KESE info

Inizzjattivi mill-Greċja, il-Belġju, l-Italja u Spanja jiġu ppremjati wkoll

Il-proġett Ġermaniż Discovering hands, li jħarreġ lil nisa għomja jew b’diżabilità viżwali biex jużaw is-sens tal-mess superjrui tagħhom biex itejbu d-detezzjoni bikrija tal-kanser tas-sider, ġie ppremjat EUR 14 000. L-erba’ inizjattivi l-oħra mill-Greċja, il-Belġju, l-Italja u Spanja ngħataw EUR 9 000 kull waħda.

Il-ħames proġetti rebbieħa huma xhieda tax-xogħol li qed jitwettaq mill-NGOs madwar l-Ewropa biex tingħata għajnuna lil uħud mill-gruppi l-iktar vulnerabbli u żvantaġġati fis-soċjetà sabiex jidħlu fis-suq tax-xogħol. Kull waħda minnhom turi r-rwol essenzjali moqdi minn organizzazzjonijiet fil-livell l-iktar bażiku biex is-swieq tax-xogħol ikunu aktar inklużivi u biex persuni ta’ kull età u sfond jiġu mħeġġa jfittxu mpjieg jew isiru intraprendituri.

"Huwa pjaċir kbir u privileġġ għalija li nippreżenta dan il-premju lir-rebbieħa. Nixtieq nieħu din l-opportunità biex nifirħilhom, iżda wkoll biex infaħħar l-individwi u l-organizzazzjonijiet tas-soċjetà ċivili li jistħoqqilhom kull tifħir għax-xogħol kbir u l-impenn tagħhom biex ħajjet in-nies titjieb, u dawn huma xempju għal kulħadd," qal il-President tal-KESE Georges Dassis.

REvive Greece tgħin lir-refuġjati, dawk li qed ifittxu ażil u lill-migranti biex jintegraw fil-pajjiżi ospitanti billi tgħallimhom l-ipprogrammar tal-kompjuter u toħloq rabtiet ma’ intraprendituri żgħażagħ Ewropej. DUO for a JOB mill-Belġju huwa programm ta’ mentoring interġenerazzjonali u interkulturali li joffri servizz individwali b’xejn ta’ sitt xhur għal migranti żgħażagħ li qed ifittxu xogħol, ipprovdut minn persuni ’il fuq minn 50 sena li għandhom esperjenza professjonali f’qasam simili għal tagħhom. Il-proġett Taljan Progetto Quid immexxi minn Cooperativa Sociale Quid huwa ditta tal-moda etika li tgħin lil gruppi vulnerabbli żvantaġġati bħal persuni qed ifittxu ażil u vittmi tal-iskjavitu, il-prostituzzjonali u l-vjolenza domestika, biex jidħlu fis-suq tax-xogħol. Il-proġett Spanjol Laundry ID tal-Institute of Robotics for Dependency (IRD) għandu l-għan li joħloq impjiegi għal persuni b’diżabilitajiet f’servizz tal-ħasil tal-ħwejjeġ li ngħata disinn teknoloġiku ġdid u adattat għall-ħtiġijiet tagħhom.

Il-ħames rebbieħa ntgħażlu minn lista ta’ iktar minn 100 proġett. L-għadd kbir ta’ parteċipanti għall-Premju tas-Soċjetà Ċivili 2017 juri li l-qgħad jibqa’ kwistjoni reali fl-Ewropa, b’waħda minn kull għaxar persuni bla impjieg u waħda minn kull erbgħa fir-riskju tal-faqar jew l-esklużjoni soċjali. (sg)

Il-Premju għas-Soċjetà Ċivili, li tnieda fl-2006, huwa mogħti għal “eċċellenza f’inizjattivi tas-soċjetà ċivili”. Kull sena, il-premju jkopri aspett differenti tal-attivitajiet tal-KESE u huwa miftuħ għall-organizzazzjonijiet tas-soċjetà ċivili kollha reġistrati uffiċjalment fi ħdan l-Unjoni Ewropea, kif ukoll għal individwi.

