KESE info

SUS Inima s’issa għenet għexieren ta’ eluf ta’ refuġjati Ukreni biex isibu post fejn jgħixu, ikopru l-ħtiġijiet bażiċi tagħhom jew jingħataw l-edukazzjoni. Toffrilhom ukoll appoġġ psikoloġiku biex jaffaċċjaw it-trawma tal-gwerra. Bħalissa qed tiġi stabbilita l-infrastruttura biex tgħin lir-refuġjati jsibu triqthom fil-qafas ekonomiku u legali tar-Rumanija. Dan kollu bil-għan li jkunu jistgħu jintegraw fis-soċjetà Rumena kemm jista’ jkun mingħajr xkiel, u b’hekk iħossuhom f’darhom. Tkellimna ma’ Lu Knobloch minn SUS Inima.

KESE Info: X’wassalkom biex tibdew il-proġett jew inizjattiva tagħkom?

SUS INIMA żviluppat il-programmi ta’ intervent u ta’ rispons għall-kriżijiet minħabba li, fuq livell lokali, kien hemm bżonn entità li tista’ tikkollabora ma’ korpi pubbliċi u privati, filwaqt li tiżgura t-trasparenza u pjattaforma ta’ kollaborazzjoni valida għall-partijiet ikkonċernati kollha li huma lesti li jipprovdu assistenza. U minħabba l-fatt li l-maġġoranza tar-refuġjati mill-Ukrajna kienu nisa u tfal, li ħafna minnhom kienu barra mill-pajjiż għall-ewwel darba, u ma kellhom l-ebda esperjenza fil-burokrazija legali, fl-ippjanar ta’ vjaġġi, eċċ. Is-sitwazzjoni kienet aktar ikkumplikata minħabba l-ostaklu tal-lingwa.

Kif intlaqa’ l-proġett tagħkom? Kellkom xi feedback mill-persuni li tajtuhom għajnuna? (Tista’ tagħtina eżempju, jekk għandek?)

Fil-bidu l-għajnuna offruta ntlaqgħet b’ċertu nuqqas ta’ rieda, madankollu, żdied sew l-għadd ta’ benefiċjarji grati li rċevew kull tip ta’ azzjoni ta’ intervent, appoġġ jew provvista ta’ varjetà ta’ servizzi, kemm akkomodazzjoni, trasport, kopertura tal-ħtiġijiet bażiċi (ikel u inizjattivi marbutin mal-irkupru mill-kriżi) kif ukoll edukazzjoni.

Kif se tużaw dan il-finanzjament speċifiku biex tipprovdu aktar għajnuna fil-komunità? Diġà qed tippjanaw xi proġetti ġodda?

Il-finanzjament speċifiku se jintuża fuq żewġ binarji: 1) appoġġ psikoloġiku għar-refuġjati, primarjament għat-tfal sabiex jgħinhom jindirizzaw it-trawma; 2) l-iżvilupp ta’ inizjattiva ġdida b’enfasi fuq il-koeżjoni ekonomika u soċjali, billi titwaqqaf infrastruttura li tista’ tassisti u tagħti pariri lir-refuġjati b’fehim bażiku dwar il-qafas legali u ekonomiku għar-Rumanija, u l-promozzjoni u l-għajnuna b’mod attiv biex isibu impjieg jew jiftħu negozju lokali, u b’hekk tippromwovi ċ-ċittadinanza attiva u l-inklużjoni sostenibbli tas-soċjetà.

X’pariri tagħti lil organizzazzjonijiet oħrajn f’termini ta’ kisba ta’ riżultati b’attivitajiet u programmi bħal dawn?

• Jiffokaw fuq il-kooperazzjoni mal-awtoritajiet lokali, il-partijiet ikkonċernati u l-NGOs minflok ma jikkompetu.
• U jibbażaw il-programmi jew l-inizjattivi kollha li jixtiequ jiżviluppaw fuq studji ta’ każijiet tal-ħtiġijiet reali tal-benefiċjarji.

Tħoss li s-solidarjetà mar-refuġjati Ukreni tibda tbatti jekk il-gwerra fl-Ukrajna tippersisti? X’jistgħu u x’għandhom jagħmlu l-organizzazzjonijiet tas-soċjetà ċivili biex jevitaw li dan iseħħ? L-UE jista’ jkollha rwol pożittiv f’dan ir-rigward?

