KESE info

Il-President iwiegħed li se jagħmel lill-Kumitat Ekonomiku u Soċjali Ewropew l-istituzzjoni ta’ għażla għad-djalogu demokratiku u jiftaħ il-bibien tiegħu għall-pajjiżi ta’ adeżjoni mal-UE.

Il-KESE ħatar lill-Awstrijak Oliver Röpke bħala l-34 president fil-65 sittin sena ta’ storja tiegħu. Eks kap tal-uffiċċju ta’ Brussell tal-Federazzjoni Awstrijaka tat-Trade Unions (ÖGB) u l-aktar President reċenti tal-Grupp tal-Ħaddiema tal-KESE, is-Sur Röpke se jmexxi l-korp tal-UE li jirrappreżenta s-soċjetà ċivili organizzata għas-sentejn u nofs li ġejjin.

Il-membru Pollakk Krzysztof Pater u l-membru Rumen Aurel Laurenţiu Plosceanu jingħaqdu miegħu fit-tmexxija tal-KESE bħala Viċi President għall-baġit u bħala Viċi President għall-Komunikazzjoni rispettivament. Bit-tiġdid tal-presidenza tal-KESE f’nofs il-mandat, is-Sur Röpke se jkompli fejn ħalliet il-kompatrijotta tiegħu Christa Schweng, li mexxiet il-Kumitat fl-ewwel nofs tal-mandat 2020–2025.

Bħala promotur tad-drittijiet tal-ħaddiema, is-Sur Röpke huwa determinat li jikkonsolida r-rwol tal-KESE bħala forum għal djalogu bejn firxa wiesgħa ta’ atturi, u jaqdi rwol ewlieni fit-tiswir tal-politiki tal-UE u biex terġa’ tinkiseb il-fiduċja taċ-ċittadini fil-proġett tal-UE.

Matul il-mandat li jmiss, se nsaħħaħ ir-rwol uniku tal-KESE bħala interfaċċa bejn iċ-ċittadini, is-soċjetà ċivili u l-istituzzjonijiet tal-UE, u naġixxi bħala pjattaforma reali għal dibattitu onest u inklużiv. Se nkun f'kuntatt mal-imsieħba tagħna fil-Balkani tal-Punent u fil-viċinat tal-Lvant biex inrawwem kooperazzjoni aktar mill-qrib, u f'kuntatt maż-żgħażagħ biex niżguraw li qed nibnu l-futur li jixtiequ jgħixu fih – inklużiv, prosperu u demokratiku”, qal il-President.

Għall-presidenza tiegħu, is-Sur Röpke għażel il-motto “Niddefendu d-demokrazija, insemmgħu leħinna favur l-Ewropa”. L-erba’ pilastri tal-programm tiegħu – il-Manifest – jinkorporaw il-viżjoni tiegħu ta’ Ewropa aktar soċjali u rappreżentattiva li tilħaq ukoll lill-ġirien tagħha biex tgħinhom iwittu t-triq lejn futur aktar stabbli u paċifiku. Il-pilastri huma d-difiża tad-demokrazija f’darna stess u lil hinn minna u li nsemmgħu leħinna favur l-Ewropa billi nagħmlu l-KESE aktar rappreżentattiv; u billi nsaħħu l-kwalità tas-sensibilizzazzjoni tal-KESE u tal-ħidma li tħares ’il quddiem tiegħu.

Il-manifest jinkludi lista ta’ azzjonijiet li l-President il-ġdid beħsiebu jimplimenta matul il-mandat tiegħu. Fost l-oħrajn, dawn jinkludu l-ħatra ta’ membri onorarji tat-tkabbir mill-pajjiżi tal-adeżjoni mal-UE biex jinvolvuhom fil-ħidma konsultattiva ta’ kuljum tal-KESE, u parteċipazzjoni robusta tal-KESE f’kampanji u attivitajiet biex tiżdied il-parteċipazzjoni tal-votanti fl-elezzjonijiet Ewropej tal-2024. L-enfasi se tkun ukoll fuq l-involviment taċ-ċittadini, b’mod partikolari ż-żgħażagħ, fl-UE permezz ta’ panels taċ-ċittadini u forom oħra ta’ parteċipazzjoni. (ll)

Bħala membru tal-Grupp ta’ Min Iħaddem tal-KESE, is-Sur Plosceanu huwa l-president tal-Assoċjazzjoni Rumena tal-Intraprendituri tal-Kostruzzjoni (ARACO) u viċi president tal-Unjoni Ġenerali tal-Industrijalisti Rumeni (UGIR).