Biex ifakkar id-9 anniversarju tiegħu, il-Premju għas-Soċjetà Ċivili tal-2017 ippremja proġetti innovattivi li jippromovu impjiegi u intraprenditorija ta’ kwalità, jiġġieldu l-esklużjoni fl-impjieg u jneħħu l-ostakli fis-suq tax-xogħol għal persuni fil-bżonn, bħaż-żgħażagħ, il-persuni bi sfond ta’ migrazzjoni, dawk qiegħda fit-tul, nisa maqtugħin mis-suq tax-xogħol, persuni b’diżabilità, u persuni li jgħixu fil-faqar.

Fl-2017, il-KESE rċieva 111-il applikazzjoni minn 25 Stat Membru. Bord tal-evalwazzjoni magħmul minn 10 membri, li jinkludi l-President u ż-żewġ Viċi Presidenti tal-KESE, il-presidenti tal-Gruppi ta’ Min Iħaddem, tal-Ħaddiema u ta’ Interessi Varji, tliet membri tal-KESE (wieħed minn kull Grupp) u espert estern, għażlu l-ħames rebbieħa. Il-ħames proġetti rebbieħa tħabbru waqt iċ-ċerimonja tal-premjijiet nhar is-7 ta’ Diċembru matul is-sessjoni plenarja tal-KESE fi Brussell. Bejniethom ingħataw EUR 50 000 ta’ premijiet fi flus.

Fis-snin preċedenti, il-premjijiet marru għal inizjattivi li jtejbu l-ħajjiet tar-refuġjati u l-migranti, jiġġieldu l-faqar u l-esklużjoni soċjali, jappoġġjaw il-komunitajiet Rom, jippromovu stili ta’ ħajja sostenibbli u impjiegi ekoloġiċi, jinkoraġġixxu n-netwerking, l-edukazzjoni u l-kampanji ta’ sensibilizzazzjoni, u jiddefendu l-interessi taż-żgħażagħ.

Aktar dettalji dwar il-Premju għas-Soċjetà Ċivili tal-2017 huma disponibbli here. Wieħed jista’ jara l-filmat dwar il-proġetti rebbieħa hawnhekk here. (sg/ac)

Hekk kif il-kumpanija tinsab lesta biex tidħol fis-suq internazzjonali, is-CEO Frank Hoffmann jgħid li l-Premju ser jintuża biex jitħarrġu istrutturi ġodda.

KESE Info: Xi tfisser għalik u għall-organizzazzjoni tiegħek ir-rebħa ta’ dan il-Premju?

Discovering Hands: Discovering Hands għandu l-għan li jtejjeb il-kwalità tal-identifikazzjoni bikrija tal-kanċer tas-sider b’mod uman ħafna billi minn diżabbiltà joħloq rigal li jsalva l-ħajja, filwaqt li jiftaħ qasam ta’ xogħol kompletament ġdid għall-persuni b’vista batuta.

L-isfida li jmiss għal Discovering Hands hija li l-mudell żviluppat tajjeb tagħna jasal f’pajjiżi Ewropej oħra - il-Premju tal-KESE ser jgħin biex iwitti ħafna toroq ġodda.

X’parir tagħti lil organizzazzjonijiet oħra fir-rigward tal-kisba tar-riżultati f’attivitajiet u programmi bħal dawn?

Intrapriża soċjali għandha dejjem tkun ċara dwar l-objettiv kummerċjali tagħha stess u ssegwih b’mod strett. Imbagħad kull sforz iħalli l-frott.

Kif ser tuża dan il-finanzjament biex tgħin iktar lill-komunità?

Bil-fondi tal-Premju tas-Soċjetà Ċivili, ser nappoġġjaw l-iżvilupp ta’ oqsma ġodda ta’ attività għall-eżaminaturi tattili għomja tagħna, pereżempju taħriġ għall-istrutturi ta’ awtoeżaminazzjoni tattili tas-sider.

Li l-karità tingħaqad ma’ servizz li jissodisfa l-ħtiġijiet tal-kumpaniji tal-ICT u d-domanda tas-suq għall-ħiliet tal-IT ser jgħin biex REvive Greece ssir sostenibbli kif ukoll tkun kapaċi tikber, jgħid id-direttur maniġerjali Theodore Dimakarakos.