Is-solidarjetà għadha f’livell għoli. Madankollu, il-volum ta’ appoġġ ipprovdut mill-komunitajiet lokali qed jonqos minħabba l-eżawriment tar-riżorsi. Soluzzjoni waħda għall-ħtiġijiet eżistenti hija li jissoktaw l-appoġġ u l-għajnuna pprovduta lir-refuġjati f’termini tal-integrazzjoni tagħhom fi ħdan il-komunitajiet lokali li jinsabu fihom. Barra minn hekk, hemm is-simplifikazzjoni, sa ċertu punt, tal-burokrazija u l-proċeduri meħtieġa għar-refuġjati Ukreni biex jiġu impjegati, jiftħu kumpanija, u biex jiksbu aċċess għall-kontijiet bankarji, l-assigurazzjoni u s-servizzi mediċi. Dan huwa meħtieġ sabiex jiġi żgurat li titnaqqas b’mod sostenibbli d-dipendenza finanzjarja minn sorsi esterni. Is-soċjetà ċivili qed taqdi rwol ewlieni fl-iżvilupp u l-implimentazzjoni tat-twassil tal-għajnuna u l-appoġġ lir-refuġjati. L-UE tista’ tgħin fil-ħolqien ta’ networks usa’ fil-livell tal-KE, u b’hekk tappoġġja u tiffaċilita skambju ta’ għarfien li jista’ jkun ta’ benefiċċju għall-partijiet kollha involuti: l-implimentaturi u l-benefiċjarji.

Meta l-aħbar dwar l-evakwazzjoni ta’ tfal bil-kanċer mill-Ukrajna waslet għand il-Fondazzjoni Villavecchia, il-persunal tagħha ma qagħadx jaħsibha darbtejn. Huma mill-ewwel offrew għajnuna volontarji biex jilqgħu u jassistu lit-tfal u l-familji tagħhom. Iżda biex ikunu jistgħu jagħtu lil dawn it-tfal il-kura u l-appoġġ adegwat li verament kellhom bżonn, il-fondazzjoni kellha tingħaqad ma’ sptarijiet u ħafna entitajiet u voluntieri oħrajn. Flimkien, irnexxielhom joħolqu post sigur għall-pazjenti żgħażagħ f’Barċellona. Natàlia Ferrer Ametller qasmet l-istorja tagħhom magħna.

KESE info: X’ħeġġiġkom tibdew il-proġett jew l-inizjattiva tagħkom?

Ġejna infurmati li tfal bil-kanċer kienu qed jiġu evakwati mill-Ukrajna u offrejna l-għajnuna tagħna lill-amministrazzjonijiet involuti u lill-organizzazzjoni internazzjonali li kienet qed tmexxi l-evakwazzjoni. Meta ġejna inkarigati li norganizzaw l-operazzjoni kollha, irċevejna appoġġ immedjat mill-Fondazzjoni Internazzjonali Josep Carreras bil-ħsieb li aħna namministraw l-operazzjoni kollha flimkien. Ħafna entitajiet oħrajn offrew li jagħtu l-għajnuna. Aħna ma ħsibnihiex darbtejn; kellna nagħtu l-għajnuna tagħna f’dawk l-oqsma fejn stajna nagħmlu dan: nilqgħu u ngħinu lit-tfal bil-kanċer u nsostnu ’l-familji tagħhom, b’koordinazzjoni mal-isptarijiet ta’ referenza.

Kif intlaqa’ l-proġett tagħkom? Ksibtu xi feedback miċ-ċittadini li għintu? (Tistgħu tagħtuna xi eżempju, jekk għandkom?)

Kienet esperjenza intensa ħafna u tgħallimna ħafna affarijiet. Fuq kollox, tgħallimna dwar is-sitwazzjonijiet ħorox tar-refuġjati. L-akbar diffikultà kienet il-lingwa, kif ukoll xi aspetti kulturali. Madankollu, kellna għajnuna minn ħafna voluntieri, li għamlu xogħol tremend bħala interpreti, jakkumpanjaw lit-tfal matul is-soġġorn kollu tagħhom fl-isptar, waqt il-vjaġġi bl-ambulanza, iż-żjarat u l-formalitajiet. Ħafna trattamenti pprogressaq b’mod tajjeb ħafna u bosta tfal diġà temmew it-trattament akut tagħhom u jinsabu fil-fażi ta’ terapija ta’ manteniment. Xi wħud minnhom setgħu jmorru lura d-dar. Pereżempju, dan ritratt ta’ wieħed mit-tfal, Mykola, u ommu, flimkien mal-ħaddiema soċjali tal-isptar tagħna. Għaddejna minn żmien diffiċli ħafna flimkien u l-aqwa rigal kien it-tbissima tat-tfal u s-sens ta’ kalma ta’ ommijiethom.