Huwa ġie elett fis-sessjoni plenarja tat-tiġdid ta’ nofs it-terminu fis-26 ta’ April 2023.

“Ninsab kuntent ħafna nassumi din ir-responsabbiltà, li għaliha jien impenjat bis-sħiħ”, huwa qal. “Illum il-ġurnata qed niffaċċjaw sfidi multipli u rridu nkunu kapaċi nikkomunikaw b’mod effettiv dak li nagħmlu fil-livell tal-UE u nsemmgħu l-vuċi tas-soċjetà ċivili organizzata tal-UE”.

Is-Sur Plosceanu, li ilu membru tal-KESE minn meta r-Rumanija ssieħbet fl-UE fl-2007, kien president tas-Sezzjoni għax-Xogħol, l-Affarijiet Soċjali u ċ-Ċittadinanza (SOC) għall-ewwel nofs tal-mandat attwali u huwa kopresident tal-Kumitat Konsultattiv Konġunt UE-Serbja.

Huwa għandu kwalifiki fl-inġinerija teknika (Università Teknika tal-Inġinerija Ċivili ta’ Bukarest) u l-liġi (Università Nicolae Titulescu ta’ Bukarest), kif ukoll eMBA fl-ekonomija (INDE) u lawrja postgradwatorja fid-difiża (Kulleġġ tad-Difiża Nazzjonali Rumen). (mp)

L-eks Ministru Pollakk għall-Politika Soċjali u l-President attwali tal-Assoċjazzjoni Pollakka tal-Iscouting u l-Guiding (ZHP), is-Sur Pater ġie elett għall-kariga fis-26 ta’ April mill-assemblea plenarja tal-KESE, li tagħha ilu membru attiv ħafna mill-2006.

Waħda mill-ogħla prijoritajiet tas-Sur Pater, bħala r-responsabbli għall-infiq tal-Kumitat, se tkun li jsaħħaħ ir-reżiljenza tiegħu, bħala istituzzjoni demokratika, għat-theddid u l-influwenza ostili.

“Mill-invażjoni tar-Russja fl-Ukrajna ’l hawn, ma kienx hemm biss bidla drammatika fix-xenarju ekonomiku, li hija sors ta’ inċertezza kbira fl-ippjanar ta’ ħafna mill-infiq tal-Kumitat, iżda wkoll fis-sitwazzjoni ġeopolitika globali”, qas is-Sur Pater. “Dan jagħmilha aktar importanti minn qatt qabel li ninvestu biex is-sistemi demokratiċi eżistenti jkunu jistgħu jipproteġu aktar id-drittijiet fundamentali u jsaħħu l-istabbiltà tagħhom stess.”

Fil-Polonja, Krzysztof Pater kellu rwol prominenti fir-riforma tas-sistema Pollakka tal-pensjonijiet lejn l-aħħar tad-disgħinijiet, u għen fit-tiswir tal-kunċett tal-pilastri ta’ finanzjament. Huwa sar Sottosegretarju tal-Istat għax-Xogħol u l-Politika Soċjali fl-2001 u Ministru għall-Politika Soċjali fl-2004.

Ippremjat bis-Salib tad-Deheb tal-Mertu mill-President tal-Polonja għax-xogħol edukattiv tiegħu mat-tfal u ż-żgħażagħ, is-Sur Pater ilu membru attiv tal-Assoċjazzjoni tal-Iscouting ZHP għal aktar minn 45 sena u bħalissa huwa l-president tagħha.

Fil-KESE kien president tas-Sezzjoni għall-Unjoni Ekonomika u Monetarja u l-Koeżjoni Ekonomika u Soċjali (2008-2010), u president tal-Osservatorju tas-Suq tax-Xogħol (2010-2013 u 2018-2020).

