KESE info

Ftit jiem qabel il-COP27 f’Sharm El-Sheikh, il-KESE adotta r-Riżoluzzjoni dwar ‘‘L-indirizzar konġunt ta’ theddida eżistenzjali: l-imsieħba soċjali u s-soċjetà ċivili għall-implimentazzjoni ta’ azzjoni klimatika ambizzjuża”. Il-messaġġ tas-soċjetà ċivili organizzata Ewropea huwa ċar: għandna bżonn li l-istituzzjonijiet tal-UE u l-Istati Membri jkomplu jaqdu r-rwol tagħhom ta’ tmexxija u jżidu l-ambizzjoni klimatika tagħhom, irrispettivament minn x’jagħmlu reġjuni oħra fid-dinja.

Maġġoranza ċara ta’ Ewropej, ta’ 70 %, jinsabu allarmati bit-tibdil fil-klima, u kważi tliet kwarti jemmnu li jeħtieġ jagħmlu aktar personalment biex jgħinu fit-tranżizzjoni ekoloġika, skont l-istħarriġ tal-Ewrobarometru. Il-KESE, permezz tar-Riżoluzzjoni u d-delegazzjoni tiegħu ta’ seba’ membri f’Sharm El-Sheikh, stieden lill-partijiet interessati kollha involuti jindirizzaw it-tħassib taċ-ċittadini u jżidu l-ambizzjoni klimatika b’konformità mal-aħħar rakkomandazzjonijiet xjentifiċi.

II-KESE kien rappreżentat mill-membri tiegħu Peter Schmidt, Isabel Caño Aguilar, Sandra Parthie, Josep Puxeu Rocamora, Neža Repanšek u Lutz Ribbe, relaturi tar-Riżoluzzjoni, u mill-attivista żagħżugħa favur il-klima Sophia Wiegand.

‘‘It-tibdil fil-klima huwa waħda mill-akbar sfidi għall-umanità f’dan is-seklu. L-impatt tiegħu mhux se jibda bi wliedna iżda diġà jinsab magħna, u qed jibdel b’mod drammatiku l-mod kif ngħixu”, qal Cillian Lohan, il-Viċi President tal-KESE għall-komunikazzjoni u attivist tal-klima. “Naturalment, nafu li l-Unjoni Ewropea qed tagħmel aktar minn kwalunkwe reġjun ieħor, kif juru l-Patt Ekoloġiku Ewropew u l-pakkett “lesti għall-mira ta’ 55 %”. Iżda bħala d-dar tas-soċjetà ċivili Ewropea, jeħtieġ li nagħmlu pressjoni fuq il-Kummissjoni Ewropea u l-Istati Membri tal-UE biex iżommu r-rwol ta’ tmexxija tagħhom u jikkonvinċu lill-imsieħba globali tagħna biex isegwu l-eżempju tal-Ewropa”. (ks)

Il-KESE u l-Kummissjoni ffirmaw protokoll ġdid ta’ kooperazzjoni li jkompli jikkonsolida u jintensifika l-kooperazzjoni politika u leġiżlattiva bejn iż-żewġ organizzazzjonijiet, kif ukoll l-isforzi konġunti tagħhom biex jikkomunikaw dwar l-Ewropa. Il-protokoll isaħħaħ ukoll il-funzjoni strateġika tal-Kumitat fir-rigward tal-istituzzjonijiet tal-UE u r-rwol tiegħu fil-promozzjoni tal-valuri tal-integrazzjoni Ewropea u d-demokrazija parteċipattiva.

Il-protokoll il-ġdid, iffirmat fis-27 ta’ Ottubru, jagħti lill-KESE rwol aktar b’saħħtu kemm fl-implimentazzjoni tal-Inizjattiva taċ-Ċittadini Ewropej, kif ukoll fi ħdan is-Semestru Ewropew, għodda ta’ politika ekonomika u fiskali ewlenija.

“Karatteristika ġdida sinifikanti fil-protokoll hija l-impenn li jiġu identifikati b’mod konġunt ħames suġġetti għal Opinjonijiet esploratorji kull sena, ladarba l-Kummissjoni tkun adottat il-programm ta’ ħidma tagħha. Dan huwa punt importanti ħafna għalina, li jippermettilna naħdmu b’mod li jħares ’il quddiem”, ikkummentat il-President tal-KESE Christa Schweng.  L-Opinjonijiet esploratorji huma Opinjonijiet imfasslin fuq talba tal-Parlament Ewropew, tal-Kummissjoni Ewropea jew tal-Kunsill tal-UE dwar kwistjonijiet ta’ interess kbir għas-soċjetà ċivili.

