti mill-impenn li sar fil-pjan ta’ azzjoni tal-Kummissjoni għall-iżvilupp tal-produzzjoni organika bil-għan li tiġi rikonoxxuta l-eċċellenza tul il-katina tal-katina tal-ikel organiku, mill-bidwi għar-restorant. (ks)

Fil-plenarja ta’ Settembru, il-KESE adotta Opinjoni fuq inizjattiva proprja dwar Teknoloġiji tal-assorbiment tal-karbonju għad-dekarbonizzazzjoni tal-industrija.

L-adozzjoni tal-Liġi Ewropea dwar il-Klima stabbiliet mira ambizzjuża għat-tnaqqis tal-emissjonijiet għall-2030, u kkonfermat l-għan tan-newtralità klimatika għall-2050. Sabiex jintlaħqu dawn l-għanijiet jeħtieġ li jintużaw teknoloġiji tal-assorbiment tad-diossidu tal-karbonju. Aktar ma t-tnaqqis tal-emissjonijiet ta’ gassijiet serra jkun inqas rapidu u rigoruż, aktar se tiżdied id-dipendenza fuq it-teknoloġiji tal-assorbiment tad-diossidu tal-karbonju biex jintlaqħu l-miri tal-Ftehim ta’ Pariġi.

“Id-dekarbonizazzjoni se tirrikjedi trasformazzjoni profonda tal-attivitajiet industrijali fi żmien 30 sena”, qal Andrés Barceló Delgado, ir-relatur tal-Opinjoni. “Għalkemm diġà jeżistu ħafna teknoloġiji b’livell baxx ta’ emissjonijiet tal-karbonju, il-progress tagħhom għadu baxx. Neħtieġu pjani direzzjonali ambizzjużi biex dawn it-teknoloġiji rivoluzzjonarji jiżdiedu u jintużaw b’mod wiesa’, u l-UE jeħtiġilha tippromovi l-innovazzjoni permezz tal-Fond għall-Klima u dak għall-Innovazzjoni.

Skont meta jibdew jintużaw, it-teknoloġiji tal-assorbiment tad-diossidu tal-karbonju jistgħu jservu żewġ għanijiet differenti: i) jaċċelleraw il-kisba ta’ emissjonijiet netti żero billi jikkumpensaw għal dawk minn setturi diffiċli biex jitrażżnu, u b’hekk tiżdied il-probabbiltà li jibqgħu fil-limiti tat-temperatura; jew ii) iġibu t-tisħin globali għal livelli inqas mil-limiti stabbiliti wara li jkun hemm temperatura massima ’l fuq mil-limiti (overshoot).

“L-iżvilupp tat-teknoloġiji, flimkien mal-edukazzjoni u t-taħriġ mill-ġdid tal-forza tax-xogħol, huma vitali għat-tranżizzjoni ekoloġika fl-industrija tal-manifattura. Id-djalogu soċjali, kemm fil-livell Ewropew, kif ukoll f’dak tal-Istati Membri u reġjonali, għandu jappoġġja s-sensibilizzazzjoni, l-aċċettazzjoni u tranżizzjoni ekoloġika u ġusta fl-industrija. Il-bini tal-kapaċitajiet u l-proġetti li jiddefinixxu l-ħiliet ewlenin se jkunu essenzjali sabiex tiġi żgurata tranżizzjoni industrijali effettiva li fiha ħadd ma jitħalla jibqa’ lura”, qalet il-korelatur għall-Opinjoni, Monika Sitárová. (ks)

F’Opinjoni reċenti, il-KESE jappoġġja l-pjan REPowerEU tal-Kummissjoni Ewropea biex l-UE titbiegħed mill-gass u ż-żejt Russi, iżda jirrimarka li ħafna mill-problemi li issa qed jiġu indirizzati bħala kwistjoni ta’ urġenza setgħu ġew evitati jew imrażżna billi titnaqqas id-dipendenza mill-importazzjonijiet tal-enerġija ħafna żmien ilu u jiġi kkompletat is-suq tal-enerġija, kif il-KESE ilu s-snin iħeġġeġ .

