Passaport għad-Demokrazija Ewropea

L-Inizjattiva taċ-Ċittadini Ewropej fil-KESE

Matul il-perjodu inizjali tal-Inizjattiva taċ-Ċittadini Ewropej, il-KESE kien minn tal-ewwel biex joħloq infrastruttura ta’ appoġġ informali għaċ-ċittadini attivi madwar l-UE, inklużi konsulenza ġenerali, għajnuna fit-traduzzjoni u organizzazzjoni ta’ seduti fil-KESE għall-IĊE li jkunu qed jitfasslu. Il-biċċa l-kbira ta’ dawn is-servizzi issa huma parti mill-obbligi regolatorji meħtieġa mill-istituzzjonijiet tal-UE bħall-Parlament Ewropew u l-Kummissjoni Ewropea.

Bħala l-iżjed istituzzjoni ta’ appoġġ għaċ-ċittadini esperjenzata tal-Unjoni, il-KESE jkompli jipprovdi informazzjoni, gwida u pjattaformi lill-organizzazzjonijiet tas-soċjetà ċivili u lill-gruppi ad hoc ta’ ċittadini attivi impenjati li jagħmlu lill-Ewropa post aktar soċjali u demokratiku fid-dinja.

Mill-2012 ’l hawn, il-KESE ospita l-konferenza annwali, Jum l-Inizjattiva taċ-Ċittadini Ewropej (magħruf fil-qosor bħala Jum l-IĊE) fi Brussell, li toffri punt fejn jiltaqgħu b’mod miftuħ u liberu l-professjonisti u l-attivisti tal-IĊE fl-Ewropa.

Barra minn hekk, il-KESE jistieden lill-IĊE ta’ suċċess jew kważi ta’ suċċess għas-sessjonijiet plenarji tiegħu u lill-IĊE li għadhom għaddejjin għal-laqgħat tas-sezzjonijiet u tal-gruppi tiegħu bħala forma ta’ kontribut biex jiżdied id-djalogu bejn iċ-ċittadini u l-istituzzjonijiet tal-UE u biex l-inizjattivi jsiru magħrufa aħjar fl-isfera pubblika Ewropea. Dawn l-istediniet inkludew l-inizjattivi Projbizzjoni tal-glifosat (Ban Glyphosate) (2017), Minority SafePack (2018), Inwaqqfu l-estremiżmu (Stop Extremism) (2019), End the Cage Age, Eat ORIGINal! Unmask your Food (2020), Insalvaw lin-naħal u lill-bdiewa! (Save Bees and Farmers) (2022) u Fur Free Europe (2023).

Minbarra din il-verżjoni elettronika tal-Passaport għad-Demokrazija Ewropea tal-KESE, hemm ukoll verżjoni stampata li hija disponibbli b'24 lingwa, kif ukoll għadd ta’ pubblikazzjonijiet u servizzi oħra.

Demokrazija Parteċipattiva

• Is-Citizens’ App tal-Parlament Ewropew hija applikazzjoni online għall-ismartphones li toffri informazzjoni dwar suġġetti u postijiet ta’ interess għalik. Din tinformak dwar avvenimenti li se jsiru viċin tiegħek; iżżid il-favoriti tiegħek fil-kalendarju personali tiegħek; turik l-aħjar rotta permezz tal-applikazzjoni tal-mapep favorita tiegħek; tipprovdi kontenut multimedjali bħal vidjows, podcasts u slideshows; tista’ tfittex u taqsam kontenut; u tista’ tiġi ppersonalizzata u kklassifikata. Disponibbli fl-Apple Store u f’Google Play b’24 lingwa.
• Id-Democracy Community hija network transnazzjonali ta’ sostenituri tad-demokrazija ospitat minn Democracy International. Il-pjattaforma hija miftuħa għal kulħadd għal skopijiet ta’ informazzjoni, edukazzjoni u networking u toffri stejjer parteċipattivi u opportunitajiet ta’ avvenimenti. Tista’ tirreġistra ruħek/l-organizzazzjoni/l-istituzzjoni tiegħek u toħloq profil li juri li tappoġġja d-demokrazija.
• Is-Servizz ta’ Azzjoni għaċ-Ċittadini Ewropej huwa organizzazzjoni internazzjonali bi sħubija pan-Ewropea. Il-missjoni tal-organizzazzjoni hija li tissaħħaħ il-pożizzjoni taċ-ċittadini sabiex tinħoloq Unjoni Ewropea aktar inklużiva u b’saħħitha billi tippromovi u tiddefendi d-drittijiet taċ-ċittadini u tiżviluppa u tappoġġja mekkaniżmi li jżidu l-parteċipazzjoni demokratika taċ-ċittadini u tal-organizzazzjonijiet taċ-ċittadini fl-UE u flimkien magħha.
• Il-pjattaforma Participo pprovduta mill-OECD (l-Organizzazzjoni għall-Kooperazzjoni u l-Iżvilupp Ekonomiċi). Hawnhekk tista’ ssib kull xorta ta’ informazzjoni dwar ir-riċerka u l-prattika tad-demokrazija parteċipattiva u diretta fil-livelli politiċi kollha. Il-pjattaforma hija parti mill-isforz tal-OECD li teżamina l-bidliet fil-ħsieb fundamentali li qed isiru mill-idea ta’ gvern rappreżentattiv tradizzjonali għal demokrazija rappreżentattiva moderna.