Il-Viċi President tal-Kummissjoni għar-Relazzjonijiet Interistituzzjonali u l-Prospettiva, Maroš Šefčovič, qal li “Din ir-reviżjoni tal-Protokoll se tiżgura li l-modi kif nikkooperaw ikunu aktar adatti għaż-żminijiet li ngħixu fihom u għall-isfidi li qed niffaċċjaw. Itenni wkoll ir-rwol importanti li għandu l-Kumitat fl-iżvilupp tal-politiki tagħna, bis-sinerġiji ta’ bejnietna jikkontribwixxu għall-funzjonament bla xkiel tal-UE”. (tk)

Fl-Opinjoni Inizjattiva kontra l-litigazzjoni abbużiva mmirata lejn il-ġurnalisti u d-difensuri tad-drittijiet, il-KESE ta l-appoġġ tiegħu għall-proposta tal-Kummissjoni li tħares liċ-ċittadini minn kawżi strateġiċi kontra l-parteċipazzjoni pubblika (SLAPPs). Dan jinkludi ġurnalisti u difensuri tad-drittijiet li huma kontributuri importanti għal dibattiti dwar kwistjonijiet diffiċli.

Il-KESE approva l-Opinjoni fil-plenarja tiegħu f’Ottubru, u ppropona estensjoni tal-lista ta’ miżuri li jgħinu fit-tnaqqis tas-SLAPPs. Ir-relatur tal-Opinjoni Tomasz Andrzej Wróblewski qal: “Jekk ma nsaħħux is-sistema, il-libertà tal-espressjoni se tiġi mhedda.”

Il-korelatur Christian Moos qal: “Din hija kwistjoni politika urġenti u pressanti. Neħtieġu azzjoni biex niddefendu l-ġurnalisti u lil dawk li jitkellmu kontra l-abbuż tal-poter, kontra l-korruzzjoni.”

Individwi b’saħħithom jew ċerti lobbies, korporazzjonijiet u korpi statali jużaw dawn is-SLAPPs biex isikktu lill-ġurnalisti u lil parteċipanti oħrajn fid-dibattitu pubbliku, bħal attivisti soċjali, difensuri tad-drittijiet tal-bniedem, organizzazzjonijiet mhux governattivi, informaturi fis-sens wiesa’, ċittadini involuti b’mod attiv u trade unions. Dawn l-azzjonijiet legali jieħdu vantaġġ minn lakuni fis-sistemi ġudizzjarji biex jinfetħu kawżi kriminali jew ċivili mingħajr bażi li jipprevjenu, jirrestrinġu jew jippenalizzaw il-parteċipazzjoni pubblika mill-individwi jew il-gruppi fil-mira.

Il-proposti tal-KESE jinkludu l-introduzzjoni ta’ deċiżjoni preliminari li ttemm il-proċedimenti li jinstabu li mhumiex konformi, u l-konsolidazzjoni tal-proċedimenti f’ġurisdizzjoni speċifika fuq talba tal-konvenut. Jistgħu jiġu kkunsidrati wkoll miżuri oħra, inkluż l-istabbiliment ta’ limitu ta’ żmien jew mezz biex titħaffef il-proċedura. Suġġeriment ieħor huwa li tiġi eskluża l-possibbiltà li persuna oħra, għajr l-attur, tiffinanzja s-SLAPPs.

Ir-rieżami tal-leġiżlazzjoni nazzjonali jgħin ukoll biex jiġu identifikati mekkaniżmi li jistgħu jservu biex jiġġieldu s-SLAPPs. Għandu jittieħed approċċ uniformi kemm għall-każijiet transfruntiera kif ukoll dawk nazzjonali, iżda wkoll biex tiġi riveduta l-leġiżlazzjoni nazzjonali sabiex tiġi dekriminalizzata l-malafama fl-Istati Membri fejn din għadha reat kriminali.

Il-KESE jissuġġerixxi wkoll li ż-żmien propost sal-evalwazzjoni tad-Direttiva SLAPP proposta jitqassar minn ħames snin għal sentejn.

Fl-aħħar nett, l-edukazzjoni u t-taħriġ huma kruċjali. Il-professjonisti legali u l-parteċipanti fid-dibattitu pubbliku jeħtieġ li jiġu mħarrġa biex ikunu jistgħu jirreaġixxu kontra s-SLAPPs u biex ikunu jistgħu jiddefendu aħjar il-libertà tal-espressjoni. (ll)

Il-KESE huwa impenjat u determinat fir-rigward tad-dekarbonizzazzjoni tas-sistema tal-enerġija tal-UE u jistieden lil dawk li jfasslu l-politika tal-UE biex jindirizzaw il-konsegwenzi ta’ dipendenza fuq l-enerġija għal għexieren ta’ snin.

B’dawn il-kliem, il-president tal-KESE, Christa Schweng, fetħet id-dibattitu dwar it-tranżizzjoni tal-enerġija u l-awtonomija strateġika tal-UE waqt is-sessjoni plenarja fis-26 ta’ Ottubru 2022. Il-KESE kien qed jospita l-professur Loenardo Meeus mill-European University Institute fi Firenze.

“Irridu naħdmu għal tranżizzjoni ekoloġika b’ritmu li n-negozji u s-soċjetajiet huma kapaċi jżommu miegħu u b’miżuri li jakkumpanjaw li jippermettu l-kompetittività globali u l-innovazzjoni tal-Ewropa,” qalet is-Sinjura Schweng. “L-UE għandha l-potenzjal li tnaqqas id-dipendenza tagħha fuq l-enerġija importata billi tiżviluppa l-kapaċità tagħha tal-enerġija lokali rinnovabbli, iżda jridu jiġu żgurati inċentivi ta’ investiment xierqa.”