KESE Info: Tista’ tgħidilna xi jfisser għalik u għall-organizzazzjoni tiegħek li rbaħtu dan il-premju?

REvive Greece: Li nirċievu dan il-premju kien kemm unur kif ukoll rikonoxximent tal-fatt li ħidmietna għandha impatt dirett fuq il-persuni li jeħtieġu appoġġ speċifiku biex jidħlu fis-suq tax-xogħol. Aħna nistennew li l-fatt li dan ir-rikonoxximent wassal għal kopertura estensiva, ser ikun pass ’il quddiem, mhux biss biex niksbu l-attenzjoni ta’ benefiċjarji potenzjali, iżda wkoll biex jgħinna noħolqu sħubijiet ma’ organizzazzjonijiet oħrajn madwar l-Ewropa li għandhom l-istess viżjoni. Fl-istess ħin, dan serva wkoll biex l-inizjattiva tagħna tkun magħrufa fis-settur privat, li jista’ jkollu rwol sinifikanti fil-ħidma tagħna.

X’parir tagħti lil organizzazzjonijiet oħra f’termini ta’ ksib ta’ riżultati f’attivitajiet u programmi simili?

Nemmnu bis-sħiħ li kull organizzazzjoni li għandha l-għan li jkollha impatt soċjali għandha tipprova tidentifika soluzzjoni li tkun ta’ benefiċċju għall-partijiet interessati kollha. Il-karità hija element fundamentali tas-solidarjetà fi kwalunkwe soċjetà, u ladarba tikkombinaha ma’ soluzzjoni li tissodisfa ħtieġa tal-atturi ewlenin li jistgħu jgħinuk tilħaq il-mira tiegħek, l-inizjattiva ssir sostenibbli kif ukoll tkun tista’ tikber. B’mod partikolari, organizzazzjonijiet li għandhom l-għan li jiżviluppaw il-ħiliet diġitali tal-benefiċjarji tagħhom iridu jaħdmu mill-qrib mas-settur privat (jiġifieri, kumpaniji tal-ICT) peress li hemm żbilanċ u domanda kbira għal dawn il-ħiliet, u b’hekk tkun ta’ benefiċċju għal kulħadd.

Kif ser tuża dan il-finanzjament biex tipprovdu aktar għajnuna fil-komunità?

L-għan tagħna issa huwa li nespandu l-attivitajiet tagħna u nżidu n-numru ta’ studenti, li mhuwiex kompitu faċli. Għandna bżonn skola akbar u tagħmir addizzjonali. Fuq kollox, neħtieġu l-persuni adatti biex jgħinuna noħolqu s-sistemi u l-proċeduri li huma meħtieġa meta organizzazzjoni tespandi. Dan il-finanzjament se jkopri xi wħud minn dawn l-ispejjeż, iżda r-rikonoxximent innifsu se jgħinna anki aktar, peress li dan jagħtina l-kredenzjali biex naħdmu mas-settur privat, u noħolqu reazzjoni katina.

Għad hemm distakk wiesa’ fi bliet Ewropej bejn persuni minn sfond ta’ migrazzjoni u dawk lokali fejn jidħol l-aċċess għas-suq tax-xogħol, qalet Emmanuelle Ghislain, koordinatur tal-kommunikazzjoni u tal-ġbir ta’ fondi tal-organizzazzjoni Belġjana DUO for a JOB, u ħabbret li l-flus tal-premju se jikkontribwixxu għat-tnedija ta’ fergħa ġdida f’Pariġi.

KESE Info: Jekk jogħġbok għidilna x’ifisser dan il-premju għalik u għall-organizzazzjoni tiegħek?

DUO for a JOB: Il-bliet fl-Ewropa qed isiru dejjem iktar diversi, globali u multikulturali. Iżda s’issa, dawn qed ibatu biex jisfruttaw il-potenzjal tal-persuni bi sfond ta’ migrazzjoni. Għad hemm distakk enormi fl-aċċess għas-suq tax-xogħol bejn dawn il-persuni u dawk lokali. Dan huwa ħela ta’ riżorsi terribbli.

