KESE info

Fil-plenarja tiegħu ta’ Diċembru, il-KESE ddiskuta l-kwistjonijiet li jaffettwaw liż-żgħażagħ fis-suq tax-xogħol. Id-dibattitu ġab fi tmiemha s-Sena Ewropea taż-Żgħażagħ 2022 u nieda s-Sena Ewropea tal-Ħiliet 2023. Il-Kumitat kien favur strateġija fit-tul għall-involviment taż-żgħażagħ u rrakkomanda li s-Snin Ewropej imorru lil hinn minn sempliċi attivitajiet promozzjonali u jipproduċu pjani ċari.

Fid-dinja ta’ wara l-COVID-19, hemm enfasi ġdida fuq il-ħtiġijiet li qed jinbidlu tas-suq tax-xogħol, bl-opportunitajiet u r-riskji kollha li jġibu magħhom, enfasizzat il-President tal-KESE Christa Schweng li fetħet id-dibattitu. “Bħala parti mis-Sena Ewropea tal-Ħiliet, il-KESE ser ikompli jiffoka fuq il-ħtiġijiet taż-żgħażagħ tagħna u l-isfidi li qed jiffaċċjaw fid-dinja tagħna li qed tinbidel malajr.”

Nicolas Schmit, il-Kummissarju Ewropew għall-Impjiegi u d-Drittijiet Soċjali, spjega l-viżjoni tiegħu għall-Ewropa: “Prospetti aħjar għaż-żgħażagħ, inkluż li nieħdu ħsieb is-sigurtà tagħhom u li nwieġbu għall-aspirazzjonijiet tagħhom għal impjiegi sinifikanti u ħajja soċjali mimlija u inklużiva.”

F’riżoluzzjoni adottata fl-istess plenarja, il-KESE appella wkoll lill-istituzzjonijiet tal-UE u lill-gvernijiet nazzjonali biex isaħħu l-involviment taż-żgħażagħ fit-teħid tad-deċiżjonijiet u jimplimentaw it-Test taż-Żgħażagħ tal-UE li ppropona. Katrĩna Leitāne, il-president tal-grupp ta’ koordinazzjoni tal-KESE għas-Sena Ewropea taż-Żgħażagħ qalet li huwa importanti li jiġi garantit “wirt tanġibbli u dejjiemi għas-Sena Ewropea taż-Żgħażagħ u li jiġi żgurat li ż-żgħażagħ ikollhom sehem fid-deċiżjonijiet li jaffettwaw il-futur tagħhom.”

Il-Kumitat qed iħares ’il quddiem lejn l-2023 u ħareġ Opinjoni dwar is-Sena Ewropea tal-Ħiliet, fejn jesprimi tħassib dwar l-aġenda mimljia wisq u l-għadd kbir ta’ prijoritajiet tas-Sena Ewropea tal-Ħiliet. Ir-relatur, Tatjana Babrauskienė, qalet li “l-attivitajiet kollha mwettqa bħala parti mis-Sena Ewropea tal-Ħiliet 2023 iridu jkunu mmirati lejn l-aħjar progress possibbli fl-oqsma kollha tal-edukazzjoni u t-taħriġ, b’ħiliet soċjali u trasversali fost il-“ħiliet it-tajba” li għandhom jiġu promossi.”

L-Opinjoni ħeġġet ukoll lill-Kummissjoni biex tiżgura li r-refuġjati u dawk li jfittxu l-ażil ikunu jistgħu jivvalidaw il-ħiliet u l-kompetenzi tagħhom fl-UE u jiġu offruti opportunitajiet ta’ titjib tal-ħiliet u taħriġ mill-ġdid tal-ħiliet biex jiffaċilitaw il-progress tagħhom fis-suq tax-xogħol. “Trid tingħata kunsiderazzjoni speċjali lill-ħbieb Ukreni tagħna. Irridu nrawmu ġenerazzjoni żagħżugħa Ukrena b’saħħitha u mhux noħolqu ġenerazzjoni ġdida mitlufa fl-Ukrajna, kif jittama r-reġim Russu”, ikkonkluda l-Kummissarju Schmit. (gb)

Il-KESE kellu dibattitu fil-plenarja tiegħu ta’ Diċembru dwar ir-rwol tal-politiki finanzjarji u ta’ rkupru pubbliku fil-promozzjoni tal-ugwaljanza bejn il-ġeneri u l-emanċipazzjoni ekonomika tan-nisa fl-UE. Id-diskussjoni kienet marbuta mal-adozzjoni ta’ żewġ Opinjonijiet: waħda dwar approċċ ibbażat fuq il-ġeneru għall-ibbaġitjar u l-investiment, u l-oħra dwar kif l-Istati Membri jistgħu jtejbu l-mod kif il-miżuri diretti u indiretti proposti fil-pjani nazzjonali tagħhom għall-irkupru u r-reżiljenza (RRP) jaffettwaw l-ugwaljanza bejn il-ġeneri.

L-ugwaljanza bejn il-ġeneri għadha l-bogħod milli tkun realtà fl-Ewropa, speċjalment fir-rigward tal-emanċipazzjoni ekonomika u l-aċċess għall-kapital ta’ riskju u l-finanzjament. “Ma nistgħux nippermettu li ninjoraw il-potenzjal tan-nisa fl-irkupru ta’ wara l-pandemija. L-integrazzjoni tal-perspettiva tal-ġeneri trid issir realtà fil-pjani nazzjonali għall-irkupru, kif ukoll fil-politika makroekonomika u l-iżvilupp globali,” qalet il-President tal-KESE Christa Schweng hija u tiftaħ id-dibattitu.

Maria Nikolopoulou, relatur tal-Opinjoni tal-KESE dwar Investimenti abbażi tal-ġeneru fil-pjani nazzjonali għall-irkupru u r-reżiljenza, żiedet tgħid: “L-ugwaljanza bejn il-ġeneri mhijiex biss kwistjoni tan-nisa: tibbenefika lil kulħadd. Il-parteċipazzjoni kemm tan-nisa kif ukoll tal-irġiel u tal-organizzazzjonijiet tas-soċjetà ċivili hija kruċjali sabiex jiġu identifikati l-oqsma li jeħtieġ li jiġu indirizzati permezz tal-baġit.”