Il-Professur Meeus irrefera għar-riformi tas-suq tal-elettriku tal-UE proposti mill-Kummissjoni Ewropea, jargumenta li s-suq tal-elettriku attwali li bnejna f’dawn l-aħħar 20 sena jista’ jkun parti mill-futur tagħna, sakemm nikkomplementawh u nikkombinawh ma’ strumenti ġodda sabiex jiġu involuti l-konsumaturi u modernizzati n-networks.

Id-dibattitu kien marbut mal-adozzjoni tal-Opinjoni tal-KESE Viżjoni strateġika dwar it-tranżizzjoni tal-enerġija li tippermetti l-awtonomija strateġika tal-UE, abbozzata minn Thomas Kattnig, Lutz Ribbe u Tomasz Andrzej Wróblewski.

L-Opinjoni tiddeskrivi l-viżjoni tal-KESE dwar it-tranżizzjoni tal-enerġija u r-rwol tagħha fit-tilħiq tal-awtonomija strateġika tal-UE, b’enfasi fuq it-tħaffif tad-dekarbonizzazzjoni, it-tnaqqis tad-dipendenza fuq l-importazzjonijiet tal-enerġija, iż-żieda fl-aċċettazjoni minn komunitajiet u negozji u l-appoġġ ta’ unitajiet domestiċi vulnerabbli. (mp)

L-UE u l-Istati Membri għandhom bżonn jimplimentaw miżuri biex itejbu ħajjet dawk li jipprovdu kura fit-tul għall-membri tal-familja b’diżabilità jew b’mard kroniku jew deġenerattiv, qal il-KESE fl-Opinjoni fuq inizjattiva proprja tiegħu dwar Ir-rwol tal-membri tal-familja li jipprovdu l-kura lill-persuni b’diżabilità u lill-anzjani, li ġiet adottata fis-sessjoni plenarja tiegħu ta’ Ottubru.

Ir-relatur tal-Opinjoni, Pietro Vittorio Barbieri, qal li l-miżuri kollha għandhom jittieħdu b’mod konġunt ma’ dawk li jfasslu l-politiki, l-impjegaturi (permezz tad-djalogu soċjali) u l-membri tal-familja li jipprovdu l-kura u l-organizzazzjonijiet rappreżentattivi tagħhom.

“L-ewwel pass huwa li nirrikonoxxu l-valur tax-xogħol tagħhom u nagħtuhom vuċi fl-assistenza li jipprovdu. It-tieni pass huwa l-għoti ta’ servizzi u appoġġ fir-rigward tal-akkomodazzjoni sabiex jiġu evitati l-iżolament, il-marġinalità u l-piż żejjed psikofiżiku. Huwa ovvju li jekk il-pajjiżi jistgħu jiggarantixxu li jipprovdu ċertu servizzi, dan inaqqas ftit mill-piż minn fuq il-membri tal-familja”.

Tali miżuri jinkludu li l-membri tal-familja li jipprovdu l-kura ikollhom servizzi tas-saħħa adegwati, inkluża l-kura tas-saħħa preventiva, kif ukoll taħriġ dwar kif jieħdu ħsieb saħħithom stess. Jinħtieġu wkoll appoġġ u kura fid-djar (skont il-ħtiġijiet tas-saħħa u tal-kura) u appoġġ psikoloġiku għal dawk li jipprovdu l-kura u l-unità tal-familja.

Il-KESE jappella wkoll biex l-Istati Membri jikkunsidraw forom alternattivi ta’ remunerazzjoni, inkluża għajnuna finanzjarja, għall-membri tal-familja li jipprovdu kura li jinsabu f’riskju ta’ faqar meta jkunu mġiegħla jċedu l-impjieg bi ħlas jew jaħdmu inqas sigħat.
L-impjegaturi għandhom jitħeġġu wkoll jipprovdu arranġamenti tax-xogħol flessibbli u benesseri korporattivi li jmorru lil hinn mill-minimu meħtieġ skont ir-regoli nazzjonali għall-impjegati li jipprovdu kura kontinwa għall-membri tal-familja.

Il-pandemija tal-COVID-19 x’aktarx aggravat is-sitwazzjoni ta’ ħafna membri tal-familja li jipprovdu l-kura, iżda m’hemmx biżżejjed informazzjoni aġġġornata disponibbli dwar l-iskala tal-kwistjoni u dan ifixkel l-isforzi biex din il-kwistjoni tiġi indirizzata. (ll)

Biex ifakkar il-Ġimgħa għall-Ugwaljanza bejn il-Ġeneri tal-Parlament Ewropew, il-KESE adotta żewġ Opinjonijiet li fihom tfasslu xi rakkomandazzjonijiet dwar il-promozzjoni tal-awtonomizzazzjoni tan-nisa u l-appoġġ lil dawk li jieħdu ħsieb il-familja. Il-Kumitat appoġġja wkoll l-inizjattiva tal-Parlament b’serje ta’ avvenimenti marbuta mal-integrazzjoni tal-perspettiva tal-ġeneri u d-diskriminazzjoni intersezzjonali.