Fl-Opinjoni li ġiet adottata fis-sessjoni plenarja ta’ Settembru u li tfasslet minn Stefan Back, Thomas Kattnig u Lutz Ribbe, il-Kumitat enfasizza li li l-effetti ekonomiċi u soċjali kkombinati tal-kriżi tal-enerġija attwali se jpoġġu s-sistema demokratika tal-UE taħt pressjoni sakemm ma jinstabux soluzzjonijiet adegwati. Għandhom jiġu implimentati miżuri immedjati biex tiġi żgurata s-sigurtà tal-provvista bi spiża li tkun “affordabbli kemm jista’ jkun” kemm għall-konsumaturi kif ukoll għall-industrija, li huma affettwati mill-kriżi attwali tal-prezzijiet, sabiex jiġi evitat it-taqlib soċjali.

Il-KESE jgħid li l-pjan REPowerEU huwa pass fid-direzzjoni t-tajba, iżda jwissi li dawn il-miżuri ta’ emerġenza m’għandhomx iwasslu għal dipendenzi ġodda u m’għandhomx ikunu ta’ ħsara għall-isforzi biex tinkiseb in-newtralità klimatika malajr kemm jista’ jkun.

Il-Kummissjoni għandha tiżviluppa strateġija ġeopolitika għall-importazzjoni tal-enerġija, li tqis il-kwistjonijiet enerġetiċi u klimatiċi urġenti, qabel ma tikkonkludi sħubijiet ma’ pajjiżi mhux demokratiċi jew politikament instabbli.

Skont il-Kumitat, il-ħtieġa urġenti biex jiġu żgurati l-provvisti tirrikjedi flessibbiltà fir-rigward tal-użu temporanju tal-fjuwils fossili u b’emissjonijiet baxxi. (mp)

L-UE teħtieġ tindirizza l-kriżi klimatika permezz ta’ approċċ tripplu: il-mobilizzazzjoni tal-fondi, l-involviment taċ-ċittadini u tas-settur privat, u l-eżerċitar ta’ tmexxija politika b’saħħitha. Dan huwa l-messaġġ imwassal minn Opinjoni fuq inizjattiva proprja tal-KESE adottata fil-plenarja ta’ Settembru.

L-Opinjoni, abbozzata minn Thomas Kattnig u Lutz Ribbe, tiddiskuti li sabiex tiġi ssodisfata d-domanda dejjem tikber għall-elettriku u biex jintlaħqu l-objettivi tal-klima, l-UE trid tinvesti aktar f’sistemi tal-enerġija intelliġenti u rinnovabbli u fl-infrastruttura tal-ħżin, u li kulħadd irid jagħti sehmu.

Skont il-federazzjoni tal-industrija Ewropea tal-elettriku, Eurelectric, l-UE trid tirdoppja l-investiment fil-grilja elettrika għal EUR 55 biljun fis-sena u żżid il-baġit għall-bini tal-kapaċità ta’ ġenerazzjoni nadifa għal EUR 75 biljun fis-sena.

“Neħtieġu investiment pubbliku enormi sabiex niksbu t-tranżizzjoni tal-enerġija u l-għanijiet tal-klima. Dan huwa essenzjali sabiex niżguraw is-sigurtà tal-provvista, nindirizzaw il-faqar enerġetiku, inżommu l-prezzijiet affordabbli u noħolqu l-impjiegi”, qal is-Sur Kattnig.

Fir-rigward tal-organizzazzjoni futura tas-sistemi u l-infrastruttura tal-enerġija, il-KESE jappoġġja l-intenzjoni tal-Kummissjoni li ttejjeb id-diżinn tas-suq tal-elettriku, u huwa bil-qawwa favur valutazzjonijiet tas-suq sabiex tiġi analizzata l-imġiba tal-atturi kollha potenzjali. “Sabiex jiġi diżinjat suq tal-enerġija li jiffunzjona tajjeb, huwa importanti li l-Kummissjoni tivvaluta l-vantaġġi u l-iżvantaġġi tas-sjieda pubblika u privata u/jew il-finanzjament privat tal-infrastruttura tal-enerġija,” qal is-Sur Ribbe.