Ody Neisingh, relatur tal-Opinjoni tal-KESE dwar Investiment b’perspettiva tal-ġeneru, qalet: “L-aspett finanzjarju tal-ugwaljanza bejn il-ġeneri għadu mhux viżibbli fil-politiki tal-UE. Għalkemm l-investiment b’perspettiva tal-ġeneri u l-ibbaġitjar sensittiv għal kwistjonijiet ta’ ġeneru qed jiġu kkunsidrati dejjem aktar minn dawk li jfasslu l-politika, għad hemm nuqqas ta’ enfasi sistemika”.

Fl-aħħar, Cinzia Del Rio, korelatur tal-Opinjoni dwar l-Investimenti b’perspettiva tal-ġeneru, ikkummentat dwar il-miżuri bbażati fuq il-ġeneru fil-pjani nazzjonali għall-irkupru u r-reżiljenza: “Għandha tingħata prijorità lill-intensifikazzjoni ta’ miżuri diretti u indiretti dwar l-ugwaljanza bejn il-ġeneri fl-implimentazzjoni tal-RRPs. Dan jirrikjedi politiki pubbliċi mmirati, u kanali ċari u sostenibbli ta’ investiment bi pjanar tar-riżorsi fuq perjodu ta’ żmien medju u twil”. (tk)

Il-kriżi globali tal-prezzijiet tal-ikel ġiet aggravata mill-gwerra fl-Ukrajna, iżda fil-fatt hija dovuta għal problemi aktar strutturali u sistemiċi fis-suq tal-komoditajiet, li ħolqu l-ġuħ u jheddu l-għajxien tan-nies, enfasizza l-KESE f’Opinjoni fuq inizjattiva proprja adottata fl-14 ta’ Diċembru.

Aggravata mill-kunflitt, ix-xokkijiet klimatiċi u l-COVID-19, il-kriżi tal-prezzijiet tal-ikel qed tikber, hekk kif il-gwerra fl-Ukrajna żżid l-ispejjeż tal-ikel, tal-fjuwil u tal-fertilizzanti. L-indiċi tal-prezzijiet tal-ikel laħqed massimu rekord fl-2022 fuq l-isfond ta’ nuqqas ta’ sigurtà fil-qasam tal-ikel mad-dinja kollha.

Madankollu, l-ambitu u l-iskala tal-volatilità attwali tal-prezzijiet jistgħu jiġu spjegati biss parzjalment mill-prinċipji fundamentali tas-suq. Wieħed mid-difetti sottostanti huwa n-natura xejn ċara u disfunzjonali tas-swieq taċ-ċereali.

“Tilgħabx bl-ikel, nannti kienet tgħidli. Madankollu, illum ħafna nies qed jinsew il-valur reali tal-ikel u qed jilagħbu fuqu,” qal ir-relatur tal-Opinjoni Peter Schmidt, President tas-Sezzjoni għall-Agrikoltura, l-Iżvilupp Rurali u l-Ambjent tal-KESE. “Aħna nuru b’mod ċar li s-suq attwali tal-komoditajiet mhux qed iwassal għal żvilupp sostenibbli, ambizzjoni klimatika u tranżizzjoni ġusta. Għall-kuntrarju, qed idgħajjef l-isforzi biex jiġi solvut il-ġuħ u biex jitrawmu dħul u prezzijiet ġusti.”

L-Opinjoni tal-KESE tenfasizza li l-kummerċ fiżiku globali taċ-ċereali huwa kkonċentrat ħafna. Erba’ kumpaniji jikkontrollaw madwar 70-90 % tal-kummerċ globali taċ-ċereali. “Filwaqt li ż-żieda fil-prezzijiet tal-ikel thedded is-sigurtà tal-ikel globalment, kumpaniji kummerċjali kbar qed jagħmlu profitt. Dan mhuwiex aċċettabbli!”, huwa qal.

Il-KESE jħeġġeġ lill-Istati Membri u lill-istituzzjonijiet tal-UE biex jieħdu l-passi meħtieġa biex irażżnu l-ispekulazzjoni eċċessiva tal-komoditajiet, filwaqt li jirrikonoxxi li s-swieq tad-derivattivi tal-komoditajiet jipprovdu servizzi ewlenin lill-produtturi u lill-utenti tal-prodotti bażiċi tal-ikel, bħall-ġestjoni tar-riskju u l-iskoperta tal-prezzijiet. Il-KESE jirrakkomanda li:

• jiġi regolat is-suq tal-futuri għad-derivattivi tal-ikel, kif kien il-każ sa tmiem l-aħħar seklu;
• jiġu regolati l-indiċijiet l-indiċijiet tal-komoditajiet u tal-ikel, b’mod partikolari billi jiġu rregolati u pprojbiti l-fondi tal-indiċi tal-komoditajiet u r-replikazzjoni permezz ta’ swaps u prodotti nnegozjati fil-borża;
• tiġi indirizzata l-finanzjalizzazzjoni tas-settur alimentari, pereżempju billi tiġi introdotta taxxa globali fuq profitti straordinarji u eċċessivi u taxxa fuq l-ispekulazzjoni tal-ikel, kif ukoll billi jinkissru l-oligopoliji fil-livelli kollha tal-katina tal-kummerċ internazzjonali tal-ikel;
• tissaħħaħ it-trasparenza tas-suq billi jitjieb ir-rappurtar ambjentali, soċjali u ta’ governanza (ESG) u d-divulgazzjoni ta’ informazzjoni mhux finanzjarja ta’ atturi involuti fl-ispekulazzjoni. (ks)

L-eżami tal-kompetittività għandu japplika għal kwalunkwe proċess ta’ tfassil ta’ politika u leġiżlattiv tal-UE, il-KESE jsostni f’Opinjoni ġdida fejn jipproponi wkoll “aġenda tal-kompetittività” tal-UE.