Waqt li fetħet id-dibatittu, il-President tal-KESE Christa Schweng qalet: “Id-differenza attwali bejn il-ġeneri fl-impjiegi mhijiex aċċettabbli u tirrappreżenta ħsara ekonomika u soċjali sinifikanti għall-UE. Jeħtieġ li noħolqu ambjent aktar favorevoli għall-intraprendituri nisa, inneħħu l-ostakli u l-istereotipi u nsibu aktar mudelli ta’ referenza għaż-żgħażagħ bniet u nisa.”

Il-Viċi President tal-Parlament Ewropew, Evelyn Regner, enfasizzat il-bżonn tal-integrazzjoni tal-perspettiva tal-ġeneri u ta’ miżuri vinkolanti: “Dan l-aħħar, il-progress kien b'ritmu aktar kajmana mis-snin preċedenti. Iżda fejn ġew introdotti miżuri vinkolanti, għadna nistgħu nagħmlu xi progress. Jeħtieġ li nibdlu l-kultura biex niġġieldu kontra l-preġudizzju, iżda neħtieġu wkoll miżuri vinkolanti. U jeħtieġ li naħdmu flimkien – il-PE, il-KESE, in-nisa u l-irġiel, iż-żgħażagħ u l-anzjani.”

Ozlem Yildirim, relatur tal-Opinjoni “Intejbu l-ugwaljanza fl-UE”, appella għal “politika effettiva kontra d-diskriminazzjoni fil-livell tal-UE, kompluta b'sanzjonijiet verament dissważivi”.

Il-korelatur, Cristian Pîrvulescu, spjega li “l-Opinjoni tappella biex tiġi żviluppata l-ġenerazzjoni li jmiss ta’ miżuri biex tiġi promossa l-ugwaljanza fl-Ewropa, abbażi tar-rikonoxximent tal-prinċipju tal-ugwaljanza u tal-obbligi biex tiġi infurzata.”

Il-Kumitat adotta wkoll Opinjoni dwar Ir-rwol tal-membri tal-familja li jipprovdu l-kura lill-persuni b’diżabilità u lill-anzjani. Ir-relatur għall-Opinjoni, Pietro Vittorio Barbieri, spjega li “l-benessri Ewropew huwa bbażat fuq dawk li jieħdu ħsieb il-familja, li spiss jitħallew barra mis-sistema. Il-maġġoranza l-kbira ta’ dawn huma nisa li huma mġiegħla jagħżlu bejn li jipprovdu l-kura jew li jkomplu jaħdmu. Inħeġġu lill-istituzzjonijiet Ewropej u nazzjonali biex jinvestigaw dan il-fenomenu f’ġieħ dawk li jindukraw u dawk li għandhom bżonn il-kura.” (gb)

F’Opinjoni fuq inizjattiva proprja, il-Kumitat Ekonomiku u Soċjali Ewropew (KESE) enfasizza l-ħafna benefiċċji ta’ strateġija ekoloġika tal-UE għall-espansjoni tal-produzzjoni tal-proteini u taż-żjut tal-pjanti u jipproponi deskrizzjoni ta’ din l-istrateġija. Dawn il-benefiċċji jinkludu t-tnaqqis tad-dipendenza tal-UE fuq l-importazzjonijiet u l-kontribut għall-iżvilupp taż-żoni rurali.

Ir-rakkomandazzjonijiet prattiċi tal-KESE għal strateġija proposta huma konformi mal-għan tal-UE li tilħaq l-awtonomija strateġika tal-provvista, il-KESE stqarr fl-Opinjoni, li ġiet approvata waqt il-plenarja tiegħu f’Ottubru.

Ir-relatur tal-Opinjoni, Lutz Ribbe, qal fil-plenarja: “L-UE tiddependi ħafna fuq l-importazzjonijiet tal-għalf, b’75% tal-pjanti b’livell għoli ta’ proteini tagħha ġejjin minn barra. Il-promozzjoni tal-produzzjoni tal-UE ta’ uċuħ ta’ proteini hija essenzjali u ser ikollha wkoll impatt pożittiv fuq il-bijodiversitrà u fuq l-ambjent kollu kemm hu, kif ukoll tgħin lill-bdiewa jnaqqsu l-użu tagħhom ta’ fertilizzanti minerali.”

Il-ħafna benefiċċji tal-espanzjoni tal-kultivazzjoni tal-proteini u taż-żjut tal-pjanti fl-UE u ż-żieda fir-rwol tal-art bil-ħaxix fl-għalf għall-annimali huma: rotazzjoni miżjuda tal-uċuħ, awtosuffiċjenza fil-fjuwil tat-tratturi u disponibbiltà akbar ta’ solidi tal-pjanti wara l-ipproċessar, peress li dawn għandhom potenzjal ta’ għalf tal-proteini eċċellenti għall-bhejjem.