Issa wasal iż-żmien li niffukaw l-isforzi tagħna biex niżguraw li kulħadd jista’ jinstab fil-post xieraq, speċifikament permezz tax-xogħol, sabiex nibnu futur pożittiv.

L-għoti tal-premju tal-KESE jikkonferma li l-isforzi tagħna huma konformi ma’ moviment globali lejn aktar opportunitajiet indaqs. Huwa kemm unur kif ukoll opportunità eċċellenti għalina biex niltaqgħu u niddiskutu ma’ inizjattivi oħrajn, u nibnu flimkien Ewropa aktar inklużiva.

X’parir tagħti lil organizzazzjonijiet oħra f’termini tal-kisba ta’ riżultati permezz ta’ tali attivitajiet u programmi? 

Aħna nemmnu li l-mentoring interkulturali u interġenerazzjonali huwa għodda b’saħħitha ħafna biex titrawwem l-integrazzjoni professjonali u għat-tisħiħ tal-koeżjoni soċjali.

Sabiex isir aktar effettiv, nemmnu li għandna nikkonċentraw fuqu bħala attività prinċipali u jiġi żviluppat approċċ strutturat b’qafas ta’ appoġġ qawwi (taħriġ, manwal, superviżjoni, eċċ.). Sħubijiet u interazzjonijiet umbagħad iridu jinħolqu ma’ organizzazzjonijiet oħrajn speċjalizzati f’oqsma komplementari, u ma’ partijiet interessati oħrajn bħal kumpaniji u servizzi pubbliċi, sabiex jinħoloq netwerk ta’ appoġġ effettiv.

Professjonaliżmu b’kumpassjoni flimkien ma’ standards għoljin ta’ akkoljenza u attenzjoni għal relazzjonijiet fost “mentees” u “mentors” huma wkoll fatturi importanti għas-suċċess ta’ proġetti bħal dawn.

Kif se tużaw dan il-finanzjament speċifiku biex tgħinu aktar fil-komunità?

Speċifikament, il-premju li ser ningħataw illum se jkun investit direttament fl-ottimizzazzjoni tal-programm tagħna, kemm f’termini ta’ kwalità kif ukoll f’termini tal-għadd ta’ benefiċjarji, prinċipalment bil-ftuħ ta’ fergħat fi bliet Ewropej oħra bħal Pariġi (fejn għadna qed infittxu b’mod attiv sħubijiet u appoġġ).

L-intrapriża tal-ekonomija soċjali bbażata f’Verona qed tippjana li tuża l-Premju għas-Soċjetà Ċivili biex tixtri magni aktar sofistikati, tirrekluta aktar persuni żvantaġġati, tiżviluppa aktar ħiliet avvanzati u tespandi lil hinn mill-fruntieri tal-Italja. Giulia Houston, inkarigata mir-relazzjonijiet istituzzjonali, tgħid li s-soluzzjoni għas-suċċess hija li wieħed ikun jista’ jiddependi minn netwerks lokali b’saħħithom.

KESE Info: Tista’ jekk jogħġbok tgħidilna xi jfisser dan il-premju għalik u għall-organizzazzjoni tiegħek?

Dan il-premju huwa ta’ unur għall-proġett Quid u jipprovdilna l-opportunità li nsaħħu l-kredibbiltà u l-viżibbiltà tagħna. Dan ifisser ħafna għalina, peress li qed nippjanaw li nistabbilixxu kuntatti fix-xena Ewropea fil-futur qrib, anke ma istituzzjonijiet u finanzjaturi internazzjonali li jistgħu jagħżlu li jappoġġjaw il-pjani futuri tagħna.

KESE Info: X’parir tagħti lil organizzazzjonijiet oħra biex ikunu jistgħu jiksbu riżultati b’attivitajiet u programmi simili? 

Il-parir li ngħata Quid meta twaqqaf, u li kien kruċjali għas-suċċess tagħna, kien li huwa essenzjali li jinħolqu netwerks b’saħħithom ma’ msieħba lokali. Barra minn hekk, nagħtu parir lil kwalunkwe persuna li għandha l-ħsieb tniedi proġetti simili li tistabbilixxi tim komplut, iddedikat u determinat. Dan huwa essenzjali biex jinħolqu sisien sodi li fuqhom jinbnew l-attivitajiet u l-futur tal-intrapriża.