Fl-Opinjoni, adottata fil-plenarja ta’ Diċembru, il-KESE jsostni li l-impatt tal-politiki u r-regolamenti tal-UE fuq il-kompetittività tan-negozji tal-UE jeħtieġ li jiġi vvalutat b’mod aktar komprensiv u sistematiku minn kif qed isir bħalissa. 

L-eżami tal-kompetittività għandu jkopri l-leġiżlazzjoni, il-miżuri fiskali, l-istrateġiji, il-programmi, il-ftehimiet internazzjonali, u anke s-Semestru Ewropew. L-eżami tal-kompetittività għandu jeżamina l-impatt tagħhom fuq in-negozji, l-impjiegi, il-kundizzjonijiet tax-xogħol u l-kost tal-konformità. Huwa għandu jqis kif dawn jistgħu jaffettwaw, fit-terminu qasir u fit-tul, lin-negozji f’setturi differenti, ta’ daqsijiet differenti u b’mudelli ta’ negozju differenti.

Is-sehem tal-UE tal-PDG globali ilu jonqos għal xi żmien mhux ħażin, u jista’ jiċkien għal inqas minn 10% sal-2050. Il-prospettiva fuq terminu qasir mhijiex aħjar, bil-konsegwenzi kontinwi tal-COVID-19, il-gwerra fl-Ukrajna, l-inflazzjoni li qed tiżdied, il-prezzijiet tal-enerġija li qed jogħlew u d-dipendenza fuq importazzjonijiet barranin ewlenin. Jekk ma’ dan kollu inżidu wkoll it-tranżizzjoni doppja ekoloġika u diġitali, ikollna idea pjuttost tajba tal-isfidi enormi li n-negozji tal-UE qed jaffaċċjaw.

Kif nistgħu niżguraw li l-kompetittività u n-negozji jingħataw rwol aktar prominenti fit-teħid tad-deċiżjonijiet tal-UE? Il-KESE jipproponi approċċ fuq tliet livelli.

L-ewwel, fil-livell tekniku, il-KESE jissuġġerixxi li tissaħħaħ il-valutazzjoni tal-impatt tal-Kummissjoni Ewropea billi l-eżami tal-kompetittività jsir obbligatorju u ħafna aktar estensiv. 

“Il-Kummissjoni Ewropea diġà trid twettaq valutazzjonijiet tal-impatt fejn jitqiesu l-effetti ta’ inizjattiva fuq il-kompetittività,” qal Christian Ardhe, ir-relatur tal-Opinjoni tal-KESE. “Madankollu, hemm ukoll ħtieġa ċara għal titjib, speċjalment fir-rigward tal-implimentazzjoni u l-infurzar”.

It-tieni, fil-livell politiku, il-kompetittività għandha titqies b’mod adegwat fit-tfassil ta’ inizjattivi ġodda, li għandhom jiġi vvalutati fir-rigward tal-kontribut u l-appoġġ tagħhom għall-kompetittività.

It-tielet, il-Kumitat jappella għal aġenda tal-kompetittività speċifika, bl-għan ewlieni fit-tul li tissaħħaħ il-kompetittività tal-UE. 

“Permezz ta’ din l-Opinjoni, nixtiequ li jiġu eżaminatu mill-ġdid il-modi kif il-kompetittività tiġi mmonitorjata, u nqisu l-kumplessitajiet involuti f’dan il-qasam,” qal Giuseppe Guerini, korelatur għall-Opinjoni. “Illum, il-kompetittività m’għadhiex xi ħaġa li taffettwa lin-negozji jew lill-kumpaniji individwali, iżda tirrigwarda verament lill-ekosistemi. Għaldaqstant, jeħtieġ li nadottaw approċċ aktar kumpless meta nkunu qed nittrattawha”. 

L-Opinjoni tfasslet fuq talba mill-Presidenza Ċeka tal-Kunsill tal-UE. (dm)

Matul is-sessjoni plenarja tal-KESE ta’ Diċembru sar dibattitu dwar ir-rikostruzzjoni u r-reżiljenza tar-reġjun Ewro-Mediterranju wara l-pandemija tal-COVID-19, b’enfasi fuq il-litteriżmu diġitali.

Christa Schweng, il-President tal-Kumitat, enfasizzat ir-rwol tal-kooperazzjoni u d-djalogu lokali u tan-network tal-organizzazzjonijiet tas-soċjetà ċivili lokali b’mod partikolari. Hija sostniet li l-Unjoni għall-Mediterran u l-Fondazzjoni Anna Lindh huma msieħba importanti ħafna għall-KESE, u huma wkoll żewġ pilastri ewlenin tas-sħubija Ewro-Mediterranja.

Álvaro Albacete Perea, Viċi Segretarju Ġenerali tal-Unjoni għall-Mediterran, u Josep Ferré, Direttur Eżekuttiv tal-Fondazzjoni Ewro‑Mediterranja Anna Lindh għad-Djalogu Bejn il-Kulturi, enfasizzaw l-importanza kruċjali li tissaħħaħ ir-relazzjoni bejn l-UE u r-reġjun tan-Nofsinhar tal-Mediterran.

Id-diġitalizzazzjoni hija fundamentali għall-progress ekonomiku u soċjali fir-reġjun Ewro-Mediterranju kollu. L-Opinjoni fuq inizjattiva proprja dwar It-tranżizzjoni diġitali fir-reġjun Ewro-Mediterranju, li tfasslet minn Dolores Sammut Bonnici u li ġiet addottata matul is-sessjoni plenarja, tenfasizza li huwa importanti li jitnaqqas id-distakk diġitali bejn il-pajjiżi individwali, bejn iż-żoni urbani u rurali u bejn il-ġenerazzjonijiet. (mp)

Il-KESE jistieden lill-UE u lill-Istati Membri jaħdmu biex jikkomunikaw aħjar mal-pubbliku ġenerali dwar id-drittijiet fundamentali u l-istat tad-dritt. F’Opinjoni adottata f’Diċembru, il-Kumitat jissuġġerixxi li ssir enfasi fuq l-ekwità u l-ġustizzja u li tingħata vuċi lil dawk li jesperjenzaw direttament ksur tad-drittijiet tal-bniedem.