Ġeneralment, strateġija tal-UE għandha tqis l-interessi tal-komunitajiet rurali u tikkontribwixxi għall-iżvilupp sostenibbli f’konformità mal-viżjoni fit-tul tal-UE.

Il-KESE jirrakkomanda li l-Kummissjoni Ewropea tagħti ħarsa aktar mill-qrib lejn il-Kummissjoni dwar il-Futur tal-Agrikoltura stabbilita mill-gvern federali Ġermaniż u jikkunsidra jekk dan il-format huwiex adatt ukoll għall-iżvilupp ta’ strateġija Ewropea dwar il-proteini. (ks)

Rapport ġdid tal-KESE jissuġġerixxi li l-UE għandha tistabbilixxi pjan ta’ azzjoni komplut, pluriennali u strateġiku sabiex jinħeles il-potenzjal sħiħ tad-diplomazija kulturali.

Għalkemm il-kultura bħala strument tal-politika barranija tal-Unjoni Ewropea ilha fuq l-aġenda għal dawn l-aħħar 17-il sena, qatt ma kienet prijorità reali. Madankollu, issa li l-gwerra reġgħet fuq il-kontinent, il-kultura teħtieġ iktar minn qatt qabel tkun xprun strateġiku ewlieni tal-politika barranija tal-UE, il-KESE jenfasizza fl-Opinjoni.

“Il-kultura tista’ tkun assi prinċipali fil-perkors intern tal-Ewropa, iżda wkoll fl-immaġni esterna li tipprojetta l-UE,” qal Luca Jahier, relatur għall-Opinjoni.

Is-Sur Jahier enfasizza b’mod partikolari l-importanza tal-wirt kulturali bħala suġġett ta’ sensittività politika kif ukoll kumpless ħafna, u għaldaqstant komponent diplomatiku b’saħħtu u komplementari għall-approċċ tal-UE lejn il-paċi, is-sigurtà u l-iżvilupp sostenibbli.

Pjan ta’ azzjoni strateġiku pluriennali u b’saħħtu dwar id-diplomazija kulturali għandu jkopri l-protezzjoni, ir-restawr u l-bini mill-ġdid tal-wirt f’żoni milquta minn diżastri naturali, kriżijiet u kunflitti. Għandu jinkludi wkoll l-identifikazzjoni ta’ inizjattivi eżistenti, li jwassal għall-ħolqien ta’ pjattaforma tal-UE għal relazzjonijiet kulturali internazzjonali kif ukoll struttura ddedikata fi ħdan is-Servizz Ewropew għall-Azzjoni Esterna li jkollha fiċ-ċentru tagħha “Mibgħut Speċjali tal-UE għar-Relazzjonijiet Kulturali”.

L-Opinjoni fuq inizjattiva proprja dwar ir-rwol tad-diplomazija kulturali, adottata fis-sessjoni plenarja tal-KESE f’Ottubru, tenfasizza s-sinifikat tad-dimensjoni kulturali fil-kuntest ġeopolitiku attwali, xi ħaġa li hija kompletament konformi mal-implimentazzjoni tal-Aġenda 2030 għall-Iżvilupp Sostenibbli. (mt)
 

F’Opinjoni fuq inizjattiva proprja adottata fis-sessjoni plenarja tal-KESE ta’ Ottubru, il-KESE appella sabiex il-mobilità tiġi rikonoxxuta bħala dritt individwali u bħala ben pubbliku li għandu jkun disponibbli għal kulħadd.

L-Opinjoni tal-KESE mfassla minn Kristina Krupavičienė u Dovilė Juodkaitė, tenfasizza li l-mobbiltà sostenibbli tista’ tagħmel l-irkupru ekoloġiku tal-UE realtà: it-trasport pubbliku li ma jagħmilx ħsara lill-ambjent u li hu faċli biex jintuża mill-utent jista’ jkun xprun ġenwin fl-irkupru wara l-pandemija tal-COVID-19.

“Il-pandemija kienet katalist, u wriet li t-trasport pubbliku huwa servizz essenzjali fl-interess pubbliku, speċjalment billi jipprovdi aċċess għall-impjiegi u s-servizzi għall-ħaddiema tal-ewwel linja u għall-gruppi vulnerabbli”, qalet is-Sinjura Krupavičienė.

Skont il-KESE, l-UE għandha bżonn strateġiji biex taġġorna l-mobbiltà u ttejjeb it-trasport pubbliku, u tagħmlu aktar attraenti u aċċessibbli għall-membri tal-pubbliku, speċjalment dawk bi dħul baxx.

It-trasport pubbliku jista’ jkun parti ewlenija mill-irkupru tal-Ewropa wara l-pandemija: jista’ jgħin biex jindirizza t-tħassib dwar il-klima u fl-istess ħin itejjeb il-kwalità tal-ħajja billi jippermetti lin-nies jaħdmu, igawdu ħajja soċjali u jaċċessaw il-kultura. Madankollu, biex tinkiseb mobbiltà sostenibbli hemm bżonn impenn politiku qawwi mill-atturi kollha u fil-livelli kollha.