Kif se tużaw dawn il-fondi speċifiċi biex tipprovdu iżjed għajnuna lill-komunità?

Il-fondi li rċevejna permezz tal-Premju tal-KESE għas-Soċjetà Ċivili ser jintużaw għat-titjib tal-istruttura ta’ produzzjoni tagħna. Għandna l-ħsieb nużawhom biex nixtru strumenti li jagħmluha possibbli li iżjed nies jaħdmu ma’ Quid: l-użu ta’ magni iżjed sofistikati għall-kisba ta’ ħiliet u tekniki iżjed avvanzati ser jgħin fil-ħolqien ta’ tkabbir professjonali għal għadd dejjem jikber ta’ ħaddiema fi Quid.

L-Istitut ta’ Spanja tar-Robotika għad-Dipendenza, li nieda l-proġett Laundry ID, jittama li l-Premju se jgħin biex jiġi żgurat li l-persuni b’diżabilità u dawk li jieħdu ħsiebhom ikunu jistgħu jisfruttaw dak li għandhom x’joffru r-robotika u t-teknoloġija ta’ assistenza, sabiex jipparteċipaw b’mod attiv fis-suq tax-xogħol.

KESE Info: Jekk jogħġbok spjega xi jfisser dan il-premju għalik u l-organizzazzjoni tiegħek.

Laundry ID: Qabel kollox huwa unur kbir li nirċievu l-Premju tal-KESE għas-Soċjetà Ċivili. Il-premju jagħtina l-prestiġju, ir-rikonoxximent u l-kredibbiltà li tirrikjedi organizzazzjoni bħal tagħna li għadha qed tinħoloq biex isaħħaħ il-ġejjieni tagħha. Dan jgħin biex nikkonsolidaw id-direzzjoni tagħna u jservi ta’ pjattaforma importanti biex tippubbliċizza l-eżistenza ta’ mudell tal-ħasil tal-ħwejjeġ fil-livell Ewropew li huwa ergonomiku, ekoloġiku, adattat, inklużiv u rħis, u li jiffaċilita aktar l-inklużjoni fis-suq tax-xogħol permezz tal-użu ta’ teknoloġija f’postijiet tal-ħasil tal-ħwejjeġ li huma kompletament adattati.

X’parir tagħti lil organizzazzjonijiet oħrajn f’termini tal-kisba ta’ riżultati permezz ta’ attivitajiet u programmi bħal dawn?

L-innovazzjoni għandha tirriżulta mill-ħtiġijiet reali tal-individwi dipendenti, il-familji tagħhom, dawk li jipprovdulhom kura professjonali u l-organizzazzjonijiet tagħhom. Fl-Istitut tar-Robotika għal Dipendenza, irridu nagħtu spinta lill-innovazzjoni sabiex dawn il-partijiet interessati jkunu jistgħu jgawdu mis-soluzzjonijiet li jistgħu joffru r-robotika u t-teknoloġija ta’ assistenza tal-ogħla livell. Inħeġġu lill-persuni kollha biex jinnovaw, sabiex is-settur inwasslulu s-soluzzjonijiet li lkoll għad għandna bżonn biex nindirizzaw l-isfidi ta’ kuljum tal-komunità.

Kif se tużaw dan il-finanzjament speċifiku biex tingħata aktar għajnuna fil-komunità?

Qed naħdmu fuq għadd ta’ proġetti interessanti li jirrikjedu aktar finanzjament għat-tlestija tagħhom, bħal:

• “AutonoMe”, dwar ir-rikonoxximent tal-emozzjonijiet fost il-persuni b’diżabilitajiet intellettwali,
• “Never Alone”, dwar pjattaforma tat-telekura għall-koordinazzjoni tal-fornituri tas-servizzi, u
• “DeliveryBot”, dwar flotta ta’ robots bi spiża baxxa għal faċilitajiet żgħar.