Sabiex jiġi ffinanzjat l-investiment tal-infrastruttura, il-KESE jirrakkomanda li jitnaqqsu l-profitti żejda tal-kumpaniji tal-enerġija u tiġi applikata “regola tad-deheb” għal kwalunkwe proġett assoċjat mal-indipendenza tal-enerġija. (mp)

F’dibattitu mal-Viċi President tal-Kummissjoni Margaritis Schinas fis-sessjoni plenarja tiegħu ta’ Settembru, il-KESE ħeġġeġ lill-Kummissjoni tkun ambizzjuża fl-implimentazzjoni tal-istrateġija Ewropea l-ġdida għall-kura. Il-KESE poġġa l-enfasi fuq il-ħaddiema tas-saħħa u l-ħiliet, l-edukazzjoni u l-kundizzjonijiet tax-xogħol tagħhom u identifika l-bini tal-fiduċja bħala prerekwiżit għas-suċċess tal-Ispazju Ewropew tad-Data dwar is-Saħħa.

Fis-sessjoni plenarja tiegħu tat-22 ta’ Settembru, il-KESE kellu dibattitu dwar l-inizjattivi tal-politika tas-saħħa tal-UE mal-Viċi President tal-Kummissjoni Ewropea u l-Kummissarju għall-Promozzjoni tal-Istil ta’ Ħajja Ewropew Tagħna, Margaritis Schinas.
Il-President tal-KESE Christa Schweng qalet, “Il-KESE jappoġġja l-inizjattivi kollha tal-UE biex tinħoloq Unjoni Ewropea tas-Saħħa u biex jiżdiedu r-reżiljenza u t-tħejjija għal kwalunkwe theddid futur.”

“Aħna determinati li nuru li s-saħħa mhijiex biss politika, hija min aħna; din hija parti mill-mudell ta’ soċjetà miftuħa li nappoġġjaw, tal-istil ta’ ħajja Ewropew tagħna,” saħaq is-Sur Schinas.

Bħala l-istituzzjoni tal-UE li kienet l-ewwel waħda li talbet għall-ħolqien ta’ Unjoni Ewropea tas-Saħħa, il-KESE adotta Opinjonijiet dwar tnejn mill-inizjattivi reċenti tal-Kummissjoni dwar is-saħħa, li għandhom l-għan li jiżguraw li kull Ewropew ikollu aċċess għal kura tas-saħħa affordabbli u ta’ kwalità għolja.

Fl-Opinjoni dwar l-Ispazju Ewropew tad-Data dwar is-Saħħa, il-KESE faħħar il-proposta tal-Ispazju Ewropew tad-Data dwar is-Saħħa bħala opportunità eċċellenti li tawtonomizza lill-individwi fl-aċċess u l-kontroll tad-data personali tagħhom dwar is-saħħa. Huwa ta l-appoġġ tiegħu għal kampanja ta’ komunikazzjoni pubblika fuq skala kbira biex tgħin lin-nies jifhmu l-benefiċċji tal-proċess ta’ kondiviżjoni u biex ikollhom fiduċja u kunfidenza fis-sistema.

“Il-fiduċja se tkun kruċjali. Iċ-ċittadini jeħtieġ li jkunu komdi bl-użu tad-data tagħhom, kemm f’termini ta’ titjib tas-servizzi pubbliċi kif ukoll tal-użu possibbli ta’ din id-data biex jiġi miġġieled il-mard u jiġu żviluppati soluzzjonijiet innovattivi mir-riċerkaturi,” qal ir-relatur tal-Opinjoni, Gonçalo Lobo Xavier.

Il-KESE adotta wkoll Opinjoni dwar l-Istrateġija dwar il-Forza tax-Xogħol u l-Kura tas-Saħħa, li fiha appella għal strateġija ambizzjuża dwar il-kura ċċentrata fuq in-nies li tista’ ttejjeb il-kura tas-saħħa u l-kura fit-tul fl-UE kollha, filwaqt li tiżgura standards ta’ kwalità ugwali fl-Istati Membri kollha jew fost ir-reġjuni f’kull pajjiż. Huwa ppropona garanzija ta’ kura Ewropea biex jiġi żgurat li kull min jgħix fl-UE jkollu aċċess għal servizzi ta’ kura affordabbli.

“Is-sistema tal-kura hija test deċiżiv għall-istil ta’ ħajja Ewropew tagħna, li jeħtieġ li jkun soċjalment ġust u inklużiv,” qal ir-relatur għall-Opinjoni, Zoe Tzotze-Lanara.