“Qed nistiednu lill-Kummissjoni Ewropea tistabbilixxi miri li jistgħu jitkejlu u ambizzjużi għall-promozzjoni tat-tranżizzjoni mill-użu tal-karozzi privati għat-trasport kollettiv u l-mobbiltà attiva, u nħeġġu lill-Unjoni Ewropea u lill-Istati Membri jikkontribwixxu għat-tranżizzjoni lejn mezzi tat-trasport aktar ekoloġiċi billi jagħmluhom aktar attraenti”, qalet is-Sinjura Juodkaitė. (mp)

Il-KESE qed iħeġġeġ lill-Kummissjoni u lill-Istati Membri jiżviluppaw pjan biex l-UE tkun iktar ippreparata għall-emerġenzi. B’mod partikolari, il-pjan għandu jżid is-sovranità tal-UE fil-ġenerazzjoni tal-enerġija, il-produzzjoni tal-ikel u tal-ilma u l-estrazzjoni tal-materja prima.

Hekk kif qed toqrob ix-xitwa u l-ispejjeż tal-enerġija qed iħassbu liċ-ċittadini, il-KESE jrid li l-UE ttejjeb ir-reżiljenza tagħha sabiex tkun tista’ tindirizza kriżijiet futuri.

F’Opinjoni fuq inizjattiva proprja, adottata waqt l-aħħar sessjoni plenarja, il-KESE enfasizza t-twemmin tiegħu li fil-politiki kollha dwar l-enerġija għandu jiġi integrat it-titjib kontinwu biex tiżdied ir-reżiljenza tas-sistemi tal-enerġija għal emerġenzi naturali, politiki jew oħrajn.

Dan għandu jinkludi l-katina kollha ta’ produzzjoni, inklużi r-riċerka u l-iżvilupp, l-ipproċessar tal-materjal, id-diżinn, il-manifatturar, l-installazzjoni, it-tnedija u l-manutenzjoni tal-faċilitajiet fis-suq uniku tal-UE. L-awtonomija tgħin jiġu eliminati l-faqar enerġetiku u l-qgħad.

Ir-relatur tal-Opinjoni, Paul Rübig, appella wkoll li jiġu appoġġjati ċ-ċittadini u l-konsumaturi li jixtiequ jinvestu fil-produzzjoni tagħhom u fl-effiċjenza fl-użu tal-enerġija: “Neħtieġu kampanji ta’ informazzjoni, inċentivi u sussidji fiskali u rridu nibnu infrastruttura ġdida tat-trasport fis-suq intern kollu, iżda wkoll barra l-Unjoni Ewropea”.

B’żieda ma’ dan, il-KESE jappella biex jiġu żgurati l-provvisti ta’ materja prima kritika bħar-ram, il-litju, il-kobalt u elementi tal-materjali tal-art rari permezz ta’ strateġiji ġodda tas-suq intern għall-estrazzjoni u r-riċkilaġġ. Huwa jirrakkomanda li jiġu salvagwardjati s-sorsi taż-żejt, tal-faħam, tal-gass, tal-uranju, tal-ilma, tal-ikel u tal-għalf tal-annimali u li jitfasslu pjani għar-razzjonalizzazzjoni tal-enerġija, tal-ikel, tal-ilma u tal-faċilitajiet tas-sanità.

Il-Kumitat Ekonomiku u Soċjali Ewropew (KESE) jirrakkomanda li ċ-Ċentri tal-Innovazzjoni Diġitali jissaħħu biex tingħata spinta lill-kapaċità tal-innovazzjoni tal-UE bħala parti mit-tranżizzjoni lejn futur sostenibbli. Iċ-Ċentri tal-Innovazzjoni Diġitali jipprovdu infrastruttura siewja għall-intrapriżi żgħar u ta’ daqs medju (SMEs) li altrimenti jistgħu jsibuha diffiċli biex isiru aktar ekoloġiċi u aktar diġitali.  

L-UE tinsab wara l-Istati Uniti u l-Ġappun f’termini tal-investiment fir-riċerka u l-iżvilupp relattiv għall-PDG (2,32 % fl-2020, imqabbel ma’ 3,08 % fl-Istati Uniti u 3,2 % fil-Ġappun).

Il-KESE jemmen li l-UE għandha ssaħħaħ l-investiment fir-riċerka u l-iżvilupp għal 3 % tal-PDG u ressaq diversi rakkomandazzjonijiet dwar kif isir l-aħjar użu taċ-Ċentri tal-Innovazzjoni Diġitali għal dan l-għan f’Opinjoni fuq inizjattiva proprja adottata fis-sessjoni plenarja tiegħu f’Ottubru.

Ir-relatur tal-Opinjoni, Giuseppe Guerini qal: “It-tranżizzjoni diġitali tolqot lis-soċjetà Ewropea kollha, mhux l-ekonomija biss. Hemm impatt dirett fuq it-tilħiq tal-miri klimatiċi tal-Patt Ekoloġiku Ewropew u l-Għanijiet ta’ Żvilupp Sostenibbli tan-NU, imma fuq kollox, hemm impatt soċjali f’ħafna oqsma”.