L-istat tad-dritt u d-drittijiet fundamentali jistgħu jitqiesu minn xi wħud bħala kunċetti li huma wisq astratti, distanti, speċjalizzati u legalistiċi. Il-Kumitat jemmen li dan huwa periklu reali li l-UE għandha bżonn tindirizza.

Cristian Pîrvulescu, relatur tal-Opinjoni tal-KESE dwar Nikkomunikaw dwar id-drittijiet fundamentali u l-istat tad-dritt, spjega li “n-nuqqas ta’ komunikazzjoni ċara u edukazzjoni fil-livell Ewropew u nazzjonali dwar dawn il-prinċipji jgawdu minnu l-għedewwa tad-demokrazija. Aħna nappellaw għal aktar appoġġ għal attivitajiet ta’ sensibilizzazzjoni tas-soċjetà ċivili u kurrikuli tal-iskejjel aktar b’saħħithom.”

Il-korelatur José Antonio Moreno Díaz enfasizza li “l-individwi ma jistgħux jiddefendu d-drittijiet fundamentali tagħhom jekk ma jkunux jafu xi jfissru fir-realtà. L-atturi tal-UE, l-istituzzjonijiet, l-Istati Membri u s-soċjetà ċivili jistgħu jagħmlu differenza billi jittraduċu kunċetti astratti fi kwistjonijiet sinifikanti u prattiċi, joħolqu kultura Ewropea kondiviża tad-drittijiet fundamentali u l-istat tad-dritt.”
 
L-Opinjoni tal-KESE targumenta li l-protezzjoni tad-drittijiet tal-bniedem u l-istat tad-dritt mhumiex possibbli fin-nuqqas ta’ stat soċjali. It-tnejn huma interkonnessi: meta l-istat soċjali ma jibqax jiffunzjona, is-soċjetà jaf tqis l-istat tad-dritt bħala kunċett fieragħ. Din ir-rabta hija rikonoxxuta mill-Pilastru Ewropew tad-Drittijiet Soċjali, għodda ta’ politika essenzjali għall-bini ta’ Unjoni aktar inklużiva.

Il-Kumitat iħeġġeġ lill-istituzzjonijiet kollha tal-UE biex ma juru l-ebda tolleranza għall-ksur tal-istat tad-dritt fl-Istati Membri. Għal dan il-għan, l-UE għandha tibqa’ sserraħ fuq id-definiżżjoni tal-istat tad-dritt prevista mill-Kummissjoni Ewropea għad-Demokrazija permezz tad-Dritt, li toffri deskrizzjoni ċara tal-prinċipji ewlenin koperti mill-istat tad-dritt.  (gb)
 

Il-valur ta’ limitu tekniku għall-esponiment għall-asbestos għandu fl-aħħar mill-aħħar jiġi stabbilit f’livell aktar baxx minn dak li qed tipproponi bħalissa l-Kummissjoni f’direttiva reċenti li tirregola l-protezzjoni tal-ħaddiema mill-perikli ta’ esponiment għall-asbestos fuq il-post tax-xogħol, qal il-KESE f’Opinjoni adottata fis-sessjoni plenarja tiegħu f’Diċembru.

“L-imsieħba soċjali jistgħu jmorru lil hinn mil-limitu l-ġdid li se japplika skont id-Direttiva u jieħdu miżuri adegwati biex ikomplu jnaqqsu l-preżenza tal-fibri tal-asbestos fuq il-postijiet tax-xogħol,” stqarr il-KESE fl-Opinjoni dwar Protezzjoni mill-espożizzjoni għall-asbestos fuq il-post tax-xogħol.

Il-KESE qal li l-limitu tekniku għandu fl-aħħar mill-aħħar jiġi stabbilit għal 0.001 fibri/cm³, wara perjodu ta’ tranżizzjoni raġonevoli.

“Aħna nilqgħu l-ambizzjoni tal-Kummissjoni li tnaqqas l-inċidenza tal-kanċer u l-isforzi speċifiċi tagħha biex timminimizza l-esponiment għall-asbestos fuq il-post tax-xogħol. Hija bażi tajba biex fuq perjodu twil ta’ żmien noqorbu lejn tolleranza żero għall-esponiment għall-asbestos. Iżda nemmnu li l-UE għandha tmur lil hinn minn dak li qed tipproponi l-Kummissjoni,” qalet ir-relatur għall-Opinjoni tal-KESE Ellen Nygren.

Ix-xjenza stabbiliet li ma hemm l-ebda livell ta’ esponiment li jista’ jitqies li huwa sikur, mingħajr ir-riskju ta’ kanċer. Għalhekk, minkejja l-projbizzjoni attwali fuq l-użu ta’ asbestos ġdid, għad hemm ammonti kbar ta’ xogħol fejn il-ħaddiema għadhom esposti għal din is-sustanza fatali,” wissiet.
Skont figuri ppreżentati f’seduta ta’ smigħ reċenti tal-KESE, madwar 90 370 persuna jmutu kull sena fl-UE minħabba kanċer relatat mal-asbestos, li juri l-ħtieġa għal valur ta’ limitu mnaqqas.