Danko Relić, korelatur għall-Opinjoni, enfasizza l-ħtieġa li l-forza tax-xogħol fil-qasam tas-saħħa tkun imħarrġa, kwalifikata u motivata. “Il-ħaddiema tas-saħħa għandu jkollhom kundizzjonijiet tax-xogħol tajbin. Għandhom jitħallsu b’mod adegwat u jkollhom sigħat tax-xogħol deċenti, igawdu bilanċ tajjeb bejn ix-xogħol u l-ħajja privata u jkollhom garanziji għas-saħħa u s-sigurtà tagħhom fuq il-post tax-xogħol! ", saħaq is-Sur Relić. (ll)

Peress li l-għadd ta’ unitajiet domestiċi fl-UE li mhux se jkunu jistgħu jsaħħnu djarhom x’aktarx li se jiżdied, u l-inflazzjoni annwali tal-enerġija qabżet l-40 %, f’Opinjoni reċenti l-KESE jħeġġeġ lill-UE u lill-Istati Membri biex jimplimentaw miżuri urġenti għall-prevenzjoni u l-indirizzar tal-faqar enerġetiku.

Il-KESE jħeġġeġ lill-Unjoni Ewropea u lill-Istati Membri jagħmlu l-aċċess ugwali għall-enerġija u s-sigurtà tal-provvista tal-enerġija bi spiża affordabbli, il-prijorità assoluta tagħhom.

F’Opinjoni dwar L-indirizzar tal-faqar enerġetiku u r-reżiljenza tal-UE, li ġiet adottata fis-sessjoni plenarja ta’ Settembru, il-KESE jirrikonoxxi l-importanza li inizjattivi reċenti tal-Kummissjoni Ewropea jagħtu lill-enerġija, bħall-pakkett “lesti għall-mira ta’ 55%”, l-implimentazzjoni tal-Patt Ekoloġiku Ewropew u l-Mewġa ta' Rinnovazzjoni. Madankollu, il-Kumitat jwissi li, mingħajr implimentazzjoni rapida, impenji b’saħħithom u miżuri konkreti mill-Istati Membri, dawn l-inizjattivi mhux se jkunu biżżejjed biex tiġi indirizzata l-kriżi attwali.

“Għandu jkun hemm approċċ komuni għall-fehim u l-indirizzar tal-faqar enerġetiku fil-livell tal-UE”, qal Ioannis Vardakastanis, ir-relatur tal-Opinjoni. “Tali approċċ jista’ jwassal għal definizzjoni komuni. Fl-istess ħin, għandna nħallu f’idejn kull Stat Membru biex isib soluzzjonijiet imfassla apposta. L-Istati Membri jeħtiġilhom jiżguraw li dawk l-aktar vulnerabbli ma jitħallewx mingħajr appoġġ”.
Il-miżuri nazzjonali biex jittaffew l-effetti negattivi taż-żieda fil-prezzijiet fuq dawk l-aktar vulnerabbli għandhom jinkludu appoġġ finanzjarju dirett u politiki soċjali, jew inċentivi u appoġġ biex jitnaqqas il-konsum tal-enerġija, abbażi taċ-ċirkostanzi speċifiċi nazzjonali u lokali.

Sabiex jiġi żgurat approċċ tassew komprensiv, il-KESE jappella sabiex titwaqqaf koalizzjoni politika wiesgħa u ambizzjuża biex jiġi indirizzat il-faqar enerġetiku, u li l-azzjonijiet tagħhom jiġu żviluppati aktar fi strateġija tal-UE. L-għan għandu jkun li l-faqar enerġetiku jitnaqqas għal livell minimu sal-2030, u li fit-tul jinqered għalkollox.
Flimkien mal-istituzzjonijiet tal-UE, il-koalizzjoni għandha tinvolvi lill-organizzazzjonijiet tas-soċjetà ċivili, inkluż dawk li jirrappreżentaw lill-popolazzjonijiet li l-aktar li jinsabu f’riskju ta’ faqar enerġetiku. L-awtoritajiet lokali u muniċipali għandhom jiġu involuti wkoll.