Kif se tużaw dan il-finanzjament speċifiku biex tipprovdu aktar għajnuna fil-komunità?

Se nużawh biex inkomplu bil-ħidma tagħna. Għandna tliet familji li t-tfal tagħhom għadhom fi stadju akut minħabba kumplikazzjonijiet bit-trattament tagħhom. Jeħtieġu akkomodazzjoni, manteniment, vjaġġar, assistenza medika, traduzzjoni, eċċ., u l-bqija tal-familji jeħtieġ li jkomplu jħossuna qrib tagħhom.

Diġà qed tippjanaw proġetti ġodda?

Iva, qed naħdmu biex noħolqu l-Padiljun Victoria, li huwa ospizju pedjatriku u l-ewwel wieħed it-tip tiegħu fi Spanja. Dan se jkun post fejn jieħdu ħsieb tfal b’mard li ma jistax jitfejjaq li jkunu fi stadji avvanzati jew fl-aħħar jiem ta’ ħajjithom. Se nirrinnovaw bini storiku f’post emblematiku ħafna fl-Isptar Sant Pau f’Barċellona.

X’parir tagħtu lil organizzazzjonijiet oħra dwar il-kisba ta’ riżultati minn attivitajiet u programmi bħal dawn?

Aħna nemmnu li huwa importanti ħafna li jiġu identifikati b’mod ċar il-ħtiġijiet u li jitfasslu proġetti li jindirizzaw dak li jeħtieġ li jiġi indirizzat, ikun kemm ikun diffiċli. Trid tkun taf tisma’, titgħallem, taċċetta l-għajnuna u tingħaqad ma’ entitajiet oħra li jaħdmu b’mod kumplimentari. Trid tapprezza x-xogħol ta’ ħaddieħor u kollha kemm aħna nimxu lejn l-istess għan flimkien.

Taħsbu li se jkun hemm ċertu għeja ta’ solidarjetà fil-konfront tar-refuġjati Ukreni jekk il-gwerra fl-Ukrajna tibqa’ għaddejja?

Sfortunatament, l-avvenimenti kurrenti malajr isiru aħbarijiet qodma u s-solidarjetà li jiġġeneraw tista’ tkun ta’ ħajja qasira. Madankollu, huwa minnu wkoll li n-nies għandhom ħafna kapaċità li jippersistu u li jiġġieldu għad-drittijiet u l-ġustizzja soċjali.

X’jistgħu u x’għandhom jagħmlu l-organizzazzjonijiet tas-soċjetà ċivili biex jipprevjenu li dan iseħħ?

Jistiednu lill-awtoritajiet biex ikomplu jipprovdu l-għajnuna u jsaħħu r-rwol tal-korpi soċjali.

L-UE jista’ jkollha rwol pożittiv f’dan ir-rigward?

Iva, billi tippromovi rakkomandazzjonijiet fil-livell Ewropew biex il-gvernijiet u l-amministrazzjonijiet jaħdmu flimkien u jiffaċilitaw il-ħidma tal-korpi rilevanti. Mhux se taħdem jekk ikollna amministrazzjonijiet li jaħdmu fuq naħa u korpi fuq oħra, mingħajr ebda rabta bejniethom. L-amministrazzjonijiet pubbliċi għandhom bżonn is-soċjetà ċivili u din tal-aħħar ma tistax u m’għandhiex tkun iżolata. Ħafna korpi soċjali ilhom jaħdmu mingħajr l-appoġġ tal-amministrazzjonijiet pubbliċi. Nafu xi sforz kbir jeħtieġ meta nkunu miftuħin u naħdmu f’network, iżda nafu wkoll li hemm, b’mod assolut, opportunità li naħdmu flimkien.

L-Assoċjazzjoni Pollakka tal-Iscouts u l-Guides, l-akbar organizzazzjoni tal-edukazzjoni mhux formali taż-żgħażagħ fil-Polonja, kienet minn ta’ quddiem biex tgħin lir-refuġjati Ukreni sa minn meta bdiet il-gwerra, u għinithom fid-diversi ħtiġijiet li qed jevolvu tagħhom. L-Assoċjazzjoni Pollakka tal-Iscouts u l-Guides hija kburija li l-membri tagħha ddeċidew li jaħdmu b’appoġġ għall-Ukrajna mingħajr ma ħasbuha darbtejn, u hija wkoll tista’ tieħu l-mertu għal dan. L-ideali li l-Assoċjazzjoni Pollakka tal-Iscouts u l-Guides trawwem fil-membri żgħażagħ tagħha jħeġġuhom jippruvaw jagħmlu d-dinja post aħjar, li huwa sforz li lkoll għandna nagħmlu ta’ kuljum. Staqsejna għadd ta’ mistoqsijiet lil Olga Junkuszew, il-kelliema għall-Assoċjazzjoni Pollakka tal-Iscouts u l-Guides.