Meta tkellem dwar l-importanza taċ-Ċentri tal-Innovazzjoni Diġitali, il-korelatur Nicos Epistithiou żied jgħid: “Iċ-Ċentri tal-Innovazzjoni Diġitali jiffunzjonaw bħala punti uniċi ta’ servizz li jipprovdu gwida lill-SMEs dwar it-tranżizzjoni doppja diġitali u ekoloġika. It-trade unions, l-organizzazzjonijiet tas-soċjetà ċivili, l-assoċjazzjonijiet ta’ min iħaddem u l-awtoritajiet pubbliċi jeħtieġ jaħdmu flimkien ma’ dawn iċ-ċentri”.

Iċ-Ċentri tal-Innovazzjoni Diġitali huma kollaborazzjonijiet bejn tipi ta’ organizzazzjonijiet differenti. Huma jservu bħala pjattaformi għall-ittestjar ta’ soluzzjonijiet teknoloġiċi qabel l-investiment u jistgħu jintużaw għall-iskambju tal-aħjar prattiki u għall-iżvilupp tal-ħiliet diġitali.

In-network taċ-Ċentri tal-Innovazzjoni Diġitali fl-Ewropa bħalissa għaddej minn ristrutturar kbir imma l-KESE jinsab imħasseb li hemm nuqqas ta’ viżjoni ċara dwar l-iżvilupp futur.

F’żewġ Opinjonijiet li għadhom kif ġew adottati, il-KESE jagħti fehmiet aġġornati dwar l-Istħarriġ Annwali dwar it-Tkabbir Sostenibbli 2022 tal-Kummissjoni, li jiddeskrivi l-prijoritajiet futuri tal-politika ekonomika u tal-impjiegi għall-UE, kif ukoll dwar ir-Rakkomandazzjonijiet dwar il-politika ekonomika taż-żona tal-euro għall-2022. Il-KESE jappella għal approċċ ibbilanċjat li ma jipperikolax l-għanijiet soċjali u ambjentali tal-UE.

Il-KESE jenfasizza li, fid-dawl taż-żieda fil-prezzijiet tal-enerġija u tal-ikel, għandha tiġi stabbilita xibka ta’ sikurezza soċjali għal dawk l-aktar vulnerabbli. Peress li l-inflazzjoni laħqet livell rekord, il-Bank Ċentrali Ewropew għandu janalizza l-effetti sekondarji tal-politika monetarja tiegħu, pereżempju fuq it-tkabbir u l-impjiegi, u fir-rigward taż-żieda fid-dejn pubbliku, jinħtieġ progress fir-riforma tal-Patt ta’ Stabbiltà u Tkabbir.

“Nappellaw għal approċċ ta’ politika bbilanċjat, li għandu jipproteġi l-ġustizzja u l-objettivi ambjentali, b’mod partikolari fi żminijiet ta’ kriżi”, qalet Judith Vorbach, relatur tal-Opinjoni addizzjonali dwar l-Istħarriġ Annwali dwar it-Tkabbir Sostenibbli 2022. “Dan l-approċċ huwa l-bażi għall-prosperità u l-kompetittività tal-passat, tal-preżent u tal-futur tal-UE, u għal konverġenza u reżiljenza akbar”.

Ir-relatur tal-Opinjoni addizzjonali dwar il-politika ekonomika taż-żona tal-euro 2022, Juraj Sipko iżid jgħid: “Irridu naħdmu flimkien biex nindirizzaw ix-xokkijiet sistemiċi bla preċedent li d-dinja qed tiffaċċja bħalissa. Id-dewmien fl-adozzjoni u l-implimentazzjoni ta’ miżuri jista’ jkollu konsegwenzi estensivi, mhux biss f’termini ta’ telf materjali, iżda wkoll f’termini ta’ ħajja umana”. (tk)

L-isfidi enormi għall-Ewropa li tirrappreżenta l-aggressjoni Russa kienu s-suġġett tas-seminar annwali tal-KESE għall-komunikaturi tas-soċjetà ċivili, bit-titolu Inkwiet ġeopolitiku fuq l-għatba tal-Ewropa: il-perspettiva tas-soċjetà ċivili, li sar f’Zagreb, il-Kroazja, fl-24 u l-25 ta’ Ottubru 2022.

L-Unjoni Ewropea ma għandhiex biss tappoġġja lill-Ukrajna matul il-gwerra, iżda għandha wkoll tirrifletti dwar ir-rikostruzzjoni fit-tul tal-Ukrajna u l-perkors tagħha lejn sħubija mal-UE. Dan ġie enfasizzat waqt is-seminar organizzat bi sħubija mal-Kunsill Ekonomiku u Soċjali tal-Kroazja.

Is-seminar kien maqsum fi tliet panels: It-tkabbir tal-UE, Il-komunikazzjoni fi żminijiet ta’ kriżi, u L-enerġija.