Ir-rapporti tiegħu mexxew kampanji biex jiżguraw li l-persuni b’diżabilità jkunu jistgħu jeżerċitaw b’mod effettiv id-dritt tagħhom li jivvutaw madwar l-UE fl-elezzjonijiet Ewropej. Huwa kien ukoll favur ir-rikonoxximent tal-valur soċjali u ekonomiku enormi tal-volontarjat, li huwa tenna fid-diskors ta’ aċċettazzjoni tiegħu: “L-attività volontarja salvat il-ħajja ta’ eluf ta’ ċittadini tal-Unjoni Ewropea matul il-pandemija tal-COVID-19 u żgurat li mijiet ta’ eluf ta’ refuġjati mill-Ukrajna setgħu jiksbu l-għajnuna li kellhom bżonn. Nittama ħafna li l-Kummissjoni Ewropea tirrikonoxxi wkoll l-isforzi tagħhom billi tagħmel l-2025 is-Sena Ewropea tal-Volontarjat, kif il-Kumitat tagħna talab. (dm)

Jinbidlu l-mexxejja ewlenin kollha tal-KESE għat-tieni nofs tal-mandat tiegħu, li jibda minn April 2023 sa Settembru 2025

Minbarra l-President, iż-żewġ Viċi Presidenti u l-Bureau, il-KESE ħatar ukoll presidenti ġodda għas-sitt Sezzjonijiet tiegħu (SOC, ECO, INT, NAT, TEN u REX), u għall-Kummissjoni Konsultattiva dwar il-Bidliet Industrijali (CCMI).

Il-President u ż-żewġ Viċi Presidenti jiġu eletti b’maġġoranza sempliċi matul is-sessjoni inawgurali tal-Assemblea. Huma jintgħażlu minn kull wieħed mit-tliet gruppi tal‑KESE (il‑Grupp ta’ Min Iħaddem, il‑Grupp tal‑Ħaddiema u l-Grupp tal-Organizzazzjonijiet tas-Soċjetà Ċivili) b’rotazzjoni, għal mandat ta’ sentejn u nofs.

Il-President huwa responsabbli għall-funzjonament tajjeb tal-attivitajiet tal-Kumitat, u jirrappreżenta lill-KESE fir-relazzjonijiet tiegħu mal-istituzzjonijiet u l-korpi l-oħra.

Iż-żewġ Viċi Presidenti – eletti miż-żewġ gruppi li l-President ma jkunx jappartjeni għalihom – huma responsabbli għall-komunikazzjoni u l-baġit rispettivament.

Il-Bureau huwa l-korp li jieħu d-deċiżjonijiet politiċi fil-KESE. Il-kompitu ewlieni tiegħu huwa li jistabbilixxi l-objettivi, l-istrateġiji u l-prijoritajiet tal-KESE fl-oqsma kollha u li jiddetermina l-programm ta’ ħidma tiegħu. Il-Bureau huwa magħmul mill-President, miż-żewġ Viċi Presidenti, mill-presidenti tat-tliet Gruppi, mill-presidenti tas-Sezzjonijiet u tas-CCMI, u jinkludi wkoll għadd varjabbli ta’ membri li ma jaqbiżx l-għadd ta’ Stati Membri.

Il-KESE huwa magħmul minn 329 membru mis-27 Stat Membru. Dawn jiġu nominati mill-gvernijiet nazzjonali u jinħatru mill-Kunsill tal-Unjoni Ewropea għal perjodu ta’ ħames snin. Huma mbagħad jaħdmu b’mod indipendenti fl-interess taċ-ċittadini kollha tal-UE. Dawn il-membri mhumiex politiċi iżda impjegaturi, trejdjunjonisti u rappreżentanti ta’ setturi tas-soċjetà differenti, bħall-biedja, l-organizzazzjonijiet tal-konsumaturi u dawk ambjentali, l-ekonomija soċjali, l-SMEs, il-professjonisti, u l-assoċjazzjonijiet li jirrappreżentaw persuni b’diżabbiltà, is-settur tal-volontarjat, l-ugwaljanza bejn il-ġeneri, iż-żgħażagħ, il-qasam akkademiku u oħrajn. (ll/dm)