KESE Info: X’ħeġġiġkom tibdew il-proġett tagħkom?
Kien biss ovvju li nirrispondu għal din il-kriżi – is-servizz huwa aspett ferm importanti tal-ħidma edukattiva tal-Assoċjazzjoni Pollakka tal-Iscouts u l-Guides. Ir-reazzjoni tal-membri tal-Assoċjazzjoni Pollakka tal-Iscouts u l-Guides turi li l-ħidma edukattiva kontinwa tagħna u l-ideali li nittrasmettu fiż-żgħażagħ verament għandhom impatt fuq ħajjithom, jappoġġjawhom u jħeġġuhom jagħmlu d-dinja post aħjar. Aħna kburin li l-membri tagħna ddeċidew li jaħdmu b’appoġġ għall-Ukrajna mingħajr ma ħasbuha darbtejn.

Kif intlaqa’ l-proġett tagħkom? Ksibtu xi feedback miċ-ċittadini li għintu? (Tista' tagħtina xi eżempju, jekk għandek?)
Il-proġett tagħna ntlaqa’ tajjeb ħafna. Aħna nistmaw li persuna waħda minn kull tliet refuġjati Ukreni rċeviet appoġġ f’ċentri mmexxija mill-iscouts, u li madwar 6 000 tifel u tifla kellhom l-opportunità li jattendu l-kampijiet tas-sajf. Nafu li dan ta lit-tfal l-opportunità li jesperjenzaw mistrieħ fiżiku, mentali u emozzjonali li tant kellhom bżonn. L-azzjonijiet tagħna evolvew flimkien mal-ħtiġijiet li qed jinbidlu. Nafu li l-fatt li stajna nilqgħu b’mod kostanti għal sfida wara l-oħra, tqis b’mod pożittiv ħafna. Irċivejna wkoll feedback pożittiv mill-organizzazzjonijiet tal-iscouts Ukreni li għandna kuntatt magħhom.

Kif se tużaw dan il-finanzjament speċifiku biex tipprovdu aktar għajnuna fil-komunità? Diġà qed tippjanaw proġetti ġodda?
Permezz tal-premju fi flus se nkunu nistgħu niżviluppaw aktar il-programm edukattiv tagħna, li jippermettilna nsawru ġenerazzjonijiet futuri ta’ ċittadini involuti li jieħdu l-inizjattiva, u li jkunu preżenti fejn huma meħtieġa, jirrispondu għall-isfidi tad-dinja tal-lum. Permezz ta’ dawn il-fondi, il-membri tal-Assoċjazzjoni Pollakka tal-Iscouts u l-Guides se jkomplu jikbru mdawwra bi sħabhom, u jiksbu ħiliet tul il-ħajja u jibnu l-karattru tagħhom skont il-valuri tal-iscouts.

X’parir tagħti lil organizzazzjonijiet oħra dwar il-kisba ta’ riżultati minn attivitajiet u programmi bħal dawn?
Aħna nemmnu li sabiex organizzazzjoni tikseb riżultati hija jeħtiġilha taħdem dejjem skont il-valuri tagħha u taġixxi biss skont il-missjoni tagħha. B’dan il-mod m’hemmx lok ta’ tħassib dwar ir-riżultati jew l-involviment tal-membri tagħha.

Taħsbu li se jkun hemm ċertu għeja ta’ solidarjetà fil-konfront tar-refuġjati Ukreni jekk il-gwerra fl-Ukrajna tibqa’ għaddejja? X’jistgħu u x’għandhom jagħmlu l-organizzazzjonijiet tas-soċjetà ċivili biex jipprevjenu li dan iseħħ? L-UE jista’ jkollha rwol pożittiv f’dan ir-rigward?
Dażgur! Bħala scouts tal-Assoċjazzjoni Pollakka tal-Iscouts u l-Guides, aħna nemmnu li kull wieħed minna ta’ kuljum għandu jagħmel sforz biex iħalli d-dinja mill-inqas ftit aħjar milli sibnieha. Dan ifisser li n-nies għandhom jiġu mħeġġa jieħdu azzjonijiet żgħar ta’ kuljum li jkomplu jbiddlu d-dinja ta’ madwarna. L-għajnuna lill-Ukrajna hija maratona, mhux tiġrija sprint. Jeħtieġ li niftakru dan u noffru appoġġ fil-ħajja tagħna ta’ kuljum.