Sabiex tintlaħaq din il-mira, il-KESE rrakkomanda li jitfassal pjan direzzjonali ta’ miżuri komplementari li jmorru lil hinn mill-proposta tal-Kummissjoni. Dawn jinkludu appoġġ finanzjarju għan-negozji u r-reġjuni li ma jkunux jistgħu jilħqu dan l-objettiv b’mod ieħor.
Peress li ħafna nies jistgħu jkunu esposti għall-asbestos mingħajr ma jkunu jafu, il-KESE stieden lill-Kummissjoni torganizza kampanja ta’ informazzjoni biex il-pubbliku jiġi edukat dwar l-asbestos u l-effetti ta’ ħsara tiegħu permezz tal-mezzi kollha possibbli, inklużi l-mezzi tax-xandir.

F’każ li r-riskju ta’ esponiment ikun reali jew suspettat, il-ħaddiema kollha għandhom isirulhom verifiki b’riżultati li jiġu ddokumentati, filwaqt li jiġi żgurat li saħħithom tkun immonitorjata kif suppost u segwita kull darba li jibdlu x-xogħol matul il-karriera tagħhom. (ll)

Il-KESE, fil-plenarja tiegħu ta’ Diċembru, laqa’ l-proposta tal-Kummissjoni għal Direttiva dwar l-irkupru u l-konfiska tal-assi bħala pass importanti lejn il-ġlieda kontra l-ħasil tal-flus u l-finanzjament tat-terroriżmu fl-UE. Minkejja titjib ġenerali f’xi wħud mill-Istati Membri, il-perċentwal ta’ assi kriminali li huma ffriżati jew ikkonfiskati għadu estremament baxx madwar l-UE.

Id-Direttiva l-ġdida ttejjeb il-kooperazzjoni transfruntiera bejn l-awtoritajiet kollha involuti fl-irkupri tal-assi, tħeġġeġ lill-pajjiżi tal-UE jiżviluppaw strateġiji nazzjonali u teħtieġhom jistabbilixxu mill-inqas Uffiċċju għall-Irkupru tal-Assi wieħed, korp speċjalizzat għat-traċċar u l-identifikazzjoni ta’ rikavat minn attività kriminali u proprjetà oħra relatata mal-kriminalità, qal il-KESE fl-Opinjoni tiegħu dwar Irkupru u konfiska tal-assi, adottata waqt is-sessjoni plenarja ta’ Diċembru.

“Nemmnu li l-proposta tal-Kummissjoni hija tajba ħafna, peress li twieġeb għall-ħtieġa li jitwessa’ l-kamp ta’ applikazzjoni tal-mekkaniżmi ta’ kkonfiskar. Din tistabbilixxi wkoll mekkaniżmi ta’ kooperazzjoni transfruntiera biex tiżdied ir-rata tal-irkupru tal-assi. Bħalissa, ir-rati huma baxxi ħafna, bi 2 % biss tal-assi kriminali ffriżati u 1 % biss ikkonfiskati,” qal ir-relatur tal-Opinjoni Ionuţ Sibian.

Id-Direttiva l-ġdida żżid ukoll lista sinifikanti ta’ krimini ma’ dawk li jinsabu fid-Direttiva dwar il-Konfiska mill-2014, inklużi t-traffikar tal-organi, is-sekwestru ta’ persuni, ir-reati ambjentali u t-traffikar ta’ vetturi misruqin, biex insemmu ftit minnhom.

Madankollu, il-KESE nnota li d-Direttiva b’mod espliċitu ma tinkludix fil-kampa ta’ applikazzjoni tagħha d-dħul klandestin tal-immigranti u l-kummerċ illeċitu tat-tabakk, minkejja d-dħul annwali sinifikanti ta’ dawn is-swieq kriminali li jiswa’ madwar EUR 289,4 miljun u EUR 8 309,3 miljun rispettivament, u ħeġġeġ b’urġenza lill-Kummissjoni żżidhom mal-lista.

Il-KESE staqsa wkoll lill-Kummissjoni tkun aktar ambizzjuża rigward l-użu mill-ġdid għal skopijiet soċjali tal-assi kkonfiskati u tistabbilixxi perċentwal minimu għall-użu mill-ġdid għal skopijiet soċjali għall-Istati Membri.

Huwa ta’ importanza kbira li l-komunitajiet affettwati jiksbu kumpens biex jirrestawraw id-danni direttament u jibbenefikaw mir-redditi minn dawn id-danni. Dan kien qasam fejn stennejna żviluppi, iżda hemm staġnar. Is-soċjetà ċivili għandha tkun involuta fil-ġestjoni u d-disponiment tal-assi kkonfiskati,”qal is-Sur Sibian.

Talba oħra tal-KESE kienet biex il-Kummissjoni tkun aktar preċiża fl-istabbiliment tad-drittijiet tal-vittmi għal kumpens. Fil-klassifikazzjoni tal-kredituri, il-vittmi għandhom jingħataw prijorità, il-Kumitat ikkonkluda. (ll)

Il-KESE laqa’ l-inizjattivi tal-Kummissjoni Ewropea għal-libertà tal-media, iżda wissa li sempliċi rakkomandazzjonijiet u approċċ ta’ liġi mhux vinkolanti mhumiex biżżejjed biex jiżguraw li l-media fl-Ewropa tibqa’ ħielsa u indipendenti mill-interferenzi politiċi, kummerċjali u oħrajn.

Fl-Opinjoni tiegħu dwar l-Att Ewropew dwar il-Libertà tal-Media (Proposta għal Regolament u Rakkomandazzjoni), il-KESE enfasizza li l-libertà u d-diversità tal-media huma fundamentali għall-istat tad-dritt u d-demokrazija liberali.

“Il-libertà tal-media tinsab fil-periklu. L-awtoritarjaniżmu qed jiżdied, anke fl-Ewropa. Ir-“raba’ poter” huwa l-ewwel difiża kontra dan l-attakk fuq il-libertà. Għaldaqstant, it-tisħiħ tal-libertà tal-media huwa essenzjali u l-Att Ewropew dwar il-Libertà tal-Media huwa inizjattiva importanti u f’waqtha sew,” qal ir-relatur tal-Opinjoni, Christian Moos.