Il-KESE jenfasizza wkoll l-importanza li jkun hemm investiment fl-enerġija rinnovabbli u l-effiċjenza enerġetika, kif ukoll ir-rinnovazzjoni fuq skala kbira tal-bini. L-Istati Membri, f’ħidma mal-awtoritajiet lokali u reġjonali għandhom jagħtu prijorità lil rinnovazzjoni profonda li twassal għal aktar minn 60 % f’iffrankar tal-enerġija. Biex dan ikun fattibbli, huwa ċar li hemm bżonn ta’ ammont kbir ta’ investiment privat. (ll)

Il-KESE dan l-aħħar ħareġ opinjoni favorevoli għal-linji gwida tal-Kummissjoni Ewropea għall-politiki dwar l-impjieg tal-Istati Membri, u ddeskrivihom bħala adatti peress li jindirizzaw l-aktar kwistjonijiet urġenti fis-suq tax-xogħol.

F’Opinjoni adottata fis-sessjoni plenarja tiegħu f’Settembru, il-KESE enfasizza li s-sitwazzjoni ġeopolitika dejjem aktar inċerta - li x’aktarx se tolqot ħażin l-ekonomija tal-UE, tikkawża inflazzjoni għolja u reċessjoni, u tnaqqas il-kapaċità tal-akkwist - tiġġustifika azzjoni deċiżiva mill-Istati Membri, li għandhom jaħdmu lejn suq uniku verament integrat u jgħinu lill-SMEs jespandu.

“In-nuqqas ta’ ħaddiema qed jerġa’ jiżdied, u din hija r-raġuni għaliex nemmnu li għandhom jiġu implimentati miżuri effettivi sabiex l-imsieħba soċjali jiġu mħeġġa jindirizzaw il-ħtiġijiet tal-ħiliet fil-livell nazzjonali, b’azzjoni adattata għas-setturi individwali u s-sitwazzjonijiet lokali. L-akkwist tal-ħiliet u l-kompetenzi relevanti qed isir dejjem aktar importanti kemm għall-ħaddiema kif ukoll għan-negozji,” qalet ir-relatur tal-Opinjoni Mariya Mincheva, hija u tindirizza l-plenarja.

Skont il-KESE, l-imsieħba soċjali għandu jkollhom rwol akbar fit-tfassil u l-implimentazzjoni tar-riformi u l-politiki tal-impjieg, dawk soċjali u ekonomiċi, inkluż billi jibnu l-kapaċità tagħhom.

Sfida importanti hija li titnaqqas ir-rata ta’ inattività, u l-appoġġ immirat huwa speċjalment importanti għall-persuni qiegħda fit-tul, qal il-KESE fl-Opinjoni. L-Opinjoni għamlet ukoll enfasi speċjali fuq il-faqar fost dawk li jaħdmu u l-ħtieġa għal strumenti ta’ politika bħal pagi deċenti, inklużi pagi minimi adegwati, u inċentivi finanzjarji temporanji mfassla tajjeb, akkumpanjati minn miżuri mmirati u effettivi ta’ taħriġ f’ħiliet u titjib tal-ħiliet.

Għandhom jissaħħu wkoll il-politiki mfassla biex jappoġġjaw liż-żgħażagħ, lill-persuni b’diżabilità u lil gruppi vulnerabbli oħra fis-suq tax-xogħol.
Fl-2022, il-Kummissjoni Ewropea pproponiet għadd ta’ emendi għall-politiki dwar l-impjieg tal-Istati Membri. Dawn jirriflettu inizjattivi reċenti u jżidu elementi ġodda relatati mal-invażjoni tal-Ukrajna mir-Russja. Il-KESE laqa’ l-enfasi tal-Kummissjoni fuq l-ambjent ta’ wara l-COVID bl-għan li tiżgura tkabbir sostenibbli.

Il-linji gwida emendati jiffokaw fuq diversi kwistjonijiet bħat-tisħiħ tad-domanda għax-xogħol; it-titjib tal-aċċess għall-impjieg, l-akkwist tul il-ħajja ta’ ħiliet u kompetenzi; it-titjib tal-funzjonament tas-swieq tax-xogħol u l-effettività tad-djalogu soċjali u l-promozzjoni ta’ opportunitajiet indaqs għal kulħadd. (ll)