Fid-diskors tal-ftuħ tagħha f’Zagreb, il-President tal-KESE Christa Schweng, qalet: “Ejjew nippruvaw nimmaġinaw lill-Ukrajna fi ftit snin oħra. Naf li huwa diffiċli li nara l-affarijiet b’mod pożittiv fl-isfond ta’ aħbarijiet kostanti mill-kamp tal-gwerra, bil-missili jkomplu jolqtu lill-bliet Ukreni kuljum, jikkawżaw ħsara lin-network tal-ilma u jikkawżaw qtugħ tal-enerġija. Il-ħsieb tagħna u l-ħidma tagħna llum iridu jkunu ggwidati minn kif irridu naraw il-futur tal-Ukrajna. Jien nara lill-Ukrajna bħala pajjiż rikostruwit, għani, bbażat fuq il-valuri Ewropej u li jippermetti liċ-ċittadini tiegħu li jirritornaw għal ħajja deċenti f’pajjiżhom.”  

“Il-Punent kif kien żbaljat dwar Vladimir Putin?” Galia Ackerman, kittieba Franċiża-Russa, ġurnalista, u storika, indirizzat din il-mistoqsija fid-diskors ewlieni tagħha. Fil-fehma tagħha, Putin kellu aġenda moħbija sa minn meta tela’ fil-poter fir-Russja.

Madankollu, għadd ta’ persuni mill-Punent ma setgħux jagħrfu l-għanijiet ta’ Putin, u oħrajn ippreferew li ma jagħmlux dan. Vladimir Putin, li huwa mħarreġ mill-KGB, għandu l-mentalità u l-etika tal-KGB. U jien naqbel li xi ħadd li huwa prodott tal-KGB jista’ jkollu l-ħiliet li jqarraq lill-biċċa l-kbira tad-dinja”, qalet is-Sinjura Ackerman.

Il-Ministru Kroat għax-Xogħol, is-Sistema tal-Pensjoni, il-Familja, u l-Politika Soċjali, Marin Piletić, il-kap tal-Uffiċċju ta’ Kollegament tal-Parlament Ewropew fil-Kroazja, Violeta Simeonova Staničić, il-Kap tal-Media tal-Uffiċċju tar-Rappreżentanza tal-Kummissjoni Ewropea fil-Kroazja Andrea Čović Vidović, u l-Kap tal-Assoċjazzjoni tal-Ġurnalisti Kroati Hrvoje Zovko, kienu fost il-kelliema li tkellmu fil-ftuħ tas-seminar.

Id-diskussjonijiet fit-tliet panels infetħu minn Seamus Boland, il-President tal-Grupp tal-Organizzazzjonijiet tas-Soċjetà Ċivili tal-KESE, Oliver Röpke, il-President tal-Grupp tal-Ħaddiema tal-KESE, u Aurel Laurențiu Plosceanu, membru tal-Grupp ta’ Min Iħaddem tal-KESE u l-President tas-Sezzjoni għax-Xogħol, l-Affarijiet Soċjali u ċ-Ċittadinanza (SOC) tal-KESE, rispettivament.

Il-panel li fetaħ is-seminar, bit-titolu Fid-dell tal-gwerra: il-kuntest ġeopolitiku ġdid tal-Ewropa u l-konsegwenzi għall-futur tal-UE, iffoka fuq l-impatt tal-azzjonijiet tar-Russja fuq il-Balkani u t-tagħlimiet li l-Ukrajna tista’ tiegħu dwar it-tkabbir tal-UE.

It-taqbida tal-Punent fil-“gwerra tan-narrattivi” kontra r-Russja ta’ Putin kienet waħda mit-temiet tad-diskussjoni tal-panel dwar Il-komunikazzjoni fi żminijiet ta’ kriżi. Il-membri tal-panel enfasizzaw is-saħħa tar-Russja biex ixxerred il-propoganda tagħha lil hinn mill-Ewropa u l-Amerika ta’ Fuq, u rrimarkaw il-ħtieġa li qed tikber għal “armata” ta’ professjonisti u voluntiera biex jiġġieldu kontra t-tekniki ta’ diżinformazzjoni fl-Ewropa.

Problemi gravi fis-suq tal-enerġija, aggravati mill-gwerra, kienu s-suġġett tad-diskussjoni tal-panel dwar Ir-rivoluzzjoni tal-enerġija bejn il-gwerra u l-objettivi klimatiċi, l-isfidi għall-Patt Ekoloġiku. L-isfidi għat-tranżizzjoni ekoloġika, it-tagħlimiet mid-dipendenza mir-Russja (li japplikaw ukoll għaċ-Ċina), u l-vantaġġi u l-iżvantaġġi tal-enerġija nukleari kienu fuq l-aġenda tad-diskussjoni.

Is-seminar kien appoġġjat ukoll mill-Uffiċċju ta’ Kollegament tal-Parlament Ewropew u l-Uffiċċju tar-Rappreżentanza tal-Kummissjoni Ewropea fil-Kroazja. (ll)