“Qed nosservaw dejjem aktar interferenza politika u ekonomika f’diversi pajjiżi tal-UE, kemm fil-media pubblika kif ukoll privata, b’rabtiet mill-qrib ma’ dawk fil-poter, li huwa inkompatibbli mar-rwol tal-media bħala r-“raba’ poter”,” qal il-korelatur Tomasz Andrzej Wróblewski.

Il-KESE appoġġja bis-sħiħ il-proposti li jsaħħu u jiddefendu l-indipendenza editorjali tal-ġurnalisti u l-pubblikaturi. Enfasizza b’mod partikolari wkoll l-indipendenza u l-imparzjalità tal-media pubblika, u qal li jinħtieġu riżorsi finanzjarji adegwati u stabbli biex dan jinkiseb.

Problema allarmanti oħra identifikata fl-Opinjoni tikkonċerna t-theddida għall-pluraliżmu tal-media minħabba l-konċentrazzjoni tas-suq. Il-monopolji tal-informazzjoni ċertament jikkostitwixxu theddida u jeħtieġ li tittieħed azzjoni kontra l-ħtif tal-media minn persunaġġi tal-media u oligarki.

Is-sjieda tal-media għandha tkun trasparenti u r-rekwiżiti tat-trasparenza għandhom ikunu vinkolanti, għalkemm dan m’għandux iwassal għal piż amministrattiv eċċessiv għall-istabbilimenti żgħar tal-media. In-nuqqas ta’ indipendenza ta’ xi korpi regolatorji nazzjonali huwa inkwetanti wkoll. Jekk ma jkunux għalkollox indipendenti, dawn m’għandhomx jipparteċipaw fil-Bord Ewropew propost għas-Servizzi tal-Media.

Il-KESE enfasizza li, bħala regolament, l-Att Ewropew dwar il-Libertà tal-Media se jkollu effett dirett. Fl-istess ħin, staqsa jekk l-approċċ ta’ liġi mhux vinkolanti applikat fir-Rakkomandazzjoni huwiex mod effettiv biex jinkisbu l-objettivi tal-Att Ewropew dwar il-Libertà tal-Media.

“Sempliċi rakkomandazzjonijiet mhumiex biżżejjed biex jiggarantixxu l-libertà u d-diversità tal-media fl-Istati Membri. Il-media ħielsa u indipendenti trid tkun kriterju vinkolanti għar-rapport dwar l-istat tad-dritt u għall-iskattar tal-mekkaniżmu fl-Istati Membri fejn il-gvernijiet jiksru l-libertajiet u l-indipendenza tal-media”, ikkonkluda s-Sur Moos. (ll)

L-edukazzjoni tista’ tgħin biex tittrasforma s-soċjetajiet ibbażati fuq il-fjuwils fossili f’soċjetajiet ċirkolari u sostenibbli. F’Opinjoni fuq inizjattiva proprja adottata f’Diċembru, il-KESE jappella għal edukazzjoni trasformattiva li tawtomomizza ż-żgħażagħ biex jikkontribwixxu għat-tranżizzjoni ekoloġika.

Il-valuri umanistiċi għandhom ikunu fil-qalba tal-edukazzjoni għall-iżvilupp sostenibbli, b’enfasi fuq il-konsegwenzi ambjentali u soċjali tal-imġiba tal-bniedem. Dan jirrikjedi li l-edukazzjoni tiġi definita mill-ġdid, mill-preprimarja sal-università u lil hinn minnha.

“Is-sostenibbiltà mhijiex biss dwar l-ambjent. Hemm ħafna aspetti, u s-17-il Għan ta’ Żvilupp Sostenibbli huma kollha importanti b’mod ugwali. L-edukazzjoni taqdi rwol kruċjali peress li hija faċilitatur ewlieni għall-SDGs l-oħra kollha," qalet Tatjana Babrauskienė, relatur għall-Opinjoni tal-KESE: L-awtonomizzazzjoni taż-żgħażagħ biex jinkiseb żvilupp sostenibbli permezz tal-edukazzjoni.

Il-ħsieb kritiku u t-teħid ta’ deċiżjonijiet infurmati għandhom jiġu mgħallma fl-iskejjel, sabiex it-tfal ikunu kapaċi jindirizzaw kwistjonijiet ta’ żvilupp sostenibbli. Fil-livell bażiku, it-tfal għandhom jiġu mgħallma dwar l-enerġija, il-konsum u l-produzzjoni sostenibbli, it-tnaqqis tal-ħela tal-ikel u l-għażla responsabbli tal-ikel.

Ir-rapport dwar l-evalwazzjoni tal-iskema għall-iskejjel tal-UE li ġie adottat dan l-aħħar jagħmel rakkomandazzjonijiet addizzjonali dwar kif is-sistema skolastika tista’ tittejjeb fl-interess tal-iżvilupp sostenibbli. “It-titjib tal-miżuri tal-edukazzjoni dwar l-ikel, b’ħin allokat fil-klassi għal tagħlim dwar l-oriġini u l-valur tal-prodotti tal-ikel u ż-żjarat fl-irziezet u n-negozji agroalimentari, jista’ jagħmel l-iskema tal-iskejjel tal-UE aktar effettiva u jikkontribwixxi għall-edukazzjoni taż-żgħażagħ dwar ikel sostenibbli u tajjeb għas-saħħa,” qal ir-relatur Arnold Puech d’Alissac. Il-KESE appella wkoll għal użu aħjar tal-finanzjament għall-edukazzjoni għall-iżvilupp sostenibbli, bħall-Faċilità għall-Irkupru u r-Reżiljenza, Erasmus+, il-Fond Ewropew għall-Iżvilupp Reġjonali u l-Fond Soċjali Ewropew Plus.

L-implimentazzjoni tal-edukazzjoni għall-iżvilupp sostenibbli bħalissa tinsab fi stadji differenti fl-Istati Membri kollha u jeħtieġ li titfassal skont iċ-ċirkostanzi lokali.

“Ma rridux nitilfu ħin biex nittrasformaw l-edukazzjoni ħalli niżguraw futur sostenibbli fl-Istati Membri, u huwa essenzjali li ż-żgħażagħ, l-għalliema u l-ġenituri jiġu inklużi b’mod attiv fil-proċess,” qalet is-Sinjura Babrauskienė. (ks)

F’Opinjoni esploratorja reċenti, il-KESE qal li s-settur tat-teknoloġija marittima jeħtieġ b’mod urġenti politiki u investiment biex jaffronta l-kompetizzjoni internazzjonali. L-enfasi għandha titqiegħed fuq it-taħriġ tal-ħiliet, il-finanzi u l-aċċess għas-suq.

Jekk l-Ewropa tonqos milli timplimenta strateġija industrijali marittima speċifika, hemm ir-riskju li din issir dejjem aktar dipendenti fuq l-Asja għall-vapuri u t-tagħmir marittimu. Ħafna portijiet Ewropej diġà huma proprjetà, b’mod parzjali jew sħiħ, ta’ kumpaniji Ċiniżi. Strateġija sostenibbli għandha tivvaluta mill-ġdid din l-istruttura ta’ sjieda.

“Il-KESE jemmen li hija meħtieġa azzjoni immedjata biex tissaħħaħ ir-reżiljenza marittima tal-Ewropa, terġa’ tinkiseb il-kompetittività globali, tiġi protetta l-pożizzjoni b’saħħitha tal-Ewropa fil-bini kumpless tal-bastimenti u tiġi salvagwardjata l-awtonomija marittima strateġika tal-Ewropa,” qal Anastasis Yiapanis, relatur tal-Opinjoni tal-KESE.

Għandhom jiġu stabbiliti grupp ta’ esperti marittimi u alleanza industrijali Ewropea għas-settur tat-teknoloġija marittima biex jgħinu lis-settur jerġa’ jikseb il-kompetittività tiegħu.

Minkejja Opinjoni fuq inizjattiva proprja tal-KESE adottata fl-2018, L-istrateġija LeaderSHIP 2020 bħala viżjoni għall-industrija tat-teknoloġija marittima, li appellat għal appoġġ aktar qawwi għas-settur marittimu, l-awtoritajiet tal-UE u dawk nazzjonali naqsu milli jipprovdu l-politiki meħtieġa.

Il-KESE esprima tħassib dwar l-ostakli li qed jiffaċċjaw il-kumpaniji Ewropej li jixtiequ jagħmlu negozju fl-Asja. Huwa appella lill-Kummissjoni Ewropea biex tagħmel sforzi akbar biex tistabbilixxi regoli kummerċjali globali u qal li kien meħtieġ li taġixxi kontra s-sussidjar barrani u l-prezzijiet dannużi tal-bastimenti bħala kwistjoni ta’ prijorità.

Il-ftehimiet bilaterali eżistenti ta’ kummerċ ħieles għandhom jiġu aġġornati biex jiġi żgurat aċċess ħieles għas-suq għall-kumpaniji marittimi tal-UE u dan għandu jiġi inkluż fi ftehimiet futuri. Jekk in-negozjati internazzjonali biex jinkiseb dan ma jirnexxux, ikun meħtieġ li l-UE tqis azzjonijiet unilaterali biex jinħoloq vantaġġ fuq il-kompetituri internazzjonali tagħha.

Fl-Opinjoni tiegħu, il-KESE nnota wkoll ir-rwol importanti tal-industrija tat-teknoloġija marittima biex tinkiseb ekonomija blu sostenibbli.

“Il-KESE jappella għal miżuri urġenti li jistimulaw id-domanda domestika għal bastimenti ekoloġiċi u ta’ teknoloġija avvanzata, inklużi programm tal-UE għat-tiġdid tal-flotta u l-modifika retroattiva ta’ bastimenti eżistenti f’konformità mal-għanijiet”, qal il-korelatur Christophe Tytgat.

Il-KESE qal li l-imsieħba soċjali u l-manifatturi lokali kienu stennew għalxejn għall-istimolu biex is-settur jiġi mħeġġeġ jaqleb għal bastimenti “ekoloġiċi”, fjuwils alternattivi u teknoloġiji biex jikkonforma mal-pakkett “Lesti għall-mira ta’ 55 %”. Madankollu, huwa laqa’ l-adozzjoni tas-sħubija tat-Trasport fuq l-Ilma b’Emissjonijiet Żero, li qed taħdem lejn trasport marittimu b’emissjonijiet żero.

Il-KESE appella għal appoġġ finanzjarju aktar qawwi għall-Patt tal-UE għall-Ħiliet u għal kampanji biex is-settur isir aktar attraenti għall-ħaddiema kollha, minn inġiniera sa welders u elettriċisti.  Il-KESE qal li hemm bżonn ta’ taħriġ mill-ġdid, titjib tal-ħiliet u programmi VET fuq skala kbira biex jiġi żgurat li s-settur ikun jista’ jimplimenta t-tranżizzjonijiet ekoloġiċi u diġitali. (ks)

Huwa meħtieġ kuntratt soċjali ġdid għall-Amerka Latina, li jiżgura r-responsabbiltà politika, l-inklużjoni, il-protezzjoni soċjali u l-impjieg ta’ kwalità, qal il-KESE f’Opinjoni fuq inizjattiva proprja, adottata f’Diċembru li għadda, dwar is-sitwazzjoni soċjoekonomika wara l-COVID fl-Amerka Latina. Is-soċjetajiet ċivili organizzati b’mod liberu u demokratiku huma l-aħjar punt tat-tluq.

Il-pandemija tal-COVID-19 laqtet ħażin ħafna lill-Amerka Latina, u żvelat id-dgħufijiet tal-politiki implimentati għal għexieren ta’ snin, li ma kienux effettivi biex jiġu ffaċċjati l-isfidi attwali. L-invażjoni mir-Russja tal-Ukrajna ggravat it-turbulenza ekonomika billi fixxklet il-ktajjeb globali ta’ provvista u kkontribwixxiet għal żieda fl-inflazzjoni.

L-Opinjoni intitolata “Is-sitwazzjoni soċjoekonomika fl-Amerka Latina wara l-kriżi tal-COVID-19 – ir-rwol tas-soċjetà ċivili fil-proċess ta’ rkupru” tqis li r-reġjun jeħtieġ kuntratt soċjali ġdid, li jista’ jinkiseb permezz ta’ ftehimiet trasversali bejn il-gruppi soċjoekonomiċi, bejn it-territorji u bejn il-ġenerazzjonijiet.

Hu u jikkummenta dwar ir-rwol tas-soċjetà ċivili, il-membru tal-KESE u r-relatur tal-Opinjoni, Josep Puxeu Roamora, enfasizza li “l-Ewropa u l-Amerka Latina huma impenjati għad-demokrazija u l-istat tad-dritt, u dan ifisser li s-soċjetà ċivili se tkun involuta b’mod attiv, u taqdi rwol ta’ tmexxija fl-iżvilupp u biex jiġu ffaċċjati l-kriżijiet, waqt li tippromovi d-djalogu neċessarju għal kuntratt soċjali ġdid”.

Europe needs to strengthen its bonds with Latin America, especially focusing on the social, green and digital transitions. "We urgently need to invest in more efforts to build alliances with like-minded partners in Latin America," said Mr Puxeu Rocamora. "We have taken this relationship for granted for too long. We have to make an effort to catch up as we are facing strong competition from other actors right now".

This alliance requires the full recognition and participation of its organised civil societies, human rights organisations, trade union and business organisations, and environmental associations, said the EESC. (at)

F’laqgħa tal-KESE li saret fi Stokkolma fil-15 ta’ Diċembru, is-Segretarju tal-Istat għall-Affarijiet tal-UE tal-Iżvezja, Christian Danielsson, iddeskriva d-direzzjoni politika tal-Presidenza Żvediża li jmiss tal-Kunsill tal-UE, li talbet lill-KESE jipprovdi kontribut dwar sitt kwistjonijiet ewlenin.

Il-KESE sar jaf li fost it-temi ewlenin tal-Presidenza Żvediża tal-Kunsill tal-Unjoni Ewropea minn Jannar sa Ġunju 2023 se jkun hemm l-appoġġ lill-Ukrajna u enfażi fuq it-tranżizzjoni ekoloġika u l-kompetittività tal-UE.

Waqt laqgħa tal-Bureau – il-korp tat-tmexxija tal-KESE – li saret fi Stokkolma fil-15 ta’ Novembru 2022, il-President tal-KESE, Christa Schweng, enfasizzat li, bl-isfidi kollha tal-futur, l-UE tista’ tirnexxi biss jekk tinvolvi b’mod kontinwu lill-orgranizzazzjonijiet tas-soċjetà ċivili Ewropea.

Hija qalet li “meta titqies il-prospettiva ekonomika negattiva għall-Ewropa, hemm bżonn li jiġu stabbiliti prijoritajiet korretti u ċari. L-iżgurar tal-irkupru u l-appoġġ għan-negozji u n-nies li qed jaffaċċjaw rata għolja ta’ inflazzjoni u prezzijiet partikolarment għoljin tal-enerġija huma ta’ importanza ewlenija għall-ekonomiji tagħna, għas-soċjetajiet tagħna u għad-demokraziji tagħna”.

Christian Danielsson, Segretarju tal-Istat fil-Ministeru għall-Affarijiet Barranin tal-Iżvezja, qal li “m’għandniex ninsew il-fatt li l-prijoritajiet huma importanti, iżda l-kompitu prinċipali tal-presidenza huwa l-presidenza nnifisha: li nimxu ’l quddiem u niksbu riżultati li huma tajbin għaċ-ċittadini, għall-Istati Membri u għall-Ewropa. Se nagħmlu l-isforzi kolha biex niksbu dan.”

Is-Sur Danielsson enfasizza li l-Presidenza Żvediża se tkompli tgħin lill-Ukrajna bl-assistenza umanitarja u se tiffoka fuq it-titjib tal-prestazzjoni u l-kompetittività tal-ekonomija tal-UE.

B’mod aktar speċifiku, il-Presidenza Żvediża se tiffoka fuq:

• it-tħaffif tat-tranżizzjoni klimatika
• it-tisħiħ tal-kompetittività tal-UE għall-impjiegi tal-
• is-salvagwardja tal-valuri fundamentali tal-UE
• il-provvista ta’ sigurtà għaċ-ċittadini tal-UE u t-tisħiħ tar-rwol tal-UE fid-dinja
• il-ġlieda kontra l-kriminalità organizzata.

Il-Presidenza Żvediża talbet lill-KESE biex jipprovdi l-kontribut u l-għarfien espert tiegħu dwar is-suġġetti li ġejjin, fil-forma ta’ “opinjonijiet esploratorji”.

• It-30 sena mis-suq uniku: Kif jista’ jittejjeb aktar il-funzjonament tas-suq uniku?
• It-tranżizzjoni lejn sistema tat-trasport sostenibbli fit-tul
• Ir-rwol taż-żgħażagħ fit-tranżizzjoni ekoloġika
• Il-vantaġġi tal-kostruzzjoni industrijali moderna tal-injam
• It-tisħiħ ulterjuri tal-kompetittività diġitali tal-UE
• Il-kompetenza u l-iżvilupp tal-ħiliet f’kuntest ta’ tranżizzjoni ekoloġika u diġitali

Hemm aktar informazzjoni fl-aħħar fuljett tal-KESE, intitolat “The EESC's activities during the Swedish presidency” (L-attivitajiet tal-KESE matul il-Presidenza Żvediża), li huwa disponibbli fis-sit web tagħna. Il-fuljett ġie ppubblikat bl-Ingliż, bl-Iżvediż, bil-Franċiż u bil-Ġermaniż. (mp/dm)